Mataupu 20
“Fafaga A’u Mamoe”
“E tatau ia i tatou uma ona aoao ia avea ma leoleo mamoe moni. E tatau foi ona tatou faaali atu lea lava alofa e tasi i isi, e pei ona faia e le Leoleo Mamoe Lelei mo i tatou uma. E taua agaga taitasi ia te Ia.”
Mai le Soifuaga o Ezra Taft Benson
Sa faamatala e Peresitene Ezra Taft Benson se aafiaga na ia maua a o auauna atu o se fesoasoani i se au peresitene o le siteki:
“I se fonotaga a le au peresitene o le siteki i Boise, Idaho, i ni tausaga ua mavae, sa matou taumafai ai e filifili se peresitene mo le korama a le au toeaina aupito vaivai ma aupito toagaogao i le siteki. Na aumai e lo matou failautusi se lisi o toeaina uma o lena korama, ma sa i ai i le lisi se suafa o se alii na ou masani i ai i ni nai tausaga. Sa sau o ia mai se aiga malosi o le Au Paia o Aso e Gata Ai, ae sa le’i tele ni mea na ia faia i totonu o le Ekalesia.
“Afai e talosagaina e le epikopo e fai ni galuega i le falelotu, e masani lava ona ia tali mai i ai, ma afai na mananao le au toeaina e taaalo sofipolo, e te maua o ia i fafo i nisi o taimi o taaalo ma i latou. Sa ia te ia le tomai e taitai ai; sa avea o ia ma peresitene o se kalapu auauna atu ma sa ia faia ai se galuega lelei.
“Sa ou fai atu i le peresitene o le siteki, ‘E mafai ona e faataga mai a’u se’i ou alu atu ma te feiloai ma le alii lenei ma luiina o ia ia faaogatusa lona olaga ma tulaga faatonuina o le Ekalesia, ma tauave le tulaga faaletaitai i lana korama? Ou te iloa e i ai sina tulaga lamatia i le faia o lea mea, ae o loo ia te ia le tomai.’
“Na faapea mai le peresitene o le siteki, ‘Ia alu e fai, faamanuia le Alii ia te oe.’
“… Sa ou alu atu i le maota o lenei alii. O le a le mafai ona galo ia te a’u le vaaiga i ona foliga ina ua tatala mai le faitotoa ma vaaia ai se tasi o le au peresitene o lana siteki o tu atu iina. Sa ia valaaulia ma le toā’i a’u i totonu; sa tapena e lona faletua le taumafataga o le afiafi, ma sa mafai ona ou sosogiina le nanamu o le kofe na sau mai le umukuka. Sa ou talosagaina o ia ia sau lona faletua matou te talanoa faatasi, ma ina ua matou saofafai, na ou tau atu i ai le pogai na ou sau ai. ‘O le a ou le talosagaina sau tali i le asō,’ na ou fai atu ai. ‘Na o le pau lava le mea ou te manao e te faia, ia e folafola mai ia te au o le a e mafaufau i ai, tatalo e uiga i ai, ma mafaufau i ai e faatatau i le uiga o le a i ai i lou aiga, ona ou toe fo’i mai ai lea e vaai oe i le vaiaso fou. Afai e te filifili e le taliaina, o le a matou alolofa pea ia te oe,’ o la’u faaopoopo atu lea.
“O le Aso Sa na sosoo ai, o le taimi lava na ia tatalaina mai ai le faitotoa, sa ou vaaia ai se suiga. Sa fiafia o ia e vaai mai ia te a’u, ma sa vave ona ia valaaulia a’u i totonu, ma valaau i lona faletua ia matou auai faatasi. Na fai mai o ia, ‘Uso Benson, na ma faia e pei ona sa e fai mai ai. Sa ma mafaufau i ai, ma sa ma tatalo e uiga i ai, ma ua ma filifili e talia le valaauga. Afai o loo ia te outou o le usoga lena talitonuga tele ia te a’u, ua ou naunau foi e faaogatusa lo’u olaga ma tulaga faatonuina o le Ekalesia, o se mea na leva ona tatau ona ou faia.’
