1 Yalishca jipa ñuca, Nefi, ñuca huauquicunaman parlashpa tucuchishca jipa, riqui paicuna nihuarca: can ñucanchita shinlli cuzascunata yachachishcangui, ñucanchi ñana ushaicaman.

2 Yalishca jipa paicunaman nircani ñuca yacharcani na alita rurajcunapaca shinlli cuzascunata parlashcani, ciertohuanga; ali rurajcunataca alicachishcanimi, testificashcanimi paicunaca vichai achil jatarichishca canga chai tucuri punllapi; chaimanda, juchayucunaca ciertota shinlli cajta tarin, paicunata shungucaman chugrichin.

3 Cunan ñuca huauquicuna, quiquinguna ali rurajcuna cashpaca ciertota cazungapa munajcuna cashpaca, yashpapacha uyashpapash, quiquinguna Diospaj ñaupapi derecho purishpa, ciertomanda na huasharimashpa, na nishpa: Can shinlli cuzascunata ñucanchiman parlangui.

4 Yalishca jipa ñuca, Nefi, ñuca huauquicunata cutin yarichircani, tucui ricuriashpa, Apunchijpaj rurachunbacha saquishcacunata alichichun.

5 Yalishca jipa paicuna shungu faquirirca Apunchijpaj ñaupapi; cashna cushijuita charircani paicunamanda jatun shuyaitapash, paicuna ali rurana chaquiñangunapi purichun.

6 Cunan, tucui cai cuzascunata nishca rurashcapash carca imaura ñuca taita shuj facha huasipi Lemuel nishpa shutichishca pugru pambapi causajujpi.

7 Yalishca jipa ñuca Nefi, Ismaelpaj ushicunamanda shujta huarmipa japircani; ñuca huauquicunapash Ismaelpaj ushicunamanda huarmipa japirca; Zorampash Ismaelpaj paya ushita huarmipa japirca.

8 Shina ñuca taita pactachishca carca tucui Apunchijpaj rurachunbacha saquishcacunahuan imatami paiman cushca carca. Ñucapash, Nefi achilyachishca carcani Apunchijmanda ninandapacha.

9 Yalishca jipa Apunchijpaj shimi ñuca taitata tutapi parlarca, mandarca caya punlla jichushca pambapi ri callarichun.

10 Yalishca jipa ñuca taita tutamandapi jatarishpaca, facha huasipaj punguman rishpa, pai jatun manllarihuan ricurca alpapi shuj esferata ricuriashpa maquihuan rurashcata; cai bronce fino carca. Esfera ucupica ishcai aujacuna tiarca; shujca ñanda ricuchijurca ñucanchi jichushca pambapi maita rinata.

11 Yalishca jipa ñucanchica tucui tiashcata tandachircanchi ñucanchi jichushca pambaman apangapa, tucui puchushca minishtirishcacunata Apunchij ñucanchiman cushca carca; ñucanchi japircanchi muyucunata paipuralla jichushca pambaman apangapa.

12 Yalishca jipa ñucanchipaj facha huasicunata apashpa jichushca pambaman rircanchi, Lamán jatun yacuta chimbashpa.

13 Yalishca jipa ñucanchi purircanchi chuscu punllacunata, urai-urai indi llujshij ladolla, ñucanchi facha huasicunata cutin shayachircanchi; pushtuta Shazer nishpa shutichircanchi.

14 Yalishca jipa japircanchi ñucanchi arcocunata flechacunatapash, jichushca pambaman rircanchi ñucanchi aillucunapaj micunapa huañuchingapa; ñucanchi aillucunapaj micunapa huañuchishca jipa cutin tigramurcanchi ñucanchi aillucunapaman jichushca pambapi, Shazer pushtuman. Ñucanchi jichushca pambapi cutin rircanchi catishpa chai direccióndallata, jichushca pambapaj fucuj fucuj pushtucunata catishpa, chaica Puca Jatun Mama Cocha manñacunapi carca.

15 Yalishca jipa ñucanchi purircanchi tauca punllacunata, micunapa ñanbi huañuchishpandi, ñucanchi arcocunahuan flechacunahuanbash rumicunahuanbash huaracacunahuanbash.

16 Ñucanchi esferapaj direcciónda catircanchi, jichushca pambapaj ashtahuan fucuj fucuj pushtucunaman ñucanchita pusharca.

17 Ñucanchi tauca punllacunata purishca jipa, ñucanchi facha huasicunata shayachircanchi asha tiempopa, ñucanchica cutin samana carcanchi ñucanchi aillucunapa micunata taringapa.

18 Yalishca jipa ñuca, Nefi, micunapa huañuchingapa rijpica, riqui, ñuca arco faquircani, acero finohuan rurashca carca; ñuca arcota faquishca jipa, riqui, ñuca huauquicuna ñucata fiñarca ñuca arcota chingachimanda, ñucanchica micunata na tarimanda.

19 Yalishca jipa ñucanchi aillucunapaman micuna illa tigramurcanchi, ashta shaijushca carcanchi, ñucanchi purimanda, paicuna micunacuna illaimanda ninanda llaquiyarca.

20 Yalishca jipa Lamán Lemuel Ismaelpaj churicunapash ninandapacha huasharimai callarirca, paicunapaj llaquiricunamanda llaquicunamandapash jichushca pambapi; ñuca taitapash Apunchij paipaj Diosta huasharimai callarirca; ari, paicuna tucui ninandapacha llaquiyashca carca, paicunapash Apunchijta huasharimarca.

