« សេចក្ដីជំនឿ » ការអភិវឌ្ឍខ្លួននៃក្រុមយុវនារី ( ឆ្នាំ ២០០៩ ) ទំព័រ ១៣–២០
« សេចក្ដីជំនឿ » ការអភិវឌ្ឍខ្លួននៃក្រុមយុវនារី ទំព័រ ១៣–២០
សេចក្តីជំនឿ
សេចក្ដីជំនឿគឺពុំមែនជាតម្រិះដ៏ឥតខ្ចោះនូវអ្វីៗទាំងឡាយនោះទេ ហេតុដូច្នេះហើយ បើសិនជាអ្នករាល់គ្នាមានសេចក្ដីជំនឿ នោះអ្នករាល់គ្នាសង្ឃឹមទៅលើអ្វីៗដែលមើលមិនឃើញ ហើយដែលពិត ( អាលម៉ា ៣២:២១ ) ។
ខ្ញុំជាបុត្រីមួយរូបរបស់ព្រះវរបិតាសួគ៌ដែលស្រឡាញ់រូបខ្ញុំ ។ ខ្ញុំមានសេចក្តីជំនឿទៅលើផែនការដ៏អស់កល្បជានិច្ចរបស់ទ្រង់ដែលផ្ដោតសំខាន់ទៅលើព្រះយេស៊ូវគ្រីស្ទ ជាព្រះអង្គសង្រ្គោះរបស់ខ្ញុំ ។
បទពិសោធន៍នៃគុណសម្បត្តិដែលតម្រូវឲ្យមាន
សូមបំពេញបទពិសោធន៍នៃគុណសម្បត្តិដែលតម្រូវឲ្យមានទាំងបីដូចខាងក្រោមនេះ ។ សូមឲ្យឪពុកម្ដាយ ឬអ្នកដឹកនាំរបស់អ្នកចុះហត្ថលេខា និងចុះកាលបរិច្ឆេទលើបទពិសោធន៍នីមួយៗ បន្ទាប់ពីអ្នកបានបញ្ចប់ ។
-
គោលការណ៍ទីមួយនៃដំណឹងល្អគឺសេចក្ដីជំនឿទៅលើព្រះអម្ចាស់ ព្រះយេស៊ូវគ្រីស្ទ ។ សូមរៀនអំពីសេចក្ដីជំនឿមកពីព្រះគម្ពីរ និងពីពួកព្យាការីដែលនៅរស់ ។ សូមអាន ហេព្រើរ ១១; អាលម៉ា ៣២:១៧–៤៣; អេធើរ ១២:៦–២២; និង យ៉ូសែប ស្ម៊ីធ—ប្រវត្តិ ១:១១–២០ ។ សូមអានសុន្ទរកថាមកពីសន្និសីទទូទៅចំនួនពីរស្ដីពីសេចក្ដីជំនឿ ។ សូមអនុវត្តសេចក្ដីជំនឿផ្ទាល់ខ្លួនរបស់អ្នកដោយការបង្កើតទម្លាប់នៃការអធិស្ឋានមួយនៅក្នុងជីវិតរបស់អ្នក ។ សូមចាប់ផ្ដើមដោយការនិយាយពាក្យអធិស្ឋានរបស់អ្នករៀងរាល់ព្រឹក និងរាល់ល្ងាចជាទៀងទាត់ ។ បន្ទាប់ពីរយៈពេលបីសប្ដាហ៍ក្នុងការធ្វើតាមទម្លាប់នេះ សូមពិភាក្សាជាមួយឪពុក/ម្ដាយ ឬអ្នកដឹកនាំម្នាក់ពីអ្វីដែលអ្នកបានរៀនអំពីសេចក្ដីជំនឿ និងរបៀបដែលការអធិស្ឋានផ្ទាល់ខ្លួនប្រចាំថ្ងៃបានពង្រឹងដល់សេចក្ដីជំនឿរបស់អ្នក ។ នៅក្នុងសៀវភៅកំណត់ហេតុរបស់អ្នក សូមបង្ហាញពីអារម្មណ៍របស់អ្នកអំពីសេចក្ដីជំនឿ និងការអធិស្ឋាន ។
