Folasaga

Ua faatuina e le Au Peresitene Sili ma le Korama a Aposetolo e Toasefululua le faasologa o Aoaoga a Peresitene o le Ekalesia e fesoasoani ai e faalatalata atili atu oe i lou Tama Faalelagi ma faaloloto ai lou malamalama e uiga i le talalelei toefuataiina a Iesu Keriso. A o faaopoopo e le Ekalesia isi voluma i lenei faasologa, o le a e faatupulaia se faaputuga o tusi o le talalelei e faasino i ai, mo lou aiga. Ua mamanuina tusi o lenei faasologa e faaaoga mo suesuega faaletagata lava ia ma aoaoga o le Aso Sa. E mafai foi ona e faaaogaina e tapena ai isi lesona po o lauga ma tali ai fesili e uiga i aoaoga faavae o le Ekalesia.

O le tusi lenei ua faaalia ai aoaoga a Peresitene Ezra Taft Benson, o lē na auauna atu o se Peresitene O Le Ekalesia a Iesu Keriso o le Au Paia o Aso e Gata Ai mai i le aso 10 o Novema, 1985, e oo i le aso 30 o Me, 1994.

Suesuega Faaletagata Lava Ia

A o e suesue i aoaoga a Peresitene Ezra Taft Benson, ia saili ma le agaga tatalo le musumusuga a le Agaga Paia. O fesili o loo i le faaiuga o mataupu taitasi o le a fesoasoani e te mafaufau loloto, malamalama, ma faaaoga aoaoga a Peresitene Benson. E mafai foi ona fesoasoani manatu nei ia te oe:

Tusi mafaufauga ma lagona e oo atu ia te oe mai le Agaga Paia a o e suesue.
Vasevase lalo o fuaitau e te manao e manatua. Mafaufau e tauloto nei fuaitau pe faailoga foi i totonu o au tusitusiga paia i talaane o ni fuaiupu e faatatau i ai.
Faitau se mataupu po o se fuaitau ia sili atu ma le tasi ina ia e malamalama atili ai.
Fesili ia te oe lava i fesili pei o nei: E faapefea ona faateleina e aoaoga a Peresitene Benson lo’u malamalama i mataupu faavae o le talalelei? O le a se mea o finagalo le Alii ia ou aoaoina mai nei aoaoga?
Faasoa atu mea ua e aoaoina i tagata o lou aiga ma au uo.
Fesili ifo ia te oe lava, pe faapefea ona fesoasoani aoaoga o lenei tusi ia te oe i luitau ma atugaluga patino.

Aoao Atu mai le Tusi Lenei

Ua mamanuina lenei tusi mo le faaaogaina i le aiga ma le lotu. E mafai ona fesoasoani taiala nei ia te oe e aoao atu ai mai le tusi.

Sauni e Aoao Atu

Saili le taitaiga a le Agaga Paia a o e sauni e aoao atu. Suesue ma le agaga tatalo mataupu ua atofa atu ina ia mautu ai i lou malamalamaaga ia aoaoga a Peresitene Benson. O le a e aoao atu ai ma le loto faamaoni sili atu ma le mana pe a uunaia oe lava ia e ana upu (tagai i le MF&F 11:21).

Afai o loo e aoaoina atu se lesona a le Perisitua Mekisateko po o le Aualofa, e le tatau ona e tuu esea le tusi lenei, pe saunia foi lesona mai nisi punaoa. Filifili ma le agaga tatalo mai le mataupu ia aoaoga e te lagona o le a sili ona fesoasoani ai ia i latou o loo e aoaoina. O nisi mataupu e tele atu ‘anomea o loo i ai nai lo mea e mafai ona talanoaina i le taimi faatulagaina o le vasega.

Faamalosiau i tagata auai e suesue le mataupu a o le’i faia le lesona ma o mai ma aumai le tusi. Afai latou te faia lena mea, o le a sili atu ona saunia i latou e auai i se talanoaga ma fefaamalamalamaai ai e le tasi le isi.

I au sauniuniga e aoao atu, ia taulai faapitoa atu i le “Fautuaga mo Suesuega ma le Aoaoina Atu” i faaiuga o mataupu taitasi. I lalo o lenei ulutala o le a e maua ai fesili, mau fesootai, ma se Fesoasoani mo Suesuega po o le aoao atu. O fesili ma mau fesootai e o faatasi lava ma le mataupu o loo maua ai. O fesoasoani mo suesuega ma le aoaoina atu, e mafai ona taiala ai oe i au taumafaiga uma e aoao ma ola ai i le talalelei, ma fesoasoani atu i isi ia faia foi faapea.

Folasia le Mataupu

A o e folasia atu le mataupu, ma i le lesona atoa, ia galue e fausia se siosiomaga ia mafai ai e le Agaga ona pai atu i loto ma mafaufau o i latou o loo e aoaoina. Ina ia amataina le lesona, fesoasoani ia i latou o loo e aoaoina ia taulai atu i aoaoga o loo i le mataupu. Atonu e te manao e faaaoga se manatu se tasi pe sili atu o loo i lalo:

Faitau ma talanoaina le vaega ua faaulutala “Mai le Soifuaga o Ezra Taft Benson” i le amataga o le mataupu.
Talanoaina se ata po o se mau mai le mataupu.
Usu faatasi se viiga e fetaui i ai.
Faasoa se aafiaga puupuu faaletagata lava ia e uiga i le autu.

