1 Ā, i pahawa ake, nā, i te pikinga ake o te ora ki runga i a Koriatuma i ōna tūnga, ka tīmata ia ki te mahara ki ngā kupu a Ētere i kōrerotia atu ai ki a ia.

2 Ka kite ia kua tata whakamatea ngā tāngata e rua miriona o tōna iwi, ā, ka pōuri haere tōna ngākau; āe rā, kua rua miriona ngā tāne mārohirohi kua whakamatea, me ā rātou hoawāhine me ā rātou tamariki anō hoki.

3 Ka tīmata tana rīpenetā mō te kino i mea ai ia; ka tīmata ia ki te mahara ki ngā kupu i kōrerotia nei e te māngai o ngā poropiti, ā, ka kite ia kua tutukihia ērā i taua wā, ia tongi, ia tongi; ā, ka tangi tōna wairua, ā, kīhai i pai kia whakaāiotia.

4 Ā, i pahawa ake, nā, ka tuhi pukapuka atu ia ki a Hiti, e hiahia ana ki a ia kia tohua te iwi, ā, ka tukuna atu e ia te kīngitanga ki a ia hei painga mō te oranga o te iwi.

5 Ā, i pahawa ake, nā, i te whiwhinga a Hiti i tana pukapuka ka tuhi pukapuka atu ia ki a Koriatuma, nā, mēnā ka tukuna ake ia e ia anō, kia whakamatea ia ki tōna ake hoari, nā, ka tohua e ia te oranga o te iwi.

6 Ā, i pahawa ake, nā, kīhai te iwi i rīpenetā i ō rātou hara; ā, ka whakaohoohokia ake te iwi kia riri ai ki te iwi o Hiti; ā, ka whakaohoohokia ake te iwi o Hiti kia riri ki te iwi o Koriatuma; nā reira, ka whawhai atu te iwi o Hiti ki te iwi o Koriatuma.

7 Ā, i te kitenga ake a Koriatuma whano ia ka hinga ka tahuti atu anō ia i te iwi o Hiti.

8 Ā, i pahawa ake, nā, ka tae atu ia ki ngā wai o Ripirianakumu, ko tōna whakamāoritanga ake, he nui, he rahi ake rānei i ngā mea katoa; nā reira, i te wā i tae atu rātou ki ēnei wai ka whakatūria ake e rātou ō rātou tēneti; ā, ka whakatū a Hiti anō hoki i ōna tēneti e pātata atu ana ki a rātou; nō reira pakanga atu ai rātou ki a rātou i te aonga ake o te rā.

9 Ā, i pahawa ake, nā, i whawhai rātou i tētahi whawhai nanakia rawa atu, nā, ka taotūngia anōtia a Koriatuma i reira, ā, ka hemo iho anō ia i te ngaronga o te toto.

10 Ā, i pahawa ake, nā, ka tākare tonu atu ngā tauā a Koriatuma ki runga i ngā tauā a Hiti, nō ka patu rātou i a rātou, nā konei tahuti atu ai rātou i tō rātou aroaro; ā, ka tahuti whakatetonga atu, ā, ka whakatūria ō rātou tēneti i tētahi wāhi e karangatia nei ko Okata.

11 Ā, i pahawa ake, nā, ka whakatūria e te tauā a Koriatuma ō rātou tēneti i te taha o te puke Rama; ā, ko taua puke rā anō te puke i hunaia ake e tōku matua a Moromona ngā tuhinga ki te Ariki, koia nei he mea tapu.

12 Ā, i pahawa ake, nā, ka whakahuihui tahi anō rātou i ngā tāngata katoa i runga i te mata katoa o te whenua, ko te hunga kāore anō kia whakamatea, hāunga ko Ētere.

13 Ā, i pahawa ake, nā, i kite a Ētere i ngā meatanga katoa o te iwi; ā, i kite ia i ngā tāngata e tautoko ana i a Koriatuma e hui tahi ana ki te tauā a Koriatuma; ā, ko te hunga tautoko i a Hiti e hui tahi ana ki te tauā a Hiti.

14 Nā reira, i te whakahuihui rātou i te iwi mō te takiwā o ngā tau e whā, kia hopukia e rātou ngā tāngata katoa i runga i te mata o te whenua, ā, kia whiwhi anō rātou i te kaha katoa e taea ana e rātou te whiwhi.

15 Ā, i pahawa ake, nā, i te wā kua huihui tahi katoa rātou, ia tangata, ia tangata ki tana tauā e pai ai, me ā rātou hoawāhine me ā rātou tamariki—tāne mai, wāhine mai, tamariki mai e whakamaua ana ki ngā rākau whawhai, e mau puapua ana, e mau ārai uma ana, me ngā ārai māhunga, ā, e whakakākahutia ana ki ngā tūmomo kākahu whawhai—ka hīkoi atu rātou tētahi ki tētahi; ā, ka whawhai rātou mō te roanga ake o taua rā, ā, kīhai i wikitōria.

16 Ā, i pahawa ake, nā, i te ngenge rātou i te pō, ā, ka hoki atu rātou ki ō rātou hōpuni; ā, whai muri atu i tā rātou hokinga atu ki ō rātou hōpuni ka huri rātou ki te tangihanga me te uhunga nō te ngarohanga o te hunga whakamatea o tō rātou iwi; ā, anō te nui o ō rātou tangihanga, ā rātou uhunga me ā rātou mōteatea, nā, ka haehaetia nuitia te hau.

