Pene 23

Te mau tia‘i no te nănă

Te vai ra te parururaa ia turu e ia pee ana‘e i te peropheta e i te tahi atu mau taata faatere no te Ekalesia.

No roto mai i te oraraa o Spencer W. Kimball

Ua haapii pinepine te peresideni Spencer W. Kimball i te faufaa rahi no te tururaa i te feia faatere i roto i te mau paroita e te mau tĭtĭ e te mau Hui Mana Faatere o te Ekalesia. I roto i te pureraa autahu‘araa no te amuiraa rahi i te ava‘e eperera 1978, ua haamana‘o oia i te mau mana‘o ta’na i farii i to’na apîraa no te mau taata ato‘a tei tavini ei episekopo no’na: « Ua farii noa matou i te hoê episekopo maitai. Ua here noa matou ia’na. Te vai nei te Episekopo Zundel e te Episekopo Moody e te Episekopo Tyler e te Episekopo Wilkins. Ua here au i to‘u mau episekopo ato‘a. Te ti‘aturi nei au e e here te taato‘araa o to‘u mau taea‘e apî i to ratou episekopo mai ia‘u i na reira ».¹

I roto i te tahi atu a‘oraa ua parau oia e: « Te haamana‘o nei au i to‘u haereraa mai i teie nei fare menemene [Te Fare Menemene no Roto Miti] mai te hoê tamarii rii no Arizona, na muri i to‘u metua tane, no te haere mai i te amuiraa rahi. Ua faahiahia roa vau i te faarooraa i te mau taea‘e ato‘a i te a‘oraa… Ua faahiahia roa i ta ratou mau a‘oraa e ua haapa‘o maitai vau i ta ratou mau faaararaa, e tae noa’tu i to‘u vai taure‘are‘araa. Ua riro teie nei mau taata e mau peropheta a te Atua, mai te mau peropheta o te Buka a Moromona e o te Bibilia ».²

Ua faaite pinepine te peresideni Kimball i to’na haamauruuru i te mau melo no to ratou hinaaro ia paturu ia’na e te tahi atu feia faatere o te Ekalesia: « I te mau vahi ato‘a e haere au, te vai nei te hoê faaiteraa rahi no te here e te hamani maitai, e te haehaa nei to‘u aau i te mauruuru no te reira. E mana te reira no to‘u aau. Te turu nei ta outou mau pure e to outou here ia‘u. Te faaroo nei te Fatu i ta outou mau pure e te haamaitai mai nei oia ia‘u e i to‘u mau taea‘e ma te tino maitai e te puai e te arata‘i nei oia ia matou i roto i te ohipa o to’na basileia i ni‘a i te fenua nei. Te mauruuru rahi nei matou paato‘a no te reira » ³ Ua parau ato‘a oia no te here ta’na e te tahi atu mau taata faatere no te Ekalesia e ite nei no te Feia Mo‘a: « Te here nei matou ia outou e te nunaa e te parau atu nei matou ia outou ia maitai outou e ia oaoa e ia poupou outou, e ua ite matou e e nehenehe te reira e tae mai na roto ana‘e i te peeraa i te mau a‘oraa a te Atua mai tei porohia na roto i ta’na mau peropheta e ta’na feia faatere ».⁴

Te mau haapiiraa a Spencer W. Kimball

Te arata‘i nei te Fatu i Ta’na Ekalesia na roto i te feia faatere tei ma‘itihia e to te ra‘i

Te ti‘a nei te Fatu te Faaora, te Fatu ra o Iesu Mesia iho, i te upoo o teie nei Ekalesia i roto i te taato‘araa o to’na ra hanahana. Te arata‘i nei oia i ta’na mau ohipa na roto i ta’na mau peropheta e aposetolo tei ma‘itihia e to te ra‘i e tei turuhia.⁵

Te faaterehia nei te mau ohipa a te Ekalesia a Iesu Mesia e te peresideniraa o te Ekalesia e te Tino Ahuru ma Piti Aposetolo, ma te tauturuhia e te tahi atu mau Hui Mana Faatere e rave rahi, e na roto ato‘a i te mau peresideni tĭtĭ e te mau peresideni misioni e te mau episekopo. Teie nei mau taata o te mau tia‘i mamoe ïa no te nănă. Ua faataa te Fatu i teie nei mau taata no te arata‘i i to’na basileia i ni‘a i te fenua nei, e ua tuu oia i ni‘a iho ia ratou te mana e te hopoi‘a, te taata tata‘i tahi i roto i ta’na iho tuhaa no te hopoi‘a. Ua horo‘a oia i teie nei mau taata te Autahu‘araa a Melehizedeka, o to’na iho ho‘i puai e te mana tei horo‘ahia i te mau taata. Te ite nei e te haamana nei oia i te mau ohipa a teie nei mau tavini tei ma‘itihia e tei faatahinuhia.⁶

