Mataupu 23

“Ia Malolosi O Outou Siteki”

“O siteki ma itu o Siona o ni faatusa ia o nofoaga paia ia na fetalai le Alii e tatau ona faapotopoto i ai Lana Au Paia i aso e gata ai e avea o se sulufaiga mai le afā.”

Mai le Soifuaga o Ezra Taft Benson

I le aso 13 o Ianuari, 1935, na lagolagoina ai e le au paia o le Siteki a Boise Idaho ia Ezra Taft Benson i le 35 tausaga o lona soifua, e avea ma fesoasoani muamua i le au peresitene o le siteki. I lalo o le taitaiga a Peresitene Scott S. Brown, na maua ai e Peresitene Benson ni avanoa se tele e auauna atu ai, taitai, ma aoao atu. Mo se faataitaiga, sa fesoasoani tele o ia i se alii o le au Perisitua Mekisateko ia toe malosi i le Ekalesia,¹ ma sa fesoasoani o ia e taitai taumafaiga a le siteki e faatino le polokalama uelefea a le Ekalesia.²

I le 1938 na faatupulaia ai le siteki i le silia ma le 8,000 ona tagata, o lea na faatonuina ai e le Au Peresitene Sili ia vavaeina i ni siteki se tolu. Fai mai Peresitene Benson sa “faateia” o ia ina ua oo i le aso 27 o Novema, 1938, ae valaauina o ia e pulefaamalumalu i se tasi o na siteki. Sa ta’u atu e lona faletua o Flora, i le la fanau, o se faamanuiaga mo lo latou tama le maua o lenei valaauga.³

O le auaunaga a Peresitene Benson o se peresitene o le siteki o se faamanuiaga mo le siteki atoa. Sa faaauau ona ia aoao atu mataupu faavae o le uelefea, ma sa ia tuuina atu se tuuto faapitoa i le autalavou. A o le’i amataina se sauniga o se tasi o konafesi faalesiteki, sa ia matauina ai se vaega o alii talavou o taumafai e sosola ese mai le falelotu. “Sa amata ona latou savavali malie atu i tua o le falefaafiafia agai i le faitotoa pito i tua, a o tau fai autilo atu i le faapaologa o le falelotu ina ia mautinoa ai e le o iloa mai lo latou o ese. Ma o le taimi tonu foi lena na laa mai ai i fafo o [ia] mai lona ofisa, mafaufau i le mea o loo tupu, ma faaloaloa atu ona lima i le falefaafiafia ina ia maua lelei le aualii ia. Sa faapea atu o ia, ‘Ua ou fiafia lava e vaai atu ia te outou alii. Tatou o faatasi i le konafesi.’ Sa ia taitai atu i latou i le nofoaumi pito i luma, ma mulimuli ane, na ia valaauina i latou e tuuina atu ni a latou molimau.”⁴

E le’i atoa le lua masina talu ona amata auauna Peresitene Benson o se peresitene o le siteki, ae oo atu se isi mea na faate’ia ai foi o ia. Sa ofoina atu ia te ia se galuega o le failautusi faapitoa o le Fono a Faalapotopotoga Faifaatoaga a le Malo, lea na manaomia ai o ia e faigaluega i Uosigitone D.C. O le taimi muamua sa ia teena ai le ofo, ae ina ua uma ona soalaupule ma Flora ma le Au Peresitene Sili, na ia filifili loa e talia.⁵ Ina ua faamaloloina o ia mai le avea ma se peresitene o le siteki i le aso 26 o Mati, 1939, sa ia tusia e faapea, o se “aso sili lea ona faigata na ou oo i ai. … I la’u tautalaga [i tagata o le siteki] sa matuai faamanuiaina a’u e le Alii, ae sa matuai faigata lava ona taofiofi o’u lagona. E leai ni tagata e sili atu ona lelei i le lalolagi atoa [ma] ou te alofa ia i latou uma.”⁶

