Mataupu 12

Saili atu i le Agaga i Mea Uma Tou te Faia

“E tatau ona tatou mataala ma nofouta i uunaiga a le Agaga Paia i vaega uma o o tatou olaga.”

Mai le Soifuaga o Ezra Taft Benson

Ina ua fautuaina e Peresitene Ezra Taft Benson ia isi Au Pulega Aoao e faatatau i auaunaga i le Ekalesia, sa masani ona ia faapea atu, “Ia manatua, Uso e, o le galuega lenei o le mauaina o le Agaga o le mea taua lea.”¹ Ma a galulue faatasi o ia ma nei usoga, na te aoaoina atu lenei mataupu faavae e ala i faataitaiga, e faaalia ai o le Alii “e latalata mai i Ana auauna, i se mamao e na o le musumusu lava.”² Na faamatala e Elder Robert D. Hales o le Korama a Aposetolo e Toasefululua, e uiga i se taimi na la malaga faatasi ai ma Peresitene Benson i se konafesi faalesiteki lea o le a valaauina ai se peresitene fou o le siteki:

“Ina ua uma le tatalo, faatalanoaga, suesuega, ma toe tatalo foi, na fesili mai Elder Benson pe ua ou iloaina o ai o le a avea ma peresitene fou. Sa ou fai atu, ou te le’i mauaina lava lena musumusuga. Sa tilotilo mai o ia ia te a’u mo se taimi umi ma tali mai, na te le’i mauaina foi. Peitai, sa musuia i ma’ua e talosagaina ni alii agavaa na umia le perisitua e lauga i le sauniga o le konafesi i le afiafi o le Aso Toonai. I sina taimi puupuu talu ona amata le lauga a le failauga lona tolu, ae uunaia loa a’u e le Agaga e tatau ona avea o ia ma peresitene fou o le siteki. Sa ou tilotilo atu ia Peresitene Benson ma vaaia ai le maligi o ona loimata. Na tuuina mai ia i ma’ua uma se faaaliga—ae na pau lava le ala e oo mai ai, o le saili pea e le aunoa mo le finagalo o le tatou Tama Faalelagi a o tatou agai i luma i le faatuatua.”³

I le amataga o se konafesi mo peresitene fou o misiona, na faasoa atu ai e Peresitene Benson le fautuaga lenei:

“E tele taimi na ou ta’uina atu ai i o’u uso, o le Agaga o le elemene lea e tasi e aupito sili ona taua i le galuega lenei. O le Agaga ma le faalauteleina o lou valaauga, e mafai ai ona e faia vavega mo le Alii i totonu o le misiona. A aunoa ma le Agaga o le a le mafai ona e manuia e tusa lava po o a au taleni ma tomai.

“O le a e maua faatonuga sili ona lelei i isi aso e tolu e sosoo ai. O le a tufatufaina atu Tusitaulima, o le a talanoaina tiutetauave ma faiga faavae, o le a suesueina aiaiga faavae, ma o nei mea uma o le a sili ona fesoasoani ia te oe. Ae o le fesoasoani sili o le a e maua a o avea ai ma peresitene o le misiona, o le a le maua lea i tusitaulima po o tusi lesona. O lau fesoasoani sili o le a sau mai le Alii lava Ia, a o e ole atu ma talosaga atu ia te Ia i le tatalo faamaualalo. A o e alu ifo pea lava pea i ou tulivae, ole atu ia te Ia mo le fesoasoaniga faalelagi i le taitaiga o lau misiona, o le a e lagona le Agaga, o le a e maua au tali mai luga, o le a manuia faaleagaga lau misiona ona o lou faalagolago atu ma lou faatuatuaina o Ia.”⁴

Na faalautele atu e Peresitene Benson lenei fautuaga i tagata uma o le Ekalesia, e aofia ai tamaiti laiti.⁵ Na saunoa o ia: “I le galuega lenei, o le Agaga o le mea taua lava lea—po o fea lava tatou te galulue ai. Ou te iloa e ao ona ou faalagolago i le Agaga. Ia tatou maua lena Agaga ma ia avea ma ni tagata faamaoni o le Ekalesia, ni fanau ma ni matua tuuto, ni faiaoga o aiga mataalia, ni faiaoga musuia, ma ni taitai musuia o uarota ma siteki.”⁶

