Mataupu 10
Faalilofia le Lalolagi ma o Tatou Olaga i le Tusi a Mamona
“O loo i ai se mana i totonu [o le Tusi a Mamona] lea e amata ona oo mai i o outou olaga i le taimi lava e amata ai ona suesue ma le manatu mamafa i le tusi.”
Mai le Soifuaga o Ezra Taft Benson
I le konafesi aoao ia Aperila 1989, na faitauina ai e Peresitene Thomas S. Monson se savali mai ia Peresitene Ezra Taft Benson i tamaiti o le Ekalesia. I lenei savali, na saunoa ai Peresitene Benson:
“Ou te iloa o loo outou faitauina le Tusi a Mamona, aua na ou mauaina le faitau selau o tusi patino mai ia te outou e ta’u mai ai ia te a’u o loo outou faitauina lenei tusi paia. Ou te tagi i le fiafia pe a ou faalogo i lenei mea. …
“E ese lo’u fiafia e faalogo atu i lo outou fiafia i le Tusi a Mamona. Ou te fiafia foi i ai, ma e finagalo le Tama Faalelagi ia faaauau pea ona outou aoao mai le Tusi a Mamona i aso uma lava. O le meaalofa faapitoa lena a le Tama Faalelagi mo outou. O le mulimuli ai i ona aoaoga, o le a outou aoao ai e fai le finagalo o lo tatou Tama o i le Lagi.”1
I le Ekalesia atoa, na usitai ai le Au Paia o Aso e Gata Ai i lenei fautuaga mai lo latou perofeta. O tala o loo i lalo, ua tuuina mai ai ni faataitaiga o faamanuiaga na oo mai ia i latou o e na tali atu i le valaau a Peresitene Benson e “faalilofia le lalolagi ma o [latou] olaga i le Tusi a Mamona.”2
“‘Ailoga e mo’i lana tala lena!’ o mafaufauga ia o Margo Merrill … i le taimi muamua na ia faalogo ai i le talosaga a Peresitene Ezra Taft Benson ina ia faitau faatasi e matua ma a latou fanau le Tusi a Mamona. ‘O la’u fanau e na o le ta’i ono, lima ma le lua tausaga le matutua. O le a na o le maumau ai o lo’u taimi ma lo’u onosai.’
“Ae sa filifili lava Uso ma Tuafafine Merrill e faataitai ona faitau le Tusi a Mamona faatasi ma le la fanau. Ina ua latou oo i le tala ia Nifae ma lana aufana gau, na faapea ona ma’i ai Melisa e ono tausaga le matua i le nimonia.
“‘Na augani mai Melisa e tuu o ia e alu i le aoga e tusa lava pe ma’i,’ [o le tala lea a] Margo. ‘Fai mai o ia, afai o le a le alu, o le a le iloa e lana uo o Pamela—o lē e auai i se isi ekalesia—le mea na tupu ia Nifae. Na tagi masusu Melisa ma faapalasi mai i o’u lima. Na ou soloina ona loimata ma fautuaina o ia e valaau ia Pamela i le telefoni ma faamatala i ai le mea na tupu ia Nifae.
“‘A o ou faalogo atu ia Melisa o faamatala auiliili atu le mea na tupu i le aufana gau a Nifae, sa ou manatuaina o’u mafaufauga na i ai muamua e uiga i le maumauina o lo’u taimi ma lo’u onosai i le faitauga o le Tusi a Mamona i la’u fanau laiti. Oka, so’u manatu faatauvaa i lo latou tomai e aoao i lesona o le Tusi a Mamona!’”3
Sa mafaufau loloto Howard J. McOmber II i le apoapoaiga a Peresitene Benson e faalilofia le lalolagi i le Tusi a Mamona. Sa mafaufau o ia, “E mafai faapefea e a’u o se tagata e toatasi ona avea ma se vaega taua o se na lologa?