Sa siitia atu le au Benson i Bethesda, Maryland, e latalata i Uosigitone, D.C. I le silia teisi ma se tausaga mulimuli ane, na asiasi atu ai Peresitene Rudger Clawson, le Peresitene o le Korama a Aposetolo e Toasefululua, ma Elder Albert E. Bowen, o se uso foi o le Korama a le Toasefululua, i le eria e faatulaga se siteki fou. Sa feiloai Peresitene Clawson ia Ezra Taft Benson ma fai atu i ai, “Uso Benson, ua finagalo le Alii e te peresitene i le siteki lenei. O le a sau tala e uiga i lena mea?” Ma sa toe faateia foi Peresitene Benson. Sa ia fai mai, “Ou te le masani i nei tagata. E le’i leva ona atoa le tausaga talu ona ou nofo iinei.”⁷ Peitai, sa ia taliaina ma le lotomaualalo le valaauga ma pulefaamalumalu ai i le tusa ma le 2,000 tagata o le siteki i se siteki e telē lona tuaoi. Sa saunoa Flora e uiga i lana auaunaga i le avea ai o se peresitene o le siteki: “E ese le fiafia i ai. E le taua ia te ia le faalagiga o le tofiga, ae o le olioli i le mafai ona fesoasoani atu i ni tagata se toatele ia iloa le moni o le talalelei.”⁸

Mulimuli ane, a o avea ma se Aposetolo, sa asiasi atu ai Peresitene Benson i siteki i le lalolagi atoa. Na saunoa o ia: “O nisi taimi ou te fai atu ai i lo’u toalua, pe a ou fo’i mai mai asiasiga i siteki, ou te le iloa lelei pe o le a faape’ī le lagi, ae e leai se isi mea manaia atu ou te manao i ai iina nai lo o le maua o le faamalieina ma le olioli i fegalegaleaiga ma ituaiga o alii ma tamaitai ou te feiloai i ai i autaitai o siteki ma uarota o Siona ma misiona o le lalolagi. E moni lava ua matuai faamanuiaina i tatou.”⁹

Ward council members being taught using the Worldwide Leadership Training video. — O se tasi o faamoemoega o se siteki o le “faatasia lea ma faaatoatoaina le au paia … e ala i le faaoo atu ia i latou o polokalama o le Ekalesia, sauniga, ma aoaoga o le talalelei.”

Aoaoga a Taft Benson

I le avea ai ma tagata o le Ekalesia, tatou te faapotopoto ai i siteki o Siona.

O nisi taimi e fesili mai ai tagata e le auai i le ekalesia, “O le a lena mea o le siteki?” E faapena foi ona fesili tagata o le ekalesia, “O le a se taua o se siteki? O le a lona uiga ia i tatou o tagata o le ekalesia?”

I tagata e le auai i le ekalesia, o le siteki e talitutusa lava ma se matagaluega i isi ekalesia. O se siteki o se eria i se faataatiaga faafaafanua ua i ai ni uarota (aulotu i le lotoifale) ma e pulefaamalumalu ai se au peresitene.

I tagata o le ekalesia, o le upu siteki o se faaupuga faafaatusa. Vaai faalemafaufau i se faleie tele lava, e faatu i luga i ni maea e tatoso atu i ni fao po o ni pine taofi se tele (ua ta’ua o siteki) ia e tu’i faamau lelei i le palapala. Ua faatusalia e perofeta ia Siona i aso e gata ai i se faleie telē lava o loo siomia ai le lalolagi [tagai Isaia 54:2; 3 Nifae 22:2]. O lena faleie ua taofiofia e maea ua nonoa mau i pine po o siteki ua tu’i i le palapala. O na siteki, e moni lava, o faalapotopotoga eseese faafaafanua ua salalau solo i le lalolagi. O le taimi nei o loo faapotopoto atu Isaraelu i siteki eseese o Siona.¹⁰

O se siteki e i ai ona faamoemoega e le itiiti ifo ma le fa:

1. O siteki taitasi, e pulefaamalumalu ai ni faitaulaga sili se toatolu, ae lagolagosua i ai ni tamalii se toasefululua e ta’ua o fautua maualuga, o le faatusa o le ekalesia atoa i le Au Paia e i totonu o se eria patino ua faataatia faafaafanua. O le faamoemoega ia faatasia ma faaatoatoaina le au paia o e o alala i totonu o na tuaoi e ala i le faaoo atu ia i latou o polokalama o le Ekalesia, ma aoaoga o le talalelei.

