1 Yalishca jipa ñuca taita ricushca cuzascunata ñuca yachangapa munashca jipa, Apunchijca ñucaman yachachi ushajta crishpa, imashna ñuca tiashpa ñuca shungupi aligutapacha yarijujpi Apunchijpaj Espíritu apahuarca, ari, shuj ninan jahua urcuman, chaipi imaurapash na ricushca carca, chai jahuapi imaura ñuca chaquita na churashcani.

2 Espírituca nihuarca: riqui, imata munangui?

3 Ñuca nircani: Ñuca munani ñuca taita ricushca cuzascunata ricungapa.

4 Espírituca nihuarca: cringuichu quiquinba taita quiruta ricurca chaimanda pai parlashca carca?

5 Ñuca nircani: Ari, quiquin yachanguimi ñuca taitapaj tucui shimicunatami crini.

6 Ñuca cai shimicunata parlashca jipa, Espíritu shinlli shimihuan caparirca, nishpa: Hosanna Apunchijman, ninan jahua jahuapacha Dios; paimi tucui cai pachapa Dios can, ari, tucuipapash. Achilyachishca cangui, Nefi, can ninan jahua jahuapacha Diospaj Churipi crishcamanda; chaimanda, can ima cuzascunata munashcata ricungui.

7 Riqui quiquinman cai cuzas señalcachun cushca canga, can quiruta ricushca jipa chai quiru fucuchirca chaita quiquinba taita malirca, quiquin ricunguipashmi shuj jari jahua pachamanda uriajumujta, paita ricunguimi; paita ricushca jipa can testimoniota cungui Diospaj Churi cajta.

8 Yalishca jipa Espíritu nihuarca: Ricui! Ñuca ricushpa shuj quiruta ricurcani; ñuca taita ricushca quirushnalla carca; chaipaj juyaillacaica tucui juyaillacunamandapash yalishca juyaillapacha carca; chaipaj yuracaipash huaira fucushca rasutapash yali yura.

9 Yalishca jipa quiruta ricushca jipa, Espírituta nircani: ñucaman quiruta ricuchihuashcangui chaica tucuita yalishca juyaillagu.

10 Pai nihuarca: Imata munangui?

11 Paiman nircani: Chai ima canata yachanayan—ñuca paihuan parlarcani shuj jarihuanshna; ñuca ricurcani paica shuj jari laya carca; shina cashpapash, ñuca yacharcani chaica Apunchijpaj Espíritu carca; pai ñucahuan parlarca shuj jari cutishujhuan parlan laya.

12 Yalishca jipa pai ñucata nihuarca: Ricui! Ñuca ricurcani, paita ricunshna paita na ricurcani; ñuca ñaupamanda rishca carca.

13 Yalishca jipa ñuca ricurcani jatun Jerusalén llactata, shuj llactacunatapash. Nazaret llactata ricurcani; Nazaret llactapi jarihuan na tacarishca cuitsaguta ñuca ricurcani, pai ninan juyaillagupacha yurajllagupachapash carca.

14 Yalishca jipa ñuca ricurcani jahua pachacuna pascarirca; shuj ángel uriajumurca ñuca ñaupapi shayarirca; pai nihuarca: Nefi, Imata ricujungui?

15 Ñuca paita nircani: jarihuan na tacarishca cuitsagu, juyaillagupacha tucui shuj jarihuan na tacarishca cuitsagucunatapash yalishca.

16 Pai nihuarca: Diospa achil juyai yachanguichu?

17 Ñuca nircani: Ñuca yachani paipaj huahuacunata juyan; shina cajpipash, ñuca na yachani tucui cuzascuna ima cajta.

18 Pai nihuarca: Riqui, jarihuan na tacarishca cuitsaguca pitami quiquin ricushcangui Diospaj Churipaj mama can, aicha cashcapi.

19 Yalishca jipa ñuca ricurcani pai Espírituhuan pushai tucurca; pai Espírituhuan pushai tucushca jipa asha tiempota ángelca parlahuarca, nishpa: Ricui!

20 Ñuca ricushpa jarihuan na tacarishca cuitsaguca cutin ricurcani, paipaj rigracunapi shuj huahuaguta marcaria.

21 Ángelca nihuarca: Riqui Diospaj Llamaguta, ari, Na Tucurina Taitapaj Churipash! Quiquin yachanguichu quiru ima cajta quiquinba taita ricushcata?

