Pene 22

Te heheuraa: « Te hoê pehe tamau e te hoê piiraa u‘ana »

Te heheuraa tamau o te ora ïa o te evanelia a Iesu Mesia.

No roto mai i te oraraa o Spencer W. Kimball

I te hoê taime ua parauparau te peresideni Spencer W. Kimball i roto i te hoê farereiraa e te mau papa‘i ve‘a i te Fare mata‘ita‘iraa no te hiero no Arizona. Ua ani atu te hoê papa‘i ve‘a ia’na: « Ua faaitehia ia matou e o oe te peresideni no te Ekalesia a Iesu Mesia i te Feia Mo‘a i te mau Mahana Hopea nei e e peropheta ato‘a oe. Teie ta‘u uiraa: « Te parauparau râ anei te Atua ia oe ? Mai te mea te na reira nei oia, e mea nahea ïa ? » Ua pahono atu te peresideni Kimball i te na ô raa e: « Oia mau. E parauparau te Atua i ta’na mau peropheta i teie nei mahana, mai ta’na i parauparau i ta’na mau peropheta i nanahi ra e mai ta’na e parauparau atu ia ratou ananahi. Te haamana‘o nei outou eaha ta Amosa i papa‘i, ‘Aita a te Fatu ra a Iehova e peu i rave, maori râ ia faaite i ta’na parau i moe i tana ra mau tavini i te mau peropheta.’ (Amosa 3:7). I te tahi mau taime e parauparau oia na roto i te hoê reo e faaroohia. I te tahi mau taime e tono oia i ta’na mau melahi, mai ta’na i rave ia Iosepha, te metua hoovai tane o Iesu. I te rahiraa o te taime e mea na roto ïa i te reo iti ha‘iha‘i o te Atua i te varua i roto i te taata. Oia ïa. Ua pahono anei au i ta oe uiraa, e teie nei taure‘are‘a ? » ¹

Ua ti‘aturi te peresideni Kimball i te ture no te heheuraa tamau, ma te parauraa e « o te toto iho no te evanelia no te Fatu ora e te Faaora, Iesu Mesia.² Ua parau o Elder Neal A. Maxwell no te Tino Ahuru ma Piti Aposetolo e » teie ti‘aturiraa, o te hoê ïa tuhaa no te huru o teie nei taata taaê mau ».³ Ua amo maitai te peresideni Kimball i ta’na hopoi‘a ei peresideni no te Ekalesia, ma te ite e e oia ana‘e te taata i ni‘a i te fenua nei o tei faati‘ahia no te farii i te heheuraa no te Ekalesia. Ua faaite papû oia e: « Ua ite au e ua pii te Fatu ia‘u i teie nei ti‘araa. Ua ite au e te vai nei te mau peropheta rahi atu â paha ia‘u, te hinaaro nei râ vau e rave i te mau mea ato‘a e nehenehe ia‘u ia rave no te faahaere te ohipa a te Fatu i mua mai ta’na e hinaaro ia ravehia. I te mau pô e i te mau poi’poi’ ato‘a te tuturi nei au e te pure nei au ma te aau tae rahi mau e ia faauru mai te Fatu ia‘u e ia heheu mai oia ia‘u te arata‘iraa e ti‘a ia‘u ia haere ti‘atu e te mea e ti‘a ia‘u ia parau atu i te mau taata no teie nei Ekalesia ».⁴

Na roto i ta’na taviniraa ei peresideni no te Ekalesia, ua farii oia i te mau heheuraa no te arata‘i i te Feia Mo‘a. Ua tae mai te heheuraa matau maitaihia o teie nei mau heheuraa i te ava‘e no tiunu 1978, i te taime a heheu ai te Fatu ia’na e i to’na ato‘a mau taea‘e i roto i te Peresideniraa Matamua e o te Tino Ahuru ma Piti Aposetolo e e nehenehe te mau haamaitairaa no te autahu‘araa tei rahuihia no vetahi, e noaa i te mau melo ti‘amâ ato‘a o te Ekalesia (a hi‘o i te Parau Haapiiraa e te mau Parau Fafau, te Faaiteraa Mana 2). Ua tae mai teie nei heheuraa i muri a‘e i te mau matahiti e rave rahi to te tahi atu mau peresideni no te Ekalesia feruri hohonuraa e pureraa noa ni‘a i teie nei tumu parau.

