សេចក្ដីទៀងត្រង់

ខ្ញុំមិនព្រមលះចោលសម្ដីដែលថាខ្លួនខ្ញុំត្រឹមត្រូវឡើយ ដរាបដល់ខ្ញុំស្លាប់ផង ( យ៉ូប ២៧:៥ ) ។

ខ្ញុំនឹងមានសេចក្ដីក្លាហានប្រកបដោយសីលធម៌ ដើម្បីធ្វើឲ្យសកម្មភាពរបស់ខ្ញុំស្របគ្នាជាមួយនឹងចំណេះវិជ្ជារបស់ខ្ញុំអំពីអ្វីដែលត្រូវ និងខុស ។

បទពិសោធន៍នៃគុណសម្បត្តិដែលតម្រូវឲ្យមាន

សូមបំពេញបទពិសោធន៍នៃគុណសម្បត្តិដែលតម្រូវឲ្យមានទាំងបីដូចខាងក្រោមនេះ ។ សូមឲ្យឪពុកម្ដាយ ឬអ្នកដឹកនាំរបស់អ្នកចុះហត្ថលេខា និងចុះកាលបរិច្ឆេទលើបទពិសោធន៍នីមួយៗ បន្ទាប់ពីអ្នកបានបញ្ចប់ ។

សេចក្ដីទៀងត្រង់គឺជាឆន្ទៈ និងបំណងប្រាថ្នាដើម្បីរស់នៅតាមជំនឿ និងបទដ្ឋានរបស់យើង ។ សូមអាន មរ៉ូណៃ ១០:៣០–៣៣ ហើយគិតអំពីអត្ថន័យនៃការ « ពុំអាចបដិសេធព្រះចេស្ដានៃព្រះបានឡើយ » ។ សូមអានកូនសៀវភៅ ដើម្បីកម្លាំងនៃយុវជន ។ សូមពិចារណាពីរបៀបដែលបទដ្ឋានរបស់ព្រះអម្ចាស់ខុសពីបទដ្ឋានរបស់ពិភពលោកនេះ ។ សូមកត់ត្រានៅក្នុងសៀវភៅកំណត់ហេតុរបស់អ្នកនូវបទដ្ឋានដ៏សមរម្យនៃអាកប្បកិរិយា ការស្លៀកពាក់ និងការសន្ទនា ក៏ដូចជាអក្សរសាស្ដ្រ ខ្សែភាពយន្ដ ទូរទស្សន៍ អ៊ិនធើរណិត តន្ដ្រី ទូរសព្ទដៃ និងប្រព័ន្ធផ្សព្វផ្សាយផ្សេងទៀត ។ សូមសរសេរផែនការរបស់អ្នកដើម្បីបន្ដមានភាពស្អាតស្អំខាងសីលធម៌ និងភាពសក្ដិសមដើម្បីចូលក្នុងព្រះវិហារបរិសុទ្ធផងដែរ ។ បន្ទាប់ពីការរក្សាបទដ្ឋានរបស់អ្នកយ៉ាងហោចណាស់មួយខែ សូមកត់ត្រាពីអារម្មណ៍របស់អ្នកនៅក្នុងសៀវភៅកំណត់ហេតុរបស់អ្នក ហើយបន្ដធ្វើតាមការតាំងចិត្តរបស់អ្នក ។
