Pene 10

Faaetaeta ia tatou i mua i te faaturoriraa a te ino

E horo‘a mai te evanelia a Iesu Mesia ia tatou i te puai e te parururaa i mua i te ino o to tatou nei anotau.

No roto mai i te oraraa o Spencer W. Kimball

Ua haapii mai te peresideni Spencer W. Kimball e, te aroraa ia Satane e to’na nuu tama‘i « e ere ïa i te tahi noa tatama‘iraa i te hoê enemi iti na’ina’i, e aroraa u‘ana râ i te hoê enemi puai, te paari, e te ineine maitai, e e riro tatou i te pau mai te mea e, e ere tatou i te mea puai, te mea ineine maitai, e te vai araara noa ».¹

I te tau a tavini ai oia ei misionare apî i roto i te misioni no Central States, ua papa‘i oia i roto i to’na buka aamu i te hoê ohipa tei tupu i ni‘a ia’na, ei faaiteraa i te faaotiraa ta’na i rave no te pato‘i i te faahemaraa. Tei ni‘a oia i te pereoo auahi te tere ra i Chicago, Illinois, e inaha, ua haafatata maira te hoê taata ia’na. « Ua tamata a‘era [oia] i te faatai‘o ia‘u i te hoê buka e mau hoho‘a faufau to roto. Ua parau atura vau ia’na e, aita vau e au i te reira huru buka. I reira, ua haamata a‘era oia i te faahema ia‘u ia haere na muri iho ia’na i Chicago, e ua ite a‘era vau e, e arata‘i roa oia ia‘u i hade. Ua haamamu atura vau ia’na, tera râ, i muri a‘e i to’na haere-ê-raa’tu, ua vai te huru ê rahi i ni‘a ia‘u hoê hora te maoro. Na ô a‘era vau e—‘Aue ! Mea etaeta mau o Satane, na roto i ta’na mau diabolo, i te tamataraa i te ruri ê i te feia apî.’ Ua haamaitai a‘era vau i te Fatu no te puai tei roaa ia‘u no te pato‘i i te reira ».²

Te mau haapiiraa a Spencer W. Kimball

Te vai mau ra o Satane, e e faaohipa oia i te mau rave‘a ato‘a no te tamata i te haamou ia tatou.

I teie anotau maramarama e te hara to tatou, te taui nei te taata eiaha i te huru noa o te Atua, i to te diabolo ato‘a râ. I roto i taua huru faanahoraa ra, e nehenehe ïa e parau e, aita o Satane e vai ra, e e mea maitai te reira no te tape‘a noa i te taata i ni‘a i te e‘a maitai i roto i te hoê tau huru maramarama ore, tera râ, ua hope te reira huru faanahoraa i to tatou nei anotau apî. Ua hape roa ïa te reira huru feruriraa. E taata mau o Satane, e taata varua râ, aita ho‘i to’na e tino tahuti. To’na hinaaro u‘ana ia haavî ia tatou i raro a‘e ia’na, i roto i te ino, aita ïa i atea’tu i te hinaaro u‘ana o to tatou Metua ia huti ia tatou ma te parau-ti‘a i roto i to’na basileia mure ore.

Te iteraa e teihea te vairaa te fifi, e te iteraa ia’na i roto i te mau mea ato‘a e tupu ra, e riro ïa ei parururaa. E mea vai araara noa te ino. Ua ineine oia i te mau taime ato‘a no te haavare e no te haru i te mau taata ato‘a aita e vai ara noa, te mau taata tau‘a ore ato‘a, te mau taata orurehau ato‘a.⁴

Aita e hi‘oraa e, o vai ta te enemi e haapa‘o ra i tera taime e i tera taime, inaha te titau nei oia «ia roohia te taata ato‘a i te ati mai ia’na ihora » (2Nephi 2:27). Te titau nei oia « i te pohe o te mau taata ato‘a » (2 Nephi 2:18). Aita oia e taui i ta’na opuaraa, e e titau oia i te reira ma te maramarama e te rohirohi ore.⁵

