Mataupu 18
Ia Faaeteete i le Faamaualuga
“O le faamaualuga o le agasala taatele, o le leaga silisili. O le vaifofō o le faamaualuga o le lotomaualalo.”
Mai le Soifuaga o Ezra Taft Benson
I lana uluai saunoaga i lana uluai konafesi aoao i le avea ai ma Peresitene o le Ekalesia, na aoao mai ai Peresitene Ezra Taft Benson e uiga i le eseesega o le va o le faamaualuga ma le lotomaualalo:
“O le faamaualauga e le faaaloalo i le Atua, ma e le popole foi po o le a le mea sa’o. E vaai atu i autafa i tagata ma finau po o ai e sa’o. …
“O le faamaualuga e faamatalaina i le ‘O le a le mea ou te manao i ai i le olaga?’ nai lo o le ‘O le a se mea ua finagalo le Atua ou te faia i lo’u olaga?’ O le loto o le tagata lava ia lea e feteenai ma le finagalo o le Atua. O le fefe i le tagata nai lo o le mata’u i le Atua.
“O le lotomaualalo e tali atu i le finagalo o le Atua—i le mata’u i Ana faamasinoga ma i manaoga o i latou o loo siomia i tatou. I le tagata faamaualuga, o viiga o le lalolagi e tatagi pea i o latou taliga; i le tagata lotomaualalo, o viiga o le lagi e faamafanafanaina ai o latou loto.”1
O nei aoaoga sa masani ai tamalii o e na auauna faatasi ma Peresitene Benson i le Korama a Aposetolo e Toasefululua. Na latou silafia, o le avea ai ma Peresitene o le latou korama, sa le’i popole ai lava o ia i ona lava manatu—ae na o le aoao lava ia iloa ma mulimuli i le finagalo o le Atua. Na faamatala e Peresitene Boyd K. Packer, o lē na avea mulimuli ane ma Peresitene o le Korama a Aposetolo e Toasefululua, e uiga i auala e taulima ai e Peresitene Benson ia talanoaga i fonotaga a le korama: “E mafai ona eseese o oulua manatu ma Peresitene Benson e aunoa ma le popole pe na i ai sona lagona faaletagata. Sa matou faia ni talanoaga anoa o mataupu e aunoa ma le popole po o le a sona finagalo e ono i ai.”2 Na ta’ua e Elder Russell M. Nelson, o lē na auauna atu i le Korama a le Toasefululua mo le lua tausaga i lalo o le taitaiga a Peresitene Benson: “I soo se iloiloga lava, e tusa lava pe le o sona finagalo faaalia lea, sa na o le tasi lava le itu na fuafaatatau i ai e Peresitene Benson se tulaga—O le a le mea e sili ona lelei mo le malo [o le Atua]? Afai e manaomia ai ona faamafolafola se vaega i se faiga e ese mai i le mea na te faia ai, ia o lena lava. Na pau lava le mea sa ia manao i ai o le mea sili ona lelei mo le malo [o le Atua].”3
A o avea ai ma se taitai faalemalo, sa tutusa lava le tuuto o Peresitene Benson i le faia o le mea na sili ona lelei mo le malo o le Atua. A o auauna atu o se failautusi o le Iunaite Setete mo mea taufaatoaga, sa tele ina “patipatia [o ia] e le lalolagi,”4 faatasi ai ma se vaega tele o faitioga faalealofa. Na te le’i faatagaina se tasi o ia mea e tatagi pea i ona taliga. Ae, sa faamaoni o ia i se faamanatu sa masani ona ia maua mai i lona faletua o Flora: “Aua e te popole i manatu o le lalolagi e uiga ia te oe, pau lava le mea ia e sa’o i le Alii.”5 O le faamalieina i le “patipatia leleoa a le lagi,”6 sa ia saili ai lava i taimi uma e tali atu i le finagalo o le Atua.
O le Faaola, o lē e “agamalu ma loto maulalo” (Mataio 11:29), o lo tatou faataitaiga sili lea o le lotomaualalo.
Aoaoga a Ezra Taft Benson
1
Ua lapataia i tatou e le Alii ina ia faaeteete i le faamaualuga.
