1 Ināianei ahau, a Moronai, e haere tonu nei taku tuhinga. Nō reira, nana, i pahawa ake nā te whakakotahitanga huna a Akihi me ōna hoa, nana, ka turakina e rātou te kīngitanga o Omere.

2 Hei aha koa, i aroha te Ariki ki a Omere, ki āna tama anō hoki, ā, ki āna tamāhine kīhai i whai i tōna whakangaromanga.

3 Ā, ka whakatūpato te Ariki i a Omere i roto i tētahi moemoeā kia wehe atu ia i te whenua; nā reira, ka wehe atu a Omere i te whenua me tana whānau, ā, ka haere mō ngā rā maha, ā, ka haere mai, ā, ka tōhipa atu i te puke o Himi, ā, ka haere mai ki te wāhi i whakangaromia nei ngā Nīwhai, ā, atu i reira ki te taha rāwhiti, ā, ka tae atu ki tētahi wāhi e kīa ana ko Aporima, i te taha o te takutai moana, ā, ka whakatūria ake tōna tēneti i reira, me āna tama rātou ko āna tamāhine anō hoki, me tōna whare katoa, atu i a Iarere rātou ko tōna whānau.

4 Ā, i pahawa ake, nā, ka whakawahia a Iarere hei kīngi i runga i te iwi, e te ringa o te whakarihariha; ā, ka tukuna atu tana tamāhine ki a Akihi hei hoawahine māna.

5 Ā, i pahawa ake, nā, ka whai atu a Akihi i te oranga o tana hungarei; ā, ka tono atu ia ki aua hunga nāna nei i whakaoati i runga i ngā oati o te hunga onamata, ā, ka riro i a rātou te māhunga o tōna hungarei, i a ia e noho ana i runga i tōna torona, e whakarongo ana ki tōna iwi.

6 Nā te mea, anō te nui o te horapa haeretanga o tēnei huinga huna whakarihariha, nā, kua pokea ngā ngākau katoa o te iwi; nō reira i kōhuru a Iarere i runga i tōna torona, ā, ka kīngi a Akihi i muri i a ia.

7 Ā, i pahawa ake, nā, ka pūhaehae haere a Akihi ki tana tama, nō reira ka tūtakina ia ki roto i te whareherehere, ā, i iti rawa te kai i whāngaia atu māna, ā, mate noa ia.

8 Ināianei ā, ka riri te teina o te mea i mate ai, (ā ko Nimira tōna ingoa) ki tōna matua nā tā tōna matua i mea ai ki tōna tuakana.

9 Ā, i pahawa ake, nā, ka whakakao mai a Nimira i tētahi ope iti, ā, ka tāhuti atu i te whenua, ā, ka haere mai, ā, ka noho tahi me Omere.

10 Ā, i pahawa ake, nā, ka whānau a Akihi i ērā atu tama, ā, ka riro i a rātou ngā ngākau o te iwi, hei aha koa i oati rātou ki a ia kia mea ai i ngā tūmomo kino katoa e rite ana ki tāna i hiahia ai.

11 Nā, i te hiahia te iwi o Akihi kia whai taonga, e rite ana ki a Akihi i hiahia ai ki te whaimana, nā reira, ka tuku atu ngā tama a Akihi i te putea ki a rātou, nā konā tōia atu anō te wāhi nui o te iwi ki a rātou.

12 Ā, ka tīmata tētahi pakanga i waenganui i ngā tama a Akihi me Akihi, hono tonu tēnei mō ngā tau maha, āe rā, e tata tae atu ana ki te whakangaromanga katoatanga o ngā tāngata o te kīngitanga, āe rā, pau katoa, atu i ngā wairua toru tekau, me te hunga i tahuti atu i te taha o Omere.

13 Nā reira, ka whakahokia anōtia a Omere ki tōna whenua tuku iho.

14 Ā, i pahawa ake, nā, ka koroheke haere a Omere; hei aha koa, ka whānau mai ia i a Emere i tōna koroheketanga; ā, ka whakawahi ia i a Emere hei kīngi i muri i a ia.

15 Ā, i muri iho i tana whakawahinga i a Emere hei kīngi ka kite ia i te maungārongo i runga i te whenua katoa mō te takiwā o ngā tau e rua, ā, ka mate ia, he maha rawa atu ngā rā i kite ai ia, e kī ana i te pōuritanga. Ā, i pahawa ake, nā, ka whakahaere a Emere i muri i a ia, ā, ka whakakī ia i ngā tapuae o tōna matua.

16 Ā, ka tīmata atu anō tā te Ariki tango i tōna kanga i te whenua, ā, ka kake rawa te whare o Emere i raro i tōna whakahaeretanga; ā, ka pakari rawa rātou i roto i te takiwā o ngā tau e ono ngahuru mā rua, nā konā ka tino whairawa rawa atu rātou—

17 I a rātou ngā tū huarākau, me ngā kākano, me ngā hiraka, me ngā rīnena papai, me te kōura, me te hiriwā, me ngā mea utu nui;

18 Me ngā tū kau katoa anō hoki, ngā ōkiha, ngā kau, ngā hipi, ngā poaka, ngā koati, me ērā atu tūmomo kararehe e pai ana hei kai mā te tangata.

19 Ā, i a rātou anō hoki he hōiho, he kāihe, ā, he arawhana, he kureroma, he kumomo i reira; he pai katoa ērā mea mā te tangata, he tino pērā anō ngā arawhana me ngā kureroma me ngā kumomo.