Ua faaara mai o Petero ia tatou e: « E haapa‘o maitai, e faaitoito, te hahaere nei ho‘i to outou enemi o te diabolo, mai te liona uuru ra, i te imiraa i te taata e pau ia’na ra » (1Petero 5:8)

E ua parau mai te Faaora e, e haavare o Lutifero i tei ma’itihia ra, mai te mea e, e nehenehe [a hi‘o Iosepha Semita—Mataio 1:22]. E faaohipa o Lutifero i to’na maramarama no te haavare, e i ta’na faati‘araa ia’na iho no te haamou. E haamo‘e oia i te mau auraa parau, e iriti mărû noa oia i te uputa, i reira, e arata‘i atu ai i te taata mai te maitai e tae roa’tu i roto i te ino roa.⁶

Ua tuatapapa maite te fatu o te haavare i te mau rave‘a ato‘a no te faatupu i ta’na mau opuaraa, ma te faaohipa i te mau mauhaa ato‘a, e i te mau faanahoraa ato‘a. E haavî oia, e faahuru ê oia, e e taui e e huna oia i te mau mea ato‘a i hamanihia ei maitai no te taata nei… i reira ho‘i e tia‘i ia’na ia haru i to ratou varua e ia haaviivii i to ratou tino, e ia faariro ia ratou no’na.

Eita roa’tu oia e taoto—e itoito rahi to’na e te rave tamau maite. E tuatapapa maite oia i to’na fifi, e i reira oia e haere ai i mua ma te papû, ma te nahonaho e tae roa’tu i te otia ta’na i faataa. E faaohipa oia i te mau melo ato‘a o to’na tino e i te natura hiaai o te taata no te arata‘i ê ia’na. E ite atea oia i te pato‘iraa, e e haapaari oia ia’na i mua i te reira. E faaohipa oia i te taime, te area e te arearearaa. Eita oia e faaea, e mea ite oia i te taparu, e e mea maramarama oia. E faaohipa oia i te mau mauhaa maitai mai te ratio, te afata teata, te mau api parau papa‘i, te manureva, te pereoo uira no te faahuru‘e e no te faaino. E faaohipa oia i te auhoaraa o te taata, i te vai-otahi-raa, e i te mau hinaaro ato‘a o te taata no te ruri ê ia ratou. E rave oia i ta’na ohipa i te taime au maitai, i te hoê vahi faahiahia roa e i rotopu i te mau taata puai. Eita oia e tau‘a ore i te hoê noa a‘e mea no te haavare, no te faahuru‘e e no te haaviivii. E faaohipa oia i te moni, te mana, te puai. E faaamuamu oia i te taata e i reira oia e taparahi ai ia’na i roto i to’na vahi ino mau. E rave oia i te maitai no te hamani i te hairiiri… E faaohipa oia i te mau haapiiraa ato‘a no te haaviivii i te taata.⁷

Eita te enemi e ite-papû-hia’tu. E mea maramarama roa oia. Ua ite oia e, eita ta’na e nehenehe e tura‘i i te mau tane e te mau vahine maitai no te rave i te tahi mau ohipa ino i tera iho taime, no reira, e haere oia ma te maramarama, ma te muhumuhu noa i te mau afa parau mau e tae roa’tu i te taime e pee mai te taata ia’na.⁸

Na roto i te tauturu a te Fatu, e nehenehe ta tatou e pato‘i i te mau mea iino.

