Mataupu 11

Mulimuli i le Perofeta Soifua

“O le perofeta e aupito sili ona taua, e tusa ai ma o tatou tulaga, o le perofeta lea o loo soifua i o tatou aso ma vaitaimi.”

Mai le Soifuaga o Ezra Taft Benson

I se tasi po a o 15 tausaga le matua o Ezra Taft Benson, sa latou saofafai faatasi ai ma lona aiga atoa i le laulau ai ma faalogologo i lona tamā o faitauina se tusi mai ia Peresitene Iosefa F. Samita ma ona fesoasoani i le Au Peresitene Sili. O se vaega o le tusi na faapea mai: “Matou te fautuaina ma uunaia le amatalia o se ‘Afiafi Faaleaiga’ i le Ekalesia atoa, o se taimi lea e mafai ai e tamā ma tina ona faapotopoto faatasi a latou fanau tama ma teine i lo latou aiga ma aoao i latou i le afioga a le Alii. … Afai e usitai le Au Paia i lenei fautuaga, matou te folafola atu o le a tulai mai faamanuiaga sili. O le a faateleina le alofa i le aiga ma le usitai i matua. O le a atiina ae le faatuatua i loto o le autalavou o Isaraelu, ma o le a latou maua le mana e faasagatau atu ai i faatosinaga leaga ma tofotofoga e lofituina ai i latou.”¹

Sa ta’ua mulimuli ane e Peresitene Benson: “Ina ua faaiu e [lo’u tamā] le faitauina o le tusi, sa faapea mai o ia, ‘Ua saunoa le Au Peresitene, ma o le afioga lenei a le Alii ia i tatou!’ Na amata mai lava i lena taimi, sa matou faia ai ma le maelega ni afiafi faaleaiga i le fale na ou ola ae ai o se tama talavou.”²

Ina ua fai se aiga o Peresitene Benson lava ia, sa faaauau pea e i laua ma lona faletua le masani na ia aoaoina mai ona matua. Fai mai a ia, “Ou te molimau atu ona o lenei aafiaga [i le fale o o’u matua] ma le aafiaga o po faaleaiga i lo’u lava fale, e mafai ona maua ai faamanuiaga silisili faaleagaga.”³

I le 1947 sa faatonuina ai e le Au Peresitene Sili ia tagata o le Ekalesia e toefaafou ia taumafaiga e fai afiafi faaleaiga. O Peresitene Benson, a o avea ai i lena taimi ma se uso o le Korama a Aposetolo e Toasefululua, na faamamafaina lena mataupu i se saunoaga o le konafesi aoao. Sa molimau atu o ia e uiga i le aiga “o se faalapotopotoga paia,”⁴ ma sa ia faamanatu atu i le Au Paia ia faamanuiaga o le a oo mai ai pe afai latou te mulimuli i le fautuaga a le perofeta, ia faamalosia o latou aiga ma fai afiafi faaleaiga. Sa molimau o ia: “O lo tatou fiafia iinei ma le olaga a sau e fesootai ma lo tatou faatinoina lelei o lenei tiutetauave maoae. O’u uso e ma tuafafine, e tauia a tatou fuafuaga e faia ma le loto tatalo ma le gauai i ai, ma ou te mautinoa i totonu o lo’u lava loto, o le a faapea ona maua mai ai ni faamanuiaga silisili, o le a oo mai lena olioli tele ma le faamalieina pe afai tatou te usitai i lenei fautuaga e pei lava foi o isi fautuaga uma ua tuuina mai ia i tatou e le Au Peresitene o le Ekalesia.”⁵

O le tofo ai i faamanuiaga e maua mai le usitaia o fautuaga a auauna filifilia a le Alii, na uunaia soo ai e Ezra Taft Benson le Au Paia o Aso e Gata Ai ia latou tepa taula’i atu i le perofeta soifua. Sa ia molimau mai ma le lototele i le valaauga paia o Peresitene taitasi o le Ekalesia ia sa latou auauna faatasi.⁶ Ina ua fofogaina e Peresitene Spencer W. Kimball, o lē na faauuina o se Aposetolo i le aso lava e tasi lea na faauuina ai foi Peresitene Benson, ia lana uluai saunoaga i le avea ai ma se Peresitene o le Ekalesia i se vaega o taitai o le Ekalesia, sa “tulai [Peresitene Benson] ma faatasi ai ma se leo na faatumulia i le ootia, e faailoa atu le lagona o i latou uma na auai, ma faapea atu, i se aotelega: ‘Peresitene Kimball, o tausaga uma talu ona faia o nei fonotaga, matou te le’i faalogo lava i se saunoaga e pei o le saunoaga na faatoa e tuuina mai. E moni lava, o loo i ai se perofeta i Isaraelu.’”⁷ Ma ina ua oo mai lena valaauga paia ia Peresitene Benson ina ua maliu Peresitene Kimball, sa ia taliaina ma le lotomaualalo ma le naunautai. Na saunoa o ia: “Sa ma tatalo e le aunoa ma lo’u toalua o Flora, ina ia faaumiumi aso o Peresitene Kimball i luga o lenei fogaeleele ma faia ai se isi vavega mo ia. Ae o lenei ua fetalai le Alii, o le a ma faia le mea sili ma te mafaia, i lalo o lana taitaiga faatonutonu, e tulei ai i luma le galuega i le lalolagi.”⁸

