1 Yalishca jipa ñuca, Nefi, espírituhuan apai tucushca jipa, tucui cai cuzascunata ricushca, ñuca taitapaj facha huasiman tigramurcani.

2 Yalishca jipa ñuca ricurcani ñuca huauquicunata, paicuna maijanshi yali canchi ninajurca caishuhuan chaishuhuan ñuca taita paicunaman parlashca cuzascunamanda.

3 Pai tauca jatun cuzascunata paicunaman na llullashpa parlarca, caicunaca yuyaipi chasquingapa shinlli carca, shuj runa Apunchijta tapushpalla; paicunaca shinlli shungucuna caimanda, chaimanda paicuna Apunchijta na tapurca imashna cana.

4 Cunan ñuca, Nefi, llaquilla carcani paicunapaj shinlli shungucunamanda, cuzascunata imata ñuca ricushca carcani, yacharcanipash caicuna canapacha carca runacunapaj huahuacunapaj jatun na ali ruraicunamanda.

5 Yalishca jipa ñuca na fangalla carcani llaquicunamanda, ñuca yuyaimanda ñucapaj llaquicuna tucuita yali jatun cajta, ñuca llacta tucurishcamanda, imashpa ñuca ricushca cani paicunapaj urmaita.

6 Yalishca jipa ñuca shinllicaita chasquishca jipa ñuca huauquicunaman parlarcani, yachangapa munashpa imamanda paicunapaj maijanshi yali canchi ninajuicunamanda.

7 Paicuna nirca: Riqui, ñucanchi na entendinchi cai shimicunata ñucanchi taita parlashca carca olivo quirupaj chaipipacha viñashca malquicunamanda, Gentilcunamandapash.

8 Paicunaman nircani: Apunchijta tapushcanguichichu?

9 Paicuna nihuarca: Ñucanchica na; Apunchijca ñucanchimanga chashna cuzasta na yachachinga.

10 Riqui, Ñuca nircani: Imashnata Apunchijpaj rurachunbacha saquishcacunata na alichinguichi? Imashinata cangunapaj shinlli shungucunamanda tucuringapa munanguichi?

11 Nachu yaringuichi Apunchij nishca cuzascunata?—Cangunapaj shungucunata na shinlliyachishpaca, fehuan mañashpaca, chasquishami yashpa, rurachunbacha saquishcacunata ricuriashpa alichishpa, cai cuzascuna cangunaman yachachishcapacha canga.

12 Riqui, ñuca nircani, Israelpaj huasica shuj olivo quiruhuan parijashpa ricuchishca can, Apunchijpaj Espírituhuan chai ñucanchi taitapi carca; nachu ñucanchica Israelpaj huasimanda faquishca, nachu ñucanchica Israelpaj huasimanda shuj malqui canchi?

13 Cunan, cuzasca ñucanchi taita ima cajta ningapa munan quimichishpa churanamanda olivo quirupipacha viñashca malquicunata Gentilcunapaj tucuillacunamanda, can, tucurimui punllacunapi, ñucanchipaj cati aillucuna na crishpa asha asha chingarijpi, ari, tauca huatacunapi, tauca miraicunapash Mesías aichapi runacunapaj huahuacunaman ricurimushca jipa, Mesíaspaj tucuilla quishpiringapa villaicunaca Gentilcunaman shamun, Gentilcunamanda ñucanchipaj cati huahuacunapaj puchushcacunapaman.

14 Chai punllaca puchushcacuna ñucanchipaj cati huahuacunaca yachanga Israelpaj huasimanda paicuna cajta, Apunchijpaj convenio llactacuna can; paicuna yachanga chayamunga rijsingapa paicunapaj punda taitacunata, rijsingapash Jatun Causachijpa quishpiringapa villaicunata, pai achil yachachirca paicunapaj taitacunaman; chaimanda, paicuna chayamunga rijsingapa paicunapaj Jatun Causachijta shujllangaman paipaj yachachishcapaj puntocunata, paicuna yachaj chayachun imashna paipaman shamushpa quishpirishca cangapa.

15 Chai punllaca nacha paicuna cushijunga ali cachinga paicunapaj mana tucurina Diosta, paicunapaj rumita paicunapaj quishpirinapash? Ari, chai punlla, nacha chasquinga shinllicaita micuchinatapash ciertopacha uvas chagramanda? Ari, nacha paicuna shamunga ciertopacha Diospaj llama corralman?

16 Riqui, ñuca canda nini, Ari; paicuna cutin yarishca canga Israelpaj huasihuan; paicuna shuj olivo quirupaj chaipipacha viñashca malqui cashpa, ciertopacha olivo quirupi quimichishpa churashca canga.

17 Caitami ñucanchi taita ningapa ima cajta munan; caica na yalingachu paicuna Gentilcunahuan chajchushca jipacaman; pai ima cajta ningapa munan caica Gentilcunamanda apashca canga, Apunchijca paipaj ushaita Gentilcunaman ricuchishca canga, Judíocunahuan na cazui tucushca cana caimandapacha, na cashpa Israelpaj huasimandacunahuan.

18 Chaimanda, ñucanchi taita ñucanchipaj cati aillucunamanllaca na parlashca carcachu, ashtahuangari tucui Israelpaj huasimanbash, convenioman señalashpa tucurimui punllacunapi pactashca canga; Apunchijca ñucanchi taita Abrahamman chai conveniota rurashca carca, nishpa: Quiquinba cati aillucunapi alpapaj tucui reinocuna achilyachishca canga.

