Pene 2

E ati e aore râ, e haere‘a faataahia ?

Ia farerei ana‘e tatou i te ati o te oto, te mauiui e te pohe, e ti‘a ia tatou ia tuu i to tatou ti‘aturiraa i ni‘a i te Atua.

No roto mai i te oraraa o Spencer W. Kimball

I to’na apî-roa-raa ra, ua farerei o Spencer W. Kimball i te mauiui na roto i te poheraa te mau taata tei herehia e ana. E va‘u to’na matahiti i pohe ai to’na tuahine o Mary tau taime rii noa i muri a‘e i to’na fanau-raa-hia mai. Hoê ava‘e i muri iho, ua ite a‘era na metua o Spencer e, ua fatata ato‘a o Fannie i te pohe, e pae matahiti to’na, e e rave rahi hepetoma i teie nei to’na mauiui-noa-raa. I muri mai, te faati‘a ra o Spencer i te parau no te mahana a pohe ai o Fannie: « I te iva o to‘u matahiti, ua pohe o Fannie i roto noa i te rima o mama. Ua ara matou paato‘a te mau tamarii i taua pô ra no te ite i te reira. Te haamana‘o noa nei au i te mea ta‘u i ite i roto i to matou piha faafaaearaa…, oia ho‘i, to‘u mama here te ta‘i noa ra ma te tape‘a i ta’na tamarii iti na’ina’i e pae matahiti i roto i to’na na rima, ua fatata roa i te pohe, e o matou paato‘a i te haatiraa na te hiti ».¹

Te tahi mea fifi roa’tu no teie tamaiti apî roa o Spencer maori râ, te mau parau api ta’na i farii e piti matahiti i muri mai, i te taime a piihia mai ai ratou, o’na e to’na mau taea‘e e te mau tuahine i te fare haapiiraa i te hoê po‘ipo‘i no te ho‘i atu i te fare. Ua horo ana‘e atura ratou i te fare, e i reira, ua farerei maira to ratou episekopo ia ratou e ua haaputuputu ia ratou i piha‘i iho ia’na, e ua parau atura ia ratou e, ua pohe to ratou mama i nanahi atura. I muri a‘e, ua haamana‘o te peresideni Kimball e: « Ua tae mai taua parau ra mai te haruru patiri te huru. Ua horo atura vau i rapae i muri mai i te fare, o vau ana‘e no te ta‘i. Aita hoê taata e ite mai ia‘u, aita e faaroo mai, i te atea roa vau i te taata, i reira to‘u ta‘i-noa-raa. I te mau taime ato‘a e faahiti au i te parau ra e, ‘Ma’ e manii faahou mai te roimata apî e tae roa’tu e, ua pau roa te reira i te tahe noa. Ua pohe o Mama ! Aita e nehenehe ia’na ia pohe ! Eita matou e ora faahou… Mai te mea ra e, te parari ra to‘u mafatu, teie mafatu ahuru ma hoê matahiti ».²

E pae ahuru matahiti i muri a‘e, tei te atea ê roa o Elder Spencer W. Kimball i to’na nohoraa i taua taime ra, inaha, te rapaauhia ra oia i muri a‘e i te hoê tapuraa rahi. E melo oia i roto i te Pŭpŭ no te Tino Ahuru Ma Piti Aposetolo i taua taime ra. Aita e nehenehe ta’na e taoto, no reira, ua haamana‘o noa oia i te mahana a pohe ai to’na mama: « Mai te mea ra e, te ta‘i faahou nei au i teie taime… ia haamana‘o vau i taua mau taime pe‘ape‘a ra ».³

I roto i te mau taime oto rahi mai teie te huru, i roto i te pure e te mau parau tumu o te evanelia e iteahia ai te hau ia Spencer W. Kimball. I to’na apî-roa-raa ra, ua ite oia e, i hea e fariu ti‘a ai no te farii i te hau. Ua papa‘i te hoê hoa o te utuafare no ni‘a i te mau pure a Spencer i to’na apî-roa-raa ra— « Ua riro mau te mo‘eraa o to’na metua vahine ei teimaha rahi i ni‘a i to’na mafatu iti, tera râ, ua aro oia ma te itoito i to’na mauiui e ua titau i te tamahanahana i te vahi hoê roa i reira e roaa mai ai ».⁴