20 Ā pēnei ringihia iho ai e te Ariki āna manaakitanga ki runga i tēnei whenua, he whenua pai rawa ake i ngā whenua katoa; ā, ka whakahau ia kia nōhia ai te whenua e te hunga mō tā te Ariki e pai ai, ki te kore ka whakangaromia rātou ina pakari rātou i roto i te kino; nā konā rā, e ai tā te Ariki: Māku te raneatanga o tōku riri e maringi iho.

21 Ā, ka whakahaere whakawā a Emere i runga i te tika i ōna rā katoa, ā, i whānau mai ia i ngā tama me ngā tamāhine tokomaha; ā, nāna ko Koriatumu, ā, ka whakawahi ia i a Koriatumu hei kīngi i muri i a ia.

22 Ā, i muri iho i tana whakawahi i a Koriatumu hei kīngi i muri i a ia ka ora ia mō ngā tau e whā, ā, ka kite ia i te maungārongo i runga i te whenua katoa; āe rā, i kite ake anō ia i te Tama o te Tika, ā, i hari ia, i whakakorōria ia i tōna rā; ā, ka mate ia i runga i te rangimārie.

23 Ā, i pahawa ake, nā, ka hīkoi a Koriatumu i roto i ngā tapuae o tōna matua, ā, nāna ngā pā kaha maha i waihanga ake, ā, i mahia ērā mea e pai ana ki tōna iwi i ōna rā katoa. Ā, i pahawa ake, nā, kāore he tamariki āna kia tino koroheke rawa ia.

24 Ā, i pahawa ake, nā, ka mate tana hoawahine, kua kotahi rau mā rua tōna pakeke. Ā, i pahawa ake, nā, ka mau a Koriatumu ki tētahi kōtiro hei hoawahine māna i tana koroheketanga, ā, ka whānau mai i ngā tama me ngā tamāhine tokomaha; nā reira i ora ia tae noa atu kia kotahi rau e whā ngahuru mā rua tau te pakeke.

25 Ā, i pahawa ake, nāna ko Komo, ā, ka kīngi a Komo i muri i a ia; ā, ka whakahaere ia mō ngā tau e whā ngahuru mā iwa, ā, nāna ko Heta; ā, i whānau mai anō ia i ētahi atu tama me ētahi atu tamāhine.

26 Ā, kua horapa haere anō te iwi ki runga i te mata katoa o te whenua, ā, ka tīmata atu anō tētahi whakarihariha i runga i te mata o te whenua, ā, ka tīmata anō tā Heta tauapo i ngā tikanga huna onamata, kia whakangaro atu i tōna matua.

27 Ā, i pahawa ake, nā, ka turakina e ia tōna matua i runga i te torona, nā te mea i whakamate ia i a ia ki tana ake hoari; ā, ka kīngi ia i muri i a ia.

28 Ā, ka haere mai anō ētahi poropiti ki roto i te whenua, e karanga atu ana i te rīpenetātanga ki a rātou—nā, me matua whakarite rātou i te huarahi o te Ariki, ki te kore ka tau mai tētahi kanga ki runga i te mata o te whenua; āe rā, ka tau mai pū anō tētahi matekai nui, mā konā whakangaromia katoatia rātou ki te kore rātou e rīpenetā.

29 Engari kāore te iwi i whakapono ki ngā kupu a ngā poropiti, engari ka makaia atu rātou e rātou; ā, ko ētahi i makaia ki roto i ngā rua, ā, mahue ana rātou kia mate. Ā, i pahawa ake, nā, i meatia ēnei mea katoa e rātou e rite ana ki te whakahau a te kīngi, a Heta.

30 Ā, i pahawa ake, nā, ka tīmata tētahi kāhoretanga nui i runga i te whenua, ā, ka tīmata wawe rawa te whakangaronga o ngā tangata whenua he mea nā te kāhoretanga, nā te mea kāore he ua i runga i te mata o te whenua.

31 Ā, ka puta mai ngā nākahi paitini anō hoki ki runga i te mata o te whenua, ā, ka whakamate i ngā tāngata tokomaha. Ā, i pahawa ake, nā, ka tīmata atu te tahutitanga atu o ā rātou kāhui i te aroaro o ngā nākahi paitini, ki te whenua whakatetonga, i karangatia nei e ngā Nīwhai ko Harahemara.

32 Ā, i pahawa ake, nā, he maha ērā mea i ngaro atu ai i runga i te huarahi; hei aha koa, i reira ētahi i tahuti atu ai ki roto i te whenua whakatetonga.

33 Ā, i pahawa ake, nā, ka mea te Ariki i ngā nākahi kia kaua e arumia tonutia atu, engari kia kaupare atu i te huarahi e kore ai te tangata e hipa atu, nā, ka mate te tangata e ngana ai kia hipa atu i reira i ngā nākahi paitini.

34 Ā, i pahawa ake, nā, ka whai atu te iwi i te ara i haere ai ngā kararehe, ā, ka kainga ngā tīnana o ngā mea i hinga mai rā i te ara, kia kainga katoatia ērā mea katoa. Nā, i te kitenga ake o te iwi ka mate rātou ka tīmata tā rātou rīpenetā i ō rātou kino, ā, ka karanga ake ki te Ariki.

35 Ā, i pahawa ake, nā, i te wā i tika tā rātou whakaiti i a rātou anō i te aroaro o te Ariki ka tukuna e ia te ua ki runga i te mata o te whenua; ā, ka hauora anō te iwi, ā, ka ai he huarākau i ngā whenua whakateraki, me ngā whenua huri noa. Ā, ka whakaatu atu te Ariki i tōna kaha ki a rātou i tana tiaki i a rātou i te matekai.