Pene 6

Te iteraa i te mau papa‘iraa mo‘a no tatou iho

E nehenehe tatou tata‘i tahi ia farii i te mau haamaitairaa o te utuhiraa ia tatou i roto i te mau papa‘iraa mo‘a.

No roto mai i te oraraa o Spencer W. Kimball

I te ahuru mamaharaa o te matahiti o Spencer W. Kimball, ua faaroo oia i te tamahine a Brigham Young, o Susa Young Gates, i te paraparauraa i roto i te hoê amuiraa tĭtĭ i ni‘a i te parau no te tai‘oraa i te mau papa‘iraa mo‘a. Te parau ra oia e: « Ua horo‘a oia i te hoê a‘oraa faahiahia no ni‘a i te tai‘oraa i te mau papa‘iraa mo‘a, e te iteraa i te reira; i muri iho, ua faaea oia i te paraparau no te ui i te amuiraa rahi, fatata hoê tauatini rahiraa o matou, ‘Ehia rahiraa o outou tei tai‘o hope roa i te Bibilia ?’

« … Ua tupu te tahi mana‘o faahapa i roto ia‘u. E rave rahi buka ta‘u i tai‘o tae mai i taua taime ra, te mau papa‘iraa arearea i roto i te mau ve‘a, te mau buka faaarearea, tera râ, te na ô noa maira to‘u aau faahapa e, ‘O oe, e Spencer W. Kimball, aitâ oe i tai‘o a‘e nei i taua buka mo‘a ra. No te aha ? Ua hi‘o a‘era vau na te hiti ia‘u, i ni‘a i te mau taata i mua mai ia‘u, e i na pae e piti o te piha, no te hi‘o e, o vau ana‘e anei tei ore i tai‘o i te reira buka mo‘a. I roto i tera rahiraa tauatini taata, mai te mea ra e, afa tatini taata ana‘e paha tei afai papû i to ratou rima i ni‘a. Ua faatopa ihora vau ia‘u i ni‘a i to‘u parahiraa. Aita vau i feruri i te tahi atu mau taata tei ore ato‘a e tai‘o, ua faahapa râ vau ia‘u iho. Aita vau i ite e, eaha ta te tahi mau taata ohipa e rave ra, e e feruri ra, ia‘u râ, aita vau i faaroo faahou i te a‘oraa. Ua oti ta’na ohipa. Ia faaoti a‘era taua putuputuraa ra, ua imi a‘era vau i te opani rahi pae piti haereraa i rapae, e ua horo atura i te fare, hoê aroa i te pae hiti‘a o te râ i te atea i te fare pureraa; ua faaite a‘era vau ma te parau ia‘u iho e, ‘E tai‘o vau. E tai‘o vau. E tai‘o vau.’

« Tomo atura vau na te uputa i muri i to matou fare, haere atura vau i ni‘a i te pa‘epa‘e vairaa tauhaa i reira matou e vaiiho ai i te mori hinu, ma’iti ihora vau hoê tei faaîhia i te hinu, tei tamauhia te uiti apî, e ua ta‘uma atura i roto i to‘u piha. I reira ua iriti au i ta‘u Bibilia e ua haamata ihora i te tai‘o i te Genese, pene hoê e te irava matamua, e ua maoro te pô to‘u tai‘oraa i te mau aamu no Adamu e o Eva e o Taina e o Abela, e o Enoha e o Noa e te tiluvi e tae roa’tu ia Aberahama ».¹

Hoê matahiti i muri a‘e ua hope ia Spencer te tai‘o i te Bibilia: « E oaoa rahi to‘u i te hi‘oraa e, ua oti te Bibilia i te tai‘ohia e au mai te omuaraa e tae roa’tu i te hopea ! Aue ïa te poupou rahi o te varua ! Aue ho‘i te oaoa i roaa ia‘u no te mau mea ato‘a i roto ra !² Ua vai taua iteraa ra i roto ia’na, e i muri a‘e ra, mea pinepine oia i te faahiti i te reira i roto te mau amuiraa rahi e te mau amuiraa area.

