Pene 24

Te faaiteraa i te Evanelia

E ti‘a ia tatou ia haaro‘aro‘a to tatou taahiraa avae no te faaite te evanelia ia vetahi ê.

No roto mai i te oraraa o Spencer W. Kimball

I roto i te hoê tere i Quito, Ecuador, e melo oia no te Tino Ahuru ma Piti Aposetolo, tei roto o Elder Spencer W. Kimball i te fare tamaaraa no te hotera e te hoê pûpû e maha misionare apî. « Ua parau oia i te tahi atu mau taata e taure‘are‘a haviti mau to ratou tu‘ati fare tamaaraa e e riro oia ei hoê misionare maitai no te Ekalesia. Ua ani o Elder Kimball i te faraoa e te û na’na, e ua ani atu i te tu‘ati mai te mea e tamarii anei ta’na i te fare. ‘Hoê tamaiti’, ua pahono maira te tu‘ati. ‘e horo‘a te faraoa e te û ia’na te tino maitai,’ parau atura o Elder Kimball, ‘e mea hau atu to’na tino i te maitai mai te mea e faaamu oe ia’na i te maa ta teie nei feia apî e horo‘a.’ Ua hi‘o maere roa te tu‘ati. I muri iho ua haamaramarama atu o Elder Kimball e teie feia apî e mau misionare ïa o te haapii nei i te evanelia a Iesu Mesia. Ua faaite te tu‘ati i to’na anaanatae ia haapii te mau misionare ia’na ».¹

Ua faahiti pinepine te peresideni Kimball i te faaueraa a te Faaora e ia afa‘ihia’tu te evanelia « e ati noa‘e te mau fenua ato‘a » (Mareko 16:15). Ua ani oia ia rahi atu â te mau misionare rave tamau, te feia apî tane ihoa râ e te mau tane e te mau vahine paari faaipoipohia, e ua faahaamana‘o oia i te mau melo ato‘a o te Ekalesia ia haa i roto i teie nei ohipa tei faataahia e to te ra‘i. Ua haapii oia e « to tatou hinaaro rahi, e to tatou piiraa rahi, o te afa‘iraa atu ïa i to te mau nunaa no teie nei ao te mori hinu no te maramarama no te turama i to ratou haere‘a mai roto atu i te pouri ta‘ota‘o e tae atu i te oaoa, te hau, e te mau haapiiraa mau no te evanelia ».²

Te mau haapiiraa a Spencer W. Kimball

Ua fafau te Fatu ia tatou i te mau haamaitairaa faahiahia ia faaite ana‘e tatou te evanelia

Te vai nei te hoê ohipa maere i te pae varua na roto i te raveraa i te ohipa misionare, na roto i te horo‘araa i te mau i‘oa o te feia e imi nei i te parau mau, na roto i te haereraa’tu na muri i te mau misionare ia horo‘a ana‘e ratou i te mau haapiiraa. E mea faahiahia e te hoona. E hoonahia te mau hora, te mau tautooraa, te maereraa e te mau mea ato‘a ia faaite ana‘e te hoê noa‘e varua i te tatarahapa e te faaroo e te hinaaro ia bapetizohia oia. A feruri na i to outou faahiahiaraa ia parau mai ana‘e ratou e, « Ia haere ana‘e mai outou i ô nei, e ia parauparau tatou no ni‘a i teie nei mau mea, e au ra e te haamana‘o nei au i te mau mea ta‘u i ite na mua’tu », aore râ, « Eita e nehenehe ia outou ia haere ê atu hou outou e parau mai ai ia matou i te mau mea ato‘a ta outou i ite no ni‘a i te Ekalesia tei faaho‘ihia mai ».³

E afa‘i mai te faaiteraa i te evanelia i te hau e te oaoa i roto i to tatou iho mau oraraa, e faarahi i to tatou iho mau aau e te mau varua no vetahi ê, e faarahi i to tatou iho faaroo, e haapuai i to tatou iho auraa e te Fatu, e e faarahi i to tatou iho iteraa no te mau haapiiraa mau o te evanelia.⁴

Ua fafau mai te Fatu ia tatou te mau haamaitairaa rahi mai te au i te huru no to tatou faaiteraa’tu te evanelia ia vetahi ê. E farii tatou i te tautururaa mai te tahi atu pae o te paruru ia tupu ana‘e te mau semeio varua. Ua parau te Fatu ia tatou e e faaore-‘oi‘oihia ta tatou mau hara ia afa‘i ana‘e mai tatou i te Mesia te mau varua e ia vai itoito noa tatou i te faaiteraa i te parau i to te ao nei, e e mea papû te imi nei tatou paato‘a i te tahi atu â tautururaa ia faaorehia ta tatou mau hara (A hi‘o PH&PF 84:61). I roto i te hoê o te mau papa‘iraa mo‘a misionare faahiahia roa‘e, te tuhaa 4 no te Parau Haapiraa e te mau Parau Fafau, ua parauhia tatou e mai te mea e tavini tatou i te Fatu i roto i te ohipa misionare « ma to [tatou] aau ato‘a, to [tatou] puai, to [tatou] mana‘o, to [tatou] itoito », i reira ïa tatou e « tia parau-ti‘a mai ai i mua i te aro o te Atua ia tae i te mahana hopea ra » (irava 2).