Aita te peresideni Kimball i parauparau maoro no ni‘a i teie nei heheuraa i mua i te taata. Ua horo‘a râ oia i te tahi na faahitiraa parau poto no to’na faaineineraa ia’na iho ia farii i te reira, e i te tahi mau taime ua faaite oia i to’na mau mana‘o no ni‘a i te reira ohipa tei tupu:

« Ua ite au e te vai nei i mua ia matou te tahi mea tei hau roa i te faufaa no te mau tamarii a te Atua e rave rahi. Ua ite au e e nehenehe ta tatou e farii i te mau heheuraa a te Fatu na roto ana‘e i te riroraa ei mea parau-ti‘a e te ineine no ratou e te ineine no te farii i te reira mau heheuraa e te faanahonahoraa i te reira. I te mau mahana ato‘a ua haere au o vau ana‘e e ma te hanahana e ma te haapa‘o maitai i roto i te mau piha teitei no te hiero, e i reira ua pûpû atu i to‘u aau e ta‘u mau tautooraa no te faahaere i teie faanahonahoraa i mua. Ua hinaaro vau i te rave i te mea ta’na i hinaaro. Ua parauparau atu vau i te reira mea ia’na i te na ô raa’tu e, ‘E te Fatu, te hinaaro nei au i te rave noa i te mea ti‘a. Aita matou e rave nei i te mau opuaraa no te haere i mua ia ite rahi mai te taata. Te hinaaro noa nei matou i te mea ta oe e hinaaro, e te hinaaro nei matou i te reira i te taime e hinaaro ai oe eiha râ na mua‘e.’ ⁵

O matou i teie nei mahana tei paturuhia e outou ei mau peropheta, ei mau hi‘o e e mau heheu parau, ua ite ïa matou i te tau mahanahana no te matahiti 1978 mai te mau taea‘e i mutaa ihora a tae mai ai te heheuraa e ‘ei feia a’ia ato‘a te Etene… e ia noaa ato‘a tei parauhia mai e ana i te Mesia, i te evanelia nei’ (Ephesia 3:6). Ua parau o Paulo e, teie te hoê mea ‘tei ore i faaitehia i te taata i te mau ui i mutaa ihora, mai tei faaitehia mai e te Varua i teie nei, i te mau aposetolo mo‘a e te mau peropheta na’na ra’ (Ephesia 3:5).

« Ua farii matou i te ohipa hanahana no to te Fatu faaite maramaramaraa mai e ua tae i te taime e nehenehe ai i te mau tane e te mau vahine parau-ti‘a ato‘a i te mau vahi ato‘a ia riro ei feia a’ia e ei feia e noaa ia ratou te mau haamaitairaa hope roa o te evanelia. Te hinaaro nei au e ia ite outou, e na ni‘a i to‘u ti‘araa ei ite taaê no te Faaora, i te huru o to‘u fatataraa’tu ia’na e i to tatou Metua i te ao ra a haere ai au e rave rahi mau taime i te mau piha teitei i roto i te hiero, e to‘u haereraa o vau ana‘e i te mau taime e rave rahi i te tahi mau mahana. Ua faaite maramarama mai te Fatu ia‘u eaha te mea e ti‘a ia rave. Aita matou e tutava nei i te mau taata no te ao nei ia taa i taua mau mea ra, no te mea e mea ‘oi‘oi ratou i te faataa mai i to ratou iho mau mana‘o aore râ ia haafaufaa ore i te rave‘a hanahana no te heheuraa.⁶

Taa ê noa’tu i te faaiteraa e te arata‘i nei te heheuraa i te mau faaotiraa a te feia faatere o te Ekalesia, ua haapii te peresideni Kimball e e nehenehe ta tatou paato‘a e farii i te heheuraa no te arata‘i i to tatou mau oraraa e no te haapuai ia tatou i roto i ta tatou mau hopoi‘a. Ua parau oia e, « Te haamaitairaa no te heheuraa o te haamaitairaa ïa e ti‘a i te taato‘araa ia imi ».⁷