Teie to‘u iteraa papû ia outou e ua ma‘itihia te feia faatere i roto i teie nei Ekalesia a Iesu Mesia e to te ra‘i e ua faataahia ratou no te arata‘i na roto i te varua tohu mai te au i roto i te tahi atu mau tau tuuraa evanelia.⁷

Ua horo‘a te Fatu i te mau melo ato‘a no teie nei Ekalesia te feia faatere i ni‘a i na faito e toru: te Episekopo aore râ te peresideni Amaa, te peresideni tĭtĭ aore râ te peresideni misioni, e te mau Hui Mana Faatere. E feia faatere ti‘aturihia teie mau faatere. Eita paha te hoê o ratou i te mea maramarama roa i te pae no te ite, te haapiiraa aore râ i te haapiipiiraa, e ti‘a râ ia’na ia faarii i te mau heheuraa a te Fatu no to’na nunaa e e matara ia’na te e‘a e haere ti‘a atu i te Atua ra.⁸

Mai te tau o te faasatauroraa, e rave rahi tauasini taata tei piihia e te Faaora no te amo i te mau ti‘araa faatere, aita ro‘atu te hoê o ratou i te mea maitai roa, ua piihia râ ratou e te Fatu e e ti‘a ia ratou ia turuhia e ia paturuhia e te mau feia o te riro mai ei mau pĭpĭ na te Fatu. O tera ïa te varua mau o te evanelia.⁹

E paruru teie nei mau faatere tei ma‘itihia, tei faariihia e tei faatoro‘ahia ia tatou i te « rave‘a a te taata nei, e te paari i te mau peu ato‘a o te haavare ra ». [Ephesia 4:14]. E ore roa te hoê taata e nehenehe ia haavarehia mai te mea e paruru oia ia’na iho i te arata‘iraa matapô aore râ iino na roto i te peeraa’tu i te Varua e te feia faatere ti‘a o te Ekalesia.¹⁰

Aita’tu e feia tei hau atu i te pe‘ape‘a maori râ te mau taea‘e Faatere o te ti‘a nei i te upoo o teie nei Ekalesia no te farii i taua arata‘iraa mai ta te Fatu e horo‘a’tu ia ratou no te maitai o te taata e no te nunaa o te Ekalesia.¹¹

Ua ite au e te parauparau nei te Fatu i ta’na mau peropheta, e te heheu nei oia i te parau mau i teie nei mahana i ta’na mau tavini mai ta’na i na reira i te tau o Adamu, o Aberahama, o Mose, o Petero e o Iosepha e e rave rahi atu â mau taata na roto i te mau tau i haerehia mai. Ua horo‘a papûhia te mau parau poro‘i no te maramarama e te parau mau a te Atua i te taata nei i teie nei mahana mai tei horo‘ahia i roto i te mau tau tuuraa evanelia ato‘a.¹²

Te haapii nei te mau peropheta i te hoê â mau parau poro‘i

Te uiui nei paha te tahi no teaha te mau Hui Mana Faatere e parauparau ai i ni‘a noa rae â i taua mau mea ra mai tera amuiraa e i tera amuiraa. I to‘u tai‘oraa i te mau faahitiraa parau a te mau peropheta i roto i te mau tenetere, e mea maramarama maitai te arata‘iraa no ta ratou mau a‘oraa. Mai te au i te mau parau a Alama te imi nei matou i te haapii i te mau taata « i te riri tuutuu ore i te ino e te hara ». Te a‘o nei matou i « te tatarahapa, e te faaroo i te Fatu ra ia Iesu Mesia » (Alama 37:32, 33). Te haapii nei matou e ia haehaa noa. Te tutava nei matou i te haapii i te mau taata « ia patoi atu ratou i te mau faahema ato‘a a te diabolo, na roto i te faaroo i te Fatu ra ia Iesu Mesia » (Alama 37:34).