E ua parau faahou mai te Fatu e:

« E mai te mea e hope to orua pue mahana i te pororaa i te parau tatarahapa i teie nei mau taata, e ia arata‘i mai orua, i te hoê noa‘e varua taata ia‘u nei, aue ho‘i to orua oaoa rahi i piha‘i iho ia’na i roto i te basileia o to‘u Metua !

« E i teie nei, mai te mea ua rahi to orua oaoa i te varua taata hoe a‘e o tei arata‘ihia mai e orua ia‘u nei i roto i te basileia o to‘u Metua, eaha’tura â ïa te huru o to orua oaoa rahi ia rahi noa’tu â ta orua varua taata e arata‘i mai ia‘u nei ! (PH&PF 18:15-16).

Mai te mea e hope to te hoê taata pue mahana i te raveraa i te ohipa e i te arata‘i mai i te hoê noa‘e varua !Auê ïa oaoa e ! Te hoê noa‘e varua taata ! Auê ïa te faufaa rahi e !Ia horo‘a mai te Atua ia tatou teie huru here no te mau varua taata ! ⁵

Ua horo‘a te Fatu i te mau melo ato‘a o te Ekalesia te hopoi‘a ia tavini ei mau ve‘a Na’na

Ua hinaaro vau e ia haamau maite tatou i roto i te aau o te mau melo ato‘a o te Ekalesia te iteraa e mai te mea ua paari te hoê taata no te riro mai ei melo, ua paari ato‘a ïa oia i te riro ei misionare; aita oia i titauhia ia faataa-taaê-hia no taua piiraa ra. Tei te melo tata‘i tahi ra te titauraa e te piiraa ia afa‘i atu te evanelia i te feia i piha‘i iho ia’na. Te hinaaro nei matou i te mau tane ato‘a, te mau vahine ato‘a, e te mau tamarii ato‘a ia amo i ta ratou hopoi‘a tei faataahia ia ratou. E mea faufaa rahi roa te reira. No te mea teie te parau poro‘i a te evanelia: E farii tatou i te mau haamaitairaa na roto mai i te evanelia, e i muri iho e haere atu tatou e faaite i taua mau haamaitairaa ra ia vetahi ê.

I teie nei, e nunaa ohipa tatou; aita râ te Fatu i parau e, « Mai te mea e au ia oe, e feruri anei oe e poro i te evanelia ». Ua parau mai oia, « A tuu i te mau taata ato‘a ia haapii mai i ta’na iho ohipa » (PH&PF 107:99) e « Inaha… e mea tia roa i te taata ato‘a o tei faaarahia ra ia faaara’tu i to’na ra taata tupu » (PH&PF 88:81).

E ti‘a ia tatou ia haamana‘o e o te Atua to tatou turu i roto i teie nei ohipa. O oia to tatou tauturu. E iriti oia i te e‘a, no te mea ua horo‘a mai oia i te faaueraa.⁶

Aue ïa ohipa faahiahia e, e to‘u mau taea‘e e to‘u mau tuahine here tei riro ei mau hoa melo no te basileia o te Atua, ia ti‘aturihia e te Fatu no te tavini ei mau ve‘a no Ta’na parau i to tatou mau taea‘e e to tatou mau tuahine e ere te melo no te Ekalesia. A mana‘o na tatou no te hoê noa taime poto e ua huri te mau ti‘araa–e e ere outou te hoê melo no te Ekalesia e e to outou râ hoa melo ore i teie nei e Feia Mo‘a ïa oia i te mau Mahana Hopea nei. E hinaaro anei outou e ia faaite mai oia ia outou te evanelia ? E oaoa anei outou i te mau parau mau apî ta outou i haapii mai ? E rahi anei to outou here e to outou faatura no te hoa o tei faaite ia outou i teie nei mau parau mau ? Oia ïa, te pahonoraa i te taato‘araa o teie nei mau uiraa e: E ïa ! ⁷