Mai te mea e, e hinaaro tatou ia faaatea ia tatou i te mau puai o te ino, e ia tape‘a maite i to tatou mau utuafare ma te paari, eiaha ia riro i raro a‘e i te mana haamou e haati nei ia tatou, mea ti‘a ia tatou ia farii i te tauturu a… te Rahu nui iho. Hoê noa iho rave‘a papû a‘e, maori râ, te evanelia a te Fatu o Iesu Mesia, e te haapa‘oraa i te mau haapiiraa hohonu e te faauruhia o te reira evanelia.⁹

I roto i te oraraa o te taata tata‘i tahi, e tupu mai te aroraa i rotopu i te maitai e te ino, i rotopu ia Satane e te Fatu. Te mau taata ato‘a tei tae‘ahia to ratou matahiti tiaauraa, oia ho‘i, te va‘u o te matahiti, e aore râ, tei hau atu i te reira, e tei tatarahapa hope roa, e ua bapetizohia ia au i te raveraa mau, e farii ratou i te Varua Maitai. Mai te mea e, e faaroo tatou i teie melo o te Atuaraa, e arata‘i oia ia tatou, e faauru, e tamahanahana, e e faaore oia i te muhumuhu a te varua ino.¹⁰

Te taata tei rahi a‘e te puai i to Lutifero, te taata tei riro ei pare ati e ei puai no tatou, e nehenehe ta’na e paturu ia tatou i te mau taime faahemaraa rahi. Eita te Fatu e iriti mai i te hoê taata i rapae i te hara e aore râ, mai roto mai i te rima o te faahema na roto i to’na iho hinaaro, e faaue râ oia i to’na Varua ia tura‘i i te taata hara ia tatara ia’na iho na roto i te tautururaa a to te ra‘i ra. E te taata o te farii i te faaururaa e te taparuraa a te Varua, e o te imi i te mau rave‘a ato‘a no te faaea tatarahapa noa, e roaa ïa ia ratou te parururaa, te mana, e te ti‘amâraa e te poupou.¹¹

Ua pato‘i Satane i te haapa‘o o Mose…

« E mose, te tamaiti a te taata nei, a haamori mai ia‘u », te faahemaraa ïa a te diabolo, ma te fafau mai i te mau ao e te mau tao‘a rahi e te mana…

… Titau a‘era te peropheta: « A haere ê atu oe, e Satane » (Mose 1:16). Teie taata haavare, te faahema, te diabolo, no to’na hinaaro ore e faaru‘e i te pohe ia’na, no to’na riri e te hae, « oto ihora ma te reo rahi, e hahae ihora ia’na i ni‘a i te fenua, e ua faaue mai i te na ôraa e: O vau te Fanau Tahi, a haamori mai ia‘u » (Mose 1:19).

Ua ite o Mose i teie nei i te oto e i te puai o te poiri, e i « te mauiui ri‘ari‘a o hade ». Teie te hoê puai e ere i te mea ohie ia ite atu, e ere ato‘a i te mea ohie ia tiavaru. No to’na ri‘ari‘a, ua tiaoro atu oia i te Atua, e i muri iho, faaue atura na roto i te hoê puai apî:

« E ore au e faaea i te tiaoro atu i te Atua… tei ni‘a iho ho‘i ia‘u to’na hanahana, no reira, ua ti‘a ia‘u ia faataa ia’na e ia oe… I te i‘oa o te Fanau Tahi, a haere ê atu, e Satane » (Mose 1:18,21).

Noa’tu o Lutifero… te enemi tumu o te taata nei, eita ato‘a ta’na e nehenehe e haapaari i mua i te mana o te autahu‘araa o te Atua. Ma te rurutaina, te aueue, te anatemahia, te oto, te auê, te au‘auraa i to’na niho, ua haere ê atura oia mai mua’tu i te aro o Mose tei upootia.¹²

E mea ti‘a ia tatou ia faaineine ia tatou no te ti‘a papû i mua ia Satane… e i mua i te mau hui arii e i te mau mana e i te mau faatere o te poiri. E ti‘a ia tatou ia ahu i te haana tama‘i ato‘a a te Atua no te pato‘iraa. [A hi‘o Ephesia 6:12–13].¹³

« A ahu na i te haana tama‘i ato‘a a te Atua ra », te na reira maira te a‘o a Paulo [Ephesia 6:11]. Na roto i te mana e te parururaa no te ra‘i mai, e ti‘a ia tatou ia ite i te mau faahemaraa a te enemi i roto i te mau huru parau ato‘a e te mau huru fatiatiaraa ato‘a, e e ti‘a ia tatou ia « pato‘i atu i te enemi i te mahana ino ra, e ti‘a roa a‘era ïa, ia mau â ». [A hi‘o Ephesia 6:13].¹⁴

