Pene 1
« Ia ora i piha‘i iho Ia’na i te hoê mahana »
Te rave‘a hoê roa e iteahia ai ia tatou te oaoa, te parau mau e te poupou o te oraraa ïa mai te au i te faanahonahoraa a te Metua i te Ao ra.
No roto mai i te oraraa o Spencer W. Kimball
E mea au roa na te mau melo taato‘a i te ao nei te himene a te Paraimere ra « E tamarii au na te Atua ra », e tae noa’tu i te parau tumu ohie roa e te hohonu o te reira himene, oia ho‘i, o vai tatou nei, eaha te tumu i tae mai ai tatou i ni‘a i te fenua nei, e eaha ta te Fatu i fafau mai ia tatou mai te mea e, e haapa‘o maite tatou. Na te tuahine Naomi W. Randall i papa‘i i te mau parau o teie himene i te matahiti 1957, i te tau e melo o Elder Spencer W. Kimball no te Pŭpŭ no te Tino Ahuru Ma Piti Aposetolo. I taua taime ra, te na ô ra te tuhaa hopea o te faaho‘iraa e « Haapii mai ia‘u i te mau mea ato‘a te ti‘a ia‘u ia ite no te ora i piha‘i iho ia’na i te hoê mahana ».
I te hoê taime, a haere ai oia i te hoê amuiraa tĭtĭ, ua faaroo o Elder Kimball i te hoê pŭpŭ tamarii Paraimere i te himeneraa « E tamarii au na te Atua ra ». Aita i maoro i muri a‘e i te reira, ua paraparau oia i te hoê melo no te Tomite Rahi Faatere no te Paraimere i teie himene. Te parau ra oia e, « Mea au roa na‘u te himene tamarii, tera râ, te vai ra hoê ta‘o aita vau e afaro roa. E farii anei te tuahine Randall ia taui i te parau ra, ite, i te parau ra, rave ? »1
Ua farii te tuahine Randall ia taui i te himene. I teie nei, teie atura ïa te faahopearaa o te faaho‘iraa « Haapii mai ia‘u i te mau mea ato‘a e ti‘a ia‘u ia rave no te parahi i piha‘i iho ia’na i te hoê mahana ».2 E itehia i roto i teie mau parau te hoê parau tumu ta te peresideni Kimball i faaite tamau i roto i te roaraa o to’na tau taviniraa: « E roaa te ora Tiretiera i te mau varua ato‘a o te haapa‘o i te mau titauraa i faataahia. Aita i nava‘i te ite-noa-raa. Titauhia râ i te hoê taata ia rave. E faufaa rahi to te Parau-ti‘a, e e mea titauhia te mau oro‘a ».3 Ua haapii oia e, te evanelia, « o te hoê ïa faanahoraa no te oraraa, e faanahonahoraa te reira no te faaoraraa o te hoê taata, e ua niuhia ïa te reira i ni‘a i te parau no te hopoi‘a a te taata iho. Ua faataahia te reira no te taata, te tamarii a te Atua. E riro te taata ei Atua a muri iho, e tei roto ia’na te huero o te huru Atua, e e nehenehe ta’na, mai te mea e, e hinaaro oia, ia ta‘uma i te mau faito teitei roa ».4
Te mau haapiiraa a Spencer W. Kimball
I roto i to tatou oraraa hou teie nei oraraa, ua haapii mai te Metua i te Ao ra ia tatou i ta’na faanahonahoraa no to tatou faateiteiraa.
I te tau a riro ai tatou ei mau varua, ma te hamani-hope-roa-hia, e te nehenehe i te feruri, e te haapii e e te haro‘aro‘a i piha‘i iho ia’na, na ô maira to tatou Metua i te Ao ra ia tatou e, « I teie nei e ta‘u mau tamarii here e, i roto i to outou huru varua, ua haere outou i mua e tae roa mai i teie faito i teie nei. No te tamau â i te haere i mua, e titauhia ia farii outou i te hoê tino tahuti. Te opua nei au e hamani i te hoê faanahonahoraa ia nehenehe ia outou ia tamau noa â i te tupu i te rahi. Mai ta outou i ite, e tupu te hoê taata i te rahi na roto ana‘e i te upooti‘araa.