Inside the Conference Center duing General Conference. October 2011. — O aso nei, ua faapotopoto ai le Au Paia o Aso e Gata Ai i le Maota Autu mo Konafesi ma le lalolagi atoa e faafofoga i le perofeta soifua.

Aoaoga a Ezra Taft Benson

O Le Peresitene o le Ekalesia o le fofoga fetalai o le Alii i le lalolagi.

Aoao e tepa taulai atu i le perofeta. O ia o le fofoga fetalai o le Alii ma e na o le pau lea o le tamalii e mafai ona saunoa mo le Alii i aso nei. Ia tuu atu le faamuamua i ana fautuaga musuia. Ia avea ana afioga musuia e fai ma faavae e iloiloina ai fautuaga a isi au pulega maualalo ifo. Ona ola latalata lea i le Agaga ina ia e iloa ai le moni o mea uma lava.⁹

O le fofoga fetalai o le Alii ma o le perofeta i luga o le fogaeleele i aso nei, e maua mai lana pule e ala i se laina o perofeta e tau atu ia Iosefa Samita, o lē sa faauuina e Peteru, Iakopo, ma Ioane, o e na faauuina e Keriso, o lē sa avea ma o loo avea pea ma faaao o le Ekalesia, o le Foafoa o lenei lalolagi, ma o le Atua o lē e tatau i tagata uma ona tutu i ona luma ma tali atu i ai.¹⁰

O le Ekalesia lenei e le o taitaia i le poto o tagata. Ou te iloa lena mea. O le mana ma le faatosinaga a le Atua Silisili Ese o loo taitaiina ai Lana Ekalesia.¹¹

O le perofeta e aupito sili ona taua mo i tatou o le perofeta soifua.

Ua silafia e le Atua mea uma, o le iuga mai le amataga, ma e leai se tagata e faafuasei ona avea ma peresitene o le ekalesia a Iesu Keriso, pe tumau ai iina ona o se mea e tupu fua, pe maliu e ala i se tulaga e le’i mafaufauina.

O le perofeta e aupito sili ona taua, e tusa ai ma o tatou tulaga, o le perofeta lea o loo soifua i o tatou aso ma vaitaimi. O le perofeta lenei o loo i ai faatonuga o aso nei mai le Atua ia i tatou. O le faaaliga a le Atua ia Atamu sa le’i faatonuina ai Noa i le auala e fau ai le vaa. O augatupulaga uma e manaomia tusitusiga paia anamua, faaopoopo i ai ma tusitusiga paia o loo i ai nei mai le perofeta soifua. O le mea lea, o faitauga ma mafaufauga loloto e aupito sili ona taua e tatau ona outou faia, o saunoaga musuia aupito lata mai nei ia mai le fofoga fetalai o le Alii. O le mafuaaga lena e taua ai ona e maua ma faitau totoa i ana upu. …

Ioe, matou te faafetai i lau afio, Le Atua, mo se perofeta e taitaia i matou i nei aso e gata ai [tagai Viiga, nu. 10].¹²

Ia faaeteete ia i latou o e faaaoga upu a perofeta ua maliliu e faasagatau ai i saunoaga a perofeta soifua, aua o perofeta soifua e ave i ai i taimi uma le faamuamua.¹³

O Peresitene taitasi na tulaga ese le filifiliina mo le taimi ma le tulaga na manaomia e le lalolagi ma le Ekalesia. O i latou uma o ni “tamalii mo le taimi sa’o,” e pei ona tatou molimauina ia Peresitene Spencer W. Kimball. Mafaufau i le vavega o lena muai faauuina ma sauniuniga! E ui sa valaauina ma tuuina i ai ki i le tele o tausaga a o le’i oo i le taimi na faaee atu ai le valaauga tele i ona luga, ae o taimi uma lava o le Peresitene o le tagata sa’o lea i le nofoaga sa’o mo ia taimi. O lenei lava vavega o se tasi o faamaoniga o le paia o le Ekalesia.¹⁴