21 Cunan yalishca jipa ñuca, Nefi, ñuca huauquicunahuan llaquiyarcani ñuca arco chingaimanda, paicunapaj arcocuna ñana caruta rimanda, caica ninandapacha shinlli cai callarirca, ari, shina cashpaca na micunata tari usharcanchi.

22 Yalishca jipa ñuca, Nefi, ñuca huauquicunaman parlarcani, paicunapaj shungucunata cutin shinlliyachishca caimanda, Apunchij paicunapaj Diosta na alicachirca.

23 Yalishca jipa ñuca, Nefi, shuj arco caspihuan rurarcani; chaimanda, ñucallata shuj arcohuan shuj flechahuan macanajungapashna churajushpa, shuj huaracahuan rumicunahuanbash. Ñuca taitata nircani: Maiman micunata taringapa ri ushani?

24 Yalishca jipa pai Apunchijta tapurca, pai shungu faquirirca ñuca shimicunamanda; paicunaman tauca cuzascunata ñuca almapaj cuyuringapa minishtirishcacunahuan.

25 Yalishca jipa Apunchijpaj shimi ñuca taitapaman shamurca; paica ciertopacha tacuri tucurca Apunchijta huasharimaimanda, cashna pai ninanda llaquirita apamushca carca.

26 Yalishca jipa Apunchijpaj shimi paiman nirca: Ricui esferata, ricui quilcashca cuzascunata.

27 Yalishca jipa ñuca taita esfera jahuapi quilcashcacunata ricushpaca, pai manllarca ninandapacha chujchurcapashmi, ñuca huauquicunapash Ismaelpaj churicunapash paicunapaj huarmicunapash.

28 Yalishca jipa ñuca, Nefi, ricurcani esferapi caj aujacunaca, fehuan purirca ricuriashpahuan yashpa ricuriajpi ñucanchi chaicunaman cujpi.

29 Chai jahuapi quilcashcapash tiarca shuj mushuj quilcashcacuna, chaica liinalla, chaicunaca ñucanchiman Apunchijpaj ali ñangunata yachanata cunajurca; caica quilcashca carca huaquinbi huaquinbi shujman tigrachishca carca, ñucanchi femanda, ricuriashpahuan caiman imashna ñucanchi cujpi. Shina ñucanchi ricunchi Apunchijca uchilla imashapash canacunahuan jatun cuzascunata apamunga.

30 Yalishca jipa ñuca, Nefi, urcu jahuaman vitsiarcani, imashnami ricuchijcuna caicunaca esfera jahuapi cushca carca.

31 Yalishca jipa ñuca sacha animalcunata huañuchircani, shinaca ñuca aillucunaman micunata tarircani.

32 Yalishca jipa ñuca tigramurcani ñucanchi facha huasicunaman, ñuca huañuchishca sacha animalcunata apamushpa; cunan paicuna ricushpa ñuca micunata tarishca cajta. Paicuna jatunda cushijurca! Yalishca jipa paicuna shungu faquirirca Apunchijpaj ñaupapi, pagui nircapash.

33 Yalishca jipa ñucanchi cutin ri callarircanchi, callaripi maita rinajushca ladollata rircanchi; ñucanchi tauca punllacunata rishca jipa ñucanchi facha huasicunata cutin shayachircanchi; shuj tiempota chaipi cangapa.

34 Yalishca jipa Ismael huañurca, pambashca carca Nahom nisha pushtupi.

35 Yalishca jipa Ismaelpaj ushicuna ninandapacha huasharimarca, paicunapaj taita chingachimanda, paicunapaj llaquicunamandapash jichushca pambapi; ñuca taitata huasharimarca, paicunata Jerusalénpaj alpamanda apamushcamanda, nishpa: Ñucanchi taita huañushcami; ari, ñucanchi jichushca pambapi caipi chaipi purishcanchi, ñucanchi llaquiyalishcanchi ninan llaquicunata, yarjaicunata, yacunayaicunata, shaijuicunatapash; tucui cai llaquiricuna jipapash ñucanchi jichushca pambapi yarjaihuan huañushunchi.

36 Shina paicuna ñuca taitata huasharimarca, ñucatapash; paicunaca Jerusalénman tigrangapa munanajurca.

37 Lamán nirca Lemuelta Ismaelpaj churicunatapash: Riqui, ñucanchi taitata huañuchishunchi, ñucanchi huauqui Nefitapash, pimi ñucanchipa mandaj, ñucanchipa yachachij cangapa japishca, ñucanchica paipaj rucu huauquicuna canchi.

38 Cunan, pai nin Apunchijca paihuan parlashca nin, paitaca ángelcunapash achil yachachishcapash nin. Ashtahuangari riqui, ñucanchi pai llullajujta yachanchi; pai cai cuzascunata nin, pai tauca cuzascunata ruran paipaj umachicunahuan, paica ñucanchi ñavicunata pandachisha yashpa, imashpapash, pai caruman pushashpaca na rijsishca jichushca pambaman; pai pushashca jipaca, paica yuyan shuj jatun mandaj ñucanchita mandaj tucungapa, pai rurai ushangapa ñucanchihuan paipaj munashcahuan munashcauraspash. Cashna laya ñuca huauqui Lamán paicunapaj shungucunata fiñachirca.

39 Yalishca jipa Apunchijca ñucanchihuan carca, ari, shinapash Apunchijpaj shimica shamurca paicunata tauca shimicunata parlarca, paicuna ninandapacha asti tucurca; paicuna tacuri tucushca jipa Apunchijpaj shimihuan paicunapaj fiñaicuna tucurirca, paicunapaj juchacunamanda arrepentirirca, shina cashpa Apunchijca ñucanchita cutin achilyachirca micunahuan, shina ñucanchi na huañurcanchichu.