E ui ina sa aoao atu faalauaitele ma le lototoa e Peresitene Benson lenei upumoni i le lalolagi atoa, ae o lana taumafaiga autu lava e mulimuli i ai sa patino ma lēleoa. Na amata i le aiga, faatasi ai ma lona faletua, o Flora. Na asiasi atu i se tasi taimi se uso o Flora o Julia Dalley i le aiga o le au Benson, ma sa ia tusi atu mulimuli ane ia Flora, e faaali atu ai sona manatu e uiga i le aiga o Benson. “O le a se isi mea i le lalolagi e sili atu ona lelei?” na ia fai atu ai. “Ou te faamemelo i le faigofie o le ituaiga olaga o loo e ola ai, ae o le mea moni na sili ona faagaeetia ai au, o totonu o lou fale o loo afio ai le Agaga o le Alii.”⁷

A Fijian woman sitting in a chair. She has her arms folded and head bowed in prayer. — “E faapefea ona tatou maua le Agaga? ‘E ala i le tatalo o le faatuatua,’ na fetalai mai ai le Alii.”

Aoaoga a Ezra Taft Benson

E tatau ona tatou taumafai ia maua le mafutaga faifaipea a le Agaga Paia i aso uma o o tatou olaga.

O se tasi o auala mautinoa e mafai ona tatou iloa ai pe o tatou i ai i le ala sa’o ma le vaapiapi, o lo tatou mauaina lea o le Agaga o le Alii i o tatou olaga.

O le mauaina o le Agaga Paia e aumai ai ni fua faapitoa.

Fai mai le Aposetolo o Paulo “a o le fua o le Agaga o le alofa, o le olioli, o le filemu, o le onosai, o le mataalofa, o le agalelei, o le faamaoni, o le agamalu, [ma le] lē gaoia.” (Kalatia 5:22–23.)

O le mea e sili ona taua i o tatou olaga o le Agaga. Ou te lagonaina i taimi uma lena Agaga. E tatau ona tatou mataala ma nofouta i uunaiga a le Agaga Paia i vaega uma o o tatou olaga. … O nei uunaiga e tele lava ina oo mai pe afai tatou te le o atuatuvale ma vevesi i le tele o mea e fai, ma pe afai e le o felefele solo o tatou mafaufau i popolega o aso uma o le olaga.⁸

O le faaleagaga—o le mauaina lea o le Agaga o le Alii—o le manaoga aupito silisili lea o loo i ai ia i tatou uma. E tatau ona tatou taumafai mo le mafutaga faifaipea a le Agaga Paia i aso uma o o tatou olaga. A tatou mauaina le Agaga, o le a tatou fiafia e auauna atu, o le a tatou alolofa i le Alii, ma o le a tatou alolofa ia i latou o loo tatou auauna atu faatasi, ma i latou o loo tatou auauna atu i ai.

I ni nai tausaga talu ona mavae le faamaturoina o Iosefa Samita, na faaali ane ai o ia ia Peresitene Polika Iaga. Faafofoga i lana savali:

“Ta’u atu i tagata ia lotomaualalo ma faamaoni, ma ia mautinoa e faatumau le agaga o le Alii, ma o le a taitaiina sa’o ai i latou. Ia faaeteete ia aua ne’i tuliesea le leo itiiti ma le filemu; o le a ia aoao atu ia te oe mea e tatau ona fai ma le mea e te alu i ai; o le a aumaia ai fua o le malo. Ta’u atu i le usoga ia tatala o latou loto i taimi uma ma mataala, a oo i le taimi e afio mai ai le Agaga Paia ia i latou, o le a saunia o latou loto e talia o ia.” …

O lenei galuega o aso e gata ai e faaleagaga. E manaomia ai le faaleagaga ina ia malamalama i ai, ia fiafia i ai, ma ia iloatino ai. O le mea lea, saili le Agaga i mea uma e te faia. Ia faatumau ia te oe i taimi uma. O le tatou lu’i lena.⁹

Ua tatou ola i se lalolagi ua matuai amioleaga lava. Ua siomia i tatou i faatosinaga o loo taumafai e faatosina i tatou o le leaga e lelei ae o le lelei e leaga. Ua tele naua aoaoga sese ua aafia ai i tatou. E toetoe lava o mea uma e lelei, manaia, mama, faagaeetia, ma faamalosiauina ua matua luitauina i le taimi nei i lo se isi lava taimi muamua.