19 Yalishca jipa ñuca, Nefi, ashtaca paicunaman cai cuzascunamanda parlarcani; ari, ñuca paicunaman parlarcani Judíocuna cutinlla apamunamanda tucurimui punllacunapi.

20 Ñuca paicunaman Isaíaspaj shimicunata villarcani, pimi parlarca Judíocunapaj cutinlla apamunamanda, na cashpa Israelpaj huasimanda; paicuna cutinlla apamurishca jipa ñana ashtahuan pandachishca canga, paicuna cutin na chajchurishca canga. Yalishca jipa ñuca parlarcani ashtaca shimicunata ñuca huauquicunaman, paicuna sumaj causajcuna carca shungu faquirircapash Apunchijpaj ñaupapi.

21 Yalishca jipa paicuna cutin parlarca, nishpa: Imata canga cai cuzas ñucanchi taita ricurca shuj muscuipi? Imata canga pai ricushca quiruca?

22 Paicunaman nircani: Chaica shuj causana quirumanda ricuchilla carca.

23 Paicuna nihuarca: Imata canga hierro barrata ñucanchi taita ricurca, chaica quiruman pusharca?

24 Paicunaman nircani chaica Diospaj shimi carca; picunami Diospaj shimita cazujpica, chaipi shinlli charirishpaca, paicuna nimaura na tucuringachu; tentacióncuna ayapaj rupajuj flechacunapash na ushaihuan yalingachu paicunata ñausayachingapa, tucuchingacaman pushangapa.

25 Chaimanda, Ñuca, Nefi, paicunata cutin yarichircani Apunchijpaj shimita yashpapacha uyachun; ari, ñuca cutin yarichircani ñuca almapaj tucui cuyuringapa minishtirishcacunahuan, tucui ñuca charishca yuyaicunahuanbash, paicuna Diospaj shimita uyashcanman yarichingapa paipaj rurachunbacha saquishcacunata punllan punllan tucui cuzascunapi alichichun.

26 Paicuna nihuarca: Imata canga yacu larca imata ñucanchi taita ricurca?

27 Paicunaman nircani yacucunaca ñucanchi taita ricurca mapallacashca carca; paipaj yuyai ashtaca shuj cuzascunapi carca chai pai yacupaj mapallacashcata na ricurca.

28 Paicunaman nircani chaica shuj manllanayai huaicu carca, chaica na ali rurajcunata causana quirumanda shicanyachirca, Diospaj santocunapamandapash.

29 Paicunaman nircani caica chai manllanayai ucu pachapaj shuj ricuchilla carca, ángelca nihuarca chaica na alita rurajcunapa alichishca carca.

30 Paicunaman nircani ñucanchi taita ricurca Diospaj alicaipash na ali rurajcunata alicunamanda shicanyachirca; punchalla caica rupajuj ninapashnalla carca, chaica Diospaman vitsiarca imaurapash na tucurina imaurapash na tucurinacamanbash, na tucuri tianllu.

31 Paicuna nihuarca: cai cuzas canllu cuerpopaj llaqui apana rurajta na rurajta ricungapa punllacunapi, na cashpaca cai canllu almapaj tucurina caipi temporal cuerpo huañushca jipa, na cashpaca temporal cuzascunatachu parlan?

32 Yalishca jipa paicunaman nircani caica ishcandi cuzascunata temporal espiritualtapash shuj ricuchilla carca; punlla shamungami paicuna ricushpa chasquichishca cana paicunapaj rurashcacunamanda, ari, rurashcacunatapash imata cuerpo temporalhuan rurashca cashcata paicunapaj ruraj na ruraj ricuna punllacunapi.

33 Chaimanda, paicunapaj na ali ruraicunapi huañushpaca paicuna llujchishpa cachai tucushca canga, espiritual cuzascunamanda, ali ruraicunapaj cajcuna; chaimanda Diospaj ñaupaman apamui tucushca canga, paicuna rurashcamanda ricushpa chasquichi tucungapa; paicunapaj rurashcacuna mapacuna cajpica paicunapash fuerzamanda mapacunallata canga; mapacuna cashpaca fuerzamanda paicuna Diospaj reinopi na causai ushan; shina cajpica, Diospaj reinopash fuerzamanda mapa canman.

34 Ashtahuangari riqui, ñuca canman nini, Diospaj reinoca na mapachu, nima mapa cuzas Diospaj reinoman na yaicungachu; chaimanda minishtirishcapacha shuj pushtu mapacunapaca alichishca tianga.

35 Shuj pushtupash alichishca tian, ari, chai manllanayai ucu pacha imamanda ñuca parlashcani, ayami caitaca alichishca can; chaimanda runacunapaj almacunapa tucuripi caica canmi Diospaj reinopi causana, na cashpa llujchishpa cachai tucuna alicaimanda imamanda ñuca parlashcani.

36 Chaimanda, na alicunaca alicunamanda anchuchishca can, causana quirumandapash, maimandami fucushca juyaillapacha, munanayaipacha tucui shuj fucushcacunamanda can; ari, caica tucuita yalishca tucui Diospaj carashcacunamanda can. Shinami ñuca huauquicunaman parlarcani. Shinacapashcachun.