I roto i ta’na tau faatereraa, e mea pinepine te peresideni Kimball i te faahiti i te mau parau tamahanahana i te feia tei oto na roto i te mo‘eraa tei herehia e ratou. Ua faaite papû oia i te mau parau tumu mure ore, ma te haapapû i te Feia Mo‘a e, e ere te pohe i te hopea o te oraraa nei. A paraparau ai oia i roto i te hoê oro‘a hunaraa te na ô ra oia e:

« Ua taoti‘ahia to tatou iteraa. Na roto i teie mata to tatou, e nehenehe ta tatou e ite i te tahi noa maile te atea. Na roto i to tatou tari‘a e nehenehe ta tatou e faaroo i te tahi noa tau matahiti rii. Mai te huru e, ua opanihia tatou, ua tamauhia tatou i roto i te hoê piha, tera râ, ia haere atu to tatou maramarama i rapae au i teie oraraa, i reira tatou e ite atu ai i ô mai i te mau otia o te tahuti nei…

« E marua te mau papa‘i, e hope te taime, e morohi e e mo‘e roa’tu ai te atearaa a tomo ai tatou i roto i te tau mure ore… e i reira tatou e ti‘a mai ai i roto i te hoê ao rahi aita e taoti‘araa to reira ».⁵

Te mau haapiiraa a Spencer W. Kimball

I roto i To’na paari, eita te Atua e faaore i te ati i te mau taime ato‘a.

I roto i te ve‘a ua papa‘i-aano-hia te parau ra: « 43 taata i Pohe i roto i te Ati Manureva. Aita hoê a‘e taata i ora i roto i teie ati perehi i ni‘a i te mou‘a ». e i reira, ua piihua te mau reo ato‘a e: « Eaha te Fatu i vaiiho ai ia tupu teie ohipa rahi ri‘ari‘a ? »

Ua û e piti pereoo uira no te oreraa te tahi pereoo e haapa‘o i te mori uteute, e ono taata tei pohe. No te aha aita te Atua i tape‘a ia ore te reira ia tupu ?

No te aha teie mama apî roa i pohe ai i te ma‘i mariri ai taata, ma te vaiiho mai i ta’na na tamarii toova‘u aita e metua vahine faahou ? No te aha aita te Fatu i faaora i to’na ma‘i ?

Ua paremo te hoê tamarii na’ina’i; ua perehu te tahi i te pereoo. No te aha ?

I te hoê mahana, ua pohe ta‘ue noa te hoê taata no te mea ua mau te taheraa toto i roto i te uaua e haere ra i roto i te mafatu, a ta‘uma ai oia i te e‘a fare. Ua itehia’tu to’na tino te tarava noa ra i ni‘a i te tahua. Ua aue ta’na vahine ma te oto rahi, « No te aha ? No te aha te Fatu i na reira ai ia‘u ? Aita anei oia i feruri i ta‘u na tamarii na’ina’i tootoru e hinaaro noa nei â i te hoê metua tane ? »

Ua pohe te hoê taure‘are‘a i roto i ta’na misioni, e ua uiui maere te taata e: « No te aha aita te Fatu i paruru i teie taure‘are‘a, inaha, te rave nei ho‘i oia i te ohipa pororaa i te evanelia ? »

Ua hinaaro vau ia ite nahea ia pahono i teie mau uiraa ma te mana, aita râ e nehenehe ia‘u. Ua papû ia‘u e, te vai ra te taime e maramarama ai tatou e e hau ai tatou. No teie râ taime, e ti‘a ia tatou ia imi maite i te ite i roto i te mau parau tumu no te evanelia.

Na te Fatu anei i faaû i te manureva i ni‘a i te mou‘a no te iriti ê i te ora o te mau taata i roto, e aore râ, e hape anei no te manureva, e aore râ, e hape anei na te taata ?