O se tasi o mafuaaga ua tatou i ai i lenei lalolagi o le iloatino lea o le mea moni mai le mea sese. O lenei iloatino e sau mai le Agaga Paia, ae le na o o tatou lava mafaufauga.

Pe a tatou saili atu ma le faatauanau ma le faamaoni mo le mea moni, o le a faataunuuina lenei folafolaga matagofie: “O le a tuu atu e le Atua ia te outou le poto e ala i lona Agaga Paia, ioe, e ala i le meaalofa le mafaamatalaina a le Agaga Paia.” Mataupu Faavae ma Feagaiga 121:26.¹⁰

A tatou lotomaualalo ma nofouta, o le a uunaia i tatou e le Alii e ala i o tatou lagona.

Tatalo i le Tama Faalelagi e faamanuia oe i Lona Agaga i taimi uma. E masani ona tatou ta’ua le Agaga o le Agaga Paia. … O le Agaga Paia e fesoasoani ia te oe e filifili le mea sa’o. O le Agaga Paia o le a puipuia oe mai mea leaga. E musumusu atu o ia ia te oe e fai le mea sa’o i se leo itiiti ma le filemu. A e faia mea lelei, e te mauaina lagona lelei, ma o le Agaga Paia lena o loo fetalai atu ia te oe. O le Agaga Paia o se soa lelei tele. E i ai o ia iina i taimi uma e fesoasoani ia te oe.¹¹

Mafaufau loloto i mataupu e te le malamalama ai. E pei ona poloaiina e le Alii ia Oliva Kaotui: E ao ina e suesue i ai i lou mafaufau; ona … ole mai [lea] ia te au pe ua sa’o, ma afai ua sa’o, o le a Ou faia ia mu lou loto i totonu ia te oe; o lea, o le a e lagona ai ua sa’o.” (MF&F 9:8, faaopoopo le faatusilima.)

Na e matauina le fasifuaitau mulimuli lena? “O le a e lagona ai ua sao.”

Tatou te lagonaina afioga a le Alii i le tele o taimi e ala i se lagona. A tatou lotomaualalo ma nofouta, o le a uunaia i tatou e le Alii e ala i o tatou lagona.O le pogai lena e faaosofia ai i tatou e uunaiga faaleagaga i isi taimi i le olioli tele, o nisi taimi i loimata. E tele taimi na faaagamalūina ai o’u lagona ma na matua ootia ou lagona i taimi e pa’i mai ai le Agaga.

O le Agaga Paia na te faaosofia o tatou lagona ia agamalu. Tatou te lagona le atili alofa atu ma le atili agalelei atu i le tasi ma le isi. O le a sili atu ona tatou to’afimalie i a tatou mafutaga. Tatou te maua se malosi sili atu e alofa atu ai i le tasi ma le isi. O le a fia faatasi tagata ma i tatou ona o o tatou foliga o loo susulu atu ai faatosinaga a le Agaga. E faateleina lo tatou amioatua i o tatou uiga faaalia. O se taunuuga, e faateleina lo tatou nofouta i uunaiga a le Agaga Paia ma mafai ai ona tatou malamalama atili ma le manino i mea faaleagaga.¹²

Tatou te maua le Agaga e ala i le tatalo faamaoni ma le anapogi.

E faapefea ona tatou maua le Agaga? “E ala i le tatalo o le faatuatua,” o le fetalaiga lea a le Alii [MF&F 42:14]. O le mea lea, e ao ai ona tatou tatalo ma le faamaoni ma le manatu tonu i ai. E tatau ona tatou tatalo mo le faatuatua faateleina ma tatalo mo le Agaga ia faatasi i a tatou aoaoga. E tatau ona tatou ole atu i le Alii mo le faamagaloga.

E tatau ona tuuina atu a tatou tatalo i le agaga e tasi ma le malosi e tasi e pei o tatalo a Enosa i le Tusi a Mamona. Ua masani le toatele i lena tala musuia, o lea o le a ou le toe ta’ua ai le mea na tupu. Ae na ona ou manao e tatai atu o outou mafaufau i upu nei. Na molimau mai Enosa: O le a ou faamatala atu ia te outou le fagatuaga na ou faia i luma o le Atua, ae ou te lei maua se faamagaloga o aʼu agasala. Sa ia faamamafaina lena fagatuaga ma le Atua. Matau le malosi o lana olega:

“Sa matelaina lo’u agaga.”

