Mataupu 5
O Mataupu Faavae o le Salamo Faamaoni
“Mo i latou o e totogia le tau e manaomia mo le salamo faamaoni, ua mautinoa lava le folafolaga. E mafai ona e toe mama. E mafai ona aveese atu le faanoanoa. O le a tafe atu i o outou olaga le filemu matagofie o le faamagaloga.”
Mai le Soifuaga o Ezra Taft Benson
I lana uluai saunoaga i le konafesi aoao o se Peresitene o le Ekalesia, sa saunoa ai Peresitene Ezra Taft Benson: “A o o’u sailia ni faatonuga mai le Alii, na toe faaalia mai i lo’u mafaufau ma lo’u loto le fetalaiga a le Alii ia ‘leai se mea e te fai atu i lenei tupulaga tau lava o le salamo.’ (MF&F 6:9; 11:9.) O le mautauave lenei a perofeta uma o aso e gata ai.”1
Na oo lava foi a’o le’i valaauina o se Peresitene o le Ekalesia, sa fai ai e Peresitene Benson le salamo o se mautauave taua o lana auaunaga. Sa fautuaina o ia e Siaosi Alapati Samita, le Peresitene o le Korama a Aposetolo e Toasefululua i lena vaitau ina ia faia lena mea. I se tusi na tusia ae le’i leva ona valaauina Peresitene Benson i le au aposetolo, na saunoa ai Peresitene Samita, “E amata atu i le taimi lenei, o la outou misiona o le sailia lea o auala e faasalalau atu ai le upumoni ma lapatai atu i tagata tou te feiloai i ai i se auala sili ona faigofie ma agalelei e faapea, o le salamo ua na’o le pau lea o le vaifofō mo mea sese o lenei lalolagi.”2
Sa faamaoni Peresitene Benson i lenei poloaiga a o ia aoao atu le talalelei i le lalolagi atoa. Sa ia aoao atu “e sili lava le saunia ma le puipuia nai lo le toe tau faaleleia ma salamo.”3 Ae sa ia matau foi e faapea, “e manaomia e i tatou uma ona salamo.”4 Sa ia faamamafaina le “liuga tele” o le loto lea e o faatasi ma le salamo (tagai Alema 5:12–14) ma faamalamalama mai le matafaioi a le Faaola i le aumaia o lena liuga:
“E galue le Alii mai totonu i fafo. E galue le lalolagi mai fafo i totonu. E aveese e le lalolagi ia tagata mai tulaga eleelea. E aveese e Keriso ia tulaga eleelea mai tagata, ona latou aveesea lea o i latou lava mai tulaga eleelea. E suia e le lalolagi ia tagata e ala i le suia o le tulaga o loo siomia ai i latou. E suia e Keriso ia tagata, ona latou suia lea o tulaga o loo siomia ai i latou. E sui e le lalolagi amioga faaletagata, ae e mafai e Keriso ona suia le natura faaletagata.
“Ioe, e suia e Keriso tagata, ma o tagata ua suia e mafai ona suia le lalolagi.”5
Na fetalai le Alii, “Ua lava lo’u alofa tunoa mo tagata uma o e latou te faalotomaualalaloina i latou lava i o’u luma” (Eteru 12:27).
Aoaoga a Ezra Taft Benson
1
Ina ia salamo faamaoni, e tatau ona tatou iloa muamua o le fuafuaga o le talalelei, o le fuafuaga lea o le fiafia.
I le lagona masani o le faaupuga, tagata auai o le Ekalesia o lona uiga o se tagata ua faamaumauina aloaia lona suafa i pepa faamaumau o le Ekalesia. …
Ae ua faamatalaina e le Alii se tagata o Lona malo i se auala e fai si ese mai. I le 1828, e ala mai i le Perofeta o Iosefa Samita, sa Ia fetalai mai ai, “Faauta, o la’u mataupu faavae lenei—ai se e salamo ma sau ia te a’u, o ia lava lea o la’u ekalesia.” (MF&F 10:67; faaopoopo le faatusilima.) Ia te Ia o lē e ana le Ekalesia lenei, o le avea ma tagata auai ua aofia ai le sili atu nai lo na o se tagata ua i ai se pepa faamaumau.