Te parau nei te mau peropheta i taua noa rae â mau mea no te mea te faaruru nei tatou i taua â mau fifi. E te mau taea‘e e te mau tuahine here e, aita te mau faaotiraa no teie nei mau fifi i taui. E ere ïa te fare mori maitai ia horo‘a ana‘e te hoê fare mori i te hoê tapa‘o faaite ê atu no te arata‘i i te mau pahi ato‘a ia tomo atu i roto i te hoê tapaeraa pahi. E ere ïa te taata arata‘i maitai na ni‘a i te mou‘a te taata arata‘i o te ite i te poromu papû na te pae mou‘a e o te arata‘i atu i te mau taata tei faataahia i roto i to’na rima na ni‘a i te mau haere‘a papû ore e te ataata e ore roa ho‘i te taata ratere e ho‘i faahou mai.¹³

I te mau taime ato‘a e haapii matou ia outou, eita e nehenehe i te feia faatere no te Ekalesia ia horo‘a i te hoê poromu apî aore râ tei hau atu i te nehenehe o te arata‘i ti‘atu i mua i te aro o to tatou Metua i te Ao ra. Aita te poromu i taui noa‘e. No reira, e ti‘a ia horo‘a-pinepine-hia te faaitoitoraa no ni‘a i taua mau mea e e ti‘a ia parau-faahou-hia te mau faaararaa. E ere no te mea ua tapitihia te hoê parau mau i te faahitihia i riro ai taua parau mau ra ei mea faufaa ore aore râ e ere i te parau mau. Oia mau, ia ore ana‘e râ tatou e faahiti pinepine e ere ïa te reira i te parau mau.¹⁴

E nehenehe ta‘u e mana‘o e ahani te Fatu iho e ti‘a ra i ni‘a i te Mou‘a ra o Oliveta e te haapii ra oia i te mau taata, e e parau ïa oia i taua mau mea iho tei parauhia e o te parauhia [i roto i ta tatou mau amuiraa]. E nehenehe ta‘u e mana‘o ahani e ti‘a noa ra oia i te pae o te roto i Galilea e te mau poti i roto i te miti e te mau taata e ti‘a haati noa ra ia’na, e parau ïa oia i te hoê â mau mea: ia haapa‘o i te mau faaueraa, ia paruru ia tatou iho ia ore tatou ia viivii i te mau mea no teie nei ao, e ia haapa‘o i te mau faaueraa ato‘a ta te Atua i horo‘a mai ia tatou. O tera ïa te mea ta’na e parau, e no reira te parau nei oia i teie nei mau mea na roto mai i ta’na mau tavini.¹⁵

Ua pinepine te mau peropheta i te haafaufaa-ore-hia aore râ i te pato‘ihia i to ratou iho tau.

Ia pee ana‘e to te ao i te mau peropheta, ua nuu ïa to te ao i mua haamata aita ana‘e to te ao e faaroo ia ratou, te hopea o te tupu-ore-raa ïa, te haaviraa, e te pohe.¹⁶

E rave rahi i roto ato‘a i te Ekalesia e hinaaro nei i te faaunauna i te mau menema o te mau peropheta tahito e i te pehi i te pae feruriraa i te mau peropheta ora [a hi‘o Mataio 23:29–30, 34].¹⁷

Eiaha tatou e rave i te hape a te feia i mutaa ihora. E rave rahi mau taata no tera faaroo e tera faaroo e ti‘aturi nei i teie nei mahana i te mau Aberahama, te mau Mose e te mau Paulo tera râ o te pato‘i nei i te ti‘aturi i te mau peropheta no teie nei mahana. Ua farii te feia no mutaa ihora i te mau peropheta no te tau na mua noa‘e ia ratou, ua faahapa e ua tuhi râ ratou i te mau peropheta tei ora i to ratou tau.¹⁸

E rave rau te mau otoheraa o tei faaohipahia i roto i te mau tenetere no te ore e farii i teie nei mau ve‘a no te ra‘i mai [te mau peropheta ora]. Ua vai te pato‘iraa no te mea no roto mai te peropheta i te hoê vahi pouri. « E maitai anei to Nazareta mai ? » (Ioane 1:46). Ua faaruru ato‘a o Iesu i te uiraa, « E ere anei teie te tamaiti a te tamuta ra ? » (Mataio 13:55). Na roto i te hoê aore râ te tahi ê atu rave‘a, te rave‘a vitiviti roa‘e no te pato‘iraa i te mau peropheta ora o te imiraa ïa i te hoê tumu, e mea hape anei aore râ e mea maamaa anei, no te faatea ê atu i te taata ia nehenehe ato‘a i ta’na parau poro‘i ia faatea-ê-hia’tu. Te mau peropheta e reo navenave ore to ratou, aore râ e reo maumau, aita ïa ratou e haapa‘o-noa‘e-hia. Aita ratou i pahono i te poro‘i a Paulo, ua hi‘o ra te tahi i te huru o to’na tino ei mea paruparu e to’na reo e reo vahavaha ïa. [a hi‘o 2 Korinetia 10:10]. Penei a‘e ua haava ratou ia Paulo na ni‘a i te ta‘iraa o to’na reo aore râ na ni‘a i te huru no ta’na parau, aita râ i haava mai te au i te mau parau mau ta’na i faahiti.