E te mau taea‘e e te mau tuahine e, te uiui nei au e mai te mea te rave nei tatou i te mau mea ato‘a e nehenehe ia tatou i te rave. Ua rahi roa anei to tatou ti‘aturiraa ia tatou iho i roto i ta tatou ohipa haapiiraa i te evanelia ia vetahi ê ? Ua ineine anei tatou i te haaroaroa i to tatou taahiraa avae ? No te faaano i to tatou orama ? ⁸

Tei teie nei e i ô nei te mahana no te afa‘iraa’tu te evanelia i te tahi atu â mau vahi e te tahi atu â mau taata. E ti‘a ia tatou ia feruri no ni‘a i ta tatou titauraa ia faaite i te parau poro‘i eiaha râ ia haapa‘o noa i te taime e au ai ia tatou. E mea varavara te mau piiraa a te Fatu ia tae mai i te taime au maitai. Tei ô nei râ te taime ia riro ana‘e te tusia ei tuhaa hau atu i te faufaa rahi i roto i te Ekalesia. E ti‘a ia tatou ia faarahi i to tatou paieti ia nehenehe ia tatou ia rave i te ohipa ta te Fatu i horo‘a ia tatou ia rave… Teie te mau parau hopea a te Fatu i Ta’na mau Aposetolo hou noa‘e i to’na Ho‘iraa’tu i te ra‘i,: « E haere outou e ati noa‘e te mau fenua ato‘a, e faaite haere i te evanelia i te taata ato‘a.

« O te faaroo e ua bapetizohia, e ora ïa; area o te ore e faaroo ra, e faahapahia ïa » (Mareko 16:15-16).

Eita e ti‘a ia tatou ia paruparu aore râ ia rohirohi i roto i te ohipa maitai. E ti‘a ia tatou ia haaroaroa i to tatou taahiraa avae. E ere ana‘e to tatou iho maitai mure ore o te fifi, te maitai mure ore ato‘a ra o to tatou mau taea‘e e mau tuahine e rave rahi e ere i te melo i teie nei, no teie Ekalesia mau. Te faahiahia nei au i te mau parau a te peropheta ra Iosepha Semita i roto i te hoê rata ta’na i haapono i to te Ekalesia mai Nauvoo mai i te 6 no tetepa 1842: « E ere anei i te mea tia ia tatou ia haere â i roto i te hoe ohipa rahi roa mai teie te huru ? A haere i mua… A rohi…a haere â, e tae noa’tu i te taime e upooti‘a’i ra ! » (PH&PF 128:22).⁹

E nehenehe ta tatou e tauturu ia vetahi ê ia farii i te evanelia tei faaho‘ihia mai na roto i to tatou hi‘oraa e tautooraa parau-ti‘a

Te ohipa melo-misionare o te taviri ïa no te tupuraa o te Ekalesia i te mau mahana i mua nei.¹⁰

Ua ite au e ua tuu te Fatu na roto i te hoê raveraa ohie i roto i to tatou hoa e te feia ta tatou i matau e rave rahi mau taata tei ineine i te tomo atu i roto i ta’na Ekalesia. Te ani nei matou e ia ite outou na roto i te pure i taua mau taata ra e ia ani i muri iho i te Fatu ia tauturu ia outou ia faaite atu ia ratou te evanelia.¹¹

E mea maramarama maitai ia tatou e e ti‘a ia tatou ia riro ei mau hoa maitai no to tatou mau taata tupu hou e nehenehe ai ia tatou ia faaara au maitai ia ratou. E ti‘a i to tatou mau taata tupu ia ite i to tatou hoaraa mau e to tatou farii maitairaa ia ratou. Te hinaaro nei matou e ia ani te mau melo i te mau taata tupu, eiaha râ e tama‘i aore râ e faari‘ari‘a ia ratou.¹²

E parau mau te evanelia. Na roto i te tuatapaparaa e te oraraa i ta’na mau ture e te imiraa i te tautururaa a te Varua Maitai, e nehenehe i te taata e imi mau nei ia ite no’na iho e e parau mau te reira. Eaha’tu ai ïa i te ohie ia taa e ia farii mai te mea e nehenehe ato‘a i te taata e imi nei i te parau mau ia ite i te faaohiparaa o te mau ture o te evanelia i roto i te oraraa o te tahi atu feia faaroo. Aita’tu e taviniraa rahi atu a‘e e nehenehe e horo‘ahia i te piiraa misionare o teie nei Ekalesia maori râ te riroraa ei hi‘oraa maitai no te mau maitai Keresetiano i roto i to tatou mau oraraa.¹³

Ua riro te mau melo parau-ti‘a, o te ora nei i te evanelia na roto i te hi‘oraa maitai e na roto ato‘a i te haapiiraa ei parau faati‘ani maitai roa‘e no te Ekalesia.

