Mataupu 22

Avatu le Talalelei i le Lalolagi

“Tatou te fiafia lava e auai i se faigapaaga ma lo tatou Tama Faalelagi i lenei galuega tele o le faaolataga ma le faaeaga o lana fanau.”

Mai le Soifuaga o Ezra Taft Benson

Mo Peresitene Ezra Taft Benson, o le galuega faafaifeautalai sa o se tu masani faaleaiga. “O le aiga o lo’u tama na i ai ni tamaiti e toasefulutasi,” sa ia faamatala mai ai. “O le toasefulutasi uma o i matou ua ma’ea ni misiona. Sa faia foi e lo’u toalua se misiona ma na faafiafiaina o ia i le la galulue faatasi mo le ono masina mulimuli [o lana misiona] ma lona tina o lē na maliu lana tane. Ina ua alu lo’u lava tamā i le misiona, ou te manatua, i le avea ai ma atalii ulumatua, ia tusi sa ia tusia mai a o i ai i le galuega faamisiona i Sisifo Tutotonu. Sa oo mai i totonu o lena fale se agaga o le galuega faamisiona lea sa le’i toe aluese lava, ma o lea ou te faafetai faamaualalo ai.”¹

Sa auauna atu Peresitene Benson o se faifeautalai faamisiona i le Misiona a Peretania mai le 1921 i le 1923, ma sa sili atu ma le lua ma le afa tausaga o faaauau ai pea le “agaga o le galuega faafaifeautalai” ia te ia. Mo se faataitaiga, i le avea ai ma failautusi a le Iunaite Setete mo mea tau faatoaga mai le 1953 i le 1961, sa toatele ni tagata o isi tapuaiga sa latou fegalegalea’i. I le taimi o le konafesi aoao ia Aperila 1961, sa ia ta’u atu ai i le Au Paia: “O loo ia te a’u le tusa ma le 9,000 o suafa o tagata, o e na ou fesootai patino atu i ai i se tofiga faalemalo. Ou te faamoemoe e tuuina atu ni kata e faailoa atu ai i latou i faifeautalai. Ou te manao lava ia faalogo i latou uma taitoatasi i le talalelei. Ou te moomoo ia mafai e fanau uma a lo tatou Tama ona fiafia i faamanuiaga ia e oo mai e ala i le taliaina ma le ola ai i le talalelei a Iesu Keriso.”²

Na faaauau pea le naunautai o Peresitene Benson i le galuega faafaifeautalai i lona soifua matua, ma sa naunau lava o ia i tagata uma o le Ekalesia ia talia lena lava naunautaiga e tasi. Sa saunoa tuusao atu o ia i alii talavou e uiga i le saunia o i latou lava mo le auaunaga faafaifeautalai faamisiona. Na ia saunoa, “Ia saunia nei. Ia saunia outou lava i le faaletino, faalemafaufau, faaleagafesootai, ma faaleagaga.”³ Sa ia uunaia matua e taiala o latou atalii i lenei tapenaga. Sa ia fautuaina foi tuafafine talavou ma tagata matutua atu o le Ekalesia, ina ia mafaufau ma le toto’a i le auaunaga faafaifeautalai faamisiona. Ma sa ia apoapoai atu i tagata uma o le Ekalesia e faasoa atu le talalelei i o latou tuaoi.

Na faamatala Peresitene Thomas S. Monson i se taimi na musuia ai e le alofa o Peresitene Benson mo le galuega faafaifeautalai se faifeautalai i le lumanai: “I se tasi Aso Faraile, sa mulimuli ai i laua ma Tuafafine Benson i le la masani o le auai atu i se sauniga i le Malumalu o Jordan River. A o i ai iina, sa alu atu se alii talavou ia Peresitene Benson o lē na faafeiloaia o ia ma le loto fiafia ma faailoa atu e faapea, ua valaauina o ia e faataunuu se galuega faamisiona. Sa tago atu Peresitene Benson i le lima o le faifeautalai faatoa valaauina ma, faatasi ai ma se ataata i ona fofoga, sa ia faapea atu, ‘Alu ma ave a’u! Alu ma ave a’u!’ Na molimau lena faifeautalai e faapea, i se lagona, sa alu o ia ma ave Peresitene Benson i lana misiona, ona o lenei faafeiloaiga na faaalia ai le alofa tumau o Peresitene Benson, lona tuuto i le galuega faafaifeautalai, ma lona manao ina ia maua o ia i taimi uma o faia le galuega a le Alii.”⁴