“Ona oo lea i se tasi po,” na fai mai ai Uso McOmber, “a o o’u mafaufau loloto i lenei faafitauli na ou iloa ai, e mafai ona ou tuuina atu i tagata taitoatasi uma o le matou auala tele le avanoa e maua ai se kopi o le Tusi a Mamona.
“Ae na i ai se faafitauli—na latou iloaina a’u. Na latou iloaina la’u taifau lea e ōu soo—ma ōu i taeao po. Na latou iloa o lo’u fanua sa le o se fanua sili lea ona manaia le teuina o le pitonuu. Na latou iloa o’u vaivaiga o se tuaoi; atonu o le a latou teena a’u.
“Ae sa ou naunau ia maua le faatuatua e alu atu ai pea. O le a ou ofo atu ia i latou le tusi—e tusa lava pe latou te tiaiina, ia pe tuu foi e pefua ai lava i luga o a latou fata mo ni tausaga se tele. Sa oo mai ia te a’u ni mafaufauga le lelei; na toetoe lava a ou faatalitonuina a’u lava o le a leai se mea e maua mai i a’u taumafaiga.
“Ona ou manatuaina lea ou te iloaina foi o’u tuaoi, lea e tai tutusa lava ma lo latou iloaina o a’u. O nisi o i latou na faamatalaina ni tala tausua faalemanuia i le fonotaga talu ai a le nuu mo atinaega, ae o nisi foi na ova le onanā i le papakiu a le pitonuu na faia talu ai. O nisi na foliga mai na itiiti lava se faamoemoe na i ai i o latou olaga. Sa ou mafaufau pe mata ou te faape’ī pe ana fai e le o a’u o se tagata o le Ekalesia, pe ana fai foi ou te le’i faalogo i le Tusi a Mamona. E mautinoa lava, e mafai ona fesoasoani le tusi lenei ia i latou o e o le a tuu atu se avanoa e faitau ai.
“O lea na ou faafesootaia ai tagata uma o le matou auala tele ma ofo atu ia i latou se kopi o le Tusi a Mamona—ma sa latou faafetai mai uma ia te au! Sa matuai sologa lelei lava, lea na ou alu atu ai i le isi auala tele na sosoo atu, ma faamaeaina ai le matou pitonuu, ona ou alu atu ai lea i le isi foi pitonuu na sosoo ai. Ina ua uma, na ou asia fale e 104 ma tuu ai ni tusi e fasefulu.
“Sa amata ona faigofie le ofoina atu o kopi o le Tusi a Mamona i tagata ou te masani ai.
“Mulimuli ane, na ou tuuina atu ai i tagata faigaluega uma e fitusefulu ma le lima matou te faigaluega ni kopi o le Tusi a Mamona. O le luasefulutolu o i latou na fai a latou lesona e faifeautalai. E toafitu na papatisoina mulimuli ane, ae toafa fanau a tagata na matou faigaluega faatasi na auai foi i le Ekalesia. E toatasi se alii na fai ana lesona e lua ae tei ane ua le toe fiafia e sailiili i le Ekalesia. E fitu masina mulimuli ane talu ona siitia atu i se isi galuega i se isi kamupani, ae valaau mai o ia e ta’u mai, sa ia faitauina le Tusi a Mamona ma iloa ai sa ia lagonaina le pa’i malie ma le toafilemu o le Agaga, e pei lava ona sa ou faamatalaina ai. E le’i umi, ae faamaeaina foi ana lesona ma papatisoina.