Te mau haapiiraa a Spencer W. Kimball

Ua ineine te Atua te Metua e Iesu Mesia i te parauparau i te taata nei

Ua parau te tahi taata e te ora nei tatou i te hoê tau i reira te Atua, mai te mea te vai nei te hoê Atua, i ma‘iti ai i te faaea mamû noa, te parau nei râ te Ekalesia a Iesu Mesia i te Feia Mo‘a i te mau Mahana Hopea nei i to te ao nei e aita te Metua aore râ te Tamaiti i faaea mamû noa. Te faaroohia nei to raua reo e te parauparau maite mai nei raua mai tei titauhia, e te faaite tamau mai nei raua i te hoê hinaaro, oia mau i te anaanatae rahi ia vai noa te aparauraa i rotopu ia raua e te mau taata.⁸

Ua faaite te hoê aivanaa i te pae faaroo e eita roa e noaa i te taata ia imi aore râ ia ite i te Atua. Ua au te reira mai te parau ra: « Aita roa vau i pa‘uma noa‘e i ni‘a i te Mou‘a Ararata–aita roa e nehenehe i te hoê taata ia pa‘uma i ni‘a i te mou‘a Ararata; aore râ, aita roa‘e au i hopu i roto i te mau pape mahanahana e te mâ no te moana Ateriatika–aore e moana Ateriatika e vai nei; aore râ, aita roa vau i ite noa‘e i te mau animala oviri i roto i te Aua no Kruger—aita roa e Aua no Kruger e vai nei; aore râ, e tino maitai noa to‘u–no reira, te mauiui ta te mau taata e faahiti ra, e ohipa noa ïa no to ratou mau feruriraa. Aita roa‘e vau i tere atura i roto i te aore, no reira aita roa e taata e nehenehe e tere vitiviti atu na roto i te aore ».

Eaha ïa te taa-ê-raa ia parau e aita roa‘e vau i faaroo aore râ i ite i te Atua—no reira, aita roa‘e te taata i ite aore râ i faaroo i te Atua aore râ i haere na muri Ia’na. Auê ïa te‘ote‘o e te faaahaaha no te hoê taata ia parau e eita te Atua e noaa i te taata ia fatata atu, ia haroaroahia, ia itehia, ia faaroohia no te mea aita taua taata ra i faaineine ia’na iho no te ohipa o te tupu mai.⁹

E ti‘a ia haamana‘ohia e eita roa te Atua e nehenehe i te itehia na roto ana‘e i te maimiraa, aita ato‘a ta’na evanelia e taahia e e mauruuruhia na roto noa i te tuatapaparaa, no te mea aore roa te hoê i ite i te Metua aore râ i te Tamaiti maori râ « o ta te Tamaiti i hinaaro i te faaite atu » (Luka 10:22).. E ite te taata e feââ i te hoê mahana i roto i to’na oto i ô nei anei aore râ i roto i te oraraa a muri atu e ua faaere to’na te‘ote‘o ia’na i te rahiraa oaoa e te tupuraa.¹⁰

Te oaoa nei tatou no to tatou iteraa e te Atua no teie nei ao e Atua ïa no te heheuraa. Te faaite mai nei to tatou Fatu i to’na mana‘o e to’na hinaaro i ta’na mau tamarii i ni‘a i te fenua nei. Mai te mea e imi tatou i te reira, e heheu rahi mai oia ia’na iho e i roto i te îraa, e e taa ia tatou i to’na huru e e noaa ho‘i i te taata tahuti nei ia taa i te huru o te Atua. Eita e nehenehe ia tatou ia haamori i te hoê ohipa ta tatou iho i hamani aore râ te mau mana‘o no to tatou mau feruriraa. Te haamori nei tatou i te hoê taata o te ora nei, tei hamani, tei faaite mai ia tatou to’na huru taata e to’na mau maitai e te hanahana o to’na ra huru.¹¹

Eita roa te Metua Elohima e te Tamaiti Iehova e faatea ia raua i te mau tamarii a te taata. O te taata ra o te faatea ê atu ia ratou iho. E oaoa te Metua e te Tamaiti i te parauparau e te amui atu i te taata…

… Noa’tu te mau atua ato‘a ta te taata e hamani nei no ratou iho e te arepurepu e tupu nei i roto i te reira, te parahi nei te Atua Ora Mau i roto i to’na ra‘i e e noaahia oia e ta’na mau tamarii.¹²

E mea faahiahia paha te tahi mau heheuraa i te pae no te mata, te rahiraa râ o te mau heheuraa e tae mai ïa mai te huru o te mau faaiteraa hohonu i te feruriraa e i te aau.

