Pene 7

Te iteraa papû o te taata hoê

Ua riro te hoê iteraa papû no ni‘a i te ti‘a mau o te evanelia ei uputa e roaa ai te mau faautuaraa rahi e te mau oaoa faito ore.

No roto mai i te oraraa o Spencer W. Kimball

I te matahiti 1947 ua farii o Elder Spencer W. Kimball i te hoê rata na ta’na tamaiti o Andrew, te rave ra i ta’na misioni rave tamau. Te papa‘i ra o Andrew e: « Ua parau atu vau i te hoê taata e… ua ite au e parau mau ta‘u e parau nei ia’na, e ua parau vau e, ua faaite mai te Varua Maitai i te reira ia‘u… Ia feruri faahou vau i te reira i muri a‘e ra, ua pe‘ape‘a vau no to‘u raveraa i te reira ohipa ». No to’na pe‘ape‘a, ua parau oia e, « Ua haapa‘o maitai au ia faaite ana‘e au i to‘u iteraa papû ma te parau noa e, ‘Te mana‘o nei au, te ti‘aturi nei au, e te vai atu ra.’ »

Ua pahono atu o Elder Kimball i ta’na tamaiti. Na ô atura oia e, « Te feruri nei au e, ua ite papû maitai oe i to oe mana‘o, no te mea, ua farerei ato‘a a‘e nei au i te reira huru i roto i ta‘u misioni. Ua hinaaro vau ia riro ei taata parau-ti‘a i mua ia‘u iho, e i mua i te faanahonahoraa, e i mua i te Fatu. No te tahi taime, ua haapa‘o maitai au ia faahiti ana‘e au i ta‘u mau parau no te tamata ia faaitoito ia vetahi ê, ma te ore e fafau i te hoê parau papû, e te tapitapi ore, oia ho‘i, ua ite au. Ua taupupu rii au no te reira huru raveraa, i te mea e, ia haapa‘o maitai ana‘e au e ia rave au i ta‘u ohipa, e ite au i te faaururaa a te Varua. E hinaaro roa vau e parau i te mea ta‘u e mana‘o ra, ta‘u i ite, tera râ, ua otiatia rii au. Ia hinaaro vau e faahiti i te hoê parau papû, e tupu te măta‘u i roto ia‘u, e noa’tu râ i te reira, ia haapa‘o maitai roa ana‘e au, e ia faauru ana‘e te varua ia‘u, e hinaaro vau e faaite papû. Ua feruri au e, ua vai parau-ti‘a vau, e mea parau-ti‘a rahi roa, tera râ, ua faaoti a‘era vau e, te haamaau ra vau ia‘u iho…

« E mea papû maitai e, i te mahana a faaite papû ai oe i te taata ta oe e haapii ra e, ua ITE oe e, e parau mau, te Fatu te reira e tamata ra ma te puai i te heheu mai ia oe i te reira parau mau na roto i te mana o te Varua Maitai. I te taime a faauru ai te Varua ia oe e a haapa‘o ai oe, e a paruru ai i te reira faanahonahoraa mo‘a, ua ite hohonu roa oe i te reira, tera râ, i te taime a ‘faaea ai te Varua i te faauru ia oe’ e a haamata ai oe i te feruri e i te hi‘opo‘a ia oe, e i te uiui ia oe iho, hinaaro a‘era oe e taui i to oe mana‘o…

« Aita to‘u hoê mana‘o tapitapi no ni‘a i to oe iteraa papû. Ua papû ia‘u e, (mai to‘u ato‘a) mea rahi ta oe mau taura nehenehe no te iteraa papû i roto ia oe, te tia‘i noa nei i te rima o te Fatu Raraa ia haaputuputu e ia raraa i te reira ei vauvau tahua nehenehe e te au maitai. E teie nei, e ta‘u tamaiti, a haapa‘o i ta‘u parau, e EIAHA E TINAI I TE VARUA RA, area râ, ia muhumuhu mai te Varua ra, a haapa‘o i ta’na mau muhumuhuraa mo‘a. A parahi maite i roto i te faaururaa a te varua, e a faaroo i te muhumuhu, e ia uruhia oe ra, a parau i to oe mau mana‘o ma te taiâ ore. Na te Fatu e faarahi i to oe iteraa papû e na’na e faauru i te taata. Te ti‘aturi nei au e, e ite oe e, aore e mana‘o faahapa to roto i teie mau parau, e mana‘o tauturu râ…