Ua faarii tamau noa te peresideni Kimball i te mau haamaitairaa no te tai‘oraa i te papa‘iraa mo‘a i roto i to’na oraraa taato‘a, e ua faaitoito noa oia ia vetahi ê ia na reira ato‘a. O Elder Richard G. Scott tei riro mai ei melo i roto i te Pŭpŭ no te Tino Ahuru Ma Piti Aposetolo tei parau e: « Ua riro o Elder Spencer W. Kimball ei faatere i to matou area i te tau e peresideni misioni au i reira. Ua ite a‘era vau i to’na maramarama e ta’na faaohiparaa i te Buka a Moromona i roto i ta’na mau parau poro‘i faauru i te mau melo e i te mau misionare… I te hoê taime, i roto i te hoê putuputuraa misionare, na ô a‘era oia e, ‘E Richard, i teie mahana ua faaohipa oe i te hoê irava no roto mai i te Buka a Moromona aitâ na ho‘i au i feruri e faaohipa mai te reira te huru.’

Te mau haapiiraa a Spencer W. Kimball

Ua riro te mau papa‘iraa mo‘a ei tao‘a faufaa rahi o te titauhia ia tatou ia imi no tatou iho.

I te tahi taime, mai te huru ra e, te faaiti nei tatou i te faufaa o te mau papa‘iraa mo‘a, no te mea, aita tatou e ite hope roa ra i te faufaa i te fariiraa tatou i te reira, e aita ato‘a ho‘i tatou e ite ra i to tatou haamaitairaa rahi na roto i te fariiraa i te reira. Mai te huru ra e, ua au roa tatou i roto i te mau mea i fariihia e tatou i roto i teie nei ao, e ua matau roa tatou i te faarooraa i te evanelia ia haapiihia ia tatou, no reira, e ere atura i te mea ohie na tatou ia feruri e, e nehenehe te reira huru e taui.

Tera râ, e mea ti‘a ia tatou ia taa maitai e, aita i maoro a‘e nei to te ao nei maiharaa mai mai roto mai i te hoê pô roa o te poiri pae varua ta tatou e parau nei e, te Taivaraa Rahi. Mea ti‘a ia tatou ia ite i te huru o te hohonu o te poiri pae varua tei vai na hou a tae mai ai taua mahana ra o te tau faatupuraa raau o te matahiti 1820 i te taime a fâ mai ai te Metua e te Tamaiti ia Iosepha Semita ra—e poiri teie tei tohuhia na e te peropheta Nephi e tei parauhia « te vairaa matapo ri‘ari‘a » i reira te evanelia i iriti-ê-hia’tu ai i te taata nei (A hi‘o 1Nephi 13:32)

… Ua î roa to‘u aau i te mauruuru i te mea e, aita vau i fanauhia i te anotau o te poiri pae varua, oia te anotau a faaea muhu ore noa to te ra‘i, e a iriti-ê-hia’tu ai te Varua. Oia mau, mai te mea e, aita te parau a te Fatu no te arata‘i ia tatou, e au ïa tatou mai te feia ori haere noa i roto i te hoê medebara rahi, ma te ite ore i te haere‘a, e aore râ, i roto i te poiri ta‘ota‘o o te hoê ana aita e mori no te faaite ia tatou i te haere‘a e ora ai…

… O Isaia tei parau no ni‘a i te taime e hope ai taua poiri ra, e no te taeraa mai te Buka a Moromona [a hi‘o Isaia 29: 11–12]…

E ua haamata a‘era te ohipa umerehia, « e ohipa umerehia e te maerehia » ta te Fatu i fafau mai e, e faatupu oia i te reira (A hi‘o Isaia 29:14).

