Mataupu 24
O Se Olaga e Faatotonugalemu ia Keriso
“O le auala aupito sili e fuaina ai so tatou maoae moni, o le auala o loo tatou amio ai e faapei o Keriso”
Mai le Soifuaga o Ezra Taft Benson
E masani ona sii mai e Peresitene Ezra Taft Benson le apoapoaiga a le Faaola i soo sa Nifae e toasefululua: “O a ituaiga o tagata e tatau ona outou i ai? E moni, ou te fai atu ia te outou e pei lava o a’u nei” (3 Nifae 27:27).1 O lenei mataupu faavae—o le manaomia ona avea atili e faapei o Keriso—sa avea soo ma manulauti o le auaunaga a Peresitene Benson, ae maise lava i le taimi o lana auaunaga o se Peresitene o le Korama a Aposetolo e Toasefululua ma le Peresitene o le Ekalesia.
O le tuuto atu o lona soifuaga e auauna ai i le Alii, na saunoa atu ai Peresitene Benson ma le mana ma le talitonuga maua’i ina ua ia faasoaina atu upu nei o [lana] molimau:
“Ou te molimau atu ia te outou, e leai se mea e sili atu le maoae, sili atu le faagaeetiaina, ma sili atu ona luitauina le faamalualiiina o le agaga nai lo o le taumafai e aoao e uiga ia Keriso ma savali i Ona tulagaaao. O lo tatou faataitaiga, o Iesu Keriso, sa femaliua’i i lenei lalolagi o le ‘Faaa’oa’o.’ O Ia o lo tatou Fautua i le Tama. Sa Ia faataunuuina le taulaga togiola maoae ina ia mafai ona tatou maua se atoatoaga o le olioli ma ia faaeaina e tusa ai ma Lona alofatunoa ma lo tatou salamo ma le amiotonu. Sa Ia faia mea uma ma le atoatoa ma poloai mai ia tatou atoatoa e pei o Ia ma Lona Tama e atoatoa. (Tagai 3 Nifae 12:48.)
“‘O le a se mea e fai e Iesu?’ po o le ‘O le a se mea e finagalo o Ia ou te faia?’ o fesili patino aupito taua ia o lenei olaga. O le savali i Ona ala o le mea aupito sili lea e ausia o le olaga. O le alii po o le tamaitai e sili ona faamanuiaina moni, o le tagata lea e sili ona latalata le ogatasi o lona olaga ma le soifuaga o le Matai.”2
A o apoapoai atu Peresitene Benson i le Au Paia e mulimuli i le faataitaiga atoatoa a le Faaola, sa ia faamanatu atu ia i latou, e na o le fesoasoani lava a le Matai e mafai ai ona latou faia ia mea. Na ia folafola mai:
“Ou te iloa o loo soifua le Alii. Ou te iloa e alofa o Ia ia i tatou. Ou te iloa o le o ese mai ia te Ia, e le mafai ona manuia ai se tagata, ae o le tumau ia te Ia, e leai se tasi e mafai ona toilalo.
“Ou te iloa e mafai e le Atua ona fesoasoani ia sili atu ona tatou manuia nai lo o le tatou faia na o i tatou lava.
“Tau ina ia tatou maua uma le lototele faamaoni e amata atu i lenei taimi e agai i luma, ina ia atili taumafai atoatoa ai i aso taitasi e mafaufau ia Keriso, aoao ia te Ia, savavali i Ona tulagaaao, ma fai mea e finagalo o Ia tatou te faia.”3
Aoaoga a Taft Benson
1
O le faataitaiga ma aoaoga a Iesu Keriso ua tuuina mai ai le tulaga faatonuina sili mo tagata uma.