« Eita ta‘u e nehenehe e opani i ta‘u episetole ma te faaite ore ia oe i to‘u iteraa papû. Ua ite au e, e parau mau—O Iesu te Rahu Nui e te Taraehara; te Evanelia i haapiihia e tatou e to tatou nau misionare e 3,000, ua faaho‘i faahou-hia mai ïa e ua heheuhia mai na roto i te peropheta mau na te Atua, o Iosepha Semita, e ua haamo‘a vau i te toe‘a o to‘u oraraa i te ‘pororaa i te basileia.’ Ua [faaite au] i to‘u iteraa papû ma te taiâ ore… e te haapapû faahou nei â vau. Ua papû ia‘u e, mai te reira ato‘a to oe iteraa papû, eiaha râ paha ta oe mau taura nehenehe o te titauhia ia raraahia ei vauvau tahua, o te oti ‘oi‘oi i te ravehia i roto i ta oe ohipa misionare, mai te mea e, e faaroo oe i te varua ia arata‘i i to oe aau.

« Ia tauturu mai te Atua ia oe ia raraa ei hoho‘a nehenehe i te mau taura nehenehe o to oe mau iteraa e to oe mau faaururaa, e ia tamau noa oe ma te puai tupu tamau maite… i te haapa‘o e i te haapii i te parau mau mure ore ».¹

Te mau haapiiraa a Spencer W. Kimball

E farii tatou tata‘i tahi i te hoê iteraa papû–e heheuraa te reira no ô mai i te Metua i te Ao ra na roto i te Varua Maitai.

Ua ui atu te Faaora ia Petero e, « O vai râ vau nei i ta outou na parauraa ? » I te i‘oa o to’na ra mau taea‘e, te tahi atu mau Aposetolo, na ô atura o Petero e, « O te Mesia oe, te Tamaiti a te Atua ora ra ». Te parau a te Faaora i muri iho, e parau faufaa roa ïa. Inaha, na ô atura oia e, « E ao to oe, e Simona Bare-iona, e ere ta te taata i faaite mai ia oe i te reira, na tau metua râ i te ao ra » (Mataio 16:13–17).

Na vai teie parau mau faahiahia i heheu mai ia’na ra ? Na to tatou Metua i te Ao ra. Nahea oia i te faaiteraa mai ? Na roto i te heheuraa. Teie iteraa tumu e, o Iesu te Mesia, te Taraehara, te Faaora, e ere ïa i ta te taata faaiteraa, e aore râ, i ta te tahi atu huru buka, e aore râ, i ta te haapiiraa tua rua. Ua farii o Petero i te reira no ô ti‘a roa mai i to tatou Metua i te Ao ra na roto i te utuuturaa a te Varua Maitai…

… E nehenehe te mau taata ato‘a i roto i teie nei ao e farii i te hoê heheuraa, mai tei faariihia e Petero ra. E riro taua heheuraa ra ei iteraa papû, ei iteraa e, te ora nei te Mesia, o Iesu Mesia o te Taraehara ïa no to te ao nei. E nehenehe te mau varua ato‘a ia farii i te haapapûraa, e ia roaa ia’na te reira iteraa papû, no ô mai ïa i te Atua ra, e ere râ no roto noa mai i te tuatapaparaa. E mea faufaa te tuatapaparaa, tera râ, e mea ti‘a ia apitihia’tu i te reira te pure tamau e te ma’imiraa, e i reira teie heheuraa e tae mai ai.