Ua parau te Fatu e « I teie nei, e rave matou i te mau materia e vai ra, e e faanahonaho matou i te reira ei fenua, e e tuu matou i reira i te mau raau e te mau animala, e e faati‘a matou ia outou ia pou i reira. E riro te reira ei vahi tamataraa no outou. E horo‘a’tu matou ia outou i te hoê fenua tao‘a rahi, tei î i te mau mea ato‘a ei maitai e ei oaoaraa no outou, e e hi‘o ho‘i matou e, e haapa‘o anei outou e e rave anei outou i te mau mea i anihia ia outou. E rave au i te hoê faaauraa e o outou. Mai te mea e, e farii outou ia haavî i to outou mau hinaaro, e ia tamau noa i te tupu i te rahi e tae roa’tu i te maitai roa ra e i te huru Atua ra na roto i te faanahonahoraa ta‘u e horo‘a’tu, e horo‘a’tu ïa vau i te hoê tino i‘o e te ivi no outou, e tae noa’tu i te hoê fenua faufaa e te hotu, e te mahana, te pape, te mau uru raau, te mau auri, te repo, e te mau mea ato‘a e au ei maa, ei ahu e ei fare no outou, e e horo‘a’tu vau i te mau mea oaoa tano ato‘a, ei maitai no outou. Taa ê noa’tu i te reira, e horo‘a’tu vau i te hoê rave‘a e ti‘a ai ia outou ia ho‘i faahou mai i mua ia‘u mai te mea e, e haamaitai outou i to outou oraraa, e upootia outou i ni‘a i te mau fifi, e e haafatata’tu outou i te maitai roa ra ».
I mua i teie mau horo‘a maitai rahi i ni‘a nei, ua pahono atura tatou te mau tamaiti e te mau tamahine a to tatou Metua i te Ao ra ma te mauruuru rahi.5
Ua tatara maramarama maitai maira te Fatu i te reira faanahonahoraa e i te mau titauraa e i te mau haamaitairaa… E horo‘ahia i te taata te ti‘amâraa no te ma’iti, ia nehenehe ia’na iho ia ma’iti.
Ua faataahia e toru tuhaa e aore râ, e toru ai‘araa, i roto i te oraraa: hou te oraraa tahuti, te tahuti, e te tahuti ore… Te ohipa e ravehia i roto i te hoê ai‘araa, e mea faufaa roa te reira no te ai‘araa e aore râ, no te mau ai‘araa i muri mai. Mai te mea e, e haapa‘o te hoê taata i to’na ai‘araa matamua, e faati‘ahia ïa oia ia haere i roto i te piti o te ai‘araa, oia ho‘i, te oraraa tahuti nei, e tau tamataraa e te fariiraa i te ite. Mai te mea e, e haapa‘o maitai oia i roto i teie ai‘araa piti, oia ho‘i te mau iteraa ta’na e farii i te fenua nei, e ora mure ore te tia‘i mai ra ia’na.6
Noa’tu e, ua mo‘ehia ia tatou te mau mea ato‘a no ni‘a i to tatou oraraa hou te oraraa tahuti nei, hou a pou mai ai tatou i ni‘a i te fenua nei, ua maramarama tatou paato‘a i te tumu i tae mai ai tatou i ô nei. Ua titauhia ia tatou ia noaa te ite, ia haapii e ia faaaravihi ia tatou iho. Ua titauhia ia tatou ia haavî i to tatou mau hiaai e to tatou mau hinaaro, ia faatere e ia haavî i to tatou mau hiaai, e ia upootia i ni‘a i to tatou mau paruparu, tei iti e tei rahi. Ua titauhia ia tatou ia haapae i te hara o te tau‘a ore, e te hara e rave-roa-hia, e ia haapa‘o i te mau ture e te mau faaueraa i horo‘ahia mai e te Metua ia tatou nei…