Ua ta’u mai e le Mataupu Faavae ma Feagaiga ia i tatou e faapea, o le Tusi a Mamona o le “talafaamaumau e uiga i se nuu pa’ū.” (MF&F 20:9.) Aisea na latou pauu ai? O se tasi lenei o savali iloga o le Tusi a Mamona. Ua tuuina mai e Mamona le tali i mataupu faaiu o le tusi i upu nei: “Faauta, o le faamaualuluga o lenei atunuu, po o tagata o sa Nifae, ua faamaonia ai lo latou faaumatiaga.” (Moronae 8:27.) Ma ina ne’i o tatou misia lena savali taua o le Tusi a Mamona mai lena nuu pa’ū, ua lapatai mai ai le Alii ia i tatou i le Mataupu Faavae ma Feagaiga, “Ia faaeteete i le faamaualuga, ne’i avea outou e pei o sa Nifae muamua.” (MF&F 38:39.)
Ou te talosagaina ma le faamaoni lo outou faatuatua ma tatalo a o o’u taumafai e faamalamalama lenei savali o le Tusi a Mamona—o le agasala o le faamaualuga. O lenei savali ua fai si umi o mamafatu i lo’u loto. Ou te iloa ua finagalo le Atua e tuuina atu le savali lenei i le taimi nei.
I le fono i le muai olaga, o le faamaualuga na pau ai Lusifelo, “le atalii o le taeao.” (2 Nifae 24:12–15; tagai foi MF&F 76:25–27; Mose 4:3).I le iuga o lenei lalolagi, pe a faamama e le Atua le lalolagi i le afi, o e faamaualuluga o le a mu e pei o tagutugutu o saito ae o e agamalu o le a mautofi i le lalolagi. (Tagai 3 Nifae 12:5; 25:1; MF&F 29:9; IS—T1:37; Malaki 4:1.)
I totonu o le Mataupu Faavae ma Feagaiga e faatolu ona faaaoga ai e le Alii le faaupuga “ia faaeteete i le faamaualuga,” e aofia ai ma se lapataiga i le toeaina lona lua o le Ekalesia, o Oliva Kaotui, ma ia Ema Samita, le faletua o le Perofeta. (MF&F 23:1; tagai foi i le 25:14; 38:39.)7
2
O le ‘auga autu o le faamaualuga o le ita lea i le Atua ma o tatou uso a tagata.
O le faamaualuga o se agasala e matua malamalama sese i ai, ma o le toatele ua agasala ai e aunoa ma le iloa. (Tagai Mosaea 3:11; 3 Nifae 6:18.) I totonu o tusitusiga paia e leai se mea e ta’u o se faamaualuga amiotonu—o taimi uma lava e ta’u ai o se agasala. O le mea lea, e tusa lava po o le a le faaaogaaga e le lalolagi o le upu, e tatau lava ona tatou malamalama i le auala o loo faaaoga ai e le Atua le upu ina ia mafai ona tatou malamalama ai i le gagana a tusitusiga paia ma faamanuiaina mai ai. (Tagai 2 Ni. 4:15; Mosaea 1:3–7; Alema 5:61.)
E toatele i tatou e mafaufau i le faamaualuga o le manatu o le tagata ua na’o ia lava, faasausili, fiatagata, fiamatamuamua, po o le fiailoa. O nei mea uma o elemene ia o le agasala, ae o le fatu, po o le ‘auga, o loo misi lava.
O le ‘auga autu lava o le faamaualuga o le ita—ita i le Atua ma le ita i o tatou uso a tagata. O le ita o lona uiga o le “le fiafia, inoino, po o se tulaga o le tetee.” O le mana lea e manao Satani e pulea ai i tatou.
O le faamaualuga e i ai le uiga o le fiatautavā. Tatou te faatautava atu o tatou loto i le finagalo o le Atua. A tatou faatūtū atu lo tatou faamaualuga i le Atua, o lona uiga ua tatou faapea atu ‘e faia lo’u loto ae le o lou fingalo.”E pei ona fai mai Paulo, aua “e saili e i latou uma a latou lava mea, e le o mea a Keriso.” (Filipi 2:21.)
O le faatautava atu o o tatou loto i le finagalo o le Atua, o le a faatagaina ai le le puleaina lelei o manaoga, mea moomia, ma tuinanau. (Tagai Alema 38:12; 3 Ni. 12:30.)