Ia ite ana‘e outou iho e, e ere o Iesu i te hoê noa philosopho rahi, e Tamaiti mau râ oia na te Atua, e ua haere mai oia i te ao nei ia au i ta tatou i faaite ra, e ua faaru‘e mai i te ao nei no te opuaraa ta tatou i faaite ra—ia ite papû ana‘e outou i te reira, e ia ite e, e peropheta o Iosepha Semita na te Atua, e teie te Ekalesia na te Atua, faati‘ahia e Iesu Mesia, i reira, ua roaa ïa ia outou te hoê heheuraa.²

Te vai ra te mau taata te haapeu nei ratou no to ratou maramarama, te feruri nei ratou e, e nehenehe ta ratou e tatara i te auraa o te tahi mau parau aro, tera râ, eita roa’tu ta ratou e nehenehe e tatara, e aore râ, e haamaramarama, e aore râ, e ite i te auraa o te mau mea o te varua na roto i ta ratou hi‘oraa, e aore râ, na roto i ta ratou feruriraa mana‘o. Na roto ana‘e i te Varua e nehenehe ai e tatara i te auraa o te mau mea o te varua. No roto mai te reira i te aau, i reira ho‘i te iteraa papû e parahi ai.³

Ua riro te iteraa papû no ni‘a i te ti‘a mau o te evanelia ei uputa e roaa ai te mau faautuaraa rahi e te mau oaoa faito ore. Ia tau‘a ore te hoê taata i te iteraa papû, mai te huru ïa e, te haere ra oia na roto i te hoê ana poiri taotao, e aore râ, na ni‘a i te hoê purumu tereraa pereoo ataata, i roto i te rupehu. E mea aroha no taua taata ra, i te mea e, te taahi atu nei oia i roto i te poiri i te avatea ti‘a nei, e te rohi ra oia i roto i te mau fifi o te nehenehe e tatara, e te parahi faufaa ore noa ra oia i roto i te papû ore e te ti‘aturi ore. E au te ite varua i te parau mau ei mori anaana e turama i te ana; ei mata‘i e ei mahana e faaore i te rupehu; ei mauhaa puai no te tatara i te mau fifi i ni‘a i te purumu.

E roaa te iteraa papû e e tape‘a-maite-hia te reira na roto i te haaraa puai.

Te iteraa papû o te heheuraa ïa e fariihia e te hoê taata—te hoê o te mau horo‘a faufaa rahi—e o te nehenehe i te mau taata ato‘a ia fana‘o mai te mea e, e aufau ratou i te hoo i titauhia.⁵

E uiraa maitai roa tei uihia e te mau taata e rave rahi milioni mai te taime a faahiti ai Iosepha Semita i te reira: Mai te mea e, te vai ra, nahea vau e ite ai e, tei hea te faanahonahoraa ti‘a, te hanahana, e tei ite-au-hia mai e te Fatu, ?

Ua horo‘a mai oia i te tatararaa. E mea ti‘a ia outou ia ite. Aita e titauhia ia outou ia vai noa i roto i te papû ore… Teie te rave‘a: e tuatapapa, e feruri, e pure, e e rave. Te heheuraa te taviri. E faaite mai te Atua i te reira ia outou mai te mea e, e auraro outou ia’na, e roaa ia outou te aau haehaa e te farii. Mai te mea e, e faaru‘e outou i to outou te‘ote‘o, e farii outou i to outou ite ore, e haavî outou i to outou huru haapa‘o noa ia outou iho, e e farii outou i te haapiiraa a te Varua Maitai, ua ineine ïa outou ia haamata i te haapii mai.⁶

E noaa ia tatou te hoê iteraa papû no ni‘a i te hoê Atua e tino to’na; te oraraa ohipa o te Mesia, mai te huru i to to’na Metua, noa’tu to raua taa ê te tahi i te tahi; te hanahana o te faaho‘i-faahou-raa-hia mai, na roto ia Iosepha Semita e te tahi atu mau peropheta, te faanahonahoraa e te mau parau haapiiraa a te Ekalesia a te Atua i ni‘a i te fenua nei; e te puai e te mana o te autahu‘araa hanahana tei horo‘ahia i te taata nei na roto i te heheuraa no ô mai i te Atua ra. E roaa te iteraa i te reira mau mea i te mau taata mana‘o paari ato‘a mai te iteraa e, e hiti mai te mahana. Ia ore te hoê taata e farii i te reira ite, e nehenehe ïa e parau e, aita oia i rave i te mea i titauhia. Mai te mau ite vanaa, e roaa te reira na roto i te tutavaraa ma te tuutuu ore. Te taata tei mâ na roto i te tatarahapa e te mau oro‘a, e roaa ia’na taua huru ite ra mai te mea e, e hinaaro oia, e e titau ho‘i i te reira, e imi maite, e tuatapapa, e e pure ma te faaroo.⁷

Ua parau te Taraehara e:

« E ere i ta‘u e haapii nei, na’na râ, na tei tono mai ia‘u nei.