Ua maramarama ato‘a tatou e, i muri a‘e i te hoê pu‘e tau roa mai te tahi noa tau tetoni e tae atu i te tahi tau matahiti e rave rahi te maoro, i roto i te oraraa tahuti nei, e pohe tatou, e e ho‘i atu to tatou tino i te Metua vahine ra, oia ho‘i, te repo, te vahi no reira mai oia i te hamani-raa-hia, e to tatou varua ra, e ho‘i atu ïa i te ao varua, i reira ho‘i tatou e haapiihia’i i to tatou fâ mure ore. I muri a‘e i te hoê pu‘e tau, te vai ra te hoê ti‘afaahouraa e aore râ, te tahoêraa te tino e te varua, i reira ho‘i tatou e riro ai ei mea tahuti ore, e na roto i te reira e ti‘a ai ia tatou ia haere e tae atu ai i te maitai roa ra, e i te huru Atua ra. Ua roaa teie ti‘afaahouraa ia tatou na roto i te tusia a te Fatu o Iesu Mesia, te Rahu nui o teie nei fenua, tei rave i teie ohipa faito ore no tatou nei—te hoê semeio o te ore roa e ti‘a ia tatou ia rave no tatou iho. No reira, ua iritihia te e‘a e roaa ai ia tatou te tahuti ore e te faateiteiraa i muri iho i roto i te basileia o te Atua mai te mea e haapa‘o tatou.7
Hou a tomo mai ai tatou i roto i teie peho oto, ua maramarama maitai tatou e, te vai ra te oto, te mauruuru ore, te teimaha te hopoi‘a, te toto, te hou, te roi mata; noa’tu râ i te reira mau mea ato‘a, ua hi‘o maira tatou i raro e ua ite maira tatou i teie fenua tei faaineinehia no tatou, e na ô a‘era tatou e, « Oia, e te Metua, noa’tu teie mau mea ato‘a, te ite nei au i te mau haamaitairaa rarahi ta‘u e farii, o vau te hoê o ta oe mau tamaiti e aore râ, mau tamahine; ia rave au i te hoê tino, e ite au e, e riro mai au i muri iho ei taata tahuti ore mai ia oe te huru, e nehenehe au e upootia i ni‘a i te mau ino o te hara e ia riro mai ei mea maitai roa, e no reira, te hinaaro ‘oi‘oi nei au e haere i ni‘a i te fenua i te taime matamua e ti‘a ai ia‘u ia haere ». E ua haere maira tatou.8
Te tahuti nei, e taime ïa no te faaineine i te farerei i te Atua.
Tatou te taata tahuti nei e ora nei i ni‘a i teie fenua, tei roto ïa tatou i te piti o to tatou ai‘araa. Tei roto tatou i to tatou tino tahuti nei, e na te reira e haapapû mai e, « ua haapa‘o » tatou i to tatou ai‘araa matamua. E mea mure ore to tatou varua, e ua ora na ho‘i i piha‘i iho i te Atua, tera râ, ua faanahonahohia te reira ei tino varua na to tatou Metua i te Ao ra. I muri iho, ua haere to tatou mau tino varua na roto i te hoê tau maoro no te tupuraa e te paariraa e te haapiipiiraa e, i muri a‘e i to tatou manuïaraa i te hi‘opo‘araa, i te pae hopea ra, ua fariihia tatou i ni‘a i te fenua nei i roto i te tahuti nei.