សូមធ្វើការវាយតម្លៃខ្លួនឯងស្ដីពីសេចក្ដីទៀងត្រង់ផ្ទាល់ខ្លួនរបស់អ្នក ។ សូមសួរខ្លួនអ្នកនូវសំណួរដូចតទៅ ៖ តើខ្ញុំចៀសវាងការនិយាយដើមគេ ការនិយាយកំប្លែងមិនសមរម្យ ការប្រើពាក្យអសុរស និងពាក្យប្រមាថ ព្រមទាំងការមិនបានគិតជ្រៅជ្រះអំពីប្រធានបទពិសិដ្ឋៗដែរឬទេ ? តើខ្ញុំពិតជាស្មោះត្រង់ ស្អាតស្អំខាងសីលធម៌ ទៀងត្រង់ អាចពឹងបាន ហើយគួរទុកចិត្តបានទាំងស្រុងនៅក្នុងការងារសាលារបស់ខ្ញុំ និងសកម្មភាពផ្សេងទៀតដែរឬទេ ? សូមអធិស្ឋានប្រចាំថ្ងៃសុំកម្លាំង និងការដឹកនាំពីព្រះវិញ្ញាណបរិសុទ្ធដើម្បីជួយអ្នកឲ្យរស់នៅដោយសេចក្ដីទៀងត្រង់ ។ សូមសរសេរនូវរឿងដែលអ្នកអាចធ្វើបានដើម្បីពង្រឹងដល់សេចក្ដីទៀងត្រង់ផ្ទាល់ខ្លួនរបស់អ្នក និងយ៉ាងហោចណាស់ទម្លាប់ថ្មីមួយដែលអ្នកចង់អភិវឌ្ឍនៅក្នុងសៀវភៅកំណត់ហេតុរបស់អ្នក ។
ព្រះអង្គសង្គ្រោះគឺជាគំរូដ៏ឥតខ្ចោះនៃសេចក្ដីទៀងត្រង់ ហើយទ្រង់បានធ្វើអ្វីដែលទ្រង់បានសន្យានឹងព្រះបិតាថាទ្រង់នឹងធ្វើ ។ សូមអាន នីហ្វៃ ទី៣ ១១:១០–១១ ។ សូមសិក្សាពីជីវិតរបស់បុគ្គលផ្សេងទៀតនៅក្នុងព្រះគម្ពីរដែលបានរស់នៅដោយសេចក្ដីទៀងត្រង់ ។ សូមអាន លោកុប្បត្តិ ៣៩; គម្ពីរនាងអេសធើរ; យ៉ូប ២:៣; ២៧:៣–៦; ដានីយ៉ែល ៣ និង ៦; កិច្ចការ ២៦; គោលលទ្ធិ និង សេចក្ដីសញ្ញា ១២៤:១៥; និង យ៉ូសែប ស៊្មីធ—ប្រវត្តិ ១:២១–២៥ ។ នៅក្នុងសៀវភៅកំណត់ហេតុរបស់អ្នក សូមរកមើលរបៀបដែលមនុស្សទាំងនេះបានបង្ហាញសេចក្ដីទៀងត្រង់ ។ សូមគិតពីគ្រាមួយដែលអ្នកបានមានសេចក្ដីក្លាហានដើម្បីបង្ហាញសេចក្ដីទៀងត្រង់ ជាពិសេសនៅពេលដែលវាមិនងាយស្រួល ឬមិនសូវពេញនិយម ។ សូមចែកចាយបទពិសោធន៍របស់អ្នក និងអារម្មណ៍របស់អ្នកអំពីសេចក្ដីទៀងត្រង់នៅក្នុងការប្រជុំទីបន្ទាល់មួយ ឬក្នុងមេរៀនមួយ ឬជាមួយនឹងឪពុក/ម្ដាយ ឬអ្នកដឹកនាំម្នាក់ ។