To tatou anei Metua i te Ao ra te tumu no te ûraa na pereoo uira, a rave-ê-hia’tu ai e ono taata i te ao mure ore, e aore râ, e hape anei na te taata faahoro tei ore i haapa‘o i te mau ture no te tereraa pereoo ?

Na te Atua anei i rave ê atu i te ora o teie metua vahine apî e aore râ, i faaue i te tamarii ia haere e marua’tu ai i roto i te anava‘i pape, e aore râ, i arata‘i i te tahi tamarii i ni‘a i te tereraa o te pereoo ?

Te Fatu anei te tumu i roohia ai te hoê taata i te ma‘i mafatu ? Aitâ anei i tae atura i te taime e pohe ai teie misionare ? A pahono mai te mea e, e nehenehe ta outou. Eita e nehenehe ta‘u, no te mea, ua ite au e, noa’tu e, e ohipa rahi ta te Atua e rave nei i roto i to tatou oraraa, aita vau i ite e, e hia rahiraa ta’na i faatupu, e e hia rahiraa ta’na i faati‘a. Noa’tu te huru o te pahonoraa i teie uiraa, te vai ra hoê ta‘u i papû maitai.

Ua nehenehe anei i te Fatu ia tape‘a i teie mau fifi ? Te pahonoraa, E. Tei te mau vahi ato‘a te Fatu, e e mana rahi to’na no te faatere i to tatou mau oraraa, no te faaora ia tatou i te mauiui, no te paruru ia tatou i te mau ati, no te faatere i te mau manureva e te mau pereoo uira, no te faaamu ia tatou, no te paruru ia tatou, no te faaora ia tatou i te rohirohi, i te haaraa, i te ma‘i, e i te pohe ato‘a, mai te mea e, e hinaaro oia. Eita râ oia e na reira.

Mea ti‘a ia tatou ia maramarama i teie parau, no te mea, e ite tatou e, e ohipa hape roa ia paruru tatou i ta tatou mau tamarii i te mau tautooraa ato‘a, i te mauruuru ore, te mau faahemaraa, te mau oto e te mauiui.

Te ture tumu o te evanelia o te ti‘amâraa ïa e te tupuraa mure ore. Mai te mea e, e faahepohia tatou ia haapa‘o maitai, e aore râ, ia vai parau-ti‘a noa, te haamouhia ra ïa taua ture tumu ra, e aita ïa e tupuraa to reira.⁶

I roto i te hoê hi‘oraa mure ore, e maramarama tatou e, e mea faufaa te ati no to tatou haereraa mure ore i mua.

Mai te mea e, e hi‘o tatou i te oraraa tahuti nei mai te taato‘araa o te oraraa, e riro ïa te mauiui, te oto, te manuia ore e te oraraa poto ei ati rahi. Mai te mea râ e, e hi‘o tatou i te oraraa mai te hoê mea mure ore tei haamata i roto i te oraraa hou teie nei oraraa, e o te taahuri atu i ô mai i te pohe, i reira te mau mea ato‘a e vai ai i roto i to ratou ra ti‘araa mau.

Aita anei e paari to roto i to’na horo‘araa mai ia tatou i te mau tamataraa ia ti‘a ia tatou ia upootia i ni‘a i te reira, to’na ato‘a horo‘araa mai i te mau hopoi‘a ia ti‘a ia tatou ia rave faaoti, to’na horo‘araa mai i te ohipa no te haapaari i to tatou mau uaua, to’na horo‘araa mai i te oto no te tamata i to tatou varua ? Aita anei tatou i tuuhia i mua i te mau faahemaraa no te tamatamata i to tatou paari, i mua i te ma‘i ia ti‘a ia tatou ia haapii i te faaoromai, i mua i te pohe ia ti‘a ia tatou ia riro mai ei mea tahuti ore e te faahanahanahia ?

Ahiri i faaorahia te feia ma‘i ato‘a ta tatou e pure nei, ahiri i paruruhia te feia parau-ti‘a ato‘a e i haamouhia te feia iino, ua mou ato‘a ïa te taato‘araa o te faanahonahoraa a te Metua, e ua ore ato‘a ïa te ture tumu o te evanelia, oia ho‘i, te ti‘amâraa. Aita ïa te taata e ora faahou na roto i te faaroo.

