1. E i na, kia oti ta Niphai tuatua anga i teianei au tuatua, kua oro atura tetai nga tangata no rotopu ia ratou ki te nooanga akavaanga, e toko rima ratou tei oro atu e kua tuatua iora ratou uaorai, i to ratou aereanga,

2. E i na, e teianei eaa tatou e kite ei me e peroveta teia tangata, e me kua akaueia mai aia e te Atua, kia totou mai i tetai au mea umere kia tatou nei. I na, kare oki tatou e irinaki ana e, i peraia aia, kare oki tatou e irinaki ana e e peroveta aia, no reira, mei te mea e tika teia mea tana i tuatua mai no te akavanui, e kua mate rai aia, ka irinaki tatou i reira i tetai ua atu au tuatua tana i akakite mai e, e tika.

3. E kua oro viviki atura ratou, e tae atura ki te nooanga o te akavanui, e i na, kua inga te akavanui ki runga i te one, te takoto ua ra aia i roto i tona uaorai toto.

4. E teianei, kia kite ra ratou i tei tupu, kua poitirere akera ratou e kua akatopa iora ki runga i te one, no tei kore rava ratou i akarongo i te tuatua ta Niphai i tuatua mai no runga i te akavanui.

5. Ina ra, i to ratou kiteanga, kua irinaki ratou, e kua tae mai te mataku kia ratou, ko te tae pouroa mai aea te akautungaanga ta Niphai i tuatua ki runga i te au tangata, no reira kua ru akera ratou, e kua inga iora ki te one.

6. I taua taime tikai ka taiaiaʼi te akavanui, kua patiaia aia ki te matipi e tona uaorai teina, kua aere mai na roto mai i te kakau muna, e kua oro aia, e kua oro ke atura te au tavini kia akakite ki te au tangata i te akatupuanga i te rongo ta tangata i rotopu ia ratou.

7. E i na, kua akaputuputu maira te au tangata ki te nooanga o te akavanui, e i na, i to ratou poitirere maata, kua kite ratou i teia nga tangata toko rima i te takoto ua anga ki runga i te one.

8. E teianei, kare rava te tangata i kite ana i te urupu tangata tei putuputu ki te aua o Niphai, na reira kua karanga iora ratou kia ratou uaorai e, Na teia au tangata i ta i te akavanui, e na te Atua i ta ia ratou kia kore ei ratou e oro ke atu mei ia tatou nei.

9. E kua opu iora ia ratou, e kua tapeka akera ia ratou e kua uri atura ki roto i te are tapekaanga. E kua tukuia atu te tuatua akakite ki te katoatoa e kua taiaia te akavanui, e ko te aronga tei ta iaia, kua uriia ki roto i te are tapekaanga.

10. E tae akera ki tera mai ra, kua akaputuputu maira te au tangata e kua aue, e ma te akakore i te kai, no te tanumanga o te akavanui tei taiaia.

11. E pera katoa te au akava, tei noo ana ki te aua o Niphai tei akarongo ana i te au tuatua a Niphai, tei reira katoa ratou i te tanumanga.

12. E kua ui atura ratou ki te au tangata e, teiea taua toko rima ra tei tonokia mai kia akara me kua mate rai te akavanui? E kua karanga maira ratou, no runga i te toko rima ta kotou e karanga mai nei e mea tonokia mai, kare matou i kite, ina ra, e toko rima, e aronga ta tangata ko ta matou ïa i uri ki roto i te are tapeka anga.

13. Kua manako akera te au akava e, kia aratakiia mai ratou, e kua aratakiia mai ratou, e i na, ko taua toko rima rai teia tei tonokia mai, e kua uiui iora te au akava i te au mea ta ratou i kite, e kua akakite iora ratou i te au mea ta ratou i rave, i te na ko anga e:

14. Kua oro matou e kua tae mai matou ki te nooanga o te akavanui, e kia kite matou i te au mea tei tuatuaia mai e Niphai, kua poitirere rava matou e topa iora ki runga i te one e kia ara ake matou mei to matou poitirere anga, e i na, kua uriia matou ki roto i te are tapekaanga.

15. E teianei, no runga oki i te taiaanga o teia tangata nei, kare matou i kite e naai i rave i te reira, e teia ua ta matou i kite, kua oro matou, e kua tae mai mei ta kotou i inangaro, e i na, kua mate aia mei ta Niphai i tuatua.

16. E teianei, kua akamarama atura te au akava ki te au tangata tei akaapa ia Niphai, i te na ko anga e, I na oki, te kite nei matou e, ko teia Niphai, kua akatika i tetai tangata kia ta i te akavanui, e kia akakite mai oki aia kia tatou, e kia akaariu atu ia tatou kia akarongo kiaia, e kia riro mai aia ei tangata maata, tei ikiia e te Atua, e e peroveta oki.

17. E teianei, ka timata tatou i teia tangata, e nana rai e aaki mai i tona tarevake, e kia akakite mai kia tatou i te tangata tikai tei ta i te akavanui.

