Omuaraa
Ua faanaho te Peresideniraa Matamua e te Pŭpŭ no te Tino Ahuru Ma Piti Aposetolo i Te mau Haapiiraa a te mau peresideni o te Ekalesia no te tauturu ia outou ia faahohonu i to outou iteraa i te evanelia tei faaho‘ihia mai, e ia haafatata ia outou i te Fatu ra na roto i te mau haapiiraa a te mau peropheta no te mau mahana hopea nei. Na roto i teie mau buka ta te Ekalesia e hamani nei, e roaa ia outou te hoê haaputuraa buka evanelia no to outou utuafare.
Te vauvau nei teie buka i te mau haapiiraa a te peresideni Spencer W. Kimball, tei riro ei peresideni no te Ekalesia a Iesu Mesia i te Feia Mo‘a i te mau Mahana Hopea nei mai te 30 no titema 1973 e tae roa’tu i te 5 no novema 1985.
Te tuatapararaa a te taata hoê
Ia tuatapapa outou i te mau haapiiraa a te peresideni Kimall, a titau i te faaururaa a te Varua. Ia haamana‘o outou i te fafauraa faauruhia a Nephi: « O te imi maite ra, e ite ïa; e e faaitehia te mau parau aro a te Atua ia ratou, na roto i te mana o te Varua Maitai » (1 Nephi 10:19). A haamata i ta outou tuatapaparaa na roto i te pure, e a tamau noa i te pure i roto i to outou aau a tai‘o noa ai outou.
I te hopea o te mau pene ato‘a, e ite outou i te mau uiraa e te mau faahororaa papa‘iraa mo‘a o te tauturu ia outou ia haro‘aro‘a e ia faaohipa i te mau haapiiraa a te peresideni Kimball. A hi‘ohi‘o rii i te reira hou a tai‘o ai outou i te pene.
A hi‘ohi‘o ato‘a i teie mau arata‘iraa i muri nei:
-
A imi i te mau parau e te mau irava parau faufaa. Ia ite outou i te hoê parau aita outou i ite i te auraa, a hi‘o i roto i te titionare, e aore râ, i te tahi atu rave‘a ia ti‘a ia outou ia maramarama maitai i to’na auraa.
-
A feruri i ni‘a i te auraa o te mau haapiiraa a te peresideni Kimball. E nehenehe ta outou e tapa‘opa‘o i te tahi mau parau e te tahi mau irava parau tei haaputapû i to outou feruriraa e to outou aau.
-
A feruri i te tahi mau iteraa to outou tei tu‘ati i ni‘a i te mau haapiiraa a te peresideni Kimball.
-
A feruri i te huru no te faaohiparaa i te mau haapiiraa a te peresideni Kimball i ni‘a ia outou. A feruri i te huru no te tu‘atiraa te mau haapiiraa i ni‘a i ta outou mau mana‘ona‘oraa e aore râ, i ta outou mau uiraa. A faaoti eaha te mea ta outou e rave i muri a‘e i te mau mea ta outou i haapii mai.
Te haapiiraa ma te faaohipa i teie buka
E nehenehe e faaohipa i teie buka no te haapii i te fare e aore râ i te fare pureraa. E tauturu teie mau arata‘iraa ia outou:
A faatumu i ni‘a i te mau parau a te peresideni Kimball e i te mau Papa‘iraa mo‘a
Ua faaue mai te Fatu e, ia haapii ana‘e tatou, « eiaha’tu ta [tatou] parau e faaite atu maori râ i ta te mau peropheta e te mau aposetolo i papa‘i ra, e [i] tei haapiihia mai ia [tatou] e te Faaa‘o na roto i te pure faaroo ra » (PH&PF 52:9)
Ua faauehia outou ia tauturu ia vetahi ê ia haro‘aro‘a e ia faaohipa i te evanelia na roto i te mau haapiiraa a te peresideni Kimball e na roto i te mau papa‘iraa mo‘a. Eiaha e tuu i teie buka i te hiti, e aore râ, e faaineine i te mau haapiiraa mai roto mai i te tahi atu mau buka. A faataa i te hoê tuhaa rahi o te haapiiraa no te tai‘o i te mau haapiiraa a te peresideni Kimball i roto i teie buka e ia tau‘a parau i ni‘a i to ratou auraa e i te huru no te faaohiparaa i te reira.