O le lua afe tausaga ua mavae, na femaliua’i ai se tagata atoatoa i le lalolagi: o Iesu le Keriso. O Ia o le alo o se tama faalelagi ma se tina faalelalolagi. O Ia o le Atua o lenei lalolagi, i lalo o le Tama. Sa Ia aoaoina tagata i le upumoni, ina ia latou saoloto ai. O Ana faataitaiga ma mataupu ua tuuina mai ai le tulaga faatonuina silisili, le ala mautinoa e tasi, mo tagata uma.4
E leai se isi lava faatosinaga tutasi ua iloga le maoae o le aafiaga i lenei lalolagi e pei o le soifuaga o Iesu le Keriso. E le mafai ona tatou malamalama i o tatou olaga e aunoa ma ana aoaoga. Ana le seanoa o ia semanu tatou te fenumiai ma lē mautonu i talitonuga sese ma faiga o tapuaiga o loo tatou vaai i ai, o se taunuuga o le mata’u ma le pogisa lea ua faatauaina e tagata faalelalolagi ma faaletino. O loo tatou mamao lava mai le sini ua ia faatuina mo i tatou, ae e le tatau ona laaloa ai la tatou vaai; pe tatau foi ona galo ia i tatou o le tatou fe’a’eiga tele agai i le malamalama, e agai i le atoatoa, o le a le mafai ona faataunuuina e aunoa ma ana aoaoga, lona soifua, lona maliu, ma lona toetu.
… E tatau ona tatou aoao ma saga aoao pea, e na o le taliaina lava ma le ola i le talalelei o le alofa e pei ona aoao mai e le Matai, ma e na o le faia lava o lona finagalo e mafai ai ona tatou motusiaina noataga o le le iloa o se mea ma le masalosalo lea e saisaitia ai i tatou. E tatau ona tatou iloa lenei upumoni faigofie ma mamalu, ina ia mafai ona tatou lagonaina le suamalie o le olioli i le agaga i le taimi nei ma le faavavau. E tatau ona tatou faagalo i tatou lava i le faatinoina o lona finagalo. E tatau ona tatou faamuamuaina o ia i o tatou olaga.5
I le mataupu 14 o le Ioane, o loo faatofa atu ai ma le alofa Iesu i ona soo i le mae’a ai o le tausamaaga mulimuli. Ua ia fetalai atu ia i latou, e alu e sauni se nofoaga mo i latou i le maota o lona Tama; ina ia i ai foi i latou i le mea e i ai o ia. Ona fai atu lea o Toma ia te ia:
“Le Alii e, matou te le iloa le mea e te maliu atu i ai; matou te mafaia faapefea ona iloa o le ala?
“Ua fetalai atu Iesu ia te ia, O a’u nei le ala, ma le upu moni, ma le ola: e le alu atu lava se tasi i le Tama, pe a le ui mai ia te a’u.” (Ioane 14:5–6.) O loo taoto i o tatou luma le ala. Ua manino lelei lona faailogaina.6
2
Tatou te o mai ia Keriso a o tatou vaai atu ia te Ia i mafaufauga uma ma faataitai i Ona uiga paia.
I le gagana o le Tusi a Mamona, e manaomia ona tatou “talitonu ia Keriso ma lē teena o ia.” (2 Ni. 25:28.) E manaomia ona tatou faalagolago ia Keriso ae le o le lima o le tagata. (Tagai 2 Ni. 4:34.) E manaomia ona tatou “o mai ia Keriso, ma faaatoatoaina ia te ia.” (Moro. 10:32.) E manaomia ona tatou o mai “ma se loto momomo ma se agaga salamo” (3 Ni. 12:19), o loo fiaaai ma fiafeinu i le amiotonu (tagai 3 Nifae 12:6). E manaomia ona tatou o mai “e taumamafa fiafia i le afioga a Keriso” (2 Ni. 31:20), e pei ona tatou mauaina e ala i Ana tusitusiga paia, Lona faauuina, ma Lona Agaga Paia.
O le aotelega la, e manaomia ona tatou mulimuli “i le faataitaiga a le Alo o le Atua soifua” (2 Ni. 31:16).7
Na fetalai le Alii, “Vaai mai ia te a’u i mafaufauga uma.” (MF&F 6:36.) O le vaai atu i le Alii i mafaufauga uma, ua na o le pau lea o le auala e mafai ai ona avea i tatou ma ituaiga o alii ma tamaitai e tatau ona avea ai i tatou.