Mai te tau a; ai te faaho‘iraa mai o te evanelia na roto i te peropheta Iosepha Semita, e [rave rahi milioni] Buka a Moromona tei nene‘ihia e tei operehia… E rave rahi Bibilia tei nene‘ihia, hau atu i te tahi atu mau buka ato‘a. Te vai ato‘a nei ta tatou Parau Haapiiraa e te mau parau fafau, e te Buka Poe Tao‘a Rahi. Taa ê noa’tu ta tatou faaohiparaa i te reira mau buka papa‘iraa mo‘a faufaa rahi, te vai ato‘a ra to tatou ite e te aravihi rahi aitâ i itehia a‘e nei i te tahi atu anotau i roto i te aamu o te ao nei, no te faaohipa i te reira mau buka, mai te mea e, e hinaaro tatou,

Ua ite te mau peropheta i tahito ra e, i muri a‘e i te poiri e tae mai ïa te maramarama. Te ora nei tatou i roto i taua maramarama ra—tera râ, te taa maitai ra anei tatou i te reira ? Ma te haapiiraa no te faaoraraa te roaa ohie ia tatou, te măta‘u nei au i te mea e, tei roto noa â te tahi pae « i te varua taoto rahi…te mata hi‘o ore, e te tari‘a faaroo ore » (Roma 11:8).

… Te ani nei au ia tatou paato‘a ia hi‘opo‘a maite i te huru o ta tatou tuatapaparaa i te papa‘iraa mo‘a. E peu matarohia ia mau aau ia tatou te tahi mau irava, e ia vai te reira i roto i to tatou upoo, e ia mana‘o tatou e, e ite rahi ïa to tatou i te evanelia. I roto i te reira huru hi‘oraa, mai te mea e, e mea iti roa to tatou ite, e nehenehe te reira e riro ei fifi. Ua papû ia‘u e, i te hoê taime i roto i to tatou oraraa, e mea ti‘a ia tatou tata‘i tahi ia imi i te mau papa‘iraa mo‘a no tatou iho—e eiaha e imi i te reira hoê noa iho taime, e tamau noa râ i te imi.⁴

Te fafauraa tatou ia tavini i te Fatu, tei te huru ïa o te taime e fariu ai tatou i roto i te mau papa‘iraa mo‘a.

Ua riro te aamu o te Arii Iosia i roto i te Faufaa Tahito ei aamu maitai roa no te « faaau… i ni‘a ia [tatou] iho » (1 Nephi 19:24). No‘u nei, o te hoê te reira o te mau aamu nehenehe roa a‘e i roto i te mau papa‘iraa mo‘a ato‘a.

E va‘u ana‘e matahiti to Iosia a haamata ai oia i te faatere i ni‘a ia Iuda, e noa’tu e, e feia ohipa iino to’na mau hui metua, te faaite mai nei te mau papa‘iraa ia tatou e, « Ua rave oia i te parau-ti‘a i te aro o Iehova, haapa‘o maite atura i te haere‘a o ta’na tupuna o Davida aore i fariu i te pae atau e te pae aui » (2 Te Mau Arii 22:2). Teie ïa te vahi maere roa, i te mea e, i taua taime ra (e piti noa u‘i hou a haamouhia ai o Ierusalema i te matahiti 587 hou te Mesia) ua mo‘e te ture a Mose tei papa‘ihia ra, e ua fatata roa aita e ite-faahou-hia, tae roa’tu i roto i te mau tahu‘a no te hiero !

Tera râ, i te ahuru ma va‘uraa o te matahiti o to’na faatereraa, ua faaue a‘era o Iosia ia tata‘ihia te hiero. I taua taime ra, ua itehia maira ia Hilikia, te tahu‘a rahi, te buka ture, ta Mose i tuu i roto i te fana o te fafauraa, e ua horo‘a’tura i te reira i te Arii Iosia ra

Ia tai‘ohia’tu te reira buka ture i mua ia Iosia ra, « ua hahae ihora [oia] i to’na ahu » e ua oto ihora i mua i te aro o te Fatu.

