1 Ināianei ahau, a Moronai, ka tuku tonu i te tuhinga a Iarere rāua ko tana teina.

2 Nā te mea i pahawa ake i muri iho i tā te Ariki whakarite i ngā kohatu i kawea ake ai e te teina a Iarere ki runga i te maunga, ka heke iho te teina a Iarere i te maunga, ā, ka purua atu ngā kohatu ki roto i ngā kaipuke i whakaritea atu nei, tētahi ki tētahi pito, tētahi ki tētahi pito; ā nana, i tiaho atu ēnā mea i roto i ngā kaipuke.

3 Ā pēnei meatia ai e te Ariki ngā kohatu kia tiaho atu i te pōuritanga, kia tuku māramatanga atu ki ngā tāne, ngā wāhine, me ngā tamariki, kia kore ai rātou e whakawhiti atu i ngā wai nunui i roto i te pōuritanga.

4 Ā, i pahawa ake, nā, i te wā kua whakaritea e rātou ngā tūmomo kai katoa, hei oranga mō rātou i runga i te wai, me ngā kai anō hoki mā ā rātou kāhui o ia tū, o ia tū, me ngā kararehe, ngā manu rānei e haria ai e rātou—ā, i pahawa ake i te wā kua whakaotioti rātou i ēnei mea katoa ka eke atu rātou ki runga i ō rātou kaipuke, ki ō rātou pōti rānei, ā, ka mānu atu ki runga i te moana, e tukua iho ana rātou e rātou anō ki te Ariki tō rātou Atua.

5 Ā, i pahawa ake, nā, ka mea te Ariki kia puhia te hau pūkeri ki runga i te mata o ngā wai, whakatewhenua o te kupu whakaari; ā pēnei pīoioitia rātou ki runga i ngā ngaru o te moana i mua i te hau.

6 Ā, i pahawa ake, nā, he maha ngā wā i tanumia iho rātou ki roto i ngā rire o te moana, nā ngā ngaru whakapuke i whatiwhatia iho nei ki runga i a rātou, me ngā tupuhi nui whakawehi anō hoki i hua ake ai i te hau pūkeri.

7 Ā, i pahawa ake, nā, i te wā e tanumia ana rātou i roto i ngā rire o te moana kīhai i taea e ngā wai te tūkino i a rātou, i te mea he mea maru hoki ō rātou kaipuke kia rite ki tētahi oko, ā, i maru hoki ērā mea e rite ana ki te āka a Noa; nō reira ka karangatia atu rātou ki te Ariki i ngā wā i karapotia iho rātou e ngā wai maha, ā, nāna anō rātou i kawe ake ai ki runga ki ngā wai.

8 Ā, i pahawa ake, nā, kāore i mutu te pupuhitanga o te hau whakatewhenua o te kupu whakaari i a rātou i runga i ngā wai; ā pēnei āia atu ai rātou ki mua i te hau.

9 Ā, i waiata whakamoemiti rātou ki te Ariki; āe rā, i waiata whakamoemiti te teina a Iarere ki te Ariki, ā, i whakawhetai ia, i whakawhetai ia ki te Ariki mō te roanga ake o te rā; ā, ina tau mai te pō, kāore i mutu tā rātou waiata whakamoemiti ki te Ariki.

10 Ā ka āia pēneitia atu rātou; ā, kāore i taea e tētahi taniwhā o te moana te whawhati iho i a rātou, e tētahi tohorā rānei te whakakino i a rātou; ā, hono tonu tā rātou whai māramatanga, i runga rānei i te wai, i raro rānei i te wai.

11 Ā, ka āia pēneitia atu rātou, e toru rau e whā tekau mā whā ngā rā i runga i te wai.

12 Ā, ka ū rātou ki uta ki te whenua o te kupu whakaari. Ā, ka tuohu iho rātou ki runga i te mata o te whenua i te wā i tau iho ō rātou waewae ki runga i te takutai o te whenua o te kupu whakaari, ā, ka whakaiti rātou i a rātou anō i mua i te aroaro o te Ariki, ā, ka heke iho ngā roimata i te hari i te aroaro o te Ariki, nā te nui o āna mahi aroha ki runga i a rātou.