No te rahi e te fifi o te mau mea no teie nei ao, te hahi ê ato‘a nei ïa te mau taata maitata‘i i te peeraa’tu i te parau mau no te mea ua rahi to ratou haapa‘oraa i te mau mea no teie nei ao…

I te tahi mau taime no te mea ua faatumuhia to ratou mau aau i ni‘a i te mau mea no teie nei ao aita te taata i haapii mai te mau haapiiraa o te ti‘a roa ia ratou ia haapii mai. E mea pinepine i te mau parau mau ohie i te pato‘ihia no te mau haapiiraa titau orehia a te taata nei, e o teie ato‘a te tahi tumu no te pato‘iraa i te mau peropheta…

Aita te mau peropheta mo‘a i pato‘i noa i te pee atu i te mau peu hape a te taata, ua faaite ato‘a râ ratou i teie nei mau hape. Aita ïa e maereraa no ni‘a i te tumu o te tau‘a-ore-raa te taata i te mau peropheta. E mea pinepine te mau peropheta i te pato‘ihia no te mea o ratou te feia matamua o tei pato‘i i te mau peu hape o to ratou iho sotaiete…

E rave‘a ihoa ta te mau peropheta i te faarepurepu i te mana‘o taata. E mea pinepine te mau peropheta mo‘a i te hi‘o-hape-hia mai te au i te mau taata iria e te pe‘ape‘a ia tapa‘ohia ta ratou mau parau e ia nehenehe ia ratou ia parau, « Ua parau vau ia outou e eaha te tupu mai ». Taua mau peropheta ta‘u i matau o te mau taata aroha roa‘e ïa i te mau taata ato‘a. No to ratou aroha e to ratou parau-ti‘a i ore ai e nehenehe ia ratou ia faahuru ê i te parau poro‘i a te Fatu no te faatupu noa i te mana‘o maitai i roto i te mau taata. No to ratou maitai rahi i ore ai e nehenehe ia ratou ia riro ei feia ino. Te mauruuru nei au no te mea e aita te mau peropheta e imi nei i te roo maitai i rotopu i te mau taata.¹⁹

E ti‘a i te mau metua ia haapii i ta ratou mau tamarii ia paturu e ia pee i te feia faatere no te Ekalesia

Nahea outou e haapii ai i ta outou mau tamarii ia here i te feia faatere o te Ekalesia ? Mai te mea e parau tamau noa outou i te mau mea maitai no ni‘a i te peresideniraa amaa, te peresideniraa mataeinaa, te peresideniraa misioni e te peresideniraa o te Ekalesia, e rahi ïa te here o ta outou mau tamarii i te mau taea‘e.²⁰

E pure tatou no te feia faatere no te Ekalesia. Mai te mea, i roto i ta ratou mau pure, ia tae i to ratou taime no te pure i roto i te mau pure utuafare e i roto ato‘a i ta ratou mau pure o ratou ana‘e i te mau mahana ato‘a, e haamana‘o te mau tamarii i mua i te Fatu i te feia faatere no te Ekalesia, eita roa ïa ratou e topa noa‘e i roto i te taivaraa…

Te mau tamarii o te pure no te mau taea‘e e rahi ïa to ratou here ia ratou a tupu ai ratou i te paari, e parau ratou i te parau maitai no ratou, e faatura e e pee ratou i to ratou hoho‘a… Te feia o te faaroo i te mau mahana ato‘a i te parau no te feia faatere no te Ekalesia o tei faahitihia i roto i te pure na roto i te here hohonu e ti‘aturi ïa ratou i te mau a‘oraa e te mau faaararaa ta ratou e faaroo.

Ia parauparau ana‘e te mau tamaroa i te Fatu no ni‘a i to ratou episekopo, e e haapa‘o maitai ïa ratou i te mau uiuiraa e te episekopo i reira ho‘i te mau faanuuraa i roto i te autahu‘araa e te mau haamaitairaa no te misioni e no te hiero e tuatapapahia’i. E e noaa ato‘a i te mau tamahine te hoê faaturaraa puai no te mau tereraa ato‘a o te ekalesia ia pure ana‘e ratou no te feia faatere no te Ekalesia.²¹

O ratou o te pee i te feia faatere no te Ekalesia e paruruhia ïa ratou.

