1 Ā, i pahawa ake, nā, i ngā rā anō o Koriatuma ngā rā o Ētere; ā, ko Koriatuma te kīngi i runga i te whenua katoa.

2 Ā, he poropiti a Ētere nā te Ariki; nā reira i puta mai a Ētere i ngā rā o Koriatuma, ā, ka tīmata tana poropiti ki te iwi, nā te mea tē taea ia te mau nā te Wairua o te Ariki i roto nei i a ia.

3 Nā te mea i karanga ake ia mai i te ata, tae noa iho ana ki te tōnga o te rā, e akiaki ana i te iwi kia whakapono ki te Atua hei mea rīpenetātanga kei whakangaromia rātou, e mea atu ana ki a rātou mā te whakapono e whakatutukihia ngā mea katoa—

4 Nā reira, ko te tangata e whakapono ana ki te Atua kua āhei te tūmanako i runga i te tūturutanga ki tētahi ao pai ake, āe rā, ki tētahi wāhi pū anō i te ringaringa matau o te Atua, he mea puta ake taua tūmanako i te whakapono, riro ana hei punga ki ngā wairua o te tangata, hei mea i a rātou kia pono kia pūmau, e hira tonu ana i runga i ngā mahi pai, e ārahina atu ana ki te whakakorōria i te Atua.

5 Ā, i pahawa ake, nā, i poropiti atu a Ētere i ngā mea whakamīharo nui ki te iwi, kīhai nei i whakaponohia e rātou, nā te mea kāore rātou i kite i aua mea.

6 Ināianei ahau, a Moronai, e hiahia ana ki te kōrero pakupaku noa e pā ana ki ēnei mea; e hiahia ana ahau kia whakakite atu ki te ao, nā, ko te whakapono koia ngā mea e tūmanakohia ana engari kāore e kitea ana; nā reira, kei totohe i te mea kāore nei koutou e kite ana, nā te mea kāore ō koutou kaiwhakaatu kia mutu rā anō te whakamātautauranga o tō koutou whakapono.

7 Nā te mea nā te whakapono i whakakite ai te Karaiti i a ia anō ki ō tātou tūpuna, whai muri iho i tana aranga ake i te mate; ā, kīhai ia i whakakite atu i a ia anō ki a rātou kia whakapono rātou i a ia; nā reira, e tika pū ana kia whakapono ētahi i a ia, nā te mea kāore ia i whakakite atu i a ia anō ki te ao.

8 Engari nā te whakapono o te tangata kua whakakite atu ia i a ia anō ki te ao, ā, kua whakakorōriatia te ingoa o te Matua, ā, kua whakaritea tētahi huarahi mā reira pea ētahi atu e pā ai ki te takoha o te rangi, kia tūmanako ai rātou ki ngā mea kāore nei i kitea noatia e rātou.

9 Nā reira, e āhei ana anō koutou te tūmanako, me te pā atu ki te takoha, ki te whakapono noa koutou.

10 Nana, he mea nā te whakapono i karangatia ai rātou te hunga onamata ki te ritenga tapu o te Atua.

11 Nā reira, nā te whakapono te ture a Mohi i homai ai. Engari kua whakaritea e te Atua he huarahi pai rawa ake i runga i te takoha o tana Tama; ā, he mea hoki nā te whakapono i tutuki ai.

12 Nā te mea ki te kore he whakapono i waenganui i ngā tamariki a te tangata kāore e taea e te Atua te mea i ngā merekara ki waenganui i a rātou; nā reira, kāore ia i whakakite atu i a ia anō kia puta tō rātou whakapono.

13 Nana, nā te whakapono o Arami rāua ko Amureke i mea kia horo iho ki te whenua.

14 Nana, nā te whakapono o Nīwhai rāua ko Rīhai i mea ai te panonitanga ki runga i ngā Rāmana, nā konā rumakina rātou ki te ahi me te Wairua Tapu.

15 Nana, nā te whakapono o Amona rātou ko ana teina i mea ai taua merekara nunui i waenganui i ngā Rāmana.

16 Āe rā, ko te hunga katoa nāna nei ngā merekara i mea, ā, nā te whakapono ērā i mea ai, ko aua hunga pū anō i mua i te Karaiti me te hunga anō hoki i muri mai.