O le alofa mo fanau uma a le Tama Faalelagi sa i ai i le fatu o le tuuto o Peresitene Benson e faasoa atu le talalelei: “E manaomia e fanau a lo tatou Tama le talalelei. … Ou te iloa e alofa le Alii ia i latou, ma o le avea ai ma ana auauna faatauvaa, e i ai se alofa i lo’u fatu mo le faitau miliona o tagata o lenei lalolagi.”⁵ O le manatunatu loloto ai i le mana o le alofa o le Faaola, sa ia molimau ai, “E faateleina o tatou faamanuiaga a o tatou faasoa atu lona alofa i o tatou tuaoi.”⁶

Mai se soifuaga o le auai ai i le galuega faafaifeautalai ma le uunaia o ona uso ā Au Paia ia faia foi faapea, ua mafai ona faamautu mai e Peresitene Benson: “Ua ou tofo i le olioli o le galuega faafaifeautalai. E leai se isi lava galuega i le lalolagi atoa e mafai ona aumaia i se tagata le olioli ma le fiafia sili atu i lo lenei.”⁷

Two elder missionaries walking down a city sidewalk in Sao Paulo, Brazil. There are buildings in the background. — “Tatou te tuuina atu ma le loto i ai o tatou taimi ma tupe ua faamanuiaina ai i tatou [e le Alii] i le faatuina o lona malo.”

Aoaoga a Taft Benson

Ua galala le lalolagi mo le tapuaiga moni, ma o loo ia i tatou.

I le mavae ai o le faaaliga mamalu a le Atua le Tama ma Lona Alo o Iesu Keriso ia Iosefa Samita, e foliga mai o le uluai tiutetauave sili na tuu i luga o le Ekalesia toefuataiina, o le avatu lea o le talalelei i le lalolagi—i fanau uma a lo tatou Tama.

Na avea moni o se faasologa sili ona mata’ina o mea taua silisili na tutupu—o se faasologa mata’ina o le ositaulaga, olioli, faigata, lototele, ma o le faatumutumuga o ia mea uma, o le alofa i uso a tagata. E leai lava se vaipanoa i luga o le fogaeleele e te maua ai se faagasologa mata’ina o mea na tutupu i se tagata e tutusa ma lea. Ioe, na maligi ai le toto, afu, ma loimata i le avatuina o lenei galuega o le alofa. Ma aisea ua tatou faia ai? Ona ua poloaiina e le Atua o le lagi; ona e alofa o ia i ana fanau, ma o lona finagalo lea ia maua e le faitau miliona o tagata o le lalolagi le avanoa e faalogo ai ma, i lo latou lava loto malie, ia talia ma ola i mataupu faavae mamalu o le faaolaina ma le faaeaina o le talalelei a Iesu Keriso.⁸

E malosi lo’u talitonuga e manaomia e le lalolagi le talalelei a Iesu Keriso, ona na te le manaomiaina se isi lava mea, ma e mananao tagata o le lalolagi i le mea o le a tuuina atu e le talalelei, ae ua latou le iloaina. Latou te mananao i le taula lea e tuuina atu e le talalelei, lea latou te maua ai tali i faafitauli latou te fetaia’i; lea e aumaia ai ia i latou se lagona o le puipuiga ma se lagona o le filemu o le loto. Ua na o le talalelei lava le tali i faafitauli o le lalolagi, o’u uso e ma tuafafine.⁹