បទពិសោធន៍នៃគុណសម្បត្តិបន្ថែម

សូមបំពេញបទពិសោធន៍នៃគុណសម្បត្តិបន្ថែមទាំងបីនេះ ។ អ្នកអាចជ្រើសរើសចេញពីជម្រើសដូចខាងក្រោម ឬសរសេរចេញពីគំនិតរបស់អ្នកឲ្យបានចំនួនពីរ ។ មុនពេលអ្នកចាប់ផ្ដើម ឪពុក/ម្ដាយ ឬអ្នកដឹកនាំរបស់អ្នកត្រូវតែអនុមតិលើកិច្ចការដែលអ្នកសរសេរដោយខ្លួនឯងទាំងនោះ ។ សូមឲ្យឪពុកម្ដាយ ឬអ្នកដឹកនាំរបស់អ្នកចុះហត្ថលេខា និងចុះកាលបរិច្ឆេទលើបទពិសោធន៍នីមួយៗ បន្ទាប់ពីអ្នកបានបញ្ចប់ ។

សូមរកមើលពាក្យ សេចក្ដីទៀងត្រង់ នៅក្នុងវចនានុក្រម ។ សូមសម្ភាសម្ដាយ ឬជីដូនរបស់អ្នក ឬស្ដ្រីដទៃទៀតដែលអ្នកគោរព ចំពោះការយល់ដឹង និងការអនុវត្តរបស់គាត់អំពីពាក្យនេះ ។ សូមធ្វើបញ្ជីមួយពីវិធីទាំងឡាយដែលអ្នកអាចធ្វើឲ្យសកម្មភាពរបស់អ្នកស៊ីសង្វាក់នឹងចំណេះដឹងរបស់អ្នកស្ដីពីការណ៍ត្រឹមត្រូវ និងខុសឆ្គង ហើយកត់ត្រានៅក្នុងសៀវភៅកំណត់ហេតុរបស់អ្នកអំពីអត្ថន័យនៃការមានសេចក្ដីទៀងត្រង់ ។
សូមរៀនអំពីការឈរជាសាក្សីម្នាក់ ។ សូមអាន ម៉ូសាយ ១៨:៩ ។ បន្ទាប់មក សូមកត់ត្រានៅក្នុងសៀវភៅកំណត់ហេតុរបស់អ្នកពីរបៀបដែលអ្នកអាច « ឈរជា [ សាក្សីម្នាក់ ] ដល់ព្រះនៅគ្រប់ពេល និងគ្រប់សេចក្ដី និងគ្រប់ទីកន្លែង » ដោយផ្ទាល់ខ្លួន ។ សូមជ្រើសរើសអាកប្បកិរិយាផ្ទាល់ខ្លួនមួយដែលអ្នកត្រូវពង្រឹង ដើម្បីឲ្យអ្នកអាចធ្វើជាគំរូដ៏ប្រសើរមួយ ។ សូមអភិវឌ្ឍសេចក្ដីទៀងត្រង់នៅក្នុងជីវិតរបស់អ្នក កាលអ្នកអនុវត្តអាកប្បកិរិយាថ្មីរបស់អ្នកក្នុងរយៈពេលបីសប្ដាហ៍ ។ សូមកត់ត្រាការរីកចម្រើនរបស់អ្នកនៅក្នុងសៀវភៅកំណត់ហេតុរបស់អ្នក ។
ការរស់នៅតាមច្បាប់តមអាហារគឺជាឱកាសមួយដើម្បីអនុវត្តសេចក្ដីទៀងត្រង់ ។ នៅថ្ងៃអាទិត្យតមអាហារដែលបានរៀបចំឡើយមួយ សូមចៀសវាងការហូបចុក និងការផឹករយៈពេលពីរពេលជាប់គ្នា ហើយបង់ដង្វាយតមអាហាររបស់គ្រួសារអ្នក ។ សូមមានគោលបំណងជាក់លាក់មួយ នៅពេលអ្នកតមអាហារ ។ អ្នកអាចតមអាហារសម្រាប់មិត្តភក្ដិដែលឈឺ ដើម្បីយកឈ្នះទម្លាប់អាក្រក់មួយ ដើម្បីទទួលបានពរជ័យពិសេសសម្រាប់ខ្លួនអ្នក ឬនរណាម្នាក់ទៀត ឬក៏ដើម្បីថ្លែងអំណរគុណ ។ សូមចាប់ផ្ដើម និងបញ្ចប់ការតមអាហាររបស់អ្នកដោយការអធិស្ឋាន ។
ចូររាយនូវបញ្ហា និន្នាការ និងឧបសគ្គនានាដែលធ្វើឲ្យគ្រួសារទន់ខ្សោយ ។ សូមអានសារលិខិតមកពីគណៈប្រធានទីមួយនៅទំព័រទី ១ នៃសៀវភៅនេះ និង « ក្រុមគ្រួសារ ៖ ការប្រកាសដល់ពិភពលោក » ( សូមមើលទំព័រ ១០១ ) និង វគ្គស្ដីពីក្រុមគ្រួសារនៅក្នុងសៀវភៅ ដើម្បីកម្លាំងនៃយុវជន ។ បន្ទាប់មកស្វែងរកនៅក្នុងទស្សនាវដ្ដីសាសនាចក្រនូវការប្រឹក្សាមកពីអស់អ្នកដែលយើងគាំទ្រជាពួកព្យាការី ពួកអ្នកមើលឆុត និងពួកអ្នកទទួលវិវរណៈ ។ សូមសរសេរផែនការរបស់អ្នកដើម្បីពង្រឹងគ្រួសារនាពេលបច្ចុប្បន្នរបស់អ្នក ព្រមទាំងគុណសម្បត្តិ និងប្រពៃណីដែលអ្នកចង់ស្ថាបនានៅក្នុងគ្រួសារនាពេលអនាគតរបស់អ្នកនៅក្នុងសៀវភៅកំណត់ហេតុរបស់អ្នក ។

បទពិសោធន៍នៃគុណសម្បត្តិផ្ទាល់ខ្លួន

គម្រោងនៃគុណសម្បត្តិ

បន្ទាប់ពីអ្នកបានបំពេញបទពិសោធន៍នៃគុណសម្បត្តិនៃសេចក្ដីទៀងត្រង់ទាំងប្រាំមួយរួចហើយ សូមបង្កើតគម្រោងមួយដែលនឹងជួយអ្នកឲ្យអនុវត្តនូវអ្វីដែលអ្នកបានរៀន ។ ការណ៍នេះគួរតែជាកិច្ចខិតខំដ៏សំខាន់មួយដែលនឹងធ្វើឡើងយ៉ាងតិចណាស់ដប់ម៉ោងដើម្បីបញ្ចប់វា ។ សូមស្វែងរកការដឹកនាំពីព្រះវិញ្ញាណបរិសុទ្ធប្រកបដោយការអធិស្ឋាន ដើម្បីជ្រើសរើសគម្រោងដ៏មានអត្ថន័យមួយ ។