A faaitoito i te mau taata ia tuatapapa i te mau pene hou te mau pureraa i te Sabati e ia ta‘ita‘i mai i te buka i te fare pureraa. Mai te mea e, e na reira ratou, e hau atu ïa to ratou ineine no te aparau amui e no te faaetaeta i te tahi e te tahi.
A Titau i te Arata‘iraa a te Varua Maitai
Mai te mea e, e pure outou no te ani i te tauturu, e e faaineine maitai outou ia outou, e arata‘i ïa te Varua Maitai i ta outou mau tautooraa. E tauturu Oia ia outou ia haapapû maitai i te mau tuhaa o te pene tata‘i tahi o te faaitoito ia vetahi ê ia haro‘aro‘a e ia ora i te evanelia.
Ia haapii outou, a pure ia ti‘a i te mana o te Varua ia apee i ta outou mau parau e i te mau aparauraa a te piha haapiiraa. Te parau ra o Nephi e, « Ia parau te taata na roto i te mana o te Varua Maitai, na te mana o te Varua Maitai e faatae i taua parau ra i roto i te aau o te tamarii a te taata nei » (2 Nephi 33:1; a hi‘o ato‘a PH&PF 50:13–22).
A faaineine i te haapii
Ua faanahohia te mau pene i roto i teie buka no te tauturu ia outou ia faaineine i te haapiiraa. A feruri ato‘a i ni‘a i teie mau arata‘iraa:
-
A tuatapapa i te pene: Na roto i te pure, a tuatapapa i te pene ia papû maitai to outou haro‘aro‘araa i te mau haapiiraa a te peresideni Kimball. Mai te mea e, e haaputapû maitai ta’na mau parau ia outou iho, e haapii ïa outou ma te aau tae mau e te mana rahi (a hi‘o PH&PF 11:21). Ia tai‘o ana‘e outou, a haamana‘o i te hinaaro o te feia ta outou e haapii. E nehenehe ta outou e tapa‘opa‘o i te tahi mau tuhaa ta outou e mana‘o ra e, e tauturu te reira ia ratou. A hi‘o i te mau upoo parau o te pene tei papa‘i-faararahi-hia. Te faaite ra te reira i te mau mea faufaa i roto i te reira pene.
-
A faataa eaha te mau tuhaa e faaohipa. I roto i te hoê pene, e rave rahi te mau mea eita e noaa ia outou i te haapii i roto i te hoê noa haapiiraa. A ma’iti ra na roto i te pure i te mau tuhaa ta outou e mana‘o ra e, e tauturu papû te reira i te mau taata ta outou e haapii ra, eiaha râ e tamata i te haapii i te taato‘araa o te reira pene.
-
A faataa e nahea ia haamata i te haapiiraa. No te faatupu i te anaanatae i te haamataraa o te haapiiraa, e nehenehe ta outou e faati‘a i te hoê ohipa tei tupu ia outou, e aore râ, a ani i te mau taata i roto i te piha haapiiraa ia tai‘o i te hoê aamu i roto i te omuaraa o te pene, e aore râ, ia hi‘o i te hoê hoho‘a i roto i te pene. I muri iho, e nehenehe ta outou e ui e, « Eaha ta teie aamu (e aore râ hoho‘a) e haapii nei no ni‘a i te tumu parau o te pene ? » Te vai ra te tahi atu mau rave‘a no te haamata i te hoê haapiiraa mai te tai‘oraa i te hoê papa‘iraa mo‘a, e aore râ, te hoê faahitiraa parau no roto mai i te pene, e aore râ, te himeneraa i te hoê himene. Te tahi atu â mana‘o tauturu, o te vaihoraa ïa i te mau taata ia ite eaha te mau tuhaa rarahi o te haapiiraa.