Eiaha e fati i raro a‘e i te mau faahemaraa, noa’tu te na’ina’i

E ô mai te hara rahi i roto i to tatou oraraa mai te mea e, e fati tatou na mua i raro a‘e i te mau faahemaraa na’ina’i. E mea varavara te hoê taata i te ô i roto i te hara rahi ma te ore e haamata na ni‘a i te fatiraa i raro a‘e i te mau hara na’ina’i na mua, e na te reira e iriti i te uputa i te hara rahi a‘e. No te faaite i te hoê hi‘oraa no ni‘a i te tahi huru faito hara, teie ta te hoê taata i parau, « Mai te hoê fenua mâ eita e î ta‘ue noa i te aihere, oia ato‘a ïa te hoê taata paieti, eita oia e riro ta‘ue noa mai ei taata paieti ore ».

E mea fifi roa, e i te tahi taime, eita roa’tu e ti‘a i te diabolo ia tomo na te hoê uputa tapirihia. Mai te huru ra e, aita ta’na e taviri no te mau opani i ponaohia. Tera râ, mai te mea e, te vai ra hoê opani ua hamama rii noa, e patia oia i to’na manimani avae i roto, e eita e maoro, e faaô mai oia i to’na avae, i muri iho, to’na tino e to’na upoo, e i te pae hopea, tei roto roa oia.

E au teie parau i te fabula no te kamela e to’na fatu te ratere ra raua na roto i te mau puu one o te medebala, e ua tupu maira te hoê vero matai one. Faati‘a ‘oi‘oi a‘era taua taata ra i to’na fare ie, e tomo atura i roto, ma te tapiri i te mau uputa ato‘a no te paruru ia’na i te hu‘a one. Tei rapae te kamela i te faaearaa, e no te puai o te vero matai one i ni‘a i to’na tino e i roto i to’na mata e to’na apoo ihu, eita ta’na e nehenehe faahou e faaoroma’i, no reira, ani atura ia tomo ato‘a oia i roto i te fare ie.

« O vau ana‘e te ô i roto nei », te parau ïa a te taata ratere.

Ani mai nei te kamela e, « E nehenehe anei ta‘u e tuu noa’tu i to‘u noa ihu i roto ia nehenehe ia‘u ia huti i te matai one ore ? »

« Na reira, e nehenehe paha ta oe ia na reira », te pahonoraa ïa a te taata ratere, e ua iriti a‘era oia maa vahi iti i te uputa, e ua tomo maira te ihu roa o te Kamela i roto. Ua au roa te kamela i teie nei ! Tera râ, aita i maoro i muri iho, ua fiu roa te kamela i te putaputa one i ni‘a i to’na mata e te taria…:

« E au te matai one mai te faira i ni‘a i to‘u afii. E nehenehe anei ta‘u e tuu atu i to‘u noa afii i roto ? »

Ua faati‘a faahou te ratere ma te parau e, eita vau e fifi, i te mea e, tei te pae i ni‘a o te fare ie te vairaa te afii o te kamela, e aita ho‘i au e faaohipa i te reira vahi. No reira, ua tuu maira te kamela i to’na afii i roto, e ua oaoa faahou te animala nei—tera râ, no te tahi noa maa taime iti.

« Te muaraa noa o to‘u tino », te aniraa ïa a te kamela, e ua faati‘a faahou te taata ratere, e aita i maoro, tei roto mai nei te muaraa o te pa‘ufifi e na avae i te fare ie. E i te pae hopea, na roto noa i teie huru raveraa taparu e te faati‘araa, ua ô roa mai te muaraa, te muriraa, e te taato‘araa o te tino, i roto i te fare ie. Tera râ, i teie nei, e mea na’ina’i roa ïa te fare ie no raua toopiti, e ua tu‘e maira te kamela i te taata ratere i rapae i roto i te matai e te vero.

Mai te au i te kamela, e riro mai o Lutifero ei fatu, mai te mea e, e fati te hoê taata i raro a‘e i ta’na mau haavarevareraa. Eita e maoro, e mo‘e roa te hiro‘a, e mana roa te puai o te ino, e e piri te uputa o te faaoraraa e tae roa’tu i te taime e matara faahou ai te reira na roto i te hoê tatarahaparaa papû.

Na te hi‘oraa o te Faaora e faaite mai ia tatou i te faufaa no te oreraa e farii i te faahemaraa i roto i to’na faito hopea. Aita anei oia i ite atu i te fifi a ti‘a ai oia i ni‘a i te mou‘a e to’na taea‘e hurihia, o Lutifero, i to’na faahemaraahia na taua fatu faahema ra ? E nehenehe ho‘i ta’na e iriti i te uputa e ia ti‘a atu i mua i te ati ma te parau e, « Na reira, e Satane, te faaroo atu nei au i to oe mana‘o. Aita e titauhia ia‘u ia hema, aita e titauhia ia‘u ia fati, aita e titauhia ia‘u ia farii—tera râ, te faaroo atu nei au ».

Aita te Mesia i faati‘atia noa a‘e. Ua opani papû oia e ma te vitiviti i te aparauraa, e ua faaue atura: « E haere ê atu oe, e Satani », oia ho‘i, « Eiaha oe i mua faahou i to‘u mata—eiaha e ti‘a mai i mua ia‘u—Eita vau e faaroo ia oe—Aita ta‘u hoê ohipa ia oe ». I muri iho, te tai‘o nei tatou e, « Faaru‘e ihora te diablo ia’na » (Mataio 4:10–11).

Teie ta tatou raveraa, ia hinaaro tatou e ape i te hara, eiaha râ e ti‘a’tu i mua i te reira e ia farii i te fifi rahi atu no te tatarahapa i te hara. Ia tai‘o vau i te aamu o te Faaora e to’na mau faahemaraa, ua papû ia‘u e, ua tuu oia i to’na mau puai no te haapaari ia’na i mua i te faahemaraa, eiaha râ no te aro ia upootia i ni‘a i te reira.¹⁵

Na te mau faaotiraa ti‘a i teie taime e tauturu ia tatou ia pato‘i i te mau faahemaraa a muri a‘e.

Te hoê o te mau ohipa tumu a te taata tata‘i tahi, o te raveraa ïa i te mau faaotiraa. E rave rahi taime i te mahana te ti‘a nei tatou i te hoê hamaaraa purumu, e ua titauhia ia tatou ia rave i te faaotiraa e, teihea te purumu e haere. Te vai ra te mau purumu e mea atea, e e mea fifi ato‘a, tera râ, e arata‘i te reira ia tatou i ni‘a i te avei‘a mau e tae atu ai i ta tatou titauraa; te vai ra te tahi mau purumu e mea poto roa, e mea aano, e e mea arearea, tera râ, e arata‘i te reira ia tatou i ni‘a i te avei‘a tano ore. E mea faufaa roa ia maramarama maitai ta tatou titauraa hopea i roto i to tatou feruriraa, na roto i te reira, eita ïa tatou haape‘ape‘ahia ia tae tatou i te mau hamaaraa purumu ato‘a na roto i teie mau uiraa faufaa ore: Eaha te haere‘a ohie a‘e, e aore râ, arearea a‘e ? e aore râ, Eaha te purumu ta vetahi ê i rave ?

E mea ohie ia rave i te mau faaotiraa ti‘a mai te mea e, e rave tatou i te reira na mua roa, ma te tape‘a noa i te opuaraa tumu i roto i to tatou feruriraa; na te reira e paruru ia tatou i te mau pe‘ape‘a e rave rahi ia tae tatou i mua i te hamaaraa purumu, ia rohirohi tatou e ia faahema-u‘ana-hia tatou.

