Mataupu 17
Tausia o le Tulafono o le Ola Mama
“O le tulafono o le amio mama a le lagi mo alii ma tamaitai uma o le ola mama atoatoa a o le’i faaipoipo ma le faamaoni a’ia’i pe a uma ona faaipoipo.”
Mai le Soifuaga o Ezra Taft Benson
O le tele o femalagaa’iga i le avea ai o se taitai faalelotu ma se taitai faalemalo, na silafia lelei ai e Peresitene Ezra Taft Benson le faaauau pea o le faiifo o amioga mama i le lalolagi atoa, ae maise lava e faatatau lea i le tulafono o le ola mama. Sa tu malosi o ia e tetee atu i lenei tulaga faiifo, i le aoao atu lea “o le tulafono o le ola mama o se mataupu faavae taua e faavavau.”1 Na ia folafola mai “i totonu o le Ekalesia ma le malo o le Atua, o le ola mama o se mea e le mafai ona uma lona aoga, e tusa lava po o a faamatalaga ma mea e fai e le lalolagi.”2 Sa ia toe aoao mai foi: “E tatau ona tatou i ai i le lalolagi amioleaga ma lē mama , … ae le o ni ō le lalolagi. E tatau ona faigofie ona tatou momoe i le po e aunoa ma le popole i ni mea le mamā na tatou faia.”3
Ina ia faaalia le taua o le faatumauina o le mama mai faatosinaga le mama a le lalolagi, na faasoa mai ai e Peresitene Benson le tala lenei:
“Ou te manatuaina se tala i se teine talavou, o le na o atu ma lana uo i se tafaoga faamasani, i se nofoaga sa fesiligia lona talafeagai, na le tusa ai foi ma le fautuaga poto a ona matua. Na fesili o ia, ‘O le a le leaga o le na o le alu i totonu e vaai po o a mea e fai ai iina?’ Sa iu ina lolo atu manatu o ona matua ia te ia ma fautuaina o ia e fai lona ofu paepae manaia mo lea tafaoga. A o le’i taunuu mai lana alii talavou, na faapea atu lona tama, ‘E mafai ona e faia se mea lea mo a’u ae e te le’i alu, alu i fafo i le falefa’aasu e aumai se fasipuaa manifi?’
“Sa te’i le teineitiiti i lenei talosaga ma faapea atu, ‘I lo’u ofu sili ona lelei? O le a le mafai ona ou aveesea lena manogi leaga.’ Sa fai atu lona tina, ‘E sa’o lelei, e le mafai ona e alu i totonu o le fale fa’aasu e aunoa ma lou aafia ai i nisi o aafiaga iina. Ma te manatu ua lava lou atamai e te le alu ai i totonu o se nofoaga e te sau ai i fafo ua faaitiitia lou lalelei ma lou mama nai lo o le taimi na e alu ai i totonu.’ Faatasi ai ma lenei fautuaga poto, na faia ai e lenei tamaitai talavou le faaiuga sa’o ia tausia o ia lava ia le pisia ma mama mai aafiaga a le tiapolo i le lalolagi.”4
O le usiusitai i le tulafono o le ola mama e aumaia ai se “lagona taua o le olioli ma le fiafia.”
Aoaoga a Ezra Taft Benson
1
Ua faatuina e le Atua le tulaga faatonuina o le ola mama mo Lana fanau.