Na ô a‘era oia, « Ua rahi ho‘i te riri o Iehova i te tupuraa ia tatou no te mea aita to tatou mau metua i haapa‘o i te parau i roto i teie nei buka, e ia haapa‘o ho‘i i te mau parau i faaitehia mai ia tatou i reira » (2 Te Mau Arii 22:13).

I reira, ua tai‘o atura te arii i te reira buka i mua i te mau taata ato‘a, e i taua taime ra, ua fafau ihora ratou paato‘a e haapa‘o ratou i te mau faaueraa ato‘a a te Fatu « ma te aau ato‘a e te varua ato‘a » (2 Te Mau Arii 23:3). I reira, ua faanaho a‘era o Iosia ia tamâhia te basileia o Iuda, ma te tatara i te mau idolo ato‘a, te mau uru raau, te mau vahi teitei, e te mau ino ato‘a tei haaputumaite-hia i roto i te tau ariiraa o to’na ra mau hui metua, tei haaviivii i te fenua e to’na ra nunaa…

« Aita ïa arii e au ia’na mai mutaaiho mai â, tei fariu ia Iehova ma te aau ato‘a, e ma te varua ato‘a, e ma te puai ato‘a, ia au i te ture ato‘a a Mose ra; aita ho‘i o’na e faito i tupu i muri a‘e ». [2 Te Mau Arii 23:25].

Te feruri papû nei au e, e mea ti‘a ia tatou paato‘a ia ho‘i faahou i roto i te mau papa‘iraa mo‘a mai te Arii Iosia ra, e ia vaiiho i te reira ia ohipa ma te puai i roto ia tatou, e ia tura‘i ia tatou ia tavini i te Fatu ma te tuutuu ore.

Te ture ana‘e a Mose tei mauhia e Iosia. Te vai nei i roto i ta tatou mau papa‘iraa mo‘a te îraa o te evanelia a Iesu Mesia; e mai te mea e, mea au te tahi tuhaa iti noa o te evanelia, e oaoa ïa to roto i te îraa o te evanelia.

Aita te Fatu e rave haapa‘oraa ore noa i te ohipa e o tatou ia horo‘a ana‘e mai oia i teie mau mea ia tatou nei, no te mea, « O tei tuuhia’tu te mea rahi ra, e mea rahi ato‘a te titauhia’tu » (Luka 12: 48). Ia roaa teie mau mea ia tatou, ua riro ato‘a ïa te reira ei hopoi‘a na tatou. E mea ti‘a ia tatou ia tuatapapa i te mau papa‘iraa mo‘a mai te au i te faaueraa a te Fatu (a hi‘o 3 Nephi 23:1–5); e e mea ti‘a ia tatou ia vaiiho i te reira ia faatere i to tatou oraraa e i te oraraa o ta tatou mau tamarii.⁵

E haapii tatou i te mau haapiiraa o te oraraa nei na roto i te tuatapaparaa i te papa‘iraa mo‘a.

Te mau haapiiraa ato‘a no te pae morare e no te pae o te oraraa varua, e itehia ïa te reira i roto i te mau buka papa‘iraa mo‘a. I reira ho‘i e itehia ai te mau faautuaraa o te parau-ti‘a e te faahaparaa o te hara.⁶

E roaa ia tatou te mau haapiiraa o te oraraa nei ma te ohie e te papû mai te mea e, e ite tatou i te hopearaa o te ino e te parauti‘a i roto i te oraraa o vetahi ê… Te iteraa maitairaa i te huru o Ioba, o te haapiiraa ïa ia tape‘a i te faaroo i roto i te mau ati tei hau roa i te rahi. Te ite-maitai-raa i te paari o Iosepha i roto i te oraraa hinuhinu o Aiphiti tahito i te taime a faahemahia ai oia e te hoê vahine tei au i ta te tino, e ia ite i teie tamaiti mâ ia pato‘i i te mau puai ato‘a o te poiri e vai ra i roto i teie taata faahema, e mea papû e, e haapuai te reira i te taata tai‘o i mua i te reira huru hara. Te iteraa i te aau farii e te hinaaro papû o Paulo a horo‘a ai oia i to’na ora no ta’na ohipa, e riro ïa ei faaitoitoraa i te feia tei mana‘o e, ua faainohia e ua tamatahia ratou.

