1. Kua ngaa rua iora te tangata, e kua aere atu rai tetai i tona aereanga, pera rai tetai, e kua akaruke ua maira ia Niphai anake, te tu ua ra aia i rotopu ia ratou.

2. Kua aere tika atu a Niphai ki tona uaorai ngutuare, ma te akamanako i te au mea ta te Atua i akakite mai kiaia.

3. E te maaraara ua ra aia, ma te taitaia no te kino o te au tangata i te ngati Niphai, ta ratou angaanga ngaro i te poiri e ta ratou ta tangata, e ta ratou keia, e tetai au ara katoatoa, e te maaraara ua ra aia i roto i tona ngakau, e i na, kua tae maira tetai reo kiaia, na ko maria:

4. E ao tikai toou e Niphai, no te angaanga taau e rave nei, kua kite oki au i toou tu maroiroi i te akakite anga i taku tuatua taku i oronga atu kia koe no teia au tangata. E kare oki koe i mataku ia ratou, e kare i aruaru i toou uaorai ora, mari ra, kua rave i toku anoano, e kua akono i taku au akaueanga.

5. E teianei, no tei rave koe i teia ma te roiroi kore, i na, e ka akameitaki au ia koe e tuatau ua atu, e akariro au ia koe ei maroiroi i te tuatua, e te rave anga oki, i te akarongo, i te angaanga, ae, ka tupu te au mea ravarai ia koe, kia tau ki taau tuatua, no te mea, kare rava koe e pati mai kiaku, i tei kore e tau i toku nei anoano.

6. E i na, ko Niphai koe, e ko au te Atua. I na, e akakite au ia koe ki mua i te aroaro o taku nei au angela e, e mana toou ki runga i teia nei au tangata, e ka ta koe i te enua ki te onge e te maki mate, e te akapouanga kia tau ki te kino o teia au tangata nei.

7. I na, te oronga atu nei au i te mana kia koe, e ko taau e akamou i te enua nei, e e akamou katoaia ïa i te rangi, e taau e tuku i te enua ka tukuia ïa i te rangi. E ka akapera toou mana, i runga i teia nei au tangata.

8. E me karanga koe ki teianei iero, kia ngaa koe i rotopu, ka pera rai.

9. E me karanga koe ki te maunga e, e uriia mai koe ki raro ei ngai papu, ka pera rai.

10. E i na, me karanga koe, e ka papa mai te Atua i teia nei au tangata ka tupu rai te reira.

11. E teianei, te akaue atu nei au kia koe, kia aere koe e akakite ki teia nei au tangata e, te tuatua maira te Atua ngateitei, me kore kotou e tataraara, ka papa aia ia kotou, e tae ua atu ki te mate.

12. E teianei, kia oti ta te Atua tuatua anga mai i teia nei au tuatua kia Niphai, kua noo iora aia e kare atura i aere ki tona kainga, kua aere atura ki te au urupu tangata tei pueurikiriki ke i runga i te aro o te enua, e kua akamata i te akakite kia ratou i te tuatua a te Atua tei akakiteia mai kiaia, no runga i to ratou mate me kore ratou e tataraara.

13. E teianei kua akangaropoina ratou i te semeio maata ta Niphai i rave i te akakite anga i te mate o te akavanui, e kua akamarokiakia i to ratou ngakau, e kare rava i akarongo i te tuatua a te Atua.

14. No reira kua akakite atura a Niphai kia ratou i te tuatua a te Atua, i te na ko anga e, kia kore ra kotou e tataraara, te tuatua maira te Atu, ka papa aia ia kotou, e akapou takiri.

15. Kia akakite ra a Niphai i te tuatua kia ratou, kare atura ratou i akarongo mai, e kua akamaro atura i to ratou ngakau, e kua aviri mai ra iaia, e kua tamata iora kia opu iaia, e kia uri ki roto i te are tapekaanga.

16. Ina ra, tei iaia oki te mana o te Atua, kare atu nei e rauka ia ratou kia opu iaia, e kia uri ki roto i te are tapekaanga, no te mea, kua rave keia oki aia e te vaerua, e kua akaatea keia atu, mei rotopu ia ratou.

17. E i tona riro anga atu i roto i te vaerua, kua aere atu aia mei tera pupu, ki tera pupu i te akakite anga i te tuatua a te Atua, e takapini ua ake, me kore ra, kua akaunga atu aia i te reira ki rotopu i te au tangata.

18. I na, kare rava ratou e akarongo mai ki tana tuatua, i reira kua akamata te pekapeka, e te openga iora, kua ngaa ratou, e kua akamata iora ratou i te tiakoke tetai ki tetai.

19. Ko te openga oki teia o te itu ngauru ma tai o te mataiti i te tutaraanga o te au akava ki rungao i te au tangata o Niphai.