1 Yalishca jipa ñuca huauquicunaman parlarcani, nishpa: Jerusalénman cutin vichai jacuchi, fielcuna cashunchi Apunchijpaj rurachunbacha saquishcacunata alichishpa; riqui pai tucui cai pachata yali ushaihuan, shinaca imashpata Labán paipaj pichachungacunatapash na yali ushanga, ari, paipaj huaranga huarangacunatapash?

2 Chaimanda vichai jacuchi; Moisés laya shinllicuna cashunchi; paica puca mama cocha yacucunata parlarcapacha, chaicuna caiman chaiman anchurirca, ñucanchi taitacuna, huatai tucushcashna canamanda, chaquishca alpata yalimurca, Faraónba macanajuj runacuna catimurca puca mama cocha yacupi pambarishpa huañurca.

3 Cunan riqui caicuna na llulla cajta yachanguichi; shuj ángel ñucanchiman parlashcatapash yachanguichi; imashpata na tucui shungu cringuichi? Vichai jacuchi; Apunchijca ñucanchita cacharita ushan, ñucanchi taitacunatashna, Labánda tucuchitapash, Egipciocunatashna.

4 Cunan cai shimicunata parlajpica, paicuna fiñashcara carca, huasharimashpa catinajurcara; shinapash paicuna Jerusalénpa pircacunacaman cati nihuarca.

5 Caica tutapi carca; ñuca paicunata canlla pircacunapi pacajuichi nircani. Paicunallata pacajushca jipa, ñuca Nefi, llactaman alilla yaicurcani Labánpaj huasiman quimiringapa rircani.

6 Espíritu pushajpi, ima cuzascunata ñuca ruragrijuita na yachashpata rijurcani.

7 Ashtahuangari ñuca rircani ñaupaman, Labánpaj huasiman ña quimirishpa shuj runata ricurcani, ñuca ñaupapi alpaman urmarca, paica vinohuan machashca carca.

8 Ñuca paipaman quimirijpica Ñuca tuparcani Labán cashcata.

9 Paipa espadata ricurcani, maipi alichishcamanda llujchircani; maqui charinaca curi cashcahuan rurashca carca, rurashca layaca alipacha carca, ñuca ricurcani espadaca juyaillapacha acero carca.

10 Yalishca jipa espíritu ñucata tangahuarca Labánda huañuchichun; ashtahuangari ñuca shungupi nircani: Nimaura ñuca jaripa yahuarta na jichashcanichu. Ñuca huashanchirircani paita na huañuchishachu yashpa.

11 Espírituca cutin nihuarca: Riqui Apunchijca paita quiquinba maquicunapi cushca can. Ari, ñuca yachanipash paica ñuca causaitapacha quichungapa munarca; ari, paica Apunchijpaj rurachunbacha saquishcacunata na cazunpashmi; paica ñucanchi charishcacunatapash aparca.

12 Yalishca jipa espírituca ñucata cutin nirca: paita huañuchi, Apunchijca paita quiquinba maquicunapi cushca can;

13 Riqui Apunchijca huañuchin na alicunata paipa tucui ali munaicuna pactamuchun. Cai alichari canman shuj na ali jari huañushpara shuj jatun llacta Diospi na crishpa asha asha chingarina ama asha asha tucurichun.

14 Cunan, imaura ñuca, Nefi, cai shimicunata uyashpaca, Apunchijpaj shimicunata yarircani imatami pai jichushca pambapi ñucaman parlarca, nishpa: Imashna quiquinba cati aillucuna ñuca rurachunbacha saquishcacunata alichishpaca, paicuna cushapacha nishca alpapi ali miranga.

15 Ari, ñuca yuyarcanipash paicunaca Apunchijpaj rurachunbacha saquishcacunata na alichingachu imasha Moiséspaj catichunbacha saquishcacunapishna, imashpapash paicuna catichunbacha saquishcacuna charishpaca.

16 Ñuca yacharcanipashmi chai catichunbacha saquishcacunaca bronce jirru fangacunapi quilcashca cajta.

17 Cutinbash, ñuca yacharcani Apunchijca Labánda ñuca maquicunapi caimanda cushca—ñuca tandachishca quilcashcacunata imashna paipaj rurachunbacha saquishcacunashna apamuchun.

18 Chaimanda ñuca espíritupa shimita cazurcani, Labánda uma ajchamanda japircani, ñuca paipa espadahuanllata umata cuchurcani.