Te hoê opuaraa papû maitai o te haereraa mai to tatou varua i ni‘a i te fenua nei e ia farii i te ai‘araa tahuti nei no te farii ïa i te hoê tino tahuti. E farii teie tino i te mau ino ato‘a, te mau faahemaraa, te mau paruparu e te mau taotiaraa o te tahuti nei, e ua titauhia ia’na ia haavî ia’na iho.9
Ua tonohia mai outou i ni‘a i teie fenua eiaha no te oaoa noa, e aore râ, no te faati‘a noa i to tatou mau hiaai e aore râ, i to tatou mau hinaaro… e mai ta to te ao e parau nei e, ia « arearea » noa.
Ua tonohia mai râ outou i ni‘a i te fenua nei i roto i te hoê opuaraa papû. Mai te huru e, ua tonohia outou ia haere i te haapiiraa, ia haamata outou mai te hoê tamarii rii e ia tupu i te rahi e tae roa’tu i te mau faito mana‘o-ore-hia o te paari, o te feruriraa maramarama, o te ite e o te mana.10
Te hoê o te mau paruparu rahi o te taata i te mau anotau ato‘a, o te faataimeraa ïa, oia ho‘i, te hinaaro ore ia farii i ta’na iho mau hopoi‘a i teie nei. Ua haere mai te taata i ni‘a i te fenua nei ia haapiihia, ia faaineinehia e ia faarahihia, e ia haamaitai-roa-hia, tera râ, e rave rahi tei ruri-ê-hia e ua… topa i roto i te faaea-noa-raa ma te ohipa ore i te pae morare e o te pae varua, e i roto i te imiraa i te mau mea oaoa o te ao nei.11
Ua riro teie oraraa tahuti nei ei taime no te faaineine ia farerei i te Atua, e o te reira ïa ta tatou hopoi‘a matamua. I teie nei, ua farii tatou i to tatou tino, o te riro ho‘i ei vairaa no to tatou varua e a muri noa’tu, no reira, i teie nei, e mea ti‘a ia tatou ia haapiipii i to tatou tino, to tatou mana‘o, e to tatou varua. No reira, te ohipa faufaa roa maori râ, o te huru ïa no ta tatou faaohiparaa i teie oraraa no te haamaitai roa ia tatou iho, ia haavî i te tino, ia haavî i te tino i raro a‘e i te varua, ia upootia i ni‘a i te mau paruparu ato‘a, ia faatere ia’na iho, ia nehenehe i te hoê taata ia haapii i te tahi atu ia faatere ato‘a, e ia rave i te mau oro‘a ato‘a e titauhia.12
Na te evanelia a Iesu Mesia e faaite mai i te e‘a e ho‘i atu ai tatou i to tatou Metua i te Ao ra
No te faataaraa i te hoê vahi aitâ tatou i haere a‘e nei, e hi‘o tatou i te hoê hoho‘a fenua… Ua horo‘a mai te Fatu o Iesu Mesia, to tatou Taraehara e to tatou Faaora, i ta tatou hoho‘a fenua—e păpă ture e e faaueraa na roto i te reira e roaa ai ia tatou te maitai roa, e te huru Atua. Taua păpă ture ra e te mau oro‘a, e parauhia te reira, te evanelia a Iesu Mesia, o te reira ana‘e te faanahonahoraa e faateitei i te taata. O te Ekalesia a Iesu Mesia i te Feia Mo‘a i te mau Mahana Hopea nei ana‘e te mau nei i te reira faanahoraa faufaa rahi i roto i to’na îraa, e e roaa te reira i te mau taata ato‘a e farii i te reira.13
