Mataupu 14
O Le Faaipoipoga ma le Aiga—Ua Faauuina e le Atua
“O le aiga o se tasi o papuipui aupito malosi a le Atua e tetee atu ai i mea leaga o o tatou aso. Fesoasoani e faatumau le malosi ma le vavalalata o o outou aiga ma agavaa mo faamanuiaga a lo tatou Tama o i le Lagi.”
Mai le Soifuaga o Ezra Taft Benson
Mai le amataga o le la faaipoipoga, sa faia ai e Ezra ma Flora Benson lo la fale ma le aiga o se mea e ave i ai le la faamuamua maualuga. A o laiti o la alo, sa amata ona la faamamafa atu i ai la te mananao i le latou aiga ia leai ni “nofoa avanoa” i le faavavau.1 Sa faamamafa mai e Peresitene Benson lenei lava savali e tasi i le taimi o lana auaunaga o se taitai o le Ekalesia. Sa ia faapea mai:
“Sa fuafuaina e le Atua le aiga ina ia faavavau. Ou te molimau atu ma lo’u loto atoa i le moni o lena folafolaga. Tau ina ia faamanuia e Ia i tatou e faamalolosia o tatou aiga ma olaga o tagata taitoatasi o le aiga, ina ia oo atu i le taimi e tatau ai, o loo mafai ona tatou lipoti atu i lo tatou Tama Faalelagi i Lona aiga selesitila ua tatou i ai uma iina—tama, tina, tuafafine, uso, tagata uma o le aiga o e alolofa i le tasi ma le isi. Ua nofoia uma nofoa. Ua tatou toe foi uma atu i le aiga.”2
Mo Peresitene ma Tuafafine Benson, o le taumafaiga e faamalosia lo latou aiga sa amatalia i le faafaileleina o le la faaipoipoga. Sa agaalofa ma tuuto i laua, faatuatuaina ma faamaoni. E ui ina sa le’i taa’ina atu i laua i feupuaiga, ae sa masani ona faia ni a la talanoaga tuusa’o.3 Sa tutusa o la lagona e uiga i le talitonuina atoatoa e le tasi o le isi, lea sa la manatu o se tasi lea o malosiaga sili o le la faaipoipoga. “E le’i i ai lava ma se taimi na ou fesiligia ai le faamaoni a’ia’i o Flora,” o le saunoaga lea a Peresitene Benson.4
Sa lagolagoina ma faamalosia e Peresitene ma Tuafafine Benson le tasi ma le isi. “Sa tele atu ni vaaiga mamao a Flora mo a’u ma o’u gafatia nai lo o se isi lava tagata i lo’u olaga. O lona faatuatua ma lona lagolagosua na avea ma se faamanuiaga sili,” o le saunoaga lea a Peresitene Benson.5 Sa masani lava, pe a ia lagonaina le le atoatoa i le mamafa o ona tiutetauave, e soloi ai e Tuafafine Benson ona loimata ma faamafanafana ia te ia.6 Sa ia sailia le fesoasoani a le Alii i le lagolagoina o [Peresitene Benson], ma na te uunaia le fanau ia latou faia foi lea lava mea e tasi. “Sa anoanoa’i tatalo ma anapogi mo tamā,” o le tala lea a lona afafine o Barbara.7
Sa faamaoni tumau ma sa’o i taimi uma ia Peresitene ma Tuafafine Benson o le tasi i le isi.
