Isahluko 10
UYakobi uchaza okokuba amaYuda aya kumbethelela emnqamlezweni uThixo wawo—Baya kusasazwa bade baqalise ukukholwa Kuye—IAmerika iya kuba lilizwe lelungelo apho kungayi kubakho kumkani ulawulayo—Zixolelaniseni noThixo nize nizuze usindiso ngenceba yobabalo Lwakhe. Malunga 559–545 P.K.
1 Kwaye ngoku mna, Yakobi, ndithetha nani kwakhona, bazalwana bam abathandekayo, malunga neli sebe linobulungisa ebendithethe ngalo.
2 Kuba qaphelani, izithembiso esithe sazizuza zizithembiso eziza kuthi ngokwasenyameni; ngako oko, njengoko bekubonakalisiwe kum ukuba abaninzi kubantwana bethu baya kutshabalala enyameni ngenxa yokungakholwa, nangona kunjalo, uThixo uya kuba nenceba kwabaninzi; kwaye abantwana bethu baya kubuyiselwa, ukuze babe nokuza koko kuya kuthi kubanike ulwazi oluyinyani loMkhululi wabo.
3 Ngako oko, njengoko nditshilo kuni, kumele ukuba kube kufanelekile ukuba uKrestu—kuba ngobusuku obudluleyo ingelosi yathetha nam ukuthi eli liya kuba ligama lakhe—eze phakathi kwamaYuda, phakathi kwabo bangabona bayinxenye yenkohlakalo yehlabathi; kwaye baya kumbethelela emnqamlezweni—kuba njalo kuyintando kuye uThixo wethu, kwaye asikho esinye isizwe emhlabeni esinakho ukumbethelela emnqamlezweni uThixo waso.
4 Kuba ukuba imimangaliso enamandlakazi inokuthi yenziwe phakathi kwenzinye izizwe zingaguquka, kwaye zazi ukuba unguThixo wazo.
5 Kodwa ngenxa yobubingeleli bobuxoki nobugwenxa, bona abaseYerusalem baya kuziqinisa iintamo zabo ngokuchasene naye, aze abethelelwe emnqamlezweni.
6 Ngako oko, ngenxa yobugwenxa babo, iintshabalalo, iindlala, izifo ezibulalayo, kwanempalalogazi ziya kuza phezu kwabo; kwaye abo bangasayi kutshatyalaliswa baya kusasazwa phakathi kwazo zonke izizwe.
7 Kodwa qaphelani, itsho njalo iNkosi uThixo: Xa sukuba ufika umhla abaya kuthi bakholelwe kum, okokuba ndinguKrestu, ke ndinqophisene nooyise okokuba baya kubuyiselwa besesenyameni, phezu komhlaba, kuwo amazwe elifa labo.
8 Kwaye kuya kwenzeka ukuba baya kuhlanganiselwa ngaphakathi ukubuya; ekusasazweni ixesha elide, ukusuka kwiziqithi zolwandle, nakwiimbombo zone zomhlaba, kwaye izizwe zabeeNtlanga ziya kuba namandla amakhulu emehlweni am, utsho uThixo, ngokubazisa kumazwe elifa labo.
9 Ewe, izikumkani zabeeNtlanga ziya kuba ngabondli kubo, baze ookumkanikazi bazo baya kubanyisa, ngako oko, izithembiso zeNkosi zibalulekile kubo abeeNtlanga, kuba ukuthethile, kwaye ngubani na onokumphikisa?
10 Kodwa qaphela, eli lizwe, watsho uThixo, iya kuba lilizwe lelifa lakho, nabeeNtlanga baya kusikeleleka phezu kwelizwe.
11 Kwaye eli lizwe liya kuba lilizwe lenkululeko kubo abeeNtlanga, kwaye akusayi kubakho zikumkani phezu kwelizwe, eziya kuphakanyiswa kubo abeeNtlanga.
12 Kwaye ndiya kuliqinisa eli ilizwe ngakuzo zonke ezinye izizwe.
13 Kwaye lowo ulwa ngokuchasene neZiyon uya kutshabalala, utsho uThixo.
14 Kuba lowo uphakamisa ukumkani ngokuchasene nam uya kutshabalala, kuba mna, iNkosi, ukumkani wezulu, ndiya kuba ngukumkani wabo, kwaye ndiya kuba kukukhanya kubo ngonaphakade, abathi baweve amazwi am.
15 Ngako oko, ngesi sizathu, ukuze iminqophiso yam izaliseke endithe ndayenza kubantwana babantu, endiya kuthi ndiyenze kubo ngeli lixa besenyameni, kumele ndiyitshabalalise imisebenzi yobumnyama efihlakeleyo, neyokubulala, neyamasikizi.
16 Ngako oko, lowo ulwa ngokuchasene neZiyon, kunye umYuda noweNtlanga, kunye umthinjwa nokhululekileyo, kunye indoda nomfazi, baya kutshabalala; kuba bangabo abo bangabahenyuzi balo lonke ihlabathi; kuba abo bangekho ngakum bachasene nam, utsho uThixo wethu.
17 Kuba ndiya kuzizalisekisa izithembiso zam endithe ndazenza kubantwana babantu, kuba ndiyakwenza kubo ngeli lixa besesenyameni—
18 Ngako oko, bazalwana bam abathandekayo, utsho njalo uThixo wethu: Ndiya kuyibandezela imbewu yakho ngesandla sabeeNtlanga; nangona kunjalo, ndiya kuzithambisa iintliziyo zabeeNtlanga, ukuze bafane nobawo kubo; ngako oko, abeeNtlanga baya kusikeleleka kwaye babalelwe phakathi kwendlu kaSirayeli.
19 Ngako oko, ndiya kulingcwalisa eli lizwe kuyo imbewu yakho, kwaye nakwabo baya kubalelwa phakathi kwembewu yakho, ngonaphakade, ibe lilizwe lelifa labo; kuba lilizwe elikhethekileyo, utshilo uThixo kum, ngaphezulu kunawo onke amanye amazwe, ngako oko ndiya kufuna okokuba bonke abantu abahlala kulo ukuba baze banqule mna, utsho uThixo.
20 Kwaye ngoku, bazalwana bam abathandekayo, xa sibona ukuba uThixo wethu onenceba usinike ulwazi olungakumbi kangaka malunga nezi zinto, masimkhumbule, sizibekele ecaleni izono zethu, kwaye singazithokombiseli ezantsi iintloko zethu, kuba asiphoselwanga kude; nangona kunjalo, siqhutyelwe ngaphandle kwilizwe lelifa lethu; kodwa sikhokelelwe kwilizwe elilunge ngakumbi, kuba iNkosi ilenze ulwandle lwaba yindlela yethu, kwaye siphezu kwesiqithi solwandle.
21 Kodwa zinentsingiselo izithembiso zeNkosi kubo abo baphezu kweziqithi zolwandle; ngako oko njengokuba ixela iziqithi, kuyimfuneko ukuba zibe ngaphezulu kunoku, kwaye zimiwe kanjalo ngabazalwana bethu.
22 Kuba qaphela, iNkosi uThixo ikhokelele kude amaxesha ngamaxesha ukusuka kwindlu kaSirayeli, ngokwentando nolonwabo lwayo. Kwaye ngoku qaphela, iNkosi iyabakhumbula bonke abo babeqetshulwe, ngako oko iyasikhumbula nathi kanjalo.
23 Ke ngoko, thakazelisani iintliziyo zenu, kwaye nikhumbule okokuba nikhululekile ukuba nizenzele—nikhethe indlela yokufa ngonaphakade okanye indlela yobomi obungunaphakade.
24 Ngako oko, bazalwana bam abathandekayo, zinikeleni kuyo intando kaThixo, kwaye ingabi yintando yomtyholi neyenyama; kwaye khumbulani, emva kokuba nizinikele kuThixo, ukuba kukulo kwaye kungalo kuphela ubabalo lukaThixo ukuba nisindiswe.
25 Ngako oko, wanga uThixo anganivusa ekufeni ngamandla ovuko, kananjalo ekufeni kwanaphakade, ngamandla entlawulelo, ukuze nibe nokwamkeleka kubukumkani bukaThixo banaphakade, ukuze nibe nokumdumisa ngobabalo olunyulu. Amen.