1 და იყო ასე, რომ იესოს მოწაფეები მოგზაურობდნენ და ქადაგებდნენ ყოველივე იმას, რაც იხილეს და მოისმინეს და ნათლავდნენ იესოს სახელით და იყო ასე, რომ მოწაფეები ერთად იკრიბებოდნენ და იყვნენ ერთსულოვანნი მხურვალე ლოცვაში და მარხვაში.

2 და იესო კვლავ გამოეცხადა მათ, რადგან მამისადმი ლოცულობდნენ მისი სახელით; და იესო მოვიდა და მათ შორის დადგა და უთხრა: რა გსურთ, რომ გიბოძოთ?

3 და მათ უთხრეს: უფალო, გვითხარი სახელი, რომელიც უნდა ვუწოდოთ ამ ეკლესიას; ვინაიდან ხალხში კამათობენ ამ საკითხის შესახებ.

4 და უფალმა მიუგო მათ: ჭეშმარიტად, ჭეშმარიტად გეუბნებით: რატომ უნდა ბუზღუნებდეს ხალხი და კამათობდეს ამის შესახებ?

5 ნუთუ არ წაიკითხეს წმინდა წერილები, რომლებშიც ნათქვამია, რომ უნდა აიღოთ ქრისტეს სახელი ანუ ჩემი სახელი? ვინაიდან ამ სახელს გიწოდებენ უკანასკნელ დღეს;

6 და რომელიც საკუთარ თავზე აიღებს ჩემს სახელს და ბოლომდე გაძლებს, იგი გადარჩება უკანასკნელ დღეს.

7 ამიტომ, რასაც არ უნდა აკეთებდეთ, ჩემი სახელით აკეთეთ; ამიტომ, ეკლესიას უწოდებთ ჩემს სახელს; და მამას მიმართავთ ჩემი სახელით, რათა აკურთხოს მან ეკლესია ჩემ გამო.

8 და როგორ იქნება ჩემი ეკლესია, თუ მას ჩემი სახელი არ ეწოდა? ვინაიდან, თუ რომელიმე ეკლესიას უწოდებენ მოსეს სახელს, ის იქნება მოსეს ეკლესია; ან თუ უწოდეს ადამიანის სახელი, ის იქნება ადამიანის ეკლესია; მაგრამ თუ მას უწოდეს ჩემი სახელი, ჩემი ეკლესია იქნება, თუ ისინი ჩემს სახარებაზე იქნებიან დაფუძნებულნი.

9 ჭეშმარიტად გეუბნებით, რომ თქვენ ჩემს სახარებაზე ხართ დაფუძნებულნი; ამიტომ, რასაც კი რამეს უწოდებდეთ, უწოდეთ ჩემი სახელი; ამიტომ, თუ მიმართავთ მამას ეკლესიის შესახებ, თუ ჩემი სახელით მიმართავთ, მამა მოგისმენთ;

10 და თუ ეკლესია დაფუძნებული იქნება ჩემს სახარებაზე, მაშინ მამა გამოავლენს მასში თავის საქმეს.

11 მაგრამ ის თუ არ იქნება დაფუძნებული ჩემს სახარებაზე, არამედ იქნება ადამიანის ან ეშმაკის საქმეზე დაფუძნებული, ჭეშმარიტად გეუბნებით, რომ თავისი საქმით ცოტა ხანი გაიხარებენ, მაგრამ დასასრული მალე მოვა და ისინი უკვე მოკვეთილნი და ცეცხლში ჩაყრილნი არიან, საიდანაც არ არის უკან დასაბრუნებელი.

12 ვინაიდან მათი საქმენი მათ უკან მიჰყვება, რადგან, კერძოდ თავიანთი საქმისთვის არიან მოკვეთილნი; ამიტომ, დაიმახსოვრეთ ყოველივე ის, რაც გითხარით.

13 აჰა, ჩემი სახარება მოგეცით და ეს არის სახარება, რომელიც თქვენ მოგეცით – რომ მოვედი ამქვეყნად მამის ნების აღსასრულებლად, რადგან მამამ გამომაგზავნა.

14 და მამამ გამომგზავნა, რათა აღმართონ ჯვარზე; და მას შემდეგ, რაც ჯვარზე აღმართეს, რომ ჩემთან მომეზიდა ყველა ადამიანი, რათა როგორც მე ვიქენ ადამიანების მიერ აღმართული, ადამიანებიც ასევე ყოფილიყვნენ მამის მიერ აღმართულნი, რათა ჩემ წინაშე წარსდგნენ, რომ განიკითხონ საკუთარი საქმეებისთვის, იყო რა ისინი კეთილი თუ ბოროტი.

15 და ამ მიზეზით მე აღმართეს; ამიტომ, მამის ძალის შესაბამისად, მე ყველა ადამიანს ჩემთან მოვიზიდავ, რათა ისინი განსჯილ იქნენ თავიანთი საქმეების შესაბამისად.

16 და იქნება ასე, რომ ყოველი, ვინც მოინანიებს და მოინათლება ჩემი სახელით, აღივსება; და თუ ბოლომდე გაძლებს, აჰა, მას წარვადგენ უდანაშაულოდ მამის წინაშე იმ დღეს, როდესაც დავდგები ამ ქვეყნის განსაკითხავად.