O le atiina ae i luga o le faavae mausali o le la faaipoipoga, na aoao ai e Peresitene ma Tuafafine Benson le la fanau i le taua o le mafutaga o aiga e faavavau. “Sa totōina e o matou matua ni lagona loloto o le faamaoni tumau ma le alofa ia i matou o le fanau,” o le faamatalaga lea a le la atalii o Mareko. “Ou te le manatu o lena ituaiga o siosiomaga e tupu fua i totonu o se aiga, ae e uunaia ma siitiaina e se tina ma se tamā e popole ma agaalofa.”8
O le tulaga faatonuina o amioga na faamoemoeina e le au Benson, faapea foi ma le faamuamua na la tuuina atu i le aiga, sa faaogatotonu lea i le talalelei. Sa la galulue e fatu se aiga lea sa manumalo ai le alofa, lea na aoao ai ma atiae le fanau, ma o se nofoaga sa latou maua ai le fiafia. Sa mananao le au Benson ia fai lo latou fale ma se sulufaiga mai le lalolagi. “Sa le’i faapea ai la na leai ni o matou faafitauli,” o le tala lea a le atalii ia Reed. “Sa le o taimi uma na matou fealofani ai. Sa le o taimi uma na fai ai a matou feau. Na i ai taimi na matou matuai tofotofoina ai le onosai o Tina. Ae, o na mea uma sa i ai se lagona o le lotogatasi faaleaiga, se lagona sa matou taumafai e lalaga faatasi.”9 Na faailoa mai e Tuafafine Benson: “E leai se tasi e atoatoa. I lo matou aiga, o lo matou faamoemoega e le o le faalauteleina o faaletonu o le tasi ma le isi, ae ia uunaia e le tasi le isi ia alualu i luma.”10
Sa laiti lava le fanau a le au Benson i le taimi na valaauina ai lo latou tamā e auauna atu i le Korama a Aposetolo e Toasefululua, ma sa popole o ia i le ono aafia ai o lona taimi e faatasi ai ma i latou ona o taimi atofaina o ana malaga. Sa ia tusia i lana api talaaga: “O le mamao o feoaiga ona o galuega a le Ekalesia o le a aveesea ai a’u mai lo’u aiga i le tele o taimi. … Ou te faamoemoe ma le faamaoni ia mafai ona ou tuuto atu i lo’u aiga, ia latou latalata atu i le Ekalesia, ma faapea ona faataunuu ai o’u tiute o se tasi o le Pulega Aoao. Ua ou iloa o le a le faigofie lenei mea.”11
O le mea moni e faapea sa le’i faigofie ona uunaia ia Peresitene Benson e galue malosi ia latalata atu i lona aiga. “O nisi o lagona ma aafiaga e sili ona fiafia, sili ona faamalieloto o [lo’u] olaga e faatatau lea i sootaga i le fale ma le aiga,” na ia saunoa mai ai.12
I le 1957, a o avea ai ma failautusi a le Iunaite Setete i mea tau faatoaga, na faia ai e Peresitene Benson se malaga taamilo e fa-vaiaso i le lalolagi e faalauteleina ni avanoa mo fefaatauaiga. Sa latou malaga faatasi ai ma Tuafafine Benson ma ona afafine o Beverly ma Bonnie. Sa latou malaga atu i atunuu e 12, lea sa latou feiloai ai ma taitai o malo ma asiasi atu i nofoaga iloga faaleaganuu, nofoaga o tagata sulufai, ma le faagaoioia o faatoaga. Sa lagona e Peresitene Benson sa faamanuiaina le malaga taamilo i le faateleina o avanoa mo fefaatauaiga e faapea foi i le atiina ae o faauoga lelei mo le Ekalesia. Ina ua latou toe taliu mai, sa faatalitali atu lona afafine o Beth ina ua tulaueleele le vaalele. Ina ua ia vaaia ona matua, sa amata ona ia momo’e atu ia i laua ma le tagi. Na aapa atu lona tama ma toso atu o ia ma fusi ia te ia ma le agaalofa. Sa mafaufau loloto o ia ma faapea mai, “O mea ofoofogia uma o le lalolagi [na matou vaai i ai], na faafuasei ona avea lena taimi ma taimi sili ona matagofie o le malaga atoa.”13
Aoaoga a Ezra Taft Benson
1
O le aiga o le faalapotopotoga aupito sili lea ona taua i le olaga nei ma le faavavau.
