1 Ā, i pahawa ake, nā, ka haere atu te teina a Iarere, (nā kua whakaritea ngā kaipuke e waru) ki te maunga, i karangatia nei e rātou ko te maunga Hereme, nā tōna tino tiketike, ā, ka rewa mai i tētahi kohatu ngā kohatu iti tekau mā ono; he mea mā, ā, he mea pūataata, he rite tōna pūataata anō ki te karāhe; ā, nāna i hari i roto i ōna ringaringa ki runga i te tihi o te maunga, ā, ka karanga ake anō ki te Ariki, e mea ana:

2 E te Ariki, nāu nei i mea mai e tika ana kia karapotia mātou e ngā waipuke. Nana ināianei, E te Ariki, kia kaua e riri ki tāu pononga nā tōna ngoikoretanga i tō aroaro; nā te mea e mōhio ana mātou he tapu koe, ā, e noho ana i ngā rangi, ā, he mea hē mātou i tō aroaro; kua huri ō mātou āhua kia kino tonu he mea nā te takanga; hei aha koa, E te Ariki, kua homai e koe tētahi whakahaunga e mea ana me karanga ake mātou ki a koe, kia whiwhi mātou i a koe e rite ana ki ō mātou hiahia.

3 Nana, E te Ariki, kua pākia mātou e koe mō tō mātou hē, ā, kua āia atu mātou, ā, kua noho mātou i roto i te koraha mō ēnei tau maha; hei aha koa, kua arohaina mātou e koe. E te Ariki, tirohia iho au i runga i te aroha, ā, tahuritia atu tō riri i tēnei tō iwi, ā, kaua rā e tukua kia whakawhiti atu rātou i ngā rire hikareia i roto i te pōuritanga; engari tirohia ēnei mea kua whakarewaina iho e au i te kohatu.

4 Ā, e mōhio ana ahau, E te Ariki, kei a koe te kaha katoa, ā, e taea ana tāu e pai ai mō te oranga o te tangata; nō reira whakapāngia mai ēnei kohatu, E te Ariki, ki tōu matikara, ā, whakaritea ērā kia tīahoaho atu i roto i te pōuritanga; ā, ka tīahoaho atu ērā ki a mātou i roto i ngā kaipuke kua whakaritea nei e mātou, kia whai māramatanga mātou i a mātou e whakawhiti atu ana i te moana.

5 Nana, E te Ariki, e taea ana e koe tēnei te mahi. E mōhio ana mātou e taea ana e koe te whakakite atu i te kaha nui, he mea iti ki tō te tangata māramatanga.

6 Ā, i pahawa ake, nā, i te kōrerotanga ake o te teina a Iarere i ēnei kupu, nana, ka torona atu e te Ariki tōna ringa, ā, ka pā takitahi iho ki ngā kohatu ki tōna matikara. Ā, ka hīkina ake te ārai i ngā karu o te teina a Iarere, ā, ka kite ia i te matikara o te Ariki; ā, i rite ki tō te tangata matikara, he rite ki te kikokiko me te toto; ā, ka hinga iho te teina a Iarere i te aroaro o te Ariki, nā te mea kua pākia ia ki te wehi.

7 Ā, ka kite te Ariki kua hinga iho te teina a Iarere ki te whenua; ā, ka kī atu te Ariki ki a ia: E mātika ake, he aha koe i hinga iho ai?

8 Ā, ka kī atu ia ki te Ariki: I kite au i te matikara o te Ariki, ā, i wehi au kei pākia iho au; nā te mea kāore au i te mōhio he kikokiko, he toto tō te Ariki.

9 Ā, ka kī atu te Ariki ki a ia: Nā tō whakapono kua kite koe, nā, ka tangohia ake ki runga ki ahau te kikokiko me te toto; ā, kāore anō te tangata kia haere mai ki mua i ahau i runga i te whakapono nui pēnei i a koe; nā te mea me i kore i pēnā kua kore i taea e koe te kite i tōku matikara. I nui atu rānei tāu i kite ai?

10 Ā, ka whakautu ia: Kāo; e te Ariki, whakakite mai koe i a koe anō ki ahau.

11 Ā, ka kī atu te Ariki ki a ia: E whakapono ana rānei koe ki ngā kupu e kōrerotia ai e au?

12 Ā, ka whakautu ia: Āe rā, e te Ariki, e mōhio ana au kei te kōrero pono koe, nā te mea he Atua pono koe, kāore e taea ana e koe te kōrero teka.

13 Ā, i tana kōrerotanga i ēnei kupu, nana, ka whakakite atu te Ariki i a ia anō ki a ia, ā, ka mea: Kua hokona mai koe i te takanga nā te mea kei te mōhio koe ki ēnei mea; nō reira kua whakahokia mai koe ki tōku aroaro; nō reira au whakakite atu ai i ahau anō ki a koe.