Ahiri i horo‘ahia mai te oaoa, te hau e te haamauruururaa i te taime ihoa a titau ai te taata rave ohipa maitai i te reira, aita ïa te ino e vai faahou–e rave ïa te mau taata ato‘a i te maitai, eiaha râ no te mea e, mea maitai ia rave i te ohipa maitai. Aita ïa e rave‘a faahou no te tamata i te puai, aita ho‘i e rave‘a faahou no te haamaitai i te huru o te taata, aita te mana e tupu faahou i te rahi, aita e ti‘amâraa no te ma’iti, te haavîraa ana‘e râ a satane te vai mai.

Ahiri i pahonohia te mau pure i te taime iho a purehia ai, ia au i to tatou hinaaro pipiri, e to tatou iteraa potopoto, e iti roa ïa, e aore râ, aita roa’tu e vai te mamae, te oto, te mauruuru ore, e aita ato‘a te pohe, e mai te mea e, aita teie mau mea, aita ato‘a ïa e oaoa, aita e manuiaraa, aita e ti‘afaahouraa, e aita ato‘a e ora mure ore e te huru Atua.

« E mea ti‘a ho‘i ia vai na pae e piti i te mau mea ato‘a ra… te parau-ti‘a… te parau ino… te parau mo‘a… te ati… te maitai… te ino » (2 Nephi 2:11).

No te mea e taata tatou, e tiavaru tatou i rapae i to tatou oraraa i te mauiui o te tino e i te pe‘ape‘a o te feruriraa, e imi tatou i te au maite e te hau, tera râ, mai te mea e, e tapiri tatou i te uputa i te oto e te hepohepo, e riro tatou i te tiavaru i to tatou mau hoa e to tatou mau hamani maitai rahi roa a‘e. Na te ati e faariro i te taata ei feia mo‘a, na roto i to ratou haapiiraa i te faaoromai, te faaoromai roa, e te haavîraa ia ratou iho…

E mea au roa na‘u teie irava o te himene ra « Aue te paari »—

Ia haere oe na te moana ra,
E ore oe e tapo‘ihia’tu
E paruruhia oe i te ati
E to‘u ra rima nei
Parau-ti‘a roa nei

E ua papa‘i o Elder James E. Talmage: « Aita e ati e farereihia e te tane e aore râ, te vahine i ni‘a i te fenua nei, ma te ore e vai te faaho‘iraa… mai te mea e, ua fariihia te reira ma te faaoromai ».

Tera râ, e nehenehe ato‘a te reira mau mea e faaino roa ia tatou mai te mea e, e rave tatou i te ino, e amuamu tatou, e e faaino tatou.

« Eita e faufaa ore te mauiui e te tamataraa ta tatou e farii. Na te reira e utuutu i to tatou ite, e faananea i to tatou huru, oia ho‘i, te faaoromai, te faaroo, te hinaaro puai, e te haehaa. Te mau mea ato‘a ta tatou e mauiui, ta tatou e faaitoito noa, mai te mea ihoa râ e, e faaitoito tatou ma te faaoromai, na te reira e patu i to tatou huru, e tamâ i to tatou aau, e faaaano i to tatou varua, e e faariro ia tatou ei taata mărû e te aroha, e ia ti‘a ia tatou ia piihia ei tamarii na te Atua… Na roto ho‘i i te oto e te mauiui, te tautooraa e te ati, e roaa ai ia tatou te ite ta tatou i haere mai e tii i ô nei, e o te faariro ia tatou mai to tatou Metua Tane e te Metua Vahine i te Ao ra te huru » (Orson F. Whitney)

Te vai ra te tahi mau taata e mea etaeta ratou ia ite ana‘e ratou i te feia herehia e ratou ia roohia i te mau ati e te mau mauiui hopea ore, e te hamani-ino-raa. E pari te tahi mau taata e, e mea ino te Fatu, e te tau‘a ore e te ti‘a ore. Aita roa to tatou e ti‘araa no te haava !…