-
សូមស្វែងរកគោលការណ៍នៃសេចក្ដីជំនឿដែលត្រូវបានបង្រៀនដោយម្ដាយរបស់ពួកកងទ័ពកម្លោះហេលេមិន ។ សូមអាន អាលម៉ា ៥៦:៤៥–៤៨ និង ៥៧:២១ ។ សូមរំឭកអ្វីដែល « ក្រុមគ្រួសារ ៖ ការប្រកាសដល់ពិភពលោក » ( សូមមើលទំព័រ ១០១ ) ថ្លែងអំពីតួនាទីរបស់ម្ដាយ ។ សូមពិភាក្សាជាមួយនឹងអ្នកម្ដាយ ឬជីដូន ឬអ្នកដឹកនាំម្នាក់អំពីគុណសម្បត្តិដែលស្ដ្រីម្នាក់ត្រូវការដើម្បីបង្រៀនដល់កូនៗឲ្យមានសេចក្ដីជំនឿ និងដើម្បីផ្អែកការសម្រេចចិត្តរបស់ពួកគេទៅលើសេចក្ដីពិតនៃដំណឹងល្អ ។ តើគោលការណ៍ទាំងនេះអាចជួយអ្នកនៅក្នុងជីវិតអ្នកនៅពេលបច្ចុប្បន្ននេះ និងជួយអ្នកឲ្យរៀបចំអ្នកក្លាយជាស្ដ្រី ភរិយា និងម្ដាយដ៏ស្មោះត្រង់ម្នាក់ដោយរបៀបណា ? សូមកត់ត្រាគំនិត និង អារម្មណ៍របស់អ្នកនៅក្នុងសៀវភៅកំណត់ហេតុរបស់អ្នក ។
-
ការរស់នៅតាមគោលការណ៍នៃដំណឹងល្អតម្រូវឲ្យមានសេចក្ដីជំនឿ ។ សូមអានអំពីសេចក្ដីជំនឿនៅក្នុង Bible Dictionary ឬ ពិតចំពោះសេចក្ដីជំនឿ ។ សេចក្ដីជំនឿទៅលើព្រះអង្គសង្គ្រោះ ព្រះយេស៊ូវគ្រីស្ទដឹកនាំទៅរកសកម្មភាព ។ សូមជ្រើសរើសគោលការណ៍មួយដូចជា ការអធិស្ឋាន ការបង់ដង្វាយមួយភាគក្នុងដប់ ការតមអាហារ ការប្រែចិត្ត ឬការរក្សាថ្ងៃឈប់សម្រាកទុកជាបរិសុទ្ធ ។ នៅក្នុងគេហដ្ឋានរបស់អ្នកផ្ទាល់ ឬក្នុងមជ្ឈដ្ឋានផ្សេងទៀត សូមរៀបចំ និងបង្រៀនមេរៀនរាត្រីជួបជុំក្រុមគ្រួសារមួយអំពីរបៀបដែលសេចក្ដីជំនឿជួយអ្នកឲ្យរស់នៅតាមគោលការណ៍នៃដំណឹងល្អនោះ ។ បើអាចទៅរួច សូមឲ្យសមាជិកគ្រួសារម្នាក់ចែកចាយបទពិសោធន៍មួយដែលបានពង្រឹងដល់សេចក្ដីជំនឿរបស់គាត់ ។ សូមចែកចាយបទពិសោធន៍ផ្ទាល់ខ្លួនរបស់អ្នកផងដែរ ។ នៅក្នុងសៀវភៅកំណត់ហេតុរបស់អ្នក សូមសរសេរនូវបទពិសោធន៍មួយក្នុងចំណោមបទពិសោធន៍ទាំងនោះ ហើយពិពណ៌នាពីអារម្មណ៍របស់អ្នកអំពីសេចក្ដីជំនឿ ។