14 Nana, ko au anō tērā i whakaritea ai i te orokohanganga rā o te ao ki te hoko i tōku iwi. Nana, Ko au a Ihu Karaiti. Ko au te Matua me te Tama. Ka whaioranga ngā tāngata katoa i ahau, ā, ki te taha mau tonu, ka meinga rātou te hunga e whakapono ai ki tōku ingoa hei tama, ā, hei tamāhine māku.

15 Ā, kāore anō au kia whakakite atu i a au anō ki te tangata nāku noa nei i hanga, nā te mea kāore anō te tangata kia whakapono mai pērā i a koe. E kite ana koe he mea hanga koe ki te ritenga o tōku ake āhua? Āe rā, i hangaia ngā tāngata katoa i te tīmatanga ki te ritenga o tōku ake āhua.

16 Nana, tēnei tīnana, e kitea nei e koe, koia te tīnana o tōku wairua; ā, kua hangaia e au te tangata ki te ritenga o te tīnana o tōku wairua; ā, me au nei e kitea nei e koe i roto i te wairua waihoki ka pērā anō hoki taku putanga mai ki tōku iwi i roto i te kikokiko.

17 Ināianei ā, he pērā i ahau, a Moronai, i kī ake e kore e taea e au te hanga ake i tētahi tuhinga whānui mō ēnei mea kua tuhia iho nei, nō reira kāti anō māku te kī ake, nā, i whakakite a Ihu i a ia anō ki tēnei tangata i roto i te wairua, i runga i te āhua me te ritenga o taua tīnana anō i whakakitea atu ai ia e ia anō ki ngā Nīwhai.

18 Ā, i minita atu ia ki a ia pērā i tana minitatanga atu ki ngā Nīwhai; ā, koinei katoa, kia mōhio ai tēnei tangata ko ia te Atua, nā ngā mahinga maha i whakakite atu ai te Ariki ki a ia.

19 Ā, nō te mātauranga o tēnei tangata kāore i taea te taupare atu i tana titiro ki roto i te ārai; ā, i kite ia i te matikara o Ihu, nā konei, i tana kitenga atu, ka hinga iho ia i te wehi; nā te mea i mōhio ia koia te matikara o te Ariki; ā, mutu tonu atu tōna whakapono, nā te mea i mōhio ia, kāore hoki ōna rangirua.

20 Nā reira, i a ia tēnei mātauranga tika rawa atu mō te Atua, kāore ia i taea te taupare atu i tana titiro atu ki roto i te ārai; nō reira i kite ia i a Ihu; ā, i minita atu ia ki a ia.

21 Ā, i pahawa ake, nā, ka kī ake te Ariki ki te teina a Iarere: Nana, e kore koe e tukuna kia puta atu ēnei mea kua kitea nei, ā, kua rangona e koe ki te ao, kia tae ki te wā e whakakorōria au i tōku ingoa i roto i te kikokiko; nā reira, ka pupuri ake koe ki ngā mea kua kitea nei, ā, kua rangona e koe, ā, kei noho ka whakakitea atu ki tētahi tangata.

22 Ā nana, ina haere mai koe ki ahau, māu ēnā mea e tuhituhi, ā, māu anō ēnā mea e hīri ake, kia kore ai tētahi e whakamāoritia ēnā mea; nā te mea māu ēnā mea e tuhituhi i roto i tētahi reo e kore nei e taea e rātou te pānui.

23 Ā nana, māku ēnei kohatu e rua e hoatu ki a koe, ā, māu anō ēnā e hīri tahi ake ki te taha o aua mea e tuhia ai e koe.

24 Nana rā, kua whakapōauautia e au te reo e tuhia ai e koe; nā reira ka mea au a tōna ake anō wā e pai ai ki ahau, kia whakanuia e ēnei kohatu ki ngā karu o te tangata ēnei mea e tuhia ai e koe.

25 Ā, i te kōrerotanga ake o te Ariki i ēnei kupu, ka whakakite atu ia ki te teina a Iarere ngā tangata whenua katoa i ora ai, me ngā mea anō hoki e ora ai; ā, kīhai ia i taupare atu i ēnā mea i tana tirohanga atu, tae atu pū anō ki ngā pito o te ao.

26 Nā te mea kua kōrero atu ia ki a ia i ngā wā o mua, nā, mehemea ka whakapono ia ki a ia ka taea e ia ngā mea katoa te whakakite atu ki a ia—me whakakite atu i aua mea ki a ia; nō reira kāore i taea e te Atua te kaiponu i tētahi mea i a ia, nā te mea i mōhio ia e āhei anō i te Ariki te whakakite atu i ngā mea katoa ki a ia.

27 Ā, ka kī atu te Ariki ki a ia: Tuhia ēnei mea, ā, hīria ake ērā; ā, māku e whakakite atu i tōku ake wā ki ngā tamariki a te tangata.

28 Ā, i pahawa ake, nā, ka whakahau te Ariki ki a ia kia hīria ake ngā kohatu e rua kua whiwhi nei ia, ā, kei whakakitea atu, taka noa ki te wā e whakakitea atu ai e te Ariki aua mea ki ngā tamariki a te tangata.