E ti‘a i ta tatou mau tamarii ia apo mai i te mau haapiiraa o te oraraa nei na roto i te huru tuutuu ore e te puai o Nephi; te huru Atua o na ati Nephi e toru; te faaroo o Aberahama; te mana o Mose; te ohipa haavare e te eia a Anania; te itoito e tae roa’tu i te pohe o te Ati Amona vî ore; te faaroo fati ore o te mau metua vahine ati Lamana tei tuuhia’tu i roto i ta ratou mau tamaiti, no te puai rahi o te reira faaroo, ua ora te mau tamaiti a Helamana. Aita hoê o ratou i pohe i roto i taua tama‘i ra.

I roto i te taato‘araa o te mau papa‘iraa mo‘a ua papa‘ihia te mau huru paruparu e te mau huru puai ato‘a o te taata, e ua papa‘ihia te mau faautuaraa e te mau faahaparaa. E matapo ïa to te taata e ore e apo mai i te haapiiraa o te oraraa na roto i te reira mau tai‘oraa. Ua parau mai te Fatu e, « Te imi nei outou i te parau i papa‘ihia ra, no te mea te mana‘o na outou e roaa te ora mure ore i reira: o te faaite ïa ia‘u o taua mau parau ra » (Ioane 5:39). I roto ato‘a i te oraraa o teie nei â Fatu e ite ai tatou i te mau huru maitai ato‘a: te huru Atua, te paari, te haavî, te maitai roa. E nahea e ti‘a ai i te mau piahi ia tuatapapa i teie aamu faahiahia ma te ore e apo mai i te tahi tuhaa no to ratou oraraa ? ⁷

I roto [i te mau buka papa‘iraa mo‘a] te vai ra te mau haamaramaramaraa no ni‘a i te oraraa o te mau peropheta, to te mau ti‘a faatere, e to te Fatu iho, e te mau hi‘oraa e te arata‘iraa e ti‘a ai i te taata nei, na roto i te haapa‘oraa i te reira mau hi‘oraa, ia riro ei mau taata maitai roa, ei taata oaoa, tei î i te poupou, e o te ora mure ore e te mau titauraa teitei ïa to ratou mau hinaaro.⁸

E roaa te ite varua i te mau taata ato‘a e tuatapapa e e imi i te mau papa‘iraa mo‘a.

Te vai nei â e rave rahi Feia Mo‘a aita e tai‘o nei e e feruri hohonu tamau nei i te mau papa’îraa, e e mea ha‘iha‘i roa to ratou ite no ni‘a i te mau haapiiraa a te Fatu i te mau tamarii a te taata nei. E rave rahi tei bapetizohia e ua farii i te hoê iteraa papû, e ua « tae i taua e‘a titiaifaro ra e te pirihao », noa’tu râ i te reira, aita ratou i rave i te taahiraa i muri iho—no te « haere ti‘a i mua ma te oaoa i te ite i te parau a te Mesia, ma te tape‘a ho‘i e tae noa’tu i te hopea ra » (2 Nephi 31:19,20; mea apitihia’tu te papa‘i opa).