Aita e otia to te mana o te autahu‘araa, tera râ, na roto i To’na paari, ua tuu mai te Atua i ni‘a ia tatou tata‘i tahi i te tahi mau otia. Oia mau, e rahi atu te maitai o te mana o te autahu‘araa mai te mea e, e haamaitai roa vau i to‘u oraraa, noa’tu râ i te reira, te oaoa nei au i te mea e, aita e ti‘a ia‘u ia faaora i te mau feia ma‘i ato‘a, noa’tu e na roto i te autahu‘araa. E riro paha vau i te faaora i te feia o tei titauhia ia pohe. E riro paha vau i te tamărû i te mauiui o te taata i titauhia ia mauiui. Te ri‘ari‘a nei au i te faataupupu i te mau opuaraa a te Atua.

Ahiri e, e mana otia ore to‘u, e te hoê iteraa e te haro‘aro‘araa potopoto, ua faaora paha ïa vau ia Abinadi i te ama o te auahi i te taime a taninahia ai oia, e na roto i te reira, ua haape‘ape‘a roa paha ïa vau ia’na. Inaha, ua pohe oia i te pohe maratiri, e no reira, ua haere oia e tii i te utu‘a a te maratiri—oia ho‘i, te faateiteiraa.

E riro paha vau i te paruru ia Paulo i mua i to’na mau ati ato‘a ahiri aita i taoti‘ahia to‘u mana. E riro paha vau i te faaora ia’na i te « tara i roto i [to’na] tino » [2Korinetia 12:7]. E na roto i te reira, ua faaino paha ïa vau i te faanahoraa a te Fatu. E toru taime to’na pureraa, no te ani i te Fatu ia iriti i « te tara » i to’na tino, aita râ te Fatu i pahono atu i ta’na mau pure [a hi‘o 2Korinetia 12:7–10]. E rave rahi taime ua fatata o Paulo i te faaino ia’na iho ahiri e, e taata ite oia i te paraparau, e taata maitai, e te nehenehe, e aita e vai ra i ni‘a ia’na te mau mea ato‘a i haehaa ai oia…

Te ri‘ari‘a nei au i te mea e, ahiri e tei te fare auri au no Karateti i te 27 no tiunu 1844, ua faatipuu paha ïa vau i te ofa‘i pupuhi tei puta i roto i te tino o te peropheta e te Patereareha. Ua faaora paha ïa vau ia raua i te mamae e te pohe, e na roto i te reira, ua faaere ïa vau ia raua i te pohe e te utua maratiri. Te oaoa nei au i te mea e, aita vau i rave i te reira faaotiraa.

Na roto ato‘a i te reira mana haavî-ore-hia, ua papû ia‘u e, ua paruru ïa vau i te Mesia i to’na mamae rahi i roto i te aua no Getesemane, i te mau faainoraa, i te hei taratara, i te hamaniino-raa i roto i te haavaraa, i te mau hamani-ino-raa i to’na tino. Ua utuutu paha ïa vau i to’na mau puta e ua faaora i te reira, ua horo‘a paha ïa vau i te pape haumaru na’na, eiaha râ i te vinita. Ua faaora paha ïa vau ia’na i te mamae e te pohe, e na roto i te reira, ua faa ere ïa vau i to te ao nei i ta’na tusia taraehara.

Eita roa’tu vau e amo i te hopoi‘a no te faaora faahou i te feia ta‘u i here. O te Mesia iho tei faaite papû i te taa-ê-raa i rotopu i to’na hinaaro e i te hinaaro o te Metua, i te taime a pure ai oia ia hopoi-ê-hia’tu te au‘a o te pohe; tera râ, ua parau faahou oia e, « ia tupu râ to oe hinaaro, eiaha to‘u ». [Luka 22:42].⁷

E nehenehe te pohe e iriti i te uputa e tae atu ai i te mau mea hanahana ra.