បទពិសោធន៍នៃគុណសម្បត្តិបន្ថែម
សូមបំពេញបទពិសោធន៍នៃគុណសម្បត្តិបន្ថែមទាំងបីនេះ ។ អ្នកអាចជ្រើសរើសចេញពីជម្រើសដូចខាងក្រោម ឬសរសេរចេញពីគំនិតរបស់អ្នកឲ្យបានចំនួនពីរ ។ មុនពេលអ្នកចាប់ផ្ដើម ឪពុក/ម្ដាយ ឬអ្នកដឹកនាំរបស់អ្នកត្រូវតែអនុមតិលើកិច្ចការដែលអ្នកសរសេរដោយខ្លួនឯងទាំងនោះ ។ សូមឲ្យឪពុកម្ដាយ ឬអ្នកដឹកនាំរបស់អ្នកចុះហត្ថលេខា និងចុះកាលបរិច្ឆេទលើបទពិសោធន៍នីមួយៗ បន្ទាប់ពីអ្នកបានបញ្ចប់ ។
-
សូមរៀនបន្ថែមទៀតអំពីពិធីសាក្រាម៉ង់ ។ សូមអានអំពីអាហារចុងក្រោយនៅក្នុង ម៉ាថាយ ២៦:២៦–២៨; ម៉ាកុស ១៤:២២–២៤; និង លូកា ២២:១៧–២០ ។ សូមបង្កើតលំនាំមួយក្នុងការសញ្ជឹងគិតអំឡុងពេលសាក្រាម៉ង់ តាមរយៈការស្ដាប់ទំនុកតម្កើង និងការអធិស្ឋានក្នុងម៉ោងសាក្រាម៉ង់ដោយយកចិត្តទុកដាក់ ។ សូមគិតអំពីមូលហេតុដែលយើងទទួលទាននំប៉័ង និងទឹក ។ បន្ទាប់ពីធ្វើតាមលំនាំនេះបានបីសប្ដាហ៍មក សូមសរសេរពីសេចក្ដីសន្យាខ្លះៗដែលអ្នកបានធ្វើ កាលអ្នកទទួលទានសាក្រាម៉ង់ ហើយចងចាំពីសេចក្ដីសញ្ញានៃពិធីបុណ្យជ្រមុជទឹករបស់អ្នក និងអ្វីដែលអ្នកត្រូវធ្វើដើម្បីរក្សាសេចក្ដីសន្យាទាំងនោះនៅក្នុងសៀវភៅកំណត់ហេតុរបស់អ្នក ។ សូមកត់ត្រាពីរបៀបដែលការយល់ដឹងរបស់អ្នកអំពីសេចក្ដីសន្យាទាំងនេះបានពង្រឹងដល់សេចក្ដីជំនឿរបស់អ្នកទៅលើព្រះអង្គសង្គ្រោះនៅក្នុងសៀវភៅកំណត់ហេតុរបស់អ្នក ។
-
សូមបង្កើនការយល់ដឹងរបស់អ្នកអំពីដង្វាយធួននៃព្រះយេស៊ូវគ្រីស្ទដោយការអាន អេសាយ ៥៣:៣–១២; យ៉ូហាន ៣:១៦–១៧; រ៉ូម ៥; នីហ្វៃ ទី២ ៩:៦–៧, ២១–២៦; អាលម៉ា ៧:១១–១៣; ៣៤:៨–១៧; និង គោលលទ្ធិ និង សេចក្តីសញ្ញា ១៩:១៥–២០ ។ នៅក្នុងសៀវភៅកំណត់ហេតុរបស់អ្នក សូមសរសេរពីអារម្មណ៍របស់អ្នកអំពីព្រះអង្គសង្គ្រោះ និងអ្វីដែលទ្រង់បានធ្វើសម្រាប់អ្នក ។ សូមចែកចាយពីអារម្មណ៍របស់អ្នកនៅក្នុងការប្រជុំថ្លែងទីបន្ទាល់មួយ ។
