1 Ā, i pahawa ake, i a Heha, koia tētahi uri o Heta—nā te mea i mate a Heta i te matekai, me tōna whare katoa atu i a Heha—nā reira, ka tīmata a Heha ki te hanga ake anō i tētahi iwi pakaru.

2 Ā, i pahawa ake, nā, ka mahara a Heha i te whakangaromanga o ōna tūpuna, ā, nāna tētahi kīngitanga tika i hanga ake ai; nā te mea i mahara ia ki tā te Ariki i mahi ai i tana haringa mai i te teina a Iarere ki tua o te rirenga; ā, i hīkoi ia i ngā huarahi o te Ariki; ā, i whānau mai ia i ngā tama me ngā tamāhine.

3 Ā, ko tana tama mātāmua, ko Heha tōna ingoa, ka haututū ki a ia; hei aha koa, ka pākia a Heha e te ringa o tētahi kaipāhua, nā tana tino whai taonga, nā konā tau mai anō te rangimārie ki tōna matua.

4 Ā, i pahawa ake, nā, ka hanga ake tōna matua i ngā pā maha i runga i te mata o te whenua, ā, ka horapa haere anō te iwi ki runga i te mata katoa o te whenua. Ā, ka tino koroheke haere a Heha ki tētahi pakeketanga tino kaumātua rawa atu; ā, nāna ko Ripakihi. Ā, ka mate ia, ā, ka whakahaere a Ripakihi i muri i a ia.

5 Ā, i pahawa ake, nā, kīhai a Ripakihi i mahi i ērā mea e pai ana i te tirohanga a te Ariki, nā te mea he tokomaha āna hoawahine me ngā hoawahine tūtūā, ā, ka whakatakotohia iho tērā ki runga i ō ngā tāngata pokohiwi, ā, he mea taumaha hei waha; āe rā, i tākehia rātou e ia ki ngā tāke taumaha; ā, ka hangaia ake e ia ngā whare tino nunui ki ērā tāke.

6 Ā, ka whakatūria e ia tētahi torona tino ātaahua rawa atu; ā, i hanga ake ia i ngā whareherehere maha, ā, ka makaia e ia te tangata e kore nei e tuku tāke ki roto i te whareherehere; ā, ka makaia e ia te tangata e kore nei e āhei ki te tuku tāke ki roto i te whareherehere; ā, ka mea ia kia hono tonu tā rātou mahi hei oranga mō rātou; ā, ka meinga e ia te tangata e kore nei e mahi kia whakamatea.

7 Nā reira i whiwhi ia i āna mahi papai katoa, āe rā, ka mea ia kia tahia āna kōura parakore i roto i te whareherehere; ā, he maha ngā tūmomo mahinga whakarākei i meinga ai e ia kia mahia i roto i te whareherehere. Ā, i pahawa ake, nā, ka whakamamaetia te iwi e ia ki ana pūremutanga me ana mōrikarikatanga.

8 Ā, i te wā kua oti i a ia hei kīngi mō te takiwā o ngā tau e whā ngahuru mā rua ka ara ake te iwi i runga i te haututūtanga ki a ia; ā, ka tīmata tētahi pakanga anō i te whenua, nā konā patua iho a Ripakihi, ā, ka āia atu ōna uri katoa ki waho i te whenua.

9 Ā, i pahawa ake i muri iho i ngā tau maha, ka huitahi a Moriatono, (he uri ia nō Ripakihi) tētahi tauā o ngā mea i peia atu, ā, ka haere atu ki te whawhai ki te iwi; ā, ka whiwhi kaha ia i runga i ngā pā maha; ā, ka nanakia haere te pakanga, ā, hono tonu mō ngā tau maha; ā, ka rapu kaha anō ia ki runga i te whenua katoa, ā, ka whakapūmauhia ia e ia anō hei kīngi i runga i te whenua katoa.

10 Ā, hei muri iho i tana whakapūmautanga i a ia anō hei kīngi, ka whakamāmā ake te pīkaunga a te iwi, nā konā whaipai ia i te tirohanga a te iwi, ā, ka whakawahia ia e rātou hei kīngi mō rātou.

11 Ā, ka mahi tika ia ki te iwi, engari kāore ki a ia anō nā ōna pūremutanga maha; nā reira i hātepea atu ia i te aroaro o te Ariki.

12 Ā, i pahawa ake, nā, ka hanga ake a Moriatono i ngā pā maha, ā, ka tino whairawa haere te iwi i raro i tana whakahaeretanga, i runga i te whai whare, me te kōura me te hiriwā, i te whakatupu kākano, me ngā kāhui o ia tū, o ia tū, me ngā mea pērā kua whakahokia ki a rātou.

13 Ā, ka ora a Moriatono ki tētahi pakeketanga tino kaumātua rawa atu, kātahi ia ka whānau i a Kimi; ā, ka whakahaere a Kimi i muri i a ia; ā, ka whakahaere ia mō ngā tau e waru, kātahi ka mate tōna matua. Ā, i pahawa ake, nā, kīhai a Kimi i whakahaere i runga i te tika, nā reira kāore ia i whakamakauria e te Ariki.

14 Ā, ka ara ake tana teina i runga i te haututūtanga ki a ia, mā konā kumea ia e ia ki roto i te hereheretanga i ōna rā katoa; ā, ka whānau mai tāna i ngā tama me ngā tamāhine i roto i te hereheretanga, ā, ka whānau mai tāna i a Rewi i tōna koroheketanga; kātahi ka mate ia.

15 Ā, i pahawa ake, nā, ka mahi pononga a Rewi i roto i te hereheretanga whai muri iho i te matenga o tōna matua, mō te takiwā o ngā tau e whā ngahuru mā rua. Ā, ka whakatupu whawhai atu ia ki te kīngi o te whenua, nā konā riro i a ia te kīngitanga.