Ua faaho‘i faahou mai te Fatu i to’na basileia i teie anotau, e tae noa’tu i te mau horo‘a e te mau mana e te mau haamaitairaa no te reira basileia. E nehenehe te mau huru ekalesia ato‘a ta outou i matau e arata‘i ia outou i roto i te hoê tere roa, ma te horo‘a mai i te tahi tuhaa no te hau, no te oaoa e no te haamaitairaa, e e nehenehe ho‘i ta ratou e hopoi roa ia outou i mua i te paruru, e i reira, a faaru‘e ai ia outou. Area te Ekalesia a Iesu Mesia, e rave ïa oia ia outou i teie pae atu i te paruru, e e hopoi atu ai ia outou na roto i te paruru, mai te huru e, aita e paruru e vai ra, na roto i te mau ao mure ore e tae roa’tu i te faateiteiraa, mai te mea e, e haapa‘o outou i ta’na mau faaueraa.14
Te evanelia a Iesu Mesia o te faanahonahoraa mure ore ïa no te faaoraraa. O te faanahonahoraa ïa i opuahia e i faaarahia mai e te Atua, te Metua Mure ore, no te faaoraraa o te mau taata ato‘a e ti‘aturi e e haapa‘o i te reira.15
Te rave‘a e roaa ai te ora mure ore e te faateiteiraa e te huru Atua i te hoê taata, maori râ, ia tomo ïa oia e ti‘a’i i roto i te basileia na roto i te bapetizoraa i ravehia ma te ti‘a mau; e titauhia i te reira taata ia farii i te Varua Maitai na roto i te tuuraa rima o te taata tei mau i te mana; e e titauhia i te tane ia faatoro‘ahia i te autahu‘araa na roto i te hoê taata tei mau i te autahu‘araa; e titauhia i te hoê taata ia rave i to’na oro‘a hiero e ia taatihia i roto i te fare o te Atua e te peropheta tei mau i te mau taviri, e aore râ, na roto i te hoê o te feia tei horo‘ahia te mau taviri; e e titauhia i te hoê taata ia ora i te hoê oraraa parau-ti‘a, te paieti, te vii-vii ore e te tavini. Aore roa e taata e nehenehe e tomo i roto i te ora mure ore na te tahi atu uputa maori râ, na te uputa ti‘a—o Iesu Mesia e ta’na mau faaueraa.16
Ua haamaitai roa o Iesu i to’na oraraa e ua riro mai ei Mesia no tatou. Ua haamaniihia te toto tao‘a rahi o te hoê atua, e ua riro mai oia ei Faaora no tatou; ua horo‘ahia to’na oraraa maitai roa, e ua riro mai oia ei Taraehara no tatou; na roto i ta’na taraehara ua ti‘a ia tatou ia ho‘i faahou i mua i to tatou Metua i te Ao ra.17
Mai te mea e, aita tatou e tatarahapa, eita tatou e fana‘o hope roa i te maitai e roaa mai na roto i te taraehara rahi e te nehenehe e te maere o te Faaora.18
E oaoa rahi to tatou i te mea e, ua haamaitai mai te Metua i te Ao ra ia tatou na roto i te horo‘araa mai i te evanelia no te tatarahapa. Ua riro ho‘i te reira ei parau tumu faufaa rahi no te mau mea ato‘a i roto i te faanahonahoraa o te evanelia. Te tatarahapa o te ture ïa a te Fatu no te tupuraa i te rahi, ta’na ture no te faahoturaa, e faanahonahoraa na’na no te farii i te oaoa. Te mauruuru maitai nei tatou no to’na fafau-papû-raa mai e, mai te mea e, te vai ra te hara e te hape, te vai ato‘a ra ïa te tatarahapa mau e te hope roa, e i reira te faaoreraa hara e horo‘ahia mai ai.
« E haere mai outou ia‘u nei, e te feia ato‘a i haa rahi, e tei teiaha i te hopoi‘a, e na‘u outou e faaora », te na reira maira te Fatu (Mataio 11:28)
Te vahi hanahana i roto i te taato‘araa o te parau no te tatarahaparaa maori râ, mai te mau papa‘iraa mo‘a tei î roa i te mau faaiteraa papû a te Fatu e, e faaore oia i te hapa, ua î ato‘a te mau papa‘iraa mo‘a i ta’na mau faaueraa ia tatou ia tatarahapa, ia taui i to tatou oraraa e ia faatiti‘aifaro i te reira i ni‘a i ta’na mau haapiiraa nehenehe.