-
A faataa na e nahea ia faaitoito i te aparauraa. Teie te tuhaa e ti‘a ia outou ia horo‘a i te rahiraa o te taime o te haapiiraa. A hi‘o i te mau mana‘o tauturu no ni‘a i te arata‘iraa i te mau aparauraa maitai i roto i te mau api ix–x o teie buka. E nehenehe ta outou e faaohipa i te mau uiraa no roto i « Te mau mana‘o tauturu no te Tuapaparaa e te Haapiiraa » i te pae hopea o te pene. E nehenehe ta outou e faaineine ato‘a i ta outou iho mau uiraa. A ui i te mau uiraa o te tauturu i te feia ta outou e haapii nei:
-
A imi i te mea e haapiihia ra. Na teie huru uiraa e tauturu i te taata ia ite e ia mataro i te mau haamaramaramaraa taa ê i roto i te mau haapiiraa a te peresideni Kimball. Ei hi‘oraa, ia oti ana‘e outou i te ma’iti i te hoê faahitiraa parau papû maitai, e nehenehe ta outou e ui e, « Eaha te tahi mau parau e aore râ, te tahi mau irava parau faufaa i roto i teie faahitiraa parau ? » e aore râ, « Eaha te parau tumu o teie faahitiraa parau ? »
-
A feruri i te auraa o te parau. Na teie huru uiraa e tauturu i te taata ia rahi atu to’na haro‘aro‘araa i te mau haapiiraa a te peresideni Kimball. Ei hi‘oraa, « I to outou mana‘oraa, no te aha e mea faufaa teie haapiiraa ? » e aore râ, « Eaha to outou mana‘o i teie faahitiraa parau ? » e aore râ, « Eaha te auraa o teie haapiiraa no outou ? »
-
A faaite i te tahi mau ohipa tei tupu ia outou. E faaitoito teie mau huru uiraa i te mau taata ia faaau i te mau mea ta te peresideni Kimball i parau, i te hoê mea i roto i to ratou iho mau oraraa. Ei hi‘oraa, « Eaha te tahi mau ohipa tei tupu ia outou e o te tu‘ati i ni‘a i te mau mea ta te peresideni Kimball i parau ? »
-
A faaohipa i te mea tei haapiihia. Na teie mau huru uiraa e tauturu i te mau taata ia feruri i te mau rave‘a e ti‘a ai ia ratou ia ora mai te au i te mau haapiiraa a te peresideni Kimball. Ei hi‘oraa, « Eaha ta te peresideni Kimball e faaitoito nei ia tatou ia rave ? E nahea tatou ia faaohipa i te mea ta’na i parau ? »
-
-
A faataa e nahea ia opani i te haapiiraa. E nehenehe ta outou e haapoto vitiviti noa i te haapiiraa e aore râ, e ani i te hoê e aore râ, e piti taata ia rave mai i te reira ohipa. Na roto i te faaururaa a te Varua, a faaite papû i to outou iteraa no ni‘a i te mau haapiiraa ta outou i tuatapapa iho nei. E nehenehe ato‘a ta outou e titau manihini i te tahi atu mau taata ia faaite i to ratou iteraa papû. A faaitoito i te mau taata ta outou e haapii nei ia pee i te mau muhumuhuraa tei fariihia e ratou mai roto mai i te Varua Maitai.
A faaineine ai outou i te haapii, e nehenehe ta outou e imi i te mau mana‘o i roto i Te haapiiraa Aore e Piiraa Teitei Atu (36123), tuhaa B, te mau pene 14, 16, 28, e te 29; e aore râ, i roto i te Te Buka Arata‘i no te Haapiiraa (34595).
A arata‘i i te mau aparauraa maitai
E nehenehe te mau arata‘iraa i muri nei e tauturu ia outou ia faaitoito e ia arata‘i i te mau aparauraa maitai:
-
A titau i te arata‘iraa a te Varua Maitai. E nehenehe ta’na e faaue mai ia outou ia ui i te tahi mau uiraa, e aore râ, ia faaô mai i te tahi mau taata i roto i te aparauraa.
