1 Ā, i pahawa ake, nāna ko Omere, ā, ka whakahaere a Omere i muri i a ia. Ā, nā Omere ko Iarere; ā, ka whānau mai a Iarere i ngā tama me ngā tamāhine.

2 Ā, ka haututū a Iarere ki tōna matua, ā, ka haere mai ia ki te noho i te whenua o Heta. Ā, i pahawa ake, nā, ka whakapatipati ia i ngā tāngata tokomaha, nā ana kupu tinihanga, kia riro i a ia te haurua o te kīngitanga.

3 Ā, i te wā i riro i a ia te haurua o te kīngitanga ka pakanga atu ki tōna matua, ā, nāna tōna matua i mauhere atu, ā, ka whakamahia ia i roto i te hereheretanga;

4 Ināianei ā, i ngā rā o te whakahaeretanga o Omere, kei roto ia i te hereheretanga mō te haurua o ōna rā. Ā, i pahawa ake, nā, ka whānau ia i ngā tama me ngā tamāhine, ko Eremo rāua ko Koriatuma ētahi o rātou;

5 Ā, i te tino pukuriri rāua nā ngā mahinga ā tō rāua tuakana, nā konā whakatūria e rāua tētahi tauā, ā, ka pakanga atu ki a Iarere. Ā, i pahawa ake, nā, ka pakanga atu rāua ki a ia i te pō.

6 Ā, i pahawa ake, nā, i te wā i whakamatea te tauā a Iarere, whano rātou ka whakamate i a ia anō hoki; ā, ka inoi atu ia kei whakamate rātou i a ia, ki te pērā ka tuku atu ia i te kīngitanga ki tōna matua. Ā, i pahawa ake, nā, ka tohua tōna oranga.

7 Ināianei ā, ka tino pōuri rawa a Iarere nō te ngaronga atu o tōna kīngitanga, nā te mea i whakatau iho tōna ngākau ki runga i te kīngitanga me te korōria o te ao.

8 Nā, he tino mātanga te tamāhine a Iarere, ā, i tana kitenga atu i ngā pōuritanga o tōna matua, ka whakaaro ake i tētahi mahere mā konā whakahokia te kīngitanga ki tōna matua.

9 Nā, he tino ātaahua te tamāhine a Iarere. Ā, i pahawa ake, nā, ka kōrero ia ki tana matua, ā, ka kī atu ki a ia: He aha i pēnei ai te pōuri nui o tōku matua? Kāore anō rānei ia kia pānui i te tuhinga i kawea mai nei e ō tāua tūpuna ki tua i te rire nui? Nana, kāore rānei i reira tētahi tuhinga e pā ana ki a rātou o mua, nā, i riro ai i a rātou ngā kīngitanga me te korōria nui nā ā rātou mahere huna?

10 Ināianei ā, nō reira, tukua tōku matua kia tono atu i a Akihi, te tama a Kiminoro; ā nana, he ātaahua ahau, ā, ka kanikani au i tōna aroaro, ā, māku ia e whakaahuareka, nō ka hiahia mai ia ki a au hei wahine māna; nā reira ka hiahia ia i a koe kia hoatu au ki a ia hei hoawahine māna, kātahi ka kī atu koe: Māku ia e tuku ki te mauria mai e koe te māhunga o tōku matua, te kīngi.

11 Ināianei ā, he hoa a Omere nō Akihi; nā reira, i te tononga atu a Iarere i a Akihi, ka kanikani te tamāhine a Iarere i tōna aroaro, ā, ka whakaahuareka i a ia, nā konā hiahia ai ia i a ia hei hoawahine māna. Ā, i pahawa ake, nā, ka kī atu ia ki a Iarere: Homai ia ki ahau hei hoawahine māku.

12 Ā, ka kī atu a Iarere ki a ia: Māku ia e hoatu ki a koe, mēnā ka mauria mai ki ahau te māhunga o tōku matua, te kīngi.

13 Ā, i pahawa ake, nā, ka whakaminea ngātahitia e Akihi ana huānga katoa ki roto i te whare o Iarere, ā, ka kī atu ki a rātou: Ka oati koutou ki ahau kia pono koutou ki ahau i roto i te mea māku e tono atu nei ki a koutou?

14 Ā, i pahawa ake, nā, ka oati katoa rātou ki a ia, i runga i te Atua o te rangi, me ngā rangi anō hoki, i runga i te whenua anō hoki, me ō rātou māhunga anō hoki, nā, ka riro atu te māhunga o te tangata e kōtiti atu i te āwhina e tonoa ai e Akihi; ā, ki te whāki atu tētahi i tētahi mea i whakamōhiotia atu e Akihi ki a rātou, koia hoki e riro atu i tōna oranga.

15 Ā, i pahawa ake, nā, i whakaae pēnei rātou ki tā Akihi. Ā, ka mahia atu e Akihi ki a rātou ngā oati i tukuna iho e rātou te hunga onamata i whai ai ki te rapu mana, he mea tuku iho e Kaina, koia tētahi kaikōhuru nō te tīmatanga.