I to tatou nei tau, mai mutaa ihora, e rave rahi mau taata e mana‘o nei e mai te mea te vai nei te heheuraa e tae mai ïa te reira na roto i te faaiteiteraa e faatupu i te maereraa rahi, e te aueueraa fenua. E mea fifi no te mau taata e rave rahi ia farii ei heheuraa taua mau heheuraa e rave rahi i te tau o Mose, i te tau o Iosepha, e i to tatou iho nei tau—taua mau heheuraa tei tae mai i te mau peropheta mai te mau faaiteraa hohonu o te ore roa e noaa i te faahapahia o te noho mai i roto i te feruriraa e te aau o te peropheta mai te hupe no te ra‘i maira aore râ a puhara atu ai te tatai-ao i te pouri o te ru‘i.

No to’na tia‘iraa i te ohipa faahiahia i to te mata, eita paha te taata e ite maite i te taheraa tamau no te heheuraa. Te parau nei au i te reira, ma te haehaa mau, e na roto ato‘a i te mana e te puai o te hoê iteraa papû e ama ra i roto i to‘u nei aau, e mai te peropheta no te faaho‘i-faahou-raa mai e tae roa mai i te peropheta no to tatou nei tau, ua vai noa te reni parauparauraa ma te mutu ore, ua tamau noa te mana, te tamau noa ra te hoê mori purapura e te hohonu i te anaana. Te reo o te Fatu o te hoê ïa pehe tamau navenave e te hoê piiraa u‘ana.¹³

E ere te heheuraa mai « te haereraa i piha‘i iho i te Atua », i te mau taime ato‘a, aore râ, « mata e mata,», aore râ « te utu i te tari‘a ». E rave rahi huru heheuraa–te tahi e mea faahiahia roa e te tahi e ere i te mea faahiahia i te mata.¹⁴

E tae mai te tahi mau heheuraa na roto i te mau moemoea. Te rahiraa o to tatou mau moemoea e mea maamaa e aita e auraa, te faaohipa nei râ te Fatu i te mau moemoea no te haamaramarama i to’na nunaa… Ua moemoeahia o Nebukanesa (A hi‘o Daniela 2). E moemoea puai tei mo‘ehia ia’na, ua haere mai râ Daniela e ua faahaamana‘o oia i te arii ta’na moemoea e ua horo‘a i te tatararaa. Ua faaite te Fatu ia Daniela te auraa no te moemoea no te hoê tumu taaê maitai.

Te vai nei te orama a Petero e i roto i te reira i ite ai oia i te hoê tapo‘i ahu i te pouraa mai te ra‘i mai tei î i te mau huru animala e te mau puaa ato‘a, e e auraa taaê maitai to te reira orama (A hi‘o Te Ohipa 10:9–35).

Ua farii ato‘a o Paulo na roto i ta’na ohipa rahi i te hoê â huru heheuraa na roto i te hoê orama. « Itea maira te hoê orama ia Paulo i te rui » (Te Ohipa 16:9)…

Te vai nei te tahi atu mau heheuraa faahiahia no te mata tei faahitihia. Te vai nei te taeraa mai o Moroni, te hoê taata, te hoê taata tei tiafaahou mai, no te faaho‘i mai i te buka faahiahia a te feia tahito no Amerika e te faaho‘i-faahou-raa mai te evanelia…

I muri iho ua haere mai o Ioane Bapetizo tei tapûhia te upoo e te arii i roto i te hoê taime paruparu… [i muri iho] o Petero, Iakobo e Ioane… E no reira ua tae mai, ma te hoê taahiraa i muri mai i te hoê taahiraa, te hoê faaho‘i-faahou-raa mai o te mau mea ato‘a, e ua tae mai te reira na roto i te heheuraa, na roto i te orama, na roto i te mau moemoea, aore râ na roto i te faaiteraa hohonu.

I teie nei, aita te taato‘araa o te mau heheuraa i roto i te mau papa‘iraa mo‘a i tae mai na roto i te mau faaiteiteraa faahiahia no te mata. Ia tai‘o outou i te Faufaa Tahito, e ite ïa outou e parauparau mai te Fatu. Ua parauparau oia ia Isaia, ia Ieremia e i te tahi atu mau taata, e ere râ taua mau faaiteiteraa i te mau farereiraa taata i te mau taime ato‘a. E mai te ohipa i tupu ia Enosa, ia tai‘o ana‘e outou i roto i te buka a Enosa i roto i te Buka a Moromona, ua haapae na oia i te maa e ua pure na oia e ua ani oia no te tahi haamaramaramaraa e ia faaorehia ta’na mau hara: « `Te na reira ra vau i te pure u‘ana’tu i roto i te Varua Maitai, inaha, tae faahou maira te reo o te Fatu i roto i tau nei aau, o tei na ô maira: » (Enosa 1:10). E rave rahi roa mau heheuraa tei tae mai mai te reira te huru.

No reira ua tae mai te heheuraa: i te tahi mau taime na roto i te fâraa mai te mau ve‘a no te ra‘i mai… Te rahiraa râ o te mau heheuraa a te peropheta Iosepha Semita i roto i ta’na buka mo‘a, te Parau Haapiiraa e te mau Parau Fafau, aita ïa i tae mai mai te reira te huru. Ua tae mai ratou na roto i te mau faaiteraa hohonu.¹⁵

Te rahiraa o te mau heheuraa tei tapa‘ohia i roto i te Parau Haapiiraa e te mau Parau Fafau e i roto i te Bibilia e mau mana‘o hohonu ïa e te iteraa faahiahia i te arata‘iraa no ni‘a mai. Teie te huru o te heheuraa ta te mau taata e farii pinepine nei no to ratou iho mau hinaaro.¹⁶

Aita tatou e ite nei i te tahi mau taime i te mau [heheuraa] ia tae mai ana‘e ratou. Te pure nei e te pure nei e te pure nei tatou no te paari e te mana‘o papû e i muri iho e au ra te mana‘o nei tatou e e ti‘a ia tatou ia haere na teie haere‘a taaê. E heheuraa te reira. Te pahono nei te Fatu i teie nei mau uiraa ta outou e tuu atu i mua ia’na.¹⁷

Eaha râ ïa te reo ta te Fatu e faaohipa ? Na roto i te peropheta Iosepha Semita, ua a‘o te Fatu ia Olive Kaudere, tei uiui no te hoê pahonoraa i ta’na mau pure:

« Oia mau, oia mau, te parau atu nei au ia oe, mai te mea ua hinaaro oe i te tahi atu â ite, a faaho‘i i to oe mana‘o i te po ta oe i tiaoro mai ia‘u i roto i to oe aau, ia noaa ia oe te ite i te huru mau o teie nei mau mea.

« Aore anei au i parau faahau i to oe aau no nia i teie nei ohipa ? Eaha atu â te ite hau a‘e i tei no o mai i te Atua ra ? » (PH&PF 6:22–23).¹⁸

E heheu mai te Fatu i To’na hinaaro no te Ekalesia na roto i te mau peropheta ora

No te mau mea ato‘a e ti‘a ia tatou ia mauruuru i teie nei mahana o te mea ïa e ua matara mau te mau ra‘i e ua niuhia te ekalesia a Iesu Mesia tei faaho‘ihia mai i ni‘a i te pãpã o te heheuraa. Ua riro mau te toto no te ora no te evanelia a te Fatu Ora e Faaora, o Iesu Mesia.¹⁹

Te mau buka faufaa rahi e te tao‘a rahi no Amerika i mutaa ihora, e te mau haapiiraa a te Mesia, te tahi atu iteraa no to’na hanahana, o te Buka a Moromona ïa, o ta tatou e parau nei ei papa‘iraa mo‘a, i te hoê â tau o te Bibilia e o te paturu nei i te reira.

Mai te [orama matamua a Iosepha Semita] i te matahiti 1820, ua tamau noa te tahi atu mau papa‘iraa mo‘a i te tae mai, e tae noa’tu i te mau heheuraa faufaa rahi e rave rahi o te tahe noa mai i roto i te hoê reni hopea ore mai te Atua i ta’na mau peropheta i ni‘a i te fenua nei. Ua tapa‘ohia te rahiraa o teie nei mau heheuraa i roto i te tahi atu mau papa‘iraa mo‘a tei piihia te Parau Haapiiraa e te mau Parau Fafau. No te faahoperaa i ta tatou mau papa‘iraa mo‘a a te Feia Mo‘a i te mau Mahana Hopea nei o te Poe Tao‘a Rahi ïa, te tahi atu buka no te heheuraa e te mau papa‘iraa tei iritihia a te mau peropheta tahito e no teie nei anotau.

