Պողոս Առաքյալի Միսիոներական Ճամփորդությունները

Գազա Փիլիպպոսը քարոզում էր Քրիստոսի մասին և Գազայի ճանապարհին մկրտեց Եթովպացի ներքինին (Գոր. Ը.26–39):

Երուսաղեմ Երուսաղեմում կատարված իրադարձությունների համար, տե՛ս 12-րդ քարտեզը:

Հոպպե Պետրոսը տեսիլք տեսավ, որ Աստված ապաշխարության պարգև է շնորհել հեթանոսներին (Գոր. Ժ; ԺԱ.5–18): Պետրոսը կենդանացրեց մահացած Տաբիթային (Գոր. Թ.36–42):

Սամարիա Փիլիպպոսը ծառայում էր Սամարիայում (Գոր. Ը.5–13), իսկ, ավելի ուշ, Պետրոսը և Հովհաննեսն ուսուցանեցին այստեղ (Գոր. Ը.14–25): Երբ նրանք Սուրբ Հոգու պարգև շնորհեցին, Սիմոն մոգը ցանկացավ գնել այդ պարգևը նրանցից (Գոր. Ը.9–24):

Կեսարիա Այստեղ, նրանից հետո, երբ հրեշտակն այցելեց Կոռնելիոս անունով հարյուրապետին, Պետրոսը նրան թույլ տվեց մկրտվել (Գոր. Ժ): Այստեղ Պողոսն ասեց իր պաշտպանական խոսքն Ագրիպպասի առաջ (Գոր. ԻԵ–ԻԶ; տե՛ս նաև ՋՍ–Պ 1.24–25):

Դամասկոս Հիսուսը հայտնվեց Սողոսին (Գոր. Թ.1–7): Երբ Անանիան վերականգնեց Սողոսի տեսողությունը, Սողոսը մկրտվեց և սկսեց իր ծառայությունը (Գոր. Թ.10–27):

Անտիոք (Ասորիքում) Այստեղ առաջին անգամ աշակերտներին կոչեցին Քրիստոնյաներ (Գոր. ԺԱ.26): Ագաբոսը մարգարեացավ սովի մասին (Գոր. ԺԱ.27–28): Անտիոքում մեծ տարաձայնություններ բարձրացան թլփատության վերաբերյալ (Գոր. ԺԴ.26–28; ԺԵ.1–9): Անտիոքում Պողոսը սկսեց իր երկրորդ առաքելությունը Շիղայի, Բառնաբասի և Հուդա Բարսաբայի հետ (Գոր. ԺԵ.22, 30, 35):

Տարսոն Պողոսի ծննդավայրը: Եղբայրները Պողոսին ուղարկել էին այստեղ նրա կյանքը պաշտպանելու համար (Գոր. Թ.29–30):

Կիպրոս Հալածանքներ կրելուց հետո, Սրբերի մի մասը փախավ այս կղզի (Գոր. ԺԱ.19): Իր առաջին միսիոներական ճամփորդության ժամանակ Պողոսը (Գոր. ԺԳ.4–5), իսկ, ավելի ուշ, Բառնաբասն ու Մարկոսն անցան Կիպրոսի միջով (Գոր. ԺԵ.39):

Պափոս Պողոսն այստեղ անիծեց մի կախարդի (Գոր. ԺԳ.6–11):

Դերբե Այս քաղաքում Պողոսը և Բառնաբասը քարոզեցին ավետարանը (Գոր. ԺԴ.6, 19–20):

Լյուստրա Երբ Պողոսը բուժեց մի հաշմանդամի, նրան և Բառնաբասին աստվածներ հռչակեցին: Պողոսը քարկոծվեց և մեռած համարվեց, սակայն ուշքի եկավ և շարունակեց քարոզելը (Գոր. ԺԴ.6–20): Սա Տիմոթեոսի ծննդավայրն էր (Գոր. ԺԶ.1–3):

Իկոնիոն Առաջին առաքելության ժամանակ Պողոսը և Բառնաբասը քարոզեցին այստեղ և նրանց սպառնացին քարկոծել (Գոր. ԺԳ.51–ԺԴ.7):

Լավոդիկեա և Կողոսա Լավոդիկեան Եկեղեցու ճյուղերից մեկն էր, որն այցելել էր Պողոսը, և որոնցից նա նամակներ էր ստանում (Կող. Դ.16): Դա նաև այն յոթ քաղաքներից մեկն է, որոնք թվարկվում են Հայտնության գրքում (մյուսներն են՝ Եփեսոս, Զմյուռնիա, Պերգամոն, Թյուատիր, Սարգես և Փիլադելփիա. տե՛ս Հայտ. Ա.11): Կողոսան գտնվում է Լավոդիկեայից 18 կիլոմետր դեպի արևելք: Պողոսը գրել է այնտեղ ապրող Սրբերին:

Անտիոք (Պիսիդիայում) Իրենց առաջին առաքելության ժամանակ Պողոսը և Բառնաբասը հրեաներին ուսուցանում էին, որ Քրիստոսը Դավթի սերնդից է սերվել: Պողոսն ավետարանն առաջարկեց Իսրայելին, իսկ հետո՝ հեթանոսներին: Պողոսին և Բառնաբասին հալածեցին ու վտարեցին (Գոր. ԺԳ.14–50):