Te feia haapa‘o ana‘e te farii i te faautuaraa i fafauhia ra, oia ho‘i, te ora mure ore. E ore roa te taata e farii i te ora mure ore ma te ore e riro ei « feia rave i te parau nei » (a hi‘o Iakobo 1:22) e ia itoito i te haapa‘oraa i te mau faaueraa a te Fatu. E ore roa te hoê taata e riro « ei feia rave i te parau nei » ma te ore e riro na mua roa ei « taata faaroo ». E no te riro ei « taata faaroo » e ere ïa i te ti‘a-noa-raa ma te ohipa ore a tia‘i noa ai i te tahi mau tuhaa o te haamaramaramaraa; e imi râ, e tuatapapa, e pure e e haro‘aro‘a. No reira, na ô maira te Fatu e, « O te ore ho‘i e farii i to‘u nei reo ra aore ho‘i ïa i matau i to‘u nei reo, e e ere ho‘i no‘u nei » (PH&PF 84:52).⁹

Ua haapii mai te tau ia‘u e, mai te mea e titau itoito tatou i teie opuaraa maitai [te tuatapaparaa i te mau papa‘iraa mo‘a] ma te tuutuu ore e te itoito, e iteahia ia tatou te mau pahonoraa i to tatou mau fifi e te hau i roto i to tatou aau. E faaaano te Varua Maitai i to tatou haro‘aro‘araa, e roaa ia tatou te mau iteraa apî, e ite tatou i te faanahoraa o te mau papa‘iraa mo‘a ato‘a; i reira te mau parau haapiiraa a te Fatu e riro ai ei mea faufaa no tatou hau atu i tei mana‘ohia e tatou. E na roto i te reira, e rahi atu to tatou paari no te arata‘i ia tatou iho e i to tatou utuafare.¹⁰

Te ani nei au i te mau taata ato‘a ia haamata i teie nei i te tai‘o i te mau papa‘iraa mo‘a ma te itoito, mai te mea e, aitâ outou i haamata atu ra.¹¹

Mai te mea e utuhi tatou ia tatou i roto i te mau papa‘iraa mo‘a, e ite tatou e e here tatou i te Metua i te Ao ra, e ia Iesu Mesia.

Ua ite au e, mai te mea e, e tau‘a ore rii au i roto i to‘u mau auraa e te Atua, e ia feruri ana‘e au e, aita te Atua e faaroo maira ia‘u, e aita e paraparau mai ia‘u, mai te huru e, tei te atea ê roa vau, mea atea roa. Mai te mea e, e utuhi au ia‘u i roto i te mau papa‘iraa mo‘a, e iti mai te atearaa, e e ho‘i faahou mai te varua. Ua ite au e, ua rahi faahou atu â to‘u here i te mau taata tei titauhia ia‘u ia here ma to‘u aau ato‘a, to‘u mana‘o ato‘a, e to‘u puai ato‘a, e na roto i te hereraa ia ratou, ua ite au e, e ohie a‘e ia haapa‘o i ta ratou a‘oraa.¹²

Ua ite au e, te ohipa e titauhia ia‘u ia rave no te faarahi i to‘u here i to‘u Rahu Nui e i te evanelia e i te Ekalesia e i to‘u mau taea‘e, o te tai‘oraa ïa i te mau papa‘iraa mo‘a. E rave rahi hora to‘u tai‘oraa i te mau papa‘iraa mo’a… Aita vau e taa ra e, nahea te hoê taata e nehenehe ai e tai‘o i te mau papa‘iraa mo‘a ma te farii ore i te hoê iteraa papû no ni‘a i to ratou huru mo‘a e no ni‘a i te mo‘a o te ohipa a te Fatu, oia te auvaha parau i roto i te mau papa‘iraa mo‘a.¹³

Te tahi tuhaa iti o te rahiraa milia taata i ni‘a i te fenua nei o te nehenehe e haere i piha‘i iho i te Atua mai ia Adamu i na reira, e o Aberahama e o Mose, noa’tu râ i te reira, i roto i te ao ta tatou e ora nei, e roaa te mau papa‘iraa mo‘a i te mau varua ato‘a, e, na roto i te reira, e ti‘a i te taata nei ia matau i to ratou Metua i te Ao ra, i ta’na Tamaiti o Iesu Mesia, e i te mau huru e te mau rave‘a e i te mau mea ta ratou e tia‘i nei i te ora mure ore.¹⁴