I lenei tisipenisione na toe tuuina mai ai e le Alii le poloaiga na tuuina atu i Sinai ina ua Ia fetalai mai, “Aua e te … mulilua, … pe e te faia soo se mea faapena” (MF&F 59:6, faaopoopo le faamamafa). Mai le amataga o taimi, na faavaeina ai e le Alii se tulaga faatonuina manino ma le mafaaseseina o le mama i feusuaiga. O le mea lava lea na i ai i taimi uma, o loo i ai nei, ma o le a i ai pea i taimi uma. O le tulaga faatonuina o le tulafono o le ola mama. O le tulafono e laugatasia uma ai—alii ma tamaitai, mo e matutua ma talavou, mo e mauoa ma matitiva.5
E leai se tulaga faatonuina itulua a le Ekalesia e uiga i le ola mama. O le tulafono o le amio mama a le lagi mo alii ma tamaitai o le mama atoatoa lea a o le’i faaipoipo ma le faamaoni a’ia’i pe a uma ona faaipoipo.6
I le Tusi a Mamona, o loo ta’u mai ai e le perofeta o Iakopo ia i tatou e faapea, e fiafia tele le Alii i le legaoia po o le ola mama o Lana fanau (tagai Iakopo 2:28). Ua outou faafofoga i ai, o’u uso e ma tuafafine? E le na o le fiafia o le Alii pe a tatou amio mama; e fiafia tele o Ia i le legaoia. Na aoao atu e Mamona lea lava mea e tasi i lona atalii o Moronae ina ua ia tusia o le legaoia ma le mama “o le mea lena ua silisili ona pele ma taua i luga o mea uma lava” (Moronae 9:9).7
O le manao faalenatura o alii ma tamaitai ina ia faatasia e mai le Atua lea. Ae o ia ituaiga fegalegaleaiga ua noatia e Ana tulafono. O na mea ua faapolopoloina ma le tatau mo le faaipoipoga, a faia i totonu o noataga o le faaipoipoga, e sa’o ma faafiafiaina i luma o le Atua ma faataunuu ai le poloaiga ina ia fanafanau ma faatumuina le lalolagi. Ae o na lava foi mea pe a faaaogaina i fafo atu o noataga o le faaipoipoga, o se fetuu lea.8
O atu i le fatafaitaulaga o le faaipoipoga ma le paia ma le mama. Ua faapolopolo mo le sootaga o le faaipoipoga na fesootaiga matagofie ma faamama’i lea na fuafuaina e le Atua o le Lagi e tatau ona avea ma se vaega o le faaipoipoga ae le o le faatinoina ma le le tatau i fafo atu o feagaiga o le faaipoipoga. Ou te le popole pe o le a se tala a le lalolagi, ae o tulaga faatonuina nei o le malo o le Atua.9
2
O le agasala faataumaoi a lenei tupulaga o feusuaiga le mama.
O le agasala faataumaoi a lenei tupulaga o feusuaiga le mama. O lenei tulaga, na saunoa ai le Perofeta o Iosefa, o le a avea ma puna o isi mau faaosoosoga, isi tu’iga, ma isi faigata mo toeaiina o Isaraelu nai lo se isi mea.10
O feusuaiga le mama o se amioga faatiapolo e le gata ua osofaia ai le lalolagi, ae faapena foi le Ekalesia i aso nei. O le le talitonuina o lea mea, o le faamalieina lea o le tagata lava ia i se tulaga lamatia po o le le amanaiaina o le matautia o aafiaga o feusuaiga le mama. I le faatulagaina o soligatulafono, e na o le fasioti tagata ma le faafitia o le Agaga Paia e muamua atu i uiga feusuai ua faasaina, lea tatou te ta’ua o le faitaaga pe a aafia ai se tagata e le’i faaipoipo, po o le agasala matuia atu o le mulilua pe a aafia ai se tagata ua faaipoipo. Ou te iloa o tulafono o le laueleele e le manatu mamafa i le ola le mama e pei ona mamafa i le Atua, pe ogaoga foi faasalaga e pei ona i ai faasalaga a le Atua, ae e le suia ai e lena mea lona inosiaina. I le silafaga a le Atua e na’o le tasi lava le tulaga faatonuina o amioga mama mo alii ma tamaitai. I le silafaga a le Atua e le uma lava le taua ma le mamafa o le ola mama. …
E leai se isi agasala ua mafua ai ona aluese le Agaga o le Alii mai o tatou tagata i aso nei nai lo o feusuaiga ia ua fai faataaloga i vai. O le mafuaaga lea o le tautevateva o o tatou tagata, ua ta’usalaina ai lo latou tuputupu a’e, faavaivaia ai o latou malosiaga faaleagaga, ma faapea ona lamatia ai i latou i isi agasala.11