No te taata tei pohe, e tere noa â te oraraa, e e mau noa â oia i to’na ti‘amâraa, e o tatou o te mana‘o nei e, e ati rahi te pohe, e ere ïa, e riro râ ei haamaitairaa ite-ore-hia…

Mai te mea e parau tatou e, te pohe i te apîraa, e ino ïa, e ati rahi, e aore râ, e pe‘ape‘a, aita anei ïa tatou e parau ra e, e mea hau a‘e te oraraa tahuti nei i te tomo-‘oi‘oi-raa i roto i te ao varua, e i te faaoraraa e te faateiteiraa ? Mai te mea e, te oraraa tahuti nei te ai‘araa maitai roa, ua riro ïa te pohe ei ino, te haapii mai nei râ te evanelia ia tatou e, aita e ino to roto i te pohe, i roto ana‘e râ i te hara « … e ao to tei pohe ra o te pohe ho‘i i roto i te Fatu ra » (A hi‘o PH&PF 63:49).

Mea iti roa ho‘i to tatou ite. Mea poto roa ho‘i to tatou mana‘o haava. Te haava nei tatou i te haere‘a o te Fatu ia au i ta tatou hi‘oraa potopoto.

Ua paraparau vau i roto i te oro‘a hunaraa o te hoê piahi no te fare haapiiraa tuarua no Brigham Young, tei pohe i roto i te Tama‘i Rahi II no te Ao nei. E rave rahi hanere tauatini feia apî tamaroa tei ô ‘oi‘oi atu i roto i te ao mure ore na roto i te ino rahi o taua tama‘i ra, e ua parau vau e, te ti‘aturi nei au e, ua piihia teie rahiraa feia apî parau-ti‘a ia haere atu i roto i te ao varua no te poro i te evanelia i tei mau varua tei faa-ere-hia. Eita paha teie parau e tano no te taato‘araa o tei pohe, te feruri nei râ vau e, e parau tano ra te reira no teie taure‘are‘a.

I roto i ta’na orama no ni‘a i « Te faaoraraa i te feia pohe » ua ite atu te peresideni Joseph F. Smith i teie mea… Ua papa‘i oia e:

« … Ua ite ihora vau e aita te Fatu iho i haere atu i te feia hara e te feia haapa‘o ore o tei pato‘i i te parau mau… inaha râ, mai rotopu mai i te feia parau-ti‘a, ua faanahonaho ihora Oia i To’na mau nuu taata… e ua faaue atura ia ratou ia haere e ia afai te maramarama o te evanelia…

« … ua haere atu to tatou Faaora i te ao o te mau varua, ma te haapii atu e ma te faaineine i te mau varua faaroo… o tei faaite i to ratou iteraa papû no ni‘a iho ia’na i te tino nei, ia ti‘a ia ratou ia afai atu i te parau poro‘i i te feia pohe ato‘a no ni‘a i te faaoraraa, aore ho‘i Oia iho e nehenehe ia haere atu i rotopu ia ratou, no to ratou orurehauraa e to ratou ofatiraa i te ture…

« Ua ite atura vau i te mau peresibutero faaroo o teie nei tau tuuraa evanelia, a faaru‘e mai ai ratou i te oraraa tahuti nei, ua tamau noa ratou i ta ratou mau ohipa no te pororaa i te evanelia o te tatarahapa e te faaoraraa ». [A hi‘o PH&PF 138: 29–30, 36–37, 57].

No reira, e nehenehe te pohe ia riro ei uputa no te mau rave‘a, mai te haapiiraa i te evanelia a te Mesia.⁸

I roto i te taime ahoaho, e ti‘aturi tatou i te Atua e ti‘a ai.

Taa ê noa’tu te parau e, e iriti te pohe i te mau uputa apî, eiaha tatou e titau i te reira. Ua faauehia tatou ia pure no te feia tei pohehia i te ma‘i, e ia faaohipa i to tatou mana autahu‘araa no te faaora ia ratou.

« E e parauhia te mau peresibutero no te ekalesia ra, toopiti e a ore râ ia rahi atu â, ia pure no ratou e ia tuu atu ho‘i i to ratou ra pu‘e rima i ni‘a iho ia ratou ra na roto i to‘u nei i‘oa; e mai te mea e pohe ratou ra e pohe ïa i roto ia‘u nei, e mai te mea e ora e ora ïa i roto ia‘u nei.