“Sa ou tootuli i lalo i luma o lo’u Tufuga.”

“Ma ou tagi atu ia te ia i le tatalo malosi ma le faatauanau mo lo’u lava agaga.”

“Ma sa ou tagi atu ia te ia i le aso atoa.”

Ona molimau mai lea o Enosa, “Ma sa oo mai se siufofoga ia te aʼu, ua fetalai mai: Enosa e, ua faamagaloina au agasala, ma o le a faamanuiaina oe. … O le mea lea, sa tafi ese ai lo’u lagona o a’u sese.” Ina ua fesili atu o ia i le Alii pe na faapefea ona faia o lenei mea, sa tali mai le Alii ia te ia: “Ona o lou faatuatua ia Keriso … ua faamamaina oee lou faatuatua.” (Enosa 1:2, 4–8; faaopoopo le faatusilima.)

Sa faamaloloina faaleagaga Enosa. E ala i lona tatalo malosi i le Atua, sa oo ai ia te ia se aafiaga lea e mafai ona lagonaina e tagata faatuatua o soo se tisipenisone, e lagonaina, ma e tatau lava ona lagonaina pe afai e ao ona latou vaai i le Atua ma faatumulia i Lona Agaga.¹³

Afai e te manao e maua le agaga o lou tofiga ma le valaauga … taumafai e anapogi mo se taimi. E le o le uiga o la’u tala o le misia o se taumafataga se tasi, ona faaluaina ai lea o lau tausami i le taumafataga e sosoo ai. O le uiga o la’u tala o le anapogi moni, ma tatalo i le taimi o lena [anapogi]. O le a tele atu mea na te faia e tuu atu ai ia te oe le agaga moni o lou tofiga ma le valaauga, ma faataga le Agaga e galue e ala atu ia te oe nai lo o se isi lava mea ua ou iloaina.¹⁴

O le suesueina o tusitusiga paia i aso uma, e aofia ai le manatunatu loloto i fuaitau o mau, e valaaulia ai le Agaga.

Ia suesue ma le maelega i tusitusiga paia, i suesuega faaletagata lava ia i aso uma. O le suesueina o tusitusiga paia i aso uma e valaaulia ai le Agaga.¹⁵

Faaalu se taimi e manatunatu loloto ai. O le manatunatu loloto i se fuaitau o tusitusiga paia—Iakopo 1:5—na taitai atu ai se alii talavou i se togavao e talanoa ma lona Tama Faalelagi. O le mea lena na matala ai lagi i lenei tisipenisione.

O le manatunatu loloto i se fuaitau o mau mai le tusi a Ioane i le Feagaiga Fou na aumaia ai le faaaliga maoae e uiga i tikeri e tolu o mamalu [tagai Ioane 5:29; MF&F 76].

O le manatunatu loloto ai i se isi fuaitau o mau mai le Tusi a Peteru na matala ai lagi ia Peresitene Iosefa F. Samita, ma ia vaaia ai le lalolagi o agaga. O lena faaaliga, ua ta’ua nei o le Faaaliga o le Togiolaina o E ua Maliliu, ua avea nei ma se vaega o le Mataupu Faavae ma Feagaiga [tagai 1 Peteru 3:18–20; 4:6; MF&F 138].

Mafaufau loloto i le taua o tiutetauave ua tuuina mai e le Alii ia i tatou. Ua fautua mai le Alii, “Ia tuu le tulaga mamalu o le faavavau ia mau i luga o o outou mafaufau.” (MF&F 43:34.) E le mafai ona outou faia lena mea pe a tumu o outou mafaufau i mea o le lalolagi.

Faitau ma suesue i tusitusiga paia.O tusitusiga paia e tatau ona suesueina i le aiga faatasi ma tama ma tina e taimua ma fai ni faataitaiga. O tusitusiga paia e tatau ona faamalamalamaina e le mana o le Agaga Paia, aua ua tuuina mai e le Alii lenei folafolaga i Ona tagata faamaoni ma usiusitai: “Ia mafai ona e iloa mealilo ma mea filemu.” (MF&F 42:61.)