“Sa ia faapea mai foi, ‘Ou te le’i toe inuina se kofe talu mai ona e iinei i le vaiaso ua tuanai, ma o le a ou le toe inuina lava.’
“Sa vaetofiaina o ia e avea ma peresitene o le korama a toeaina, ma na amata ona siisii i luga le auai i lana korama—ma sa faaauau pea ona siisii i luga. Sa alu atu o ia, faauouo mai toeaiina le toaaga, ma aumai i latou i totonu. I ni nai masina mulimuli ane, na ou siitia ese ai mai le siteki.
“Na mavae le tele o tausaga, ma i se tasi aso i le Lotoa o le Malumalu i le Aai o Sate Leki, sa sau ai se tagata ia te a’u, faaloaloa mai lona lima, ma fai mai, ‘Uso Benson, e te le manatuaina a’u, a ea?’
“‘Ioe, ou te manatua,’ na ou fai atu ai, ‘ae ou te le o manatua lou suafa.’
“Sa ia faapea mai, ‘E te manatua lou susu mai i le fale o se toeaina solitulafono i Boise i le fitu tausaga ua mavae?’ Ma, ioe, na ou toe manatuaina lelei lava. Ona ia fai mai lea, ‘Uso Benson, O le a le lava le umi ou te ola ai e faafetai atu ia te oe mo lou oo mai i lo’u fale i lena aoauli o le Aso Sa. Ua avea nei a’u ma se epikopo. Sa ou manatu lava na ou fiafia, ae sa ou le’i iloaina le mea e ta’u o le fiafia moni.’”1
O le musuia ai i lenei aafiaga ma isi, na uunaia ai e Peresitene Benson tagata faamaoni o le Au Paia o Aso e Gata Ai e aapa atu i tagata o le Ekalesia o e ua mamao “ese mai le Ekalesia ma aafiaga o le talalelei.”2 I le konafesi aoao ia Aperila 1984, na ia saunoa mai ai: “Ua matou fiafia lava i le toe faatoaagaina mai o le toatele o o tatou uso ma tuafafine. Matou te uunaia taitai perisitua ma ausilali ia faaauau pea lenei taumafaiga maoae.”3 O le vaiaso lava lena, na ia saunoa atu ai i se vaega o taitai perisitua e uiga i le manaomia o le faaaumeaina o alii i le Ekalesia o e e le’i faauuina i le tofi toeaina:
“Ou te lagona le alofa i na alii, o ulu o aiga. … Ou te le talitonu o i ai sa tatou luitau telē atu i le Ekalesia i aso nei, nai lo le faatoaagaina mai o na alii, ma aumai i latou i le tulaga e mafai ai ona latou aveina atu o latou aiga i le maota o le Alii, ma tatala atu ai ia i latou faamanuiaga silisili ua silafia e alii ma tamaitai i le lalolagi nei ma le lalolagi a sau.
“Uso e, o lo matou faamoemoega ma tatalo, ia outou tagai atu i lenei taumafaiga e toe faatoaagaina mai tagata ia sili atu nai lo na o se polokalama le tumau. Matou te faamoemoe a oo i le taimi e faamaumauina ai le talafaasolopito o lenei vaitau o la tatou Ekalesia, o le a tusia ai e faapea, o le taimi lenei ua faailogaina ai se vaitaimi na toe maua mai ai e le Ekalesia a le Atua le toatele o agaga na sē ese ma leiloloa.”4
“O le taimi lava lenei e faaaoga ai le aoaoga a le Faaola e uiga i le leoleo mamoe lelei.”
Aoaoga a Ezra Taft Benson
1
O le avea ai ma soo o le Alii, o se vaega o la tatou misiona o le aapa atu lea i o tatou uso ma tuafafine o e ua vavaeeseina i latou lava mai le Ekalesia.