Na fesili atu le Alii i Ona soo, “O a ituaiga o tagata e tatau ona outou i ai?” Ona ia tali lea i Lana lava fesili i le faapea atu, “E pei lava o a’u nei.” (3 Ni. 27:27.) Ina ia avea e pei o Ia, e tatau ona tatou tuu o Ia i o tatou mafaufau—i o tatou mafaufau e le aunoa. O taimi uma tatou te aai ma feinu ai i le faamanatuga, ua tatou tautino atu ia “manatua pea o ia.” (Moro. 4:3; 5:2; MF&F 20:77, 79.)
Afai o mafaufauga ua fau ai o tatou ituaiga o tagata, ma e ao ona tatou faapei o Keriso, ona tatau lea ona tatou mafaufau i mafaufauga faaKeriso. Sei ou toe tau atu le mea lea: Afai o mafaufauga ua fau ai o tatou ituaiga o tagata, ma e ao ona tatou faapei o Keriso, ona tatau lea ona tatou mafaufau i mafaufauga faaKeriso.
… O o tatou mafaufauga e tatau ona i ai i le Alii. E tatau ona tatou mafaufau ia Keriso.8
Ia faataga o tatou olaga patino, o tatou aiga, ma a tatou faatinoga o galuega ia susulu mai ai o tatou uiga faaKeriso. O lea ia ola ai i se auala o le a faapea mai ai isi e uiga ia te oe, “O se Kerisiano moni le la!”
Ioe, tatou te talitonu ia Iesu Keriso, ae ia sili atu ona—tatou vaai atu ia te Ia, tatou faalagolago ia te Ia ma taumafai e faataitai i Ona uiga paia.9
O Keriso o lo tatou taulaiga atoa. O Ia o lo tatou faataitaiga. … O le auala aupito sili e fuaina ai so tatou maoae moni, o le auala o loo tatou amio ai e faapei o Keriso.10
O le avea e faapei o le Faaola—o se matuai luitau lava mo soo se tagata! O Ia o se tasi o le Aiga Atua. O Ia o le Faaola ma le Togiola. Sa atoatoa o Ia i vaega uma o Lona soifuaga. Sa leai se mea sese po o se faaletonu ia te Ia. Faamata e mafai ona tatou … avea e faapei o Ia? O le tali o le ioe. E le gata ina tatou mafaia, ae o lo tatou matafaioi foi lena, o lo tatou tiutetauave. Semanu Na te le tuuina mai ia i tatou lena poloaiga pe ana le finagalo o Ia tatou te faia [tagai Mataio 5:48; 3 Nifae 12:48].
O le Aposetolo o Peteru, o loo i le ata lenei ma Iesu Keriso toetu, na aoao mai i auala e mafai ona tatou faataitai ai i uiga o le Faaola.
Na saunoa le Aposetolo o Peteru e uiga i le faagasologa e mafai ai e se tagata ona maua “le amio Atua” (2 Peteru 1:4). E taua lenei mea, aua afai e avea i tatou ma ē moni e mauaina le amio Atua, o le a tatou avea e faapei o Ia. Sei o tatou vailiilia atili le mea ua aoao mai e Peteru ia i tatou e uiga i lenei faagasologa. O lana faamatalaga lenei:
“O le mea lea, ia outou matua faamalosi ai lava, ina ia faaopoopoina le amio lelei i lo outou faatuatua; ia faaopoopo foi le poto i le amio lelei;
“Ia faaopoopo foi le le gaoia i le poto; ma ia faaopoopo le onosai i le le gaoia; o le amio Atua foi i le onosai;
“Ia faaopoopo foi le alofa i le au uso i le amio Atua; o le alofa foi i le alofa i le au uso” (2 Peteru 1:5–7).
O amioga mama na faataatitia e Peteru o vaega ia o le amio Atua, po o uiga auau mama o le Faaola. O amioga mama nei e ao ona tatou faataitaia pe afai tatou te fia avea atili e pei o Ia. Sei o tatou talanoaina ni nai uiga taua o uiga nei.