O lea la ou te fia tuuina atu ai ni manatu faavae taua e tatau ona tatou malamalama i ai ma faaaoga pe afai o le a tatou salamo faamaoni ma o mai i le Alii.
O se tasi o togafiti taufaasese e masani ona faaaoga e Satani o le manatu lea e faapea, o poloaiga a le Atua ua faia e taofiofi ai lo tatou saolotoga ma faatapulaa ai le fiafia. O isi taimi e lagona patino ai e tagata talavou, o tulaga faatonuina a le Alii ua pei o ni pa ma ni filifili, ua faasāsā ai i latou mai gaoioiga ia e foliga mai e sili atu ona faafiafiaina o le olaga. Ae o le mea sa’o o le faafeagai tonu lava lena. O le fuafuaga o le talalelei o le fuafuaga lea e aumai ai tagata i le atoatoaga o le olioli. O le manatu faavae muamua lenei ou te fia faamamafaina atu. O mataupu faavae o le talalelei o laasaga ma taiala ia o le a fesoasoani ia i tatou e maua ai le fiafia ma le olioli moni.
O le malamalama ai i lenei manatu faavae na mafua ai ona alaga le Fai Salamo, “Ua tele lava lo’u naunau i lau tulafono! … O au poloaiga ua fa’apoto sili ai a’u nai lo o’u fili. … O lau afioga o le sulu lea i o’u vae, ma le malamalama i lo’u ala. … Ua fai mo’u tofi o au tulafono e faavavau: aua o mea ia e faafiafia ai lo’u loto.” (Salamo 119:97–98, 105, 111.)
Afai tatou te mananao e salamo faamaoni ma o mai ia te Ia, ina ia mafai ai ona ta’ua i tatou o tagata o Lana Ekalesia, e tatau ona tatou muai iloa muamua lava lenei upumoni e faavavau—o le fuafuaga o le talalelei o le fuafuaga o le fiafia. O le amioleaga sa le’i aumaia, o le a le aumaia, ma o le a le mafai lava ona aumaia ia i tatou le fiafia [tagai Alema 41:10]. O le solia o tulafono a le Atua e na o le faanoanoa, nofopologa, ma le pogisa na te aumaia.6
2
O le faatuatua ia Iesu Keriso e muamua i le salamo faamaoni.
O se manatu faavae lona lua e taua ona tatou malamalama i ai o le sootaga lea o le salamo i le mataupu faavae o le faatuatua. O le salamo o le mataupu faavae autu lona lua lea o le talalelei. O le mea muamua lava e tatau ona i ai so tatou faatuatua i le Alii o Iesu Keriso. Aisea e faapea ai? Aisea e tatau ai ona muamua le faatuatua i le Alii i lo le salamo faamaoni?
Ina ia tali i lenei fesili, e tatau ona i ai so tatou malamalama i le taulaga togiola a le Matai. Na aoao mai Liae e faapea “e le mafai e se tagata ona mau i le afioaga o le Atua, vagana ai ua ala atu i galuega, ma le alofa mutimutivale, ma le alofa tunoa o le Mesia Paia.” (2 Nifae 2:8.) E oo lava foi i le tagata e sili ona amiotonu ma amiosa’o e le mafai ona faasaoina e ia o ia lava i ona lava uiga lelei, auā, e pei ona ta’u mai e le Aposetolo o Paulo ia i tatou, “ua agasala tagata uma lava, ma ua le oo i le [mamalu o] le Atua.” (Roma 3:23.)
‘Ana le seanoa le soifuaga atoatoa, ma le le agasala o le Faaola, lea sa Ia ofoina mai ma le lotomalie mo i tatou, semanū e leai se faamagaloga o agasala.