17 Ā, he mea anō nā te whakapono i whiwhi ai ngā apataki tokotoru i te kupu whakaari kia kore ai rātou e rongo i te mate; ā, kīhai rātou i whiwhi i taua whakaari kia puta mai tō rātou whakapono.

18 Ā, kāore anō hoki tētahi i mahi merekara i tētahi wā kia puta tōmua mai tō rātou whakapono; nā reira i whakapono tuatahi rātou ki te Tama a te Atua.

19 Ā, he tokomaha ngā mea i tino kaha rawa tō rātou whakapono, i mua noa atu i te haerenga mai a te Karaiti, kīhai rātou i taea te pupuri ki waho o te ārai, engari i kite pono ō rātou karu i ngā mea i kite ai rātou i runga i tētahi karu whakapono, ā, i hari rātou.

20 Ā nana, i kite anō mātou i roto i tēnei tuhinga ko te teina a Iarere tētahi o ēnei; nā te mea i nui rawa tōna whakapono ki te Atua, nā, i te wā i toro atu te Atua i tōna matikara kīhai i taea e ia te huna atu i te tirohanga a te teina a Iarere, nā tōna kupu i kōrerotia atu ai ki a ia, ko taua kupu i whiwhi ai ia i runga i te whakapono.

21 Ā, whai muri iho i tā te teina a Iarere tirohanga atu i te matikara o te Ariki, he mea nā te whakaari i whiwhi ai te teina a Iarere i runga i te whakapono, kāore i taea e te Ariki te pupuri i te mea kotahi i tana tirohanga; nā reira i whakakitea atu e ia ngā mea katoa ki a ia, nā te mea kaore tonu ia i taea te pupuri ki waho o te ārai.

22 Ā, he mea nā te whakapono i whiwhi ai ōku tūpuna i te whakaari e mea ana ka puta mai ēnei mea ki ō rātou teina ngā Tauiwi; nā reira kua whakahaua ahau e te Ariki, āe rā, e Ihu Karaiti pū anō.

23 Ā, ka kī atu au ki a ia: E te Ariki, ka whakatoi ngā Tauiwi ki ēnei mea, nā tō mātou ngoikoretanga ki te tuhituhi; nā te mea e te Ariki, nāu anō mātou i whakakaha i te taha ki te kupu, he mea nā te whakapono, engari kāore koe i whakakaha i a mātou ki te taha o te tuhituhi; nā te mea nāu anō tēnei iwi katoa i mea kia taea ai te kōrero kaha, he mea nā te Wairua Tapu i homai e koe ki a rātou;

24 Ā, nāu anō mātou i mea kia iti noa tā mātou tuhituhi, nā te pōrori o ō mātou ringaringa. Nana, kāore koe i whakakaha i a mātou ki te taha o te tuhituhi pērā i te teina a Iarere, nā te mea nāu anō ia i mea kia kaha ngā mea nāna nei i tuhi pērā i a koe, ā, taea ana te tangata e pānui ana i aua mea.

25 Nāu anō ā mātou kupu i mea kia kaha, ā, kia nui, nā konā kāore ērā e taea ana e mātou te tuhituhi; nā reira i a mātou e tuhituhi ana ka kite mātou i tō mātou ngoikoretanga, ā, ka tatutatu nā te whakanohotanga iho o ā mātou kupu; ā, e wehi ana au kei whakatoi mai ngā Tauiwi i ā mātou kupu.

26 Ā, i taku kōrerotanga ake i tēnei mea, ka kōrero mai te Ariki ki ahau, e mea ana: Ko tā te poroheahea te whakatoi, engari ka tangi rātou; ā, ka nui taku aroha mō te hunga māhaki, nā, e kore rātou e whai kaha i runga i tō koutou ngoikoretanga

27 Ā, ki te haere mai ngā tangata ki ahau māku e whakakite atu ki a rātou tō rātou ngoikoretanga. E hoatu ana e ahau te ngoikoretanga mō te tangata kia whakaiti rātou; ā, he nui tōku aroha mō ngā tāngata katoa e whakaiti i a rātou anō i tōku aroaro; nā te mea ki te whakaiti rātou i a rātou anō i tōku aroaro, me te whakapono ki ahau, kātahi au ka mea i ngā ngoikoretanga hei mea kaha ki a rātou.

28 Nana, māku e whakakite atu ki ngā Tauiwi tō rātou ngoikoretanga, ā, māku e whakakite atu ki a rātou, nā, mā te whakapono, te tūmanako me te aroha noa e kawe mai ki ahau—te mātāpuna o te tika katoa.