E na o le talalelei lava o le a laveaiina le lalolagi mai le malaia o lona lava faafanoga. E na o le talalelei lava o le a faatasia ai tagata o ituaiga ma atunuu uma i le filemu. E na o le talalelei lava o le a aumaia le olioli, fiafia, ma le faaolataga i le aiga o le tagata.¹⁰

Ua galala le lalolagi mo le tapuaiga moni, ma o loo ia i tatou.¹¹

O le savali mamalu lenei tatou te mananao e faasoa atu i le lalolagi, e faapea na ala mai i le Atua le Tama ma Lona Alo o Iesu Keriso, ua toe fuatai mai ai le malo o le Atua. O le savali aupito silisili ona maoae lea talu mai le toetu o Iesu Keriso.¹²

Tatou te taliaina ma le lotomaualalo ma le agaga faafetai, lenei tiutetauave tele ua tuu mai i luga o le Ekalesia. Tatou te fiafia lava e punouai i se faigapaaga ma lo tatou Tama Faalelagi i le galuega tele o le faaolataga ma le faaeaga o lana fanau. Tatou te tuuina atu ma le loto i ai o tatou taimi ma ni tupe na te faamanuiaina ai i tatou i le faatuina o lona malo i le lalolagi. Ua tatou iloa o lenei mea o lo tatou tiute muamua lea ma lo tatou avanoa sili. O lenei agaga ua iloa ai le galuega faafaifeautalai a le Ekalesia a Iesu Keriso o le Au Paia o Aso e Gata Ai i vaitau uma o le lalolagi. Ua avea o se faailoga tupito o le aumaiga o le tisipenisione o le atoatoaga o taimi—o tatou taimi. Po o fea lava e i ai tagata faamaoni o le Au Paia o Aso e Gata Ai, e i ai foi iina lenei agaga o le ositaulaga le manatu faapito mo le faamoemoega silisili i le lalolagi atoa.¹³O loo i ai se tatou misiona tele. E ao ona tatou saunia, o e talavou ma e matutua. E ao ona tatou tutu atu o se faamanuiaga i atunuu, faamaoni i mataupu faavae o le amiotonu.

¹⁴

E mafai ona avea i tatou uma ma faifeautalai, po o a lava o tatou tulaga po o ni tofiga i le olaga.

I le avea ai ma tagata o le Ekalesia a le Alii, e tatau lava ona tatou manatu mamafa i le galuega faafaifeautalai. Afai o loo e galue e pei ona tatau ai, afai e te alofa i lenei galuega, o le a e fesoasoani e laveai agaga o le fanau a tagata.¹⁵

E le gata e tatau ona manatu i le faasoaina atu o le talalelei o se tiute faaleperisitua, ae e tatau foi ona tatou tulimatai uma atu i lenei aafiaga ma se fiafiaga sili ma le naunautai. O le faamoemoega moni lava o le faasoaina atu o le talalelei o le aumaia lea o agaga ia Keriso, ia aoao ma papatiso fanau a lo tatou Tama Faalelagi ina ia mafai ona tatou olioli faatasi ma i latou (tagai MF&F 18:15) i le malo o lo tatou Tama.¹⁶

Tatou te limalima uma i lenei tiutetauave maoae. E le mafai ona tatou aloese ai. Ia aua ne’i manatu ifo se alii po o se tamaitai e faapea, ona o nofoaga o tatou aumau ai, pe ona o o tatou tulaga i saofaiga faitele, pe ona o a tatou galuega po o tulaga o galuega, ona tuusaunoa ai lea o i tatou mai lenei tiutetauave.¹⁷

Alii talavou ma tamaitai talavou

Matou te faamoemoe ua i ai ni fuafuaga a alii talavou uma ia avea ma se avefeau mo le Alii.¹⁸

E faapefea ona e atiaeina i loto o taulelea se manao tele e auauna atu? E te le faatali … e fesoasoani ia i latou e fai se faaiuga pe auauna atu i se misiona. E te fesoasoani ia i latou e fai le faaiuga e o pe a tai iva, sefulu pe sefulutasi tausaga le matutua! O le aiga o le nofoaga lea e amata ai sauniuniga a alii talavou. Ma e tatau i alii talavou uma ona saunia i lona aiga e auauna atu.