16 Ā, i tautokona rātou e te mana o te rēwera kia mahia ēnei oati ki te iwi, kia mau tonu ki a rātou i roto i te pōuritanga, kia āwhina ai i te hunga rapu mana kia rapu mana, kia kōhuru, kia pāhua, kia rūkahu, kia mahia ai ngā tūmomo whakarihariha me ngā pūremutanga.

17 Ā, nā te tamāhine a Iarere i puru ki roto i tōna ngākau kia kimihia ēnei mea onamata; ā, nā Iarere i puru ki roto i tō Akihi ngākau; nā reira, ka mahia atu e Akihi ki ana huānga me ōna hoa, e ārahina atu ana rātou i runga i ngā whakaari whakapatipati kia mahia tāna i pai ai.

18 Ā, i pahawa ake, nā, ka whakaritea e rātou tētahi huinga huna, e rite ana ki a rātou nō onamata; ko taua whakakotahitanga he mea mōrikarika, ā, he mea whakarihariha i runga i ngā mea katoa, i te tirohanga a te Atua;

19 Nā te mea kāore te Ariki e mahi ana i roto i ngā whakakotahitanga huna, kāore rānei ia e mea kia whakaheke te tangata i te toto, engari kua kīa kia kaua i roto i ngā mea katoa, mai i te tīmatanga o te tangata.

20 Ināianei ahau, a Moronai, e kore nei e tuhituhi i ā rātou tūmomo oati me ā rātou whakakotahitanga, nā te mea kua whakamōhiotia mai ki ahau kei waenganui ēnā mea i ngā iwi katoa, ā, kei roto anō i ngā Rāmana.

21 Ā, nā ēnei mea anō te whakangaromanga o tēnei iwi e kōrerotia ake nei e ahau, me te whakangaromanga anō hoki o te iwi o Nīwhai.

22 Ā, ko te iwi e tautoko ake i ngā whakakotahitanga huna pērā, kia rapu mana, kia whai taonga, kia horapa haere i runga i te iwi, nana, ka whakangaromia rātou; nā te mea e kore te Ariki e tuku ngā toto o te hunga tapu, e whakahekea iho ai e rātou, e hono tonu ai te karanga ake ki a ia i te whenua mō te utu ki runga ki a rātou, engari ka kore ia e rapu utu ki runga i a rātou.

23 Nā reira, E koutou e ngā Tauiwi, he whaimātauranga ia nō te Atua kia whakakitea atu ēnei mea ki a koutou, kia rīpenetā koutou i ō koutou hara, ā, kaua e tuku kia eke ake ēnei whakakotahitanga huna ki runga i a koutou, he mea hanga ake kia whaimana, ā, kia whai taonga—me te mahi, āe rā, ka tau mai pū anō te mahi whakangaromanga ki runga i a koutou, ki tō koutou turakinga me tō koutou whakangaromanga ki te tuku ēnei mea kia puta mai.

24 Nā reira, e whakahau ana te Ariki i a koutou, ina kite koutou i ēnei mea e puta mai ana ki waenganui i a koutou, nā, ka oho ake ki tētahi mātauranga mō tō koutou āhuatanga weriweri, nā tēnei whakakotahitanga huna kei roto nei i a koutou; auē rānei te mate mō tēnei mea, nā ngā toto o te hunga kua whakamatea iho nei; nā te mea kei te karanga ake rātou i te puehu kia rapu utu ki runga i taua mea, ki runga hoki i te hunga katoa nāna nei tēnei i hanga.

25 Nā te mea e pahawa ake ana, nā, ko te tangata e hangaia ake tēnei mea e whai ana ki te turaki iho i te herekoretanga o ngā whenua katoa, o ngā iwi katoa; ā, mā konā pahawa ake ai te whakangaromanga ki ngā tāngata katoa, nā te mea kua hangaia ake e te rēwera, koia te matua o ngā rūkahu katoa; ko taua kairūkahu pū anō nāna nei ō tātou mātua tuatahi i tinihanga, āe rā, ko taua kairūkahu pū anō nāna nei te tangata i mea kia kōhuru mai i te tīmatanga; nāna nei ngā ngākau o te tangata i whakapakeke nā konei rātou kōhuru ai i ngā poropiti, kua ākina ki te kohatu, kua makaia ki waho, mai i te tīmatanga.

26 Nā reira ahau, a Moronai, e whakahaua ana kia tuhia ēnei mea kia whakakorehia atu te kino, ā, kia tae mai te wā e kore ō Hātana kaha ki runga i ngā ngākau o ngā tamariki a te tangata, engari kia whakapakepakea rātou kia mahi pai i ngā wā katoa, kia haere mai ai rātou ki te mātāpuna o te tika katoa, ā, kia whakaorangia ai.