O le mea lea, o le salamo e loloto atu lona uiga nai lo na o se suiga o le amio. E toatele alii ma tamaitai i le lalolagi ua faaalia le naunau sili ma le loto pulea i le faatoilaloina o mausa leaga ma vaivaiga o le tino. Ae i le taimi lava lea e tasi latou te le o mafaufau ai i le Matai, ma o nisi taimi e teena moni ai lava o Ia ma le loto i ai. O suiga faapena o amioga, e tusa lava po o se itu lelei, e le faavaeina ai se salamo faamaoni.
O le faatuatua i le Alii o Iesu Keriso o le faavae lea e tatau ona fausia ai i luga le salamo faamaoni ma le anoa. Afai tatou te saili moni atu e lafoai ese le agasala, e tatau ona tatou vaai atu muamua ia te Ia o le Mataisau o lo tatou faaolataga.7
3
O le salamo e aofia ai se suiga tele o le loto.
O le mataupu faavae taua lona tolu mo i tatou ia malamalama ai, pe afai o le a avea i tatou ma tagata moni o le Ekalesia e faapea, o le salamo e le na’o se suiga o amioga e aafia ai, ae o se suiga o le loto.
Ina ua maea le lauga ofoofogia a le Tupu o Peniamina i le nuu o Saraemila, sa alalaga atu tagata uma i le leo e tasi ua latou talitonu i ana upu. Sa latou iloa ma le mautinoa o ana folafolaga o le togiola ua moni, auā, sa latou fai mai, “o le Agaga o le Alii Mamana Aoao … ua ia faia se liuga tele i totonu o i matou, po o i totonu o o matou loto, [ia matau le mea lenei] ua le toe i ai so matou manao e fai mea leaga, ae ia faia mea lelei e le aunoa.” Mosaea 5:2).8
Mata e mafai ona suia loto o tagata? Oi ioe! E tupu i aso uma i le galuega faafaifeautalai maoae a le Ekalesia. O se tasi lea o vavega a Keriso o aso nei ua sili ona taatele. Afai e le’i tupu lava ia te oe—ua tatau nei ona tupu.
Na ta’u atu e lo tatou Alii ia Nikotemo e faapea, “a le toe fanau le tagata, e le mafai ona iloa e ia o le malo o le Atua.” (Ioane 3:3.)
Fai mai Alema: “Ma sa fetalai mai le Alii ia te aʼu: Aua e te ofo e ao i le fanauga uma a tagata, ioe, o tane ma fafine, o atunuu uma, ituaiga, gagana eseese ma nuu, ona toe fanauina; ioe, fananauina i le Atua, ma suia mai lo latou tulaga faaletino ma paʼū, i se tulaga o le amiotonu, ua togiolaina e le Atua, ma avea ma ona atalii ma afafine;
“Ma faapea ona avea ai o i latou ma tagata fou; ma vagana ai ua latou faia lenei mea, e leai se ala latou te mafai ai, ona fai mo o latou tofi le malo o le Atua.” (Mosaea 27:25–26.)
O le mataupu lona fa o le Alema o loo faamatala ai se vaitaimi o le talafaasolopito o sa Nifae lea “sa faapea ona amata ona vaivai le ekalesia i lona alualu i luma.” (Alema 4:10.) Sa faafetauia e Alema lenei luitau e ala i le faamavae mai lona nofoaga o se faamasino sili i le malo “ma tuu atu atoatoa o ia lava i le perisitua maualuga” ona o lona tiutetauave lea. (Alema 4:20.)
Sa tuuina atu lona malosi ma lona mafaufau atoa “i le molimau manino” e faasaga i le nuu (Alema 4:19), ma i le mataupu e lima o le Alema, sa ia fesiligia ai le silia ma le fasefulu ni fesili taua. O le talanoa tuusa’o atu i tagata o le Ekalesia, sa ia tautino atu ai, “Ou te fesili atu ia te outou, ou uso e o le ekalesia, ua fanauina ea outou faaleagaga i la le Atua? Ua outou maua ea ona foliga i o outou mata? Ua oo ea lenei liuga tele i o outou loto?” (Alema 5:14.)