O loo i ai se tulaga matautia tele i le fausiaina o au sootaga a o le’i faaipoipo i luga o se faavae o sootaga faaletino. … O aafiaga matautia o na sootaga le faatulafonoina, e faaauau atu ai lava i le olaga faaipoipo, e aumaia ai le le fiafia, lototiga, ma le faavaivaia o le fausaga o le aiga.12
O amioga mama a’ia’i o se mataupu faavae e faavavau. O le Agaga o le Atua “e le mafai ona afio i malumalu le paia” [tagai Helamana 4:24]. O le mama a’ia’i e aumai ai le ola; o le le mama e oo mai ai le oti. E le mafai ona solia tulafono paia a le Atua e aunoa ma le faasalaina. Ua toilalo malo tetele ona o le faaleagaina o amioga mama, ona o agasala o le ola le mama ua tuua ai o latou tagata o ni tagata mailaila ma faalumaina o e ua le mafai ona toe faafesaga’i ma luitau o o latou aso.13
O le ola le mama o le mea leaga aupito sili ona tausalaina lea o mea leaga uma, ae o le ola mama o se tasi lea o puipuiga aupito sili ona malosi o le faafatuaiga faamanuiaina. O aiga fiafia ma faamanuiaina e le mafai ona fausia i luga o le ola le mama.14
O nisi latou te tauamiotonuina lo latou ola le mama i le finau mai e faapea, o tapulaa e faatatau i ai ua na o ni tulafono faalelotu, o ni tulafono e leai ni uiga aua o le mea moni lava e leai se Atua. O lenei mea o le a e iloaina ua na o se ‘alofaga e le moni, ua mamanuina e ta’uamiotonu ai le matelaina faalelalolagi o se tagata, tuinanau o le tino, ma manaoga faananau. O le tulafono a le Atua e le masuia. E faatatau i tagata uma, pe latou te talitonu i le Atua pe leai. E aafia ai tagata uma i ona faasalaga, e tusa lava pe o le a le taumafai o se tagata e fai ni ‘alofaga pe le amanaiaina.
O le ola le mama … na te aumaia i taimi uma se taunuuga faanoanoa. E le mafai e se tagata ona faia ni mafutaga le mama e aunoa ma le puapuagatia i ona aafiaga faataumaoi. E le mafai ona ia faia ni mea sese ma maua ai ni lagona lelei—e le mafai. Soo se taimi lava e soli ai e se tasi se tulafono a le Atua, na te totogia le sala i le lototiga, i le faanoanoa, i le salamo, i le leai o se faaaloalo mo ia lava, ma ia aveesea ai o ia lava mai le fesootaiga ma le Agaga o le Atua.15
3
Ina ia faatumauina le ola mama a’ia’i, e tatau ona tatou saunia i tatou lava e tetee atu i faaosoosoga.
E toatele tagata e pauu atu i agasala o feusuaiga i se taumafaiga lē tapasaina e faamalie ia tuinanau faaletagata. E tofu i tatou uma ma se manao ina ia lagona le alofaina ma le ta’uaogaina. Tatou te saili uma foi ia maua le olioli ma le fiafia i o tatou olaga. O le iloaina o lenei mea, e masani ai ona faatosina e Satani ia tagata i le ola le mama e ala i le ta’alo’alo i o latou manaoga masani. Ua ia folafola mai le fiafia ma le faamalieina.
Ae e moni lava, o lenei mea o se taufaasese. E pei ona fai mai le tusitala o le Faataoto: “O lē mulilua i le fafine ua leai sona mafaufau: o lē na te faia lea mea, na te faaumatia e ia lona lava ola” (Faataoto 6:32). Na aoao mai e Samuelu le Sa Lamana lea lava mea e tasi ina ua ia fai mai, “Ua outou saili mo le fiafia i le fai o le amioletonu, o se mea lea ua le tusa ai ma le natura o lena amiotonu” (Helamana 13:38). Na faafaigofie mai e Alema e faapea: “E le’i avea lava le amioleaga ma fiafia” (Alema 41:10).16
E i ai se muagagana anamua e faapea: E sili le saunia ma le puipuia i lo le salamo ma tau togafitia. E sa’o lelei lena faaupuga e faatatau i le tulafono o le ola mama. O le uluai puipuiga lava i le faatumauina o lo tatou ola mama o le saunia lea o i tatou lava e tetee atu i faaosoosoga ma puipuia i tatou lava mai le pauu atu i le agasala.17
Mafaufauga mama