E le mafai ona talia e le tagata faamaualuga le pule a le Atua e tuuina atu le taitaiga i o latou olaga. (Tagai Helamana 12:6.) E faatautava atu o latou manatu e uiga i le upumoni e faasaga i le atamai sili o le Atua, o latou tomai e faatautava ma le pule o le perisitua a le Atua, mea latou te ausia e faasaga i Ana galuega mamana.
O lo tatou ita i le Atua e tele faaupuga e faaupu ai, e pei o le fouvale, lotomaa’a, ua-malo, le salamo, faafefeteina, maitaitagofie, ma tagata e saili i ni faailoga. E mananao ē faamaualuluga ia ioe mai le Atua ia i latou. Latou te le mananao e suia o latou taofi e ioe ai i le finagalo o le Atua.
O le isi vaega tele o lenei agasala taatele o le faamaualuga, o le ita i o tatou uso a tagata. E faaosoosoina i tatou i aso uma ia fia sili atu i lo isi tagata ma vaai maualalo ai ia i latou. (Tagai Helamana 6:17; MF&F 58:41.)
O le tagata faamaualuga, e fai tagata uma ma ona fili e ala i le fiatautava atu o ō latou atamai, manatu, galuega, tamaoaiga, taleni, po o soo se isi fuataga faalelalolagi e faasaga i isi. I upu a C. S. Lewis: “O le faamaualuga na te le maua se fiafia mai le mauaina o se mea, ae na o le mauaina o mea e tele atu nai lo le isi tagata.… O le faatusatusaga lea e fai ai oe ma tagata faamaualuga: o le fiafia i le iloa ai ua sili atu oe i lo isi uma tagata. O le taimi lava e aluese ai le agaga lea o le fiatautava, o le taimi foi lena e aluese ai foi ma le faamaualuga.” (Mere Christianity, New York: Macmillan, 1952, pp. 109–10.)
I le fono i le muai olaga, na folasia ai e Lusifelo lana talosaga e faatautava ai i le fuafuaga a le Tama e pei ona lagolagoina e Iesu Keriso. (Tagai Mose 4:1–3.) Sa manao o ia ina ia faamamaluina o ia i luga atu o isi tagata uma. (Tagai 2 Ni. 24:13.) O le faapuupuuga, o lona manao faamaualuga o le faatoilaloina lea o le Atua. (Tagai MF&F 29:36; 76:28.)
Ua tumu tusitusiga paia i faamaoniga o taunuuga ogaoga o le agasala o le faamaualuga o tagata taitoatasi, vaega, o aai, ma mālō. “E muamua le faamaualuga i le malaia.” (Faataoto 16:18.) Na faaumatia ai le nuu o sa Nifae ma le nuu o Sotoma. (Tagai Moronae 8:27; Esekielu 16:49–50.)8
3
O tagata faamaualuluga e sili atu ona fefefe i faamasinoga a tagata nai lo o faamasinoga a le Atua.
O le faamaualuga na ala ai ona faasatauroina ia Keriso. Na feita le au Faresaio ona sa tautino atu e Iesu o Ia o le Alo o le Atua, lea sa avea ma se taufaamatau i o latou tofiga, o lea na latou taupulepule ai Lona maliu. (Tagai Ioane 11:53.)
Na avea Tavita ma fili o Saulo ona o le faamaualuga. Na lotovale o ia ona na alalaga le motu o tama fafine o Isaraelu e faapea “Ua fasia e Saulo ana toaafe, a o Tavita o ana sefulu o afe.” (1 Sam. 18:6–8.)
O tagata faamaualuluga e sili atu ona fefefe i faamasinoga a tagata i lo o faamasinoga a le Atua. (Tagai MF&F 3:6–7; 30:1–2; 60:2.) O le “O le a se manatu o tagata ia te a’u?” e sili atu ona mamafa nai lo le “O le a se finagalo o le Atua ia te a’u?”
Na toetoe lava a faasaoloto e le Tupu o Noa le perofeta o Apinati, ae o lona faamaualuga na lolo atu ai i le manaoga o ana faitaulaga amioleaga ma auina atu ai loa Apinati e susunuina. (Tagai Mosaea 17:11–12.) Sa faanoanoa Herota i le talosaga a lana ava e vavaeese le ao o Ioane le Papatiso. Ae o lona manao faamaualuga ia lelei o ia i le vaai a “e ua taooto e aai faatasi ma ia” na mafua ai ona ia fasiotia Ioane. (Mataio 14:9; tagai foi Mareko 6:26.)
O le faamaualuga o le Tupu o Noa na oo ai ina maliu Apinati ma oo ai foi i lona lava oti.
O le fefe i faamasinoga a tagata e iloa lelei lava i le faatautava i le faamalieina o tagata. O tagata faamaualuluga e fiafia ma “sili le manao i le viiga mai tagata, i [lo] le viiga mai le Atua.” (Ioane 12:42–43.) O o tatou faamoemoega mo mea tatou te faia, o itu na e faaalia ai le agasala. Na fetalai Iesu, sa Ia faia “pea lava o mea” e lelei i le Atua. (Ioane 8:29.) Pe le lelei ea le avea ma o tatou faamoemoega le fiafia o le Atua nai lo le taumafai ia tatou sili a’e i o tatou uso ma ia sili atu i lo isi?
O isi tagata faamaualuluga e matuai leai ma se manatu popole po o fetaui o latou totogi ma o latou manaoga, ona e mananao ia faapea tagata e tetele atu o latou totogi nai lo se isi tagata. O lo latou taui o le manao lea ia sili atu i latou i lo isi tagata uma. O le ita lenei e o faatasi ma le faamaualuga.
A mauaa le faamaualuga i o tatou loto, o le a aveesea lo tatou ola tutoatasi mai le lalolagi ma saisaitia ai lo tatou saolotoga i le nofopologa i faamasinoga ma manatu o tagata. E leotetele atu le feei a le lalolagi nai lo o musumusuga a le Agaga Paia. O manatu o tagata e tafiesea ai faaaliga a le Atua, ma faamaamulu ai e tagata faamaualuluga le āi uamea. (Tagai 1 Ni. 8:19–28; 11:25; 15:23–24.)9
4
O le faamaualuga e tele auala e faaalia ai.
O le faamaualuga o se agasala e faigofie ona iloa atu i isi ae seasea ona tatou iloaina ia i tatou lava. O le toatele o i tatou e mafaufau o le faamaualuga o se agasala a i latou e maualuluga atu, e pei o tagata maumea ma atamamai, o loo vaai maualalo mai ia i tatou uma. (Tagai 2 Ni. 9:42.) Peitai, o loo i ai se gasegase taatele ia i tatou—ma o le faamaualuga lena mai le pito i lalo i le vaai atu i luga. E tele auala e faaalia ai, e pei o le saili masei, faitatala, faatuāupua, muimui, ola fiatele, matau’a, manaonao fua, leai se lotofaafetai ma se faamalo e ono siitia ai se isi, ma le lē loto faamagalo ma le lotoleaga.
O le mea moni o le le usiusitai o se malosiaga o le faamaualuga e tetee i se tagata o loo taitai ia i tatou. [O lea tagata] e mafai ona avea o se mātua, se taitai perisitua, se faiaoga, po o le Atua foi. O se tagata faamaualuga e ita i le mea moni e faapea e maualuga atu se isi tagata ia te ia. E manatu o ia o lenei mea ua maualalo ai lona tulaga.
O le manatu faapito o se tasi lea o foliga masani o le faamaualuga. “O le a se aafiaga o mea uma ia te a’u” o le totonugalemu lea o mea uma e taua—fiamatamuamua, manao ia misi alofa tagata uma ia te ia, faamalieina o ia lava i mea o le lalolagi, ia viia na o ia lava, ma le sailia o ana lava mea.
O le faamaualuga e oo ai i faiga faalilolilo lea e faufau ina ia maua ai le pule, oa, ma le mamalu o le lalolagi. (Tagai Helamana 7:5; Eteru 8:9, 16, 22–23; Mose 5:31.) O lenei fua o le agasala o le faamaualuga, e ta’ua o faiga faalilolilo, na faatoilaloina ai malo o sa Iareto ma sa Nifae, ma sa avea lava ma o le a avea pea ma pogai o le toilalo o le tele o malo. (Tagai Eteru 8:18–25.)
O le isi foliga o le faamaualuga, o finauga. O fefinauaiga, misa, puleaga amioletonu, faia o ni va o augatupulaga [ona o le eseesega o manatu o le au matutua ma le autalavou], tatalaga o faaipoipoga, sauaina o taitoalua, faatupu vevesi, ma feteenaiga e aofia uma i le vaega lenei o le faamaualuga.
O finauga i totonu o o tatou aiga e tuliese ai le Agaga o le Alii. E faapea foi ona tutuliese ai le toatele o tagata o o tatou aiga. O finauga e amata mai i se upu faalealofa e tautalagia ma e oo atu lava i taua i le lalolagi atoa. Ua ta’u mai e tusitusiga paia ia i tatou e “na o le faamaualuga lava e tupu ai le misa.” (Faataoto 13:10; tagai foi Faataoto 28:25.)
Ua molimau mai foi tusitusiga paia, o le tagata faamaualuga e maitaita gofie ma ita umi. (Tagai 1 Ni. 16:1–3.) Latou te taofiofia le faamagalo atu ina ia nofosala ai le isi tagata ia i latou ma ia tauamiotonuina ai o latou lagona faamanualia.
O le tagata faamaualuga e le faigofie ona ia taliaina ni fautuaga po o ni aoaiga. (Tagai Faataoto 15:10; Amosa 5:10.) Latou te faaaogaina le tetee e tauamiotonu ai ma fai ma ‘alofaga i o latou vaivaiga ma faaletonu. (Tagai Mataio 3:9; Ioane 6:30–59.)
O tagata faamaualuluga e faalagolago i le lalolagi e ta’u atu ia i latou pe i ai so latou taua pe leai. O lo latou talitonuina o i latou lava e fua lea po o gafea o latou tutu ai i manuia o le lalolagi. Latou te lagona le tauaogaina o ni tagata taitoatasi pe afai e toatele ni tagata e maualalo ifo ia i latou i mea e ausia, taleni, lalelei, po o le atamai. O le faamaualuga e mataga. E fai mai, “A e manuia, Ua ou toilalo.”
Afai tatou te alolofa i le Atua, ma fai Lona finagalo, ma sili atu lo tatou matatau i Lana faamasinoga nai lo o le faamasinoga a tagata, o le a tatou maua le taua faaletagata lava ia.10
5
O le faamaualuga e faatapulaaina pe taofia ai le alualu i luma.
O le faamaualuga o se agasala ta’usalaina i le aano tonu o lena upu. Na te faatapulaaina pe taofia ai le alualu i luma. (Tagai Alema 12:10–11.) O le tagata faamaualuga e le faigofie ona aoaoina. (Tagai 1 Ni. 15:3, 7–11.) Latou te le suia o latou manatu ina ia talia le upumoni, aua o le faia o lena mea e faapea ai o i latou na sese.
O le faamaualuga e matua aafia leaga ai o tatou sootaga uma—la tatou sootaga ma le Atua ma Ana auauna, i le va o le tane ma le avā, matua ma fanau, pule ma le tagata faigaluega, faiaoga ma le tamaitiiti aoga, ma tagata uma. O le tulaga o lo tatou faamaualuga e iloa ai le auala tatou te taulimaina ai lo tatou Atua ma o tatou uso ma tuafafine. E finagalo Keriso ia siia’e i tatou i le tulaga o loo i ai o Ia. Pe o tatou mananao ea e fai foi lena mea mo isi?
O le faamaualuga e faavaivaia ai o tatou lagona o le avea ma fanau a le Atua, ma ni usoga o tagata. Na te tuueseese ma vaevaeina ai i tatou i “tulaga,” e tusa ai ma a tatou “oa” ma o tatou “avanoa mo le aoaoina.” (3 Ni. 6:12.) O le lotogatasi e faigata ona maua e tagata faamaualuga, ma sei vagana ua tasi i tatou e le a le Alii i tatou. (Tagai Mosaea 18:21; MF&F 38:27; 105:2–4; Mose 7:18.)
Mafaufau i mea ua tatou maumaua i le tuanai ma mea o loo tatou maumaua i le taimi nei i o tatou olaga, o tatou aiga ma le Ekalesia ona o le faamaualuga.
Mafaufau i le salamo e mafai ona tupu i olaga e suia, faasaoina o faaipoipoga, ma aiga e faamalolosia, pe ana le taofia i tatou e le faamaualuga mai le ta’uta’u atu o a tatou agasala ma lafoaiina. (Tagai MF&F 58:43.)