E manatu le Ekalesia a Iesu Keriso o le Au Paia o Aso e Gata Ai, o le aiga o le faalapotopotoga aupito sili lea ona taua i le olaga nei ma le faavavau atoa. Ua aoao mai le Ekalesia, e tatau ona faaogatotonu mea uma i totonu ma faataamilo i le aiga. Ua faamamafa mai ai o le faasaoina o le olaga faaleaiga i le olaga nei ma le faavavau e faamuamua lea i lo isi mea uma e fiafia i ai.14
E le mafai ona i ai se mea faamalie loto e suitulaga i le aiga. O lona faavae e tutusa lava le umi ma le lalolagi. O lana misiona na faauuina e le Atua.15
E leai se malo e sili a’e sona tulaga i lo ona aiga. O le a le sili a’e le tulaga o lenei Ekalesia i ona aiga. E le sili a’e foi i tatou i le avea ai o se nuu nai lo o a tatou magālafu [po o nofoaga e faatasitasi ai aiga], i o tatou aiga. … O le aiga lelei o le faavae papa lea, o le maatulimanu o se malo. E tatau ona faasaoina. E tatau ona faamalosia.16
E fesili mai nisi tagata ia te a’u i le avea ai ma se taitai o le Ekalesia, pe aisea tatou te tuu ai le faamamafa tele i le aiga ma le auaiga, ae o loo i ai ni faafitauli e ogaoga atu o loo siomia ai i tatou? Ioe, o le tali, o faafitauli ogaoga tetele atu ua na o ni taunuuga o faafitauli a tagata taitoatasi ma aiga.17
O le faaipoipoga ma le aiga ua faauuina e le Atua. I se faauigaga i le faavavau, o le faaolataga o se mataupu faaleaiga. E faamasinoina e le Atua ia matua mo lo latou tulaga faatausimea i le tausiga o o latou aiga. O se tiutetauave e sili ona paia.18
2
O faaipoipoga fiafia, o tane ma avā e alolofa ma auauna atu i le Atua faapea ma le tasi i le isi.
O le faaipoipoga, o le aiga, ma le auaiga e sili atu nai lo na o ni faalapotopotoga masani. E paia i latou, e le’i faia e se tagata. Na faauuina e le Atua le faaipoipoga mai lava i le amataga. I le faamaumauga o lena uluai faaipoipoga i le Kenese, na fofogaina ai e le Alii ni folafolaga taua se fa: muamua, e le lelei ona nofo toatasi o le tagata; lona lua, o le fafine na faia ina ia avea ma fesoasoani i le tane; lona tolu, o i laua e tatau ona avea ma tino e tasi; ma lona fa, e tatau i le tane ona tuua lona tamā ma lona tina ae faatasi ma lana ava. (Tagai Kenese 2:18, 24.)
Mulimuli ane, na fetalai mai ai le Alii na pei e faamamafa mai ai le faamatalaga na muamua atu: “O lenei, o e ua faatasia e le Atua, aua ne’i faateaeseina e se tagata” (Mataio 19:6). Na Ia fetalai mai foi, “Ia e alofa i lau avā ma lou loto atoa, ma ia e pipii atu ia te ia ae le o se isi” (MF&F 42:22).19
Ua ta’u mai e tusitusiga paia ia i tatou: “Sa amata ona galueaiina e Atamu le eleele … e pei ona poloaiina ai o ia e A’u o le Alii. Ma sa galue foi Eva, lana ava, faatasi ma ia. … Sa amata ona latou fanafanau ma uluola i le lalolagi. … Ma o Atamu ma Eva, lana ava, sa valaau atu i le suafa o le Alii. Ma sa viia e Atamu ma Eva le suafa o le Atua, ma sa la faailoa atu mea uma i o laua atalii ma afafine. … Ma o Atamu ma Eva, lana ava, sa le tuua le valaau atu i le Atua.” (Mose 5:1–2, 4, 12, 16.)
Mai lenei faamaumauga musuia, ua tatou iloa ai na tuuina mai e Atamu ma Eva ia i tatou se faataitaiga lelei o se sootaga faalefeagaiga o le faaipoipoga. Sa la galulue faatasi; sa maua faatasi a la fanau; sa la tatalo faatasi; ma sa la aoaoina faatasi le la fanau—i le talalelei. O le mamanu lenei ua finagalo le Atua ia faataitai i ai alii ma tamaitai amiotonu uma.20
O le faaipoipoga lava ia e tatau ona manatu i ai o se feagaiga paia i luma o le Atua. Ua i ai i se ulugalii ua faaipoipoina se matafaioi e le gata i le tasi ma le isi, ae i le Atua foi. Ua Ia folafola mai faamanuiaga ia i latou o e e faamamaluina lena feagaiga.
O le faamaoni a’ia’i o se tasi i ana tautoga o le faaipoipoga, e matua taua lava mo le alofa, faatuatuaina, ma le filemu. O le mulilua ua matua manino lava le ta’usalaina e le Alii.
O le taofiofi ma le loto pulea e tatau ona avea ma mataupu faavae e limataitaiina ai le sootaga o le faaipoipoga. E tatau i ulugalii ona aoao e pulea o latou laulaufaiva i upu e tautatala ai faapea foi ma le [puleaina] o o latou tuinanau.