Ia pulea ou mafaufauga. E leai se tasi e faafuasei lava ona oo i le ola le mama. O fatu muamua lava o le ola le mama e totoina i taimi uma i le mafaufau. A tatou faatagaina o tatou mafaufauga e taulai atu i mea leaga po o mea le mama, o lona uiga ua e laasia le laasaga muamua e agai atu i le ola le mama. E faapitoa ona ou lapataia outou ia tetee atu i mea leaga o ponokalafi. Ua faafia ona tatou faalogo ia i latou o e na tofatumoanaina i le loloto o le agasala e faapea, e masani lava o le laasaga muamua i lo latou agai atu i le solitulafono, sa amataina i mea faaponokalafi. Sa aoao mai le Faaola e tusa lava pe o le vaai atu o se alii i se tamaitai ma tuinanau atu i ai, po o se isi faaupuga, pe a ia faatagaina ona mafaufauga ia le taofiofia, ua uma ona ia solia le mulilua faatasi ma ia i lona loto (tagai Mataio 5:28; MF&F 63:16).18
O i latou e mafaufau i mafaufauga mama latou te le faia ni amioga eleelea. E le gata e te tali atu i luma o le Atua mo au amioga, ae faapea foi mo le puleaina o ou mafaufauga. O lea, ia ola ina ia e le nē pe afai e faaalia ou mafaufauga ma amioga i luga o se lauie i lau lotu. E sa’o lava le faaupuga tuai e faapea, a e totoina ni mafaufauga e te seleseleina ni amioga, a e totoina ni amioga e te seleseleina ni mausa, a e totoina ni mausa e te seleseleina ni uiga faaletagata, ma o ou uiga faaletagata e te iloa ai lou taunuuga e faavavau. “E pei ona manatu o ia i lona loto, ua faapea lava o ia.” (Tagai Faataoto 23:7.)19
Ia mafaufau ma le toto’a i upu a le perofeta o Alema i lona atalii faalogogata o Korianetona, “Lafoai au agasala ma aua e te toe alu e tusa ma tuinanau o ou mata” (Alema 39:9).
“O tuinanau o ou mata.” I o tatou aso, o le a le uiga o lena faamatalaga?
O ata tifaga, polokalama a le televise, ma ata vitio e taufaaosooso ma lē mama.
O Mekasini ma tusi e mataga ma faaponokalafi.
Matou te fautuaina outou … e aua le faaleagaina o outou mafaufau i na mea faatufanua, aua o le mafaufau e oo atu i ai lenei eleelea, o le a le toe tutusa lava i se taimi mulimuli ane.20
Ia mama. Ia mama o outou mafaufauga ma amioga. Faitau i tusi lelei. Aua nei tuua o outou mafaufau e noatia i ponokalafi. … I fetalaiga a le Alii, “Ia tuu le amiomama e teuteuina ai ou mafaufauga e le aunoa; ona solo malosi ai lea o lou lototele i luma o le Atua. O le a avea le Agaga Paia ma au soa e le aunoa.” (MF&F 121:45–46.)21
Tatalo mo le malosi
Ia tatalo e le aunoa mo le malosi e tetee ai i faaosoosoga. O le a oo mai faaosoosoga ia i tatou uma lava. O le a oo mai i ni ituaiga se tele ma faaali mai i le tele o mea taufaasese, ae ua tuuina mai e le Alii ia i tatou le ki mo le teenaina. Sa fetalai o Ia i le Perofeta o Iosefa Samita: “Tatalo e le aunoa, ina ia mafai ona e sau ai o lē ua manumalo; ioe, ina ia mafai ona e manumalo ia Satani, ma ina ia e sao ese mai lima o auauna a Satani ua sapasapaia lana galuega” (MF&F 10:5). E tatau ona avea ma vaega o a tatou tatalo i aso uma le ole atu i le Alii mo le malosi faifai pea e tetee ai i faaosoosoga, ae maise lava o faaosoosoga e aafia ai le tulafono o le ola mama.22
E leai se faaosoosoga e tuu atu i ou luma e le mafai ona e teenaina. Aua ne’i faatagaina oe lava e te i ai i tulaga ia e faigofie ai ona e pa’ū. Faalogo i uunaiga a le Agaga. Afai o loo e auai ni mea e te lagona ai e le mafai ona e tatalo ma ole atu mo faamanuiaga a le Alii i luga o le mea o loo e faia, o lona uiga o loo e punouai i ni ituaiga gaoioiga sese.23
Aloese mai i tulaga le talafeagai
O alii ma tamaitai o e ua faaipoipo, o nisi taimi e faatafai ma ta’alo’alo ma taufaalili ai i tagata o le isi itupa. E fuafuaina ni feiloaiga ia e manatu e le afaina, po o le faaaluina o ni taimi se tele e faatasitasi ai. I nei tulaga uma, e ‘alo ai tagata i le faapea mai o nei faatasiga ua na o ni lagona masani lava o faauooga. Ae o le mea na foliga mai atonu o se taufaalili sa manatu e leai se afaina, pe na o sina taimi itiiti e fiafia ai ma le tagata o le isi itupa, e faigofie lava ona oo atu i se aafiaga matuia ma iu ai i le le faamaoni a’ia’i i le va faaleulugalii.