18. E kua tuku atura ratou i nga tangata toko rima ra, i te ra o te tanumanga. E kua patoi atura ratou i te au akava i te tuatua ta ratou i akaapa ia Niphai, e kua tupu iora te tauetonoanga i rotopu ia ratou uaorai, e kua muteki atura ratou.

19. Ina ra, kua akaue atu rai ratou, e kia tapekaia a Niphai, e kia aratakiia mai ki mua i te katoatoa, e kua tamata akera i te uiui atu i tetai au uianga, e kia mou aia ia ratou, e kia rauka ia ratou te akaapa iaia no te mate.

20. E kua na ko atu kiaia, kua kite oki koe, e koai teia tangata tei ta tangata? E teianei, ka akakite mai kia matou, e kia kitea taau ara, e kua karanga ratou e, teia te moni, e tera oki tetai, ka akaora matou ia koe, me akakite mai koe i te reira, e ma te akakite mai i te koreromotu taau i maani kiaia.

21. Ina ra, kua tuatua atura a Niphai kia ratou, E teianei au neneva, e kotou te aronga peritome koreia te ngakau, e kotou te aronga matapo, e kotou te aronga kaki marokiakia, kua kite ainei kotou e, eaa te roa i to te Atua akakoromaki ua anga ia kotou, i te rave maro ua anga kotou i te au ara?

22. E tau rava ia kotou kia akamata i te aue e kia ngunguru no te mate maata tei tiaki ua maira ia kotou i teianei, me kore kotou e tataraara.

23. I na, te karanga mai nei kotou e, kua tuatua ana maua ko tetai tangata e kia ta ia Setoroma to tatou akavanui. Ina ra, te karanga atu nei au kia kotou, e no te mea, kua akakite atu au kia kotou kia kite kotou i teia nei au mea, e ei kite oki no kotou e, kua kite au i te kino e te au mea rikarika i rotopu ia kotou na.

24. E no tei rave au i teia, no reira kua karanga kotou e kua akatika au i tetai tangata, ei rave i teia angaanga, no tei akaari au i teia akairo kia kotou, i riri mai ei kotou kiaku e kua umuumu mai oki i toku nei oraanga.

25. E teianei, ka akaari akaou atu au i tetai akairo, kia kite me ka inangaro kotou kia ta mai iaku.

26. E i na, te karanga atu nei au kia kotou, ka aere ki te te ngutuare o Seanutuma, koia oki te teina o Setoroma, ka karanga atu ei kiaia:

27. Kare ainei a Niphai, te akamea peroveta ra, tei totou i te au kino no runga i teia au tangata, i koreromotu kia koe, e kia ta koe i toou tuakana ia Setoroma.

28. E i na, ka karanga mai aia kia kotou e, kare.

29. E ka karanga atu kotou kiaia, naau rai i ta i toou tuakana?

30. Ei reira aia ka tu ei ma te mataku, e kare aia i kite e, eaa tana ka tuatua. E i na, ka patoi mai aia kia kotou e ka akamea poitirere aia, e ka akakite mai aia kia kotou e, e apa kore aia.

31. Ina ra, e akara kotou iaia, e ka kite kotou i te toto ki runga i tona kakau pu.

32. E kia kite kotou i te reira, e akapera atu kotou kiaia e, Noea mai teianei toto? Kare ainei matou i kite e, ko te toto teia o toou tuakana?

33. Ei reira aia e ruketekete ei, e ka moteteka tona mata e mei te mea ra e, ka mate aia.

34. Ei reira kotou ka karanga atu ei e, no te mataku ia koe, i ei akara anga moteteaka ia koe, i kite ei matou e kua apa koe.

35. Ei reira te mataku maata e tae mai ei ki runga iaia, ei reira aia e aaki mai ei kia kotou, e kare aia e patoi akaou, e nana rai i rave teia ta anga.

36. Ei reira katoa aia e tuatua mai ei kia kotou, e ko au ko Niphai, kare rava au i kite no runga i teia manamanata, mari ra, kua orongaia mai kiaku, e te mana o te Atua. Ei reira kotou e kite ei e, e tangata tika au, e kua tonokia mai au kia kotou e te Atua.

37. Kua aere atura ratou e kua rave mei ta Niphai i tuatua kia ratou. E i na, ko te au tuatua tana i tuatua mai, e mea tika anake te reira, i te au tuatua tana i patoi, e te au tuatua tana i aaki.

38. E kua aratakiia mai aia, kia akakite iaia uaorai e, koia te ta tangata, i reira kua tukuia atu nga tangata toko rima kia aere, e Niphai katoa.

39. Te vai ra te au tangata Niphai tei irinaki i te au tuatua a Niphai e te vai ra tetai aronga tei irinaki no te tuatua a nga toko rima, no te mea kua ariuia ratou i to ratou nooanga i roto i te are tapekaanga ra.

40. E teianei, te vai ra tetai aronga i roto i te au tangata, tei karanga e, e peroveta a Niphai.

41. E te vai ra tetai pae tei karanga e, e Atua aia, e naringa e kare aia i te Atua kare aia e kite i te au mea katoa. I na oki, kua akakite mai aia i te manako o to tatou ngakau e kua akakite mai i te au mea, i na, kua akakite mai aia i te tangata tikai tei ta i te akavanui.