O le tatalo i totonu o le aiga, ma le tatalo faatasi o le tasi ma le isi, o le a faamalosia ai le mafutaga [a se ulugalii]. O mafaufauga, manaoga, ma manatu o le a faasolosolo lava ona tuufaatasia i se agaga e tasi seia oo ina tasi o oulua faamoemoega ma sini e sailia.
Faalagolago i le Alii, i aoaoga a perofeta, ma tusitusiga paia mo le taitaiga ma le fesoasoaniga, ae maise lava pe a i ai ni feeseeseaiga ma ni faafitauli.
O le tuputupu a’e faaleagaga e oo mai e ala i le foiaina faatasi o faafitauli—ae e le o le sosola ese mai ai. O aso nei ma le faamamafa le mataofiofia i le tutoatasi o le tagata lava ia ua aumaia ai le manatu faapito o le tagata mo na o ia lava ma le teteaga. O le avea o tagata e toalua ma “tino e tasi” o loo tumau pea ona avea ma tulaga faatonuina a le Alii (Tagai Kenese 2:24.)
O le mealilo i se faaipoipoga fiafia o le auauna atu lea i le Atua ma le [auauna atu o le] tasi i le isi. O le sini o le faaipoipoga o le lotogatasi ma ia tasi, faapea foi ma le atinaega o le tagata lava ia. E ui ina ese mai i le mea e masani ona talitonu ai, ae o le tele o lo tatou auauna atu i le tasi ma le isi, o le tele foi lena o lo tatou tuputupu a’e faaleagaga ma faalelagona.21
“O le alofa o loo tatou iloa iinei … o le ute tonu lea e fusia faatasi ai aiga mo le olaga nei ma le faavavau.”
E maeu le matagofie ma le tuusa’o o le fautuaga mai le Aposetolo o Paulo. Sa ia faapea mai, “O outou tane, ia outou alolofa atu i a outou lava ava, faapei o Keriso foi ona alofa mai i le ekalesia” (Efeso 5:25).
I faaaliga i aso e gata ai, na toe fetalai mai ai le Alii e uiga i lenei tiute. Na Ia fetalai, “Ia e alofa i lau ava ma lou loto atoa, ma ia e pipii atu ia te ia ae le o se isi” (MF&F 42:22). I lo’u malamalama i ai, ua na o le tasi lava le isi [tagata] i tusitusiga paia uma ua poloaiina i tatou ia alolofa atu i ai ma o tatou loto atoa, ma o le Atua lava Ia. Mafaufau i le uiga o lena mea!
O lenei ituaiga alofa e mafai ona faaalia mo a outou ava i le anoanoa’i o itu. O le mea muamua lava ma le sili, e leai se isi mea vagana ai le Atua lava Ia e faamuamua i lo lau ava i lou olaga—e le o le galuega, e le o gaoioiga faafiafia, e le o mea e fiafia i ai. O lau ava o lou fesoasoani faapelepele lea ma faavavau—o lau soa.
O le a le uiga o le alofa atu i se tasi ma lou loto atoa? O lona uiga ia alofa atu ma ou lagona loloto uma faapea ma lou tuuto atoa. E mautinoa lava a e alofa i lau ava ma lou loto atoa, e le mafai ona e faalumaina o ia, faitioina o ia, saili masei ia te ia, pe sauaina o ia e ala i upu, amioga pa’aā, po o faatinoga.
O le a le uiga o le “pipii atu ia te ia”? O lona uiga ia latalata atu ia te ia, ia tuuto ma faamaoni atoa ia te ia, ia talanoa ma ia, ma ia faailoa atu lou alofa ia te ia.22
O tane ma ava, o e alolofa le tasi i le isi, o le a iloaina o le alofa ma le faamaoni tumau e fetaliai. O lenei alofa, o le a tuuina mai ai se siosiomaga mafana mo le tuputupu a’e faalelagona o fanau. O le olaga faaleaiga e tatau ona avea ma se taimi o le fiafia ma le olioli e mafai e fanau ona toe tepa ai i tua ma ni manatuaga faamama’i ma fegalegaleaiga. (Ezra Taft Benson, “Faaolataga—O Se Mataupu Faaleaiga,” Liahona, Iulai 1992, 2; po o le tusi lesona a le tagata aoga, 302).23
3
O aiga malolosi latou te faafaileleina le alofa, faaaloalo, ma le felagolagoma’i mo tagata taitoatasi o le aiga.