16 Ā, whai muri iho i tana rironga i a ia anō te kīngitanga ka mea ia i tērā e tika ana i te tirohanga a te Ariki; ā, ka whaiora te iwi i runga i te whenua; ā, ka ora ia ki tētahi pakeketanga tino kaumātua rawa, ā, ka whānau anō tāna i ngā tama me ngā tamāhine; ā, ka whānau anō tāna i a Koroma, nāna nei ia i whakawahi hei kīngi i muri i a ia.

17 Ā, i pahawa ake, nā, ka mea a Koroma i ērā mea e pai ana i te tirohanga a te Ariki i ōna rā katoa; ā, ka whānau mai tāna i ngā tama me ngā tamāhine tokomaha; ā, whai muri iho i tana kitenga i ngā rā maha ka hemo atu ia, e pērā pū anō i te whānuitanga o te ao; ā, ka whakahaere a Kihi i muri i a ia.

18 Ā, i pahawa ake, nā, ka hemo atu anō hoki a Kihi, ā, ka kīngi a Ripi i muri i a ia.

19 Ā, i pahawa ake, nā, i mea anō a Ripi i ērā mea e pai ana i te tirohanga a te Ariki. Ā, ka whakangaromia ngā nākahi paitini i ngā rā o Ripi. Nā reira ka haere atu rātou ki roto i te whenua whakatetonga, ki te aruaru kai mō te iwi i te whenua, nā te mea i kapi katoa te whenua i ngā kararehe o te ngahere. Ā, ka meinga anō hoki a Ripi hei kaiaru kararehe tino pai.

20 Ā, ka hanga rātou i tētahi pā tino nui i te whenua whāiti, i te taha e wehea ruatia ana te whenua e te moana.

21 Ā, ka tiakina e rātou te whenua whakatetonga hei koraha, e aruaru kararehe ai rātou. Ā, kapi katoa te mata o te whenua whakateraki i ngā tāngata.

22 Ā, he nui rawa tō rātou kaha ki te mahi, ā, ka mahi hokohoko rātou, ā, ka whakawhitiwhiti rātou tētahi ki tētahi, kia whai taonga ai rātou.

23 Ā, i mahi rātou i ngā tūmomo oa katoa, ā, i hanga kōura rātou, me te hiriwā, me te rino, me te parāhe, me ngā tūmomo maitai katoa; ā, i keria tēnā e rātou mai i te whenua; nā reira, ka purangatia ngā puranga puehu nunui ki te hopu oa, me te kōura, me te hiriwā, me te rino, me te kapa. A, i mahi rātou i ngā tūmomo mahinga papai katoa.

24 Ā, i a rātou ngā hiraka, me ngā rinena miro pai; ā, i mahi i ngā tūmomo mahinga kākahu katoa, kia whakakākahuria rātou i ō rātou kirikau.

25 Ā, ka hanga rātou i ngā tūmomo taputapu katoa kia ngaki ai i te whenua, hei parau, hei ruirui, hei kokoti, hei ngaki, hei patu anō hoki.

26 Ā, i hanga rātou i ngā tūmomo taputapu katoa hei whakamahi i ā rātou kararehe.

27 Ā, i hanga rātou i ngā tūmomo rākau whawhai katoa. Ā, i mahi rātou i ngā tūmomo mahinga katoa e rerekē nei te whakamahinga.

28 Ā, kāore hoki he iwi i nui ake ō rātou manaakitanga i ō rātou, i nui ake hoki ō rātou whaipai he mea nā te ringa o te Ariki. Ā, i tētahi whenua rātou e pai ake ana i ngā whenua katoa, nā te mea kua kōrerotia nei e te Ariki.

29 Ā, i pahawa ake, nā, i ora a Ripi mō ngā tau maha, ā, i whānau mai tāna i ngā tama me ngā tamāhine; ā, nāna anō a Heatomo.

30 Ā, i pahawa ake, nā, ka kīngi a Heatomo i muri i tōna matua. Ā, i te paunga o ngā tau e rua ngahuru mā whā e whakahaere ana a Heatomo, nana, ka tangohia atu te kīngitanga i a ia. Ā, he maha ngā tau i mahi pononga ai ia i roto i te hereheretanga, āe rā, ko te toenga katoa o ōna rā.

31 Ā, nāna a Hete, ā, ka noho a Hete i roto i te hereheretanga i ōna rā katoa. Ā, nā Hete ko Arona, ā, ka noho hereheretia a Arona i ōna rā katoa; ā, nāna ko Amanikara, ā, ka noho hereheretia anō hoki a Amanikara i ōna rā katoa; ā, nāna ko Koriatumu, ā, ka noho hereheretia a Koriatumu i ōna rā katoa; ā, nāna ko Komo.

32 Ā, i pahawa ake, nā, ka kumea atu e Komo te hauruatanga o te kīngitanga. Ā, ka kīngi ia i runga i te hauruatanga o te kīngitanga mō ngā tau e whā ngahuru mā rua; ā, ka haere atu ia ki te pakanga ki te kīngi, a Amakiri, ā, ka riro i a ia te mana i runga i te toenga atu o te kīngitanga.

33 Ā, ka tīmata ngā kaipāhua i runga i te whenua i ngā rā o Komo; ā, ka mau i a rātou ngā tikanga tawhito, ā, ka whakamahia ngā oati e rite ana ki te ritenga o te hunga onamata, ā, ka whai anō ki te whakangaro i te kīngitanga.

34 Nā, ka nui tā Komo whawhai atu ki a rātou; hei aha koa, kāore rātou i taea e ia.