-
សូមបង្កើនការយល់ដឹងរបស់អ្នកអំពីផែនការនៃសេចក្ដីសង្គ្រោះ ។ ធនធានសម្រាប់ការសិក្សារួមមាន កូរិនថូស ទី១ ១៥:២២; វិវរណៈ ១២:៧–៩; នីហ្វៃ ទី២ ៩:១–២៨; ១១:៤–៧; គោលលទ្ធិ និង សេចក្តីសញ្ញា ៧៦:៥០–១១៣; ៩៣:៣៣–៣៤; ម៉ូសេ ៤:១–៤; និង អ័ប្រាហាំ ៣:២៤–២៧ ។ សូមគូរ ឬរករូបភាពមួយដែលពិពណ៌នាពីផែនការនៃសេចក្ដីសង្គ្រោះ រួមមាននូវជីវិតមុនជីវិតនៅលើផែនដីនេះ កំណើត ជីវិតរមែងស្លាប់ សេចក្ដីស្លាប់ ការជំនុំជម្រះ និងជីវិតបន្ទាប់ពីការជំនុំជម្រះ ។ ដោយប្រើរូបភាពនេះ សូមពន្យល់ពីផែនការនៃសេចក្ដីសង្គ្រោះដល់សិស្សក្នុងថ្នាក់ ឬគ្រួសាររបស់អ្នក ឬមិត្តភក្ដិម្នាក់ ។ សូមពិភាក្សាពីរបៀបដែលចំណេះដឹងអំពីផែនការនេះជះឥទ្ធិពលដល់សកម្មភាពរបស់អ្នក ជួយអ្នកឲ្យយល់ពីអត្តសញ្ញាណរបស់អ្នក ហើយបានពង្រឹងដល់សេចក្ដីជំនឿរបស់អ្នក ។
-
ព្រះអម្ចាស់បានបញ្ជាយើងឲ្យបង់ដង្វាយមួយភាគក្នុងដប់ ។ សូមអាន គោលលទ្ធិ និង សេចក្ដីសញ្ញា ១១៩ និង ម៉ាឡាគី ៣:៨–១២ ។ ដោយសារការគោរពប្រតិបត្តិតាមច្បាប់ដង្វាយមួយភាគក្នុងដប់គឺជាភស្ដុតាងមួយនៃសេចក្ដីជំនឿរបស់អ្នក សូមបង់ដង្វាយមួយភាគក្នុងដប់ឲ្យបានពេញលេញ ។ បីខែក្រោយមក សូមកត់ត្រានៅក្នុងសៀវភៅកំណត់ហេតុរបស់អ្នកពីរបៀបដែលការបង់ដង្វាយមួយភាគក្នុងដប់បានជួយឲ្យសេចក្ដីជំនឿរបស់អ្នករីកចម្រើនឡើង ។ សូមរៀបរាប់ពីពរជ័យនៅក្នុងជីវិតរបស់អ្នក ទាំងធំ ទាំងតូច ដែលបានកើតឡើងដោយសារតែសេចក្ដីជំនឿរបស់អ្នកទៅលលើគោលការណ៍នៃការបង់ដង្វាយមួយភាគក្នុងដប់ ។
បទពិសោធន៍នៃគុណសម្បត្តិផ្ទាល់ខ្លួន
គម្រោងនៃគុណសម្បត្តិ
បន្ទាប់ពីអ្នកបានបំពេញបទពិសោធន៍នៃគុណសម្បត្តិទាំងប្រាំមួយរួចហើយ សូមបង្កើតគម្រោងមួយដែលនឹងជួយអ្នកឲ្យអនុវត្តនូវអ្វីដែលអ្នកបានរៀន ។ ការណ៍នេះគួរតែជាកិច្ចខិតខំដ៏សំខាន់មួយដែលនឹងធ្វើឡើងយ៉ាងតិចណាស់ដប់ម៉ោងដើម្បីបញ្ចប់វា ។ សូមស្វែងរកការដឹកនាំពីព្រះវិញ្ញាណបរិសុទ្ធប្រកបដោយការអធិស្ឋាន ដើម្បីជ្រើសរើសគម្រោងដ៏មានអត្ថន័យមួយ ។