I to‘u apîraa, ua faaoti papû vau i to‘u mana‘o e, eita roa’tu vau e tamata i te ti, te taofe, te avaava, e aore râ, te ava. Ua ite au e, na teie faaotiraa papû ta‘u i paruru ia‘u e rave rahi taime i roto i te mau mea e rave rahi tei tupu i ni‘a ia‘u. E rave rahi taime ua hinaaro vau ia hutihuti rii, e aore râ, ia rave, e aore râ, ia tamata, tera râ, na te faaotiraa paari i horo‘a mai ia‘u i te tumu maitai e te puai papû no te pato‘i.

… Te taime no te faaotiraa e, eita tatou e rave i hoê noa a‘e mea i raro iho i te rave‘a e ora ai tatou i piha‘i iho i to tatou Metua, o teie ïa taime, e na roto i te reira, te mau ma’itiraa ato‘a ta tatou e rave, ia ravehia ïa ia au i te faaotiraa eiaha te hoê a‘e mea ia faaapiapi ia tatou no te titauraa i taua opuaraa ra.¹⁶

A haamau i te hoê arata‘iraa na outou iho, na roto i te reira, aita ïa outou e na ni‘a iho noa i te rave i te faaotiraa no te ohipa ta outou e rave ia farerei outou i taua faahemaraa nei â i tera taime e tera taime. Hoê noa taime e titauhia ia outou ia rave i te faaotiraa no te tahi mau mea !

E haamaitairaa rahi to te oreraa e na ni‘a iho noa i te rave i te faaotiraa no ni‘a i te hoê faahemaraa. E pauraa taime te reira huru raveraa, e e nehenehe ato‘a e fifi.¹⁷

E nehenehe ta tatou e tura‘i i te tahi mau mea i te hiti hoê noa iho taime, e ua oti roa i reira ! E nehenehe ta tatou e rave i te hoê faaotiraa ohie roa no ni‘a i te tahi mau mea o ta tatou e haamau i roto i to tatou oraraa, e ia haapa‘o i te reira—ma te ore e ho‘i faahou mai na ni‘a iho e ia rave faahou i te faaotiraa hanere a‘e rahiraa taime, no te iteraa e, eaha te rave, e eaha te ore e rave.

Ua riro te faaotiraa papû ore e te mana‘o paruparu ei vahi au na te Enemi ia ora e ia rave i te ohipa, no te mea, e nehenehe ta’na e taparahi e rave rahi taata i roto i taua mau huru to ratou ra… Mai te mea e, aitâ outou i na reira’tura, a faaoti ia rave i te faaotiraa ! ¹⁸

Aue ïa te nehenehe ahiri e, e ti‘a ia tatou ia arata‘i i te mau tamaroa ato‘a e te mau tamahine ato‘a, e Feia Mo‘a i te mau Mahana Hopea nei, ia faaoti i to ratou mana‘o i roto i to ratou tamariiraa ra, ia parau e, « Eita roa’tu vau e fati i raro a‘e ia Satane e aore râ, i te tahi noa’tu taata o te hinaaro ia haamou vau ia‘u iho ».¹⁹

Te taime tano no te faaoreraa i te mau peu iino, o te taime ïa hou a rave ai i te reira. Te rave‘a no te hoê oraraa maitai, tei roto ïa i te parururaa e te mitoraa. Te feia o te fati i roto i te ino o te feia ïa tei tuu ia ratou iho i roto i te hoê ti‘araa fifi.²⁰

E upootia tatou i mua i te enemi mai te mea e, ua ite tatou i to tatou paruparu, e e rohi tatou ia upootia i ni‘a i te reira.