2. E ao i tagata o le siteki ona avea ma ni faataitaiga po o ni tagavai o le amiotonu.

3. O siteki e ao ona avea o se puipuiga. E fai e tagata o le ekalesia lenei mea a o latou aufaatasi i lalo o o latou taitai perisitua i le lotoifale ma faapaia i latou lava e fai lo latou tiute ma tausi a latou feagaiga. O na feagaiga, pe a tausia, o le a avea ma se puipuiga mai mea sese, amioleaga, po o mala.

E na o nofoaga lava e i ai o tatou siteki tatou te fausia ai malumalu. O faamanuiaga ma sauniga o le malumalu e sauniuni ai se tasi mo le faaeaga. Ioe, e le mafai e siteki uma ona tofu ma se malumalu, ae ua tatou molimauina i le taimi nei ni atinae mataina, ioe, e ofoofogia, i le fausiaina o malumalu i itu eseese o le lalolagi. O polokalama faapena e mafai ai e tagata o le Ekalesia ona maua le atoatoaga o faamanuiaga a le Alii.

4. O siteki o se sulufaiga mai le afa lea o le a sasaa mai i luga o le lalolagi atoa.¹¹

Ua faatulagaina siteki e fesoasoani ai i matua e aoao le talalelei ma taitai atu a latou fanau i sauniga o le faaolataga.

I le Mataupu Faavae ma Feagaiga tatou te faitauina:

“O lenei foi, o le tulaga e oo i ai le i ai o matua e fai fanau i Siona, po o i soo se tasi o ona siteki ua faatulagaina, ae latou te le aoaoina i latou ia malamalama i le mataupu faavae o le salamo, faatuatua ia Keriso le Alo o le Atua soifua, ma e uiga i le papatisoga ma le meaalofa o le Agaga Paia e ala i le faaee o lima, pe a valu tausaga le matutua, ia i ai le agasala i luga o ulu o matua. Aua o le a avea lenei mea o se tulafono i e nonofo i Siona, po o soo se tasi o ona siteki ua faatulagaina.” (68:25–26; faaopoopo le faatusilima.)

O i e te vaaia ai se tasi o faamoemoega autu o siteki. Ua faatulagaina e fesoasoani i matua “e fai fanau i Siona” e aoao ia i latou le talalelei a Iesu Keriso, ma faatautaia sauniga o le faaolataga. E faatutuina ia siteki e faaatoatoa ai le Au Paia, ma o le atinaega e amata i totonu o le aiga i aoaoga mataalia o le talalelei.¹²

A o atagia mai i amioga a tagata o le ekalesia ia tulaga faatonuina a le Alii o le paia, e avea le siteki ma se faatusa matagofie e vaai uma mai i ai le lalolagi.

Ua fetalai le Alii” “Aua e ao ina faateleina Siona i le matagofie, ma i le paia; o ona tuaoi e ao ina faalauteleina; o ona siteki e ao ina faamalolosia; ioe, e moni Ou te fai atu ia te outou, e ao ina tulai Siona ma ofu i ona ofu matagofie.” (Mataupu Faavae ma Feagaiga 82:14.)

O i lea o loo folafola mai ai e le Alii le isi faamoemoega taua o se siteki: ia avea ma se faatusa matagofie e vaai uma i ai le lalolagi. O le faaupuga “ofu i ona ofu matagofie” e faatatau moni lava i le paia o totonu o le loto lea e tatau lava ona maua e tagata uma o le ekalesia e ta’ua o ia lava o se tagata o le Au Paia. O Siona o “e loto mama.” (Mataupu Faavae ma Feagaiga 97:21.)

E faamalolosia ia siteki o Siona, ma o tuaoi o Siona e faalauteleina, a o susulu atu i amioga o tagata o le au paia le tagavai o le paia lea ua faamoemoeina e le Alii mai Lona nuu filifilia.¹³

O siteki taitasi e avea o se puipuiga ma se sulufaiga mai fili vaaia ma lē vaaia.