“Ou te fiafia i le Tusi a Mamona. Ou te mafaufau i ai o se kata e valaau ai le Alii, ma ua ou maofa i le faigofie ona amatalia ai o se lologa faaleagaga i se tulaga patino lava. A tatou faia le galuega a le Alii, tatou te mauaina lana fesoasoaniga.”4
Na faamatala mai e se isi tagata le suiga na tupu i lana molimau a o mulimuli o ia i le fautuaga a Peresitene Benson e faitau le Tusi a Mamona: “Ina ua luiina tatou e Peresitene Benson e faitau le Tusi a Mamona, sa 15 o’u tausaga. O le taimi lena o o’u faamaoni lava i le faitauina o tusitusiga paia, ae na matele lava lo’u taulai atu i le Feagaiga Fou. Ae i le uunaiga a Peresitene Benson, na amata ai ona ou suesue i aso uma i le Tusi a Mamona. O se taimi sili lea ona taua o le suiga mo a’u. Na aoaoina a’u e le Feagaiga Tuai e faatatau i le auaunaga faalelalolagi a Iesu Keriso, ma o le a ou faafetai pea i lena mea. Ae sa ou manaomia le loloto lea na oo mai mai le suesueina o le Tusi a Mamona. E ui ina sa fesoasoani le Tusi Paia ia ou iloa mea na fai e Iesu mo tagata i le Nuu Paia, ae na aumaia e le Tusi a Mamona ia te a’u se malamalamaaga loloto o mea ua Ia faia mo a’u. E ala i se suesuega o le Tusi a Mamona, na ou maua ai se molimau i le Togiola le i’u a lo’u Faaola. Ma mulimuli ane, ina ua ou feagai ma faalavelave na tofotofoina ai lo’u faatuatua, sa ou liliu atu ai i le Tusi a Mamona mo le faamafanafanaga ma le malosiaga. O le taimi nei, ou te le tuua lava se aso e mavae atu e aunoa ma le faitauina o le Tusi a Mamona.”5
Ua faitau miliona i latou ua o mai ia Keriso ona o upumoni o loo i totonu o le tusi na tuuina mai e Moronae ia Iosefa Samita.
Aoaoga a Ezra Taft Benson
1
O le Tusi a Mamona na tusia mo i tatou.
O le Tusi a Mamona … na tusia mo o tatou aso. Sa le’i maua e sa Nifae le tusi; e faapena foi ia sa Lamana o aso anamua. Sa fuafuaina mo i tatou. Sa tusitusi Mamona e lata i le taufaaiuiuga o le malo o sa Nifae. E ala mai i musumusuga a le Atua, o lē e silafia mea uma mai lava i le amataga, sa ia faapupuuina ai talafaamaumau o seneturi e tele, filifilia tala, lauga, ma mea na tutupu o le a sili ona aoga ia i tatou.
Ua molimau mai tusitala autu taitasi o le Tusi a Mamona na latou tusitusi mo tupulaga o le lumanai.… Afai na latou vaai i o tatou aso ma filifilia mea o le a sili ona taua mo i tatou, pe le o se pogai sili ea lena ona taua e tatau ai ona tatou suesue ma aoao i le Tusi a Mamona? E tatau ona le aunoa ona tatou fesili ifo ia i tatou lava, “Aisea na musuia ai Mamona (po o Moronae po o Alema) e le Alii ia faaaofia na mea i lana tusitusiga? O le a se lesona e mafai ona ou aoaoina mai lena mea e fesoasoani ai ia te au ou te ola ai i nei aso ma nei vaitau?”
O loo i ai lea faataitaiga ma lea faataitaiga o auala o le a tali ai lena fesili. Mo se faataitaiga, ua tatou maua i le Tusi a Mamona le ala tatou te sauniuni ai mo le Afio Mai Faalua. O se tasi o vaega tele o le tusi ua faatatau tonu i ni nai tausaga a o lumanai le afio ifo o Keriso i Amerika. E ala i le suesueina ma le totoa o lena vaitau, e mafai ai ona tatou iloa le mafuaaga na faaumatiaina ai nisi i faafanoga matautia na muamua atu i Lona afio ifo, ma po o le a foi le mea na mafai ai ona o atu isi ma tutu i le malumalu i le laueleele o Nuumau ma pa’i atu o latou lima i manu’a o Ona lima ma Ona vae.