« O tei hinaaro maite i te haapa‘o i to’na ra hinaaro, e ite ïa i ta‘u e haapii nei e na te Atua, e na‘u iho » (Ioane 7:16–17).

Eaha te auraa i te parau e, ia ite i te haapiiraa ? O te hoê ïa ite aueue ore. Ua horo‘a mai te Fatu i te hoê haamauruururaa faufaa rahi, tera râ, ua faanaho oia e, e fariihia te reira na roto i te haapa‘oraa i te tahi mau titauraa. I taua taime ra, te haamaitairaa i fafauhia mai, o te iteraa ïa i te haapiiraa a te Atua. E te ture i taua taime ra, o te « haapa‘oraa ïa i to’na ra hinaaro »…

… Te haapa‘o-ha‘umani-noa-raa i te mau parau haapiiraa, eita te reira e horo‘a mai i te iteraa papû; eita te haapa‘o-afa-noa-raa i te evanelia e horo‘a mai i taua haapapûraa ra, na roto râ i te haapa‘o-hope-roa-raa i ta’na mau faaueraa.

E mea pinepine tatou i te ite i te reira i roto i te oraraa o te mau melo o te Ekalesia. Ua parau mai te hoê taata ia‘u i roto i te hoê tere to‘u i roto i te hoê tĭtĭ, « Te haapae papû nei au i te haere atu i roto i te mau pureraa iritiraa mana‘o. Aita ta‘u e nehenehe e farii i te mau faahitiraa mana‘o ta te tahi mau taata e faaite nei. Aita ta‘u e nehenehe e farii i te reira mau haapiiraa maori râ, ia hope te mau tuhaa o te reira i te imi-papû-hia e au ». Ua ite au i teie huru taata i te mea e, ua farerei a‘e nei au i te tahi atu mau taata mai ia’na ra te huru. Aita roa’tu ratou i haapa‘o hope roa i te mau faaueraa: mea iti roa ta ratou tuhaa ahuru e aore râ, aita roa’tu, te haere nei ratou i te mau pureraa i te tahi noa mau taime, te faaino nei ratou i te mau haapiiraa, i te mau pŭpŭ tauturu, e i te feia faatere, e te ite papû nei tatou e, no te aha aita e roaa ia ratou te iteraa papû. Haamana‘o na tatou e, ua parau mai te Fatu e:

« Ua ruuruuhia vau, o te Fatu, ia rave outou i te mea ta‘u i parau ra; ia ore râ outou ia rave i ta‘u i parau ra, e ore ïa ta outou e fafauraa i reira » (PH&PF 82:10).

Aita teie huru taata i « rave i ta’na i parau ra »,no reira, aita ïa ta ratou e fafauraa i reira…

… E ere i te haapa‘oraa matapo, e haapa‘oraa ti‘aturi papû râ e te taviriraa i te mau taviri o te iriti i te vahi vairaa o te ite varua. Eita te Fatu e mata ê i te huru o ta’na mau tamarii, e oaoa râ oia ia riro tatou ei mau tamarii na’na e ia haamaitai ia tatou paato‘a, mai te mea e, e farii tatou ia na reira oia.

Eaha te ohipa ta outou e rave no to outou iteraa papû ? E tape‘a noa anei outou i te reira ia oi maitai mai te tipi ta to tatou mau metua vahine e faaohipa nei no te tapu i te i‘o puaa ? E vaiiho anei outou i te reira ia faufaa ore e ia tutae-auri-hia ?… E au oia mai te hoê tumu roti. Paruru i te ûa eiaha ia topa i ni‘a ia’na; paruru i te pape eiaha ia tahe na piha‘i iho ia’na no te tahi tau taime iti, eaha te ohipa e tupu i ni‘a i ta outou tumu roti ? E pohe oia. E pohe to outou iteraa papû. E pohe to outou here. E titauhia te mau mea ato‘a ia faaamu i te maa. Te faaamu nei outou i to outou tino e toru taime i te mahana. Ua parau te Fatu e, no te tape‘a i to outou iteraa papû, no te faaora i to outou varua, ua titauhia ia outou ia faaamu noa ia’na i te mau mahana ato’a… No reira oia i parau ai e, a pure noa i te mau pô ato‘a e i te mau po‘ipo‘i ato‘a.

