1 Yalishca jipa ñucanchi cutin ri callarircanchi jichushca pambata; ñucanchi caimanda chaiman indi llujshij ladoman purircanchi. Ñucanchi purircanchi ashtaca llaquicunata shinlliyashpapacha yalircanchi jichushca pambapi; ñucanchi huarmicuna jichushca pambapi huahuacunata charirca.

2 Ninan jatun carca Apunchijpaj achil yachishcacuna ñucanchi jahuapi, ñucanchica jichushca pambapi chahua aichahuan causajpipash; ñucanchi huarmicunaca paicunapaj huahuacunapa ashtaca lecheta charirca, shinllicuna carca, ari jaricunashna; paicuna callarirca shinllicuna caita rinacunapi na huasharimashpa.

3 Shina ñucanchi ricunchi Diospaj rurachunbacha saquishcacunaca pactachishca cana. Shina runacunapaj huahuacuna Diospaj rurachunbacha saquishcacunata alichijpica, pai micuchin, shinllichinbash, imashapash canacunata cun chaicunahuan pactachichun imata pai mandashcacunata; chaimanda, pai imashapash canacunata curca ñucanchiman jichushca pambapi canajujpi.

4 Ñucanchi tauca huatacunata canajurcanchi, ari, chaipica pusaj huatacunata jichushca pambapi.

5 Ñucanchi chayamurcanchi pambaman chaitaca Ashtacapacha Tiaj nishpa shutichircanchi, ashtaca fucushcacunamanda sacha mishquimandapash; tucui cai cuzascuna Apunchij alichishca carca ama ñucanchi huañuchun. Ñucanchi ricurcanchi jatun mama cochata, chaita shutichircanchi Irreantum, caica, ima cajta nishpaca acha yacucuna can.

6 Yalishca jipa mama cocha patapi ñucanchi facha huasicunata shayachircanchi; masqui tauca llaquicunata llaqui yalishca cashpapash acha na rurarinalla, ari, ashtacapacha caita na tucuilla quilcai ushanchi, ñucanchi ninandapacha cushijushca carcanchi mama cocha pataman chayamushpaca; ñucanchica pushtutaca Ashtacapacha Tiaj nishpa shutichircanchi, ashtaca fucushcacunamanda.

7 Yalishca jipa ñuca, Nefi, Ashtacapacha Tiaj pambapi tauca punllacunata cashca jipa, Apunchijpaj shimi shamurca ñucapaman, nishpa: Jatari, urcuman vitsia. Yalishca jipa ñuca jatarircani urcuman vitsiarcani, Apunchijta mañarcani.

8 Yalishca jipa Apunchijca parlahuarca, nishpa: shuj barcota rurangui, ñuca quiquinman ricuchishca layapi, ñuca quiquinba runacunata cai yacucunata chimbashpa apachun.

9 Ñuca nircani: Apunchij, maimanda rina cani mineralcunata tarishpa surcushpa yacuyachingapa, ñuca imacunatalla rurai ushangapa barcota rurangapa quiquin ricuchihuashca layapi?

10 Yalishca jipa Apunchijca nihuarca: maiman rinata mineralta taringapa, chaicunahuan imacunatalla rurangapa.

11 Yalishca jipa ñuca, Nefi, shuj fucunata rurarcani animal caracunahuan ninata fucuchingapa; ninata fucuchingapa minishtishca shuj fucunata rurashca jipa, ñuca ishcai rumicunata paipura huajtarcani nina japichingapa.

12 Chai horascaman Apunchijca ninata japichichun na saquishca carca jichushca pambata rinajujpica; pai nirca: ñuca quiquingunapa micunacuna mishqui cachun rurasha, ama yanuchun;

13 Ñuca jichushca pambapipash micha casha; ñuca canba ñaupapi ñanda alichisha, shina canguna ñuca rurachunbacha saquishcacunata alichijpica; chaimanda, can rurachunbacha saquishcacunata alichijpica cushapacha nishca alpaman pushaitucungui; can yachanguipash ñuca canba pushaj cajta.

14 Ari, Apunchijca nircapash: can cushapacha nishca alpaman chayashca jipa, can yachanguipash ñuca, Apunchijca Dios cani; Ñuca Apunchij canda tucuchinamanda cacharichircani; ari, ñuca Jerusalénpaj alpamanda apamurcani.

15 Chaimanda, ñuca, Nefi, Apunchijpaj rurachunbacha saquishcacunata shinlliyashpa alichingapapacha munarcani, ñuca huauquicunata cutin yarichircani fielcuna rurariajcunapash cachun.