Sa ia faaauau pea, “Afai ua oo ia te outou se liuga o le loto, ma afai ua outou lagona le fia pepese i le pese o le alofa togiola, ou te fia fesili atu, e mafai ea ona outou lagonaina nei?” (Alema 5:26.)
Pe o le a le matuai faateleina ea le alualu i luma o le Ekalesia i aso nei pe a faateleina le numera o i latou o e e toefanauina faaleagaga? Mata e mafai ona outou vaai faalemafaufau i le mea o le a tupu i totonu o o outou aiga? Mata e mafai ona e vaai faalemafaufau i le mea o le a tupu i le faateleina o le numera o kopi o le Tusi a Mamona i lima o se numera faatoateleina o faifeautalai o e e iloa le ala e faaaoga ai ma o e ua fanauina i la le Atua? A tupu lenei mea, o le a tatou maua le seleselega tele o agaga na folafola mai e le Alii. O le “fanauina i le Atua” lea sa mafai e Alema o le sa avea ma se faifeautalai ona ta’u atu le upu ina ia mafai ai e le toatele o isi tagata ona fanauina i le Atua. (Tagai Alema 36:23–26.)9
E ala i le salamo, na oo ai Alema le Itiiti i se liliuga faavavega o le loto.
A tatou oo i lenei suiga tele, lea e na’o le faatuatua lava ia Iesu Keriso ma e ala i le galueaiina o le Agaga i o tatou luga e mafai ona oo mai ai, o le a peiseai e avea i tatou ma se tagata fou. O lea, ua faatusaina ai le suiga i le fanaufouina. E faitau afe outou ua oo i lenei suiga. Ua outou lafoai ese olaga agasala, o nisi taimi o agasala mamafa ma matuia, ma e ala i le faaaogaina o le toto o Keriso i o outou olaga, ua oo ai ina mama. Ua le o toe i ai so outou manao e toe foi i o outou auala tuai. O outou moni lava o se tagata fou. O le uiga lena o le suiga o le loto.10
4
O le faanoanoa e tusa i le Atua e taitai atu ai i le salamo faamaoni.
O le manatu lona fa ou te fia faamamafa atu o le faaupuga lea o loo faatatau i ai tusitusiga paia o le “faanoanoa e tusa i le Atua” i a tatou agasala. “E le o se mea ua le masani ai le maua o alii ma tamaitai i le lalolagi o ē ua latou lagona le faanoanoa i mea sa sese ona latou fai. O nisi taimi ua mafua nei lagona ona ua avea a latou amioga ma mea ua tupu ai lo latou faavauvau ma lo latou faanoanoa tele, po o ē foi e pele ia i latou. O nisi taimi e mafua lo latou faanoanoa ona ua maua i latou ma faasalaina i a latou amioga. O ia lagona faalelalolagi e le maua ai le “faanoanoa e tusa i le Atua.”
… I aso faaiu o le malo o sa Nifae, sa fai mai ai Mamona e uiga i lona nuu: “o lo latou faanoanoa sa le tupu mai i le salamo, ona o le agalelei o le Atua; ae o se faanoanoa o tagata tausalaina, ona e le tuua pea i latou e le Alii i taimi uma ia latou fiafia i le agasala.
“Ma sa latou le o mai ia Iesu ma le loto momomo ma le agaga salamo, ae sa latou upuleaga i le Atua, ma fia feoti.” (Mamona 2:13–14.)