O se fesili lelei lava ia fesili ifo ai ia i tatou lava o le: Mata e fiafia lo’u toalua pe a ia iloaina lenei mea sa ou faia?24
Afai ua e faaipoipo, ia aloese mai le tuua na o oulua ma se tagata o le isi itupa i soo se mea e mafai ai. O le tele o faalavelave o le ola le mama e amataina pe a tuua na o se alii ma se tamaitai na o i laua i se ofisa, po o le lotu foi, po o le tietie i se taavale. O le taimi muamua atonu sa le’i fuafuaina pe mafaufau foi i le agasala. Ae o na tulaga e maua ai se avanoa lelei mo faaosoosoga. O le tasi mea e taitai atu ai i le isi mea, ma e vave lava ona taunuu atu i se faalavelave pagatia. E sili atu le faigofie o le taumamao mai tulaga faapena mai lava i le amataga ina ia leai se avanoa e faatupulaia ai se faaosoosoga.25
Tauagafau
Ia tauagafau. O le tauagafau i laei ma le gagana ma amioga o se faailoga moni lea o le faamamaina ma o se uiga vaaia lea o se Au Paia o Aso e Gata Ai e amio mama. … Ia lafoai ese lavalava pupuu ma mataga ma faatosina.26
“Mo i latou o e o nofofua ma tafafao faamasani, ia fuafua ma le faaeteete ni gaoioiga lelei ma aogā.”
Gaoioiga lelei ma maloloina
Faatoilalo le leaga i le lelei. E mafai ona e faatoilaloina le tele o lagona faatiapolo e ala i gaoioiga lelei faamalosi tino ma faalesoifua maloloina. O se tagata maloloina lelei, ua saoloto mai faatosinaga faavaivai tino ma agaga o le avamalosi ma le tapaa, o loo i ai i se tulaga lelei atu e faatoilalo ai le tiapolo.27
Mo i latou e nofofua ma o loo tafafao faamasani, ia fuafua ma le faaeteete ni gaoioiga lelei ma aogā ina ia le tuua ai na o oulua e leai ni mea e faia ae fefaasoaai lagona faamama’i faaletino. … O le mataupu faavae lenei o le faatumuina o le olaga o se tagata i gaoioiga lelei ina ia leai se avanoa e faatupulaia ai le leaga.28
Faatumu o outou olaga i punavai lelei o le mana. E le lava le tau na ona faapea e taumafai e tetee le tiapolo pe aveese agasala mai o tatou olaga. E tatau foi ona tatou faatumuina o tatou olaga i le amiotonu. E tatau ona tatou auai i gaoioiga ia e aumaia ai le malosi faaleagaga.
Ou te talanoa atu i ia ituaiga o gaoioiga e pei o le faatofuina o i tatou lava i tusitusiga paia. O loo i ai se mana e tafe mai i totonu o o tatou olaga pe a tatou faitau ma suesue i tusitusiga paia i aso uma, lea e le mafai ona maua i se isi lava auala. O tatalo i aso uma o le isi lena punavai o le mana tele. O le anapogi mo se malosiaga faapitoa po o faamanuiaga faapitoa e mafai ona faamalosia ai i tatou e sili atu nai lo o tatou tomai masani. O auaunaga faaKerisiano, auai i le lotu, auauna atu i le malo [o le Alii]—e mafai uma ona faaopoopo atu i lo tatou faleteuoloa o le malosi ma le mana.
E tatau ona tatou faia ni mea e tele atu nai lo na o le aveese o faatosinaga le lelei mai o tatou olaga. E tatau ona tatou suia i gaoioiga amiotonu e faatumulia ai i tatou i le malosi ma le naunautai e ola e pei ona tatau ai.29
4
E ala atu i le salamo tatau, o i latou o e ua saisaitia i agasala tau feusuaiga e mafai ona toe mama.