Ia tatou faamalosia le aiga. O tatalo faaleaiga ma faaletagata lava ia i taeao ma afiafi, e mafai ona valaaulia ai faamanuiaga a le Alii i luga o o tatou aiga. O taimi o taumafataga e maua ai se taimi matagofie e toe faamanatu ai gaoioiga o le aso, ma ia le gata la ina fafagaina ai le tino ae ia fafagaina ai foi ma le agaga, i le feauaua’i o tagata o le aiga i le faitauina o tusitusiga paia, ae maise lava o le Tusi a Mamona. O le po o se taimi lelei lea mo tamā pisi e alu atu ai i tafatafa o ana fanau taitoatasi, e talanoa ma i latou, tali ni a latou fesili, ma ta’u atu ia i latou lo latou matuai alofagia.24
O le aiga o se tasi o papuipui aupito malosi a le Atua e tetee atu ai i mea leaga o o tatou aso. Fesoasoani e faatumau le malolosi ma le vavalalata o o outou aiga ma agavaa ai i faamanuiaga a lo tatou Tama o i le Lagi. A o outou faia lea mea, o le a outou maua le faatuatua ma le malosiaga lea o le a faamanuiaina ai o outou olaga e faavavau.25
O se tasi o mea maoae o loo finagalo ai le Alii mai ia i tatou taitoatasi o le saunia lea o se aiga e i ai se faatosinaga fiafia ma lelei mo le manuia. I tausaga o lumanai, o le a le afaina tele ai le taugata o meaafale po o le aofai o faletaele, ae o le mea o le a matuai tele lona taua o le iloaina lea pe na lagona e a tatou fanau le alofa ma le taliaina i totonu o le aiga. O le a matuai taua pe na i ai le fiafia ma taliega, po o le fe’aina’i ma finauga.26
O aiga faamanuiaina e i ai le alofa ma le faaaloalo mo tagata taitoatasi o le aiga. E iloa e tagata o le aiga o loo alofaina ma talisapaia i latou. E lagona e fanau e alofagia i latou e o latou matua. O le mea lea, latou te saogalemu ai ma talitonu ia i latou lava.
O aiga malolosi e atinae ai se uiga faaalia o le [faia] o ni talanoaga anoa. Latou te talanoaina o latou faafitauli, fai faatasi fuafuaga, ma feoeoea’i i le ausiaina o faamoemoega tutusa. O afiafi faaleaiga ma fonotaga faaleaiga e faia ma faaaogaina o ni meafaigaluega aoga e ausia ai lenei mea.
O tama ma tina o aiga malolosi e latalata atu i a latou fanau. Latou te talanoa. O nisi tama e faatalanoaina aloaia lava tamaiti taitoatasi, o isi e faia faasamasamanoa, ae o isi e i ai taimi latou te faaaluina na o i latou lava ma tamaiti taitoatasi.
E tofu aiga uma ma faafitauli ma luitau. Ae o aiga faamanuiaina e taumafai e galulue faatasi mo ni vaifofō nai lo o le faaaogaina o faitioga ma finauga. Latou te tatalo mo le tasi ma le isi, talanoa, ma tuu atu faamalosiauga. E i ai taimi e anapopogi faatasi ai nei aiga ia lagolago ai se tagata o le aiga.
O aiga malolosi e felagolagoma’i le tasi ma le isi.27
4
O le aiga o le nofoaga sili lea mo fanau e aoao ai mataupu faavae ma tu masani o le talalelei.
O le aiga o le nofoaga aupito sili lea ona mataalia e aoao atu ai tulaga faatauaina tumau i ona tagata. O le olaga faaleaiga e malosi ma faavae i luga o mataupu faavae ma tu masani o le talalelei a Iesu Keriso, … e seasea vaaia ai ni faafitauli.28
Ua iloa e matua faamanuiaina e le faigofie le tausiga o se fanau i se siosiomaga ua faaleagaina i le amioleaga. O le mea lea, latou te faia ai ni faiga magafagafa e tuuina atu ai faatosinaga aupito sili ona lelei. E aoaoina ai mataupu faavae o amioga mama. E i ai ma faitauina ai tusi lelei. E puleaina lelei le matamataina o le televise. E maua ai musika lelei ma musuia. Ae o le mea e sili ona taua, e faitauina ma talanoaina ai tusitusiga paia o ni auala e fesoasoani e atiae ai le faaleagaga.