Tatou te iloa mai le Tusi a Mamona le ala na ola ai soo o Keriso i taimi o taua. Tatou te iloa mai le Tusi a Mamona le leaga o faapotopotoga faalilolilo na faaalia i faamatalaga auiliili ma le taufaafefe moni. O le Tusi a Mamona tatou te maua ai lesona mo le taulimaina o sauaga ma le liliuese. E tele mea tatou te aoao mai ai e uiga i ala e faia ai galuega faafaifeautalai. Ae sili atu i lo se isi lava tusi, tatou te iloa i le Tusi a Mamona le matautia o le faalelalolagi, ma le pupū o o tatou loto i mea o le lalolagi. E i ai ea se tasi e masalosalo na tusia lenei tusi mo i tatou, ma tatou te maua mai ai i totonu le mana tele, faamafanafanaga tele, ma le puipuiga tele?6
2
A o tatou suesueina le Tusi a Mamona i aso uma, o le a tafe atu le mana o le tusi i totonu o o tatou olaga.
E le faapea e na o upumoni e aoao ai i tatou e le Tusi a Mamona, e ui o le mea moni lena na te faia. E le faapea e na o le molimau mai o le Tusi a Mamona e uiga ia Keriso, e ui o le mea tonu lena o loo ia faia foi. Ae o loo i ai se isi mea e sili atu. O loo i ai se mana i le tusi lea e amata ona tafe atu i o outou olaga i le taimi lava e amata ai ona e suesue faamaoni i le tusi. O le a e maua ai le malosi sili atu e tetee ai i faaosoosoga. O le a e maua ai le malosi sili atu e aloese ai mai mea taufaasese. O le a e maua ai le malosi e tumau ai i le ala sa’o ma le vaapiapi. O tusitusiga paia ua taua o “afioga o le ola,” (MF&F 84:85), ma e leai se isi mea e sili atu ai ona moni lena faaupuga nai lo o le Tusi a Mamona. Pe a amata ona e fiaai ma fiainu i na upu, o le a e maua ai le ola manuia faateleina.7
E mafai e tagata ona faasese e le tasi le isi, ae e le faaseseina e le Atua le tagata. O le mea lea, o le Tusi a Mamona ua faataatiaina le suega sili ona lelei mo le iloaina o lona moni a’ia’i—o le faitau lea i ai ona ole atu lea i le Atua pe moni [tagai Moronae 10:4]. …
O lenei la, o le faamautinoaga sili lea mo e loto faamaoni—ia iloa ai e ala i faaaliga faaletagata lava ia mai le Atua, e moni le Tusi a Mamona. E faitau miliona i latou ua faataitaia ma iloa, ma e faateleina le faitau miliona o isi o le a latou iloaina.
O le taimi nei, ua manaomia e le agaga atoa ma le tino le fafagaina e le aunoa. O le taumafataga ananafi ua le lava lea mo le tausiga o manaoga o le asō. E faapena foi la i le le faitauina soo o le “tusi e aupito sili ona sa’o i luga o le fogaeleele,” e pei ona ta’ua e Iosefa Samita, e le lava lea. (History of the Church, 4:461.)
E le o upumoni uma e tutusa le taua, e faapena foi i tusitusiga paia uma e le tutusa le taua. O le a se isi auala e sili atu ona lelei e fafaga ai le agaga nai lo o le taumafa soo mai le tusi na fai mai le Perofeta o Iosefa Samita, o le a “latalata atili atu ai se tagata i le Atua e ala i ona mataupu, nai lo o se isi lava tusi”? (History of the Church, 4:461.)8
Pe faalagolago ea taunuuga e faavavau i lo tatou tali atu i lenei tusi? Ioe, a le o lo tatou faamanuiaga, o lo tatou faasalaga.
E tatau i tagata uma o le Au Paia o Aso e Gata Ai ona suesue i lenei tusi i le olaga atoa. A le o lea, ua ia tuuina lona agaga e lamatia ma lafoai ai le mea e mafai ona tasi ai lona tulaga faaleagaga ma faaleatamai i lona olaga atoa. E i ai se eseesega i le va o se tagata liliu mai ua faavae i luga o le papa o Keriso e ala i le Tusi a Mamona ma pipii mau ai i le ai uamea, ma le tagata liliu mai e [le] o faia lena mea.9
Ua tatou maua se numera faateleina o e ua faatalitonuina, e ala i le Tusi a Mamona, o Iesu o le Keriso. O le taimi nei ua tatou manaomia se numera faateleina o e o le a faaaogaina le Tusi a Mamona e tuuto atu ai ia Keriso. E manaomia ona faatalitonuina i tatou ma tuuto atu.
… O’u uso e ma tuafafine pele, ia tatou faitauina le Tusi a Mamona ma ia talitonu ai o Iesu o le Keriso. Ia faaauau pea ona tatou toefaitauina le Tusi a Mamona ina ia mafai ona tatou o mai atoatoa ai ia Keriso, ia tuuto atu ia te Ia, ia faatotonugalemu ia te Ia, ma ia musuiaina e Ia.
Tatou te fetaiai ma le fili i aso uma lava. O luitau o lenei vaitau o le a faatautava ma soo se fili o le tuanai, ma o nei luitau o le a faateteleina uma i le faaleagaga ma le faaletino. E tatau ona tatou latalata atu ia Keriso, e tatau ona tatou tauaveina i aso uma Lona suafa i o tatou luga, ma manatua pea o Ia, ma tausia Ana poloaiga.10
3
E tatau ona tatou faalilofiaina le lalolagi ma o tatou olaga i le Tusi a Mamona.
E manaomia e i tatou taitoatasi ona maua ni a tatou lava molimau o le Tusi a Mamona e ala i le Agaga Paia. Ma o a tatou molimau, faatasi ma le Tusi a Mamona, e tatau ona faasoa atu i isi ina ia mafai ai foi ona latou iloa lona moni e ala i le Agaga Paia.11
Pe mafai ona e vaai faalemafaufau i le mea o le a tupu i le faateleina o le aofai o kopi o le Tusi a Mamona e taulimaina e se numera faateleina o faifeautalai, o e e iloa le ala e faaaoga ai, ma o e ua fanauina i la le Atua? A tupu lenei mea, o le a tatou maua se seleselega tele o agaga e pei ona folafolaina mai e le Alii.12
“O loo ia te a’u se vaaiga mamao i le faalilofiaina o le lalolagi i le Tusi a Mamona.”
E i ai so’u talitonuga maumaututu: O le faatele lava ona tatou aoao atu ma talai atu mai le Tusi a Mamona, o le tele foi lena o lo tatou faafiafiaina o le Alii, ma o le faateleina foi lena o lo tatou mana e tautala atu ai. O le faia o lena mea, o le a matuai faatoateleina ai o tatou tagata liliu mai, i totonu o le Ekalesia, ma i latou tatou te talai atu i ai. … O le tatou tiute la o le aoao atu o mataupu faavae o le talalelei o loo i le Tusi Paia ma le Tusi a Mamona. “O mea ia ia latou aoao atu, e pei ona o le a taitaiina ai i latou e le Agaga” (MF&F 42:13).13
O le Tusi a Mamona o le meafaigaluega lea ua mamanuina e le Atua e “tafi [ai] le lalolagi … e pei o se lolo, ae faapotopoto [Ana] au filifilia.” (Mose 7:62.) O lenei lomiga paia o tusitusiga paia e tatau ona faatutotonu atili i a tatou talaiga, a tatou aoaoga, ma a tatou galuega faafaifeautalai.
… I lenei vaitau o ala o faasalalauga faaeletonika ma le anoanoai o le faasalalauina o le afioga lolomi, o le a faamasinoina ai i tatou e le Atua pe afai tatou te le tuleia le Tusi a Mamona i se auala silisili.
Ua i ai ia i tatou le Tusi a Mamona, ua i ai ia i tatou tagata o le au paia, ua i ai ia i tatou faifeautalai, ua i ai ia i tatou punaoa, ae o le manaoga ua i ai i le lalolagi lea. O le taimi lava lenei!
O’u uso e ma tuafafine pele, e faigata ona tatou malamalama i le mana o le Tusi a Mamona, po o le matafaioi paia e tatau ona ia faia, po o le tele e tatau ona tuleia. …
Ou te luiina i tatou uma ia mafaufau ma le agaga tatalo i laasaga e mafai ona tatou faia patino e aumai atoatoa ai lenei molimau fou mo Keriso i totonu o o tatou lava olaga ma i se lalolagi ua matuai manaomiaina lava [le Tusi a Mamona].
E i ai sa’u vaaiga mamao o aiga e lapataia, o vasega e fāgua, ma pulelaa e toe faamumuina i le agaga o savali o le Tusi a Mamona.
E i ai sa’u vaaiga mamao o faiaoga o aiga ma faiaoga asiasi, taitai o uarota ma paranesi, ma taitai o siteki ma misiona o fautuaina o tatou tagata mai le tusi e aupito sili ona sa’o nai lo o se isi lava tusi i le lalolagi—o le Tusi a Mamona.
E i ai sa’u vaaiga mamao o tagata faatufugaga ua latou faia ata tifaga, talafaatino, tusiga, musika, ma atavali mai autu maoae ma tagata iloga mai le Tusi a Mamona.
E i ai sa’u vaaiga mamao o le faitau afe o faifeautalai e o atu i le galuega faamisiona ua taulotoina le faitau selau o mau mai le Tusi a Mamona, ina ia mafai ona latou fafagaina ai manaoga o se lalolagi ua matelaina faaleagaga.
E i ai sa’u vaaiga mamao o le latalata atu o le Ekalesia atoa i le Atua e ala i le ola ai i mataupu o le Tusi a Mamona.
O le mea moni, e i ai sa’u vaaiga mamao o le faalilofia o le lalolagi i le Tusi a Mamona.14
Tau ina ou faamalo atu ia te outou le Au Paia faamaoni, o e o loo taumafai e faalilofia le lalolagi ma o outou olaga i le Tusi a Mamona. E le gata e ao ona tatou tufatufaina atu i se tulaga sili atu ona faateleina ia kopi o le Tusi a Mamona, ae e ao foi ona tatou agai atu i luma ma le lotototoa i o tatou lava olaga ma le lalolagi atoa i ana savali ofoofogia.15
Fautuaga mo Suesuega ma le Aoaoina Atu
Fesili
-
I le vaega 1, toe iloilo le fautuaga a Peresitene Benson e uiga i le auala e suesue ai le Tusi a Mamona. E mafai faapefea e lenei fautuaga ona fesoasoani ia i tatou e faafetaiaia ia luitau? O a ni fuaitau o le Tusi a Mamona e faatatau i luitau tatou te fetaiai?
-
O a ni auala ua e vaaia ai le faataunuuina o folafolaga o loo lisiina i le vaega 2? O a nisi o mea e mafai ona tatou faia e faasoa atu ai le Tusi a Mamona i tagata o loo manaomia nei folafolaga i o latou olaga?
-
O le a sou manatu i le uiga o le “faalilofia o le lalolagi ma o [tatou] olaga i le Tusi a Mamona”? (Mo nisi o faataitaiga, tagai i le vaega 3.)
Mau Fesootai
2 Nifae 27:22; Mamona 8:26–41; Moronae 1:4; 10:3–5; tagai foi i le faatomuaga o le Tusi a Mamona
Fesoasoani mo Suesuega
A o e faitau, “vase lalo ma faailoga ia upu po o fuaitau ina ia e iloa ai le eseesega i le va o manatu o loo i totonu o se [fuaiupu] se tasi. … Ia tusi i autafa o fuaiupu ia mau e faamanino ai ia fuaiupu o loo e suesueina” (Tala’i La’u Talalelei [2004], 23).