1 ఆ దేవదూత నాతో—చూడుము, నీ సంతానమును మరియు నీ సహోదరుల సంతానమును చూడుమనెను; నేను చూచి, వాగ్దానదేశమును వీక్షించితిని; సముద్రపు ఇసుక వలె అధిక సంఖ్యలో గల జన సమూహములను నేను చూచితిని.

2 సమూహములు ఒక దానికి వ్యతిరేకముగా మరొకటి యుద్ధము చేయుటకు కూడియుండుట చూచితిని; యుద్ధములు, యుద్ధములను గూర్చిన వదంతులను, ఖడ్గము చేత గొప్ప సంహారములను నా జనుల మధ్య చూచితిని.

3 ఈవిధముగా ఆ దేశములో అనేక తరములు యుద్ధములు, వివాదములందు గతించిపోవుట నేను చూచితిని; అంతేకాకుండా, లెక్కించలేనన్ని పట్టణములను కూడా చూచితిని.

4 వాగ్దానదేశముపై ఒక అంధకారపు పొగమంచును చూచితిని; మెరుపులను చూచితిని; ఉరుములను, భూకంపములను, అన్ని రకములైన కలకలములతో కూడిన శబ్దములను వింటిని; భూమిని, రాళ్ళను, అవి బీటలు వారుటను చూచితిని; పర్వతములు ముక్కలై దొర్లుటను చూచితిని; భూ మైదానములను, అవి విరిగిపోవుటను చూచితిని; అనేక పట్టణములు మునిగిపోవుటను చూచితిని; అనేకులు అగ్నితో కాల్చబడుటను చూచితిని; మరియు భూమి కంపించుటను బట్టి, దాని పైకి అనేకమంది దొర్లిపడుటను చూచితిని.

5 నేను ఈ దృశ్యములను చూచిన తరువాత, ఆ అంధకారపు ఆవిరి భూముఖము నుండి దూరముగా కదలిపోవుటను చూచితిని; ప్రభువు యొక్క అత్యంత తీవ్రమైన తీర్పును బట్టి పతనము కాని అనేక సమూహములను చూచితిని.

6 పరలోకములు తెరువబడుటను, దేవుని గొఱ్ఱెపిల్ల పరలోకము నుండి దిగి వచ్చుటను చూచితిని; ఆయన క్రిందికి దిగివచ్చి, తనను వారికి ప్రత్యక్షపరచుకొనెను.

7 పరిశుద్ధాత్మ పండ్రెండుగురు ఇతరులపై పడుట కూడా నేను చూచి సాక్ష్యమిచ్చితిని; వారు దేవునిచేత నియమింపబడి, ఎన్నుకోబడిరి.

8 అప్పుడు ఆ దేవదూత నాతో ఇట్లనెను: గొఱ్ఱెపిల్ల యొక్క పండ్రెండుగురు శిష్యులను చూడుము, వీరు నీ సంతానమునకు పరిచర్య చేయుటకు ఎన్నుకోబడిరి.

9 మరియు అతడు నాతో చెప్పెను: గొఱ్ఱెపిల్ల యొక్క పండ్రెండుగురు అపొస్తలులు నీకు జ్ఞాపకమున్నారా? ఇశ్రాయేలు వంశపు పన్నెండు గోత్రములకు తీర్పు తీర్చు వారు వీరే; అందువలన నీ సంతానము యొక్క పండ్రెండుగురు సేవకులు వారిచే తీర్పు తీర్చబడుదురు. ఏలయనగా మీరు ఇశ్రాయేలు వంశస్థులు.

10 నీవు చూచుచున్న ఈ పండ్రెండుగురు సేవకులు నీ సంతానమునకు తీర్పు తీర్చుదురు. వారు నిరంతరము నీతిమంతులుగా ఉందురు. ఏలయనగా, దేవుని గొఱ్ఱెపిల్ల యందు వారి విశ్వాసమును బట్టి వారి వస్త్రములు ఆయన రక్తమందు తెల్లగా చేయబడినవి.

11 మరియు ఆ దేవదూత నాతో చెప్పెను: చూడుము! నేను చూచి, మూడు తరములు నీతియందు గడచిపోవుట వీక్షించితిని; వారి వస్త్రములు దేవుని గొఱ్ఱెపిల్లవలే తెల్లగా ఉండెను: ఆ దేవదూత నాతో ఇట్లనెను: ఆయన యందు వారి విశ్వాసమును బట్టి వీరు గొఱ్ఱెపిల్ల యొక్క రక్తమునందు తెల్లగా చేయబడిరి.

12 నీఫైయను నేను, నాలుగవ తరము వారిలో నీతియందు గతించిపోయిన అనేకులను చూచితిని.

13 మరియు భూ సమూహములు కూడియుండుట నేను చూచితిని.

14 ఆ దేవదూత నాతో ఇట్లనెను: నీ సంతానమును, నీ సహోదరుల సంతానమును చూడుము.

15 నేను చూచి, నా సంతానము నా సహోదరుల సంతానమునకు వ్యతిరేకముగా సమూహములలో కూడియుండుట వీక్షించితిని; వారు యుద్ధమునకై కూడియుండిరి.

16 ఆ దేవదూత నాతో ఇట్లనెను: నీ తండ్రి చూచిన మురికి నీటి ఊటను చూడుము; ముఖ్యముగా అతడు చెప్పిన నదిని చూడుము; దాని లోతులు నరకపు లోతులైయున్నవి.

17 ఆ అంధకారపు పొగమంచులు అపవాది శోధనలు. అవి కన్నులకు గృడ్డితనమును కలుగజేయును; మనుష్య సంతానపు హృదయాలను కఠినపరచును; మరియు వారు నశించి, తప్పిపోవునట్లు వారిని విశాలమైన దారులలోనికి నడిపించును.

18 నీ తండ్రి చూచిన ఆ పెద్ద విశాలమైన భవనము మనుష్య సంతానపు వ్యర్థమైన ఊహలు మరియు గర్వమైయున్నది. అతి భయంకరమైన అగాధమొకటి వారిని వేరుచేయును. ముఖ్యముగా, దేవుని గొఱ్ఱెపిల్ల అయిన మెస్సీయ, ఎవరిని గూర్చి పరిశుద్ధాత్మ లోకము ప్రారంభమైనప్పటి నుండి ఈ సమయము వరకు, మరియు ఈ సమయము నుండి మొదలుకొని నిరంతరము సాక్ష్యమిచ్చుచున్నాడో ఆ నిత్యదేవుని న్యాయవాక్యము వారిని వేరుచేయును.

19 ఆ దేవదూత ఈ మాటలు చెప్పుచున్నప్పుడు నేను దృష్టి నిలుపగా, ఆ దేవదూత మాటప్రకారము నా సహోదరుల సంతానము నా సంతానమునకు వ్యతిరేకముగా పోరాడుచుండుట చూచితిని; నా సంతానము యొక్క గర్వము మరియు అపవాది శోధనలను బట్టి నా సహోదరుల సంతానము నా సంతానమును ఓడించుట చూచితిని.

20 నేను చూచి, నా సహోదరుల సంతానము నా సంతానమును అధిగమించుటను వీక్షించితిని; వారు భూముఖముపై సమూహములుగా సంచరించిరి.

21 వారు సమూహములుగా కూడియుండుటను నేను చూచితిని; వారి మధ్య యుద్ధములు, యుద్ధములను గూర్చిన వదంతులను చూచితిని; మరియు యుద్ధములు, యుద్ధములను గూర్చిన వదంతులలో అనేక తరములు గతించిపోవుట నేను చూచితిని.

22 ఆ దేవదూత నాతో—వీరు విశ్వాసమందు క్షీణించి పోవుదురనెను.

23 వారు విశ్వాసమందు క్షీణించిపోయిన తరువాత, వారొక నల్లని అసహ్యకరమైన, మలినమైన, సోమరితనముతో సకల విధముల హేయక్రియలతో నిండిన జనముగా మారుట నేను చూచితిని.