E maitai rahi to te Atua. E hinaaro rahi to’na ia faaore i te hapa. Te hinaaro nei oia ia haamaitai roa tatou i to tatou oraraa e ia haavî ia tatou iho. Aita oia e hinaaro ia Satane e ia vetahi ê ia faatere i to tatou oraraa. E ti‘a ia tatou ia ite e, te haapa‘oraa i te mau faaueraa a to tatou Metua i te Ao ra, o te reira ana‘e ïa te haere‘a e ti‘a ai ia tatou ia haavî ia tatou iho, te haere‘a ana‘e te reira e iteahia ai te oaoa, te parau mau, e te ruperupe hope i roto i teie nei oraraa e a muri noa’tu.19
E iritihia te fare tao‘a no te oaoa i te feia tei haapa‘o i te evanelia a Iesu Mesia ia au i to’na ti‘a mau e te ohie ho‘i… Te feia ato‘a e opua ia ora i to ratou oraraa ma te haapa‘o maite i te evanelia a Iesu Mesia, —e i muri iho, a pee ai i te reira e‘a ta ratou i faanaho, e farii ïa ratou i te oaoa rahi, te oraraa fana‘o i ô nei e te faateiteiraa e te ora mure a muri atu.20
Te feia itoito e te haapa‘o maitai ana‘e o te faateiteihia
Mai te mea e feia parau mau tatou e te haavare ore, e ti‘a mai tatou, eiaha i roto noa i te tahuti ore, i roto ato‘a râ i te ora mure ore. Te tahuti ore o te oraa ïa e a muri noa’tu i roto i te hoê basileia i faataahia. Te ora mure ore o te fariiraa ïa i te faateiteiraa i roto i te ao teitei roa a‘e e te oraraa i roto i te hoê utuafare.21
I te hoê mahana, ua parau te hoê taata e, te hoê noa mea aita oia e au i roto i te Ekalesia Momoni maori râ, te parauraa e, na roto ana‘e i te reira Ekalesia e faaorahia ai te hoê taata. Na ô atura vau ia’na e, « Aita roa, aita matou e parau nei i te reira huru parau. Te parau nei matou e, te feia ti‘aturi i te haapa‘oraa e te feia aita e ti‘aturi i te haapa‘oraa, tera râ, e feia maitai, e faaorahia ïa ratou, tera râ, e rave rahi faito faaoraraa ».22
Te feia e ora mai te au i te huru o te ao nei, e haere atu ïa ratou i roto i te basileia tiretia, tei faaauhia te hanahana i te feti‘a.
Te feia tei vai ti‘a noa e te afaro, e tei ora i te hoê oraraa tura e te maitai, e haere atu ïa ratou i roto i te basileia teretetiera, tei faaauhia te hanahana i te ava‘e.