Sei o’u fesili atu, pe tatou te manaomia ea se perofeta moni a le Alii i le lalolagi i aso nei? Pe na manaomia e tagata i le vaitaimi o Noa se perofeta e lapataia i latou faaleagaga ma faaletino? Ana musu se tagata e mulimuli ia Noa, mata e mafai ona faasaoina o ia mai le lolo? Ae ua ta’u mai e le Tusi Paia ia i tatou, o aso mulimuli tatou te ola ai, o le amioleaga o tagata o le a tutusa lava ma le amioleaga o tagata i aso o Noa ina ua faamamaina e le Atua le lalolagi i le lolo [tagai Mataio 24:37–39]. E te manatu la tatou te manaomia se perofeta i aso nei e lapataia ma saunia i tatou mo le faamamaina lea na folafola mai e le Atua o le a oo mai, ae o le taimi la lenei [o le a faamama] i le afi?¹⁵

Afai tatou te fia iloa po o le a le lelei o lo tatou tulaga ma le Alii, ona tatou fesili ifo lea ia i tatou lava, po o le a se lelei o lo tatou tulaga ma Lana taitai i le olaga lenei—o le a le latalata o le ogatasi o o tatou olaga ma le auauna faauuina a le Alii—le Perofeta soifua—Peresitene o le Ekalesia, faapea ma le Korama a le Au Peresitene Sili.¹⁶

President Ezra Taft Benson speaking. — A o avea ma Peresitene o le Ekalesia, sa saunoa atu Ezra Taft Benson ma le alofa tele ma le naunautai.

E ta’u mai e le perofeta soifua ia i tatou mea e manaomia ona tatou iloa, ae le o mea tatou te mananao e faalogo i ai.

O se uiga vaaia o se perofeta moni o lona folafola mai lea o se savali mai le Atua. Na te le tau faatoese mai mo le savali, pe fefe foi o ia i soo se taunuuga e faatatau i lona tulaga faaleagafesootai, lea e ono oo atu ai i le ulagia ma le sauaina.¹⁷

O nisi taimi e i ai i latou o e manatu o lo latou poto faalelalolagi i se mataupu faapitoa ua sili atu i le atamai faalelagi ua tuuina mai e le Atua i lana perofeta e uiga i lea lava mataupu e tasi. Latou te lagona e tatau i le perofeta ona i ai ni faailoga faalelalolagi po o se aoaoga e pei ona latou mauaina ae latou te lei taliaina soo se mea e saunoa i ai le perofeta lea e ono feteenai ma a latou aoaoga faalelalolagi. O le a se tele o aoaoga faalelalolagi na maua e Iosefa Samita? Ae na faapea ona ia tuuina atu faaaliga e uiga i ituaiga uma o mataupu. … Tatou te uunaia le poto faalelalolagi i le tele o itu, ae ia manatua, afai e i ai se feteenaiga i le va o le poto faalelalolagi ma saunoaga a le perofeta, ia outou tutu faatasi ma le perofeta ma o le a faamanuiaina ai outou, ma o le a i ai le taimi tou te iloa ai na outou faia le mea sa’o.

… E le tau faapea mai le perofeta, “Ua faapea ona fetalai mai o le Alii” ia tuuina mai ia i tatou ni tusitusiga paia.

O nisi taimi e i ai i latou e fefinaua’i e uiga i upu. Atonu latou te faapea mai na tuuina mai e le perofeta le fautuaga ae e le faamalosia i tatou e mulimuli i ai seiiloga e faapea mai o ia o se poloaiga. Ae ua fetalai mai le Alii e faatatau i le Perofeta, “Ua’i atu i ana upu uma ma poloaiga o le a ia tuu atu ia te outou.” (MF&F 21:4.)

… E ta’u mai e le perofeta ia i tatou mea e manaomia ona tatou iloa, ae le faapea o taimi uma e ta’u mai ai mea tatou te mananao e iloa.

“Ua e ta’u mai ia te i matou ni mea faigata, ua sili atu nai lo mea e mafai ona matou gafatia,” sa faaseā ai uso o Nifae. Ae na tali atu i ai Nifae e faapea, “E ave e tagata ua sala le upumoni o se mea faigata, ona e tuia ai i latou i le totonugalemu lava.” (1 Ni.16:1–2.)

