1 Ināianei ā, ka tīmata ake tētahi kanga ki runga i te whenua he mea nā te whakarihariha o te iwi, nā konā, mehemea ka whakatakotohia iho e te tangata tana taputapu, tana hoari rānei ki runga i tana paenga, ki runga rānei i tōna takotoranga, nana, hei te aonga ake o te rā kua kore e kitea e ia, anō te nui o te kanga ki runga i te whenua.

2 Nā reira ka piri tahi tēnā tangata me tēnā tangata ki tāna ake, ki ōna ringaringa, kua kore rānei ia e tono, e tuku rānei; ā, ka puritia e ia tangata, e ia tangata te puritanga o tōna hoari ki tōna ringa matau, hei tiaki i ōna rawa me tōna ake oranga me āna wahine me āna tamariki.

3 Ināianei ā, whai muri i te takiwā o ngā tau e rua, ā, whai muri i te matenga o Harere, nana, ka tū ake te teina a Harere, ā, ka whawhai atu ia ki a Koriatuma, ā, ka taea ia e Koriatuma, ā, ka whai atu ia i a ia ki te koraha o Akihi.

4 Ā, i pahawa ake, nā, ka whawhai atu te teina a Harere ki a ia i roto i te koraha o Akihi; ā, ka tino nanakia haere te whawhai, ā, ka hinga iho ngā mea manomano i te hoari.

5 Ā, i pahawa ake, nā, ka whakapaea te koraha e Koriatuma; ā, ka hīkoi atu te teina a Harere ki waho atu i te koraha i te pō, ā, ka patua tētahi wāhanga o te tauā a Koriatuma, i a rātou e haurangi ana.

6 Ā, ka haere atu ia ki te whenua o Morono, ā, ka whakanohoia ia e ia anō ki runga i te torona o Koriatuma.

7 Ā, i pahawa ake, nā, ka noho a Koriatuma rātou ko tana tauā ki roto i te koraha mō te takiwā o ngā tau e rua, nā konā whiwhi kaha nui ai ia ki tana tauā.

8 Nā, ko te teina a Harere, ko Kireara tōna ingoa, i whiwhi kaha nui anō hoki ia ki tōna tauā, he mea nā ngā whakakotahitanga huna.

9 Ā, i pahawa ake, nā, ka kōhurutia ia e tōna tohunga nui i a ia e noho ana i runga i tōna torona.

10 Ā, i pahawa ake, nā, ka kōhurutia ia e tētahi o ngā whakakotahitanga huna i tētahi ara huna, ā, ka riro i a ia ake anō te kīngitanga; ā, ko Ripi tōna ingoa; ā, he tangata tino kaitā a Ripi, he kaitā ake i ngā tāngata katoa kei waenganui i te iwi.

11 Ā, i pahawa ake, nā, i te tau tuatahi o Ripi, ka haere ake a Koriatuma ki te whenua o Morono, ā, ka whawhai atu ki a Ripi.

12 Ā, i pahawa ake, nā, ka whawhai atu ia ki a Ripi, i reira hahau a Ripi ki runga ki tōna ringa, nā, ka taotū ia; hei aha koa, ka tākare tonu atu te tauā a Koriatuma ki runga i a Ripi, nā konā tahuti atu ai ia ki ngā rohe ki ngā takutai.

13 Ā, i pahawa ake, nā, ka aru atu a Koriatuma i a ia; ā, ka whawhai atu a Ripi ki a ia i runga i te takutai.

14 Ā, i pahawa ake, nā, ka haua te tauā a Koriatuma e Ripi, nā konā tahuti atu anō rātou ki te koraha o Akihi.

15 Ā, i pahawa ake, nā, ka aru atu a Ripi i a ia ki ngā mānia o Akoha. Ā, kua mauria atu e Koriatuma ngā tāngata katoa i a ia e tahuti atu ana i te aroaro o Ripi ki taua takiwā o te whenua i tahuti ai ia ki reira.

16 Ā, i tana taenga atu ki ngā mānia o Akoha ka whawhai atu ia ki a Ripi, ā, ka hahau iho ia ki runga ki a ia kia mate rawa ia; hei aha koa, i haere mai te teina a Ripi i muri i a ia, ā, ka tino nanakia haere anō te pakanga, nā konā tahuti atu ai anō a Koriatuma i te aroaro o te tauā a te teina a Ripi.