O le faamoemoega o le ekalesia a le Alii o le faatupulaia lea o le alualu i luma o atalii ma afafine uma o le Atua e agai atu i faamanuiaga silisili o le ola e faavavau. …
Ou te fia talanoaina la tatou misiona o le faaatoatoaina o le Au Paia, ae maise lava o le lu’i o le faatoaagaina mai o i latou o e vavaeeseina i latou lava mai le auai atoatoa i le Ekalesia. O nei tagata, o o tatou uso ma tuafafine, o e ua o ese i le taimi nei mai le Ekalesia ma le aafiaga o le talalelei.
I totonu o lenei vaega o tagata ua le toe toaaga mai, o loo i ai le toatele o i latou ua le o toe auai i sauniga lotu, o e atonu ua le toe naunau mai pe ua le toe popole foi. O loo aofia ai foi i latou o e ua leiloloa mo sina taimi ona ua tatou le iloa po o fea o i ai. O nisi o i latou nei o tagata fou liliu mai o e e foliga mai e le’i maua le tausiga ma aoaoga lea na semanu e avea ai i latou ma “nuu faatasi ma le Au Paia.” (Tagai Efeso 2:19.) O le toatele lava o le au nofofua matutua.
I ia tagata uma, o i tatou, i le avea ai ma tagata o le Ekalesia ma soo o le Alii, e tatau lava ona faaali atu ma faafou lo tatou alolofa ma valaaulia ma le lotoatoa i latou e toe foi mai. “Foi mai.Foi mai ma taumamafa i le laoai a le Alii, ma toe tofo i fua suamalie ma faamalieina o le faaaumeaina faatasi ma le Au Paia.” (Ensign, March 1986, p. 88.)
O le luitau o loo tatou fetaia’i e maoae. … E tatau ona tatou faaaoga se faatuatua tele, malosi ma le tuuto atoa pe afai tatou te fia aapa atu i nei uso ma tuafafine. Ae e tatau lava ona tatou faia. O loo faamoemoeina i tatou e le Alii ia tatou faia. Ma o le a tatou faia!5
2
A o tatou taumafai e faafailele i latou o e ua se ese, e tatau ona tatou faaaogaina aoaoga a le Faaola e uiga i le leoleo mamoe lelei.
O le taimi lava lenei e faaaoga ai le aoaoga a le Faaola e uiga i le leoleo mamoe lelei i le luitau o loo tatou fetaiai nei, o le toe aumaia o mamoe ua leiloloa ma tamai mamoe ua se ese.
“Pe ni a fa outou? ai se tagata o i ai mamoe e selau, afai e sē le tasi, na te le tuua ea le ivagafulu ma le iva i mauga, a e alu o ia e saili i lē na sē?
“Afai foi na te maua, e moni, ou te fai atu ia te outou, e tele lona olioli i lea, a e itiiti i le ivagafulu ma le iva e le’i sē.” (Mataio 18:12–13.)
I le vaitaimi o Iesu, na silafia lelei e le leoleo mamoe Palesitina ana mamoe taitasi. Na iloa foi e mamoe lona leo ma talitonuina o ia. Latou te le mulimuli lava i se tagata ese. O lea, a valaau atu i ai, e sau le mamoe ia te Ia. (Tagai Ioane 10:1–5, 14.)
I le po, e taitai atu ai e leoleo mamoe a latou mamoe i le pamanu po o se lafumamoe. E si’o le pamamoe i puipui po o pa maualuluga, ma tuu ai ni laau talatala i le pito i luga o le pa e taofi ai manu aivao ma tagata gaoi mai le fe’a’ei ai i luga. Peitai, o nisi taimi, e oso a’e ai se manufeai ona o le fiaai i luga o le pa i totonu o le lotolotoi o mamoe, ma fefefe ma faamatauina ai i latou.
O sea tulaga faapea e iloa ai le eseesega o le leoleo mamoe moni—o le e alofa i ana mamoe—ma le tagata e na o le faigaluega lava mo le tupe ona o lona tiute lea. Sa naunau le leoleo mamoe moni e ofo atu lona ola mo le mamoe. E alu atu o ia i le mea o i ai mamoe ma tau mo lo latou saogalemu. Ae i le isi itu, o le tagata e faigaluega mo le tupe, e na o lona lava saogalemu patino e popole i ai nai lo o mamoe, ma e masani lava e sola ese o ia mai le tulaga matautia [ne’i afaina ai].