Te mea e ti‘a i te melo tata‘i tahi ia rave, na roto i te hi‘oraa maitai e te faaiteraa i te iteraa papû, o te faaiteraa ïa i te mau melo ore te oaoa no te oraraa e te iteraa i te evanelia e na roto i te reira te afa‘iraa’tu ia ratou i te faito e e farii ai ratou i te haapiiraa mau.¹⁵

Te fâ mau no te pororaa manuia ia rave ïa te mau melo i te maimiraa e ia haapii ïa te mau misionare rave tamau… Ia rave ana‘e te mau melo i te maimiraa e anaanatae ïa ratou i te faahoaraa, e iti mai ïa te feia e imi nei i te parau mau i te mo‘e hou te bapetizoraa, e o ratou tei bapetizohia e faaea itoito noa mai ïa ratou.¹⁶

Ta tatou fâ o te ite-‘oi‘oi-raa ïa i te mau tamarii a to tatou Metua tei ineine i te pae varua no te haere tia’tu i te bapetizoraa i roto i te basileia. Te hoê o te mau rave‘a maitai roa‘e no te ite o te faaite-‘oi‘oi-raa’tu ïa to outou mau hoa, fetii, taata tupu, e te feia ta outou i matau i te mau misionare rave tamau.¹⁷

Te mo‘ehia ra ia tatou i te tahi mau taime e e mea maitai a‘e ia faatupu i te tahi arepurepu i roto i te auraa e te hoê hoa eiaha râ ia faaere ia’na i te ora mure ore ma te faaea mamû noa.¹⁸

Eiaha e tia‘i no te faahoaraa roa e te taime papû e te taime maitai roa ra. Te mea e ti‘a ia outou ia rave o te iteraa ïa mai te mea o ratou tei ma‘itihia. « E faaroo to‘u nei feia i ma‘itihia ra i to‘u re‘o ma te faaetaeta ore i to ratou ra mau aau » (PH&PF 29:7). Mai te mea e faaroo ratou e e matara to ratou aau i te evanelia, e iteahia ihoa i te reira iho taime. Mai te mea aita ratou e faaroo e ua etaeta to ratou mau aau e te ti‘aturi ore e te mau mana‘o pato‘i, aita ïa ratou i ineine. I roto i teie nei huru, a tamau noa ïa i te here ia ratou e i te faahoa ia ratou e a tia‘i i te taime i mua no te ite mai te mea ua ineine ratou. Eita outou e ere i to ratou hoaraa. E e faatura noa â ratou ia outou.

Oia mau, te vai nei te mau taime e paruparu te mana‘o, aita râ hoê a‘e mea e mo‘e. Aita roa te hoê taata e ere i te hoê hoa no te mea noa aita oia e hinaaro i te tamau i te farerei i te mau misionare. E nehenehe te melo e tamau noa te faahoaraa ma te ore e riro e haafifi i to’na hoaraa aore râ te hoaraa taaê e taua utuafare ra. I te tahi mau taime ua titauhia te tahi atu â taime no te tahi mau taata ia haere mai i roto i te Ekalesia hau atu i te tahi atu mau taata. E ti‘a i te melo ia tamau noa i te faahoa e ia tamata faahou i te tahi atu taime no te faafariu. Eiaha e haaparuparu te mana‘o no te hoê noa mauraa o te tereraa o te ohipa. Te vai nei e rave rahi mau hanere aamu no ni‘a i te faufaa no te tape‘a maiteraa i roto i te ohipa misionare.¹⁹

Te vai nei i roto i te ohipa misionare te faahoaraa tamau e te here i te feia faafariu apî-hia e te mau melo paruparu

Ia bapetizo ana‘e tatou i te tahi taata e hara ïa ia vaiiho ia’na ia hee noa’tu i rapae au i te Ekalesia e i rapae au i te evanelia no te mea ua ere oia i te faahoaraa. Te faahoaraa o te hoê ïa hopoi‘a faufaa rahi roa. E ti‘a ia tatou ia faahoa i te mau taata ato‘a e tomo mai nei i roto i te Ekalesia. Tera te tumu ua hinaaro matou i te mau melo ia rave i te ohipa misionare e ia titau i te tautururaa no ô mai i te mau misionare. Te hinaaro nei matou i te mau taata… ia haere atu e rave i teie nei ohipa no te mea e mau taata tupu noa â ratou i muri a‘e i te bapetizoraa o te hoê taata. E nehenehe noa â ia ratou ia faahoa ia ratou, e nehenehe noa â ia ratou ia haere e tii ia ratou e ia afa‘i atu ia ratou i te pureraa autahu‘araa; e nehenehe noa â ia ratou ia faaitoito e ia tauturu ia ratou i roto i ta ratou mau pureraa pô utuafare e te tahi atu mau ohipa.²⁰