Ua paari au i roto i te oraraa faaapu, e no reira, ua ite au e, ia haere ana‘e te puaa i rapae, e hi‘o vau na mua i te mau apoo e mea na reira ratou i te haereraa i rapae na mua’tu. Mai te mea e, tei rapae te hoê puatoro i te aua no te haere e imi i te mau vahi aihere maitai a‘e, ua ite au e, ihea vau e hi‘o ai na mua i te vahi na reira oia i te haereraa i rapae. E mea papû roa e, e mea na reira oia i te ou‘araa na ni‘a i te aua na mua’tu, e aore râ, i te vahi ua fati te aua. Mai te reira ato‘a te diabolo, ua ite oia e, i hea e faahema ai, i hea e rave ai i ta’na aroraa. Ua itehia ia’na te vahi paruparu. Te vahi i reira te hoê taata i paruparu ai na mua’tu, i reira ato‘a ïa oia e faahema faahou ai.²¹

Mai te huru ra e, tei piha‘i iho noa te ino ia tatou… E no reira, e mea ti‘a ato‘a ïa ia tatou ia vai araara noa. E tabula tatou i to tatou mau paruparu, e i reira tatou e imi ai i te rave‘a no te faaore i te reira.²²

Te rahiraa o tatou te vai ra to tatou mau vahi paruparu, e na reira ho‘i te ati i te rave ia tatou, maoti râ, ua paruru-maitai-hia tatou e ua tehu roa…

Te faaite mai nei te aamu e rave rahi… hi‘oraa o te puai e o te te‘ote‘o, to te taata iho anei e aore râ, to te nunaa, tei pohe na roto i te peperaa te vahi paruparu. I te rahiraa o te taime, tei te vahi ateatea noa teie mau vahi paruparu, e mau paruparu no te tino, e ua ite o Lutifero i te mau peu, te mau paruparu, e te mau vahi paruparu o te hoê taata, e faaohipa oia i te reira mau paruparu no te haamou roa ia tatou i te pae varua. To te tahi taata, e riro paha e hiaai ava to’na paruparu; to te tahi ra, e riro ïa te hinaaro maha ore; to te tahi ra, ua vaiiho ïa i to’na hiaai apeniraa ia faatere ia’na; te tahi ra, to’na ïa here i te moni, e te oraraa ona e te au maite ta te moni e nehenehe e hoo; e to te tahi ra, te titau ra ïa i te mana; e te vai atu ra.²³

Te taata e mau hinaaro ino to’na, ia riro ïa oia ei taata parauti‘a i te iteraa i to’na mau paruparu. Te parau atu nei au ia outou e, eita te Fatu e tuu mai i te hara i roto i to tatou oraraa. Aita oia i hamani i te taata ei taata ino… Ua faati‘ahia te hara i roto i te ao nei, e ua faati‘ahia o Satane ia faahema ia tatou, tera râ, e ti‘amâraa to tatou. E nehenehe ta tatou e rave i te hara e aore râ, e ora ma te parau-ti‘a, tera râ, eita ta tatou e nehenehe e ape i te hopoi‘a. E mea ohie roa, e e mea paruparu ato‘a ia faahapa i te Fatu no ta tatou hara, ma te parau e, aita e rave‘a, eita e nehenehe e arai. Faahapa i to tatou mau metua no ta tatou mau hara e no te huru o to tatou haapiiraahia, e rave‘a te reira na te taata e ape ra i ta’na hopoi‘a. E riro paha, aita na metua i manuia i roto i ta raua hopoi‘a; ua fifi paha to tatou oraraa, tera râ, i roto i to tatou ti‘araa e tamaiti e e tamahine na te Atua, tei roto ia tatou te mana no te ti‘a i ni‘a a‘e i to tatou huru oraraa, e ia taui i to tatou oraraa.²⁴

Te taparu nei matou i to tatou mau taata i te mau vahi ato‘a, « E tena na, e auraro atu outou i te Atua. E pato‘i atu i te diabolo, e na’na e ma‘ue ê atu » (Iakobo 4:7).