Na faaaoga e Iesu lenei faataitaiga masani o Lona vaitaimi e tautino mai ai o Ia o le Leoleo Mamoe Lelei, le Leoleo Mamoe Moni. Ona o Lona alofa mo Ona uso ma tuafafine, o le a Ia ofoina atu ai ma le loto i ai Lona soifua mo i latou. (Tagai Ioane 10:11–18.)
O le iuga lava, na ofo atu e le Leoleo Mamoe Lona soifua mo le mamoe—mo oe ma a’u, mo i tatou uma.
O faatusa o le leoleo mamoe lelei e i ai itu taua e tutusa ai ma le Ekalesia i aso nei. E tatau ona taitaiina mamoe e ni leoleo mamoe mataala. Ua toatele naua ua se ese. O nisi ua tāina ese atu e mea faalavefau mo se taimi puupuu. O isi ua matuai leiloloa moni lava.
Ua matou iloa, e pei foi o vaitau ua mavae, o nisi o mamoe o le a fouvale ma ua pei “o se lafu aivao ua sosola ese mai le leoleo mamoe.” (Mosaea 8:21.) Ae o le tele lava o o tatou faafitauli e afua mai i le leai o se alofa ma le le mataala i le leoleoina o mamoe, ma e ao ona atiina ae nisi leoleo mamoe se toatele.
I le tausiga a se leoleo mamoe, e tatau ona fafagaina o tatou tagata fou, i latou e le’i leva ona taliaina le talalelei, e ala i faauoga agalelei a o faasolosolo ona faateleina lo latou malamalama i le talalelei ma amata ona ola i tulaga faatonuina fou. O na taulaiga faapena o le agalelei o le a fesoasoani e faamautinoa ai o le a latou le toe foi i tua i amioga tuai.
Faatasi ai ma se tausiga agaalofa a se leoleo mamoe, o le a le ta’aina atu ai o tatou tagata talavou, a tatou tamai mamoe i le fesesea’i solo. Ae afai foi e fesesea’i, o le lou o le tootoo a le leoleo mamoe—o lima agaalolofa ma se loto malamalama—o le a fesoasoani e toe aumai ai i latou.
Faatasi ai ma se tausiga a se leoleo mamoe, e mafai ai lava ona toe maua mai le tele o i latou o e ua ola tutoatasi mai le lafu. O le toatele o e ua faaipoipo i fafo atu o le Ekalesia ma ola ai lava i ituaiga olaga o le lalolagi, e ono tali mai i se valaaulia ia toe foi mai i le lafu.6
A o tatou faafaileleina faauooga i totonu o o tatou uarota ma paranesi, tatou te fesoasoani i le tasi ma le isi ia tumau pea i totonu o le lafu a le Leoleo Mamoe Lelei.
3
O tagata o le Au Paia o Aso e Gata Ai ua se ese e manaomiaina le manatu popole moni ma faamaoni mai leoleo mamoe moni ma agaalofa.
E leai ni vaifofo fou i lenei faafitauli tuai o le se ese o mamoe i se isi mea mo ni meaai. O le tiutetauave na tuu atu e Iesu ia Peteru, lea na Ia faamamafaina e ala i le fetalai faatolu atu i ai, o le vaifofo tonu lea: “Fafaga i a’u tamai mamoe… . Leoleo i a’u mamoe Fafaga a’u mamoe… .” (Tagai Ioane 21:15–17.)
E pei o le apoapoaiga matagofie o le Tusi a Mamona, o i latou e papatisoina i le ekalesia a Keriso, e tatau ona “manatua [i taimi uma] i latou ma tausia i le afioga lelei a le Atua.” (Moronae 6:4.)
O lea la, o le tali, e maua i le leoleoina ma le agaga tatalo ma le fafagaina o le lafu—i se isi faaupuga, o le vaaiga ma le tausia patino o i latou. E tatau ona i ai le manatu popole moni ma faamaoni mai leoleo mamoe moni ma agaalofa, ae le na o le faatagā popole lea e ono faaalia e se tagata e faigaluega mo le tupe.
