កិច្ចការល្អ

ដូច្នេះ ចូរឲ្យពន្លឺរបស់អ្នករាល់គ្នាបានភ្លឺនៅមុខប្រជាជននេះ ដើម្បីឲ្យគេអាចឃើញការល្អរបស់អ្នករាល់គ្នា ហើយសរសើរតម្កើងដល់ព្រះវរបិតានៃអ្នករាល់គ្នា ដែលគង់នៅស្ថានសួគ៌ ( នីហ្វៃ ទី៣ ១២:១៦ ) ។

ខ្ញុំនឹងជួយមនុស្សដទៃ ហើយស្ថាបនានគរតាមរយៈការបម្រើដ៏សុចរិត ។

បទពិសោធន៍នៃគុណសម្បត្តិដែលតម្រូវឲ្យមាន

សូមបំពេញបទពិសោធន៍នៃគុណសម្បត្តិដែលតម្រូវឲ្យមានទាំងបីដូចខាងក្រោមនេះ ។ សូមឲ្យឪពុកម្ដាយ ឬអ្នកដឹកនាំរបស់អ្នកចុះហត្ថលេខា និងចុះកាលបរិច្ឆេទលើបទពិសោធន៍នីមួយៗ បន្ទាប់ពីអ្នកបានបញ្ចប់ ។

សូមរៀនពីមូលហេតុដែលការបម្រើគឺជាគោលការណ៍គ្រឹះមួយនៃដំណឹងល្អ ។ សូមអាន ម៉ាថាយ ៥:១៣–១៦; ២៥:៣៤–៤០; កាឡាទី ៦:៩–១០; យ៉ាកុប ១:២២–២៧; ម៉ូសាយ ២:១៧; ៤:២៦; និង នីហ្វៃ ទី៣ ១៣:១–៤ ។ ជាញឹកញាប់ មនុស្សដទៃផ្ដល់ការបម្រើដែលអ្នកមិនអាចកត់សម្កាល់បានឡើយដូចជា ការរៀបចំអាហារ ការអាន ឬការស្ដាប់ដល់កុមារតូចៗ ការកែតម្រូវសំលៀកបំពាក់ ឬការជួយដល់បងប្អូនប្រុសស្រីណាម្នាក់ ។ ក្នុងរយៈពេលពីរសប្ដាហ៍ សូមកត់ត្រាក្នុងសៀវភៅកំណត់ហេតុរបស់អ្នកអំពីសកម្មភាពបម្រើដ៏ស្ងប់ស្ងាត់ដែលសមាជិកគ្រួសាររបស់អ្នក និងមនុស្សដទៃបានធ្វើ ។ សូមលើកសរសើរដល់ការបម្រើរបស់ពួកគេតាមរបៀបដ៏មានន័យនានា ។
ការបម្រើគឺជាគោលការណ៍ដ៏សំខាន់មួយក្នុងជីវិតគ្រួសារ ។ សូមជួយរៀបចំបញ្ជីមុខម្ហូបដល់គ្រួសាររបស់អ្នក ទៅទិញម្ហូប និងរៀបចំគ្រឿងម្ហូបខ្លះៗក្នុងរយៈពេលពីរសប្ដាហ៍ ។ អំឡុងពេលនោះ សូមជួយគ្រួសាររបស់អ្នកឲ្យជួបបរិភោគអាហារជុំគ្នា ។ សូមរាយការណ៍ដល់ថ្នាក់រៀនរបស់អ្នកអំពីអ្វីដែលអ្នកបានរៀន ។
សូមអាន ម៉ូសាយ ១៨:៧–១០ ហើយសរសេររបៀបបីយ៉ាងដែលអ្នកអាចលួងលោមដល់មនុស្សដទៃ ឬជួយពួកគេឲ្យទ្រាំទ្រនឹងបន្ទុករបស់ពួកគេនៅក្នុងសៀវភៅកំណត់ហេតុរបស់អ្នក ។ សូមធ្វើតាមអ្វីដែលអ្នកបានសរសេរ ហើយប្រាប់ដល់សមាជិកគ្រួសារ ឬអ្នកដឹកនាំម្នាក់អំពីបទពិសោធន៍ និងរបៀបដែលឥរិយាបថ និងការយល់ដឹងរបស់អ្នកបានផ្លាស់ប្ដូរ ។

បទពិសោធន៍នៃគុណសម្បត្តិបន្ថែម

សូមបំពេញបទពិសោធន៍នៃគុណសម្បត្តិបន្ថែមទាំងបីនេះ ។ អ្នកអាចជ្រើសរើសចេញពីជម្រើសដូចខាងក្រោម ឬសរសេរចេញពីគំនិតរបស់អ្នកឲ្យបានចំនួនពីរ ។ មុនពេលអ្នកចាប់ផ្ដើម ឪពុក/ម្ដាយ ឬអ្នកដឹកនាំរបស់អ្នកត្រូវតែអនុមតិលើកិច្ចការដែលអ្នកសរសេរដោយខ្លួនឯងទាំងនោះ ។ សូមឲ្យឪពុកម្ដាយ ឬអ្នកដឹកនាំរបស់អ្នកចុះហត្ថលេខា និងចុះកាលបរិច្ឆេទលើបទពិសោធន៍នីមួយៗ បន្ទាប់ពីអ្នកបានបញ្ចប់ ។