16 Yalishca jipa ñuca imatalla ruranacunata mineralmanda rurarcani caitaca rumimanda surcushpa yacuyachircani.

17 Ñuca huauquicuna ricurca ñuca ña shuj barcota ruragrijujta, paicuna huasharimai callarihuarca, nishpa: Ñucanchi huauquica shuj juizu illa can, paica shuj barcota rurai ushasha yuyan; ari, paica yuyanbash pai cai jatun yacucunata chimbai ushasha.

18 Shina ñuca huauquicuna na alicachihuarca, paicuna na trabajangapa munarca, na crirca ñuca shuj barcota rurai ushajta; shinallata na crirca ñuca Apunchijhuan yachachi tucushca cajtapash.

19 Yalishca jipa ñuca, Nefi, ninandapacha llaquiyashca carcani paicunapaj shungucuna shinlliyaimanda; cunanga paicuna ricushpaca ñuca llaquiyai callarita paicunaca cushijurca paicunapaj shungucunapi, cashna paicuna cushijurca, nishpa: Ñucanchi yacharcanchi can na shuj barcota rurai ushanata, ñucanchi yacharcanchi can yuyai illa cajta; chaimanda, can na shuj ninan jatun ruranata pactachi ushangui.

20 Canga ñucanchi taitashna cangui, ñaupashpa pushamurca paipaj shungupa muspaj yuyashcacunahuan; ari, pai Jerusalénpaj alpamanda ñaupashpa llujchimurca, ñucanchi jichushca pambapi caipi chaipi purishcanchi cai tauca huatacunata; ñucanchi huarmicuna shinlli trabajashca, vijsayu cashpapash; paicuna jichushca pambapi huahuacunata charishca tucui cuzascunata llaqui yalishca, huañuitalla na; ashtahuan ali canma carca paicuna huañushpaca Jerusalénmanda nara shamushpallata cai llaquicunata yalina randi.

21 Riqui, cai tauca huatacunata ñucanchi jichushca pambapi llaqui yalishcanchi, cai tiempota ñucanchica ali yalinchiman carca ñucanchipaj charishcacunahuan ñucanchipaj chasquina alpapi; ari, ñucanchica cushilla canchiman carca.

22 Ñucanchi yachanchi Jerusalénpaj alpapi causaj runacunaca ali ruraj runacuna carca; paicuna alichirca Apunchijpaj catichun saquishcacunata ricushpa chasquichinacunatapash, tucui pai rurachunbacha saquishcacunatapash, Moiséspaj catichunbacha saquishcacunahuan; chaimanda, ñucanchi yachanchi paicuna ali ruraj runacuna can; ñucanchi taita paicunata ricushpa chasquichishca can; ñaupashpa pushamushca can paipaj shimicunata uyaimanda; ari, ñucanchi huauqui paishnalla can. Cashna laya shimirimaicunahuan ñuca huauquicuna huasharimanajurca na alicachinajurca ñucanchita.

23 Yalishca jipa ñuca, Nefi, parlarcani, nishpa: cringuichi canguna ñucanchi taitacuna, picunami Israelpaj huahuacuna carca, cacharichishca canma carca Egipciocunapaj maquicunamanda Apunchijpaj shimicunata na uyashpaca?

24 Ari, canguna yanguichichu paicunaca huatai tucushcashnamanda cacharichishca canmanlla carca, Apunchijca Moisésta huatai tucushcashnamanda cacharichichun na mandashca cajpica?

25 Cunan canguna yachanguichi Israelpaj huahuacunaca huatai tucushcashnapi carca; canguna yachanguichipash paicuna shinlli ruranacunahuan llaquichishcacuna carca, chaicuna apangapa shinlli carca; chaimanda, canguna yachanguichi paicunapaj minishtirishcapacha shuj ali cuzas cana carca, huatai tucushcashnamanda cacharichi.

26 Cunan canguna yachanguichi Moisésca Apunchijmanda mandai tucushca carca cai jatun ruranata rurangapa; canguna yachanguichipashmi paipaj shimihuan Puca Mama Cochapa yacucuna caiman chaiman anchuchishca carca, paicunaca chaquishca alpa jahuata yalirca.

27 Ashtahuangari canguna yachanguichi Egipciocunaca paicuna Faraónba macanajujcuna carca, Puca Mama Cochapi pambarishpa huañurca.

28 Canguna yachanguichipashmi Israelpaj huahuacunaca jichushca pambapica maná nishcata micurca.

29 Ari, canguna yachanguichipash Moisésca, paipaj shimi nishcashna Diospaj ushai paihuan caimanda, rumita huajtarca, yacu llujshirca, Israelpaj huahuacuna yacunayaita yalichichun.