Mafaufau i le toatele o tagata o le Ekalesia ua le toaaga mai ona ua faamanualiaina o latou loto ma ua le mafai ona faatagaina i latou e lo latou faamaualuluga e faamagalo atu pe o mai e taumamafa atoatoa i le laoai a le Alii.
Mafaufau i le fiasefulu afe o alii talavou ma ulugalii e mafai ona fai ni misiona i le taimi nei pe ana leai lo latou faamaualuluga ua taofia ai i latou mai le gauai atu o o latou loto i le Atua. (Tagai Alema 10:6; Helamana 3:34–35.)
Mafaufau foi i le faateleina o galuega faalemalumalu pe ana faapea e sili atu le taua o le taimi e faaalu mo lenei galuega faaleatua nai lo le tele o le taimi o loo faaaluina i le tele o mea o loo tulitulimatagauina ona o le faamaualuluga.11
O le lotomaualalo e aumaia ai le lotogatasi ma le malosiaga i faaipoipoga ma aiga.
6
O le vaifofō o le faamaualuga o le lotomaualalo.
O le faamaualuga e aafia uma ai i tatou i le tele o taimi eseese ma i tulaga eseese. O lea la ua mafai nei ona e iloa le mafuaaga na matuai telē ma ateatea ai le fale tele lea na ta’ua i le miti a Liae, lea e faatusaina i le faamaualuga o le lalolagi ma na toatele le motu o tagata na ulu atu i ai. (Tagai 1 Ni. 8:26, 33; 11:35–36.)
O le faamaualuga o le agasala taatele, o le leaga silisili. Ioe, o le faamaualuga o le agasala taatele, o le leaga silisili.
O le vaifofō mo le faamaualuga o le lotomaualalo—agamalu, usiusitai. (Tagai Alema 7:23.) O le loto momomo ma le agaga salamo lea. (Tagai 3 Ni. 9:20; 12:19; MF&F 20:37; 59:8; Sa. 34:18; Isa. 57:15; 66:2.) E pei ona faaupuina lelei e Rudyard Kipling:
Ua fai ifo le vevesi ma le pisapisao;
Ua tuuvaa kapeteni ma tupu.
Ae tumau pea lau taulaga mai anamua,
O se lotomaualalo ma se loto momomo.
Le Alii le Atua o ‘Au, ia tatou mafuta,
Ne’i galo ia i matou, ne’i galo ia i matou. …
O le a i ai se nuu lotomaualalalo o le Atua. A le mafai ona tatou filifili ia lotomaualalo, ia po o le faamalosia o i tatou ia lotomaualalo. Fai mai Alema, “Amuia i latou o e latou te faalotomaualalaloina i latou lava e aunoa ma le faamalosia ia lotomaualalalo.” (Alema 32:16.)
Ia tatou filifili e lotomaualalo.
E mafai ona tatou filifili e faamaualaloina i tatou lava e ala i le faatoilaloina o le feitagai ma o tatou uso ma tuafafine, manatu ia i latou e pei foi o i tatou, ma siitia i latou ia maualuga pe maualuga atu nai lo le mea o tatou i ai. (Tagai MF&F 38:24; 81:5; 84:106.)
E mafai ona tatou filifili e faamaualaloina i tatou lava e ala i le taliaina o fautuaga ma aoaiga. (Tagai Iakopo 4:10; Helamana 15:3; MF&F 63:55; 101:4–5; 108:1; 124:61, 84; 136:31; Faataoto 9:8.)
E mafai ona tatou filifili e faamaualaloina i tatou lava e ala i le faamagalo atu o i latou na faatiga ia i tatou. (Tagai 3 Ni. 13:11, 14; MF&F 64:10.)
E mafai ona tatou filifili e faamaualaloina i tatou lava e ala i le tuuina atu o auaunaga lē manatu faapito. (Tagai Mosaea 2:16–17.)
E mafai ona tatou filifili e faamaualaloina i tatou lava e ala i le o i misiona ma talai atu le afioga lea e mafai ai ona faalotomaualalo ai isi. (Tagai Alema 4:19; 31:5; 48:20).
E mafai ona tatou faamaualaloina i tatou lava e ala i le ulu soo atu i le malumalu.