Eita e nehenehe ia matou ia ore e haapuai i te hinaaro ia rave i te ohipa misionare i roto i te faanahoraa e e faatitiaifaroraa a te autahu‘araa ia faahoahia te mau taata e imi nei i te parau mau e ia faahaerehia’tu ratou i roto i te mau faanahoraa a te Ekalesia ia nehenehe ia ratou ia itoito ‘oi‘oi mai e ia riro mai ei mau melo haapa‘o maitai. No reira, teie te tahi atu rave‘a e nehenehe ai i te mau melo ato‘a no te Ekalesia ia rave itoito noa e te tamau i te ohipa misionare–na roto i te faahoaraa, te faauraa’tu, te faaitoitoraa i te mau melo apî o te Ekalesia.²¹

E mea faufaa rahi roa ia faataa-vitiviti-hia te feia tei bapetizohia ei mau melo faafariu ei mau taea‘e hahaere o te faahoa ia ratou na roto i te haapa‘o maitairaa’tu ia ratou. E ti‘a i teie nei mau taea‘e hahaere, i raro a‘e i te faatereraa a to ratou taata faatere no te autahu‘araa, ia hi‘o e e horo‘ahia i te mau taata faafariu paari ato‘a te tahi mau ohipa o te faaanaanatae ia ratou e te hoê ato‘a rave‘a e faaitoitoraa no te faarahi i to ratou ite no te evanelia. E ti‘a ia ratou ia tauturuhia i te haamauraa i te mau auraa sotiare e te mau melo no te Ekalesia ia ore ratou e faaea noa o ratou ana‘e a; ai ratou i to ratou oraraa ei Feia Mo‘a itoito i te mau Mahana Hopea nei.²²

E mea anaanatae e e mea oaoa ia hi‘o… i te Feia Mo‘a ia tauahi e ia tauturu e ia pure no te mau taata o te tomo mai nei i roto i te basileia o to tatou ra Fatu i te mau mahana ato‘a. A tamau noa i te haere atu e tauturu te tahi e te tahi—e te tahi atu â mau taata e rave rahi o te tomo mai i roto i te Ekalesia. A farii poupou atu ia ratou e a here e a faahoa atu ia ratou.²³

Ta tatou hopoi‘a ei mau taea‘e e e mau tuahine i roto i te Ekalesia o te tautururaa ïa ia ratou tei mo‘e i te imiraa i to ratou e‘a, e te tautururaa ïa ia ratou tei ere i te tao‘a faufaa rahi ia ite faahou ratou i ta ratou tao‘a rahi. Te haapii maramarama mai nei te mau papa‘iraa mo‘a ia tatou e e titauraa na te melo tata‘i tahi ia haapuai i to’na mau hoa melo.

Na roto i te here e te maramarama ato‘a ua haapapû mai te Faaora i te reira a parau ai oia ia Petero, « E ia faafariuhia mai oe ra, a faaitoito i to mau taea‘e » (Luka 22:32). Te hinaaro nei au e parau ato‘a’tu ia outou e: Ia faafariuhia mai outou ra, a faaitoito i to outou mau taea‘e e mau tuahine. E rave rahi e poia nei, i te tahi mau taime ma te ite ore i te tumu no to ratou poia. Te vai nei te mau parau mau varua e te mau ture o te nehenehe e riro ei niu papû no to ratou mau oraraa, e oraraa paruruhia no to ratou mau varua, e hau no to ratou mau aau e feruriraa mai te mea e faahaere tatou i ta tatou mau pure e to tatou mana‘ona‘oraa ia ratou ra…

Te vai nei paha te tahi o te parau mai e, « Ahani, ua ite matou te hoê tane aore râ te hoê vahine o te ore roa e puta to’na aau ». Oia ïa e nehenehe ia’na ia putapuhia. E nehenehe ia’na ia haamaitaihia e ia tauturuhia ! Teie te fafauraa a te papa‘iraa mo‘a. Te parau nei, « E ore roa te aroha e mou » (1 Korinetia 13:8). E ore roa ! Mai te mea e faaohipa-maoro-hia e ore roa te aroha e ma‘iri i te faatupu i ta’na semeio i roto anei i te taata tata‘i tahi, i roto anei ia tatou, i roto ia taua toopiti, aore râ i roto i te mau taata e haati nei i te taata.