Te vai nei te feia o te mana‘o nei e e na roto i te neneiraahia teie nei mau buka mo‘a, o « te hopearaa ihoa ïa o te mau peropheta ». Te faaite faahou nei râ matou i to te ao nei e e tamau noa te heheuraa e e te vai nei i roto i te mau vahi vairaa a te Ekalesia teie nei mau heheuraa o te tae mai nei i te mau ava‘e ato‘a e i te mau mahana ato‘a. Te faaite papû ato‘a nei matou e te vai nei, mai te matahiti 1830 a faanahonahohia’i Te Ekalesia a Iesu Mesia i te Feia Mo‘a i te mau Mahana Hopea nei, e e vai noa mai â, e tae noa’tu i te hopea o te mau tau, te hoê peropheta, tei itehia mai e te Atua e to’na nunaa, o te tamau noa i te tatara i te mana‘o e te hinaaro o te Fatu.²⁰

I muri a‘e i te pure e te haapaeraa maa… ia rave-ana‘e-hia te mau faaotiraa faufaa rahi [e te feia faatere o te Ekalesia], ia faatupu-ana‘e-hia te mau misioni e te mau tĭtĭ apî, ia faahaere-ana‘ehia te mau hoho‘a e te mau faatureraa apî, aita te parau apî e tau‘ahia ra e ua mana‘ohia te reira ei mau pereraa noa a te taata. No ratou râ o te parahi nei i roto i te mau pŭpŭ iti e o te faaroo i te mau pure a te peropheta e te iteraa papû o te taata a te Atua haamata no ratou o te ite i te hohonu no ta’na mau faaotiraa e te maramarama no ta’na mau faaotiraa e ta’na mau faahitiraa parau, ua riro mau ihoa oia e peropheta no ratou. No te faaroo ia’na ia faaoti i te mau faanahoraa apî na roto i teie mau huru faahitiraa parau hanahana e « Te mauruuru nei te Fatu », « e mea tano taua tauiraa ra », « Ua parau mai to tatou Metua i te Ao ra », o te iteraa ïa i te mea maitai.²¹

Aita te heheuraa i faaea e e ore roa e faaea. Ua faanahonahohia teie nei Basileia a te Atua no te toe‘a o te taime, eita roa e haamouhia aore râ e horo‘ahia’tu i te tahi atu nunaa. O te hoê faanahoraa tamau e e tupu noa i te rahi e eita e iti mai. Ua haamau-papû-hia ta’na mau haapiraa tumu, e no te tupuraa e te rahiraa, e faati‘ahia te mau rave‘a maitai atu â no te haapii i te evanelia na te ao taato‘a nei. E piihia te tahi atu mau tavini no te haamaraa i te ohipa no te hoê ao rahi a‘e. E ore roa te heheuraa e te tahi atu mau semeio e faaea maori râ ia faaea te faaroo. I te vahi e te vai ra i reira te faaroo au maitai, e tamau noa ïa teie nei mau mea.

Ua faaara te peropheta Moromona e: « E atae ho‘i te huna i te mau parau i heheuhia mai e te Fatu ra, e te na ô mai e, ua oti ta te Fatu heheuraa i te parau, e te raveraa i te ohipa na roto i te tohu, e te mau mea e horo‘a-noa-hia e te Varua ra ! » (3 Nephi 29:6).²²

Te faaite papû atu nei au e te nuu nei te Ekalesia i mua na roto i te mau heheuraa a te Atua i ta’na mau taata faatere tei piihia e te Atua. Tei piha‘i iho te Atua Mana Hope i teie nei nunaa.²³

Ia haapa‘o ana‘e tatou i te mau faaueraa, ia faaohipa ana‘e tatou i te faaroo e ia pure ana‘e tatou ma te aau tae, te faaineine ra ïa tatou ia tatou iho ia faarii i te heheuraa no tatou iho

Te haamaitairaa no te heheuraa o te hoê haamaitairaa ïa e ti‘a ia tatou ia imi maite. E ite te mau tane e te mau vahine parauti‘a e tei ia ratou ra te varua no te heheuraa no te arata‘i i to ratou mau utuafare e no te tauturu ia ratou i roto i ta ratou mau hopoi‘a ê atu. E ti‘a râ ia tatou… ia faaineine no taua heheuraa ra na roto i te faaafaroraa i to tatou mau oraraa e na roto i te haamatauraa’tu i te Fatu na roto i te aparau-pinepine e tamauraa’tu ia’na.²⁴