I le Itulagi i Sasae, sa galue ai le Aposetolo o Paulo i tagata o Korinito. Ina ua oo mai lipoti o ni faafitauli ogaoga i le Au Paia, e aofia ai le ola le mama (tagai 1 Korinito 5:1), Sa tusi atu ai e Paulo se tusi malosi o le aoaiga. Sa tali atu tagata i le agaga talafeagai, ma na manino lava le faasa’oina o ia faafitauli, aua o lana tusi lona lua ia i latou, sa tusia ai e Paulo: “O lenei, ou te olioli e le ona ua outou tiga, a ona ua iu lo outou tiga i le salamo” aua na faatigaina outou e tusa i le Atua. …
“Aua o le tiga e tusa i le Atua e tupu ai le salamo e oo i le ola e le toe salamo ai: a o le tiga faalelalolagi e tupu ai le oti.” (2 Korinito 7:9–10.)
I nei mau uma e lua, o le faanoanoa e tusa i le Atua ua faauigaina o se faanoanoa e taitai atu ai i tatou i le salamo.
O le faanoanoa e tusa i le Atua o se meaalofa a le Agaga. O se iloaina loloto o a tatou amioga ua tiga ai lo tatou Tama ma lo tatou Atua. O le iloa manino o a tatou amioga na mafua ai ona onosaia e le Faaola, o Lē na leai se agasala, o lē silisili foi i tagata uma, ia tiga ma puapuaga. O a tatou agasala na mafua ai ona tafe mai le toto i puninii uma o Lona tino. O le tiga moni lenei faalemafaufau ma faaleagaga o le mea lea o loo ta’ua e tusitusiga paia o le mauaina “o se loto momomo ma se agaga salamo.” (Tagai 3 Nifae 9:20; Moronae 6:2; MF&F 20:37; 59:8; Salamo 34:18; 51:17; Isaia 57:15.) O se agaga faapena o le tulaga manaomia moni lea mo le salamo faamaoni.11
5
O loo naunau lava le Tama Faalelagi ma Iesu Keriso ia silasila mai ua suia o tatou olaga, ma o le a La’ua fesoasoani mai ia i tatou.
O le isi mataupu faavae ou te fia talanoaina o lenei: E leai se tasi e sili atu ona naunau e silasila mai ua suia o tatou olaga nai lo le Tama ma le Faaola. O loo i le tusi o Faaaliga se valaaulia mamana ma o’oo’o mai le Faaola. Ua fetalai o Ia, “Ou te tu atu i le puipui ma tuitui atu: ai se tasi e faalogo mai i lou leo, ma tatala mai le puipui, ou te ulufale atu ia te ia.” (Faaaliga 3:20.) Ia matau e le o fetalai mai o Ia, “Ou te tu atu i le puipui ma faatalitali mo lau tu’itu’i mai.” O loo valaau mai, augani mai, ma talosaga mai o Ia, ia tau lava o le tatala o o tatou loto e ulufale mai i ai o Ia.
I le lauga maoae a Moronae e uiga i le faatuatua, o loo atili aoao manino mai ai le mataupu faavae lea. Sa ta’u atu e le Alii ia te ia, “Afai e o mai tagata ia te a’u o le a ou faaali atu ia te i latou o latou vaivaiga. Ou te avatu i tagata ia vaivaiga ina ia faalotomaualalalo ai i latou; ma ua lava lo’u alofa tunoa mo tagata uma.” E le afaina po o a o tatou faaletonu, po o o tatou vaivaiga po o o tatou le atoatoa. Ua lava Ana meaalofa ma [Ona] mana e faatoilaloina uma ai [na vaivaiga].