« E ora noa outou i piha‘i iho te tahi e i te tahi na roto i te here, e ia pohe te tahi ra e oto ihoa outou no ratou ra, e ia rahi atu â te otoraa no ratou ra o te pohe ma te ere i te ti‘aturiraa i te ti‘afaahouraa hanahana ra.

« E tupu ho‘i teie o te pohe i roto ia‘u nei e ore ïa e ite i te pohe, e riro ho‘i ïa ei mea mărû ia ratou ra;

« E o te ore e pohe i roto ia‘u ra, e ati ho‘i to ratou, no te mea e poheraa mamae to ratou.

« E teie faahou â, e tupu a ho‘i teie i te taata e faaroo to’na ia‘u nei ia faaorahia oia, e aore oia i faataahia no te pohe ra, e faaorahia ïa oia » (PH&PF 42:44–48).

Ua haapapû mai te Fatu ia tatou e, e faaorahia tei pohehia i te ma‘i mai te mea e, e ravehia te oro‘a, mai te mea e, te vai ra te faaroo, e mai te mea e, « aita te taata ma‘i i faataahia no te pohe ».E toru teie tumu, o te ti‘a ia haapa‘ohia. E rave rahi o te ore e haapa‘o i te mau oro‘a, e rave rahi roa’tu â o te ore e hinaaro, e aore râ, aita e ti‘a ia ratou ia faaite i te faaroo. E mea faufaa ato‘a te tahi tumu: oia ho‘i, mai te mea e, aita ratou i faataahia no te pohe.

Ia pohe te mau taata ato‘a e ti‘a ai. E tuhaa faufaa te pohe no te oraraa nei. Oia mau, aita tatou e ineine roa nei no te taui. No te mea ho‘i e, aita tatou i ite e, afea oia e tae mai ai, te aro nei tatou no te tape‘a i to tatou oraraa. Eiaha tatou e măta‘u i te pohe. Te pure nei tatou no tei pohehia i te ma‘i, te haamaitai nei tatou i tei mauiui, te ti‘aoro nei tatou i te Fatu ia faaora e ia tamărû i te mauiui e ia faaora i te ora e ia faataime i te pohe, e te tahi atu â, eiaha râ no te mea e, e mea ri‘ari‘a te ora mure ore…

Mai ta Koheleta i parau ra, (3:2), te ti‘aturi nei au e, e taime to te pohe, te ti‘aturi ato‘a nei râ vau e, e rave rahi te taata e pohe nei hou « to ratou taime » no te mea, mea haapa‘o ore ratou, te faaino nei ratou i to ratou tino, te tamatamata nei, e aore râ, te imi nei ratou i te ati, i te pepe, e i te ma‘i…

Na te Atua e faatere nei i to tatou ora, te arata‘i nei e te haamaitai nei oia ia tatou, tera râ, te horo‘a mai nei oia i to tatou ti‘amâraa. E ti‘a ia tatou ia ora i to tatou oraraa ia au i ta’na faanahonahoraa no tatou, ia ore ana‘e, e riro tatou i te haapoto e aore râ i te faahope i te reira.

Ua ite au e, ua faanaho te Fatu i to tatou haere‘a. Ia tae i te hoê taime, i reira tatou e maramarama hopea roa ai, e ia hi‘o ana‘e mai tatou i muri mai taua vahi maitai ra a muri a‘e, e oaoa tatou no te mau mea e rave rahi tei tupu i roto i teie oraraa e tei riro ho‘i ei mau mea fifi no tatou ia haro‘aro‘a.

I te tahi taime te titau nei tatou ia ite eaha te mea e vai nei i muri ia tatou, tera râ, na te mau mana‘o ti‘a e faaho‘i mai ia tatou i muri no te farii i te oraraa i te mahana hoê, e ia faarahi e ia faahanahana i taua mahana…