Atonu e i ai nisi o e ua fai si tuai ona oo atu i ai le fautuaga ia saunia ma puipuia. Atonu ua matuai saisaitia lava oe i agasala matuia. Afai o le tulaga lea, ua leai nei la se filifiliga i le taimi lenei, ae ia toe faaleleia o outou olaga ma salamo i au agasala. Ia te oe ou te fia fautuaina atu ni mea taua se lima, e mafai ona e faia e te toe foi mai ai i se tulaga o amioga mama a’ia’i. Ia vave sola ese mai soo se tulaga o e i ai lea a le mafua ai ona e agasala pe ono faaosooso ai oe e agasala. Ole atu i le Alii mo le mana e faatoilalo ai. Faataga lou taitai perisitua e fesoasoani atu ia te oe e faaleleia le solitulafono ma toe foi mai i le faaaumeaina atoatoa i le Alii. Inu mai le vaipuna faalelagi ma faatumu ai o outou olaga i punavai lelei o le mana. Ia manatua e ala i le salamo tatau ai, e mafai ai ona e toe mama.
Mo i latou o e totogia le tau o le mauaina o le salamo faamaoni, ua mautinoa lava le folafolaga. E mafai ona e toe mama. E mafai ona aveesea le faanoanoa. O le a tafe atu i o outou olaga le filemu matagofie o le faamagaloga. I lenei tisipenisione, na fetalai mai ai le Alii ma le manino, “Faauta, o ia o lē ua salamo i ana agasala, o ia lava lea ua faamagaloina, ma o A’u o le Alii, e le toe manatuaina lava i latou” (MF&F 58:42).30
5
E tatau i matua ona aoao a latou fanau ia ola i le tulafono o le ola mama.
E tatau i matua ona tuu atu i a latou fanau ia faatonuga maoti e uiga i le ola mama a o latiti, mo lo latou puipuiga faaletino ma le puipuiga o amioga mama.31
Afai e alolofa ma faaaloalo ia matua i le tasi ma le isi, ma afai o i ai i le la faigapaaga paia le lagolago atoatoa ma le faamaoni a’ia’i lē fesiligia, o nei mea taua o le a maua lea i aiga o le lumanai. I le isi itu, afai latou te feupua’i, fefinaua’i, ma leai se fealofani i le aiga, ma auai i tu ma aga matautia o le faatafai i isi pe a aluese atu, o lona uiga o le a faapena foi ona faavaivaia ia aiga o le lumanai. …
… E tatau ona avea o tatou aiga ma puipuiga o le malosiaga e ala i le faapaleina i le amiotonu ma aumaia i totonu o aiga le filemu, lotogatasi, ma le le manatu faapito lea e maua mai i le mama a’ia’i o le tagata lava ia, faamaoni a’ia’i lē fesiligia, ma le tuuto atu i le aiga. E tatau i matua ona talia le faaipoipoga o se faalapotopotoga paia, ma faamamaluina le tulaga faamatua. E tatau ona musuia le fanau e ala i mataupu ma faataitaiga a o sauniuni atu mo le faaipoipoga, ia malupuipuia mai le ola le mama e pei o le malupuipuia mai se faama’i inosia, ma ia faatino isi amioga mama taua faaKerisiano.32
Ua fautuaina e Peresitene Ezra Taft Benson ia matua e aoao a latou fanau i le tulafono o le ola mama.
6
Ua tuuina mai e le Atua ia i tatou le tulafono o le ola mama ina ia aumaia ia i tatou le olioli.