O le vave sauniuni e aofia ai le aoaoina o se tama talavou e tatalo, faitau atu ia te ia tala mai le Tusi a Mamona ma isi tusitusiga paia, faia o afiafi faaleaiga ma tuu atu ia te ia se vaega o le lesona [e aoao mai], aoao o ia i mataupu faavae o le amio mama, amataina o se teugatupe mo lana misiona i le lumanai, aoaoina o ia i le auala e galue ai, ma le sauniaina o ni avanoa e auauna atu ai i isi.¹⁹

Matou te mananao i alii talavou e ulufale atu i le galuega faamisiona ua mafai ona ulufale atu i le galuega faamisiona ma “galulue loa ma le malosi,” o e ua i ai le faatuatua e puna mai i le amiotonu o le tagata lava ia atoa ai ma le ola mama ina ia mafai ona latou faia se misiona maoae ma le faamanuiaina.²⁰

E finagalo le Alii i alii talavou uma ia auauna atu o se faifeautalai faamisiona. … E leai se isi lava mea e sili atu ona taua e mafai ona faia e se alii talavou i lo lenei. E mafai ona faatali le a’oga. O sikolasipi e mafai ona tolopo i se isi taimi. O sini faalegaluega e mafai ona tolopoina. Ioe, e oo lava foi i se faaipoipoga i le malumalu e tatau lava ona faatali seia mae’a ona auauna atu se alii talavou i se misiona faamamaluina mo le Alii.

… O tamaitai talavou … e mafai foi ona maua le avanoa e auauna atu ai i le galuega faamisiona. Ou te faafetai ona sa auauna atu la’u lava soa e faavavau i se misiona i Hawaii ae ma te le’i faaipoipo i le Malumalu o Sate Leki, ma ua ou fiafia lava ona e toatolu fanau teine a la’u fanau sa auauna atu faamisiona. O nisi o a tatou faifeautalai sili ona lelei o tuafafine talavou.²¹

Faifeautalai matutua

Tatou te manaomia se numera faateleina o faifeautalai matutua i le auaunaga faamisiona.²²

E toatele ulugalii matutua atu e mafai ona auauna atu i ni misiona. O le faia o lea mea, o le a latou iloa ai, o se misiona e faamanuiaina ai a latou fanau, fanau a a latou fanau, ma fanau a fanau a a latou fanau i se ala e le mafai ona faia i se isi lava auala. O le a faia ai se faataitaiga sili mo fanau i le lumanai.²³

E toatele ulugalii e mafai ona molimau, o a latou auaunaga faamisiona o nisi ia o taimi sili ona latou fiafia faatasi ai ona sa latou matuai tuuto atoatoa atu i le faamoemoega e tasi—le galuega faafaifeautalai.²⁴

Galuega faamisiona a tagata o le au paia

E tatau ona matou faamamafa atu le manaomiaina o le faateleina o le galuega faamisiona a tagata o le au paia. Ua faamaonia e ala i aafiaga, o le galuega aupito sili lenei ona faamanuiaina o galuega uma faamisiona. O galuega faamisiona a tagata o le au paia o se tasi lea o vaega taua e manaomia mo le tuputupu ae o o tatou tagata taitoatasi o le au paia. O lo’u talitonuga maumaututu o le galuega faamisiona a tagata o le au paia o le a siitia ai le faaleagaga i soo se uarota lava latou te faatinoina.²⁵

A woman giving another woman a Book of Mormon. — “Ua faamoemoeina i tatou e le Alii ia avea ma ni faifeautalai.”