Hou a fanauhia mai ai tatou, ua ite tatou e, e haere mai tatou i te fenua nei no te farii i te tino e i te mau iteraa, e e farii tatou i te oaoa, te oto, te ora maitai e te mauiui, te au maite e te teimaha, te tino maitai e te tino ma’ima’i, te manuia e te manuia ore, e ua ite ato‘a tatou e, i muri a‘e i te hoê tau oraraa, e pohe tatou. Ua farii tatou i teie mau mea ato‘a ma te aau oaoa, e te hinaaro papû ia farii i na mea toopiti, te mea maitai e te mea ino. Ua farii poupou tatou i te fana‘oraa ia haere mai i te fenua nei, noa’tu e, no te hoê noa mahana e aore râ, e hoê noa matahiti. Penei a‘e aita tatou i tau‘a roa e, e pohe anei tatou i te pohe ma‘i, te ati pepe, e aore râ, i te paruparu o te tino e te feruriraa. Ua farii tatou ia ora i to tatou oraraa ia au i te mau mea e tupu mai, e ia au i ta tatou faanahoraa e te faatereraa, ma te amuamu ore, te riri ore, e aore râ, ma te titauraa tano ore.

I mua i te ati, e tuu tatou i to tatou ti‘aturiraa i ni‘a i te Atua, ma te ite e, noa’tu te potopoto o to tatou feruriraa, eita ta’na opuaraa e mou. Taa ê noa’tu te mau fifi ta te oraraa e horo‘a mai nei, te horo‘a ato‘a mai nei te oraraa i te haamaitairaa rahi ia tupu tatou i te rahi i roto i te ite e i te paari, te faaroo e te ohipa, e te faaineineraa ia ho‘i e ia farii i te hanahana o te Atua.⁹

Te mau mana‘o tauturu no te tuatapaparaa e te haapiiraa

A feruri i teie nei mau mana‘o a tuatapapa ai outou i te pene aore râ, a faaineine ai outou i te haapii. No te tahi atu tautururaa, a hi‘o i te mau api v–xi.

No te aha aita te Fatu e paruru ia tatou i te taato‘araa o te oto e te mauiui ? (A hi‘o api 16–17).
A tuatapapa i te mau api 17–19, ma te imi e, eaha te erehia e tatou mai te mea e, eita te Fatu e farii ia tatou ia roohia i te ati. Nahea tatou ia pahono atu i to tatou mau ati e te mauiui ? E mea nahea to te Fatu faaitoitoraa ia outou i roto i to outou mau ati ?
A tai‘o i te paratarafa « Te vai ra te tahi mau taata », i ni‘a i te api 19. No te aha e mea fifi roa ia hi‘o i tei herehia e tatou te mauiui ra ? Eaha te ti‘a ia tatou ia rave ia ore tatou ia riri e aore râ, ia haaparuparu i roto i taua mau taime ra ?
A hi‘o i te mau api 19–24, no te imi i te mau haapiiraa no ni‘a i te mau haamaitairaa autahu‘araa. Afea outou i te iteraa i te mana faaora, e aore râ, i te mana tamahanahana o te autahu‘araa ? Nahea tatou ia pahono ia ite ana‘e tatou e, aita te Fatu e hinaaro ia faaorahia te hoê taata tei herehia e tatou, e aore râ, ia faataimehia to’na pohe ?
Nahea outou ia tatara i te mau haapiiraa a te peresideni Kimball no ni‘a i te poheraa o te hoê tamarii rii ?
Ua haapii mai te peresideni Kimball e, « I mua i te ati, e tuu tatou i to tatou ti‘aturiraa i te Atua » (api 24). Ia ti‘aturi ana‘e te hoê taata i te Atua, eaha te ohipa ta’na e rave i roto i te taime no te ati ?

Te mau papa‘iraa mo‘a: Salamo 116:15; 2 Nephi 2:11–16; 9:6; Alama 7:10–12; PH&PF 121:1–9; 122:1–9

Kimball siblings — O Spencer W. Kimball e to’na mau taea‘e e te mau tuahine,e piti matahiti hou a pohe ai to’na tuahine o Fannie. Tei ti‘a, mai te aui haere i te atau: Clare, Ruth, Gordon,e o Delbert. Tei parahi, na te aui mai: Helen, Alice, Fannie, and Spencer.

« Ahiri e, e mana oti‘a ore to‘u, e te hoê iteraa e te haro‘aro‘araa potopoto, ua faaora paha ïa vau ia Abinadi »