30 Masqui paicuna Apunchij paicunapaj Dios-huan pushajpipash, paicunapaj Jatun Causachij, paicunapaj ñaupata rijujpi, pushashpa punllapi, tutapi michata cushpa, tucui cuzascunata paicunamanda rurashpa chaicuna ali carca runapa chasquichun, paicunapaj shungucunata shinlliyachirca paicunapaj yuyaicunata ñausayachirca, Moisésta pliturca ciertopacha causajuj Diostapash.

31 Yalishca jipa paipaj shimi nishcashna paicunata tucuchirca; paipaj shimi nishcashna paicunata pusharca; paipaj shimi nishcashna paicunamanda tucuita rurarca; nimata na rurarca paipaj shimi nishcamandalla.

32 Jordán jatun yacuta chimbashca jipaca paicunataca shinllicunata rurarca, chai alpapi causaj huahuacunata llujchishpa cachachun, ari, paicunata tucuchingacaman shicanyachinga.

33 Cunan, canguna yanguichichu paipaj alpamanda huahuacunaca, picunami cushapacha nishca alpapi cajcunaca, paicunapaj taitacunahuan llujchishpa cachai tucushca carca, canguna yanguichichu paicuna ali rurajcunachu carca? Riqui, ñuca ninimi, Na.

34 Canguna yanguichichu ñucanchi taitacunaca paicunata yali ajllai tucushcacha canman carca paicuna ali ruraj cuna cajpica? Ñuca ninimi, Na.

35 Riqui, Apunchijca tucui aichatami pacta juyan; alicunaca Diospaj ayudashca can. Ashtahuangari riqui, cai runacunaca Diospaj shimita shujllangaman na cazurca, paicuna na ali ruraicunapi fucurca; Diospaj tucuilla fiñai paicunapaj jahuapi carca; Apunchijca alpata paicunamanga llaquichirca, ñucanchipa taitacunamanga achilyachirca; ari, paicunaman llaquichirca paicunata tucuchingapa, ñucanchi taitacunamanga achilyachirca caita, chai jahuapi paicuna ushaita charichun.

36 Riqui, Apunchijca alpata rurashcami chaipi causashca cachun; paipaj huahuacunata rurashcami can paicuna chaipi tiarichun.

37 Paica shuj ali jatun llactata jatarichinga, na alicunapaj jatun llactacunataca tucuchinga.

38 Pai alicunataca juyailla pambacunaman pushanga, na alicunata tucuchin, paicunamanda alpatapash llaquichin.

39 Pai jahua pachacunapi jatun mandan, chaica paica jatun tiarina can, cai alpaca paipaj chaqui sarunami can.

40 Pai juyan picuna paita paicunapaj Dios cachun chasquijcunata. Riqui, pai juyan ñucanchi taitacunata, paicunahuan pactachinacunata ruran, ari, Abraham, Isaac Jacobhuanbash; pai pactachinacunata rurashcacunata yarin; chaimanda, paicunata Egipto llactamanda apamurca.

41 Pai jichushca pambapi paipaj varahuan llaquichirca; paicunapaj shungucunata shinlliyachimanda, cangunashnallata; Apunchijca paicunapaj na ali ruraicunamanda paicunata llaquichirca. Pai rupajuj alascunahuan rij culebracunata paicunapaman cacharca; canishca jipa paicuna imashapash jambishca canata alichirca; paicunapaj trabajo rurana carcami ricuna; cai yangalla caimanda, ruranalla caimanda, taucacuna huañurca.

42 Paicunaca huaquinbi huaquinbi paicunapaj shungucunata shinlliyachirca, Moisésta pliturca, Diostapash; shina cajpipash, canguna yachanguichi paicunaca pushai tucurca cushapacha nishca alpaman paipalla pihuanbash na pactan ushaihuan.

43 Cunan, tucui cai cuzascuna jipa, punlla shamushca paicuna na alicunaman tigrashca, ari, ñalla fucuiman; ñuca na yachanichu cai punllacunapi ñalla tucuchi tucushca canga; yachanimi punlla shamungapachami paicuna tucuchi tucushca canga, huaquinlla na tucuchi tucunga, picuna huatai tucushcashnaman apashca canga.

44 Chaimanda, Apunchijca mandashca ñuca taitata jichushca pambaman richun; Judíocunaca paipaj causaita quichungapa munarca; ari, cangunapash paipaj causaita quichungapa munarcanguichi; chaimanda, canguna huañuchijcuna canguichi cangunapaj shungupi paicunashnallata.

