1 Cutin: Ali uyashpa, Oh Israelpaj huasi, tucui canguna shicanyamushca canguichi llujchishpa cachamui tucushcapash ñuca llactapuracunapaj michijcunapa na ali ruraicunamanda; ari, tucui shicanyamushca chajchui tucushcacuna, pimi ñuca llactapuramanda canguichi, Oh Israelpaj huasi. Uyahuaichi Oh islacuna, uyaichi carumanda llactapuracunapash; Apunchijca vijsamandallata cayashca; ñuca mamapa ucumandallata pai ñuca shutita villashca carca.

2 Pai ñuca shimita shuj filo espadatashna rurashca carca; pacahuarca paipaj maquipaj llanduhuan, shuj llambuyachishca flechatashna rurahuarca; flechata alchina carapishna pacahuarca;

3 Ñucata nihuarca: can ñuca sirvij cangui, Oh Israel, canbimi punchallayashca casha.

4 Ñuca nircani, ñuca yanga rurashcani, ñuca tucuchishcani ñuca shinllicaita nimapa yangapash; ciertopacha ñuca ricushpa chasquichina Apunchijhuanmi can, ñuca rurana Dios-huanmi.

5 Cunan, Apunchijca nirca—vijsapi cajllapitami paipaj sirvij cachun rurahuarca, paiman Jacobta tigrachichun—masqui Israel na tandanajujpipash, shina cashpapash Apunchijpaj ñavipi punchapamba casha, ñuca Dios ñuca shinllicai canga.

6 Pai nirca: ashalla can quiquin ñuca sirvij caica Jacobpaj tribucunata jatarichingapa, Israelpaj alchishpa charishcacunata cutinlla apamungapa. Gentilcunapaj shuj micha cachunbash quiquinda churasha, ñuca quishpirina cangui cai alpa tucurinacaman.

7 Apunchijca shina nin, Israelpaj Jatun Causachij, Shuj Achil, runacunapaj na ricunayachi tucushca, jatun llactacuna millanayachishca, mandajcunapaj sirvij: Jatun mandajcuna ricunga jataringapash, príncipecuna adoranga, Apunchijmanda paica fiel caimanda.

8 Apunchijca shina nin: chasquina punlla cajpi ñuca uyashcani, Oh mama cochapaj islacuna, quishpirina punllapi ñuca ayudashcani; alchishpa charishami, ñacha sirvijtaca cushami llactapuracunapaj shuj pactachinata, cai alpata cutin alichichun, pipash illa jichushcacunata chasquichun;

9 Vichashcacunata ningui: llujshichi; yanallapi cajcunata: Ricurichi. Paicuna ñangunapi michi tucunga, paicunapaj jihuacuna tucui jahua pushtucunapi canga.

10 Paicuna na yarjachinga na yacunayachinga, rupaipash indipash paicunata na llaquichingachu; paicunata llaquinga pushangapash, yacu pujyucunaman pai pushanga.

11 Tucui ñuca urcucunata shuj ñanman tigrachisha, ñuca jatun ñangunata jatun alicachishca canga.

12 Jipaman, Oh Israelpaj huasi, riqui, caica carumanda shamunga; ricui vichaimanda indi huashajuj ladomanda; caicuna Sinim pambamanda.

13 Cantai, Oh jahua pachacuna; cushijushca cai, Oh alpa mama; chaquicunata churanga picunami indi llujshij ladopi cajcuna; cantangapa llujshimuichi, Oh urcucuna; paicuna ñana ashtahuan llaquichishca canga; Apunchijca paipaj llactapuracunata cushichirca, paipaj llaquicunapi cajcunataca llaquinatapash charinga.

14 Ashtahuangari, riqui, Sión nishca carca: Apunchijca jichuhuarca, Apunchijca cungahuarca—ashtahuangari paica ricuchingami na cashcata.

15 Shuj huarmi cunganllu chuchujuj huahuata, paica nacha llaquinga paipaj vijsamanda churita? Ari, paicuna cungangapashmi, shina cashpapash ñuca na quiquinda cungashachu, Oh Israelpaj huasi.

16 Riqui, ñuca maqui tablapi quilcashcashna charini; quiquinba pircacuna ñuca ñaupapi catilla can.

17 Canbaj churicuna calpanajun tucuchijujcunapaman; canda jichushca saquijcunaca llujshishpa ringami.

18 Vichai alsai ñavicunata muyundi ricui; tucui caicuna tandanajunga, quiquinbaman shamunga. Ñuca causani, Apunchij nin, tucuimandaca churachishca cangui, shuj juyaillaguhuan, caicunahuan chumbilingui shuj cazaranalla cuitsagushna.

19 Shitashca jichushca pushtucunaca, quiquinba tucuchina pambapash, cunanga quichijipacha canga chaipi causajcunamanda; tucuchijcunaca caruman shitashca canga.

20 Huahuacuna picunata charingui, callarijcunata chingachishca jipa, cutin canbaj rinripi ninga: pushtuca quichijipachami ñucapaca; cuhuai pushtuta ñuca causangapa.

21 Shinashpa canbaj shungupi ningui: pita caicunataca ungurca, ñuca huahuacunataca chingachircanimi, jichushca, huatai tucushcashna cani caiman chaiman purini? Pita caicunata viñachishca? Riqui, ñuca jichui tucushca cani; caicuna maipita carca?

22 Apunchij Diosca shina nin: Riqui, ñuca maquihuan vichai alsasha Gentilcunata, jatarichisha llactapuracunaman ñuca banderata; paicuna quiquinba churicunata rigracunapi apamunga, quiquinba ushicunata paicunapa rigra jahuacunapi pushanga.

23 Jatun mandajcunami quiquinba viñachij taitacuna, paicunapaj jatun mandaj huarmicuna quiquinba viñachij mamacuna; paicuna canbaj ñaupapi urai cumuringa paicunapaj ñavihuan alpaman, quiquinba chaquimanda ñutu alpata lambinga; yachangami ñucami Apunchijca cani; maijan ñucata shuyajcuna na pingai tucungachu.

24 Macanajuipi japishcata quichunallachu jatun ushai charijcunamanda, tucui ali huatai tucushcashnata cacharingallachu?

25 Ashtahuangari Apunchijca shina nin, huatai tucushcashnacunatapash ushai charijcunamanda quichushca canga, manllanayaipaj macanajuipi japishcata cacharingallami; ñuca fiñasha maijan quiquingunahuan fiñajta, ñuca quishpichisha quiquinba huahuacunata.

26 Ñuca quiquinda llaquichijcunata micuchishami paicunapaj aichacunahuanllata; paicuna paicunapaj yahuarhuanllata mishqui vinohuanshna machangami; tucui aichacuna yachangami Ñuca, Apunchij cajta, quiquinba Jatun Quishpichij quiquinba Jatun Causachij, Jacobpaj Shinlli.