Միլետոս Այստեղ, իր առաքելության ժամանակ, Պողոսը զգուշացրեց Եկեղեցու երեցներին, որ «հափշտակող գայլեր» կմտնեն հոտի մեջ (Գոր. Ի.29–31):

Պատմոս Հովհաննեսը բանտարկյալ էր այս կղզում, երբ ստացավ այն տեսիլքները, որոնք այժմ Հայտնության գրքում են (Հայտ. Ա.9):

Եփեսոս Ապողոսը մեծ զորությամբ քարոզում էր այստեղ (Գոր. ԺԸ.24–28): Իր երրորդ առաքելության ժամանակ Պողոսը երկու տարի ուսուցանեց Եփեսոսում՝ դարձի բերելով շատ մարդկանց (Գոր. ԺԹ.10, 18): Այստեղ նա ձեռնադրմամբ շնորհեց Սուրբ Հոգու պարգևը (Գոր. ԺԹ.1–7) և շատ հրաշքներ գործեց, ներառյալ չար հոգիներ դուրս գցելը (Գոր. ԺԹ.8–21): Այստեղ Դիանային երկրպագողներն աղմուկ բարձրացրին Պողոսի դեմ (Գոր. ԺԹ.22–41): Հայտնության գրքի մի մասն ուղղված է եղել Եփեսոսի Եկեղեցուն (Հայտ. Ա.11):

Տրովադա Իր երկրորդ միսիոներական ճամփորդության ժամանակ, լինելով այստեղ, Պողոսը տեսիլք տեսավ, որում մի մարդ օգնություն էր խնդրում Մակեդոնիայի համար (Գոր. ԺԶ.9–12): Իր երրորդ առաքելության ժամանակ, Պողոսը կենդանացրեց մահացած Եվտիքոսին (Գոր. Ի.6–12):

Փիլիպպե Պողոսը, Շիղան և Տիմոթեոսը դարձի բերեցին Լիդիա անունով մի կնոջ, դուրս գցեցին մի չար ոգի և ծեծվեցին քաղաքի իշխանությունների կողմից (Գոր. ԺԶ.11–23): Նրանք աստվածային օգնություն ստացան՝ բանտից ազատվելու համար (Գոր. ԺԶ.23–26):

Աթենք Իր երկրորդ առաքելության ժամանակ, Աթենքում, Պողոսը Մարսի բլրի (Ակրոպոլիսի) մոտ քարոզեց «անծանոթ աստծո» մասին (Գոր. ԺԷ.22–34):

Կորնթոս Իր երկրորդ առաքելության ժամանակ Պողոսը գնաց Կորնթոս, որտեղ բնակվեց Ակյուղասի և Պրիսկյուղայի հետ: Այստեղ նա քարոզեց և մկրտեց շատ մարդկանց (Գոր. ԺԸ.1–18): Իր թուղթը Հռոմեացիներին Պողոսը գրել է Կորնթոսից:

Թեսաղոնիկեա Իր երկրորդ միսիոներական ճամփորդության ժամանակ Պողոսը քարոզում էր այստեղ: Երբ հրեաները սպառնալիք դարձան նրանց անվտանգության համար, նրա միսիոներական խումբը հեռացավ Բերիա (Գոր. ԺԷ.1–10):

Բերիա Պողոսի երկրորդ միսիոներական ճամփորդության ժամանակ, Պողոսը, Շիղան և Տիմոթեոսն ազնիվ հոգիներ գտան՝ ուսուցանելու: Թեսաղոնիկեի հրեաները հետևում և հալածում էին նրանց (Գոր. ԺԷ.10–13):

Մակեդոնիա Իր երկրորդ և երրորդ ճամփորդությունների ժամանակ Պողոսն ուսուցանել է այստեղ (Գոր. ԺԶ.9–40; ԺԹ.21): Պողոսը գովաբանել է Մակեդոնիայի Սրբերի առատաձեռնությունը, որոնք օժանդակել էին իրեն և Երուսաղեմի աղքատ Սրբերին (Հռովմ. ԺԵ.26; Բ Կոր. Ը.1–5; ԺԱ.9):

Մելիտե Դեպի Հռոմ իր ճանապարհին Պողոսը նավաբեկության ենթարկվեց այս կղզու մոտ (Գոր. ԻԶ.32; ԻԷ.1, 41–44): Նա չվնասվեց օձի կծածից և Մելիտեում շատ հիվանդներ բժշկեց (Գոր. ԻԸ.1–9):

Հռոմ Պողոսը, տնային կալանքի տակ լինելով, երկու տարի քարոզել է այստեղ (Գոր. ԻԸ.16–31): Հռոմի բանտարկության ժամանակ նա գրել է նաև իր թղթերը, կամ նամակները Եփեսացիներին, Փիլիպպեցիներին և Կողոսացիներին, ինչպես նաև Տիմոթեոսին և Փիլիմոնին: Պետրոսը գրել է իր առաջին թուղթը «Բաբելոնից», որը, հավանաբար, Հռոմն էր, այն բանից հետո, երբ Ք.ծ.հ. 64 թվականին Ներոնը սկսեց հալածել Քրիստոնյաներին: Ընդհանուր հավատամք կա, որ Պետրոսը և Պողոսը նահատակվել են այստեղ: