1 Yalishca jipa ñucanchi jichushca pambaman ñucanchi taitapaman urai rishca jipa, riqui, pai cushijuihuan junda carca, ñuca mama Saríahpash, ninanda cushijurca, pai ñucanchimanda llaquirishcapacha carca.

2 Pai jichushca pambapi ñucanchi huañushca yarca; ñuca taitata na alicachirca, shuj achil muscuj runa cangui nishpa: Riqui quiquin ñaupashpa apamushcangui ñucanchipa chasquina alpamanda, ñuca churicuna ña illan, paicuna jichushca pambapi huañushca.

3 Ñuca mama cashna laya shimirimaicunahuan ñuca taitata na alicachirca.

4 Yalishca jipa ñuca taita paiman parlarca, nishpa: Ñuca yachani ñuca shuj achil muscuj runa cani; Diospa cuzascunata achil muscuipi na ricushca cashpaca ñuca Diospaj alicaita na rijsimanllu, Jerusalénpillata cashpaca, ñucanchi huauquicunahuan huañunchiman carca.

5 Ashtahuangari riqui, ñuca shuj cushapacha nishca alpata chasquishca cani, chai cuzascunapi ñuca cushijuni; ari, ñuca yachani, Apunchijca ñuca churicunata Labánpaj maquicunamanda cacharichinga, paicunata ñucanchipaman jichushca pambaman cutin apamunga.

6 Cashna laya shimirimaihuan ñuca taita, Lehi, ñuca mama, Saríahta ñucanchimanda cushichijurca, ñucanchi Jerusalénpaj alpaman jichushca pambata rinajushpa, Judíocunapa tandachishca quilcashcacunata apamungapa.

7 Ñucanchi ñuca taitapa facha huasiman tigramujpica, riqui paicuna ninanda cushijurca, ñuca mama cushilla carca.

8 Pai parlarca, nishpa: Cunan ñuca yachani juizu japishpa Apunchijca ñuca cusata mandashca carca jichushca pambaman richun; ari, ñuca yachanipashmi juizu japishpa Apunchijca ñuca churicunata cuidanga, Labánpaj maquicunamanda cacharichinga, paicunaman ushaita cunga chaimanda paicuna pactachi ushanga imata paicunaman Apunchij mandashcata. Pai cashna laya shimirimaicunahuan parlarca.

9 Yalishca jipa paicuna ninanda cushijurca, Apunchijman sacrificiota ofrendacunata rupachishpa curca; Israelpaj Diosta paicuna pagui nirca.

10 Paicuna Israelpaj Diosta pagui nishpa jipa, ñuca taita, Lehi, tandachishca quilcashcacunata chaicuna bronce jirru fangacunapi quilcashcacunata japirca, pai callarimanda chaicunata rijsirca.

11 Pai ricurca chaicuna picha Moiséspaj quilcashcacunata charijta, chaicuna shuj tandachishpa quilcashca cai pachata rurashcamandapacha carca, Adán, Evamandapash, ñucanchi callari taitacuna;

12 Judíocunapa callarimanda shuj tandachishca quilcashcapash, Sedequíaspaj reinado callari huata, Judápa jatun mandajmandapash;

13 Achil villachijcuna villachishcacunapash, callarimanda, Sedequíaspaj reinado callari huatamanda; tauca achil villachishcacunatapash chaicuna Jeremíaspa shimihuan parlashca carca.

14 Yalishca jipa ñuca taita, Lehi, bronce jirru fangacunapi paipaj taitacunapaj genealogíata tarirca; chaimanda pai yacharca pai Josémanda cati aillu cajta; ari, José Jacobpa churi carca, pai Egiptoman jatui tucurca, Apunchijpaj maquihuan alchishpa charishca carca, paipaj taita Jacobta, paipa tucuilla huasi ucupuratapash ninan yarjaihuan ama huañuchun alchishpa charirca.

15 Paicuna huatai tucushcashnamanda cachari tucurca Egipto alpamanda apai tucurcapash, chai Diosmandallata pimi paicunata alchishpa charirca.

16 Shina ñuca taita, Lehi, paipaj taitacunapaj genealogíata tuparca. Labánpash Josépaj cati huahuallata carca, chaimanda pai paipaj taitacunapash cai tandachishca quilcashcacunata alichishpa charishcarca.

17 Cunan ñuca taita tucui cai cuzascunata ricushca cashpa, espírituhuan pai jundashca carca, paipaj cati aillucunamanda achil villachishpa callarirca—

18 Chai bronce jirru fangacuna jatun llactacunaman ringa, reinocunaman, shimi rimaicunapaman llactapuracunamanbash pimi paipaj cati aillucuna carca.

19 Chaimanda, pai nirca chai bronce jirru fangacuna nimaura na tucuringa; chaicuna ima punllapash punchallacaica na chingangachu. Pai tauca cuzascunata achil villachirca paipa cati aillucunamanda.

20 Yalishca jipa cunangaman ñuca ñuca taitapash rurachunbacha saquishcacunata alichircanchi Apunchij ñucanchiman mandashcata.

21 Ñucanchi tandachishca quilcashcacunata apamurcanchi Apunchij ñucanchiman mandashca cajpi, chaicunata rijsircanchi tarircanchipash chaicuna ñucanchipaj munanayai carca; ari, ñucanchipaj jatun valishca carca, Apunchijpaj rurachunbacha saquishcacunata ñucanchi huahuacunamanbash alchishpa chari ushashpaca.

22 Chaimanda, caica Apunchijpaj jatun yachai carca, ñucanchihuan apamuna, jichushca pambata rinajujpi cushapacha nishca alpaman.