Eita te Fatu e faahepo i te taata ia farii ia’na; e mai te mea eita ratou e ti‘aturi, eita ïa ratou e farereihia’tu. Mai te mea te oaoa nei ratou i te ti‘aturi i to ratou iho mau numeraraa e tatararaa, e vaiiho ïa te Fatu ia ratou i te oraraa ta ratou iho i ma‘iti…

… Te vai noa nei â i teie nei mahana te heheuraa, te mau orama, te faaoraraa i te ma‘i, te iritiraa i te mau reo ĕê mai i roto i te tahi atu mau tau, mai te mea te vai ra te faaroo i titauhia.²⁵

Tei piha‘i iho te Atua Mana Hope i teie nei nunaa. E farii tatou i te taato‘araa o te mau heheuraa e hinaarohia e tatou mai te mea e rave tatou i ta tatou ohipa e e haapa‘o tatou i te mau faaueraa a te Atua…

A haamana‘o:

Mai te mea te vai nei te mata no te hi‘o, e vai mai ïa te mau orama no te faauru.

Mai te mea te vai nei te mau tari‘a no te faaroo, e vai mai ïa te mau heheuraa no te faaohipa.

Mai te mea te vai nei te mau aau o te nehenehe e taa, a ite i teie: e eita te mau parau mau teitei no te evanelia a Iesu Mesia e vai huna noahia e e vai mo‘emo‘e noa, e e nehenehe i te mau taata e imi mau nei i te parau mau e ite i te Atua e ta’na opuaraa.²⁶

I muri a‘e i to’na horo‘araa ia ratou i to ratou ti‘amâraa, ua taparu e ua arata‘i to ratou Metua i te Ao ra i ta’na mau tamarii e te tia‘i nei râ oia i ta ratou piiraa, ta ratou mau pure, e to ratou haafatataraa’tu ia ratou ia’na ra ma te aau tae…

E hinaaro rahi to te Fatu i te ite i to ratou mau hinaaro araara e te haamataraa o ta ratou mau tutavaraa ia tomo atu i roto i te pouri. I muri a‘e i to’na horo‘araa i te ti‘amâraa no ta ratou faaotiraa, e ti‘a ia’na ia faati‘a i te taata ia imi i to’na e‘a e tae noa’tu i te taime e tapae ai oia i te maramarama. Ia haamata ana‘e râ te taata i te poia, ia haamata ana‘e to’na rima i te toro atu, ia haamata ana‘e to’na mau turi ava‘e i te tuturi e ia papû to’na reo, i reira ana‘e to tatou Fatu e tura‘i ai i te paerai, e huti ai i te paruru, e e faati‘a ai i te mau taata ia haere mai roto atu i te papû oreraa i roto i te papûraa mau, i roto i te maramarama o te ra‘i.²⁷

Mai te mea e ti‘a mai te hoê taata ma te faahiti noa i te mau parau, e ti‘a ïa ia’na ia tuturi faahou i raro i ni‘a i to’na mau turi avae e ia faaea noa i raro e tae noa’tu i te taime ua haamau oia i te aparauraa i rotopu ia’na e te Fatu o te hinaaro mau nei i te haamaitai, e no te mea ua horo‘a oia i te taata to’na ti‘amâraa, eita ïa oia e faahepo i taua taata ra ia faarii atu ia’na.²⁸

