1 Ā, ka whakahau te Ariki i te teina a Iarere kia heke iho i te maunga i te aroaro o te Ariki, ā, kia tuhia ngā mea i kitea ai e ia; ā, i kīa kia kaua e puta atu ērā mea ki ngā tamariki a te tangata kia whakairia ake rā anō ia i te rīpeka; ā, mō tēnei take puritia ai ērā mea e kīngi Mōhia, kia kore ai e puta atu ki te ao kia whakakite rā anō te Karaiti i a ia anō ki tana iwi.

2 Ā, whai muri iho i tā te Karaiti tino whakakite atu i a ia anō ki tana iwi ka whakahau ia kia whakaputaina ērā mea.

3 Ināianei ā, whai muri iho i tērā, kua memeha atu rātou i te whakapono kore; ā, kāore tētahi hāunga ko ngā Rāmana, ā, kua whakaparahako rātou i te rongopai a te Karaiti; nō reira kua whakahaua au kia hunaia ake anō ērā mea ki roto i te whenua.

4 Nana, kua tuhituhi au ki runga i ēnei papa ngā mea pū anō i kite ai te teina a Iarere; ā, kāore he mea e nui ake ana i ngā mea i whakakitea atu ai ki te teina a Iarere.

5 Nā reira kua whakahau te Ariki ki ahau kia tuhia ērā mea; ā, nāku ērā mea i tuhituhi. Ā, i whakahau ia ki ahau kia hīria ake ērā mea; ā, i whakahau anō hoki ia ki ahau kia hīria ake anō tō reira whakamāoritanga; nā reira nāku ngā mea whakamāori i hīri ake, e rite ana ki te whakahau a te Ariki.

6 Nā te mea i kī mai te Ariki ki ahau: E kore ērā mea e puta atu ki ngā Tauiwi kia tae ki te rā e rīpenetā ai rātou i ō rātou hara, ā, kia meinga hei mea mā i te aroaro o te Ariki.

7 Ā, hei taua rā e whakapakari rātou i tō rātou whakapono ki a au, e ai tā te Ariki, e pērā pū anō i tā te teina a Iarere, kia meinga rātou hei mea whakatapua i roto i ahau, kātahi au ka whakakite atu i ngā mea i kite ai te teina a Iarere, tae atu ana ki te huranga ake ki a rātou aku whakakitenga katoa, e ai tā Ihu Karaiti, te Tama a te Atua, te Matua o ngā rangi me te whenua, me ngā mea katoa kei roto rā.

8 Ā, tukua te tangata e tautohetohe ai ki te kupu a te Ariki kia kangaia; ā, tukua anō te tangata e whakakore nei i ēnei mea kia kangaia; nā te mea e kore au e whakakite atu ki a rātou ngā mea nui ake, e ai tā Ihu Karaiti; nā te mea ko au anō ia e kōrero nei.

9 Ā, i taku whakahau iho ka puare noa, ā, ka kati noa ngā rangi; ā, i taku kupu ka tūoioi te whenua; ā, i taku whakahau iho ka pahemo atu tō reira tāngata, me te mea nei nā te ahi.

10 Ā, ko te tangata e kore nei e whakapono ki aku kupu, kāore nei e whakapono ana ki ngā kupu a aku apataki; ā, mehemea kāore au i te kōrero, whakawākia e koutou; nā te mea ka mōhio koutou ko au e kōrero ana, hei te rā whakamutunga.

11 Engari ko te tangata e whakapono nei ki ngā mea kua kōrerotia nei e au, māku ia e toro atu ki ngā whakakitenga o tōku wairua, ā, ka mōhio ia, ā, ka whakaatu ia. Nā te mea mā tōku Wairua ia e mōhio ai e pono ana ēnei mea; nā te mea e whakapakepake ana ēnei mea i te tangata kia mahi pai.

12 Ā, nōku ngā mea katoa e whakapakepake nei i te tangata ki te mahi pai; nā te mea kāore e puta mai te pai i tētahi ki te kore i ahau. Ko au anō tērā e ārahi nei i te tangata ki ngā mahi pai katoa; ko te tangata e kore nei e whakapono ki aku kupu e kore nei e whakapono ki ahau—nā, ko au anō tērā; ā, ko te tangata e kore nei e whakapono ki ahau e kore anō e whakapono ki te Matua nāna nei au i tono mai. Nana rā, ko au anō te Matua, ko au anō te māramatanga, me te oranga, me te pono o te ao.

13 Haere mai ki ahau, E koutou e ngā Tauiwi, ā, māku e whakakite atu ki a koutou ngā mea nui ake, ko te mātauranga kua hunaia ake nā te whakaponokore.

14 Haere mai ki ahau, E koutou te whare o Iharaira, ā, ka whakakitea atu tēnā ki a koutou anō te nui o ngā mea kua whakatakotohia ake e te Matua mō koutou, mai i te tūāpapa o te ao; ā, kāore anō kia puta mai ki a koutou, he mea nā te whakapono kore.

15 Nana, ina tihaea e koutou te ārai o te whakapono kore e mea nei i a koutou kia noho tonu ai i tō koutou āhuatanga weriweri o te whakarihariha, me te whakapakeketanga o ō koutou ngākau, me te kāpōtanga o te hinengaro, kātahi ngā mea nui whakamīharo kua hunuia ake i a koutou mai i te tūāpapa o te ao—āe rā, ina karanga ake koutou ki te Matua i runga i tōku ingoa, i runga i te ngākau marū me te wairua iro, kātahi koutou ka mōhio, nā, kua maumahara te Matua i te kawenata i kawenata ai ia ki ō koutou tūpuna, E te whare o Iharaira.

16 Kātahi ka huraina ake aku whakakitenga katoa i mea ai au kia tuhia e taku pononga a Hoani ki ngā karu o te iwi katoa. Kia mahara, ina kite koutou i ēnei mea, ka mōhio koutou kua tata mai te wā e whakakitea atu ai ērā mea i roto pū anō i ngā mahinga.

17 Nō reira, ina whiwhi koutou i tēnei tuhinga ka mōhio koutou kua tīmata te Matua i tana mahi i runga i te mata katoa o te whenua.

18 Nō reira, kia rīpenetā e koutou e ngā tōpito katoa o te ao, ā, haere mai ki ahau, ā, whakapono mai ki taku rongopai, ā, rumakina i runga i tōku ingoa; ā, ka whai mai ngā tohu i te hunga e whakapono ai i tōku ingoa.

19 Ā, kua manaakitia te tangata e kitea ai e ū ana ki tōku ingoa hei te rā whakamutunga, nā te mea ka hāpaingia ake ia kia noho ai i te kīngitanga i whakaritea ai i te tūāpapa o te ao. Ā, nana, ko au anō nāna nei i kōrero. Āmine.