17 და ის, ვინც ბოლომდე არ გაძლებს, მოიკვეთება და იმ ცეცხლში იქნება ჩაგდებული, რომლიდანაც არ არის უკან დასაბრუნებელი, მამის სამართლის გამო.

18 და ეს არის სიტყვა, რომელიც მან ადამიანთა შვილებს უბოძა. და ამ მიზნისთვის იგი შეასრულებს მიცემულ სიტყვას და იგი არ ცრუობს, არამედ ასრულებს თავის ყოველ სიტყვას.

19 და ვერცერთი უწმინდური ვერ შევა მის სასუფეველში; ამიტომ, არაფერი შედის მის სავანეში, მათ გარდა, რომლებმაც ჩემი სისხლით გაირეცხეს სამოსელი, საკუთარი რწმენითა და ყოველი ცოდვის მონანიებით და საკუთარი ბოლომდე ერთგულებით.

20 ახლა, ეს არის მცნება: მოინანიეთ, თქვენ, დედამიწის ყველა კიდენო, მოდით და ჩემი სახელით მოინათლეთ, რათა სულიწმინდის მიღებით განიწმინდოთ, რომ უკანასკნელ დღეს ჩემ წინაშე უმწიკვლოდ წარსდგეთ.

21 ჭეშმარიტად, ჭეშმარიტად გეუბნებით: ეს არის ჩემი სახარება; და თქვენ იცით, რა უნდა აკეთოთ ჩემს ეკლესიაში; ვინაიდან უნდა მიბაძოთ ჩემს ნამოქმედარს, რომელიც იხილეთ; რამეთუ იხილეთ ჩემი ნამოქმედარი და უნდა მიბაძოთ მას;

22 ამიტომ, თუ აკეთებთ ყოველივე ამას, კურთხეულნი ხართ, ვინაიდან უკანასკნელ დღეს ამაღლდებით.

23 ჩაიწერეთ ის, რაც იხილეთ და მოისმინეთ, გარდა იმისა, რაც აკრძალულია.

24 ჩაიწერეთ ამ ხალხის მომავალი საქმენი ისევე, როგორც ჩაიწერა წარსული.

25 რადგან, აჰა, ეს ხალხი განიკითხება იმ წიგნების მიხედვით, რომლებიც დაიწერა და დაიწერება, ვინაიდან მათი მეშვეობით ხალხი გაიგებს მათი საქმეების შესახებ.

26 და აჰა, ყოველივე არის მამის მიერ ჩაწერილი; ამიტომ, ქვეყანა განიკითხება იმ წიგნების მიხედვით, რომლებიც დაიწერება.

27 და იცოდეთ, რომ თქვენ იქნებით ამ ხალხის მსაჯულნი, იმ სამართლის შესაბამისად, რომელსაც მე გიბოძებთ, რომელიც იქნება სამართლიანი. ამიტომ, როგორი ხალხი უნდა იყოთ? ჭეშმარიტად გეუბნებით: ისეთი, როგორიც მე ვარ.

28 და ახლა მამასთან მივდივარ. და ჭეშმარიტად გეუბნებით, რაც არ უნდა სთხოვოთ მამას ჩემი სახელით – მოგეცემათ.

29 ამიტომ, ითხოვეთ და მიიღებთ; დააკაკუნეთ და გაგეღებათ. ვინაიდან ის, რომელიც ითხოვს – ღებულობს; და ვინც დააკაკუნებს – გაეღება.

30 და ახლა, აჰა, დიდია ჩემი სიხარული, სისრულემდეც კი, თქვენ გამო, ასევე ამ თაობის გამო; დიახ, თავად მამა ხარობს, ასევე ყველა წმინდა ანგელოზიც, თქვენსა და ამ თაობის გამო; ვინაიდან არცერთი მათგანი არ დაიკარგა.

31 აჰა, მინდა გაიგოთ; ვინაიდან ვგულისხმობ მათ, რომლებიც ამ თაობიდან ცოცხლები არიან და არცერთი მათგანი არ დაიკარგა; და მათში არის სისრულე ჩემი სიხარულისა.

32 მაგრამ, აჰა, მაღონებს ამ თაობის მეოთხე თაობა, ვინაიდან იგი მათ ტყვედ წაიყვანს, როგორც წაიყვანა დაღუპვის შვილი; ვინაიდან გამყიდიან ვერცხლსა და ოქროზე, იმაზე, რასაც ჩრჩილი სპობს და რისთვისაც ქურდები აღწევენ და იპარავენ. და იმ დღეს მათ მოვევლინები, თავზე დავანთხევ მათსავე ჩადენილს.

33 და იყო ასე, რომ, როდესაც იესომ დაასრულა ეს სიტყვები, მან უთხრა თავის მოწაფეებს: შედით ვიწრო კარიბჭით; ვინაიდან ვიწროა კარიბჭე და ვიწროა გზა, რომელსაც სიცოცხლისკენ მიჰყავს და მცირედნი ჰპოვებენ მას; მაგრამ ფართოა კარიბჭე და განიერია გზა, რომელსაც სიკვდილისკენ მიჰყავს და მრავალნი დადიან მასზე, სანამ არ დაღამდება, როდესაც ვეღარავინ შეძლებს საქმის კეთებას.