E mea ti‘a ia tatou ia faaite i to tatou mana‘o i roto i te mau pureraa iritiraa mana‘o.

O te mau pureraa iritiraa mana‘o te tahi o te mau pureraa maitai roa a‘e i roto i te [Ekalesia] i roto i te hoê ava‘e taato‘a, mai te mea e, ua farii outou i te varua. Mai te mea e, ua ha‘umani outou i roto i te hoê pureraa iritiraa mana‘o, te vai ra ïa hoê fifi i roto ia outou iho, eiaha râ i roto i te tahi atu mau taata. E nehenehe ta outou e ti‘a i ni‘a e e faaite i to outou iteraa papû e ia feruri e, o te reira te pureraa maitai roa a‘e i roto i te ava‘e; mai te mea râ e, e parahi noa outou a tai‘o noa ai i te mau hapehape o te reo, e a ata noa ai i te taata e ere i te mea ite roa i te paraparau, i reira ïa outou e ha‘umani ai… Eiaha e haamo‘e i te reira ! E titauhia ia outou ia aro no te hoê iteraa papû. E titauhia ia outou ia aro tamau maite noa !

Te parau nei te Fatu i roto i te tuhaa 60 o te Parau Haapiiraa e te mau Parau Fafau, « Area râ i te tahi râ aore au i mauruuru roa ra, no te mea e ore roa ratou e hamama mai i to ratou ra mau vaha » (PH&PF 60:2). Eaha ta’na e parau nei ? Te parau nei oia e, mai te mea e, aita ratou e faaohipa i te reira, e ere ratou i te mea ta’na i horo‘a atu ia ratou ra. E ere ratou i to ratou varua. E ere ratou i to ratou iteraa papû. E teie tao‘a faufaa rahi tei roaa ia outou, e riro te reira i te mo‘e ê roa i to outou nei oraraa.

I te mau ava‘e ato‘a te putuputu nei te Peresideniraa Matamua e te Tino Ahuru Ma Piti e te mau Hui Mana Faatere Rahi i roto i te hiero. Te faaite nei ratou i to ratou iteraa papû e te parau nei ratou te tahi i te tahi i to ratou here te tahi e te tahi mai ia tatou ato‘a e na reira nei. Eaha te tumu te mau Hui Mana Faatere Rahi e faatupu ai i te pureraa iritiraa mana‘o ? Hoê â ïa tumu a faatupu ai tatou i te pureraa iritiraa mana‘o. Ia mana‘o outou, e nehenehe anei ta outou e ora noa e toru, e ono, e iva, e hoê ahuru ma piti atu ava‘e ma te faaite ore i to outou iteraa papû, e a tape‘a noa ai i te reira i roto i to’na puai hopea ?…

Ua ite outou e, e ohipa faufaa rahi teie iteraa papû, e ohipa faufaa rahi roa a‘e ïa. Te mau huru orometua ato‘a e aore râ, te mau huru tahu‘a ato‘a o te nehenehe e faahiti i te papa‘iraa mo‘a, e e vauvau mai i te tahi mau tau‘araa parau. E ere râ te mau huru tahu‘a ato‘a e aore râ te mau huru orometua ato‘a te nehenehe e faaite i to’na iteraa papû. Eiaha e parahi noa i roto i ta outou pureraa iritiraa mana‘o a faaere ai ia outou i te mau haamaitairaa e a parau ai e, « Ia‘u i mana‘o, eita vau e faaite i to‘u iteraa papû i teie mahana. Ia‘u i mana‘o, e ere i te mea tano no te tahi mau melo ia na reira vau, i te mea e, te vai atu ra te tahi mau taime e nehenehe ta‘u ia na reira ».A faaite i to outou iteraa papû. Hoê minuti, ua rava’i roa no te faaite i te reira.