22 Ñuca cutichircani, nishpa: Ari, caica Diospaj juyaimi, paimandallata runacunapaj huahuacunapaj shungucunapi pactarishcata jichan; chaimanda, chaica tucui cuzascunamanda yalishpa munashcapachami.

23 Pai parlahuarca, nishpa: Ari, Almapa yalipacha cushijuimi.

24 Pai cai shimicunata nishca jipa, nihuarca. Ricui! Ñuca ricurcani, Diospaj Churica runacunapaj huahuacunahuan rijurca; ricurcani taucacuna paipaj chaquicunapi cungurishpa paita adorarca.

25 Yalishca jipa ñuca ricurcani chai hierro barrata, imata ñuca taita ricushca carca, Diospaj shimi carca, chaica causana yacu pugyuman pushajurca, nacashpaca causana quiruman; chai yacucunaca Diospaj juyaita shuj ricuchi carca; Ricurcanipash causana quiruca Diospaj juyaita shuj ricuchi carca.

26 Ángelca cutin nihuarca: Ricui, Diospaj achil juyaita ricui!

27 Ñuca ricushpa ricurcani cai pachapaj Jatun Causachijta, pimanda ñuca taita parlashca carca; ricurcanipash Achil Villachijta pimi paita ñaupashpa ñanda alichinga. Diospaj Llamaguca ñauparca paihuan bautizai tucurca, ñuca ricurcani jahua pachacuna pascarirca, Espíritu Santo jahua pachamanda paipaj uma jahuaman palomagushna uriajumurca.

28 Ñuca ricurcani pai ñauparca runacunaman achil yachachishpa, ushaihuan jatun punchapamba caihuanbash; mashnacharicuna tandanajushca carca paita uyangapa; ñuca ricurcani paicunapamanda paita llujchishpa cacharca.

29 Ñuca ricurcanipash cutishuj chunga ishcaicunata paita catinajurca. Yalishca jipa paicuna Espírituhuan pushai tucushca carca ñuca ñavimanda, ñuca paicunata ñana ricurcanichu.

30 Yalishca jipa Ángelca cutin parlahuarca, nishpa: Ricui! Ñuca ricurcani jahua pachacuna cutin pascarirca, ricurcani ángelcuna runacunapaj huahuacunaman uriajumunajujta; paicuna paicunata achil yachachirca.

31 Pai cutin parlahuarca, nishpa: Ricui! Ñuca ricushpa, ricurcani Diospaj Llamagu runacunapaj huahuacunahuan rijurca. Ñuca ricurcani mashnachari runacuna ungushca carca, tucui laya unguicunahuan llaquichishcacuna carca, ayacunahuan mapa espíritucunahuanbash; tucui cai cuzascunata ángel ñucaman parlarca ricuchihuarcami. Paicuna jambi tucushca carca Diospaj Llamagupaj ushaihuan; ayacunapash mapa espíritucunapash llujchishpa cachashca carca.

32 Yalishca jipa ángelca cutin parlahuarca, nishpa: Ricui! Ñuca ricurcani Diospaj Llamaguta, pai runacunahuan japi tucushca carca; ari, Mana Tucurina Diospaj Churica cai pachahuan ricushpa chasquichishca carca; ñuca ricurcani testimoniota cuni.

33 Ñuca, Nefi, paica cruz jahuapi vichai jatarichi tucurca cai pachapaj juchacunamanda huañurcapashmi.

34 Pai huañushca jipa ñuca ricurcani cai alpamanda mashnacharicunaca, tandanajushcacuna carca Llamagupaj apóstolcunahuan macanajungapa; Apunchijpaj ángelca shina shutichirca chunga ishcaicunata.

35 Cai alpamanda ashtacapacha tandanajushcacuna tandanajushca carca; ñuca ricurcani paicuna shuj jatun lugarlla huasipi carca, ñuca taita ricushca huasipishna. Apunchijpaj ángelca cutin parlahuarca, nishpa: Riqui cai pachapaj jatun yachashca; ari, riqui Israelpaj huasi tandanajushca can Llamagupaj chunga ishcai apóstolcunahuan macanajungapa.

36 Yalishca jipa Ñuca ricurcani testimoniota cuni, chai jatun lugarlla huasica cai pachapaj jariyai carca; chaica urmarca, chai urmaica ninan jatun carca. Apunchijpaj ángelca cutin parlahuarca, nishpa: cashnami tucurinaca canga tucui jatun llactacuna, reinocuna, shimi rimaicuna, llactapuracunapash, picunami tandanajunga Llamagupaj chunga ishcai apóstolcunahuan macanajungapa.