E leai se isi mea e finagalo ai lo tatou Tama Faalelagi mo i latou ae ia fiafia. Ua Ia ta’uina mai na o mea lava o le a aumaia ai le olioli ia i tatou. Ma o le tasi o mataupu faavae mautinoa ua tuuina mai e le Atua e fesoasoani ia tatou maua ai le olioli o le tulafono lea o le ola mama. Ou te tatalo ma lo’u loto atoa o le a outou matuai manatunatu ma le faamaoni i taunuuga faafiafiaina o le tausiga o lenei tulafono, ma taunuuga matautia o le soliina.33
O le mafuaaga mo le amio mama—lea e aofia ai le ola mama o le tagata lava ia, mafaufauga ma amioga mama, ma le amiosa’o—o le tatau lea ona tatou maua le Agaga ma le mana o le Atua i o tatou olaga e fai ai le galuega a le Atua. A aunoa ma lena mana ma aafiaga o le a le sili ifo la i tatou nai lo o tagata o loo i ai i isi faalapotopotoga. O le a susulu atu lena mama ma o le a faatosina mai ai isi e agai atu i se olaga lelei atu, ma mafua ai ona fesili tagata e le auai i le ekalesia e uiga i lo tatou faatuatuaga.34
Ia faamaoni i tulafono paia a le Atua. Ia manatua e le mafai ona solia i latou e aunoa ma le faasalaina. Afai e te manao ia fiafia ma faamanuiaina i au fegalegaleaiga i le lalolagi, faamasaniga tumau, ma le fausiaina o se aiga, ia faaogatasi o outou olaga ma tulafono e faavavau o le lagi. E leai lava se isi auala.35
E leai se fiafia tumau i le ola le mama. E leai se olioli e maua i le solia o le tulafono o le ola mama. Na o lona faafeagai e moni lea. Atonu e i ai le faamalieina mo sina taimi. Mo sina taimi e foliga ai ua matagofie mea uma. Ae o le a vave lava ona oona le mafutaga. O le a oo mai le tausalaina ma le maasiasi. Tatou te fefefe ina ne’i iloa a tatou agasala. E tatau ona tatou sosola ma lalafi, pepelo ma faiamio. E amata ona mate le alofa. E amata ona tuputupu ae le lototiga, lotoleaga ma le fuā, ita, e oo lava i le inoino. O nei mea uma o taunuuga masani ia o le agasala ma le solitulafono.
I le isi itu, afai tatou te usitai i le tulafono o le ola mama ma tausia i tatou lava ia mama, o le a tatou maua faamanuiaga o le alofa faateleina ma le filemu, talitonuina ma le faaaloalogia sili atu o a tatou manamea faaipoipo, tuuto atili atu i le tasi ma le isi, ma faapea ai ona maua se lagona loloto ma le taua o le olioli ma le fiafia.36
Fautuaga mo Suesuega ma le Aoaoina Atu
Fesili
-
Na saunoa Peresitene Benson o le tulaga faatonuina a le Alii mo feusuaiga mama ua “manino ma le mafaaseseina” (vaega 1). E faapefea ona ese mai lenei tulaga faatonuina mai savali a le lalolagi?
-
O a nisi o taunuuga o le solia o le tulafono o le ola mama? (Mo nisi o faataitaiga, tagai i le vaega 2.)
-
O a nisi o mea patino e mafai ona tatou faia e puipuia ai i tatou lava ma o tatou aiga mai faaosoosoga o feusuaiga? (Mo nisi o faataitaiga, tagai i le vaega 3.)
-
Toe iloilo le fautuaga a Peresitene Benson ia i latou ua “oo i agasala matuia” (vaega 4). O a ni ou manatu ma lagona a o e mafaufau loloto i le folafolaga a le Alii e taliaina ai le tagata salamo “e toe foi mai i le faaaumeaina atoatoa”?
-
Aisea e te manatu ai e taua i matua ona “tuu atu i a latou fanau faatonuga maoti e uiga i le ola mama a o laiti”? E faapefea ona faatosinaina e le faamaoni atoatoa o matua i le tasi ma le isi ia lagona o fanau e uiga i le faaipoipoga ma le tulafono o le ola mama? (Tagai i le vaega 5.)
-
O a nisi o “taunuuga faafiafiaina” o le tausiaina o le tulafono o le ola mama? (Mo nisi o faataitaiga, tagai i le vaega 6.)
Mau Fesootai
Kenese 39:7–21; 1 Korinito 6:18–20; Kalatia 5:16; Alema 38:12; 39:3–5; 3 Nifae 12:27–30; MF&F 42:22–25
Fesoasoani mo le Aoaoina Atu
“Ia uunaia i latou o loo e aoaoina ina ia o mai saunia i le vasega e aoao ma auai i talanoaga o le lesona. Pe a latou taumafai taitoatasi e aoaoina le talalelei, o le a sili atu ona latou saofaga atu i se siosiomaga e aoao ai i taimi o lesona” (O Le Aoao Atu, E Leai Se Isi Valaauga E Sili Ai [1999], 86).