Ae o le isi faaaliga mai le Alii ua tuuina mai ai lenei faamalamalamaga o le faamoemoega o siteki: “E moni ou te fai atu ia te outou uma: Tutulai ia ma susulu atu, ina ia avea lo outou malamalama ma tagavai mo atunuu; ma ina ia avea le faapotopotoina faatasi i luga o le laueleele o Siona, ma i luga o ona siteki, mo se puipuiga, ma mo se sulufaiga mai le afa, ma mai le toasa pe a sasaa mai e aunoa ma le suia i luga o le lalolagi atoa.” (Mataupu Faavae ma Feagaiga 115:5–6.)

I lenei faaaliga o loo i ai se poloaiga ia faasusulu atu lo tatou malamalama ina ia avea ma se tagavai mo atunuu. O se tagavai o se ālā fua e mafai ai e se tasi ona iloa le sa’olele po o le atoatoa. O le Au Paia e ao ona avea ma tagavai o le paia e vaai atu i ai le lalolagi. O le matagofie lena o Siona.

Ona faaali mai lea e le Alii e faapea, o siteki o Siona e tatau ona avea “ma se puipuiga, ma mo se sulufaiga mai le afa, ma mai le toasa pe a sasaa mai e aunoa ma le suia i luga o le lalolagi atoa.” O siteki o se puipuiga lea mo le Au Paia mai fili e vaaia ma lē vaaia. O le puipuiga o faatonuga ia e tuuina mai e ala mai i le taitaiga faaleperisitua e faamalosia ai molimau ma siitia ai le lotogatasi o le aiga ma le amiotonu o le tagata.

I Lana fetalaiga tomua i Ana faaaliga i le Mataupu Faavae ma Feagaiga, sa lapatai mai ai le Alii: “Ua vave ona oo mai o le aso; e le’i oo mai le itula, ae ua latalata mai lava, le taimi o le a aveesea ai le filemu mai le lalolagi, ma o le a maua ai e le tiapolo le mana i luga o lana lava pulega” [Mataupu Faavae ma Feagaiga 1:35].

O aso nei … ua tatou vaaia ai le faataunuuga o lenei valoaga lea ua faaali ai e Satani, i le ita e le faaitiitia, le mana i luga o “lana lava pulega”—le lalolagi. E le’i i ai se taimi muamua ua matuai malosi ai ana faatosinaga, ma e na o i latou o e ua avea le Agaga Paia e fai ma o latou taiala—ma mulimuli i fautuaga mai taitai perisitua—o le a faasaoina mai le faataumaoi o ana faatosinaga faatiapolo.

O loo fetalai mai foi le Alii i lena faaaliga tomua, o le a i ai Lona mana i luga o Lana Au Paia, “ma o le a nofotupu i lo latou lotolotoi” [Mataupu Faavae ma Feagaiga 1:36]. Na te faia lenei mea a o Ia galue e ala mai i Ana auauna filifilia ma au pulega o siteki ma uarota.¹⁴

An African congregation gathered in sacrament meeting. — O le faapotopoto ai ma uso a Au Paia, ua tatou vaai ai o se siteki e mafai ona avea “ma se puipuiga, ma mo se sulufaiga mai le afā” (MF&F 115:6).

A o tuputupu a’e pea le Ekalesia, e taua tele lo tatou atiaeina ia mausali ma lelei, ma ia i ai i o tatou siteki faaolioli ia vaega autu e manaomia mo le manuia, ae o siteki o i ai nei ia galulue maelega ia avea ma ni siteki e lelei atoatoa i se lagona o mea faaleagaga ua ausiaina. O nei siteki e tatau ona avea ma ni nofoaga e faapotopoto i ai mo Siona o aso nei, ma e manaomia ona avea o ni apitaga faaleagaga ma ia ola tutoatasi i le tele o auala e mafai ai.¹⁵