Te vai nei paha te mana‘o pe‘ape‘a i roto i te tahi pae o te taata no te huru o te ao nei, e no te rahi te ino, tera râ, ua parau mai te Fatu e, « … mai te mea râ ua vai ineine noa outou, e ore outou e măta‘u » (PH&PF 38:30), e ua parau faahou â oia e, « E hau ta‘u e vaiiho ia outou nei… Eiaha e taiâ to outou aau, eiaha ho‘i e măta‘u » (Ioane 14:27).²⁵

Tatou te Feia Mo‘a i te mau Mahana Hopea nei, e mea ti‘a ia tatou ia vai araara noa. Te rave‘a no te paruru i te taata e i te utuafare tata‘i tahi i te mau faahemaraa a te Enemi e no te faaineine no te mahana rahi o te Fatu, o te mau-papû-raa ïa i te auru o te auri, o te faarahiraa i te faaroo, o te tatarahaparaa ïa i ta tatou mau hara, e i to tatou mau hapehape, e ia anaanatae i te ohipa o To’na basileia i ni‘a i te fenua nei, oia te Ekalesia a Iesu Mesia i te Feia Mo‘a i te mau Mahana Hopea nei. Tei roto ho‘i i reira te oaoa mau hoê roa no te mau tamarii paato‘a a te Metua.²⁶

Te mau mana‘o tauturu no te tuatapaparaa e te haapiiraa

A feruri i teie nei mau mana‘o a tuatapapa ai outou i te pene aore râ, a faaineine ai outou i te haapii. No te tahi atu tautururaa, a hi‘o i te mau api v–xi.

Eaha te haapiiraa a te peresideni Kimball no ni‘a ia Satane e ta’na mau rave‘a ta outou i feruri e, e mea maitai e no te aha ? (A hi‘o i te mau api 126–27).
A hi‘o faahou i te tuhaa o te haamata i te mau api 127–28. Nahea te Fatu ia tauturu ia tatou no te pato‘i i te ino ? (Ei hi‘oraa, a hi‘o i te aamu i te api 125). I nahea outou i te fariiraa i teie huru tauturu ?
A tai‘o i te fabula i ni‘a i te api 130. I to outou mana‘oraa, no te aha te taata ratere i faati‘a ai i te kamela ia tomo mai i roto i to’na fare ie ? A feruri e mea nahea to te Faaora pato‘iraa i te faahemaraa (a hi‘o i te mau api 130–31). Eaha te tahi mau rave‘a e ti‘a ai i te mau metua ia tauturu i ta ratou mau tamarii ia ite e ia pato‘i i te mau faahemaraa, noa’tu e mea na’ina’i roa ?
A hi‘o faahou i te taato‘araa o te paratarafa piti i ni‘a i te api 131. A faaau i te rave‘a no te mitoraa i mua i te hara, e te rave‘a no te tatarahaparaa i te hara e te upootiaraa i ni‘a i te reira.
Te parau ra te peresideni Kimball e, « E mea ohie ia rave i te mau faaotiraa ti‘a mai te mea e, e rave tatou i te reira na mua roa » (api 132). Eaha te tupu i roto i to tatou oraraa mai te mea e, e ravehia te mau faaotiraa na mua roa ia haapa‘o te mau faaueraa mai te Parau Paari ? (Ei hi‘oraa, a hi‘o i te api 132). Eaha te tahi mau faaotiraa no ni‘a i te haapa‘oraa i te evanelia ta outou i rave papû ?
A feruri i te mau parau a te peresideni Kimball no ni‘a i ta’na mau puaa e ta’na puatoro (api 133–35). Eaha te roaa ia tatou na roto i te fariiraa i to tatou mau paruparu e te fariiraa i te hopoi‘a no te reira ?

Te mau papa‘iraa mo‘a: 1 Korinetia10:13; 1 Nephi 15:23–25; Helamana 5:12; Etera 12:27; PH&PF10:5

woman thinking — Ua haapii mai te peresideni Kimball e, mai te mea e faaroo tatou i « te faaururaa mărû e te piiraa a te Varua. », e haamaitaihia ïa tatou i te « parururaa, te mana, te ti’amâraa e te oaoa ».

family studying scriptures — Ua parau te peresideni Kimball e, no te paruru ia tatou i te enemi, e mea ti‘a ia tatou ia « mau papû i te auru o te auri ».