O le faamatalaga lenei mai ia Peresitene Spencer W. Kimball ua faaalia ai le ala e mafai ai ona tatou atiina ae atili le faaleagaga i o tatou olaga:

“Ua ou iloaina a ou manatu faasamasamanoa i le ma fesootaiga ma le e paia, ma a oo ina foliga mai e le o faafofoga mai le [Atua] ma leai se siufofoga o fetalai mai, o lona uiga ua ou matua mamao, mamao ese lava. Afai ou te faatofuina au lava i tusitusiga paia, ona vaapiapi ai lea o le va ma toe foi mai le faaleagaga.E iu ina malosi tele lo’u alofa ia i latou e tatau ona ou alofa i ai ma lo’u loto, mafaufau ma le malosi atoa, ma alofaina tele i latou, ma ou iloa ai ua faigofie atu ona ou taliaina a latou fautuaga.” …

O se fautuaga matagofie tele lena ua ou iloaina e moni e ala i aafiaga.

O le tele lava o lou masani i tusitusiga paia, o lou latalata atili atu foi lena i le mafaufau ma le finagalo o le Alii, ma o le latalata atili foi lea o le avea o outou o se tane ma se ava ma le fanau. O le a e iloa ai, e ala atu i le faitauina o tusitusiga paia o le a faapea ona mau ai upumoni o le faavavau i o outou mafaufau.¹⁶

A Brazilian woman reading the scriptures. She is sitting on a bus. — “O le suesueina o tusitusiga paia i aso uma e valaaulia ai le Agaga.”

E le manao le fili ia tupu le faitauina o tusitusiga paia i totonu o o tatou aiga, ma o lea o le a ia fatuina ai ni faafitauli pe a ia mafaia. Ae e tatau lava ona tatou tutumau pea.¹⁷

E le mafai ona tatou iloa le Atua ma Iesu e aunoa ma le suesue e uiga ia i laua ona fai ai lea o o la finagalo. O lenei ala e taitai atu i le malamalama faaopoopo faaalia, pe afai e usitai i ai, o le a iu ina taitai atu ai i tatou i isi upumoni. Afai tatou te mulimuli i le mamanu lenei, o le a tatou maua le malamalama ma le olioli atili, ma iu ai ina taitaiina atu i le afioaga o le Atua, lea o le a tatou faatasi ai ma Ia, ma maua ai le atoatoa.¹⁸

O le a faatasi mai le Agaga Paia ia i tatou pe a tatou faamamalu, faaaloalo ma usiusitai i tulafono a le Atua.

Ua aoaoina i tatou e le nofo le Agaga i nofoaga le mama [tagai Helamana 4:24]. O le mea lea, o se tasi o mea e tatau ona ave i ai la tatou faamuamua, o le mautinoa lea o faatulagaina lelei o tatou lava olaga patino.¹⁹

Sei ou talanoa atu e uiga i le usiusitai. O loo outou aoao nei e tausi uma poloaiga a le Atua. A o outou faia o lea, o le a outou maua Lona Agaga e faatasi ma outou. O le a outou maua lagona lelei e uiga ia te outou lava. E le mafai ona outou faia mea sese ae lagona ai le fiafia. E le mafai!²⁰

O le folafolaga faaletino mo le usiusitai [i le Upu o le Poto] o le: O le “a [latou] maua le maloloina i o latou pute ma le su i o latou ivi; … o le a [latou] taufetuli ae le vaivai, ma o le a savavali ae le matapogia.” (MF&F 89:18, 20.)

Ae peitai, ou te lagonaina i taimi uma o le faamanuiaga silisili o le usiusitai i le Upu o le Poto ma isi poloaiga uma, e faaleagaga.

Faalogo i le folafolaga faaleagaga: “O le au paia uma o e e manatua e tausi ma faia nei upu, ma savavali i le usiusitai i poloaiga, … o le a latou maua le poto ma oa silisili o le malamalama, o oa natia lava.” (MF&F 89:18, 19; faaopoopo le faatusilima.)