A o tatou talanoaina le manatu faavae o se leoleo mamoe moni, ua tatou iloa ua tuuina mai e le Alii lenei tiutetauave i e o loo umiaina le perisitua. Ae o loo i ai foi valaauga “faaleoleo mamoe” o tuafafine i auaunaga alofa ma le agalelei latou te tuuina atu i le tasi ma le isi, ma isi. O lea la, e tatau ia i tatou uma ona aoao ia avea ma leoleo mamoe moni. E tatau foi ona tatou faaali atu lea lava alofa e tasi i isi, pei ona faaali mai e le Leoleo Mamoe Lelei mo i tatou uma. E taua agaga taitoatasi ia te Ia. O Lana valaaulia e tālo atu i tagata uma [o le ekalesia]—i atalii ma afafine uma o le Atua.
“Faauta, ua ia auina mai se valaaulia i tagata uma, ona ua faaloaloa mai ia te i latou aao o le alofa mutimutivale, ma ua ia fetalai: Ia salamo, ona ou talia lea o outou. …
“O mai ia te a’u ma o le a outou aai ai i le fua o le laau o le ola; …
“Ioe, o mai ia ia te a’u ma aumai galuega o le amiotonu.” (Alema 5:33–35.)
E leai se tasi e le oo atu i ai Lana valaaulia. E talia uma i latou o le a mauaina Lana valaaulia mamalu e auai i Lana talalelei. O mamoe—o nisi ua le mautonu, o nisi ua le o toe i ai se naunau—e tatau ona maua mai ma alolofa i ai seia oo ina toe malolosi. E tatau ona faaaoga uma punaoa a le au perisitua ma ausilali e lagolago ai i lenei taumafaiga.
E le taitai mafai ona ausia lenei lu’i sei iloga ua faaaoga e ta’ita’i o le siteki, uarota, korama, ma ausilali ma tagata faamaoni o le au paia i soo se mea lo latou loto ma le faatuatua e toe aumai ai le tagata lē toaga ia toe malosi atoatoa i le Ekalesia.
A o e taumafai ma le naunautai ia ausia lenei sini tauaogaina, matou te uunaia outou ia tuu atu se faamamafa faafouina i asiasiga mataalia a faiaoga o aiga a le au perisitua ma asiasiga mataalia a faiaoga asiasi a le Aualofa. O faiaoga o aiga ma faiaoga asiasi o ni polokalama musuia. Ua mamanuina ia oo atu i tagata taitoatasi o le Ekalesia i masina taitasi, i tagata malolosi [i le Ekalesia] ma tagata e le malolosi. Faamolemole ia tuu atu se faamamafa faateleina i faiaoga o aiga ma faiaoga asiasi.7
4
A o faaauau ai ona tatou auauna atu i o tatou uso ma tuafafine, e mafai ona tatou fesoasoani ia latou maua faamanuiaga ma sauniga uma o le talalelei.
O a tatou tatalo i le taimi nei e tatau ona tutusa lava le malolosi ma le popole e pei ona sa i ai tatalo a Alema a o ia saili e toe aumai sa Sorama na feseseta’i o e na o ese mai le Alii:
“Le Alii e, sei e tuu mai ia te i matou ia mafai ona matou maua le manuia i le toe aumaia o i latou ia te oe, ia Keriso.
“Faauta, Le Alii e, ua pele lava o latou agaga, ma o le toatele o i latou o o matou uso; o lea, tuu mai ia te i matou, Le Alii e, le mana ma le poto ina ia mafai ona matou toe aumai i latou nei, o o matou uso, ia te oe. (Alema 31:34–35; faaopoopo le faatusilima.) …
E le suia lava mataupu faavae o le toe faatoaagaina mai o agaga. O ia mea:
1. O tagata ua leiloloa pe ua le toe toaaga mai e tatau ona maua ma faafesootaia.
2. E tatau ona faaalia le popole ma le agaalofa. E tatau ona latou lagonaina lo tatou alolofa.
3. E tatau ona aoaoina i latou i le talalelei. E tatau ona latou lagonaina le mana o le Agaga Paia e ala atu i faiaoga.
4. E tatau ona faaaofia i latou i lo tatou faaaumeaina.
5. E tatau ona latou maua ni tiutetauave anoa o le Ekalesia.
I upu o le Tusi a Mamona, e tatau ona tatou “galulue pea i ai.” (3 Ni. 18:32.)