I maota o aiga faamanuiaina o le Au Paia o Aso e Gata Ai, e aoao ai e matua a latou fanau ia malamalama i le faatuatua i le Atua, salamo, papatisoga, ma le meaalofa o le Agaga Paia. (Tagai MF&F 68:25.)
O tatalo faaleaiga o se tu masani faifai pea i totonu o nei aiga. O le tatalo o le auala lea e faailoa atu ai le agaga talisapaia o faamanuiaga ma faailoa atu ai ma le lotomaualalo le faalagolago atu i le Atua Silisili Ese mo le malosi, tausiga ma le fesoasoani.
O se faamatalaga atamai ma le faamaoni e faapea, o aiga e tootutuli faatasi e tutusa’o i luga i luma o le Alii!29
E manaomia ona iloa e fanau po o ai i latou i le lagona e faavavau o lo latou faasinomaga. E manaomia ona latou iloa o loo i ai so latou Tama Faalelagi e faavavau, lea e mafai ona latou faalagolago i ai, lea e mafai ona latou tatalo atu i ai, ma maua mai ai lo latou taitaiga. E manaomia ona latou iloa le mea na latou o mai ai, ina ia i ai se uiga ma se faamoemoega o o latou olaga.
E tatau ona aoaoina fanau e tatalo, ia faalagolago i le Alii mo le taitaiga, ma ia faailoa atu le agaga faafetai mo faamanuiaga ua latou maua. Ou te manatua lo’u tootuli ai i autafa o moega o le ma fanau laiti, ma fesoasoani atu ia latou tatalo.
E tatau ona aoaoina fanau i le sa’o mai le sese. E mafai ma e tatau ona latou aoao i poloaiga a le Atua. E tatau ona aoaoina i latou e sese le gaoi, pepelo, po o le manao fua i mea a isi tagata.
E tatau ona aoao fanau e galulue i le aiga. E tatau ona latou aoaoina iina, o le galue faamaoni e atiae ai le amio solia ma le faaaloalo o le tagata ia te ia lava. E tatau ona latou aoao ia iloaina le matagofie o le galue, o le faia o se galuega ia lelei.
O taimi paganoa o tamaiti e tatau ona fuafuaina ma taulai tonu atu i gaoioiga talafeagai lelei.30
O le polokalama a le Ekalesia o le afiafi faaleaiga, na mamanuina ia faamalosia ma puipuia ai le aiga, e faia i se po se tasi o vaiaso taitasi, lea e ao ona faaavanoaina mo tama ma tina e faapotopoto faatasi mai ai ia i latou o latou atalii ma afafine.31
O mataupu faavae o le talalelei e mafai ona aoaoina e ala i afiafi faaleaiga anoa, lea o le a faamalolosia ai le autalavou ia latou le matatau mo o latou lumanai. O aoaoga faapena e tatau ona faia i le faatuatua, molimau ma le talitonu o le a lelei mea uma.32
O le faatulagaina lelei o o outou aiga o le tausia lea o poloaiga a le Atua. O lenei mea e aumaia ai le fealofani ma le alofa. … O tatalo faaleaiga i aso uma. O le aoaoina o o outou aiga ia malamalama i le talalelei a Iesu Keriso. O le tausia lea e tagata taitoatasi o le aiga o poloaiga a le Atua. O le … agavaa lea e maua se pepa faataga o le malumalu, o le maua e tagata uma o le aiga o sauniga o le faaeaga, ma le faamauina faatasi o lou aiga mo le faavavau. O le saoloto lea mai aitalafu soonafai, faatasi ai ma tagata o le aiga e totogi faamaoni sefuluai ma taulaga.33
5
Ua faaali mai e le Atua e mafai ona faaauauina aiga i talaatu o le oti.
