« ការអភិវឌ្ឍខ្លួនសូមស្វាគមន៍ » ការអភិវឌ្ឍខ្លួននៃក្រុមយុវនារី ( ឆ្នាំ ២០០៩ ) ទំព័រ ១
« សូមស្វាគមន៍ » ការអភិវឌ្ឍខ្លួននៃក្រុមយុវនារី ទំព័រ ១
ការអភិវឌ្ឍខ្លួនសូមស្វាគមន៍
អ្នកគឺជាបុត្រីសំណព្វរបស់ព្រះវរបិតាសួគ៌ ដែលត្រូវបានរៀបចំឲ្យមកលើផែនដីក្នុងពេលដ៏ពិសេសនេះសម្រាប់គោលបំណងមួយដ៏ពិសិដ្ឋ និងរុងរឿង ។ អ្នកមានការទទួលខុសត្រូវដ៏ថ្លៃថ្នូរមួយក្នុងការប្រើប្រាស់កម្លាំង និងឥទ្ធិពលរបស់អ្នកសម្រាប់សេចក្ដីល្អ ។ ព្រះវរបិតាសួគ៌ជាទីស្រឡាញ់របស់អ្នកបានប្រសិទ្ធពរដល់អ្នកឲ្យមានទេពកោសល្យ និងសមត្ថភាពដែលនឹងជួយអ្នកឲ្យបំពេញបេសកកម្មដ៏ទេវភាពរបស់អ្នក ។ នៅពេលដែលអ្នករៀនទទួលយក ហើយអនុវត្តតាមគុណសម្បត្តិរបស់ក្រុមយុវនារីនៅក្នុងជីវិតរបស់អ្នក នោះអ្នកនឹងមានទម្លាប់ផ្ទាល់ខ្លួនក្នុងការអធិស្ឋាន ការសិក្សាព្រះគម្ពីរ ការគោរពប្រតិបត្តិតាមព្រះបញ្ញត្តិទាំងឡាយ និងការបម្រើដល់មនុស្សដទៃ ។ ទម្លាប់ផ្ទាល់ខ្លួនប្រចាំថ្ងៃទាំងនេះនឹងពង្រឹងដល់សេចក្ដីជំនឿ និងទីបន្ទាល់របស់អ្នកលើព្រះយេស៊ូវគ្រីស្ទ ។ ទម្លាប់ទាំងនេះក៏នឹងអនុញ្ញាតឲ្យអ្នកចេះស្គាល់ និងអភិវឌ្ឍអំណោយទានដ៏ពិសេសរបស់អ្នកដែរ ។
សូមប្រើឥទ្ធិពលរបស់អ្នកដើម្បីលើកកម្ពស់ និងផ្តល់ពរដល់គ្រួសាររបស់អ្នក យុវនារីដទៃទៀត និងពួកយុវជនដែលអ្នកទាក់ទងជានិច្ច ។ សូមគោរពដល់ភាពជាស្ដ្រី គាំទ្រដល់បព្វជិតភាព និងឲ្យតម្លៃលើភាពជាម្ដាយ និងភាពជាឪពុក ។
នៅពេលអ្នកចូលរួមធ្វើការអភិវឌ្ឍខ្លួន នោះអ្នកចូលរួមជាមួយនឹងយុវនារីរាប់ពាន់នាក់ផ្សេងទៀត ដែលកំពុងតែខិតខំមករកព្រះគ្រីស្ទ និង « ឈរជាសាក្សីដល់ព្រះនៅគ្រប់ពេល និងគ្រប់សេចក្ដី និងគ្រប់ទីកន្លែង » ( ម៉ូសាយ ១៨:៩ ) ។ សូមប្រឹក្សាជាមួយនឹងឪពុកម្ដាយរបស់អ្នក ហើយជ្រើសរើសគោលដៅប្រកបដោយការអធិស្ឋានដែលនឹងជួយអ្នកក្នុងការបណ្ដុះបុគ្គលិកលក្ខណៈជាស្ដ្រី ពង្រឹងទីបន្ទាល់របស់អ្នក និងឈានទៅរកសក្ដានុពលដ៏ទេវភាពរបស់អ្នក ។ សូមទាញយកផលប្រយោជន៍ពីពេលវេលារបស់អ្នកក្នុងក្រុមយុវនារី តាមរយៈការរៀបចំដើម្បីទទួលពិធីបរិសុទ្ធដ៏ពិសិដ្ឋនៃព្រះវិហារបរិសុទ្ធ ក្លាយជាភរិយា និងម្ដាយដ៏ស្មោះត្រង់ម្នាក់ ហើយពង្រឹងដល់គេហដ្ឋាន និងគ្រួសាររបស់អ្នក ។
គណៈប្រធានទីមួយ