Na saunoa Peresitene Harold B. Lee:

“Atonu e te le fiafia i mea e sau mai le pulega o le Ekalesia. E ono feteenai ma ou manatu faaupufai. E ono feteenai ma ou manatu faaleagafesootai. E ono faalavelave i nisi o tulaga o lou olaga tafao. … O lo outou saogalemu ma lo matou saogalemu e faalagolago lea pe tatou te mulimuli i ai pe leai. … Ia tatou tepa taulai atu pea i le Peresitene o le Ekalesia.” (Conference Report, October 1970, p. 152–153.)

Ae o le perofeta soifua lea e le fiafia moni i ai le lalolagi. Na saunoa Peresitene Kimball, “E oo lava i totonu o le Ekalesia, e toatele e matele i le atia’e o tuugamau o perofeta ua mavae ae fetogia faalemafaufau ia perofeta soifua.” (Instructor, 95:257.)

Aisea?Aua o le perofeta soifua na te ta’u sa’o mai mea e tatau ona tatou iloa i le taimi nei, ae e mananao le lalolagi i perofeta ina ia maliliu i latou, pe popole pea i mataupu e fitoitonu ia i latou lava. …

O le auala tatou te tali atu ai i saunoaga a se perofeta soifua pe a ia ta’u mai ia i tatou mea e manaomia ona tatou iloa, ae sili ai le aua ne’i lagonaina, o se suega lea o lo tatou faamaoni. …

Atonu e lagona e le au popoto e pau le taimi e musuia ai le perofeta o le taimi lea e tutusa ai lona finagalo ma o latou manatu, a le o lena, na pau le mea o loo faia e le perofeta o le faailoa mai o lona manatu—talanoa mai o se tagata masani. Atonu e lagona e le au mauoa latou te le manaomia se fautuaga mai se perofeta faatauvaa. …

… E le tau manaomia ona lauiloa le perofeta i le lalolagi po o mea faalelalolagi.

E vaeluaina tagata a o faailoa mai e se perofeta le upumoni. O e faamaoni i le loto e faalogo atu i ana upu, ae o e amioletonu, a lē amanaiaina le perofeta o le a finau ma ia. Pe a faailoa mai e le perofeta agasala a le lalolagi, e mananao tagata o le lalolagi a le o le tapuni o le fofoga o le perofeta po o le fai lava o latou e pei e le o i ai se perofeta, nai lo le salamo i a latou agasala. O le lauiloa e le o se tofotofoga lea o le upumoni. E toatele lava perofeta na fasiotia pe tuliesea. A o tatou latalata atu i le afio faalua mai o le Alii, e mafai ona e faamoemoeina lena mea a o faasolo lava ina amioleaga tagata o le lalolagi, o le a tuuitiitia le lauiloa o le perofeta ia i latou.¹⁸

O le a faamanuiaina i tatou a o tatou mulimuli i le perofeta soifua.

Ina ia fesoasoani ia outou pasia tofotofoga taua o loo i le lumanai, o le a ou tuuina atu ia te outou … se ki silisili, afai o le a outou faamamaluina, o le a faapaleina ai outou i le mamalu o le Atua ma aumaia ai outou i le manumalo e ui lava i le ita o Satani.

… I le avea ai ma se Ekalesia tatou te usuina le viiga, “Ia Viia Oe le Atua mo le Perofeta” [Viiga, nu. 10]. Ia o le ki silisili lenei—Mulimuli i le perofeta. …

O le perofeta e na o le pau lea o le tamalii e saunoa mo le Alii i mea uma lava.

I le vaega e 132 fuaiupu e 7 o le Mataupu Faavae ma Feagaiga, o loo talanoa mai ai le Alii e uiga i le perofeta—le peresitene—ma faapea mai:

“Ma e le sili atu lava i le toatasi lē e i luga o le lalolagi e faaee atu i ai lenei mana ma ki o le perisitua i le taimi e tasi.”

Ma o le vaega e 21 fuaiupu e 4–6, o loo ta’u mai ai e le Alii:

“O le mea lea, ia outou, o lona uiga o le ekalesia, uai atu i ana upu uma ma poloaiga o le a ia tuu atu ia te outou e pei ona maua e ia, ma savavali i le paia atoa i oʼu luma;

“Ona o lana upu ia outou talia, e pei lava ua mai i lo’u lava gutu, i le onosai ma le faatuatua atoa.

“Ona o le faia o nei mea o le a le manumalo ai faitotoa o seoli ia te outou.”¹⁹

O le a le taitaiseseina lava e le perofeta le Ekalesia.