Aita e tuatapaparaa na te taata nei e itehia ai te Atua, ua faaite mai râ oia ia’na i ta’na ra mau tavini te mau peropheta, e ua haapii mai ratou ia tatou i to’na ra huru. E roaa ia tatou tata‘i tahi te haapapûraa o te parau mau na roto i ta tatou iho haapaeraa maa e te pure. Noa’tu te vero o te haapa‘oraa e haati nei ia tatou, te vai noa ra to tatou hau i ropu i te ori‘o o te vero, ma te ite papû i te Fatu e i te Tamaiti mai roto mai i te mau papa‘iraa tahito e o teie tau e ta te Varua i haapapû mai. I roto i te reira iteraa, e noaa to tatou ti‘aturi i te ora mure ore.¹⁵

Te mau mana‘o tauturu no te tuatapaparaa e te haapiiraa

A feruri i teie nei mau mana‘o a tuatapapa ai outou i te pene aore râ, a faaineine ai outou i te haapii. No te tahi atu tautururaa, a hi‘o i te mau api v–xi.

A feruri hohonu i te mau aamu i te mau api 72–74. Nahea teie mau aamu i te haaputapû ia outou ? A ui ia outou iho e, eaha te huru no ta outou tai‘oraa, te haro‘aro‘araa, e te faaohiparaa i te mau papa‘iraa mo‘a. A hi‘opo‘a i ta outou mau opuaraa no te tai‘oraa i te mau papa‘iraa mo‘a.
Ia hi‘o ana‘e outou i te tuhaa e haamata i te mau api 74–75, a feruri i to outou oraraa aita e papa‘iraa mo‘a. Eaha ïa te huru taa-ê-raa o to outou oraraa ? Eaha te tahi mau hopearaa e tupu mai na roto i te faaitiraa i te faufaa o te mau papa‘iraa mo‘a ?
No te aha aita e rava’i ia ite i te tahi noa mau papa‘iraa mo‘a « i roto i to tatou feruriraa » ? (api 76). Eaha to outou mana‘o ia imi faahou outou i te mau papa‘iraa mo‘a no outou iho, e « ia tamau noa i te imi » ?
Ua faaitoito mai te peresideni Kimball ia tatou ia faaau i te aamu o te Arii Iosia i ni‘a ia tatou (mau api 76–77; a hi‘o ato‘a 2 Te Mau Arii 22–23). Eaha te aifaitoraa e te taa-ê-raa ta outou e ite ra i rotopu i to outou oraraa e i te oraraa o te Arii Iosia e to’na mau taata ?
A feruri na i te tahi mau « haapiiraa o te oraraa » ta outou i apo mai na roto i te tai‘oraa i te mau papa‘iraa mo‘a (No te tahi mau hi‘oraa, a hi‘o i te mau api 77–79.
A hi‘o faahou i te maha o te paratarafa i te mau api 79–80. Eaha te tahi mau irava tei tauturu ia outou ia ite i te mau pahonoraa i to outou mau fifi e ia ite ato‘a i te hau i roto i to outou aau ?
A tai‘o i te paratarafa matamua e te piti i te mau api 80–81. Eaha ta te tai‘oraa i te mau papa‘iraa mo‘a i faatupu i roto i to outou autaatiraa e te Atua ? To outou autaatiraa e te mau melo o te utuafare ? Ta outou taviniraa i roto i te mau piiraa o te Ekalesia ?

Te mau papa‘iraa mo‘a: Amosa 8:11–12; 1 Nephi 19:23; Alama 37:8; PH&PF 1:37; 18:33–36