Te feia tei ti‘aturi i te Mesia, tei faaru‘e i te mau mea o te ao nei, tei faariro i te Varua Maitai ei arata‘i no ratou, e tei faatusia i te mau mea ato‘a na ratou ra, te feia tei haapa‘o i te mau faaueraa a te Atua—e haere atu ïa ratou i roto i te basileia tiretiera, tei faaauhia te hanahana i te mahana.23
Ua oti maitai te haere‘a o te oraraa i te faaitehia, mai te au i te opuaraa hanahana, e farii te feia ratere i te hoho‘a fenua, oia te evanelia a Iesu Mesia, ua faataa-maramarama-maitai-hia te vahi tapaeraa, oia te ora mure ore. Te tia‘i maira te Metua i te reira tapaeraa, ma te ti‘aturi papû e te hepohepo ato‘a no te farii i ta’na mau tamarii e ho‘i atu nei. Te fifi râ ho‘i, e rave rahi o te ore e tae atu.24
No te aha o te tahi ana‘e tuhaa iti o te tapae i te faateiteiraa i roto i te basileia tiretiera ? E ere no te mea e, aita te reira i faataahia no ratou, e ere no te mea e, aita ratou i ite e, ua faataa-ato‘a-hia te reira no ratou, e ere no te mea e, aita te iteraa papû i horo‘ahia ia ratou, no te mea râ e, eita ratou e faaitoito ia reni e ia faaau i to ratou oraraa mai to te Faaora te huru, e ia haamau papû i te reira ia ore ia hahi ê e tae roa’tu i te hopea ra.25
E rave rahi… te mau melo o te Ekalesia e huru haamaoro e te tau‘a ore to ratou, e te faataime noa. Na ni‘a ê noa ta ratou haapa‘oraa i te evanelia, e ere i te haapa‘o papû. Ua haapa‘o ratou i te tahi mau titauraa, e ere râ i te mea itoito. Aita ratou e rave i te mau hara rarahi, aita râ ratou e rave i te mau mea i titauhia ia rave—te mau mea mai te aufauraa i te tuhaa ahuru, te haapa‘oraa i te parau paari, te pureraa i te pure fetii, te haapaeraa i te maa, te haereraa i te mau pureraa, te taviniraa…
… Eita te Fatu e huri i te mau ti‘aturiraa e te mau hinaaro e te mau feruriraa maitai o te hoê taata i roto i te ohipa. Na tatou tata‘i tahi iho e rave i te reira no tatou iho…
Te feia itoito ana‘e te faateiteihia e o te farii i te faito hanahana teitei a‘e, no reira, « e rave rahi te parauhia ra, tera râ, aita rea te ma’itihia ra » (PH&PF 121:40). Mai ta te Faaora i parau, « … te apĭapĭ râ o te uputa e te piri ho‘i o te e‘a e tae atu ai i te ora, e te iti ho‘i o te feia i ite atu i te reira ». E i te tahi pae, « te atea nei ho‘i te uputa e te aano nei te e‘a e tae atu ai i te pohe; e e rave rahi tei na reira i te tomo » (Mataio 7: 13, 14).
Oia mau, e rave rahi Feia Mo‘a i te mau Mahana Hopea nei e feruri nei e, ua bapetizohia ratou e ua haamauhia ei melo no te Ekalesia, e ua farii roa ho‘i te tahi pae i to ratou oro‘a hiero e ua faaipoipohia e ua taatihia i roto i te hiero mo‘a, e no reira, ua papû ia ratou e, e farii ratou i te mau haamaitairaa o te faateiteiraa e te ora mure ore. Tera râ, e ere roa’tu mai te reira. Te vai ra e piti titauraa tumu e titauhia i te mau taata ato‘a ia haapa‘o, ia ore ana‘e, eita ïa e roaa ia ratou te mau haamaitairaa rarahi i pûpûhia mai. E titauhia i te taata ia farii i te mau oro‘a, e ia haapa‘o maitai, ia upootia i ni‘a i to’na mau paruparu. No reira, e ere te taato‘araa o te taata e parau e, e Feia Mo‘a ratou no te mau Mahana Hopea nei o te faateiteihia.