-
A tauturu i te mau taata ia faatumu te mana‘o i ni‘a i te mau haapiiraa a te peresideni Kimball. A ani ia ratou ia tai‘o i ta’na mau parau no te faatupu i te aparauraa e no te pahono i te mau uiraa. A faatitiaifaro i te mau aparauraa o te haamata ra i te hahi ê i te parau tumu, e aore râ, te mau aparauraa tohutohu mana‘o, e aore râ, te mau marôraa.
-
Mai te mea e, e ti‘a, a faaite i te mau ohipa tei tupu ia outou o te tu‘ati atu i te mau haapiiraa i roto i te pene.
-
A faaitoito i te mau taata ia faaite mai i te tahi mau mana‘o to ratou, ia ui i te mau uiraa, e ia haapii te tahi i te tahi (a hi‘o PH&PF 88:122). Ei hi‘oraa, e nehenehe ta outou e ani ia ratou ia faaite mai i to ratou mana‘o no ni‘a i te parau ta vetahi ê atu i parau, e aore râ, e nehenehe ta outou e horo‘a i te hoê uiraa i te mau taata e rave rahi.
-
Eiaha e haape‘ape‘a ia vai muhu ore noa te taata i muri a‘e i to outou uiraa i te hoê uiraa. E mea pinepine te taata i te titau i te taime no te feruri e aore râ no te hi‘o i roto i ta ratou buka hou a faaite mai ai i to ratou mau mana‘o, to ratou iteraa papû, e te mau mea tei tupu i ni‘a ia ratou.
-
A faaroo ma te aau tae mau, e a imi i te rave‘a ia taa maitai outou i te mau mana‘o o te mau taata. A faaite i te mauruuru no ta ratou mau tautooraa ato‘a.
-
Ia faaite mai te mau taata e rave rahi mau mana‘o, a tapa‘o i te reira mau mana‘o i ni‘a i te tabula, e aore râ, a ani i te tahi taata ê atu ia rave i te reira.
-
A imi i te mau rave‘a rau no te faao te mau taata i roto i te aparauraa. Ei hi‘oraa, e nehenehe ta outou e faaaparau ia ratou i roto i te mau pŭpŭ na’ina’i, e aore râ, ia aparau i te taata i piha‘i iho noa ia ratou.
-
A farerei hoê e aore râ, e piti taata na mua roa. A ani ia raua ia haere mai i roto i te piha haapiiraa ma te ineine i te pahono i te hoê o te mau uiraa ta outou i faaineine.
-
Eiaha e opani i te hoê aparauraa maitai no te mea e, te imi ra outou i te rave‘a no te faahope roa i te haapiiraa ta outou i faaineine. Te mea faufaa mau, maori râ, ia ite te mau taata i te faaururaa a te Varua, e ia tupu ratou i te paari i roto i ta ratou fafauraa ia ora i te evanelia.
Haamaramaramaraa no ni‘a i te mau parau tauturu tei faahitihia i roto i teie buka
Te mau haapiiraa a te peresideni Kimball i roto i teie buka, e mau faahitiraa parau ïa no roto mai i te mau papa‘iraa e rave rahi. Ua tape‘a-noa-hia mai i roto i teie nei mau faahitiraa parau te mau faatomaraa, te papa‘iraa, te reta papa‘i rarahi e te paratarafa, mai te au i to ratou papa‘i-matamua-raahia, maori râ, te tahi noa mau tauiraa no te nene‘iraa i titauhia no te haamaitai i te tai‘oraa. No reira, e ite outou i te tahi mau tauiraa ha‘iha‘i roa i roto i te mau faahitiraa parau.
Teie ato‘a te tahi, e mea pinepine te peresideni Kimball i te faaohipa i te mau parau ra, te mau taata, te taata, e aore râ, te taata nei, no te faahiti i te parau no te mau taata ato‘a, te tane e te vahine. Mea pinepine oia i te faaohipa i te parau ra, oia, no na apeni e piti. E ohipa matarohia te reira i roto i te reo no to’na ra tau. Noa’tu râ te mau taa-ê-raa i rotopu i te reira mau faahitiraa parau e i te faahitiraa parau matarohia i teie tau, no te vahine e te tane paato‘a te haapiiraa a te peresideni Kimball.