Te hinaaro ra anei outou i te arata‘iraa ? Ua pure anei outou i te Fatu no te faaururaa ? Te hinaaro ra anei outou i te rave i te ohipa ti‘a aore râ te hinaaro nei outou i te rave i te mea noa’tu e ere i te mea ti‘a ? Te hinaaro ra anei outou i te rave i te mea maitai roa‘e no outou i te hopearaa aore râ i te mea au roa no teie noa taime ? Ua pure anei outou ? Eaha te rahiraa o ta outou pure ? Nahea to outou pureraa ? Ua pure anei outou mai ta te Faaora o te Ao nei i pure i Gesetemane aore râ ua ani outou i te mea ta outou i hinaaro ma te feruri ore e mai te mea e mea tano anei ? Te parau ra anei outou i roto i ta outou mau pure: « Ia haapa‘ohia to oe hinaaro » ? Ua parau anei oe, « E te Metua i te Ao ra, mai te mea e faauru e e faaite mai oe ia‘u i te mea ti‘a, e rave ïa vau i te ohipa ti‘a » ? Aore râ ua pure outou, « A horo‘a mai i te mea ta‘u e hinaaro nei mai te mea aita e rave ihoa vau i te reira » ? Ua parau anei outou: « E te Metua i te Ao ra, te here nei au ia oe, te ti‘aturi nei au ia oe, ua ite au e ua ite oe i te mau mea ato‘a. E taata parauti‘a vau. Te hinaaro mau nei au i te rave i te ohipa ti‘a. Ua ite au e e nehenehe ta oe e ite i te hopea mai te haamataraa mai. E nehenehe ta oe e ite i te mau mea i mua. E nehenehe ta oe e ite e mai te mea i roto i to‘u huru oraraa i teie nei mahana, e farii anei au i te hau aore râ te pe‘ape‘a, te oaoa aore râ te oto, te manuiaraa aore râ te topatariraa. A faaite mai na e te Metua i te Ao ra tei herehia, e e fafau vau ia rave i te mea ta oe e parau mai ia‘u ia rave ». Ua pure anei outou mai te reira te huru ? Aita anei outou i feruri e te vai ra te paari i roto i te reira ? Ua nava‘i anei to outou itoito i te pureraa i taua pure ra ? ²⁹

E horo‘a atu te Fatu ia outou te pahonoraa i ta outou mau uiraa e i ta outou mau pure mai te mea e faaroo outou. Aita te reira pahonoraa i titauhia ia tae mai na roto i te peropheta… E nehenehe i te mau taata ato‘a ia farii i te mau heheuraa mai te mea ua nava‘i to ratou parau-ti‘a e ua nava‘i to ratou piriraa’tu i te Fatu.³⁰

Te mau Mana‘o no te Tuatapaparaa e te Haapiiraa

A feruri i teie nei mau mana‘o a tuatapapa‘i outou i te pene aore râ a faaineine ai outou i te haapii. No te tahi atu tautururaa, a hi‘o i te mau api v–xi.

A tai‘o i te aamu o te peresideni Kimball i to’na fariiraa i te heheuraa i te matahiti 1978 no ni‘a i te autahu‘araa (te mau api 286–87). Noa’tu e e mea taaê roa te tahi mau tuhaa no te aamu o te peresideni Kimball no taua heheuraa ra, eaha te tahi mau hi‘oraa no te ohipa i tupu ia’na tei au ato‘a i ta tatou ato‘a mau tautooraa ia farii i te heheuraa ? Nahea ta tatou e nehenehe ai e pee i to’na hi‘oraa ?
A tai‘o i te tuhaa e haamata i te api 288. Eaha ïa ta outou e parau atu i te hoê hoa o te parau e ua faaea mamû noa te Atua ? Eaha te mau papa‘iraa mo‘a aore râ te mau ohipa i tupu ta outou e nehenehe e faaite atu no te tauturu i to outou hoa ?
Eaha te tahi o te mau rave‘a e nehenehe ai te heheuraa e tae mai ? (No te tahi mau hi‘oraa, a hi‘o i te mau api 289–92).Ua haapii te peresideni Kimball e e tae mai te rahiraa o te mau heheuraa mai te huru o te mau faaiteraa hohonu eiaha râ na roto i te mau faaiteiteraa faahiahia no te mata. Nahea ta tatou e nehenehe ai ia ite mai te mea no ô mai i te Fatu te hoê feruriraa aore râ te hoê mana‘o ? (A hi‘o i te api 293).
No teaha tatou e hinaaro ai i te mau peropheta ora taaê noa’tu i te mau papa‘iraa mo‘a ? (No te tahi mau hi‘oraa, a hi‘o i te mau api 293–94). Nahea to outou haamaitairaahia na roto i te mau heheuraa i horo‘ahia i te peresideni o te Ekalesia ?
Eaha te a‘o ta outou e horo‘a i te tahi taata o te imi nei i te arata‘iraa no ô mai i te Fatu ra ? (A hi‘o i te mau api 295–97).

Te mau papa‘iraa mo‘a: Te mau Arii I 19:9–12; Moroni 10:3–5; PH&PF 1:38; 8:2–3; 43:1–4; 76:5–10