19 Jipaman ñuca paipa espadahuanllata umata cuchushpa, ñuca Labánpaj churajunacunata japircani ñucapa cuerpopi chaicunata churajurcani; ari, tucui uchillacunacaman; ñuca paipa armadurata ñuca lomocunapi chumbilishpa huatarircani.

20 Ñuca caita rurashca jipa, Labánpaj tesorocuna alichishca pushtuman rircani. Labánpaj tesorocuna alichishca pushtuman chayashpaca, riqui Labánpaj sirvij runata ricurcani paica tesorocuna alichishca pushtupa llavecunata charirca. Ñuca paita Labánpaj shimirimaihuan, jacu ñucahuan maipimi tesorocuna alichishca pushtuman mandarcani.

21 Paica ñuca paipa mandaj Labánmi yarca, paica churajunacunata, espadata ñuca lomocunapi chumbilishpa huatarishcatapash ricurca.

22 Pai parlahuarca Judíocunapa rucucunamanda, pai yachaimanda paipaj mandaj, Labán, tutapi paicunahuan cashca cajpi.

23 Ñuca parlarcani Labán cajshnalla.

24 Ñuca parlarcanipash ñuca chai quilcashcacunata apanata, chai bronce jirru fangacunapi cajcunata, ñuca rucu huauquicunaman picunami canlla pircapi carca.

25 Mandarcanipashmi ñucata catihuachun.

26 Pai, iglesiamanda huauquicunata parlajun yarca, Labánpacha can yarca, pitami ñuca huañuchircani, chaimanda pai catihuarca.

27 Pai ñucaman tauca viaje Judíocunapaj rucucunamanda parlarca, ñuca huauquicunapaman tigrajujpi, paicuna canlla pircacunapi carca.

28 Yalishca jipa Lamán imaura ricuhuarca ninanda manllarirca, shinallata Lemuel, Sampash. Paicuna ñuca ñaupamanda calparca; paicuna Labánmi yarca, pai ñucata huañuchishpa paicunatapash huañuchingapa munan yarcapash.

29 Yalishca jipa paicunata cayarcani, paicuna uyahuarca; chaimanda paicuna ñuca ñaupamanda calpaita saquirca.

30 Yalishca jipa Labánpaj sirvij runa ñuca huauquicunata ricushpa manllai callarirca, ñalla ñuca ñaupamanda calparca Jerusalén llactaman tigrangapa.

31 Cunan ñuca Nefi, shuj jatun viñai runa caimanda, Apunchijpaj shinllicaita chasquishcapash caimanda, Labánpaj runata charircani, paita japishpa charircani, pai na calpai usharcachu.

32 Yalishca jipa paihuan parlarcani, ñuca shimicunata uyahuarca, imashna Apunchij causan, ñuca causanipash, pai ñucanchipaj shimicunata uyajpica, ñucanchi paipa causaita huacaichishun.

33 Ñuca paiman parlarcani, juramentota rurarcani ama manllaita charichun; paica ñucanchishna libre jari canga ñucanchihuan jichushca pambaman urai rijpi.

34 Ñuca paiman parlarcanipash, nishpa: Apunchijpacha ñucanchita cai cuzascunata rurachun mandashca carca; nachu utsia mascajcuna cana canchi Apunchijpaj rurachunbacha saquishcacunata alichishpa? Chaimanda, quiquin jichushca pambaman ñuca taitapaman urai rijpica quiquin ñucanchipurashna causangui.

35 Yalishca jipa Zoram ñuca parlashca shimicunamanda cushijuita japirca. Cunan chai runapa shutica Zoram carca; pai jichushca pambaman ñucanchi taitapaman rishapacha nirca. Ari, paipash shuj juramentota rurarca cunanmanda ñucanchihuan casha nishpa.

36 Cunan ñucanchi munarcanchi pai ñucanchihuan cachun caimanda, Judíocuna ñucanchi jichushca pambaman rishcata ama yachachun, paicuna catimushpa ñucanchita huañuchinata manllarcanchi.

37 Yalishca jipa ñucanchiman Zoram juramento rurajpica, paimanda ñucanchipa manllaicunaca quidarca.

38 Yalishca jipa ñucanchi bronce jirru fangacunata aparcanchi Labánpaj runatapash, jichushca pambaman rircanchi, ñucanchi taitapa facha huasiman rircanchi.