O le a le umi talu mai le taimi mulimuli na e valaaulia ai se tuaoi i le sauniga faamanatuga po o se konafesi faalesiteki, pe sau i lou fale mo se afiafi faaleaiga? O le a le umi talu mai le taimi mulimuli na e faia ai se talanoaga moni e faatatau i le talalelei? O aafiaga matagofie nei.²⁶

O le a lagolago e le Alii tagata o le au paia i o latou tiutetauave faafaifeautalai pe afai e ia i latou tau lava o le faatuatua e taumafai ai.²⁷

O le taimi lenei e siitia ai la tatou vaai, ina ia maua se vaaiga mamao o le maoae o lenei galuega tele. O loo faamoemoeina e le Alii mai ia i tatou. E le lava le tau na ona avea ma tagata o le Ekalesia ma o i le sauniga faamanatuga, totogi a tatou sefuluai, ma lagolago le polokalama o le uelefea. E lelei uma mea na—ae e le lava lena. Ua faamoemoeina i tatou e le Alii ia avea ma ni faifeautalai, ia ola i le talalelei—ioe, i le atoatoa, ma ia fesoasoani e fausia Lona malo.²⁸

O le Tusi a Mamona o le tusitusiga faavae sili lea e tatau ona tatou faaaogaina i la tatou galuega faafaifeautalai.

O le Tusi a Mamona e mo le tagata o le ekalesia ma le tagata e le auai i le ekalesia. A tuufaatasi ma le Agaga o le Alii, o le Tusi a Mamona o le meafaigaluega aupito silisili lea ua tuuina mai e le Atua ia i tatou e faaliliu ai le lalolagi. Afai e ao ona tatou faia se seleselega o agaga, e tatau ona tatou faaaogaina le meafaigaluega ua mamanuina e le Atua mo le galuega—o le Tusi a Mamona.

Ma o le faitauina o le Tusi a Mamona o se tasi lea o faatauanau silisili e mafua ai ona tatou fia o i le misiona. Tatou te manaomia nisi faifeautalai se toatele atu. Ae tatou te manaomia foi ni faifeautalai ua lelei atu ona saunia e o mai mai uarota ma paranesi ma aiga ia latou te iloa ma fiafia ai i le Tusi a Mamona. Tatou te manaomia ni faifeautalai o i ai se molimau malosi i lona paia, ma o e, e ala i le Agaga e mafai ona luiina a latou tagata sailiili e faitau ma mafaufau loloto i ona itulau, ma iloa ma le mautinoa lelei o le a faaali mai e le Alii ia i latou lona moni e ala i le mana o le Agaga Paia. Tatou te manaomia ni faifeautalai e tutusa lelei ma la tatou savali.²⁹

O le Tusi a Mamona o le tusitusiga faavae sili lea e ao ona tatou faaaogaina i la tatou galuega faafaifeautalai. Na te faaali mai o Iosefa Samita o se perofeta. O loo i ai afioga a Keriso, ma lana misiona maoae o le aumaia o tagata ia Keriso. O isi mea uma e taula i ai. O le fesili laualuga lava o le Tusi a Mamona o le “E te fia aoao atili e uiga ia Keriso?” O le Tusi a Mamona o le auala sili lea ona lelei e saili ai ia maua le tagata ua saunia e talia le talalelei. E le o i ai ni mea e “fiafia i ai le lalolagi,” ma o lea, e le fiafia i ai le lalolagi. O se faamama maoae. (Tagai 1 Nifae 6:5.)

O loo i ai se eseesega i le va o se tagata liliu mai o loo atiina ae i luga o le papa o Keriso e ala i le Tusi a Mamona ma piimau pea i le āi uamea, ma le tagata e le o faia faapea.³⁰

E le tatau ona galo ia i tatou, o le Alii Lava Ia na sauniaina le Tusi a Mamona e fai ma Ana molimau autu. O le Tusi a Mamona o loo avea pea ma a tatou meafaigaluega faafaifeautalai e sili ona mamana. Ia tatou faaaogaina.³¹

Ina ia faamanuiaina i le galuega faafaifeautalai, e tatau ona tatou maua le Agaga, maua le lotomaualalo, alofa i tagata, ma galue ma le maelega.