O nisi ua manatu o lenei folafolaga sa faalagolago lava i le tausiga o tuutuuga o le Upu o le Poto. Ae o le a outou matauina e tatau ona tatou savavali i le usiusitai i poloaiga uma. Ona tatou maua ai lea o ni folafolaga patino faaleagaga. O le uiga o lenei mea, e tatau ona tatou usiusitai i le tulafono o le sefuluai, tausia le paia o le aso Sapati, ia tumau i le amio mama ma le ola mama, ma usiusitai i isi poloaiga uma.

Afai tatou te faia nei mea uma, o le folafolaga: O le a latou “maua le poto ma oa silisili o le malamalama, o oa natia lava.” (MF&F 89:19.)

O ai se tamā ma se tinā o le a le manao i musumusuga a le Alii i le tausiaina o le la fanau? Ou te molimau atu, e mafai ona fai mo outou nei faamanuiaga. E mautinoa lava o le a le mananao ni matua, e ala i le le usiusitai, e taofia a latou fanau mai le mauaina o faamanuiaga a le Alii. O tamā ma tinā uma i Isaraelu e tatau ona agavaa i latou lava mo lenei folafolaga.

O le ola ai i poloaiga a le Atua o se tuutuuga o le agavaa mo le ulufale atu i le Maota o le Alii. O iina e tuuina mai ai le poto ma “oa silisili o le malamalama” e faatatau i lo tatou fiafia i le olaga lenei ma le olioli i le faavavau atoa. …

Ou te le talitonu e mafai e se tagata o le Ekalesia ona maua se molimau ola ma le malosi o le talalelei e aunoa ma le tausia o poloaiga. O se molimau o le maua lea o musumusuga i le taimi nei e iloa ai e moni le galuega, ae e le o se mea e na o le faatasi ona tatou maua. E faatasi le Agaga Paia ma i latou o e faamamalu, faaaloalo, ma usiusitai i tulafono a le Atua. Ma o le Agaga lena e aumaia musumusuga i le tagata. Ou te molimau faamaualalo atu i le moni o lenei folafolaga.²¹

Fautuaga mo Suesuega ma le Aoaoina Atu

Fesili

Na saunoa Peresitene Benson o uunaiga mai le Agaga Paia “e tele lava ina oo mai pe afai tatou te le o atuatuvale ma vevesi i le tele o mea e fai, ma pe afai e le o felefele solo o tatou mafaufau i popolega o aso uma o le olaga” (vaega 1). E mafai faapefea ona tumau lo tatou nofouta i le Agaga e tusa lava pe o i ai ni o tatou popolega faapena?
Na aoao mai Peresitene Benson, “A tatou lotomaualalo ma nofouta, o le a uunaia i tatou e le Alii e ala i o tatou lagona” (vaega 2). O a ni mea ua e aoaoina e uiga i le iloaina o ni uunaiga faapena?
I le vaega 3, o loo uunaia ai e Peresitene Benson i tatou ia mulimuli i le faataitaiga a Enosa, e pei ona tusia i le Tusi a Mamona. O a nisi o lesona e uiga i le sailia o le Agaga e mafai ona tatou aoaoina mai ia Enosa?
Mo oe lava ia, o le a le eseesega i le va o le faitauina o tusitusiga paia ma le “manatunatu loloto i se fuaitau o mau”? (Tagai i le vaega 4.) Aisea e te manatu ai, o le suesueina ma le maelega o tusitusiga paia e fesoasoani lea ia i tatou e maua ai uunaiga a le Agaga?
Na saunoa Peresitene Benson, “E faatasi le Agaga Paia ma i latou o e faamamalu, faaaloalo, ma usiusitai i tulafono a le Atua” (vaega 5). Aisea e te manatu ai o lo tatou gafatia i le mauaina o musumusuga e faatosinaina e a tatou taumafaiga e tausi ia poloaiga?

Mau Fesootai

1 Nifae10:17–19; 2 Nifae 4:15–16; Mosaea 2:36–37; MF&F 8:2–3; 45:56–57; 76:5–10; 121:45–46

Fesoasoani mo Suesuega

“A o e suesue, ia matuai taulai atu ma le toto’a i manatu e oo mai i lou mafaufau ma lagona e oo mai i lou loto” (Tala’i La’u Talalelei [2004], 19). Mafaufau e tusitusi i lalo ni lagona e te maua, e tusa lava pe foliga mai e le faatatau i upu o loo e faitauina. Atonu o mea tonu na e finagalo le Alii e faaali atu ia te oe.