Taitai se Talanoaga e Uiga i Aoaoga a Peresitene Benson

A o e aoao atu mai lenei tusi, valaaulia isi e faasoa mai o latou manatu, fai ni fesili, ma aoao e le tasi le isi. A oo ina latou taufai fefaasoaai, o le a sili atu ona latou saunia e aoao ma mauaina faaaliga mo le tagata lava ia. Faataga ni talanoaga lelei e faaauau pea nai lo le taumafai e fai uma le lesona. Ina ia uunaia ni talanoaga, faaaoga ia fesili o i le faaiuga o mataupu taitasi. E mafai foi ona e atiina ae au lava fesili aemaise mo i latou o loo e aoaoina.

O vaega ia e filifili mai ai e te ono maua ai ni manatu faaopoopo:

Talosagaina tagata e auai e faasoa mai mea ua latou aoaoina mai a latou suesuega faaletagata lava ia o le mataupu. E ono fesoasoani le faafesootai o nisi o le vasega a o faagasolo le vaiaso ma talosagaina i latou e sauniuni e faasoa mai mea ua latou aoaoina.
Tofi ni tagata e faitauina fesili filifilia i le faaiuga o le mataupu (pe taitoatasi po o ni vaega toalaiti). Fai i ai e vaavaai mo aoaoga i le mataupu e fesootai ma fesili. Ona valaaulia lea o i latou e faasoa mai o latou manatu ma malamalamaaga i isi o le vasega.
Faitau faatasi nisi o aoaoga a Peresitene Benson i le mataupu. Talosaga atu i tagata auai e faasoa mai ni faataitaiga mai tusitusiga paia ma mai o latou lava aafiaga patino e faaalia ai na aoaoga.
Fai atu i tagata auai e filifili se vaega se tasi e fiafia i ai ma faitau leleoa. Valaaulia i latou i ni vaega taitoalua pe taitoatolu, ma i latou o e sa filifiliaina foi le vaega lena, ma talanoa i mea na latou aoaoina.

Uunaia le Fefaasoaai ma le Faaaogaaga

O le a sili atu le ‘anoa o aoaoga a Peresitene Benson mo tagata auai o e faasoaina atu na aoaoga i isi, ma faaaoga i o latou olaga. Atonu e te manao e faaaoga se manatu se tasi pe sili atu lenei:

Fesili atu i tagata auai pe faapefea ona latou faatatauina aoaoga a Peresitene Benson i o latou tiutetauave i le aiga ma i le Ekalesia. Mo se faataitaiga, atonu e te fesoasoani ia i latou e mafaufau loloto ma talanoaina auala e mafai ai ona latou faatatauina ana aoaoga i le avea ai o ni tane, avā, matua, atalii, afafine, faiaoga o aiga, po o faiaoga asiasi.
Uunai tagata auai e faasoa atu nisi o aoaoga a Peresitene Benson i tagata o le aiga ma uo.
Valaaulia tagata auai e faaaoga mea ua latou aoaoina, ma faasoa mai o latou aafiaga i le amataga o le vasega e sosoo ai.

Faaiu le Talanoaga

Otooto faapuupuu le lesona, po o le fai atu i ni tagata auai se toatasi pe toalua e faia lena mea. Molimau atu e uiga i aoaoga sa outou talanoaina. E mafai foi ona e valaauliaina isi e faasoa mai a latou molimau.

Faamatalaga e faatatau i Punaoa o Loo Ta’ua i Lenei Tusi

O aoaoga o loo i lenei tusi o upusii tuusa’o mai lauga, tusiga, tusi ma api talaaga a Peresitene Ezra Taft Benson. O upusii mai punaoa ua lomiaina o loo tumau pea le faaaogaina o faailoga, sipelaga, faamataitusi lapopoa, ma le faapalakalafaina o punaoa autu, vagana ua tatau ona faia ni suiga faalefaatonu po o le faalomitusi ina ia faamanino atili ai le faitauina. Mo lea mafuaaga, atonu ua e vaaaia nai eseesega laiti i le anotusi. Mo se faataitaiga, o soanauna e faatatau i le Atua o loo i mataitausi laiti i nisi o upusii ae mataitusi tetele i isi.

E le gata i lea, e masani ona faaaogaina e Peresitene Benson upu e pei o le alii, o alii po o tagata e faasino i tagata uma, o tane ma fafine. E faaaoga soo lava e ia soanauna o ia, o lana ma le ia e faasino i itupa uma e lua. O se faiga masani lea i le gagana o lona vaitaimi. E ui lava i eseesega i nei tulafono o gagana ma faaaogaaga i le vaitau lenei, o aoaoga a Peresitene Benson e faatatau uma lava i tamaitai ma alii.