O nisi taimi e fesili ai faifeautalai, “E mafai faapefea ona manuia a’u taumafaiga? E faapefea ona mataalia se tasi i le galuega faafaifeautalai?” O vaega autu nei e fa ua faamaoniaina mo le manuia o le galuega faafaifeautalai mo faifeautalai ma tagata uma o le ekalesia.

Muamua, taumafai ia maua le Agaga.

Ina ia faamanuiaina, e tatau ona tatou maua le Agaga o le Alii. Ua aoaoina i tatou e faapea o le a le nofo le Agaga i malumalu le mama. O le mea lea, o le tasi o mea muamua e ave i ai la tatou faamuamua, o le mautinoa lea o loo ua faatulagaina lelei o tatou lava olaga patino. Na folafola mai e le Alii, “Ia mama outou o e e tauaaoina ipu a le Alii.” (Mataupu Faavae ma Feagaiga 38:42.)

Ua tuuina mai e le Faaola ia i tatou Lana tulafono e faatatau i le aoaoina atu o Lana talalelei: “O le a tuu atu ia te outou le Agaga e ala i le tatalo o le faatuatua; ma afai tou te le maua le Agaga aua tou te aoao atu.” (Mataupu Faavae ma Feagaiga 42:14.)³²

Afai e i ai se savali se tasi ua faafia ona ou ta’uina atu i o’u uso o le Toasefululua, o le Agaga o le mea lea e taulia. O le Agaga o le mea lea e taua. Ou te le iloa pe faafia ona ou faia lenei faamatalaga, ae ou te le vaivai lava e faapea atu—o le Agaga o le mea lea e sili ona taua.³³

Lona lua, ia maua le lotomaualalo.

Ua fetalai mai le Alii, e leai se tasi e mafai ona fesoasoani i lenei galuega vagana ua lotomaualalo o ia ma tumu i le alofa. (Tagai Mataupu Faavae ma Feagaiga 12:8.) Ae o le lotomaualalo e le o le vaivai lea. E le o le popole; e le o le fefe foi. E mafai ona [tatou] lotomaualalo ma lē fefefe foi. E mafai ona [tatou] lotomaualalo ma lototele foi. O le lotomaualalo o le iloa lea o lo tatou faalagolago atu i se mana e maualuga atu, o se manaoga tumau mo le lagolagosua mai a le Alii i Lana galuega.³⁴

E le mafai ona tatou faia na o i tatou le galuega lenei. O Lana galuega lenei. O Lana talalelei lenei. E tatau ona tatou maua Lana fesoasoani. Augani atu i ai, ola ia e mauaina, ma gauai atu lou loto i le Alii ia maua ai.³⁵

Lona tolu, alofa i tagata.

E tatau ona tatou atiina ae se alofa mo tagata. E tatau ona tatou alofagia i latou i le alofa mama o le talalelei, i se manao ia siitia i latou, ia atiina ae i latou, ia faasino atu i latou i se olaga maualuga atu, ma lelei atu ma iu atu ai i le faaeaga i le malo selesitila o le Atua. Matou te faamamafa atu uiga auau mama o tagata tatou te fegalegalea’i faatasi, ma ia alolofa ia i latou o ni fanau a le Atua o e e alofa i ai le Alii. …

O le a le mafai lava ona tatou mataalia sei iloga tatou te iloa ona faaali atu tiga alofa i fanau uma a lo tatou Tama—sei iloga tatou te iloa ona alolofa atu ia i latou. E mafai e tagata ona lagonaina le faasafua atu o le alofa ia i latou. E toatele e moomoo i ai. A tatou malamalama i o latou lagona, o le a faapena foi ona latou tali mai ma le agalelei ia i tatou. O le a tatou maua ai se uo.³⁶

Ua i ai so tatou … tiute sili ia alolofa i o tatou tuaoi. O le poloaiga lona lua lea le sili. O le toatele o o tatou tuaoi e le o avea i le taimi nei ma ni tagata o le Ekalesia. E tatau ona avea i tatou ma ni tuaoi lelei. E tatau ona tatou alolofa i fanau a lo tatou Tama ma feoeoea’i ma i latou.

