1 Ā, i pahawa ake, nā, ka whakahaere whakawā a Oriha ki runga i te whenua i runga i te tika i ōna rā katoa, he tino maha ōna rā.

2 Ā, ka whānau mai āna i ngā tama me ngā tamāhine; āe rā, i whānau mai āna i ngā mea toru tekau mā tahi, e rua tekau mā toru ngā tama.

3 Ā, i pahawa ake, nā, ka whānau mai tāna i a Kipi i tōna koroheketanga. Ā, i pahawa ake, nā, ka whakahaere a Kipi whai muri iho i a ia; ā, nā Kipi ko Korihoro.

4 Ā, ka haututū a Korihoro ki tōna matua i te wā e toru tekau mā rua tōna pakeke, ā, ka haere atu ia kia noho ai i te whenua o Niho; ā, ka whānau mai ia i ngā tama me ngā tamāhine, ā, ka tino ātaahua haere rātou; nā reira ka kukume atu a Korihoro i ngā tāngata tokomaha kia whai atu i a ia.

5 Ā, i te wā i whakakotahi ia i tētahi tauā ka haere ake ki te whenua o Morona te wāhi i noho ai te kīngi, ā, ka mauheretia ia, mā konā pahawa ake te kōrero a te teina a Iarere, nā, ka whakaraua rātou.

6 Nā, ko te whenua o Morono, i reira te kīngi e noho ana, e tata atu ana ki te whenua e karangatia ana ko te Whakangaromanga e ngā Nīwhai.

7 Ā, i pahawa ake, nā, ka noho a Kipi i roto i te hereheretanga, me tōna iwi i raro i a Korihoro tana tama, kia koroheketia rawatia ia; hei aha koa ka whānau mai a Kipi i a Hure i tōna koroheketanga, i a ia e noho herehere tonu ana.

8 Ā, i pahawa ake, nā, i te riri a Hure ki tana tuakana; ā, ka pakari haere a Hure, ā, ka mārohirohi haere ki te ritenga o tō te tangata kaha; ā, i kaha hoki ia i runga i te whakawākanga.

9 Nā reira, ka haere mai ia ki te puke o Eparaima, ā, nāna nei i whakarewa iho i te puke, ā, ka hangaia he hoari maitai mō te hunga i kumea atu ai e ia; ā, whai muri i tana whakamauranga i a rātou ki ngā hoari ka hoki ki te pā o Niho, ā, ka pakanga atu ki tana tuakana a Korihoro, mā konā rapu ai te kīngitanga, ā, ka whakahokia atu ki tōna matua a Kipi.

10 Ināianei ā, nā te mea i mea ai a Hure, ka whakataua iho e tōna matua te kīngitanga ki runga ki a ia; nō reira ka tīmata tana whakahaere i muri i tōna matua.

11 Ā, i pahawa ake, nā, i whakahaere whakawā i runga i te tika; ā, ka horapa haere i a ia tōna kīngitanga ki runga i te mata o te whenua, nā te mea kua tokomaha rawatia te iwi.

12 Ā, i pahawa ake, nā, ka whānau mai a Hure i ngā tama me ngā tamāhine tokomaha.

13 Ā, ka rīpenetā a Korihoro i ngā mea kino i mea ai ia; nā reira ka hoatu e Hure he mana ki a ia i roto i tōna kīngitanga.

14 Ā, i pahawa ake, nā, he tokomaha ngā tama me ngā tamāhine a Korihoro. Ā, kei waenganui i ngā tama a Korihoro tētahi ko Noa tana ingoa.

15 Ā, i pahawa ake, nā, ka haututū atu a Noa ki a Hure, te kīngi, me tana matua anō hoki a Korihoro, ā, ka kumea atu tana teina a Kohoro, me ana teina katoa anō hoki me ngā tāngata tokomaha.

16 Ā, ka pakanga atu ia ki a Hure, te kīngi, mā konā riro ai i a ia tō rātou whenua tuku iho tuatahi; ā, ka meinga ia hei kīngi i runga i tērā wāhi o te whenua.

17 Ā, i pahawa ake, nā, ka pakanga atu ia ki a Hure, te kīngi; ā, ka mau ia ki a Hure, te kīngi, ā, ka mauhereheretia atu ia ki roto o Morono.

18 Ā, i pahawa ake i a ia whano ka whakamate i a ia, ka ngōki atu ngā tama a Hure ki roto i te whare o Noa i te pō, ā, ka whakamatea ia, ā, ka turakina iho te tatau o te whareherehere, ā, ka whakaputaina mai tō rātou matua, ā, ka whakanohoia iho ia ki runga i tōna ake torona.

19 Nā reira, ka hangaia ake e te tama a Noa tōna kīngitanga i muri i a ia; hei aha koa kāore rātou i rapu mana atu anō ki runga i a Hure te kīngi, ā, ka kake nui te iwi i raro i te whakahere a kīngi Hure, ā, ka tupu kaha.

20 Ā, ka weheruatia te whenua; ā, e rua ngā kīngitanga, ko te kīngitanga o Hure, me te kīngitanga o Kohoro, te tama a Noa.

21 Ā, ka mea a Kohoro, te tama a Noa i tana iwi kia pakanga atu ki a Hure, nā konā hinga ai rātou i a Hure, ā, ka whakamate a Kohoro.

22 Ināianei ā, he tama tā Kohoro ko Nimirota tōna ingoa; ā, ka tukua atu e Nimirota te kīngitanga o Kohoro ki a Hure, ā, ka makau haere ia i ngā karu o Hure; nā reira ka whakatau iho a Hure i ngā makauranga nui ki runga ki a ia, ā, i mahi ia i tāna i pai ai i roto i te kīngitanga o Hure.

23 I a Hure e kīngi ana ka puta mai ngā poropiti tokomaha ki waenganui i te iwi, he mea tono e te Ariki, e poropiti ana, nā, i te kukume iho te whakarihariha me te whakapakoko o te iwi i tētahi kanga ki runga i te whenua, ā, ka whakangaromia rātou ki te kore rātou e rīpenetā.

24 Ā, i pahawa ake, nā, ka haututū te iwi ki ō rātou poropiti, ā, ka whakatoia rātou. Ā, i pahawa ake, nā, ka whakahaere whakawā a kīngi Hure ki runga i te hunga katoa i whakatoi ai i ngā poropiti.

25 Ā, ka whakaritea e ia tētahi ture puta noa i te whenua katoa, e tuku mana ana ki ngā poropiti e taea ai e rātou te haere ki ngā wāhi katoa e pai ai; ā, mā tēnei kaupapa kukume mai anō te iwi ki te rīpenetātanga.

26 Ā, tohu te Ariki i te iwi mō rātou i rīpenetā i ō rātou kino me ō rātou whakapakoko, ā, ka tīmata tā rātou kake anō i te whenua. Ā, i pahawa ake, nā, ka whānau mai a Hure i ngā tama me ngā tamāhine i tōna koroheketanga.

27 Ā, kāore he pakanga anō i ngā rā o Hure; ā, i maumhara ia ki ngā mea nunui i mea ai te Ariki mō ōna matua i tana kawenga mai i a rātou ki tua o te rire nui ki roto i te whenua o te kupu whakaari; nā reira i whakahaere whakawā ia i runga i te tika i ōna rā katoa.