2 Capítulo
Lehipa aillucunata jichushca pambaman Puca Jatun Mama Cochata ladota pushan—Paicunapaj charishcacunata saquin—Lehi Apunchijman shuj sacrificiota cun paipaj churicunaman rurachunbacha saquishcacunata alichichun yachachinbash—Lamán Lemuelpash paicunapaj taitata huashariman—Nefi cazuj can fehuan achil mañan; Apunchijca paihuan parlan, pai ajllai tucun paipaj huauquicunata mandachun. Nara 600 C.Ñ.
1 Caimanda riqui, yalishca jipa Apunchijca ñuca taitaman parlarca, ari muscuipipash, paiman nircapash: Lehi quiquinga achilyachishca cangui, cuzascunata imata rurashca caimanda; quiquinga fielmi cashcangui cai runacunaman yachachishcangui imatami ñuca quiquinman mandashcata, riqui, paicuna quiquinba causaita quichungapa munan.
2 Yalishca jipa Apunchijca ñuca taitata mandarca, shuj muscuipi paipaj ailluta apashpa jichushca pambaman richun.
3 Yalishca jipa paica Apunchijpaj shimita cazuj carca, chaimanda Apunchij paita imashna mandashcata rurarca.
4 Yalishca jipa paica jichushca pambaman rirca. Paipaj huasita, paipaj chasquina alpatapash, paipaj curitapash, paipaj culquitapash, paipaj juyailla cuzascunatapash saquirca, paihuan nimata na aparca, paipa aillucashcatalla, micunacunatapash, facha huasicunatapash apashpa, jichushca pambaman rirca.
5 Pai, pata ladota urai shamurca puca mama cocha manñalla; pai jichushca pambapi purirca manñacunapi maijanmi puca mama cocha ladolla can; pai jichushca pambapi purircapacha paipa ailluhuan, caicunaca carcami ñuca mama, Saríah, ñuca rucu huauquicunapash, paicuna carca Lamán, Lemuel, Sam.
6 Yalishca jipa imaura pai quimsa punllacunata jichushca pambapi purishca carca, pai paipaj facha huasita shuj pugru pamba ladota shayachirca shuj rijuj yacu ladota.
7 Yalishca jipa pai shuj rumicunahuan altarta rurarca, Apunchijman shuj ofrendata ricuchirca, Apunchij ñucanchi Diosta pagui nirca.
8 Yalishca jipa paica jatun yacuta shutichirca, Lamán, caica puca mama cochaman yaicumujurca; pugru pambaca manñacunapi yacu shimiman quimiriaj carca.
9 Imaura ñuca taita cai yacucuna jatun yacumanda puca mama cochapa pujyuman yaicumujta ricurca, pai Lamánman parlarca, nishpa: Oh quiquin cai jatun yacushna, tucui ali rurana pujyuman calpajushcanguimanlla!
10 Cunan pai caita Lemueltapash parlarca: Oh quiquin cai pugru pambashna cashcanguiman, shinlli na shaijushpa na cuyurishpa catijujlla Apunchijpaj rurachunbacha saquishcacunata alichishpa!
11 Cunan, Lamán, Lemuelpash shinlli shungu caimanda pai caita parlarca; caimanda riqui paicuna tauca cuzascunapi paicunapa taitata huasharimarca, pai shuj achil muscuj jari caimanda, paicunata ñaupashpa Jerusalénpaj alpamanda llujchimurca, paicunapa chasquina alpata saquishpa, paicunapa curitapash, paicunapa culquitapash, paicunapa juyailla cuzascunatapash, jichushca pambapi huañungapa. Caitaca paicuna nirca paica paipaj shungupa muspaj yuyashcallacuna rurashca can.
12 Shinami Lamán Lemuelpash, rucu huauquicuna cashpapash, paicunapaj taitata huasharimarca. Paicuna huasharimarca na yachaimanda Dios imashna randi cajta pimi paicunata rurashca can.
13 Paicuna critapash na crirca Jerusalénca, chai jatun llacta, tucuchishca canata Achil villachijcunapa shimicuna nishcashna. Paicuna Judíocunashna carca picunami Jerusalénpi carca, picunami ñuca taitata causaita quichungapa munarca.
14 Yalishca jipa imata ñuca taita paicunaman Lemuelpaj pugru pambapi parlarca, ushaihuan, espírituhuan junda caimanda, paicunapa tucuilla cuerpocunacaman paipaj ñaupapi chujchurca. Paica paicunata pandachirca, paicuna paihuan cutin fiñashpa rimanata manllarca; shinashpa, paicuna tucui rurai nishcacunata rurarca.
15 Ñuca taitaca facha huasipi causarca.
16 Yalishca jipa ñuca Nefi, chairapacha viñaj huambra caimanda, shina cajpipash jatun viñai caimanda, ashtahuangari ninan munaita charimanda Diospaj na villashcacunata yachangapa, caimanda, Ñuca Apunchijta mañarcani; riqui pai ñucata ricungapa shamurca, ñuca shunguta amujyachirca chaimanda ñucaca tucui ñuca taitapaj shimicuna parlashcata crircani; caimanda, ñuca mana ñuca huauquicunashna na cazuj carcanichu.
17 Ñuca Sam-man parlarcani, paiman yachaj chayachishpa ima cuzascunata Apunchijca ñucaman paipaj achil espírituhuan ricuchishca carca. Yalishca jipa pai ñuca shimicunapi crirca.
18 Ashtahuangari, riqui, Lamán Lemuelpash ñuca shimicunata na uyanayachirca; paicunapaj shinlli shungucunamanda llaquirishpa paicunamanda Apunchijta ñuca mañarcani.
19 Yalishca jipa Apunchij ñucaman parlarca, nishpa: quiquinga achilyachishca cangui, Nefi, quiquinba femanda, quiquin ñucata utsia mascaimanda, jariyanata na yarij shunguhuan.
20 Shinapacha quiquin ñuca rurachunbacha saquishcacunata alchishpaca, ari charijyanguichijmi, cushapacha nishca alpaman ñaupashpa pushasha; ari shuj alpa chai ñuca quiquingunaman alichishca carca; ari shuj alpa maijan tucui alpacunamanda ajllashcapacha.
21 Shinapacha quiquinbaj huauquicuna quiquinda na cazujpi, paicuna Apunchijpaj ñaupamanda anchuchi tucunga.
22 Shinapacha quiquin ñuca rurachunbacha saquishcacunata alichishpaca, quiquin quiquinbaj huauquicunapa shuj mandaj shuj yachachij tucunguimi.
23 Chaimanda riqui, ima punlla paicuna ñucata na cazujpica, ñuca paicunata llaquichisha llaquinayai llaquihuan, paicunaca na ushaita charingachu quiquingunapaj cati aillucunapa jahuapi, imashpapash paicuna ñucata na cazujpillachari.
24 Shina cai cashna cajpi paicuna ñucata na cazujpica, paicuna quiquingunapaj cati aillucunapa shuj astishna canga, paicunata tangashpa cutin yarichingapa ñucata yarichun.