Na ta’ua e Peresitene Uilifoti Uitilafi: “Ou te fai atu ia Isaraelu, o le a le faatagaina lava a’u e le Alii po o se isi lava alii e tu o se peresitene o lenei Ekalesia e taitaieseina outou. E le o i ai lena mea i le polokalama [a le Alii]. E le o i ai i le finagalo o le Atua” [tagai Aoaoga a Peresitene o le Ekalesia: Wilford Woodruff (2004), 207].

Na faamatala e Peresitene Marion G. Romney le mea lenei na tupu ia te ia:

“Ou te manatua i tausaga ua mavae a o avea a’u ma epikopo, na ou talosagaina ai Peresitene Heber J. Grant e saunoa atu i le matou uarota. Ina ua uma le sauniga, sa ou momoliina atu o ia i lona maota. … A o tu i o’u tafatafa, sa ia tuu mai lona lima i luga o lo’u tauau ma fai mai: ‘Lo’u atalii, ia e tepa taulai atu i le Peresitene o le Ekalesia, ma afai na te ta’uina atu ia te oe se mea e fai, ma e sese, ae e faia, o le a faamanuiaina oe e le Alii mo lena mea.’ Na sosoo ai ma se faaivi o lona mata, ma faapea mai, ‘Ae e le tatau ona e popole. O le a le faatagaina e le Alii lana fofoga fetalai e taitai ese tagata.’” (Conference Report, October 1960, p. 78.)²⁰

Na faamatalaina se tala faapea, a o tietie atu Polika Iaga i se pitonuu, sa ia vaaia se alii o fauina se fale ma sa na ona ia ta’u atu ia te ia, ia faasautualua le mafiafia o ona puipui. O le taliaina o Peresitene Iaga o se perofeta, sa suia ai e le alii lea ana fuafuaga ma faaluaina ai le mafiafia o ona puipui. E le’i leva ona uma, ae oo atu se lologa i lena aai, na iu ai i le tele o mea na faaleagaina, ae na tumau pea puipui a lenei alii. A o faia le taualuga o lona fale, sa faalogoina o pese o ia, “Ia viia oe le Atua, mo le perofeta!”²¹

I le avea ai ma tagata o le Ekalesia, e i ai nisi o tulaga faigata e ao ona uia pe afai e tatau ona tatou taunuu saogalemu atu i lo tatou Tama Faalelagi. O le a tuuina mai ia i tatou se avanoa e filifili ai i le va o fautuaga feteenai e tuuina mai e nisi. O le mea lena e tatau ai ona tatou aoao—ma o le vave lava o le tatou aoao, o le lelei foi lena—o le tatou tepa taulai atu i le Perofeta, le Peresitene o le Ekalesia.²²

Fautuaga mo Suesuega ma le Aoaoina Atu

Fesili

Na saunoa Peresitene Benson, “Aoao e tepa taulai atu i le perofeta” (vaega 1). O le a le uiga o lenei fuaitau ia te oe?
Aisea e te manatu ai o le perofeta e sili ona taua mo i tatou, o le Peresitene o loo i ai nei o le Ekalesia? (Tagai i le vaega 2.) O le a se fautuaga na tatou maua lata mai nei mai le perofeta soifua?
A o e iloiloina le vaega 3, mafaufau i se taimi na e mulimuli ai i le fautuaga a le perofeta e ui lava ina sa e le malamalama atoa i ai. O a ni mea e mafai ona tatou aoaoina mai i aafiaga faapena?
Mafaufau i le “ki silisili” na faailoa mai e Peresitene Benson i le vaega 4. O a nisi o faamanuiaga na e maua ina ua e faamaoni i lenei ki silisili?

Mau Fesootai

2 Nofoaiga Tupu 20:20; Amosa 3:7; Efeso 2:19–20; 4:11–15; MF&F 1:14–16, 37–38; 107:91–92; Mataupu Faavae o le Faatuatua 1:6

Fesoasoani mo le Aoaoina Atu

“Aua e te fefe i le leai o se pisa. E masani ona manaomia e tagata i nisi taimi e mafaufau e uiga i fesili ma tali atu i ai pe faailoa atu ai po o a o latou lagona. Atonu e te faatali pe a mavae ona tuuina atu se fesili, pe a maea ona fetufaai mai se tulaga faaleagaga na oo i ai, pe i ai foi ni faafaigata i se tagata e faamatala mai ai ona lagona” (O Le Aoao Atu, e Leai Se Valaauga e Sili ai [1999], 70).