Ou te faamoemoe lava o le a faatumulia i tatou i le alofa o le Atua mo o tatou uso a tagata!³⁷

Lona fa, galue ma le maelega.

Afai tatou te mananao e faatumauina le Agaga, e tatau ona tatou galulue. E leai se fiafia po o se faamalieina e sili atu nai lo le iloa, i le maea ai o se aso faigata o galuega, na tatou faia le mea sili tatou te mafaia.

O se tasi o mealilo aupito silisili o le galuega faafaifeautalai o le galue malosi. Afai e galue se faifeautalai, o le a ia maua le Agaga; afai na te mauaina le Agaga, o le a ia aoao atu e ala i le Agaga; ma afai na te aoao atu e ala i le Agaga, o le a ia pa’i atu i loto o tagata ma o le a fiafia o ia. Galue, galue, galue—e leai se isi tulaga faamalieloto e mafai ona suitulaga ai, aemaise lava i le galuega faafaifeautalai.”³⁸

Ou te iloa o loo soifua le Atua.O Lana galuega lenei. Ua toe fetalai mai o ia mai le lagi faatasi ma se savali mo le lalolagi atoa; e le mo na o se vaega o le Au Paia o Aso e Gata Ai, ae mo o tatou uso ma tuafafine uma, i totonu ma fafo o le Ekalesia. Talosia ia tuu mai e le Atua ia i tatou le malosi e avatu ai lena savali i le lalolagi, ia ola i le Talalelei, ia faatumauina tulaga faatonuina o le Ekalesia, ina ia mafai ona tatou agavaa i faamanuiaga folafolaina.³⁹

Fautuaga mo Suesuega ma le Aoaoina Atu

Fesili

Aisea e manaomia ai e le lalolagi le talalelei, “aua e leai lava se isi mea na te manaomiaina”? (Mo nisi faataitaiga, tagai i le vaega 1.) O a nisi o upumoni toefuataiina e te talitonu “o loo galala i ai le lalolagi”?
A o e iloiloina le vaega 2, mafaufau i le fautuaga e faatatau ia te oe ma lou aiga. O a ni auala e mafai ai e i tatou taitoatasi ona faasoa atu le talalelei, e tusa lava po o a o tatou tulaga? O a ni mea e mafai ona tatou faia e sauniuni ai mo le auaunaga faafaifeautalai faamisiona? O a ni mea e mafai ona tatou faia e fesoasoani ai i isi ia saunia mo le auaunaga faafaifeautalai faamisiona?
Na saunoa Peresitene Benson, o le Tusi a Mamona o le “meafaigaluega aupito silisili lea ua tuuina mai e le Atua ia i tatou e faaliliu ai le lalolagi” (vaega 3). O le a se taimi na e vaaia ai ni tagata na liliu mai e ala i le suesueina o le Tusi a Mamona? O a ni auala e mafai ona faaleleia atili ai a tatou taumafaiga e faasoa atu le Tusi a Mamona?
Na faasoa mai e Peresitene Benson ni “vaega autu se fa ua faamaoniaina mo le manuia o le galuega faafaifeautalai” (vaega 4). Aisea e te manatu ai, o nei vaega autu e taitai atu ai i le manuia o le galuega faafaifeautalai? O a ni faataitaiga ua e vaaia o ni tagata o mulimuli i nei mataupu faavae?

Mau Talafeagai

Mareko 16:15; 1 Timoteo 4:12; Alema 17:2–3; 26:1–16; MF&F 4; 12:7–9; 15:4–6; 88:81; 123:12–17

Fesoasoaniga mo le Aoao Atu

“Ia fetufaai atu mea na e aoaoina. A o e faia lenei mea, o le a manino ou manatu ma o le a faateleina lou malosi e faatumau ai” (O le Aoao Atu, E Leai Se Isi Valaauga E Sili Ai [1999], 17).