… Te ti‘aturi nei au e aita roa te hoê taata e ore e nehenehe e faafariuhia–e parau paha vau e faaitoito-faahou-hia–mai te mea e rave te taata tano i te raveraa tano i te taime tano na roto i te rave‘a tano e na roto i te varua tano. Ua ite au e e tauturu mai te mau haamaitairaa a to tatou Metua i te Ao ra i ta tatou mau tautooraa mai te mea e faaineine tatou ia tatou iho, e mai te mea e ora tatou i te mau ture no te evanelia ma te oaoa, e mai te mea e imi tatou i te tautururaa a to tatou Metua i te ao ra…

Ia fariu te mau taea‘e hahaere no te pŭpŭ autahu‘araa, te mau tuahine hahaere no te Sotaiete Tauturu, te mau tane e te mau vahine, te mau metua e te mau tamarii, e te mau melo i te mau vahi ato‘a o te here nei i te Fatu e te hinaaro nei i te rave i to’na mana‘o, na roto i te here e te faaururaa e ia rave i te mau ohipa maitai tei titauhia no te tauturu i te feia i roto i te fifi. Eita te mau taime poto no te anaanataeraa e te oaoa rahi e faatupu i te mau fâ i hinaarohia. E nehenehe râ ta tatou mau fâ i hinaarohia e noaahia, e e tae pinepine mai te reira na roto i te rave‘a i ore roa i mana‘ohia e tatou, mai te mea e faarahi tatou na roto i te pure i ta tatou mau tautooraa. Eita te mau haamaitairaa ana‘e a te Fatu e tae mai i roto i to tatou mau oraraa e te mau oraraa o te tahi atu mau taata, e piri atu ato‘a râ tatou i te Fatu e e ite tatou ia parahi ana‘e To’na here e To’na varua.²⁴

E ti‘a i te mau metua ia tauturu i ta ratou mau tamarii ia faaineine no te ohipa misionare rave tamau.

Te hinaaro nei matou ia haere rahi mai â te feia apî no te Ekalesia no te faito matahiti misionare hau atu i te mau numera o teie nei taime ia nehenehe ia ratou ia rave i ta ratou hopoi‘a, ta ratou titauraa e ta ratou haamaitairaa ei mau tavini o te Fatu i roto i te ohipa misionare. Aue ïa to tatou e to ratou puai ia faaineine ana‘e te feia apî tane ato‘a ia ratou no te ohipa a te Fatu ! ²⁵

Ia ani ana‘e vau no te tahi atu â mau misionare, aita vau e ani nei ia rahi atu â te mau misionare aita e iteraa papû aore râ aita i ti‘amâ. Te ani nei au e ia haamata ‘oi‘oi tatou e ia faaineine maitai a‘e tatou i ta tatou mau misionare i roto i te mau amaa ato‘a e te mau paroita ato‘a o te ao nei. Teie te tahi atu titauraa—ia taa maite te feia apî e e haamaitairaa rahi ia haere i te misioni e e ti‘a ia ratou ia maitai i te pae tino, ia maitai i te pae feruriraa, ia maitai i te pae varua, e « aore ho‘i e tia i te Atua ia hi‘o noa’tu i te hara ma te faati‘a e hoê iti a‘e ». [Alama 45:16].

Te ani nei au i te mau misionare o tei haapii maitaihia e tei faaineinehia na roto i te utuafare e te mau faanahonahoraa a te Ekalesia, e o te haere atu i te misioni ma te hinaaro rahi. Te ani nei au… e ia faaineine maitai atu â tatou i te mau feia apî e faaineine nei ei misionare, i to ratou apî-roa-raa ra, roa atu â, ia nehenehe ia ratou tata‘i tahi ia tia‘i i ta’na misioni ma te oaoa rahi.²⁶

E ti‘a ia tatou ia feruri na roto i te mau numera rahi. E ti‘a ia tatou ia faaineine maitai a‘e i ta tatou mau misionare, eiaha noa i te pae o te reo i te pae ato‘a ra o te papa‘iraa mo‘a e i ni‘a’tu i te mau mea ato‘a te hoê iteraa papû e te hoê auahi ura o te tuu i te puai i roto i ta ratou mau parau.²⁷

A tono i ta outou mau tamaroa i te misioni. Te minuti i fanauhia mai ai ratou, e haamata i te haapii ia ratou. E faaroo ratou i ta outou mau pure, i te pô e i te po‘ipo‘i. E faaroo ratou ia outou ia pure i te Fatu no te tauturu ia iriti i te mau uputa no te mau nunaa ato‘a. E faaroo ratou i te parau no te ohipa misionare. E faaroo ratou ia outou ia pure no to outou mau episekopo e to outou mau peresideni misioni e te tahi atu mau taata o te tavini nei ia outou, e e tupu mărû noa’tu ai te reira mau mea i roto ia ratou.²⁸

Fatata i te mau taime ato‘a e ite au i te hoê tamarii rii tamaroa, e parau vau, « E riro oe e misionare faahiahia, e ere anei ? » E tanu outou i roto i to’na feruriraa te hoê huero. Mai te tanuraa i te mau raau hotu e te tahi atu mau tumu raau. E tupu te reira e e tupu noa, e mai te mea e parauparau te hoê metua tane e te hoê metua vahine i ta raua nau tamaroa… no te haereraa i te misioni—i to ratou aruaruraa, fatata roa—e tupu taua huero iti ra e e tupu noa i te rahi.²⁹

E mea maitai ia haamata te mau metua i te faaineine ‘oi‘oi i ta ratou mau tamaroa i te haaputu i te moni i te omua-roa-raa o to ratou mau oraraa. A vaiiho ia noaa ia ratou te varua no te haaputu i ta ratou moni. A vaiiho ia noaa ato‘a ia ratou te varua no te tuatapapa e no te pure no ni‘a i te evanelia, ia ite ratou no ratou iho nahea te evanelia e ohipa ai i roto i to ratou iho mau oraraa e te oraraa o te feia e haati nei ia ratou. Ia noaa ia ratou te varua no te taviniraa a paari noa’i ratou e te tautururaa i te tahi atu mau taata ia tuatapapa i te mau oaoa no te parau poro‘i a te evanelia i roto i to ratou mau oraraa. Ia faaohipa ratou i ta ratou mau piha haapiiraa evanelia e te mau ohipa i roto i taua mau piha haapiira evanelia ei faaineineraa no te titauraa i te ite i te pae varua faufaa rahi no ratou e no vetahi ê. Ia faaineine ratou ma te tape‘a-mâ-raa i to ratou mau oraraa e ia vai ti‘amâ ratou e ia hinaaro ratou ma to ratou aau ato‘a ia tauturu i te Fatu no te afa‘i atu te evanelia i te feia tei ineine i te farii i te reira.³⁰

Te ti‘aturi nei au e e faatere te mau utuafare ato‘a i te pureraa pô utuafare i te mau pô monire ato‘a ma te faaea ore. E riro ïa te ohipa misionare te hoê o te mau tumu parau puai o te tuatapapahia i roto i te pureraa pô utuafare. E rave te metua tane e te metua vahine e te mau tamarii i to ratou taime no te pûpû i te mau pure o te faatumuhia i ni‘a i teie nei tuhaa faufaa rahi—ia iritihia te mau uputa o te mau nunaa ia tatou e te piti, ia anaanatae te mau misionare, te feia apî tane e tamahine o te Ekalesia i te faaî i taua mau misioni ra e i te afa‘i mai i te mau taata i roto i te Ekalesia.³¹

Te hinaaro nei te Ekalesia i te mau tane e te mau vahine faaipoipohia ia tavini ei mau misionare.

Mai te mea e faati‘a te ea e te tahi atu mau ohipa, e nehenehe ta te mau metua e tia‘i i te mahana e nehenehe ato‘a’i ia ratou ia tavini i te hoê misioni.³²

Ua mo‘ehia ia tatou, tatou te feia paari, tei tatuhaahia e tei ite i te hoê vahi ohie no te haere atu e ta tatou mau tauhaa puhaparaa e te tahi atu mau ohiparaa ta tatou. Ua ite tatou i te hoê rave‘a ohie no te haamaha i to outou iho mau mana‘o e no to tatou iho mau feruriraa e e ti‘a i te ohipa ia tamau noa–e tono ïa tatou i ta tatou mau tamaroa, o ta tatou ïa e parau nei.

E hopoi‘a teie na tatou paato‘a. Aita te taato‘araa o tatou e nehenehe e rave i te reira, tera râ e rave rahi e, e rave rahi o tatou e nehenehe ia na reira.³³

E nehenehe ia matou ia faaohipa e rave rahi hanere tane e vahine faaipoipo, te feia paari mai te tahi o outou, ua paari to outou mau utuafare, tei faatuhaahia i roto i ta ratou mau ohipa, o te nehenehe e haere… e haapii i te evanelia. E nehenehe ta matou e faaohipa e rave rahi hanere mau tane e vahine faaipoipo. A haere noa outou e parau i to outou episekopo—e tera noa te mea e ti‘a ia outou ia rave. A parau atu ia’na e, « Ua ineine maua i te haere, mai te mea e nehenehe ta oe e faaohipa ia maua ». I to‘u feruriraa e farii paha outou i te hoê piiraa.³⁴

Teie te ohipa a te Fatu. Te rave nei tatou i ta’na ohipa. Ua faaue taaê oia ia tatou, e aita tatou i matauhia i rotopu i te mau taata e rave rahi no te ao nei. Ua tae te taime no te tatua i to tatou nei mau tauupu e ia haere i mua ma te paieti apî no teie nei ohipa rahi. Ua fafau tatou, o outou e o vau nei, ia rave i te reira. Ia parau paato‘a ana‘e tatou mai taua taure‘are‘a, tei itehia i roto i te hiero i piha‘iho i to’na na metua mana‘o pe‘ape‘a, i te parahiraa i rotopu i te mau orometua, « Ia haapa‘o vau i ta tau metua e tia‘i ». [Luka 2:49].³⁵

Te mau mana‘o tauturu no te tuatapaparaa e te haapiiraa

A feruri i teie nei mau mana‘o a tuatapapa‘i outou i te pene aore râ a faaineine ai outou i te haapii. No te tahi atu tautururaa, a hi‘o i te mau api v–xi.

Nahea te ohipa misionare e riro ai « ei ohipa maere i te pae varua » ? (api 312). I faaite ana‘e tatou i te evanelia, « eaha ïa te mau ohipa « faahiahia e te hoona » ta tatou e nehenehe e farii ? (No te hoê hi‘oraa, a hi‘o i te aamu i te api 311).
A tai‘o faahou i te mau api 312–14 ma te imi i te mau haamaitairaa ta tatou e farii ia faaite ana‘e tatou i te evanelia. Eaha te taime i ite ai outou i te hoê o teie nei mau haamaitairaa ?
A tai‘o i te taato‘araa o te paratarafa maha i te api 314. I to outou feruriraa, eaha te auraa no te parau « ia faaroa i to tatou taahiraa avae » e « a faaano i to tatou orama » ? Nahea ta tatou e nehenehe ai ia pee i teie nei a‘oraa i roto i te ohipa misionare ?
A tai‘o faahou i te tuhaa o te haamata i te api 316. A feruri aore râ a tuatapapa i te a‘oraa taaê ta outou i ite no ni‘a i te faaiteraa i te evanelia i te utuafare e i te mau hoa. Ei hi‘oraa: a) Eaha ta tatou e nehenehe e rave no te « faaineine i to tatou mau taata tupu » ? (b) Nahea tatou e nehenehe ai e riro ei « faati‘aniraa » no te Ekalesia ? (c) Eaha te tahi o te mau fifi e tupu na roto i te tia‘iraa no te « taime tano e te taime maitai roa » no te faaite i te evanelia ? (d) Nahea e ti‘a ai ia tatou ia pahono atu mai te mea eita te mau melo no to tatou utuafare e to tatou mau hoa e farii i ta tatou aniraa ia haapii mai i te evanelia ?
Eaha te tahi o te mau hinaaro o te mau melo apî ? o te mau melo paruparu ? Eaha ta tatou e nehenehe e rave no te tauturu ia ratou ? (A hi‘o i te mau api 318–20).
Eaha te mau mea maitai ta te feia faatere no te Ekalesia e imi i roto i te mau misionare rave tamau ? (No te tahi mau hi‘oraa, a hi‘o i te mau api 320–23). Eaha ta te mau metua e ta te tahi atu mau taata e nehenehe e rave no te tauturu i te mau tamarii ia faatupu i teie nei mau maitai ? Eaha te tahi o te mau rave‘a ta te mau metua e te mau tamarii e nehenehe e rave no te pee atu i te a‘oraa a te peresideni Kimball no te haaputu i te moni no te mau misioni ?
Ua tiaoro te peresideni Kimball i te mau tane e te mau vahine faaipoipohia ia tavini i te mau misioni (te mau api 323–24). Eaha te tahi o te mau ohipa e te tahi mau rave‘a ta te Ekalesia e horo‘a nei i te mau misionare tane e vahine faaipoipohia ? Eaha ta te mau tane e vahine faaipoipohia e nehenehe e rave no te faaineine i te tavini ? Eaha te huru no ta outou raveraa i te ohipa misionare i teie taime o to outou oraraa ?

Te mau papa‘iraa mo‘a: Mosia 3:20; Alama 26:1–16; Helamana 6:3; Moroni 6:3–4; PH&PF 84:88

Elder Kimball and missionary companion — *Elder Spencer W. Kimball ei misionare rave tamau i roto i te misioni no te mau tuhaa fenua i ropu, tiunu 1915. Tei te pae aui o Elder Kimball, i piha‘i iho i to’na hoa misionare o L. M. Hawkes.*

missionaries teaching family — *« Te fâ mau no te pororaa manuia ia rave ïa te mau melo i te maimiraa e ia haapii ïa te mau misionare rave tamau ».*

family home evening — « Te ti‘aturi nei au e e faatere te mau utuafare ato‘a i te pureraa pô utuafare i te mau pô monire ato‘a ma te faaea ore. E riro ïa te ohipa misionare te hoê o te mau tumu parau puai o te tuatapapahia i roto i te pureraa pô utuafare ».