10 Capítulo
Lehi jipacanata nin Judíocuna Babiloniacunamanda huatai tucushcashna apai tucushca canga—Pai Judíocunamanda shuj Mesías, shuj Jatun Quishpichij, shuj Jatun Causachij shamunata nin—Lehi ninbash shuj shamunata pimi Diospaj llamaguta bautizanga—Lehi ninbash Mesíaspa huañuita causarinatapash—Pai shuj olivo quiruhuan Israelpaj shicanyaita tandanajuitapash parijashpa ricuchin—Nefi Diospaj churimanda parlan, Espíritu Santopaj donmanda, ali rurana minishtirishcamandapash. Nara 600–592 C.Ñ.
1 Cunan ñuca, Nefi, catini cushpa shuj jirru fangacunapi tandachishpa quilcashcata ñuca rurashca catishcacuna, ñuca reinado achil yachachishcapash; chaimanda, catini ñucapaj tandachishpa quilcashcacunahuan, ñuca taitapaj huaquin cuzascunatapash parlana cani, ñuca huauquicunamandapash.
2 Riqui, yalishca jipa ñuca taita paipaj muscushcata shimicunata parlashpa tucuchishca jipa, paicunata cutin yarichirca tucui shunguhuan, Judíocunamanda paicunaman parlarca—
3 Chai jipa paicuna tucuchi tucushca cajpi, chai jatun Jerusalén llacta, taucacuna Babiloniaman huatai tucushcashna apai tucujpi, Apunchijpaj paipaj propio punllamanda, paicuna tigramunga cutin, ari, chaipica huatai tucushcashnamanda tigramunga; paicuna huatai tucushcashnamanda tigramushpa paicunapaj chasquina alpata cutin charinga.
4 Ari, sujta patsaj huatacuna ñuca taita Jerusalénda saquishcamanda, Apunchij Diosca shuj achil villachij Judíocunamanda jatarichinga—shuj Mesíasta, shuj shimipi, cai pachapaj shuj Jatun Quishpichijta.
5 Achil villachijcunamanda parlarca, taucapacha cai cuzascunata testificashcacunamanda, cai Mesíasmanda, pimanda pai parlarca, cai pachapa Jatun Causachij.
6 Chaimanda, tucui runacuna chingashca urmashcapash carca, shina canma carca imaurapash na tucurinacaman imashpapash paicuna jatun causachijpi confiashpaca.
7 Pai parlarcapash shuj achil villachijmanda pimi Mesíaspa ñaupa shamugrin, Apunchijpaj ñanda alichingapa—
8 Ari, pai ñaupashpa rishpa jichushca pambapi yachachinga: Apunchijpaj ñanda alichichi, paipaj chaquiñangunata derechaichi; cangunapurapimi shuj canguna na rijsishca; paica ñucata yali. Paipa chaquipi churajushpa huatarishcata ñuca pascaitallapash na ushana cani. Ñuca taita cai cuzascunamanda ashtahuan parlarca.
9 Ñuca taita nirca pai bautizanga Betábarapi Jordánmanda chaishu ladopi; pai nircapash yacuhuan bautizanga; Mesíasta yacuhuan bautizanga.
10 Mesíasta yacuhuan bautizashca jipa, pai rijsishpa testificanga pai Diospaj llamaguta bautizashcata, pimi cai pachapaj juchacunata apanga.
11 Yalishca jipa ñuca taita cai shimicunata parlashca jipa ñuca huauquicunaman quishpiringapa villaicunamanda parlarca maijan Judíocunaman yachachishca canga, Judíocuna na crishpa cunganamandapash. Paicuna Mesíasta huañuchisca jipa, pimi shamugrin, pai huañushca jipa pai jataringa huañushcacunamanda, paimandallata ricurimunga, espíritu santomanda, gentilcunaman.
12 Ari, ñuca taita gentilcunamanda ashtahuan parlarca, Israelpaj huasimandapash, chaita paicuna shuj olivo quiruhuan parijashpa ricuchi tucushca carca, chaipaj malquicuna chalchi tucushca canga caiman chaiman tucui alpa jahuallapi shitai tucushca cangapash.
13 Chaimanda, pai nirca minishtirishcami ñucanchi shujllashnalla cushapacha nishca alpaman pushai tucuna, Apunchijpaj shimicuna pactachishca cachun, ñucanchica caiman chaiman tucui alpa jahuallapi shitai tucushca cangapa.
14 Israelpaj huasi caiman chaiman shitai tucushpaca paicuna apamui tucushpa cutin tandachishca canga; tucuripi, Gentilcuna tucuilla quishpiringapa villaicunata chasquishca cashpa, olivo quirupaj chaipacha viñashca malquicunaca, Israelpaj huasimanda puchushcacunaca, quimichishpa churashca canga, chayamunga rijsingapa ciertopacha Mesíasta, paicunapaj Apunchijta, paicunapaj Jatun Causachij.
15 Cashna laya shimi rimaicunahuan ñuca taita achil villashpa ñuca huauquicunaman parlarca, ashtahuan cuzascunatapash cai quilcashcacunapica na quilcani; ñuca taucacunata quilcashcani ñucapa shuj quilcashcapi ñuca alicachishcata.
16 Tucui cai cuzascuna, ñuca parlashcata, ñuca taita facha huasipi causashpa rurashca carca, Lemuelpaj pugru pambapi.
17 Yalishca jipa ñuca, Nefi, ñuca taitapaj tucui cai shimicunata uyashca cashpa, achil muscuipi pai ricushcacunamanda, paica Espíritu Santopaj ushaihuan parlarca, cai ushaita Diospa churipi fehuan chasquirca—Diospaj churica Mesías carca pimi shamugrin—Ñuca, Nefi, munashca carcani ñucapash ricuiman, uyaiman yachaimanbash cai cuzascunata, Espíritu Santopaj ushaihuan, chaica Dios carashca tucui picunata paita utsia mascajcunata, imashna punda tiempopishna paimanda runacunapaj huahuacunaman ricurimugrin tiempopipash.
18 Paica paillata can caina, cunan, imaurapash na tucurinacaman; tucui runacunapaj ñanga alichishca can cai pachata rurashcamandapacha, shina paicuna arrepentirishpa paipaman shamujpica.
19 Maijan utsia mascajca taringa; Diospaj na villashcacunata paicunaman yachachinga, Espíritu Santopaj ushaihuan, imashna punda tiempopishna shinallata punda tiempocunapi shamujcunapipash; chaimanda, Apunchijpaj ñanga muyujunlla mana tucurin.
20 Caimanda yarichi, Oh runa, quiquinba tucui rurashcacunamanda ricushpa chasquichinaman apamui tucungui.
21 Chaimanda ruran na ruran ricuna punllacunapi na alita rurashca cashpaca, quiquinguna mapalla ricuringuichi Diospaj ricushpa chasquichina jatun tiarina ñaupapi; nishuj mapalla cuzas Dios-huan na causai ushan; chaimanda, llujchishpa cachai tucunguichi imaurapash na tucurinacaman.
22 Espíritu Santo cuhuashca autoridadta ñuca cai cuzascunata parlachun, caicunata ama jarcarichun.