O le uiga muamua, lea e faaopoopo atu uma i ai isi uiga, o le faatuatua. O le faatuatua o le faavae lea e fausia ai se uiga faaleatua. …
Sa faaauau le saunoaga a Peteru i le faapea mai e tatau ona tatou faaopoopoina i lo tatou faatuatua le amio mama. … O le amio mama ua fautuaina ai e tatau i [se tagata] ona i ai mafaufauga mama ma amioga mama. O le a le tuinanau o ia i lona loto, aua o le faia o lena mea o le a “faafiti e ia le faatuatua” ma aluese ai le Agaga (MF&F 42:23)—ma e leai se mea e sili atu le taua i lenei galuega nai lo o le Agaga. …
O le amio mama e fesootai ma le paia, o se uiga auaumama o le amio Atua. E tatau ona [tatou] matuai saili mo mea e mama ma matagofie ae le o mea eleelea ma inosia. O le mama o le a teuteuina ai [o tatou] manatu e le aunoa (tagai MF&F 121:45). E mafai faapefea e se tagata ona gauai atu ona lava tuinanau i le leaga o ponokalafi, gagana masoa, po o uiga tufanua ae manatu ia te ia lava e matua mama atoatoa? …
O le isi laasaga na faamatala e Peteru i le faagasologa o le tuputupu ae, o le faaopoopo lea o le poto i lo tatou faatuatua ma le amio mama. Ua ta’u mai e le Alii ia i tatou “e le mafai lava ona faaolaina se tagata i le lē iloa [o se mea]” (MF&F 131:6). I se isi nofoaga na poloai mai ai le Atua, “Ia outou saili mai totonu o tusi sili ona lelei upu o le poto; saili i le aoaoina, e ala lava lea i le suesue ma le faatuatua foi” (MF&F 88:118). … E ui ina taua soo se suesuega o le upumoni, ae o upumoni o le faaolataga o upumoni sili ia ona taua i soo se tagata e mafai ona aoaoina. O le fesili a le Alii, “Aua se a le aoga i le tagata pe afai na te maua le lalolagi uma, ae maumau ai lona ola?” (Mataio 16:26) e mafai ona faatatau i sailiga faaleaoaoga faapea foi ma sailiga o mea faalelalolagi. Atonu foi e fesili le Alii, “Se a le aoga i le tagata, pe afai na te aoaoina mea uma o le lalolagi ae le aoao pe faapefea ona faaolaina?” …
O le tuufaatasia o lo tatou aoaoina faaleagaga ma lo tatou aoaoina faalelalolagi o le a fesoasoani ia i tatou e faatumauina ai lo tatou taulaiga i mea e sili ona taua i lenei olaga. …
O le isi uiga na faamatalaina e Peteru o se vaega o le amio Atua o le le gaoia. [O se tagata e le gaoia] e taofiofi i ona lagona ma upu e tautala ai. Na te faia mea i se auala e paleni lelei ma e le soona faia pe soona faaaogaina tele se mea. I se faaupuga, e amio pulea. O ia e pule i ona lagona, ae le o le faafeagai. …
I lo tatou le gaoia e ao ona tatou faaopoopo atu i ai le onosai. … O le onosai o le isi lea ituaiga o amio pulea. O le tomai lea e tolopo ai le faamalieina o se manao ma pulea lelei tuinanau o se tagata. I ana mafutaga ma e pele ia te ia, o se tagata onosai na te le faia ni amioga le mafaufau lea o le a ia toe salamo mulimuli ai. O le onosai o le faato’ato’a lea i taimi o le popolevale. O se tagata onosai e malamalama i sese o isi.
O se tagata onosai foi e faatalitali i le Alii. O nisi taimi tatou te faitau pe faalogo ai i tagata o e sailia se faamanuiaga mai le Alii, ona le to’a lelei lea pe afai e le vave oo mai le tali. O se vaega o le natura paia o le amioatua o le lava lea o le faalagolago i le Alii ia “filemu ma iloa o [ia]] o le Atua” (MF&F 101:16).
O se [tagata] e onosai o le a faapalepale i mea sese ma faaletonu o tagata e pele ia te ia. Ona e alofa o ia ia te i latou, o le a ia le sailiili masei pe faitio pe tautuua’i foi.
O le isi uiga na ta’ua e Peteru o le agalelei. … O se tagata e agalelei e tiga alofa ma agamalu i isi. E magafagafa o ia i lagona o isi ma e amiosolia. E loto fesoasoani. O le agalelei e magalo ai vaivaiga ma sese o isi. O le agalelei e oo atu i tagata uma—i e matutua ma e talavou, i manu o le fanua, i e o i tulaga maualalalo faapea ma e o i tulaga maualuluga.
O uiga moni nei o le natura paia o le amioatua. Ua outou tagai la i auala e mafai ai ona avea atili i tatou e faapei o Keriso, pe a faateleina lo tatou amiomama, faateleina le agalelei, faateleina le onosai, ma faateleina lo tatou pulea o o tatou lagona loloto?
Na faaaoga e le Aposetolo o Paulo nisi o faaupuga manino e faamanino ai e tatau ona ese mai se tagata o le Ekalesia mai le lalolagi. Sa ia fautuaina i tatou e “oofu ia Keriso” (Kalatia 3:27), “to ese le tagata tuai,” ae “oofu … i le tagata fou” (Efeso 4:22, 24).
O le amio mama mulimuli ma o le faatumutumuga lea o uiga paia o le alofa mama, po o le alofa le pona o Keriso (tagai Moronae 7:47). Afai o le a tatou saili moni ia avea atili e pei o lo tatou Faaola ma le Matai, ona tatau lea ona avea le aoao e alofa atu e pei ona Ia alofa mai ma a tatou sini aupito maualuga. Na ta’ua e Mamona le alofa mama o le alofa lea “ua silisili … i mea uma” (Moronae 7:46).
Ua tele naua talanoaga a le lalolagi i aso nei e uiga i le alofa, ma o loo sailia foi e le toatele. Ae o le alofa le pona o Keriso e matuai tele sona eseesega mai le mea ua manatu i ai le lalolagi e uiga i le alofa. O le alofa mama e le sailia ni mea e faamalie ai le manatu faapito. O le alofa le pona o Keriso e na o le tuputupu ae e faavavau ma le fiafia o isi na te sailia. …
Na tautino mai le Faaola, o le ola e faavavau o le iloa lea o le Atua moni e toatasi ma Lona Alo o Iesu Keriao (tagai Ioane 17:3). Afai e moni lenei mea, ma ou te molimau faamaoni atu e moni, ona tatau lea ona tatou fesili ifo po o a ni auala tatou te iloa ai le Atua. O le faagasologa o le faaopoopo atu o le tasi uiga faaleatua i le isi, e pei ona faamatalaina e Peteru, e avea ma itu taua i le mauaina o lenei malamalama e tau atu i le ola e faavavau. Ia matau le folafolaga a Peteru, lea e sosoo ane ai lava i le faagasologa na faamatalaina:
“Aua pe a maua e outou ia mea, ma ua faateleina, ona avea ai lea o outou ma e ua le paie, a o e fua mai le iloa lelei o lo tatou Alii o Iesu Keriso” (2 Peteru 1:8; faaopoopo le faatusilima).
…Ou te tatalo ina ia faateleina nei uiga auau mama ma uiga paia o le Faaola ia i tatou ina ia oo i le taimi tatou te tutu ai i le Faamasinoga ma fesili mai o Ia ia i tatou taitoatasi, “O a ituaiga o tagata e tatau ona outou i ai?” ae ua mafai ona ea i luga o tatou ulu i le lotofaafetai ma le olioli ma tali atu, “E pei lava o lau afio.”11
3
O le a faamafanafanaina ma siia’e i tatou e le Faaola i a tatou taumafaiga e tutumau i luga o le ala ua Ia faailogaina mo i tatou.
E ui ina tatou o ese mai le ala ua faailogaina mo i tatou e le Tamalii o Kalilaia, o lena lava tulaga ua tatou toilalo ai i a tatou lava tauiviga taitoatasi. … Ae e le o tuuaunoaina i tatou mai lana fesoasoani. Na faafia ona ia fetalai atu i ona soo, ma i tatou uma, “Aua le atuatuvale o outou loto. …”
“Afai tou te ole atu i se mea i lo’u igoa, ou te faia lava.”
“Ou te le tuua outou o matuaoti. …”
“Ou te tuuina atu ia te outou le manuia, o lo’u manuia ou te avatu ai ia te outou. …” (Ioane 14:1, 14, 18, 27.)12
Se’i o tatou toe liliu atu i le Tusi a Mamona … e aoao ai nisi o mataupu faavae e uiga i le o mai ia Keriso, o le tuuto atu ia te Ia, taulai atu ia te Ia, ma faagalo i tatou lava ae mulimuli ia te Ia. O le a tatou sii maia ni nai mau mai le anoano o mau e uiga i lea mataupu.
Muamua, e tatau ona tatou iloa ua valaaulia i tatou e Keriso e o mai ia te Ia. “Faauta, ua ia auina mai se valaaulia i tagata uma, ona ua faaloaloa mai ia te i latou aao o le alofa mutimutivale, … Ioe, ua fetalai mai o ia: O mai ia ia te a’u ma o le a outou aai ai i le fua o le laau o le ola” (Alema 5:33–34).
O mai, aua e tu o ia “ma aao faaloaloa mai e tali outou” (Mamona 6:17).
O mai, aua “o le a ia faamafanafana outou i o outou puapuaga, ma o le a ia aioia a outou tagi” (Iakopo 3:1).
“O mai ia te ia, ma tuu atu o outou agaga atoa e fai ma taulaga ia te ia” (Ominae 1:26).
A o tapunia e Moronae talafaamaumau o le malo o sa Iareto, sa ia tusia, “Ou te apoapoai atu ia te outou ia outou saili lenei Iesu o le ua tusi i ai le au perofeta ma aposetolo” (Eteru 12:41).
I upu faaiu a Moronae o loo tusia e lata i le mutaaga o le malo o sa Nifae, fai mai a ia, “Ioe, o mai ia Keriso, ma faaatoatoaina ia te ia, … ma afai tou te faafiti outou lava mai mea uma e le faaleatua, ma alolofa i le Atua ma o outou manatu atoa, mafaufau, ma le malosi atoa, ona lava lea o lona alofa tunoa mo outou” (Moronae 10:32).
O i latou o e ua tuuto atu ia Keriso e “tutu o ni molimau a le Atua i taimi uma ma i mea uma, ma i nofoaga uma” e mafai ona latou i ai “seia oo lava i le oti” (Mosaea 18:9). Latou te “taofi le suafa” o Keriso ia “tusia pea” i o latou loto (Mosaea 5:12). Latou te tauave i o latou lava luga “le suafa o Keriso, ma ua i ai le maua’i e auauna atu ia te ia e oo i le iuga” (Moronae 6:3).
Pe a tatou ola i se olaga e faatotonugalemu ia Keriso, “[tatou te] tautalatala e uiga ia Keriso, [tatou te] olioli ia Keriso, [tatou te] talai atu Keriso” (2 Nifae 25:26). Tatou te “tali le afioga malie a le Atua, ma taumamafa fiafia i lona alofa” (Iakopo 3:2). E ui lava ina sa oi le loto o Nifae ona o ana agasala, ae na ia fai mai, “Ua ou iloa lē ua ou faalagolago i ai. Sa avea lo’u Atua ma o’u lagolago” (2 Nifae 4:19–20).
Tatou te manatua le fautuaga a Alema: “Tuu atu i le Alii au mea uma e fai, ma soo se mea e te alu i ai ia tuu atu i le Alii; ioe, ia tuu atu ou manatu uma i le Alii; ioe, ia tuu atu alofaaga o lou loto i le Alii e faavavau.Filifili faatasi ma le Alii i au mea uma e fai” (Alema 37:36–37).
Fai mai Helamana, “Ia manatua, ia manatua, o luga lava o le papa o lo tatou Togiola, o Keriso lea, … e ao ina oulua atinae ai lo oulua faavae; ina ia pe a auina mai e le tiapolo ana matagi malolosi, … o le a leai [so latou] mana i luga o oulua e toso ifo ai oulua i lalo o le to o le pagatia” (Helamana 5:12).