Na faaauau mai pea e Moronae le fetalaiga a le Alii: “Ua lava lo’u alofa tunoa mo tagata uma o e e latou te faalotomaualalaloina i latou lava i o’u luma, ma faatuatua mai ia te a’u, ona ou faia lea o mea vaivai ia avea ma mea malolosi ia te i latou.” (Eteru 12:27; faaopoopo le faatusilima)
E maeu lea folafolaga mai le Alii! E mafai ona suia, fatufatu, ma mamanu ia afuaga tonu o o tatou faafitauli ia avea ma se malosiaga ma se puna o le mana. O lenei folafolaga o loo toe ta’ua i ni isi foi faaupuga i le tele o isi mau. Fai mai Isaia, “Na te avatua le malosi i e ua vaivai; a o e ua leai se malosi, na te faatuputele i ai le malosi.” (Isaia 40:29.) Sa ta’u atu e le Alii ia Paulo, “O lo’u nei alofa tunoa e lava lea e fesoasoani ia te oe: auā o le vaivai e faaatoaina ai lo’u mana.” (2 Korinito 12:9.) I le Mataupu Faavae ma Feagaiga tatou te faitau ai, “O ia o le e gatete i lalo o lo’u mana o le a faamalosia, o le a ia aumai fua o le viiga ma le poto.” (MF&F 52:17; tagai foi i le 1 Ni. 17:3; 2 Ni. 3:13; MF&F 1:28; 133:58–59.)12
O se tasi o togafiti sili ona lelei a Satani ia i latou o e ua ia maileia i le agasala, o le musumusu atu lea i o latou taliga e faapea, ua latou le agavaa e tatalo. O le a ia ta’u atu ia te oe e faapea, ua matuai le fiafia le Tama Faalelagi ia te oe, ma o le a Ia le toe faafofoga mai i au talosaga. O le pepelo lenei mea, ma na te ta’uina mai e faasese ai i tatou. E maoae le malosi o le agasala. Ae afai tatou te aveese mai ai i tatou lava, ae maise lava i agasala ogaoga, o lona uiga o loo i ai so tatou mana e malosi atu nai lo o i tatou lava.
E leai se isi e sili atu le naunau e fesoasoani mai ia te oe ia sola ese mai le agasala nai lo lou Tama Faalelagi. Alu atu ia te Ia. Faailoa atu i ai lau agasala, ta’uta’u atu lou maasiasi ma lou tausalaina, ona e augani atu lea ia te Ia mo se fesoasoani. O loo ia te Ia le mana e fesoasoani ai ia te oe e manumalo ai.13
Uso e ma tuafafine, e tatau lava ona faailoa atu a tatou agasala i le Alii i le faamaualalo ma le salamo momomo. E tatau ona tatou aioi atu ia te Ia mo le mana e faatoilalo ai agasala. E moni lava ia folafolaga. O le a Ia laveai mai ia i tatou. O le a tatou maua le mana e suia ai o tatou olaga.14
6
E le tatau ona leai so tatou faamoemoe a o tatou saili atu ia avea e faapei o Keriso.
O le manatu lona ono ma le mulimuli ou te fia ta’ua e uiga i le faagasologa o le salamo e faapea e tatau ona tatou faaeteete, a o tatou saili ia avea atili pea ma atua, ina ia aua nei faalotovaivaia i tatou ma leai se faamoemoe. O le avea e faapei o Keriso o se sailiga o le olaga atoa ma e masani lava ona aofia ai le tuputupu ae ma le suia lea e telegese, e toetoe lava a le iloaina. Na faamaumauina i tusitusiga paia ni tala o ni alii na maoae ni liliuga o o latou olaga, i se taimi vave lava, e pei o: Alema le Itiiti, Paulo i le ala i Tamaseko, Enosa o loo tatalo e oo lava i le leva o le po, le Tupu o Lamonae. O ia ituaiga faataitaiga ofoofogia o le mana e liua ai e oo lava ia i latou o loo tanumia i le agasala o le a aumaia se talitonuga faapea o le Togiola e mafai ona oo atu ia i latou ua matua lofituina i le faanoanoa.
Ae ao lava ona tatou faaeteete a o tatou talanoaina nei faataitaiga ofoofogia. E ui e moni ma mamana, ae o ni aafiaga uiga ese ia ma lē masani ai, ma e le o se ala masani e tupu mai ai le liua. Aua o Paulo uma, o Enosa uma, ma Tupu Lamonae uma lava, e selau ma selau afe tagata ua latou iloa o le faagasologa o le salamo, e sili atu le atamai ma e faifai malie. O lea aso ma lea aso latou te faalatalata atu ai i le Alii, ma lo latou le iloa moni o loo atiina ae e i latou se olaga faapei o le Atua. Ua ola filemu i latou i ni olaga lelei, ma auauna atu atoa ma le maelega. Ua pei i latou o sa Lamana, o e na fetalai ai le Alii ‘sa papatisoina i le afi ma le Agaga Paia, a ua latou le iloa.” (3 Ni. 9:20; faaopoopo le faatusilima).