17 Nā, ko Hiti te ingoa o te teina a Ripi. Ā, i pahawa ake, nā, ka whai atu a Hiti i a Koriatuma, ā, nāna ngā pā maha i turaki, ā, i patu ia i ngā wahine me ngā tamariki, ā, i tahu ia i ngā pā.

18 Ā, ka puta atu tētahi wehi o Hiti puta noa i te whenua; āe rā, ka puta te karanga puta noa i te whenua—Ko wai e tū atu ki te tauā a Hiti? Nana, tahia ana e ia te whenua i tōna aroaro!

19 Ā, i pahawa ake, nā, ka tīmata te iwi ki te huihui tahi ki roto i ngā tauā, puta noa i te mata katoa o te whenua.

20 Ā, i te weheruatia rātou; ā, ka tahuti atu tētahi wāhi o rātou ki te tauā a Hiti, ā, ka tahuti atu anō tētahi wāhi o rātou ki a Koriatuma.

21 Ā, anō te nui me te roa o te pakanga, ā, anō te roa o te whakahekenga toto me te parekura, nā, kua kapi katoa te mata o te whenua i ngā tūpāpaku o te hunga mate.

22 Ā, anō te tere me te hohoro o te pakanga kāore i reira ētahi toenga hei tanu i te hunga mate, engari ka hīkoi atu rātou i te whakahekenga toto ki te whakahekenga toto, e mahue iho ana ngā tūpāpaku o ngā tāne, ngā wāhine me ngā tamariki e takoto marara ana ki runga i te mata o te whenua, kia mahue hei kai mā te nokenoke o te kikokiko.

23 Ā, ka puta atu tō reira haunga ki runga i te mata o te whenua, ki runga i te mata katoa pū anō o te whenua; nā reira ka raru te iwi i te awatea me te pō, nā tō reira haunga.

24 Hei aha koa, kāore a Hiti i mutu tana whai i a Koriatuma; nā te mea i oati ia kia ngakia e ia te mate ki runga i a Koriatuma mō te toto o tōna tuakana, i whakamatea e ia, me te kupu a te Ariki i tau mai ai ki a Ētere e mea ana e kore a Koriatuma e hinga i te hoari.

25 Ā pēnei ka kite tātou, nā, ka toro atu te Ariki ki a rātou i runga i te raneatanga o tōna riri, ā, i whakaritea tētahi huarahi e ō rātou whakarihariha me tō rātou mōrikarika mō te whakangaromanga mau tonu.

26 Ā, i pahawa ake, nā, ka whai atu a Hiti i a Koriatuma whakaterāwhiti, tae atu pū anō ki te takutai, ā, i reira pakanga atu ai ia ki a Hiti mō te takiwā o ngā rā e toru.

27 Ā, anō te kino o te whakangaromanga i waenganui i ngā tauā a Hiti, nā, ka mataku haere te iwi, ā, ka tīmata tā rātou tahuti atu i te aroaro o ngā tauā a Koriatuma; ā, ka tahuti atu rātou ki te whenua o Korihoro, ā, ka tahia atu ngā tāngata whenua i tō rātou aroaro, ko te hunga katoa e kore e pai ki te hono atu ki a rātou.

28 Ā, ka whakatūria e rātou ō rātou tēneti i te raorao o Korihoro; ā, ka whakatū a Koriatuma i ōna tēneti i te raorao o Huru. Nā, e pātata ana te raorao o Huru ki te puke o Komonoro; nā reira, ka whakakao ngātahi a Koriatuma i āna tauā ki runga i te puke o Komonoro, ā, ka whakatangihia atu he tetere ki ngā tauā a Hiti hei pōhiri atu ki a rātou ki te riri.

29 Ā, i pahawa ake, nā, ka haere mai rātou, engari ka āia atu anō; ā, ka haere tuarua mai, ā, ka āia tuaruatia atu anō rātou. Ā, i pahawa ake, nā, ka haere tuatoru mai rātou, ā, ka nanakia rawa atu te pakanga.

30 Ā, i pahawa ake, nā, ka hahau atu a Hiti ki runga i a Koriatuma, nā konā, ka maha ngā motu hohonu o tērā i a ia; ā, ka hemo iho a Koriatuma i te mea kua ngaro ngā toto nui, ā, ka kawea atu ia anō nei kua mate ia.

31 Nā, he nui nō te matenga o ngā tāne, o ngā wāhine me ngā tamariki i ngā taha e rua i whakahau ai a Hiti i tana iwi kia kore tonu e whai atu i ngā tauā a Koriatuma; nā reira, ka hoki rātou ki tō rātou hōpuni.