O le alofa o loo tatou iloa iinei e le o se atalafoia femoumoua’i, ae o le ute tonu lea e fusia faatasi ai aiga mo le olaga nei ma le faavavau.34
Na faaali mai e le Atua o le Lagi e ala mai ia Iosefa Samita le upumoni e faapea, e mafai ona faaauauina aiga i talaatu o le oti—o o tatou tiga-alofa, lagona faamamai, ma le alofa o le tasi i le isi e mafai ona i ai e faavavau.35
E leai se taulaga e sili atu le maoae nai lo le mauaina o faamanuiaga o se faaipoipoga e faavavau. O le toatele o i tatou, e faigofie ona oo atu i se malumalu, ae atonu o le faigofie tele o le oo atu i ai, ua manatu mama tele ai i le faamanuiaga. E pei foi o isi vaega o le ola faamaoni i le talalelei, o le faaipoipoina i le ala a le Alii e manaomia ai se loto naunautai e faafiti oe lava mai mea e le faaleatua—mea faalelalolagi—ma se naunautaiga e fai le finagalo o lo tatou Tama. E ala i lenei faatinoga o le faatuatua, tatou te faaali atu ai lo tatou alolofa i le Atua ma lo tatou magafagafa i se augatupulaga e le’i fananau mai. A o avea o tatou aiga ma punavai sili o le olioli i lenei olaga, talosia ia faapena foi i le faavavau.36
Aiga ma le Auaiga. Oka se matagofie o mea e manatua e mapuna a’e mai o tatou loto i le ta’uaina o nei upu faapelepele! Ou te manao ma ou tatalo mo outou, faatasi ai ma le malosi uma o lo’u agaga, ina ia outou iloa le fiafia e le mafaamatalaina ma le faamalieina o le avea ma ni matua faamamaluina. O le a outou misia se tasi o fiafiaga sili ona loloto o lenei olaga ma le faavavau pe afai tou te aloese ma le loto i ai mai tiutetauave o le avea ma ni matua ma le fausiaina o se aiga. E pei ona faaalia mai e ala mai i le Perofeta o Iosefa Samita, o le manatu faavae matagofie o le aiga ma sootaga tumau faaleaiga, o loo taoto lea i le faavae tonu o lo tatou fiafia iinei ma le faavavau.37
Fautuaga mo Suesuega ma le Aoaoina Atu
Fesili
-
Na aoao mai Peresitene Benson, “I se lagona i le faavavau, o le faaolataga o se mataupu faaleaiga” (vaega 1). O le a le uiga o lenei mea ia te oe? O a ni mea e mafai ona fai e tagata o le aiga mo le faaolataga o le tasi ma le isi?
-
A o e suesue i le fautuaga a Peresitene Benson i le vaega 2, mafaufau loloto pe faapefea ona faatatau uma atu i le mea na ia ta’ua “o le mealilo i se faaipoipoga fiafia.” Aisea e te manatu ai o lenei “mealilo” e tau atu i le fiafia?
-
I le vaega 3, mafaufau i le saunoaga a Peresitene Benson e uiga i tu masani o ni aiga faamanuiaina. O a ni auala e faamalosia ai e nei tumasani ia aiga? Mafaufau loloto i se mea e mafai ona e faia e mulimuli ai i lenei fautuaga.
-
Aisea e te manatu ai o le aiga “o le nofoaga aupito sili lea ona mataalia e aoao atu ai tulaga faatauaina tumau”? (Tagai i le vaega 4, ia matau le fautuaga faapitoa a Peresitene Benson e uiga i le aoao atu i totonu o le aiga.) O le a se taimi na e vaaia ai tagata o le aiga o fesoasoani le tasi i le isi i le aoaoina o mataupu faavae o le talalelei?
-
Na molimau mai Peresitene Benson o aiga e mafai ona “faaauauina i talaatu o le oti” (vaega 5). O a ni ou manatu ma lagona a o e mafaufau loloto i lenei upumoni? O a nisi o “manatuaga matagofie” e te manatuaina pe a ta’ua le aiga ma le auaiga?
Mau Fesootai
Salamo 127:3–5; 1 Korinito 11:11; 3 Nifae 18:21; MF&F 49:15; 132:18–19; tagai foi i le “O Le Aiga: O Se Folafolaga i le Lalolagi,” Liahona, Nov. 2010, 129
Fesoasoani mo Suesuega
“O lau suesuega o le talalelei e sili atu ona aoga pe aoaoina oe e le Agaga Paia. Ia amata i taimi uma lau suesuega o le talalelei i le tatalo mo le Agaga Paia ina ia fesoasoani ia te oe” (Tala’i La’u Talalelei [2004], 18).