E le tatau ona leai so tatou faamoemoe. O le faamoemoe o se taula lea i agaga o tagata. E manao Satani ina ia tatou lafoai ese lena taula. O le auala lenei e mafai ai ona ia aumaia le lotovaivai ma le faatoilaloina. Ae e le tatau ona leai so tatou faamoemoe. E fiafia le Alii i taumafaiga uma, e oo lava i mea iti, i aso uma lea tatou te taumafai ai ia avea atili e pei o Ia. E ui atonu tatou te manatu e fai lava si mamao o le savaliga i luga o le ala e tau atu i le atoatoa, ae e le tatau lava ona lafoaia lo tatou faamoemoe.15
Mo i latou o e totogia le tau e manaomia e le salamo faamaoni, ua mautinoa lava le folafolaga. E mafai ona e toe mama. E mafai ona aveese atu le faanoanoa. O le a tafe atu i o outou olaga le toafilemu matagofie o le faamagaloga.
O afioga a le Alii e ala mai ia Isaia e mautinoa lava: “O loo faapea mai Ieova: O mai ia, ina tatou filifili ia, e ui lava ina pei o ofu mumu a outou agasala, e sisina ia e pei o le kiona; e ui lava ina mumu ia e pei o le ie ulaula, e avea e pei o fulufulu mamoe (Isaia 1:18).
Ma i le tisipenisione lenei na fetalai mai ai le Alii i le manino lava lea e tasi ina ua Ia fetalai mai, “Faauta, o ia o lē ua salamo i ana agasala, o ia lava lea ua faamagaloina, ma o A’u, o le Alii e lē toe manatuaina lava i latou” (MF&F 58:42).16
“O le salamo faamaoni e faavae lea ma e tafe mai mai le faatuatua i le Alii o Iesu Keriso. E leai lava se isi auala e sili atu ona lelei e maua ai.”
Ou te faamoemoe o le a tatou le ola i mea ua tuanai. O tagata e ola i mea ua tuanai e le tele so latou lumanai. Tatou te matele ina auē i mea ua tatou maumaua, e uiga i faaiuga na tatou faia ma tatou toe mafaufau i ai i tua atonu o ni faaiuga sese. Tatou te matele lava foi i le lagonaina o ni faalogoga le lelei e uiga i tulaga o loo siomia ai i tatou, ma le manatu semanu atonu e lelei atu pe ana faapea na tatou faia ni faaiuga e ese ai. E mafai ona tatou aoao mai aafiaga o le tuanai. Ae aua nei o tatou faaaluina o tatou taimi e popole ai i faaiuga ua uma ona fai, o mea sese sa faia. Ia tatou ola i le taimi lenei ma i le lumanai.17
O’u uso ma tuafafine pele, a o tatou saili atu ia agavaa e avea ma tagata o le Ekalesia a Keriso—tagata i le agaga moni o loo Ia faaaogaina ai le upu, tagata o e ua salamo ma o mai ia te Ia—tau ina ia tatou manatua nei mataupu faavae e ono. Muamua, o le talalelei o le fuafuaga a le Alii mo le fiafia, ma o le salamo ua mamanuina e aumai ai ia i tatou le olioli. Lona lua, o le salamo faamaoni e faavae lea ma e tafe mai mai le faatuatua i le Alii o Iesu Keriso. E leai lava se isi auala e sili atu ona lelei e maua ai. Lona tolu, o le salamo moni e aafia ai se suiga o le loto ae le na o se suiga o amioga. Lona fa, o se vaega o lenei suiga tele o le loto, o le lagona lea o le faanoanoa e tusa i le Atua mo a tatou agasala. O le uiga tonu lenei o le loto momomo ma le agaga salamo. Lona lima, ua lava meaalofa a le Atua e fesoasoani ai ia i tatou e faatoilalo ia agasala ma vaivaiga uma, pe afai o le a tatou liliu atu ia te Ia mo se fesoasoani. Ma le mea mulimuli, e tatau ona tatou manatua, o le tele o le salamo e le aafia ai ni suiga ofoofogia pe maoae, ae e na o se laasaga faasolosolo, mausali, ma faifaipea e agai atu i le tulaga faaleatua.