E mafai ona tatou faamaualaloina i tatou lava e ala i le ta’uta’u atu ma le lafoaia o a tatou agasala ma ia toe fanauina i la le Atua. (Tagai MF&F 58:43; Mosaea 27:25–26; Alema 5:7–14, 49.)
E mafai ona tatou filifili e faamaualaloina i tatou lava e ala i le alofa i le Atua, lolo atu o tatou loto i Lona finagalo, ma faamuamua o Ia i o tatou olaga. (Tagai 3 Ni. 11:11; 13:33; Moronae 10:32.)
Ia tatou filifili e lotomaualalo. E mafai ona tatou faia. Ou te iloa tatou te mafaia.
O’u uso e ma tuafafine pele, e tatau ona tatou saunia e laveai Siona. O le mea moni lava, o le agasala o le faamaualuga o loo taofiofia i tatou mai le faatuina o Siona i le vaitau o le Perofeta o Iosefa Samita. O le agasala lava lea e tasi o le faamaualuga na faamutaina ai le faapaiaina o sa Nifae. (Tagai 4 Nifae 1:24–25.)
O le faamaualuga o le maa tu’ia tele lea i Siona. Ou te toe fai atu: O le faamaualuga o le maa tu’ia tele lea i Siona.
E tatau ona tatou faamamaina totonu o le ipu po o i tatou lava e ala i le faatoilaloina o le faamaualuga. (Tagai Alema 6:2–4; Mataio 23:25–26.)
E tatau ona tatou gaua’i atu “i uunaiga a le Agaga Paia,” ma tuu ese le “tagata natura,” faamaualuga ae avea ma “se tagata paia e ala i le togiola a Keriso le Alii,’ ma avea “e pei o se tamaitiiti, e usiusitai, agamalu, lotomaualalo.” (Mosaea 3:19; tagai foi Alema 13:28.)
Tau ina ia tatou faia faapea ma faaauau atu ai i le ausiaina o lo tatou taunuuga paia, o la’u tatalo faatauanau lea.12
Fautuaga mo Suesuega ma le Aoaoina Atu
Fesili
-
Na faailoa mai e Peresitene Benson o le faamaualuga na taitai atu ai i le faafanoga o le nuu o sa Nifae (tagai vaega 1.) O le a sou manatu, aisea ua i ai i le faamaualuga se mana faataumaoi?
-
O a ni auala e ono “faatautava ai e tagata o [latou] loto i le finagalo o le Atua”? (Tagai i le vaega 2.) O a nisi o faamanuiaga e oo mai ia i tatou pe a tatou mulimuli i le finagalo o le Atua?
-
Aisea e te manatu ai, tatou te fesili i nisi o taimi “O le a se manatu o isi tagata e uiga ia te a’u?” ae le o le “O le a le finagalo o le Atua ia te a’u?” (Tagai i le vaega 3.) E faapefea ona suia o tatou olaga pe afai o lo tatou faanaunauga sili o le faafiafiaina o le Atua?
-
Toe iloilo auala e faaalia ai le faamaualuga o loo lisiina i le vaega 4. E mafai faapefea ona tatou aloese mai nei foliga o le faamaualuga i o tatou olaga?
-
Na saunoa Peresitene Benson, “O le faamaualuga e matua aafia leaga ai o tatou sootaga uma—ma le Atua ma isi (vaega 5). Aisea ua moni ai lenei mea? O a ni auala e faaleleia ai a tatou sootaga pe a tatou lotomaualalalo?
-
I le vaega 6, o loo lisi ai e Peresitene Benson ni auala e mafai ona tatou filifili ai ia lotomaualalo. Aisea e te manatu ai e sili atu le lelei o le filifili ia lotomaualalo nai lo le faamalosia ia lotomaualalo?
Mau Fesootai
Mataio 23:12; Luka 18:9–14; Iakopo 4:6; Alema 5:27–28; MF&F 112:10; 121:34–40
Fesoasoani mo Suesuega
Ina ia faatatauina upu a se perofeta ia te oe lava, mafaufau pe faapefea ona faatatau ana aoaoga ia te oe (tagai O Le Aoao Atu, E Leai Se Isi Valaauga E Sili Ai [1999], 172). Mafaufau e fesili ifo ia te oe lava pe mafai faapefea ona fesoasoani na aoaoga ia te oe i ou popolega, fesili ma luitau i lou olaga.