29 Ko au, a Moronai, kua rongo i ēnei kupu, ā, ka whakaāiotia au, ā, ka kī: E te Ariki, kia meatia tāu e tika ai, nā te mea e mōhio ana au e mahi ana koe ki ngā tamariki a te tangata e rite ana ki tō rātou whakapono.

30 Nā te mea i kī atu te teina a Iarere ki te maunga Terini, E neke—ā, ka neke ia. Ā, mehemea kāore ōna whakapono kua kore i neke; nā reira ka mahi koe i muri i te whakaponotanga a te tangata.

31 Nā te mea i pērā tāu whakakite atu i a koe anō ki āu apataki; nā te mea i muri i tā rātou whakaponotanga, me tā rātou whakahua ake i tōku ingoa, nāu anō koe i whakakite atu ki a rātou i runga i te mana nui.

32 Ā, kei te mahara anō hoki au nāu nei i kī, nā, he whare tōu kua whakaritea nei mō te tangata, āe rā, i roto i ngā whare nui o tōu Matua, nā konā pai rawa ake tā te tangata tūmanako; nā reira me tūmanako te tangata, ki te kore e kore ia e whiwhi wāhi i roto i te wāhi nāu nei i whakarite.

33 Hei āpiti anō, e mahara ana ahau ki tāu i kī ai, nā, kua aroha koe ki te ao, tae atu ki tāu whakatakotoranga iho i tōu ake oranga mō te ao, kia tīkina ake anō e koe kia whakaritea tētahi wāhi mō ngā tamariki a te tangata.

34 Ināianei ā, e mōhio ana ahau ko te aroha noa tēnei aroha i aroha nei koe ki ngā tamariki a te tangata; nā reira, ki te kore te tangata e whai aroha noa kāore e taea e rātou te rapu i taua wāhi kua whakaritea nei e koe i roto i ngā whare nui o tō Matua.

35 Nā reira, e mōhio ana au nā tēnei mea nāu nei i kī, nā, ki te kore he aroha noa ō ngā Tauiwi, he mea nā tō mātou ngoikoretanga, nā, māu rātou e whakamātautau, ā, ka murua ō rātou pūkenga, āe rā, ko ērā mea pū anō i whiwhi nei rātou, me te hoatu ki te hunga e hira ake ana ā rātou.

36 Ā, i pahawa ake, nā, ka inoi ake au ki te Ariki kia tuku atu ia i te aroha ki ngā Tauiwi, kia whai aroha noa ai rātou.

37 Ā, i pahawa ake, nā, ka kī mai te Ariki ki ahau: Hei aha māku ki te kore ō rātou aroha noa, kua ū tonu koe; nā reira, ka whakamākia ō kākahu. Ā, ka whakakahangia koe i te mea kua kite koe i tō ake ngoikoretanga, tae noa atu ki tāu nohotanga iho i te wāhi kua whakaritea nei e ahau i roto i ngā whare nui o tōku Matua.

38 Ināianei ahau, a Moronai, e poroporoaki atu ki ngā Tauiwi, āe rā, ki ōku huānga anō hoki e arohaina nei e au, kia tutaki anō tātou i te aroaro o te nohoanga-whakawā o te Karaiti, i reira mōhio ai ngā tāngata katoa kāore e pokea ana ōku kākahu ki ō koutou toto.

39 Kātahi koutou ka mōhio kua kite au i a Ihu, ā, kua kōrero mai ia kanohi ki te kanohi ki ahau, ā, i kī mai ia ki ahau i runga i te whakaiti mārama, e rite ana ki tētahi tangata e kōrero ana ki tētahi atu i tōku ake reo, e pā ana ki ēnei mea;

40 Ā, he torutoru noa ngā mea kua tuhia, he mea nā tōku ngoikoretanga ki te tuhituhi.

41 Ināianei ā, e hiahia ana ahau ki te akiaki i a koutou kia rapua tēnei Ihu kua tuhituhia nei e ngā poropiti me ngā āpōtoro, kia piri tahi tonu te aroha o te Atua te Matua, me te Ariki a Ihu Karaiti anō hoki, me te Wairua Tapu, koia nei e whakaatu ana mō rāua, ki a koutou mō āke tonu atu. Āmine.