Afai o le a tatou taumafai e faaaoga nei mataupu faavae i o tatou olaga ma faatino i aso taitasi, o le a faapea loa ona tatou agavaa e avea e sili atu nai lo na o ni tagata ua i ai ni pepa faamaumau i le Ekalesia a Iesu Keriso. I le avea ai ma ni tagata moni o le Ekalesia, e a tatou Lana folafolaga lenei: “Ai se ua auai i la’u ekalesia, ma tumau i la’u ekalesia e oo i le gataaga, o ia lea o le a Ou faatuina i luga o la’u papa, ma o le a le mafai e faitotoa o seoli ona manumalo e faasaga ia te i latou.” (MF&F 10:69.)
Ou te tatalo ina ia tatou maua uma lena folafolaga mo i tatou lava.18
Fautuaga mo Suesuega ma le Aoaoina Atu
Fesili
-
Na saunoa Peresitene Benson, ina ia salamo moni, e ao ona tatou iloa muamua “o le fuafuaga o le talalelei o le fuafuaga lea o le fiafia” ma o le amioleaga “e le aumaia ai ia i tatou se fiafia” (vaega 1). Aisea e te manatu ai e taua lenei malamalamaaga i le faagasologa o le salamo?
-
I a tatou taumafaiga ia salamo, aisea e le lava ai le suia na o le amio? (Tagai i le vaega 2.) Aisea e te manatu ai, e manaomia ona tatou vaai atu ia Iesu Keriso ina ia mafai ai ona salamo moni?
-
O a ni auala ua e oo ai i se “liuga tele o le loto,” e pei ona faamatalaina i le vaega e 3? O a ni mea e mafai ona tatou faia e fesoasoani ai i isi ia lagonaina lenei suiga?
-
O a ni auala e ese ai le “faanoanoa e tusa i le Atua” mai le salamo lea e lagona e nisi o tagata pe a latou faia se mea sese? (Tagai i le vaega 4.) E mafai faapefea e se matua po o le epikopo ona faaaoga aoaoga o loo i le vaega 4 e fesoasoani ai i se tasi o loo manaomia ona salamo?
-
A o e iloiloina le vaega 5, o a ni aoaoga e faapitoa lou mauaina ai o le mafanafana? Aisea ua mafanafana ai nei aoaoga ia te oe?
-
I le molimau atu e uiga i le mana o le Togiola a le Faaola, na saunoa ai Peresitene Benson, “E le tatau ona leai so tatou faamoemoe” (vaega 6). A o e iloiloina le vaega 6, o a ni upumoni e uiga i le Togiola ua e tau i ai ua ofo atu ai ia te oe le faamoemoe?
Mau Fesootai
Luka 15:11–32; Mosaea 4:10–12; 26:30–31; Alema 34:17–18; 3 Nifae 27:19–20; MF&F 18:10–16; 19:15–19
Fesoasoani mo le Aoaoina Atu
“O lou popolega sili lava e tatau ona i ai o le fesoasoani atu lea i isi e aoaoina le talalelei, ae le o le tuuina atu o se aoaoga faafiafiaina. E aofia ai i lenei mea le tuuina atu o avanoa mo tagata o loo aoaoina e aoao ai e le tasi le isi” (Aoao Atu, E Leai Se Isi Valaauga e Sili Ai [1999], 67).