O siteki ma itu o Siona o ni faatusa ia o nofoaga paia ia na fetalai le Alii e tatau ona faapotopoto i ai Lana Au Paia i aso e gata ai, e avea o se sulufaiga mai le afā. O iinei o le a outou faapotopoto i ai ma lau fanau e tapuai, e faatino sauniga paia, e feoeoea’i ai, e aoao ai, e faafiafia ai i musika, siva, tala faatino, afeleti, ma o le tulaga masani lava ia faaalualu ai i luma outou lava ma le tasi ma le isi. E masani ona manatu tele e faapea, e taua le i ai i luga o o tatou faletatalo se olo, ma ni tumutumu e faasasaga i le lagi o le faatusa lea o le auala e tatau ona i ai o tatou olaga ia agai pea lava pea i luga i le Atua.¹⁶

Na muai vaai le perofeta o le Tusi a Mamona o Nifae i le aso o le a faataapeapeina ai le Au Paia i siteki i le lalolagi atoa. Sa ia vaaia le taimi o le a faaloaloa mai ai e le Alii Lana puipuiga ia i latou pe a lutia i puava faigata ma faamata’uina ai lo latou ola. Na vavalo Nifae: “Ma sa oo ina aʼu, vaai aʼu o Nifae, i le mana o le Tamai Mamoe a le Atua, ua alu ifo i luga o le au paia o le ekalesia a le Tamai Mamoe, ma luga o tagata o le feagaiga a le Alii, o e sa faataapeapeina i luga o le lalolagi atoa; ma sa faaauupegaina i latou i le amiotonu ma le mana o le Atua i le mamalu tele.” (Tusi a Mamona, 1 Nifae 14:14.)

E ala mai i faaaliga ua tatou iloa ai o le a i ai mea taufaamatau, mala, ma sauaga i aso e gata ai, ae o le amiotonu e mafai ai ona faasaoina le Au Paia. E moni lava le folafolaga a le Alii o loo i le Tusi a Mamona: “O le a faasao ai e Ia e ua amiotonu i lona mana.” (1 Nifae 22:17.)¹⁷

Fautuaga mo Suesuega ma le Aoaoina Atu

Fesili

I le mae’a ai o le faitauina o le vaega 1, o le a sau tali atu i se tasi e fesili pe aisea e faatulaga ai tagata o le Ekalesia i siteki?
Na faamanatu mai e Peresitene Benson ia i tatou, o siteki e fesoasoani i matua e aoao le talalelei i a latou fanau ma tuuina atu sauniga o le perisitua mo i latou (tagai i le vaega 2). O a ni auala ua faamalosia ai e lau siteki au taumafaiga i le aiga?
O le a se taimi na e vaaia ai tagata o le siteki o o mai faatasi e fai se faataitaiga “e vaai uma i ai le lalolagi”? (Tagai i le vaega 3.) O faapefea ona faamanuiaina oe mai nei gaoioiga?
O a ni auala o loo tuuina atu ai e se siteki le puipuiga “mai fili e vaaia ma lē vaaia”? (Tagai i le vaega 4.) O a ni avanoa o loo tatou maua e auai ai i a tatou siteki? O a nisi o faamanuiaga e mafai ona tatou maua e ala i le faia faapea?

Mau Talafeagai

Isaia 25:3–5; Mataio 5:14–16; Moronae 10:31–33; MF&F 101:17–21; 133:7–9

Fesoasoaniga mo le Aoao Atu

“O se faiaoga atamai e le mafaufau faapea, ‘O le a se mea e tatau ona ou faia i le vasega i le aso?’ ae fesili, ‘O le a se mea o le a fai e tamaiti o la’u vasega i le aso?’; e le o le, ‘O le a le mea o le a ou aoao atu i le aso?’ae, ‘O le a faapefea ona ou fesoasoani i tamaiti o lau vasega ia iloa le mea e moomia ona latou iloa?’” (Virginia H. Pearce, “The Ordinary Classroom—a Powerful Place for Steady and Continued Growth,” Ensign, Nov. 1996, 12; sii mai le O Le Aoaoina Atu o le Talalelei: O Se Tusitaulima mo Faiaoga ma Taitai o le OAE [1994], 13).