E paruru-noa-hia te mau melo no te Ekalesia mai te mea e pee maite ratou i te mau haapiiraa e te mau a‘oraa e te arata‘iraa a te feia faatere no te Ekalesia.²²

Te feia faatere ta te Fatu i tuu i roto i ta’na Ekalesia ua riro ïa no te nunaa o te Ekalesia ei vahi tapaeraa pahi, ei hoê vahi no te parururaa, ei pou taamuraa mai te reira te huru. Eita roa te hoê i roto i teie nei Ekalesia e hahi ê atu mai te mea e taamu papû atu oia ia’na i ni‘a i te feia faatere no te Ekalesia ta te Atua i tuu i roto i ta’na Ekalesia. Eita roa’tu teie nei Ekalesia e hahi ê atu, eita roa’tu te Tino Ahuru ma Piti Aposetolo e arata‘i ê atu ia outou i te mau e‘a hape; aita roa oia i na reira e e ore roa oia e na reira. Te vai nei te mau taata o te hahi ê; eita roa râ te rahiraa o te Tino Ahuru ma Piti Aposetolo e vai i te pae hape i te hoê noa‘e taime. Ua ma‘iti te Fatu ia ratou; ua horo‘a oia ia ratou te mau hopoi‘a taaê mau. E e paruruhia te feia e ti‘a’tu i piha‘i iho ia ratou. E, mai te mea râ e haamata te hoê taata i te haere i to’na haere‘a ma te pato‘i i te mana, tei roto ïa oia i te ati rahi. Aita vau e parau nei e taua feia faatere ta te Fatu i ma‘iti o te feia maramarama roa‘e ïa, e te feia haapiipii-rahi-roa‘e ïa, tera râ o ratou o tei ma‘itihia, e ei mau taata o tei ma‘itihia e te Fatu o ratou ïa to’na mana faatere i haamanahia, e e paruruhia ïa te feia e faaea piri atu ia ratou.²³

Mai te mea e ora tatou i te evanelia e e pee atu tatou i te a‘oraa a te feia faatere o te Ekalesia, e haamaitaihia ïa tatou i te aperaa i te mau fifi e rave rahi e ta‘iri nei i to te ao.²⁴

E faaroo na tatou i te feia ta tatou e paturu nei ei mau peropheta e ei mau hi‘o, e i te tahi ato‘a mau taea‘e, mai te mea râ tei ni‘a ia ratou to tatou ora mure ore, no te mea tei ni‘a mau ihoa ia ratou ! ²⁵

Te mau mana‘o tauturu no te tuatapaparaa e te haapiiraa

A feruri i teie nei mau mana‘o a tuatapapa‘i outou i te pene aore râ a faaineine ai outou i te haapii. No te tahi atu tautururaa, a hi‘o i te mau api v–xi.

A feruri na nahea to outou oraraa i haamaitaihia ai a paturu ai outou i te feia faatere no te Ekalesia i ni‘a i na faito e toru tei faaitehia mai e te peresideni Kimball (a hi‘o i te api 300). A na reira ai outou, eaha te mau ohipa tei tupu o te tae mai i to outou feruriraa ?
A tai‘o i te tuhaa o e haamata i te api 303. Eaha te tahi mau poro‘i e ho‘i noa mai nei ta outou i ite i roto i te mau amuiraa i tupu iho nei ?
A tai‘o i te taato‘araa o te toru e te maha o te mau paratarafa i te api 305. I to outou feruriraa no teaha te tahi mau taata e mana‘o ai e mea fifi roa i te pee atu i te mau peropheta ora ? Eaha te tahi mau hioraa o ta outou e haamana‘o ra e o ta outou i ite aita i maoro a‘e nei ?
Eaha ta tatou e nehenehe e rave no te faaitoito i te mau tamarii e te tahi atu mau taata ia faatura e ia pee i te feia faatere no te Ekalesia ? (No te tahi mau hi‘oraa, a hi‘o i te api 307).
A tai‘o i te tuhaa hopea no te pene. No teaha tatou e paruruhia’i ia pee ana‘e tatou i te a‘oraa a te feia faatere no te Ekalesia ?

Te mau papa‘iraa mo‘a: Ephesia 2:19–20; 4:11–16; Helamana 13:24–29; PH&PF 1:14, 38; 21:4–6; 121:16–21

President Kimball greeting people — Te farii ra te peresideni Kimball i te mau taata a tomo atu ai oia i roto i te Fare Menemene no Roto Miti no te amuiraa rahi.

Paul teaching — « Aita ratou i pahono i te poro‘i a Paulo, ua hi‘o râ te tahi i te huru o to’na tino ei mea paruparu e to’na reo e reo vahavaha ïa ».