មុនពេលអ្នកចាប់ផ្ដើម សូមឲ្យឪពុក/ម្ដាយ ឬអ្នកដឹកនាំរបស់អ្នកអនុមតិលើគម្រោងនេះសិន ។ សូមសរសេរការវាយតម្លៃមួយ បន្ទាប់ពីអ្នកបានបញ្ចប់ ។ ខាងក្រោមនេះគឺជាយោបល់មួយចំនួនអំពីគម្រោងនៃគុណសម្បត្តិមួយ ។
-
សូមទន្ទេញ « ព្រះគ្រីស្ទដ៏មានព្រះជន្មរស់ » ( សូមមើលទំព័រ ១០២ ) ឲ្យចាំស្ទាត់ ។ នៅពេលអ្នកធ្វើដូច្នេះ សូមពិចារណាពីឥទ្ធិពលរបស់ព្រះអង្គសង្គ្រោះនៅក្នុងជីវិតរបស់អ្នក និងរបៀបដែលសេចក្ដីជំនឿរបស់អ្នកទៅលើទ្រង់បានកើនឡើង ។ សូមអនុវត្តតាមគំរូរបស់ព្រះអង្គសង្គ្រោះ ។
-
សូមអាន អាលម៉ា ៣២:២៨–៤៣ ។ សូមចាត់ទុកសេចក្ដីជំនឿដូចជាគ្រាប់ពូជមួយ ដែលអ្នកជួយដាំ ថែទាំ និងប្រមូលផលក្នុងសួនបន្លែមួយ ។ សូមកត់ត្រានៅក្នុងសៀវភៅកំណត់ហេតុរបស់អ្នកពីរបៀបដែលអ្នកអាចចិញ្ចឹម ថែទាំ និងពង្រឹងដល់សេចក្ដីជំនឿរបស់អ្នក ។
-
សូមចូលរៀនថ្នាក់ពង្សប្រវត្តិមួយនៅក្នុងវួដ ឬសាខារបស់អ្នក ។ សូមប្រមូលរឿងរ៉ាវដែលកើតមានទាំងឡាយដែលសាច់ញាតិរបស់អ្នក ឬមនុស្សដទៃដែលបានបង្ហាញពីសេចក្ដីជំនឿ ឬសម្ភាសសមាជិកគ្រួសារ ឬមនុស្សដទៃ ហើយកត់ត្រាពីដំណើររឿងរបស់ពួកគេ ។
-
សូមពិពណ៌នាពីពរជ័យនៃសេចក្ដីជំនឿដោយការសរសេររឿង កំណាព្យ ឬចម្រៀងមួយដោយខ្លួនឯង ឬដោយការបំពេញគម្រោងសិល្បៈចក្ខុវិស័យមួយដែលបង្ហាញពីសេចក្ដីជំនឿរបស់អ្នកទៅលើព្រះយេស៊ូវគ្រីស្ទ ។
គម្រោងរបស់ខ្ញុំគឺ ៖
ផែនការរបស់ខ្ញុំដើម្បីអនុវត្តគម្រោងរបស់ខ្ញុំគឺ ៖
ការអនុមតិ
កាលបរិច្ឆេទបញ្ចប់ដែលប៉ាន់ស្មាន
ការវាយតម្លៃលើគម្រោងរបស់ខ្ញុំគឺ ( រួមបញ្ចូលទាំងអារម្មណ៍ និងការយល់ដឹងរបស់អ្នកអំពីសេចក្ដីជំនឿដែលបានរីកចម្រើនផង ) ៖
ហត្ថលេខារបស់ឪពុក/ម្ដាយ ឬអ្នកដឹកនាំ
កាលបរិច្ឆេទ
ម៉ោងដែលបានចំណាយ