មុនពេលអ្នកចាប់ផ្ដើម សូមឲ្យឪពុក/ម្ដាយ ឬអ្នកដឹកនាំរបស់អ្នកអនុមតិលើគម្រោងនេះសិន ។ សូមសរសេរការវាយតម្លៃមួយ បន្ទាប់ពីអ្នកបានបញ្ចប់ ។ ខាងក្រោមនេះគឺជាយោបល់មួយចំនួនអំពីគម្រោងនៃគុណសម្បត្តិមួយ ។

សូមកត់ត្រាពីឧទាហរណ៍នៃរបៀបដែលសមាជិកគ្រួសារបានបង្ហាញគុណសម្បត្តិនៃសេចក្ដីទៀងត្រង់នៅក្នុងជីវិតរបស់ពួកគេ ។
ការមានសេចក្ដីទៀងត្រង់មានន័យថា ការកាន់ខ្ជាប់តាមការតាំងចិត្តរបស់អ្នក ។ សូមស្វែងរក ហើយរក្សាការតាំងចិត្តរបស់អ្នកចំពោះមនុស្សដទៃ កាលអ្នកចូលរួមជាសមាជិកម្នាក់ក្នុងក្រុម ឬអង្គភាពមួយ ឬកាន់តំណែងជាអ្នកដឹកនាំម្នាក់នៅក្នុង សាលារៀន ឬសហគមន៍របស់អ្នក ។
ដោយប្រើ ធីម៉ូថេ ទី១ ៤:១២ ជាមគ្គុទេសន៍របស់អ្នក សូមរៀបចំ និងអនុវត្តសកម្មភាពមួយដែលនឹងជួយអ្នកឲ្យអនុវត្តការធ្វើជា « គំរូដល់ពួកអ្នកជឿ » ។
ការចុះ និងការរក្សាសេចក្ដីសញ្ញានៃព្រះវិហារបរិសុទ្ធតម្រូវឲ្យមានសេចក្ដីទៀងត្រង់ ។ សូមរៀបចំខ្លួនចុះសេចក្ដីសញ្ញានៃព្រះវិហារបរិសុទ្ធដោយការធ្វើ និងការពាក់សម្លៀកបំពាក់ដែលសមស្របនឹងបទដ្ឋាននៃសម្លៀកបំពាក់សមរម្យដូចដែលបានពន្យល់នៅក្នុងកូនសៀវភៅ ដើម្បីកម្លាំងនៃយុវជន និងនៅក្នុងប្រសាសន៍របស់ពួកព្យាការីដែលនៅរស់ ។
នៅក្នុងសុន្ទរកថាដែលផ្ដល់ដោយពួកអ្នកមានសិទ្ធិអំណាចទូទៅ សូមស្វែងរកប្រធានបទស្ដីពីសេចក្ដីទៀងត្រង់ និងភាពស្មោះត្រង់ ។ សូមរៀនពីមូលហេតុដែលគោលការណ៍ទាំងនេះមានសារៈសំខាន់ចំពោះសុភមង្គល និងការរៀបចំចូលព្រះវិហារបរិសុទ្ធរបស់អ្នក ។ សូមធ្វើរបស់មួយ ( ដូចជា រូបភាពមួយ សៀវភៅនៃសម្ដីសម្រង់មួយក្បាល ឬរបស់ចាក់ដោយដៃមួយ ) ដែលនឹងរំឭកអ្នករាល់ថ្ងៃអំពីការតាំងចិត្តរបស់អ្នកដើម្បីមានចិត្តស្មោះត្រង់ និងស្មោះពិតនៅគ្រប់ពេលទាំងអស់ ហើយដើម្បីត្រូវបានគេស្គាល់ដោយសារសេចក្ដីទៀងត្រង់របស់អ្នកផ្ទាល់ខ្លួន ។

គម្រោងរបស់ខ្ញុំគឺ ៖

ផែនការរបស់ខ្ញុំដើម្បីអនុវត្តគម្រោងរបស់ខ្ញុំគឺ ៖

ការអនុមតិ

កាលបរិច្ឆេទបញ្ចប់ដែលប៉ាន់ស្មាន

ការវាយតម្លៃលើគម្រោងរបស់ខ្ញុំគឺ ( រួមបញ្ចូលទាំងអារម្មណ៍ និងការយល់ដឹងរបស់អ្នកអំពីសេចក្ដីទៀងត្រង់ដែលបានរីកចម្រើនផង ) ៖

ហត្ថលេខារបស់ឪពុក/ម្ដាយ ឬអ្នកដឹកនាំ

កាលបរិច្ឆេទ

ម៉ោងដែលបានចំណាយ