13 Ā, i pahawa ake, nā, ka haere atu rātou ki runga i te mata o te whenua, ā, ka tīmata tā rātou ngaki i te whenua.

14 Ā, he tokowhā ngā tama a Iarere; ā, i huaina rātou ko Hakoma, rātou ko Kirika, ko Maha, ko Oriha.

15 Ā, ka whānau ake anō te teina a Iarere i ngā tama me ngā tamāhine.

16 Ā, neke atu i te rua tekau mā rua te tokomahatanga o ngā hoa o Iarere rāua ko tana teina; ā, i whānau mai anō rātou i ngā tama me ngā tamāhine i mua i tā rātou ūnga mai ki te whenua o te kupu whakaari; ā, nō reira ka tīmata tā rātou tokomaha haeretanga.

17 Ā, i whakaakona rātou kia hīkoi whakaiti i te aroaro o te Ariki; ā, i whakaakona anō hoki rātou mai i ngā wāhi tiketike.

18 Ā, i pahawa ake, nā, ka horapa haere rātou i runga i te mata o te whenua, ā, ka tīmata tā rātou whakatokomaha haere me tā rātou ngaki i te whenua; ā, ka pakari haere rātou i runga i te whenua.

19 Ā, ka koroheke haere te teina a Iarere, ā, ka kite ia meake heke iho ia ki te rua tūpāpaku; nā reira ka kī atu ia ki a Iarere: Tukua tāua kia whakakotahi i tō tātou iwi kia tatauria ai rātou, kia mōhio ai tāua he aha tā rātou hiahia ki a tāua i mua i tā tāua hekenga iho ki ō tāua rua tūpāpaku.

20 Ā, ka whakaminea te iwi kia rite ki ērā kōrero. Nā, kua rua tekau mā rua ngā tama me ngā tamāhine a te teina a Iarere; ā, kua tekau mā rua ngā tama me ngā tamāhine a Iarere, tokowhā āna tama.

21 Ā, i pahawa ake, nā, ka tatauria tō rāua iwi; ā, whai muri iho i tā rāua tatau i a rātou, i hiahia rāua kia mōhio ai he aha ngā mea e hiahia nei rātou i a rāua i mua i tā rāua hekenga iho ki ō rāua rua tūpāpaku.

22 Ā, i pahawa ake, nā, i te hiahia te iwi i a rāua kia whakawahia tētahi o ā rāua tama hei kīngi mō runga i a rātou.

23 Ināianei ā nana, he mea pōuri ki a rāua. Ā, ka kī atu te teina a Iarere ki a rātou: Kāore e kore mā konei ara ake ai te hereheretanga.

24 Engari ka kī atu a Iarere ki tana teina: Tukua kia whai kīngi ai rātou. Nō reira kī atu ai ia ki a rātou: Kōwhiria e koutou tētahi o ā māua tama hei kīngi, tā koutou pū anō e pai ai.

25 Ā, i pahawa ake, nā, i kōwhiria te mātāmua a te teina a Iarere; ā, ko Pakaka tōna ingoa. Ā, i pahawa ake, nā, ka whakakorea e ia, kāore ia i pai hei kīngi mō rātou. Ā, i te hiahia te iwi kia kukume tōna matua i a ia, engari kīhai i pērā tōna matua; ā, ka whakahau ia ki a rātou kia kaua e kukume i tētahi tangata hei kīngi mō rātou.

26 Ā, i pahawa ake, nā, i kōwhiria e rātou ngā teina katoa a Pakaka, ā, kīhai rātou i pai.

27 Ā, i pahawa ake, nā, kīhai hoki ngā tama a Iarere i pai, ko ngā mea katoa hāunga tētahi; ā, ka whakawahia a Oriha hei kīngi i runga i te iwi.

28 Ā, ka tīmata tōna whakahaere, ā, ka kake haere te iwi; ā, ka tino whairawa haere te iwi.

29 Ā, i pahawa ake, nā, ka mate a Iarere, ā, me tana teina anō hoki.

30 Ā, i pahawa ake, nā, i hīkoi whakaiti a Oriha i te aroaro o te Ariki, ā, ka mahara ki te nui o ngā mea i mea ai te Ariki mō tōna matua, ā, i whakaako anō ia i tana iwi ki ngā mea nunui i mea ai te Ariki mō ō rātou matua.