Tera râ, no te Feia Mo‘a itoito i te mau Mahana Hopea nei tei haapa‘o hope roa i te mau titauraa, e mea hanahana ïa te mau fafauraa no ratou, eita e roaa ia faataa:
Ei reira raua e riro ai ei na Atua, no te mea aore to raua e hopea; no reira raua e vai noa’i mai te hopea ore e tae noa’tu i te hopea ore, no te mea ho‘i e haere noa â raua, ei reira raua e vai ai i ni‘a a‘e i te mau mea ato‘a ra, no te mea ua auraro ho‘i te mau mea ato‘a ia raua ra. Ei reira raua e riro ai ei na atua, no te mea tei ia raua te mau mana ato‘a ra, e e auraro atu te mau melahi ia raua ra » (PH&PF 132:20).26
Ia ite ana‘e te taata i te aano, te faufaa, te hanahana no te « mau mea ato‘a » ta te Fatu i fafau i te niinii i ni‘a i ta’na mau taata haapa‘o, e hoona ïa te mau mea ato‘a i ravehia na roto i te faaoromai, te faaroo, te tusia, te hou e te mau roimata. E afai atu te mau haamaitairaa no te mure-ore-raa i roto i teie nei « mau mea ato‘a » i te taata te tahuti ore e te ora mure ore, te tupuraa mure ore, te faatereraa hanahana, te rahiraa mure ore, te maitai-roa-raa, e na muri atu i te reira, te atuaraa.
Te mau mana‘o tauturu no te tuatapaparaa e te haapiiraa
A feruri i teie nei mau mana‘o a tuatapapa ai outou i te pene aore râ, a faaineine ai outou i te haapii. No te tahi atu tautururaa, a hi‘o i te mau api v–xi.
-
A hi‘o faahou i te paratarafa toru i te api 2 e te taato‘araa o te paratarafa toru i te api 3, i reira ho‘i to te peresideni Kimball faataaraa i ta tatou pahonoraa i roto i te oraraa matamua i te faanahonahoraa a te Metua i te Ao ra. I to outou mana‘oraa no te aha tatou i pahono ai mai te reira te huru ?
-
A hi‘o i te taato‘araa o te mau paratarafa piti e te toru i te api 4. Eaha ta outou e rave no te farii i te oaoa i roto i te oraraa nei ma te haamo‘e ore i ta outou « opuaraa faufaa » ?
-
A tuatapapa i te mau haapiiraa a te peresideni Kimball no ni‘a i te mau tumu o te tahuti nei i ni‘a i te mau api 4–6. Mai te au i teie nei mau haapiiraa, i to outou mana‘oraa no te aha te faataimeraa i riro ai « te hoê o te mau paruparu rahi roa o te taata » ? Nahea e nehenehe ai ia tatou ia upooti‘a i teie nei huru ?
-
Ua haapii te peresideni Kimball e, e au te evanelia a Iesu Mesia mai te hoê tabula fenua o te arata‘i ia tatou i te faateiteiraa (te mau api 6–9). A feruri na e, tei hea outou i teie nei i roto i teie tere, e eaha te ti‘a ia outou ia rave no te haere tamau â i mua.
-
I to outou mana‘oraa eaha te auraa no te parau ra, ia itoito i roto i te evanelia ? (no te tahi mau hi‘oraa, a hi‘o i te mau api 9–11 e i te aamu i ni‘a i te api 1). No te aha te riroraa ei melo no te Ekalesia e te iteraa i te evanelia eita te reira e rava’i no te farii i te faateiteiraa i roto i te basileia tiretiera ?
Te mau papa‘iraa mo‘a: Iakobo 1:22; Alama 34:30–41; 3 Nephi 27:13–22; PH&PF 76:50–93; Aberahama 3:22–26
Mai tei anihia e te peresideni Kimball, teie atura te faaho‘iraa no te himene ra « E tamarii au na te Atua ra »: « Haapii mai ia‘u i te mau mea ato‘a ta‘u e rave no te parahi i piha‘i iho ia’na i te hoê mahana ».
« Te hoê opuaraa papû maitai o te haereraa mai to tatou varua i ni‘a i te fenua nei e ia farii i te ai‘araa tahuti nei no te farii ïa i te hoê tino tahuti ».
« Ua haamaitai roa o Iesu i to’na oraraa e ua riro mai ei Mesia no tatou… Na roto i ta’na taraehara ua ti‘a ia tatou ia ho‘i faahou i mua i to tatou Metua i te Ao ra ».