E iteraa papû to outou ! E titauhia ia patu e ia faateitei e ia faarahi i te reira; te reira ïa te ohipa ta outou e rave nei. I te mau taime ato‘a e faaite outou i to outou iteraa papû, te puai atu ra ïa te reira.¹⁰

E faaitehia te mau iteraa papû ma te faaohipa i te mau parau ohie e te puai.

« Ua ite au e, e parau mau ». Ua faaohipahia teie mau parau ehia rahiraa milia taime na te mau taata e rave rahi milioni, aita râ te reira i faaiti i to ratou faufaa. Eita roa’tu ratou e marau. Te pe‘ape‘a nei au no te mau taata e tamata nei i te faahiti i te reira na roto i te tahi atu mau huru parau, no te mea aita e parau mai teie, « Ua ite au ».Aita e parau e nehenehe e faaite i te mana‘o hohonu no roto mai i te aau o te taata mai teie parau ‘Ua ite au ».¹¹

Te vai ra te tahi pae o to tatou mau taata maitai, e mea ri‘ari‘a roa na ratou ia faaohipa i te mau parau mataro-noa-hia, e no reira, e tamata ratou i te taamino noa na te hiti i to ratou iteraa papû na roto i te faahitiraa i te mau mea no te hiti. Eiaha roa’tu outou e haape‘ape‘a no te mau parau mataro-noa-hia i roto i te iteraa papû. Ia faaite ana‘e te peresideni o te Ekalesia i to’na iteraa papû, e parau oia e, « Ua ite au e, ua pii te Atua ia Iosepha Semita, ei ti‘a no te Atua. Ua ite au e, o Iesu te Mesia, te Tamaiti a te Atua ora ». Te ite ra outou, taua mau mea nei â ta outou tata‘i tahi e parau ato‘a nei. Tera te hoê iteraa papû. Eita roa’tu te reira e tahito, eita roa’tu e tahito ! Faaite pinepine atu i te Fatu i to outou here rahi ia’na.

E ere te iteraa papû i te hoê faaitoitoraa; e ere te iteraa papû i te hoê a‘oraa (aita outou i anihia ia faaitoito i te tahi atu mau taata); e ere ho‘i i te aamu no te hoê tere orihaere. Tei ô nei outou no te faaite i to outou iho iteraa papû. E mea maere roa te rahiraa parau ta outou e nehenehe e parau i roto i te roara e 60 tetoni na roto i te iteraa papû, e aore râ, 120, e aore râ, 240 tetoni, e aore râ, te huru o te taime i horo‘ahia na outou, mai te mea e, e haapa‘o noa outou i te faaite i te iteraa papû. Te hinaaro nei tatou ia ite e, eaha to outou mana‘o. Ua here mau anei outou i te ohipa ? Te oaoa ra anei outou i roto i ta outou ohipa ? Ua here anei outou i te Fatu ? Te oaoa ra anei outou i te mea e, e melo outou no te Ekalesia ? ¹²

Faaite noa i te mana‘o e vai ra i roto ia outou. Tera te iteraa papû. I te taime e haamata ai outou i te haapii ia vetahi ê, ua hope ato‘a ïa to outou iteraa papû i reira. Faaite noa mai ia matou eaha to outou mana‘o, eaha ta to outou feruriraa, ta to outou aau e te taato‘araa o te mau tuhaa o to outou tino e parau mai nei ia outou.¹³

No to‘u ite papû e, ia tae i te hoê tau, ia au i te tereraa o te mau mea ato‘a, e titauhia ia‘u ia ti‘a atu i mua i te Fatu e ia horo‘a’tu i te hoê faaiteraa no ta‘u mau parau, no reira, i teie nei, te faaite atu nei au i to‘u iho iteraa papû hanahana e, ua fâ mai te Atua, te Metua Mure Ore, e te Fatu ti‘afaahou, o Iesu Mesia, i te tamaiti ra ia Iosepha Semita. Te faaite papû nei au e, te Buka a Moromona, e iritiraa ïa no te mau parau o te tahi mau nunaa tahito tei ora na i te tuhaa tooa o te râ o te fenua, i reira ratou i tupu ai i te rahi e i te puai, na roto i te haapa‘oraa i te mau faaueraa a te Atua, tera râ, ua mou hope roa ratou na roto i te tama‘iraa ratou ratou iho, no to ratou haamo‘eraa i te Atua. Te faaite nei teie buka i te iteraa papû no te vai-mau-raa te Fatu o Iesu Mesia ei Faaora e ei Taraehara no to te taata nei.