សូមបង្រៀនមេរៀនមួយអំពីការបម្រើនៅក្នុងរាត្រីជួបជុំក្រុមគ្រួសារ ឬនៅក្នុងការប្រជុំផ្សេងទៀត ។ សូមប្រើរូបភាព តន្ដ្រី គំរូ ឬការសម្ដែងនៅក្នុងមេរៀនរបស់អ្នក ។ អ្នកអាចប្រើសៀវភៅសិក្សា Teaching, No Greater Call ទុកជាជំនួយ ។
សូមអាន គោលលទ្ធិ និង សេចក្តីសញ្ញា ៥៨:២៦–២៨ ។ សូមគិតពីរបៀបដែលយុវនារីម្នាក់ ក៏ដូចជាភរិយា និងម្ដាយម្នាក់អាចអនុវត្តតាមបទគម្ពីរនេះនៅក្នុងគ្រួសាររបស់គាត់ ។ សូមអភិវឌ្ឍគន្លងនៃការបម្រើមួយនៅក្នុងជីវិតរបស់អ្នក ដោយការជ្រើសរើសសមាជិកគ្រួសារម្នាក់ដែលអ្នកអាចជួយបាន ។ សូមបម្រើដល់បុគ្គលនោះយ៉ាងហោចណាស់រយៈពេលមួយខែ ។ សូមកត់ត្រានៅក្នុងសៀវភៅកំណត់ហេតុរបស់អ្នកនូវសកម្មភាព និងអារម្មណ៍របស់អ្នកអំពីរបៀបដែលការណ៍នេះបានជួយពង្រឹងដល់ទំនាក់ទំនងរបស់អ្នកជាមួយនឹងបុគ្គលនោះ ។
សូមចំណាយពេលយ៉ាងហោចណាស់បីម៉ោងដើម្បីបម្រើដល់មនុស្សដទៃដែលមិនមែនជាគ្រួសាររបស់អ្នក ។ សូមសាកសួរប្រធានសមាគមសង្គ្រោះវួដ ឬសាខារបស់អ្នក ឬអ្នកដឹកនាំសហគមន៍ម្នាក់នូវយោបល់ពីការបម្រើ ។ ឧទាហរណ៍ អ្នកអាចមើលថែដល់កុមារ ពេលឪពុកម្ដាយរបស់ពួកគេចូលព្រះវិហារបរិសុទ្ធ, ប្រមូល ធ្វើ ឬកែកុនប្រដាប់លេង ឬល្បែងសម្រាប់ថ្នាក់ទារកដ្ឋាន, ទទួលយកការចាត់តាំងមួយទៅសម្អាតសាលាប្រជុំ, ឬបំពេញកិច្ចការមួយ ឬអានឲ្យមនុស្សចាស់ជរា ឬជនទុរគតផ្សេងទៀតស្ដាប់ ។ សូមកត់ត្រានៅក្នុងសៀវភៅកំណត់ហេតុរបស់អ្នកនូវប្រតិកម្មរបស់បុគ្គលដែលអ្នកបានបម្រើនោះ និងគោលដៅដែលអាចមានអំពីឱកាសបម្រើនាពេលអនាគតនានា ។
តាមរយៈកិច្ចការល្អរបស់អ្នក នោះមនុស្សដទៃនឹងមើលឃើញពីគំរូរបស់អ្នក ហើយអាចចង់ដឹងបន្ថែមទៀតអំពីដំណឹងល្អ ។ សូមអធិស្ឋានដើម្បីមានបទពិសោធន៍ដូចជាពួកអ្នកផ្សព្វផ្សាយសាសនាមួយ ។ សូមអាន ម៉ាថាយ ២៤:១៤; ២៨:១៩; និង គោលលទ្ធិ និង សេចក្ដីសញ្ញា ៨៨:៨១ ។ សូមអញ្ជើញមិត្តម្នាក់ដែលពុំមែនជាសមាជិកនៃសាសនាចក្រ ឬមិត្តម្នាក់ដែលមិនសូវសកម្មឲ្យចូលរួមការប្រជុំ ឬសកម្មភាពសាសនាចក្រជាមួយនឹងអ្នក ។ សូមណែនាំមិត្តភក្ដិរបស់អ្នកដល់មនុស្សដទៃ ហើយត្រូវប្រាកដថា គាត់ចូលរួមចំណែក ។ សូមចែកចាយទីបន្ទាល់របស់អ្នកអំពីដំណឹងល្អ ហើយអញ្ជើញគាត់ឲ្យមកម្ដងទៀត ។