Na fai mai Nifae, o le Alii “ua ia faatumuina a’u i lona alofa, ua oo lava ina mu ai lo’u tino” (2 Nifae 4:21). O i latou o e maliliu ia Keriso “ua faaolaina ia Keriso” (2 Nifae 25:25). Latou “le mafatia i soo se ituaiga o puapuaga, vagana ai ua tofatumoanaina i le olioli ia Keriso” (Alema 31:38). E “opoina i latou i aao o Iesu” (Mamona 5:11). O la Nifae, “Ou te olioli i lo’u Iesu, ona ua togiola e ia lo’u agaga” (2 Nifae 33:6). Fai mai Liae, “Ua siosiomia a’u e faavavau i aao o lona alofa” (2 Nifae 1:15). …
… [Na tusia] e lena tagata maoae o Mamona se tusi i lona atalii faapelepele o Moronae, i upu nei:
“Lou atalii e, ia e faamaoni ia Keriso; ma ia le avea mea ua ou tusia ma mea e te faanoanoa ai, e faamamafa ai oe i lalo sei e oti; ae talosia ia sii ae oe i luga e Keriso, ma talosia ia mau e faavavau i lou mafaufau ona mafatia ma lona maliu, ma le faaali mai o lona tino i o tatou tamā, ma lona alofa mutimutivale ma le tali-tiga, ma le faamoemoe o lona mamalu ma le ola faavavau.
“Ma talosia ia i ai, ma mau faatasi ma oe e faavavau, le alofa tunoa o le Atua le Tama, o le o lona nofoalii ua maualuga i le lagi, ma lo tatou Alii o Iesu Keriso, o le ua afio i le itu aao taumatau o lona mana, seia oo ina pule o ia i mea uma” (Moronae 9:25–26).
O la’u tatalo mo i tatou taitoatasi, ia tatou mulimuli foi i lena fautuaga musuia: “Ia faamaoni ia Keriso.” Ma o le a Ia sii a’e i tatou ma o Lona alofa tunoa o le a i ai ma mau faatasi ma i tatou e faavavau.13
Fautuaga mo Suesuega ma le Aoaoina Atu
Fesili
-
Na folafola mai e Peresitene Benson, “E leai se isi faatosinaga tutasi ua iloga le maoae o le aafiaga i lenei lalolagi e pei o le soifuaga o Iesu le Keriso” (vaega 1). O a ni auala ua faia e le soifuaga o le Faaola se aafiaga i le lalolagi? O a ni auala ua faatosinaina ai oe e Lona soifuaga?
-
E faapefea ona suia o tatou olaga pe a tatou “mafaufau ia Keriso”? E faapefea ona fesootai o tatou mafaufauga ma o tatou uiga? A o e suesueina le vaega 2, mafaufau loloto i mea e mafai ona e faia e atiina ae atili ai atoatoa uiga faaKeriso o loo ta’ua iina.
-
E mafai faapefea ona aumai e aoaoga i le vaega 3 le faamoemoe ia i tatou a o tatou taumafai ia avea atili e faapei o le Faaola? O faapefea ona fesoasoani le Faaola ia te oe i au taumafaiga e mulimuli ia te Ia?
Mau Fesootai
Mareko 8:34; Filipi 4:13; 1 Ioane 3:23–24; 2 Nifae 25:23, 26; Mosaea 3:19; Alema 7:11–13; Moronae 7:48
Fesoasoaniga mo le Aoao Atu
“Fuafua ia gaoioiga e suesue ai o le a fausia ai lou faatuatua i le Faaola” (Tala’i La’u Talalelei [2004], 22). Mo se faataitaiga, a o e suesue atonu e te fesili ifo ia te oe lava i fesili e pei o fesili nei: “E mafai faapefea ona fesoasoani nei aoaoga ia te a’u e faateleina ai lo’u malamalama i le Togiola a Iesu Keriso? E mafai faapefea ona fesoasoani nei aoaoga ia te a’u ia ou avea atili ai e pei o le Faaola?”