45 Canguna na ali ruraicunata rurangapa ñapash canguichi ashtahuangari Apunchij cangunapaj Diosta yaringapa unayaicuna. Canguna shuj ángelta ricushcanguichi, cangunahuan parlashca; ari, canguna huaquinbi huaquinbi paipaj shimita uyashca canguichi; cangunata alillagu casillagu parlashca, ashtahuangari uyaita saquishcanguichi, paipaj shimicunata na uyanguichi; chaimanda, cangunaman parlashca culun nina shimihuanshna, caica alpatapash chaupirinashna chujchuchirca.

46 Canguna yachanguipashmi paipaj tucui ushaita charij shimimanda paica ushanmi ruraita cai alpaca ñana tiachun; ari, canguna yachanguichipashmi paipaj shimimanda pai rurai ushan lomalla pushtucunaca pugru pushtucuna cachun, pugru pushtucuna chaupirichun. Oh, imashpata, cangunapaj shungucunapi shinllicuna caita ushanguichi?

47 Riqui, ñuca alma chaupirin jatun llaquihuan cangunamanda, ñuca shungu nanachishca can; ñuca manllani canguna imaurapash na tucurinacaman llujchishpa cachashca canata. Riqui, Diospaj Espírituhuan junda cani, cashna ñuca cuerpo shinllicaica illan.

48 Cunan yalishca jipa ñuca cai shimicunata parlajpica paicuna fiñahuarca, munarca shitangapa ucu ucu mama cochaman; paicunapaj maquicunata ñuca jahuapi churajpica ñuca parlarcani: Tucui Ushaita Charij Diospaj shutipi, ñuca mandani ama tacarihuanguichu, Diospaj ushaihuan jundami cani, ñuca aichata tucuchingacaman; picunami maquicunata ñuca jahuapi churajpica anguyanga shuj chaquishca virushna; nima na canga Diospaj ushai ñaupapica, Diosca paita chugrichingami.

49 Yalishca jipa ñuca, Nefi, nircani paicunapaj taitataca ashtahuan ama huasharimachun; paicunapaj trabajotapash ñucaman ari nichunlla, imashpa Dios mandahuarca shuj barcota rurachun.

50 Paicunata nircani: Dios mandashca cajpica tucui cuzascunata rurai ushasha. Pai mandajpica cai yacuta nichun, alpa cai, alpa canman; ñuca nijpica rurashca canga.

51 Cunan, Apunchijca cashna jatun ushai charijpica, runacunapaj huahuacunaman juyailla ruraita ricuchinacunata rurarca, imashpashi shuj barcota ruranata na yachachihuanga?

52 Yalishca jipa ñuca, Nefi, ñuca huauquicunaman tauca cuzascunata nircani, cashna picuna pandarishcacuna carca ñucahuan na fiñai usharca; maquicunata ñuca jahuapi churangapapash manllarca paicunapaj dedocunahuanbash na tacarihuarcachu tauca punllacunata. Cunan paicuna manllarca caita ruraita ñuca ñaupapi anguyana manllaimanda, Diospaj Espírituca ninan ushaihuanbacha carca; shina paicunaman imalla rurashca carca.

53 Yalishca jipa Apunchijca nihuarca: canba maquita cutin chutai quiquinba huauquicunapaman, quiquinba ñaupapi na anguyangachu, ashtahuangari paicunata chaspisha, Apunchijca nin caita rurashami paicuna yachachun ñuca Apunchij paicunapaj Dios cajta.

54 Yalishca jipa ñuca maquita chutarcani ñuca huauquicunapaman, paicuna na anguyarcachu ñuca ñaupapi; ashtahuangari Apunchijca paicunata chaspirca, pai parlashca shimi nishcashna.

55 Cunan, paicuna nirca: ñucanchi yachanchimi ciertopacha Apunchijca quiquinhuan can, ñucanchi yachanchi Apunchijpaj ushaimi ñucanchita chaspishca can. Paicuna ñuca ñaupapi cungurirca, ñalla adorahuarca, ashtahuangari paicunata na saquircanichu, nishpa: ñuca quiquingunapa huauqui cani, ari, jipa huauqui; chaimanda, Apunchij quiquinba Diosta adoraichi, quiquingunapaj taitata quiquingunapaj mamata alicachishpa cazuichi, quiquingunapaj punllacuna cai alpapi mirashca cachun Apunchij quiquinba Dios cuchun.