Te faaite papû nei au e, te autahu‘araa mo‘a, ta Aarona e ta Melehizedeka, e te mana no te rave i te ohipa i te i‘oa o te Atua, ua faaho‘i-faahou-hia mai te reira i te fenua nei na roto ia Ioane Bapetizo, e o Petero, Iakobo e o Ioane; e ua faaho‘i-ato‘a-hia mai te tahi atu mau taviri; e te puai e te mana o taua mau horo‘a rau ra, tei rotopu te reira ia tatou i teie mahana. Te faaite hanahana nei au i te iteraa papû no teie mau mea i te mau taata ato‘a e faaroo mai nei i to‘u reo. Te fafau nei au na roto i te i‘oa o te Fatu e, te feia ato‘a e haapa‘o mai i ta tatou poro‘i, e e farii e e ora i te evanelia, e tupu ïa ratou i te rahi i roto i te faaroo e te haro‘aro‘a. E rahi atu te hau i roto i to ratou oraraa e i roto i to ratou utuafare, e na roto i te mana o te Varua Maitai, e parau ato‘a ratou i teie nei â mau parau o te iteraa papû e te parau mau.¹⁴

Te mau mana‘o tauturu no te tuatapaparaa e te haapiiraa

A feruri i teie nei mau mana‘o a tuatapapa ai outou i te pene aore râ, a faaineine ai outou i te haapii. No te tahi atu tautururaa, a hi‘o i te mau api v–xi.

A tai‘o faahou i te rata ta Elder Spencer W. Kimball i papa‘i atu i ta’na tamaiti o Andrew (mau api 83–84), ma te ite i te faaauraa o te iteraa papû i te hoê vauvau tahua. Eaha te mau mea i tupu e te mau mana‘o o tei riro ei mau « taura nehenehe no te iteraa papû » ? A feruri na eaha ta te Fatu ohipa i rave no te tauturu ia outou ia raraa i to outou mau taura no te iteraa papû ei vauvau tahua.
I to outou mana‘oraa, eaha te tauturu tei roaa ia Andrew Kimball i to’na fariiraa i te rata a to’na metua tane ? Eaha te mau taime e nehenehe ai i te mau metua e faaite i to ratou iteraa papû i ta ratou mau tamarii ? Nahea tatou i te tauturu i te feia apî ia farii e ia ite i te muhumuhu a te varua o te arata‘i atu i roto i te hoê iteraa papû ?
A hi‘o poto noa i te mau api 85–92, ma te imi i te mau ta‘o e te mau faahitiraa parau ta te peresideni Kimball i faaohipa no te faataa i ta tatou mau tautooraa no te farii e no te haapuai i to tatou iteraa papû. Mai te mea e, e ite te hoê taata e, te aueue ra to’na iteraa papû, eaha ta te reira taata ohipa e rave ?
A tuatapapa i te haapiiraa a te peresideni Kimball no ni‘a i te mau pureraa haapaeraa maa e te iritiraa mana‘o (mau api 90–91). I to outou mana‘oraa, no te aha i faatupuhia teie mau pureraa no tatou ? No te aha to tatou mau iteraa papû e tupu ai i te rahi ia faaite ana‘e tatou i te reira ? Eaha te ohipa ta tatou e nehenehe e rave no te haapapûraa ia riro mau te pureraa iritiraa mana‘o ei hoê o te mau pureraa maitai roa a‘e o te ava‘e no tatou ?
A hi‘o faahou i te haapiiraa a te peresideni Kimball no ni‘a i te huru no te faaiteraa i to tatou iteraa papû (mau api 91–93). No te aha e puai rahi te vai ra i roto i te mau parau ra « Ua ite au » ?

Te mau papa‘iraa mo‘a: 1 Korinetia 12:3; 1 Petero 3:15; Alama 5:45–46; Moroni 10:4–7; PH&PF 42:61; 62:3