17 Ā, i pahawa ake, nā, ao ake te rā ka haere atu anō rātou ki te whawhai, ā, he whakawehi nui taua rā; hei aha koa, kāore i wikitōria rātou, ā, i te taunga iho o te pō ka haehaetia anōtia te hau ki ā rātou tangihanga, me ā rātou uhunga, me ā rātou mōteatea, nō te ngarohanga o te hunga whakamatea o tō rātou iwi.

18 Ā, i pahawa ake, nā, ka tuhi pukapuka atu anō a Koriatuma ki a Hiti, e hiahia ana ki a ia kia kaua e haere mai ai ki te whawhai, engari kia mau ia ki te kīngitanga me te tohu anō i te oranga o te iwi.

19 Engari nana, kua oti tā te Wairua o te Ariki piri tahi ki a rātou, ā, i a Hātana anō te kaha katoa i runga i ngā ngākau o te iwi; nā te mea kua riro atu rātou i te pakeketanga o ō rātou ngākau, me te kāpōtanga o ō rātou hinengaro kia whakangaromia rātou; nā reira haere atu anō ai rātou ki te pakanga.

20 Ā, i pahawa ake, nā, ka whawhai rātou mō te roanga ake o taua rā, ā, i te taunga iho o te pō ka moe rātou i runga i ō rātou hoari.

21 Ā, ao ake ana te rā ka whawhai rātou tae noa pū anō ki te taunga o te pō.

22 Ā, ka haurangi rātou i te riri i te taunga ihotanga o te pō, e rite pū ana ki te tangata e haurangi ana i te waina; ā, ka moe anō rātou i runga i ō rātou hoari.

23 Ā, ka whawhai anō rātou i te aonga ake o te rā; ā, i te taunga iho o te pō kua hinga katoa rātou i te hoari hāunga ko ngā mea e rima tekau mā rua o Koriatuma me ngā mea e ono tekau mā iwa o te iwi o Hiti.

24 Ā, i pahawa ake, nā, ka moe rātou i runga i ō rātou hoari i taua pō, ā, ao ake te rā ka whawhai anō rātou, ā, ka whawhai atu anō rātou ki ō rātou hoari me ō rātou puapua i runga i tō rātou kaha katoa, mō te roanga ake o taua rā.

25 Ā, i te taunga iho o te pō, e toru tekau mā rua o te iwi o Hiti, ā, e rua tekau mā whitu o te iwi o Koriatuma.

26 Ā, i pahawa ake, nā, ka kai rātou, ā, ka moe rātou, ā, ka whakaritea mō te mate hei te aonga ake o te rā. Ā, he tāne kaitā, he tāne mārohirohi rātou e rite ana ki tō te tangata kaha.

27 Ā, i pahawa ake, nā, i whawhai rātou mō te takiwā o ngā haora e toru, ā, ka hemo iho rātou nā te nui o te toto i heke ai.

28 Ā, i pahawa ake, nā, i te wā kua rahi te kaha o ngā tāngata o Koriatuma e taea ai e rātou te hīkoi, whano rātou ka tahuti atu mō ō rātou oranga; engari nana, ka tū ake a Hiti, me āna tāne anō hoki, ā, ka oati ia i runga i tōna riri ki te whakamate i a Koriatuma, kia mate rānei ia ki te hoari.

29 Nā reira, ka whai atu ia i a rātou, ā, ao ake te rā kua mau ia ki a rātou; ā, ka whawhai anō rātou ki te hoari. Ā, i pahawa ake, nā, i te wā kua hinga katoa iho rātou ki te hoari, hāunga ko Koriatuma rāua ko Hiti, nana kua hemo iho a Hiti i te ngaronga o te toto.

30 Ā, i pahawa ake, nā, i te tītahatanga o Koriatuma i runga i tana hoari, nā, ka whakatā poto ia, nā, ka haua iho te māhunga o Hiti.

31 Ā, i pahawa ake, nā, whai muri iho i tana hahautanga iho i te māhunga o Hiti, nā, ka maranga ake a Hiti ki runga i ōna ringaringa kātahi ka hinga iho; ā, whai muri i tana okeokenga kia whai manawa, ka mate ia.

32 Ā, i pahawa ake, nā, ka hinga iho a Koriatuma ki te whenua, ā, ka meinga anō nei kāore ōna oranga.

33 Ā, ka kōrero atu te Ariki ki a Ētere, ā, ka kī atu ki a ia: Haere atu. Ā, ka haere atu ia, ā, ka kite ia kua tutuki ngā kupu a te Ariki; ā, ka whakaotia e ia tana tuhinga; (ā, kāore i pau i a au te wāhi whakaterau te tuhituhi) ā, ka hunaia ake ērā mea e ia i tētahi āhua e kitea ai ērā mea e te iwi o Rimihi.

34 Nā, koinei ngā kupu whakamutunga i tuhia ai e Ētere: Mehemea e hiahia ana te Ariki kia kawea kētia atu, kia tukua rānei ahau ki tā te Ariki i te kikokiko, kāore he aha māku, mēnā ka whakaorangia au i roto i te kīngitanga o te Atua. Āmine.