បទពិសោធន៍នៃគុណសម្បត្តិផ្ទាល់ខ្លួន

គម្រោងនៃគុណសម្បត្តិ

បន្ទាប់ពីអ្នកបានបំពេញបទពិសោធន៍នៃគុណសម្បត្តិនៃកិច្ចការល្អទាំងប្រាំមួយរួចហើយ សូមបង្កើតគម្រោងមួយដែលនឹងជួយអ្នកឲ្យអនុវត្តនូវអ្វីដែលអ្នកបានរៀន ។ ការណ៍នេះគួរតែជាកិច្ចខិតខំដ៏សំខាន់មួយដែលនឹងធ្វើឡើងយ៉ាងតិចណាស់ដប់ម៉ោងដើម្បីបញ្ចប់វា ។ សូមស្វែងរកការដឹកនាំពីព្រះវិញ្ញាណបរិសុទ្ធប្រកបដោយការអធិស្ឋាន ដើម្បីជ្រើសរើសគម្រោងដ៏មានអត្ថន័យមួយ ។

មុនពេលអ្នកចាប់ផ្ដើម សូមឲ្យឪពុក/ម្ដាយ ឬអ្នកដឹកនាំរបស់អ្នកអនុមតិលើគម្រោងនេះសិន ។ សូមសរសេរការវាយតម្លៃមួយ បន្ទាប់ពីអ្នកបានបញ្ចប់ ។ ខាងក្រោមនេះគឺជាយោបល់មួយចំនួនអំពីគម្រោងនៃគុណសម្បត្តិមួយ ។

សូមជួយដាក់ផែនការ និងចូលរួមក្នុងគម្រោងមួយដើម្បីសម្អាត ឬធ្វើឲ្យសហគមន៍របស់អ្នកមានសោភ័ណភាព ។
សូមត្រៀមខ្លួនធ្វើជាមេផ្ទះម្នាក់ តាមរយៈការប្រមូលរូបមន្ដម្ហូប ដើរទិញម្ហូប និងរៀបចំអាហារសម្រាប់គ្រួសាររបស់អ្នក ។
សូមធ្វើការជាមួយនឹងសមាជិកគ្រួសារម្នាក់ ដើម្បីប្រមូលឈ្មោះសាច់ញាតិដែលបានចែកឋានទៅមួយចំនួន ដែលពុំមែនជាសមាជិកសាសនាចក្រ ។ សូមស្វែងរកថ្ងៃកំណើត និងថ្ងៃមរណភាពរបស់ពួកគេ ហើយរៀបចំឈ្មោះពួកគេដាក់ទៅព្រះវិហារបរិសុទ្ធ ។ សូមជួយដាក់ផែនការដើម្បីទៅព្រះវិហារបរិសុទ្ធ និងធ្វើពិធីបុណ្យជ្រមុជទឹកឲ្យសាច់ញាតិទាំងនោះ ។
សូមរៀបចំបម្រើដល់មនុស្សដទៃដោយការទទួលការបំពាក់បំប៉នជំនាញមួយដើម្បីប្រើប្រាស់ក្នុងស្ថានភាពមានអាសន្នដូចជា សង្គ្រោះបឋម ការធ្វើឲ្យដឹងខ្លួនឡើងវិញ ឬជំនាញសង្គ្រោះជីវិត ។
សូមបម្រើមនុស្សដទៃ ។ សូមស្ម័គ្រចិត្តនៅក្នុងសហគមន៍, ប្រមូលសម្ភារផ្គត់ផ្គង់តម្រូវការសប្បុរសធម៌, ចំណាយពេលបន្ថែមទៀតជួយដល់មណ្ឌលកុមារ ឬមនុស្សចាស់ជរា, ឬបង្ហាត់បង្រៀនក្នុងសាលារៀន ឬក្នុងសហគមន៍របស់អ្នក ។

គម្រោងរបស់ខ្ញុំគឺ ៖

ផែនការរបស់ខ្ញុំដើម្បីអនុវត្តគម្រោងរបស់ខ្ញុំគឺ ៖

ការអនុមតិ

កាលបរិច្ឆេទបញ្ចប់ដែលប៉ាន់ស្មាន

ការវាយតម្លៃលើគម្រោងរបស់ខ្ញុំគឺ ( រួមបញ្ចូលទាំងអារម្មណ៍ និងការយល់ដឹងរបស់អ្នកអំពីកិច្ចការល្អដែលបានរីកចម្រើនផង ) ៖

ហត្ថលេខារបស់ឪពុក/ម្ដាយ ឬអ្នកដឹកនាំ

កាលបរិច្ឆេទ

ម៉ោងដែលបានចំណាយ