E faapitoa lo matou popole i tagata fou liliu mai ina ia auai faatasi i le faatoaagaina mai atoa i le Ekalesia. E tatau ona talia lelei i latou ma le alofa.
Ia tatou lotogatasi i a tatou taumafaiga e toe aumai tagata ua le toe toaaga mai ina ia malolosi atoatoa i le Ekalesia. I le faia o lea mea, o le a tutusa lelei ai lo tatou auai faatasi i le ausiaina o le misiona a le Ekalesia—ia aumai atoatoa le talalelei, ma ona faamanuiaga ma sauniga uma, i olaga o tagata uma o le Ekalesia. E “manaomia [e le Ekalesia] itutino taitasi uma” (MF&F 84:110), ma e manaomia e tagata uma o le ekalesia le talalelei, le Ekalesia, ma ona sauniga uma.
Tau ina ia tatou sailia uma faamanuiaga a le Alii e faamalosia ai i tatou, ma aumai ai ia i tatou le malosi e tatau ai ma faatosinaga o le a tatou manaomia a o tatou galulue faatasi i lenei galuega tele o le alofa.8
Fautuaga mo Suesuega ma le Aoaoina Atu
Fesili
-
O a ni ou lagona a o e mafaufau i tagata o [lou] aiga po o uo o e ua “o ese mai le Ekalesia ma le aafiaga o le talalelei”? O le a se mea e mafai ona tatou faia e aapa atu ai ia i latou? (Tagai i le vaega 1.)
-
Manatunatu loloto i aoaoga a Peresitene Benson e uiga i eseesega o le tagata e faigaluega mo na o le tupe ma se leoleo mamoe (tagai i le vaega 2). O a ni mea e mafai ona tatou faia ia avea ai ma ni leoleo mamoe lelei atu?
-
Na faamanatu mai e Peresitene Benson ia i tatou, e manaomia e tagata “le manatu popole moni ma faamaoni mai se leoleo mamoe moni ma lotoalofa” (vaega 3). E mafai faapefea ona tatou atiaeina le popole faamaoni mo isi? A o e mafaufau loloto i le fesili lenei, mafaufau i lau auaunaga o se faiaoga o aiga po o se faiaoga asiasi.
-
O le a sou manatu i le uiga o le ia “galulue pea i ai”? (3 Nifae 18:32). Mafaufau i mataupu faavae e lima ua faasoa mai e Peresitene Benson e fesoasoani ia tatou auauna atu ai ia i latou o e e manaomia ona toe foi mai ma malolosi i le Ekalesia (tagai i le vaega 4). O a ni auala e mafai ai e nei mataupu faavae taitasi ona fesoasoani i se tasi ia maua faamanuiaga o le talalelei?
Mau Talafeagai
Mataio 9:10–12; Luka 15; 22:32; 1 Peteru 5:2–4; Moronae 6:4; MF&F 18:10–16; 84:106
Fesoasoaniga mo le Aoao Atu
“O le faitau, suesue, ma le mafaufau loloto e le tutusa. Tatou te faitau i upu ma mafai ona maua ai ni manatu. Tatou te suesue ma maua ai mamanu ma fesootaiga o mau. Ae a tatou mafaufau loloto, ua tatou valaaulia faaaliga e ala i le Agaga. Ia te au, o le mafaufau loloto, o le mafaufau lea ma le tatalo ou te faia pe a uma ona ou faitau ma suesue ma le totoa i tusitusiga paia” (Henry B. Eyring, “Auauna atu ma le Agaga,” Ensign po o le Liahona, Nov. 2010, 59).